E Faapei Lava o Tusitusiga Paia!
E alala le tusitala i Iuta, ISA.
Na matou manatu o loo lelei lava le gasologa o le savaliga sopo, pe ana matou le vaaia le faailo o le auala.
“Ma o le a Ou faamamaina foi avega ua tuu i o outou tauau” (Mosaea 24:14).
O le au tai sefulu tausaga e matua atatamai lava. Matou te fia iloa mea mo i matou lava.
E ta’u soo mai lava e lo’u tama ia te au e faatatau ia tusitusiga paia ia te au lava. Ia faatatau o lona uiga ua e taumafai e faaaoga mea ua e aoaoina mai tusitusiga paia i lou olaga. O lea la, pe a matou faitauina faatasi o se aiga, o nisi taimi e oso atu ai lava sau tala ao lei faamalamalamaina mai e Tama ia i matou. E pei, “Ou te iloa, Tama, ua tatau ona tatou anapopogi ma tatalo, e pei na fai mai i tusitusiga paia.”
E ataata o ia aua e masani lava ona ou mauaina le savali sao.
Ae i se tasi taimi, sa ou iloa ai o tusitusiga paia e mafai ona pei moni lava o lo’u olaga! Na tupu nei mea uma ina ua matou o i se faatasiga faaleaiga o le malaga o atofaafafa.
Sa ou tauaveina la’u lava ato faafafa lapoa ma le taga moe, ma ou te le’i tomumu. Aua, sa faapea e na o le fa maila (6.5 km) i le vaituloto. Ou te mafai ona ou au, e leai se faafitauli.
E lei faigata tele le savaliga sopo, ae sa ou fiafia e malolo ina ua mavae le lua maila (3 km). Ona matou vaaia lea o le faailo muamua o le auala sopo. Na fai mai o loo tumau lava le ono maila (9.5 km) le mamao o le vaituloto. E lei tau taua maia e lou tama ia te au faapea sa matua faaluaina le umi o le auala e pei ona matou mafaufauina muamua. Ua uma ona ou iloaina lena mea. Sa tatau la ona ia tau mai ia i matou e tau faaumiumi le faaaogaina o matou vaiinu.
O le fautuaga a lo’u tama sa taua ae sa faigata ona mulimulitai i ai. Sa lagona le vevela o le la i le aoauli, ma sa tau leai ni meapaolo i le auala Na foliga mai o le a matou le taunuu lava i le vaituloto.
Na taotao mai i tua o tamaiti laiti ia le au matutua, ae sa pito lava i luma ia taosoga matutua. Sa matou o faatasi ma ou taosoga e toatolu matou te tupulaga, ma sa matou oo i se mea e i le va.
Ina ua le mafai ona matou toe iloa atu se tasi i luma atu po o tua foi, na amata ona matou popole. Sa faalogoina le mamafa o matou atofaafafa, ma ua leai ni vai ia matou fagu vai. O le a le umi tatou te o ai?
Mulimuli ane, na matou popole tele ma ua le lavava ma filifili loa e tutu ma tatalo.
Ina ua uma le tatalo, na matou pikiina i luga a matou atofaafafa ma faaauau le savaliga.
E lei umi ae matou faalogoina le patapatatu mai o vae solofanua o loo agai mai i luga o le ala. Sa matou faatalitali ma iloa atu se alii o loo tietie i se solofanua o agai mai ia i matou.
Sa tu o ia ma tuuina mai ia i matou sina vai. Na ia faamatalaina mai o loo faanatinati atu o matou tausoga matutua i le vaituloto ma se faamama vai e pamu mai ai se vai e aumai mo i matou. Sa faalogo le tagata i le ala o matou manaomia ai se vai ma sa ia ioe e fesoasoani mai. “O i ai nisi o outou o manaomia se fesoasoani ia outou ato faafafa?” na ia fesili mai ai.
Sa ou tilotilo atu i o’u tausoga, ma sa latou ataata ia te au. Na matuai lelei lava o matou lagona!
“E tatau ona e alu e fesoasoani i isi,” o le matou tala lea i le tagata. “O loo lelei i matou.”
Ma e moni lava! O le vaega o totoe o le auala e oo i le vaituloto na foliga mai e pei o siiina e agelu a matou ato faafafa ma tuleia i matou i luma. Ina ua ou tauina i ou matua e uiga i ai mulimuli ane, na ataata Tama ao Tina na i ai loimata i ona mata.
O le vaiaso mulimuli ane, na faitau ai e lo’u aiga le Mosaea 24.Na pupula tele ou mata ao matou faitauina upu nei: “Ma o le a Ou faamāmāina foi avega ua tuu i o outou tauau, e oo ia te outou tou te le lagonaina i latou i luga o o outou tua” (fuaiupu 14).
“O le mea lena na tupu i luga o le auala,” na oso atu ai lau tala. Ou te lei manaomia le tau mafaufau e uiga i le auala e faaaoga ai lenei mau i lo’u olaga—ua uma ona faamatalaina e lenei mau lo’u olaga! Matua ofoofogia lava! Ou te le mafai ona faatali e saili isi mau na pei o lo’u olaga.
Ma o le ala lena na ou iloa ai e mafai ona ou faatatauina tusitusiga paia ia te au, ma e mafai foi ona ou faatatauina au i tusitusiga paia!
Ata na tusia e Scott Peck