Mata e tatau ona ave se misiona a alii talavou i le taimi lava e atoa ai le 18 tausaga? Ma o sili atu ea ona uunaia malosi ia tamaitai talavou e ave se misiona i le taimi nei lea ua mafai ai ona latou o i le 19 tausaga?
Ina ua fofogaina mai e Peresitene Thomas S. Monson le suiga o tausaga e agavaa ai mo le galuega faafaifeautalai, sa ia saunoa mai, “Ou te le o faapea atu o alii talavou uma o le a—pe ua tatau—ona auauna atu i le vave lena. Ae, e faalagolago lava i tulaga o tagata taitoatasi, faapea foi ona faalagolago i le naunautaiga o taitai perisitua, ae ua i ai nei le avanoa lena.”1 Mafaufau i lou soifua maloloina faaletino ma faalelagona, sauniuniga mo mea tautupe, ma le sauniuniga faaleagaga. E mafai ona e talanoa ma matua ma taitai perisitua e uiga i nei mea pe a filifili po o le a le taimi sao e auauna atu ai.
E faatatau i tamaitai talavou, na saunoa mai ai Peresitene Monson, “Tamaitai Talavou … e le o noatia … i lalo o le poloaiga lea e tasi e auauna atu e pei o alii talavou. Peitai, matou te faamautinoa atu o tuafafine talavou o le Ekalesia, ua latou faia se saofaga taua i le avea ai o ni faifeautalai, ma e matou te taliaina foi la latou auaunaga.”2