O Mai ia Keriso

Saunia e le Au Peresitene Aoao o Alii Talavou

Alii talavou o le Perisitua Arona, o la tatou autu o le Mutuale i lenei tausaga e musuia ai oe e mafaufau e uiga i la oulua sootaga ma Iesu Keriso, lo tatou Faaola ma le Togiola, ma auala e mafai ona avea ai faapei o Ia. O le tatou autu o le “O mai ia Keriso, ma faaatoatoaina ia te ia, ma faafiti outou lava mai mea uma e le faaleatua” (Moroniae 10:32).

O se valaaulia paia lenei e faalatalata atili atu ai i le Alo o le Atua. Ona o Lana Togiola, e mafai ona tatou maua le mana e auauna atu ai, e faafiti i tatou lava mai mea e lē faaleatua i o tatou olaga, ma ia lagona Lona alofa e le iu. A o tatou faia faapea, o le a tatou maua le filemu moni ma le fiafia.

A o e galue i le valaaulia e o mai ia Keriso, o le a oo ina ia e malamalama i lou tiute paia o le “valaau atu i tagata uma ia o mai ia Keriso” (MF&F 20:59). O le a faatumuina o outou loto ma se naunautaiga e taitai ai isi ia te Ia ina ia latou maua le faamanuiaga lava e tasi na e mauaina ma faaauau pea ona maua.

Sa faataunuuina e se tasi alii talavou, o Mikaele, lenei tiute e ala i le fesoasoani atu ia Jose, o se uo mai le aoga.

I se tasi aso, na fesili atu ai Jose ia te ia, “Mikaele, aisea e te fiafia ai lava oe i taimi uma?”

Na fai mai Mikaele, “Ona o loo ou auauna atu.”

“Aisea e te auauna atu ai?”

“Ona o loo ou umia le perisitua ma o lo’u tiute lea,” na tali atu ai.

Na fai mai Jose, “Ou te fia iloa atili e uiga i le perisitua.”

Sa valaaulia e Mikaele Jose i gaoioiga a le Ekalesia ma mulimuli ane i sauniga a le Ekalesia. Na iu lava ina aoaoina Jose ma lona aiga e faifeautalai ma na papatisoina ai. Na fai mai Jose, “O le galuega faafaifeautalai o le faavae lea o la tatou Ekalesia. Afai tatou te faamaoni ma amiotonu i a tatou fegalegaleaiga i aso taitasi, o le a matauina e i latou o siomiaina i tatou ma o le a latou fesiligia i tatou e pei ona ou faia. O Mikaele o se ipu i le fuafuaga sili a le Atua.”

Ao e faalatalata atili atu i le Alii, o le a e maua se manao e auauna atu i isi e pei ona faia e Mikaele. Ma ao outou faia, o le a e iloaina le moni o lenei folafolaga mai Peresitene Henry B. Eyring, Fesoasoani Muamua i le Au Peresitene Sili: “A tuuina atu lou loto e valaaulia tagata e o mai ia Keriso, o le a suia lou loto. O le a e faia Lana galuega mo Ia. O le a e iloaina ai o loo tausia pea e Ia lana folafolaga e i ai faatasi ma oe i lau auaunaga. O le a e iloa ai o Ia. Ma i se taimi o le a avea oe e pei o Ia ma ‘faaatoatoaina outou e Ia.’”²

O le fatu lena o le autu o le tausaga lenei.