“Lesona 72—Fotopampianarana sy Fanekempihavanana 58:38–60: -Izay efa nibebaka … no voavela,-” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 58:38–60,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 72: Fotopampianarana sy Fanekempihavanana 58–59
Fotopampianarana sy Fanekempihavanana 58:38–60
“Izay efa nibebaka … no voavela”
Na dia ireo mpianatr’i Jesoa Kristy mahatoky indrindra aza dia mila fibebahana sy famelan-keloka. Ao amin’ny Fotopampianarana sy Fanekempihavanana 58, dia nanasa mpitarika maromaro tao amin’ny Fiangonany i Jesoa Kristy mba hibebaka ary nampanantena ny hamela ny fahotany raha toa ka mankatò izy ireo. Ny tanjon’ity lesona ity dia ny hanampy ireo mpianatra hahatsapa fanantenana fa ny Mpamonjy dia mamela ireo izay mibebaka amin’ny fahotany.
Sahanasa fianarana azo atao
Maratra
Hevero ny hanomboka ny fampianarana amin’ny alalan’ny famoronana fifanakalozan-kevitra mikasika ny ilantsika ny famelan’i Jesoa Kristy ny fahotantsika.
Ny fomba iray hanaovana izany dia ny mampiseho ity sary manaraka ity na manao sary tsotra kely mampiseho zatovo iray eny amin’ny solaitrabe. Mba hisian’ny fahalianana, dia azonao atao ny manasa ny iray kilasy hanome anarana azy sy hamolavola antsipiriany momba ny fiainany alohan’ny hizarana izao toe-javatra manaraka izao.
Alaivo sary an-tsaina hoe nilaza taminao ny namanao fa nianjera avy teny amin’ny vato misolampy izy omaly alina. Mahatsapa fanaintainana be izy rehefa miaina ary mieritreritra fa tapaka ny sandriny. Nanapa-kevitra ny tsy hijery dokotera izy satria manahy sao ho diso fanantenana ilay dokotera sy ny olon-kafa raha mahafantatra fa nisafidy ny hanatona teo akaikin’io vato misolampy mampidi-doza io izy. Noho izany dia mikasa ny hitazona ny fanaintainany ho tsiambaratelo izy, ary manantena fa ho sitrana ny zava-drehetra rehefa mandeha ny fotoana.
-
Inona no tsapanao mikasika ny fikasan’ny namanao? Nahoana?
Alaivo sary an-tsaina ny toe-javatra mitovy amin’izany, fa tamin’ity indray mitoraka ity ny namanao dia nilaza taminao fa nanao fahotana goavana izy. Raha tokony hanaraka ny fampianaran’ny Mpamonjy momba ny fibebahana izy, dia nanapa-kevitra ny hanafina ny fahotany ary manantena fa hilamina ny zava-drehetra rehefa mandeha ny fotoana.
Asao ny mpianatra hizara fanontaniana na ahiahy maro samihafa izay mety hitarika ny zatovo tsy hibebaka.
-
Inona no torohevitra homenao an’ilay namanao?
Mampianatra momba ny fibebahana ny Mpamonjy
Hazavao fa tamin’ny taona 1831, dia nandeha nankany Missouri i Joseph Smith sy ireo loholona hafa, izay toerana nandidian’ny Tompo ny sasany tamin’izy ireo mba hijanonana sy hanorenana ny tanànan’i Ziona. Ao anatin’ny torolalan’ny Tompo dia nanoro hevitra ny sasany tamin’izy ireo Izy mba hibebaka amin’ny fahadisoan’izy ireo (jereo ny Fotopampianarana sy Fanekempihavanana 58:14–15, 38–41, 60).
Vakio ny Fotopampianarana sy Fanekempihavanana 58:60 mba hahitana ny torohevitry ny Tompo ho an’ny lehilahy iray antsoina hoe Ziba Peterson.
-
Inona araka ny eritreritrao no tsy fahazoan-kevitra mety ho nananan’i Ziba momba an’ Andriamanitra na mikasika ny fibebahana izay mety ho nahatonga azy hanafina ny fahotany? (Azonao atao ny mamaky ny torohevitr’i Almà ho an’ny zanany lahy momba ny vokatry ny fiezahana hanafina ny fahotantsika. Jereo ny Almà 39:7–9.)
-
Iza amin’ireo tsy fahazoan-kevitra ireo no heverinao fa mbola miteraka olana amin’izao fotoana izao?
Hevero ny hampiseho ity hafatra manaraka ity, ary omeo fotoana ny mpianatra hisaintsainana manokana na hanoratana ny eritreriny.
Avy eo dia asao izy ireo hikaroka ireo fampianarana mandritra ny lesona, izay afaka manampy azy ireo amin’ny ezaka ataony mandritra ny androm-piainany mba hibebaka.
Manontania tena raha toa ka misy fahotana izay nampisalasala anao ny hibebaka momba azy. Raha izany no izy, dia eritrereto hoe nahoana ianao no miahotra.
Fanontaniana sy valiny
Rehefa mandalina ity andinin-tsoratra masina manaraka ity ny mpianatra, dia azonao atao ny mampahatsiahy azy ireo fanontaniana na ahiahy manokana momba ny fibebahana izay nozarainy tany am-piandohan’ny lesona.
Vakio ny Fotopampianarana sy Fanekempihavanana 58:42–43 mba hitadiavana ireo fampianaran’ny Mpamonjy izay manampy amin’ny famaliana ireo fanontaniana sy ahiahy mety hananan’ny olona sasany momba ny fibebahana.
Ny Fotopampianarana sy Fanekempihavanana 58:42–43 dia andinin-tsoratra masina fifehezana fotopampianarana. Hevero ny hanasa ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora amin’izy ireo ny mahita ny toerana misy izany.
Zarazarao ho ao anaty vondrona kely ny mpianatra. Asao izy ireo hizara andian-teny avy amin’ny andininy 42–43 izay manampy azy ireo hamaly fanontaniana na ahiahy manokana na izay nanan-danja tamin’izy ireo. Asao avy eo ireo vondrona mba hizara amin’ny iray kilasy ny zavatra nianarany. Rehefa mizara ny mpianatra, dia ataovy azo antoka fa takatr’izy ireo hoe raha mibebaka amin’ny fahotantsika isika, dia hamela antsika ny Tompo sy ny hoe mba hibebahana dia takin’ny Tompo isika hibaboka sy hiala amin’ny fahotantsika.
-
Ahoana no ahafahan’ireo fahamarinana ireo manampy amin’ny ahiahy mety hananan’ny olona momba ny fibebahana?
Raha toa ka manana fanontaniana mikasika ny fibebahana izay tsy valian’ireo andininy ireo ny mpianatra, dia diniho raha tsara kokoa ny manampy azy ireo hahita valiny ao anatin’ity lesona ity, mandritra ny lesona ho avy, na amin’ny alalan’ny fanolorana loharanom-pahalalana nofidin’ Andriamanitra izay ahafahan’izy ireo mikaroka valiny samirery.
(Fanamarihana: Misy fehezan-teny izay afaka manampy ao amin’ny fizarana “Loharanom-pitaovana fanampiny” raha toa ka manana fanontaniana mikasika ireo foto-kevitra manokana ao amin’io andinin-tsoratra masina fifehezana fotopampianarana io ny mpianatra, toy ny fibabohana na ny fialana amin’ny fahotana.)
Mamela heloka ny Tompo
Ity fizarana ity dia natao hanampiana ireo mpianatra hahatsapa fanantenana fa ny Mpamonjy dia mamela ireo izay mibebaka. Fantaro ombam-bavaka hoe iza amin’ireo loharano sy sosokevitra no tena hanampy ny mpianatrao amin’ny fanomanana amim-pahombiazana ny valintenin’izy ireo amin’ity asa atao manaraka ity.
Manomàna valiny azonao zaraina amin’ny olona iray izay manahy ny tsy hahazo famelan-keloka, ao amin’ny diary fandalinanao. Inona no azonao zaraina momba ny toetran’ny Mpamonjy sy ireo fampanantenany izay afaka manampy io olona io handresy ny ahiahiny rehetra? Misafidiana sasantsasany amin’ireto safidy manaraka ireto mba hanampiana anao hanomana ny valinteninao:
-
Soratra Masina: Tadiavo ao amin’ny soratra masina ireo andinin-tsoratra masina mirakitra ny fampanantenan’ny Tompo ho an’ireo izay mibebaka na ireo tantara izay mampiseho ny fahavononany hamela heloka. Ny lisitr’ireo andinin-tsoratra masina fifehezana fotopampianarana ao amin’ny Tahirin-kevitra fototra ho an’ny fifehezana fotopampianarana (2023) dia mety hanampy. Mety ho azonao heverina ny hampifanaraka na hampifandray ny sasany amin’ireo andinin-tsoratra masina ireo amin’ny Fotopampianarana sy Fanekempihavanana 58:42–43.
-
Porofo manokana: Mieritrereta ohatra izay nanatrehanao maso ny fahavononan’ny Mpamonjy hamela heloka sy hanampy olona iray hiova. (Aza mizara anarana na antsipiriany momba ny fahotana.)
-
Ny fizarana “Hanampy anao Jesoa Kristy” ao amin’ny Ho zatovo mahery: Torolalana amin’ny fanaovana safidy ([2022], 6–9): Mitadiava fahamarinana momba ny Ray any An-danitra sy momba an’i Jesoa Kristy izay manome fanantenana antsika.
-
Mpaminany maoderina: Mitadiava fanambarana avy amin’ireo mpitarika maoderina ao amin’ny Fiangonana izay manampy antsika hahatakatra ny toetran’i Jesoa Kristy mamela heloka.
Ity manaraka ity dia ohatra iray avy amin’ny Loholona Dieter F. Uchtdorf ao amin’ny Kôlejin’ny Apôstôly Roambinifolo izay azonao safidina mba hozaraina amin’ireo mpianatrao:
I Jesoa Kristy no maha zatovo mahery
Mampianatra ny Loholona Uchtdorf fa i Jesoa Kristy no mpitarika tsara indrindra amin’ny fandraisana fanapahan-kevitra. Mampahafantatra ny boky torolalana Ho zatovo mahery! vaovao ihany koa izy.
Ry tanora namako malala, raha teto izao ny Mpamonjy, dia inona no holazainy aminareo? …
… Mety hahatsiaro ireo fahadisoana nataonao ianao, ireo fotoana izay nanekenao ho resin’ny fakam-panahy, ireo zavatra nirinao raha mba tsy natao—na ireo izay nirinao raha nataonao tsaratsara kokoa.
Ho tsapan’ny Mpamonjy izany, ary mino aho fa hanome toky anao Izy amin’ny teny izay efa nolazainy ao amin’ny soratra masina manao hoe:
“Aza matahotra” [Lioka 5:10].
“Aza miroanàhana” [Fotopampianarana sy Fanekempihavanana 6:36].
“Matokia” [Matio 14:27].
“Aoka tsy hitebiteby ny fonareo” [Jaona 14:1, 27].
Heveriko fa tsy hanao fialan-tsiny noho ireo fahadisoana nataonao Izy. Tsy hanamaivana izany Izy. Tsia, hangataka anao Izy hibebaka—hiala amin’ny fahotanao, sy hiova, mba hahafahany mamela heloka anao. Hampahatsiahy anao Izy fa 2.000 taona lasa izay dia nentiny teo Aminy ireo fahotana ireo mba hahafahanao mibebaka. Izany dia ampahany amin’ilay drafitry ny fahasambarana izay nomena antsika avy amin’ilay Raintsika any An-danitra be fitiavana. (Dieter F. Uchtdorf, “I Jesoa Kristy no maha zatovo mahery,” Liahona, nôv. 2022, 9)
Rehefa avy nomena fotoana ampy hanomanana ny valinteniny ireo mpianatra, dia asao izy ireo hizara ny zavatra nianarany ao anaty vondrona kely mba hahafahan’izay rehetra maniry ny hizara hanao izany.
Azonao atao ny mampiseho ny horonan-tsary hoe “Manam-piniavana hamela heloka ny Mpamonjy” (5:50), izay hita ao amin’ny ChurchofJesusChrist.org, ho ohatra iray amin’ny fanirian’ny Mpamonjy tsy tapaka hamela heloka.
Farano amin’ny fijoroanao ho vavolombelona momba ny toetra mamela heloka ananan’ny Mpamonjy ny fotoam-pianarana, ary amporisiho ny mpianatra hibebaka amim-pinoana ny fampanantenany.
The Savior Wants to Forgive
A former addict and repeat convict shares his experiences with the Savior’s ability and willingness to forgive him again and again, even when he felt undeserving.
Manao tsianjery
Azonao atao ny manampy ireo mpianatra hitadidy ilay andinin-tsoratra masina fifehezana fotopampianarana sy ilay andian-teny manan-danja ao amin’ny soratra masina nandritra ity lesona ity, ary avereno jerena izany mandritra ireo lesona hafa any aoriana any. Ilay andian-teny manan-danja ao anatin’ny soratra masina dia ny hoe “Izay efa nibebaka tamin’ny fahotany, dia izy no voavela.” Ireo hevitra ho an’ny asa fanaovana tsianjery dia ao amin’ny tovana eo ambanin’ilay hoe “Sahanasa famerenana ny fifehezana fotopampianarana.”