“Lesona 73—Fotopampianarana sy Fanekempihavanana 59: Andron’ny Tompo,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 59,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 73: Fotopampianarana sy Fanekempihavanana 58–59
Fotopampianarana sy Fanekempihavanana 59
Ny Andron’ny Tompo
Tamin’ny 1831 dia niantso Olomasina sasantsasany ny Tompo mba hifindra any amin’ny Fivondronan’i Jackson, Missouri, mba hanorina an’i Ziona. Raha niaraka tamin’ireo Olomasina ireo ny Mpaminany Joseph Smith dia nahazo torolalana avy amin’ny Tompo mikasika ny fomba hihazonana ny andro Sabata ho masina. Ity lesona ity dia afaka manampy ireo mpianatra hanaja ny Tompo amin’ny alalan’ny fisafidianana ny hitandrina ny andro Sabata ho masina.
Sahanasa fianarana azo atao
Fanapahan-kevitra momba ny andro Sabata
Ampio ny mpianatra hieritreritra ny sasany amin’ireo fitahiana sy fanamby avy amin’ny fankatoavana ny didy hitandrina ny andro Sabata ho masina. Azonao atao ny mampiasa ity zavatra niainana manaraka nozaraina nandritra ny fihaonamben’ny Fiangonana maneran-tany ity. Ny fieritreretana ny toe-javatra iainan’ny olon-kafa dia afaka manampy amin’ny fanomanana ireo mpianatra handinika ny eritreriny sy ny zavatra tsapany ary ny andraikitra raisiny manokana.
Nizara ity zavatra niainana manaraka ity ny Loholona Larry Y. Wilson ao amin’ny Fitopololahy:
Ny zanakay vavy, Mary, dia mpilalao baolina kitra malaza tamin’ny mbola zatovo. Indray taona ny ekipany dia tonga tany amin’ny lalao famaranana, saingy ny tsy nampoizina dia ho tanterahina andro Alahady izany lalao izany. Amin’ ny maha-zatovo azy, dia an-taonany maro no nampianarana an’i Mary fa ny andro Sabata dia natao ho andro fitsaharana sy fanavaozana ny hery ara-panahy, fa tsy andro hialana voly. Kanefa dia mbola nahatsapa fanerena avy tamin’ny mpanazatra sy ny ekipany ny hilalaovany izy ary koa ny faniriany tsy hamela ny ekipany ho resy. (Larry Y. Wilson, “Araky ny fitsipiky ny fahamarinana irery ihany,” Liahona, mey 2012, 104–5)
-
Nahoana ny olona sasany no mety mihevitra izany ho fanapahan-kevitra manan-danja eo amin’ny fiainan’i Mary, fa ny hafa kosa tsy mihevitra izany?
-
Raha ianao no Mary, inona no heverinao fa zava-dehibe hodinihina alohan’ny handraisanao an’io fanapahan-kevitra io?
Eritrereto mandritra ny fotoana fohy ireo fanapahan-kevitra raisinao momba ny andro Sabata. Inona no ataonao matetika mba hitarihana ny safidinao? Rehefa mandalina ianao androany, dia mitadiava fitaomam-panahy avy amin’ny Fanahy Masina mba hanampy anao hahafantatra ny antony hitandremana ny Sabata ho masina sy ny fomba ahafahanao manao izany.
Ny didin’ny Tompo sy ny fitahiany
Ity andiam-pehezan-teny manaraka ity dia afaka manome ny sahan-kevitra manodidina ny Fotopampianarana sy Fanekempihavanana 59.
Na dia niharatsy aza ny fahasalamany tamin’izy 55 taona, dia nandao ny tranony tany Colesville, New York, i Polly Knight, ary tapa-kevitra ny hankatò ny Tompo sy ho any Ziona. Tonga tany Ziona (Fivondronan’i Jackson, Missouri) i Polly ary maty andro vitsivitsy taty aoriana. Tamin’ny andro nandevenana azy, indray Alahady, dia nandray ny fanambarana voarakitra ao amin’ny Fotopampianarana sy Fanekempihavanana 59 ny Mpaminany Joseph Smith. Ao amin’io fanambarana io dia nampianatra fahamarinana izay afaka nampionona ny fianakavian’i Polly ny Tompo (jereo ny andininy 1–2). Niresaka momba ny didiny koa Izy, niaraka tamin’ny fanamafisana ny momba ny Sabata. Nampanantena fitahiana lehibe ho an’ireo izay manamasina ny andro Sabata ny Tompo.
Manaova tsanganana roa eny amin’ny solaitrabe miaraka amin’ny lohateny hoe Torolalana sy Fitahiana. Asao ny mpianatra handalina ireto andininy manaraka ireto ao anaty vondrona kely ary hitanisa ny zavatra hitany ao amin’ireo tsanganana eny amin’ny solaitrabe. Afaka mamorona lisitra mitovy amin’izany koa izy ireo ao amin’ny diary fandalinany.
Vakio ny Fotopampianarana sy Fanekempihavanana 59:9–20, ary manaova lisitra roa, ny lisitra iray mikasika ireo torolalana omen’ny Tompo momba ny zavatra ataontsika sy ny fihetsika asehontsika amin’ny Sabata, ary ny lisitra iray hafa momba ny fitahiana atolony antsika.
Asao ny mpianatra hizara ny zavatra nianaran’izy ireo. Ary koa, omeo fahafahana hametraka fanontaniana izay mety hananany izy ireo, ary iaraho midinika ny fanontanian’ireo mpianatra. Mety hanampy ny mpianatra ny mijery ny famaritana ireo teny sarotra rehefa ilaina izany. Ny mpianatra dia afaka mifanakalo hevitra sy mahita ny dikan’ny hoe “hanatanterahanao ny fanompoana ny Avo Indrindra” (andininy 10) sy ny hoe “hanatitra ny fanatitrao sy ny fanati-pisaoranao ho an’ny Avo Indrindra” (andininy 12). Azonao atao ny manampy amin’ny fitarihana ny fifanakalozan-kevitry ny mpianatra amin’ny fanontaniana toy ireto manaraka ireto:
-
Inona no zavatra azontsika ianarana avy amin’ireto andininy ireto momba ny tanjon’ny Sabata?
Asao ny mpianatra hizara izay fahamarinana hitany. Azonao atao ny mangataka ny mpianatra hifanakalo hevitra momba ny antony hiheveran’izy ireo fa manan-danja ireo fahamarinana hitan’izy ireo. Miaraka amin’ireo fahamarinana hafa izay zarain’ny mpianatra dia ampio ny mpianatra hamantatra sy hifanakalo hevitra fa ny Sabata dia andro iray hanehoantsika ny fanolorantenantsika ho an ’Andriamanitra. (jereo ny andininy 10).
-
Ahoana no ahafahan’ny fananana andro iray hifantohana amin’ny fitiavanao sy ny fanolorantenanao ho an ’Andriamanitra manampy anao eo amin’ny fiainanao?
Manome voninahitra ny Tompo amin’ny Sabata
Ity asa atao manaraka ity dia afaka manampy ny mpianatra hahatakatra ny fomba ahafahan’izy ireo manome voninahitra ny Tompo amin’ny alalan’ireo safidy ataony amin’ny andro Sabata. Azonao atao ny manoratra ny fanontaniana momba ny fahazoan-dalana hidirana ny tempoly etsy ambany eny amin’ny solaitrabe.
Mandritra ny dinidinika momba ny fahazoan-dalana hidirana ny tempoly, dia hanontaniana an’izao ianao:
“Moa ve ianao miezaka mitandrina ny andro Sabata ho masina any an-tokantrano sy any am-piangonana, manatrika ireo fivorianao, miomana amin’ny fanasan’ny Tompo sy mandray izany amim-pahamendrehana, ary miaina fiainana izay mifanaraka amin’ireo lalàna sy ireo didin’ny filazantsara?”
Mba hanampiana anao hieritreritra ny fomba ahafahanao mankatò ny didy hitandrina ny andro Sabata ho masina, dia soraty ao anatin’ny diary fandalinanao ireo hevitra mikasika ny fomba ahafahanao manaja ny Tompo amin’ny fitandremana ny andro Sabata ho masina.
Ireto loharano manaraka ireto dia afaka manampy ny mpianatra hamantatra fomba maro kokoa hitandremana ny Sabata ho masina ao an-tokantrano sy any am-piangonana. Hevero ny hampiseho izany azy ireo ary omeo fotoana ny mpianatra handalinana sy hanampiana ny lisitr’ireo hevitra.
Vakio ireto soratra masina manaraka ireto mba hahitana ny zavatra nataon’i Jesoa Kristy tamin’ny Sabata:
Halalino ireto loharano manaraka ireto mba hahazoana hevitra fanampiny momba ny fitandremana ny andro Sabata ho masina:
-
“Tiavo Andriamanitra, tiavo ny namanao,” ao amin’ny Ho zatovo mahery!: Torolalana amin’ny fanaovana safidy ([2022], 10–14)
-
topics.ChurchofJesusChrist.org
ChurchofJesusChrist.org
Rehefa nomena fotoana ampy handalinana ny mpianatra dia asao izy ireo mba hizara ny zavatra nianarany. Azonao atao ny manasa azy ireo hanoratra ny sasany amin’ireo zavatra hitany eny amin’ny solaitrabe. Hevero koa ny hametraka ireto fanontaniana manaraka ireto mba hanampiana ny mpianatra hizara ny zavatra niainany manokana.
-
Inona no nanampy anao haneho fanolorantena ho an’ Andriamanitra amin’ny andro Sabata? Inona no fiovana nentin’ireo fihetsika ireo ho anao?
Mety ho liana amin’ny fianarana bebe kokoa avy amin’ny zavatra niainan’i Mary izay nampahafantarina tany amin’ny fiandohan’ny lesona ireo mpianatra. Azonao atao ny manome ny mpianatra ny ambin’ilay tantara amin’ny alalan’ny fampisehoana ilay horonan-tsary “Araky ny fitsipiky ny fahamarinana irery ihany” manomboka eo amin’ny mari-potoana 5:24 hatramin’ny 6:26, ao amin’ny ChurchofJesusChrist.org.
Manaova drafitra
Hevero ny hampiseho ity fanasana manaraka ity. Azonao atao ny manasa mpianatra vitsivitsy vonona hizara ny drafiny rehefa vitany ny fanaovana izany.
Manaova drafitra ao amin’ny diary fandalinanao momba ny fomba hiezahanao hanaja ny Mpamonjy amin’ny andro Sabata. Azonao atao ny mamantatra ireo hevitra mikasika ny zavatra hatombokao na hotohizinao na hatsahatrao, na ao an-trano izany na any am-piangonana.