Mo Le Malosi o le Autalavou
Ou Te Manatua Pea o Ia
O le ala tatou te tausia ai le aso Sapati ia paia o se faailoaga i fafo o la tatou feagaiga e manatua pea Iesu Keriso.
Ata na tusia e Ben Sowards
Ou te manatua, i le avea ma se tagata e 11 tausaga, o le taitai faaaloalo atu e lo’u epikopo i totonu o le falesa o le matou falelotu fou a le uarota, lea sa ma nonofo faatasi ai i luma o le laulau faamanatuga. Sa fai mai o ia, “E te iloa, Larry, e le o toe mamao ae faauuina oe i le tofi o le tiakono i le Perisitua Arona. Mata e te iloaina o se faamanuiaga ma se tiute faapitoa lena mea?” Na ia tau mai ia te au o le a ou maua se tiutetauave paia e galue ai e pei ona faia e le Faaola i le tuuina atu o faatusa paia o le faamanatuga ia i latou i la tatou aulotu. Sa lofituina au i le tele naua o le valaauga o le perisitua o le a ou mauaina.
Na talosaga mai lo’u epikopo ina ia ou taulotoina ia tatalo e lua o le faamanatuga ma mafaufau pe faapefea ona fetaui i lo’u olaga. Sa ia fai mai e tatau ona ou taumafai e faia mea o loo fai mai ai ia tatalo o le faamanatuga ia i tatou taitoatsi e fai pe afai ou te galue ai mo le Faaola i le tuuina atu o le faamanatuga i isi. Ina ua ou toe foi i le fale, sa fesoasoani lou tama ia te au e sue ia tatalo o le faamanatuga i tusi uma e lua o le Mataupu Faavae ma Feagaiga (20:76–79) ma le Tusi a Mamona (Moronae 4; 5). Sa ou faitau i ai ma le faaeteete mo le taimi muamua i lo’u olaga. Sa ou faalogo ma le totoa a o tuuina mai i le lotu. Sa ou mafaufau loloto i upu a o tufa le falaoa, ae na foliga mai o le aafiaga atoa o le feagaiga o le faamanatuga na amata ona manino mai ina ua ou faalogo i upu nei i le faamanuiaga o le vai: “latou te manatua pea o ia.” Sa ou fesili ia te au lava ia, “Mata o ou manatua pea o Ia? O le a le uiga o le upu pea? E mafai faapefea ona ou manatua pea o Ia?” O taimi uma lava ou te faalogo ai i na tatalo o le faamanatuga paia ou te lagona le ootia i le toe mafaufau ai i nei lava fesili e tasi.
O le ala o tatou tausia ai le aso Sapati ia paia o se faailoaga i fafo o la tatou feagaiga ma le Tama Faalelagi e manatua pea Iesu Keriso. O le aso Sapati e tatau ona avea ma faavae mo lo tatou manatuaina o Ia mo le isi ono aso o le vaiaso.
O le Aso Sa o se aso e faifai lemu ai, malolo, ma manatua ai. Tatou te auai atu ia tatou sauniga Lotu; mafaufau ai i o tatou malosiaga, faamanuiaga, ma pona; saili le faamagaloga; aai ma feinu i le faamanatuga; ma mafaufau loloto i puapuaga o le Faaola mo i tatou. Tatou te taumafai e aua nei faatosinaina i tatou e soo se mea o le a taofia ai i tatou mai le tapuai atu ia te Ia, “i le aso lenei,” e pei ona fetalai mai le Alii, “aua nei e faia ai se isi lava mea” (MF&F 59:13). Soo se gaoioiga tatou te faatinoina i le taimi o le Sapati e tatau ona ogatusa ma le agaga o le manatuaina o Keriso. Afai o soo se mea o loo tatou faia i soo se vaega o le Sapati e aveese ai i tatou mai le manatuaina o le Faaola ma auauna atu i le Sapati e pei ona Ia auauna atu, atonu la e tatau ona tatou toe mafaufau i mea o loo tatou faia. Ia manatua, o le aso Sapati o se aso ua tofia e le nao le “malolo ai mai au galuega” ae ia “avatu ai au tapuaiga i le Silisili Ese” (MF&F 59:10).
E tatau ona tatou fuafua o tatou olaga i se auala o le a leai ai se alofaga mo le aveesea mai o le paia o soo se vaega o le aso o le Alii. O se aso e tatau ai ona faia Lana pisinisi, o se aso lea o le a faamanuia ai ma toe faafouina ai o tatou olaga atoa e ala i aafiaga paia a le tagata lava ia ma o tatou aiga. O se aso mo le faatamaoaigaina o o tatou agaga.
Faaalu sina taimi o le asō e fatuai ai se fuafuaga manatunatu lelei o mea o le a e faia e avea moni ai le aso Sapati o se aso paia ma mamalu i lou olaga. Ona faatinoina lea o lau fuafuaga.
Ia manatua le folafolaga matagofie a le Alii ia i latou o e ua faamamaluina ma le tatau le Sapati: “Ma o le tulaga e oo i ai la outou faia o nei mea ma le faafetai, ma loto ma mata fiafia, … e a outou le atoatoa o le lalolagi” (MF&F 59:15–16). Mata tatou te gafatia le aveesea mai o nei faamanuiaga i o tatou olaga ma olaga o tagata o o tatou aiga?
Ou te talitonu i le faamamaluina o le aso Sapati. Ou te molimau atu ma le lototoa ma le lotomaualalo o le tausia o le aso Sapati o se poloaiga a lo tatou Atua, o loo soifua ma e alofa ia i tatou taitoatasi. Ou te molimau atu afai o le a tatou mulimuli ma ola ai i le tiute paia o le tausia o le aso Sapati ia paia, o le a faamanuiaina i tatou e le Alii, taitaiina i tatou, ma musuia i tatou i le foiaina o faafitauli e faafetaiaia i tatou.