O le a se mea e mafai ona ou faia pe afai ua uunaia malosi au e solia ia tulaga faatonuina o le Ekalesia e isi talavou o e o ni tagata toaaga foi o le Ekalesia? Ou te le fia foliga o se tagata fia-amiotonu po o le faamasinosino.
Ia maua le lototele e tu atu mo tulaga faatonuina o le Ekalesia, e tusa lava pe o le uunaiga e sau mai isi talavou o le Au Paia o Aso e Gata Ai o e malamalama i tulaga faatonuina ma atonu foi o manatu o e fia amiotonu. O fea o mea nei e sili atu le lamatia: o le le usitai i poloaiga a le Alii po o le faafoliga o se tagata lelei i nisi o lau tupulaga? (Ia, afai o latou uunaia malosi oe e faia se mea e te lagonaina patino le le toafilemu pe ua solia ai se tulaga faatonuina na setiina e lou aiga nai lo le Ekalesia, e mafai lava ona e tu atu mo oe lava ia e ala i lou faapea atu, ua e filifili e aua le faia ma talosagaina i latou e faaaloalo i ou lagona.)
E moni, e tatau ona e taumafai e taulimaina ma le faaeteete le mea na tupu. E pei ona tau atu e le perofeta o Alema i lona atalii faifeautalai o Sepulona, “Faaaoga le lotoa, ae le o le faafiamalosi” (Alema 38:12). E le tatau ona i ai se tuuaiga saua po o se uiga faamaualuga. E mafai lava le na o lou faailoa atu i tagata ou tulaga faatonuina ia ua e filifili e ola ai. Ma afai ua talosagaina oe e tagata o toaaga mai o le Ekalesia e solia ni tulaga faatonuina a le Ekalesia ua manino lelei, ia manatua le saunoaga a Peresitene Dieter F. Uchtdorf, Fesoasoani Lua i le Au Peresitene Sili: “Ia avea oe o se uo i tagata uma, ae aua lava nei fetuutuunaia ou tulaga faatonuina.”1