Lesona 71: Fotopampianarana sy Fanekempihavanana 58–59

Fotopampianarana sy Fanekempihavanana 58:26–29

“Hazoto hirotsaka amin’ny tanjona tsara”

Olomasina maro, anisan’izany ny vondrona iray avy any Colesville, New York, no vao tonga tao amin’ny Fivondronan’i Jackson, Missouri. Naniry ny hanampy ny Tompo hanorina an’i Ziona izy ireo, saingy tsy azon’izy ireo antoka hoe inona no hatao. Nanazava ny Tompo fa tokony hampiasa ny fahafahany misafidy izy ireo mba hitadiavana fomba hanampiana sy hanompoana. Ity lesona ity dia afaka manampy ireo mpianatra hahatakatra ny fomba hanarahana ny ohatra nasehon’ny Mpamonjy momba ny fandehandehanana manao soa.

Sahanasa fianarana azo atao

Andro iray teo amin’ny fiainan’i Kristy

Mialoha ny fotoam-pianarana dia soraty eny amin’ny solaitrabe ny hoe Mandehandeha manao soa izy ireo. Asao ny mpianatra tsirairay hizara ny anaran’ny olona iray izay fantany, ka mifanaraka amin’io fanoritsoritana io ny fiainany. Afaka mizara ny antony mahatonga an’io andian-teny io hampahatsiahy azy ireo an’ilay olona nosafidiny ny mpianatra vitsivitsy izay mazoto hanao izany.

Lazao ny mpianatra fa ny Asan’ny Apostoly 10 dia firaketana ny fampianaran’i Petera tao Kaisaria. Asao izy ireo hamaky ny Asan’ny Apostoly 10:38 mba hitadiavana izay anarana mety ho nosoratan’i Petera teo amin’ny solaitrabe.

Alaivo sary an-tsaina hoe ho toy ny ahoana raha teraka tamin’izao androntsika izao i Jesoa, na mpiara-monina taminao Izy, na nianatra tao amin’ny sekoly nisy anao Izy.

• Inona no zavatra azonao alaina sary an-tsaina fa ho nataony ka azo faritana hoe “[nandehandeha manao] soa”?

Mba hanampiana ny mpianatra hanana faniriana hanaraka ny ohatra nasehon’ny Mpamonjy dia omeo fotoana izy ireo hirakitra an-tsoratra ny zavatra eritreretiny mikasika ity zavatra mitarika fanehoan-kevitra manaraka ity ao amin’ny diary fandalinany.

Miezaha maka sary an-tsaina izay zavatra mety ho tsapanao raha toa ka nisy sabotsy iray niarahanao tamin’i Jesoa “nandehandeha nanao soa” nandritra ny tontolo andro. Inona no mety ho fiantraikan’izany zavatra niainana izany eo amin’ny fomba hisafidiananao ny zavatra handanianao ny fotoanao na dia amin’ny andro tsy iarahanao Aminy aza?

Misafidy ny hanao soa

Tamin’ny nandraisana ny Fotopampianarana sy Fanekempihavanana 58 dia vao tonga tao Missouri i Joseph Smith sy ireo loholon’ny Fiangonana sasantsasany. Naniry hahazo toromarika momba ny fomba hananganana ny Fiangonana sy hanorenana an’i Ziona tao amin’io faritra io izy ireo. Nampianatra azy ireo ny fomba ahafahany mampiasa ny fahafahany misafidy ny Tompo mba hanaovana ny asany.

Vakio ny Fotopampianarana sy Fanekempihavanana 58:26–29 mba hianarana ny zavatra nampianarin’ny Mpamonjy ireo Olomasina mikasika ny fampiasana ny fahafahana misafidy ananan’izy ireo. Soraty ao amin’ny fizarana tokony hisy azy ao amin’ity tabilao manaraka ity ireo teny na andian-teny izay hitanao. (Fanamarihana: Ny hoe “tsy mety” dia midika hoe tsy ilaina na tsy irina.)

Hevero ny hampiseho ity tabilao manaraka ity eny amin’ny solaitrabe na omeo tahadikan’izany ny mpianatra. Mety hanampy ny mpianatra handray anjara kokoa amin’ity sahanasa ity ny fanasana azy ireo hanao izany miaraka amina namana iray.

Fampiasana ny fahafahana misafidy ananantsika mba ho lasa …

Tahaka an’i Jesoa kokoa	Tsy tahaka an’i Jesoa kokoa

Rehefa mahavita ireo mpianatra, dia hevero ny hametraka fanontaniana izay manampy azy ireo hieritreritra sy hahatakatra ny dikan’ireo andian-teny izay hitany. Ohatra:

• Inona, araka ny eritreritrareo, no dikan’ny hoe “hazoto hirotsaka,” na mazoto mikatsaka ny hanao soa?

• Nahoana, araka ny eritreritrareo no tsy tokony “[ho]terena” hanao soa isika?

• Nahoana no zava-dehibe ny fahazotoantsika hanao soa?

Soraty ao amin’ny diary fandalinanao na ao amin’ny soratra masinao, amin’ny alalan’ny teninao manokana ny fahamarinana iray na roa izay azonao lazaina fa manan-danja amin’ny Mpamonjy avy amin’ireo andininy ireo.

Asao ireo mpianatra hizara fahamarinana izay nosoratany na hanoratra izany eny amin’ny solaitrabe. Ny fahamarinana azon’izy ireo tenenina dia ny hoe manome valisoa an’ireo izay mazoto mikatsaka ny hahatonga fahamarinana Andriamanitra.

Azonao atao ny manasa ireo mpianatra hisaintsaina na hirakitra ny hatetiky ny fikatsahan’izy ireo amim-pahazotoana ny fomba hanompoana an’ Andriamanitra sy ny hafa ka tsy miandry tenenina mikasika izay tokony hatao. Asao izy ireo hijery tsara ireo fomba ahafahan’izy ireo miezaka kokoa hazoto hirotsaka amin’ny tanjona tsara eo am-panohizany ny fandalinany.

• Inona no ohatra azonao eritreretina avy ao amin’ny soratra masina ka ahitana olona niaina ny fampianaran’ny Mpamonjy ao amin’izany andininy izany?

• Inona avy ireo ohatra ahitana ny Mpamonjy mahatsikaritra fahafahana hanao soa ka mampiasa ny fahafahany misafidy mba hanao zavatra?

ChurchofJesusChrist.org

Na azonao aseho ny horonan-tsary “Widow of Nain” (2:22), ao amin’ny ChurchofJesusChrist.org.

Ny fampianaran’ny Mpamonjy eo amin’ny fiainantsika

Hevero ny hanampy ireo mpianatra hahita ny mety ho fisehon’ny fampianaran’ny Mpamonjy ao amin’ny andininy 26–29 eo amin’ny toe-javatra tena misy eo amin’ny fiainana. Azonao ampiasaina ny sasany amin’ireto toe-javatra ireto na toe-javatra hafa izay misy ifandraisany tsara kokoa amin’ny toe-javatra iainan’ny mpianatrao.

Zarao ho vondrona kely vitsivitsy ireo mpianatra mba hifanakalo hevitra mikasika izay andininy na andian-teny tena miantefa amin’ny toe-javatra tsirairay. Amporisiho ireo vondrona mba hieritreritra fomba maro ahafahan’ny olona tsirairay mampiasa ny fahafahana misafidy ananany mba hirotsahana amin’ny fanaovan-tsoa.

Avy eo dia hevero ny hanasa ny vondrona tsirairay mba hamerina ilay sahanasa amin’ny alalan’ny famoronana ny rafi-tantaran’izy ireo manokana izay ahafahan’ny zatovo iray mampihatra ny fampianaran’ny Mpamonjy ao amin’ny fizarana 58.

1. Vao tsy ela i Juliet no notendrena hanompo fianakaviana iray izay mbola tsy hitany mihitsy. Na ny fomba hanombohana izany aza tsy dia hainy loatra.

2. Olona tena mahafinaritra ny mpampianatra an’i Ann ao amin’ny Sekoly Alahady saingy mpampianatra tsy mbola ampy traikefa izy. Maro amin’ireo mpiara-mianatra aminy no toa lasa tsy liana na tsy miezaka mandray anjara intsony amin’ny lesona.

3. Mahatsikaritra i Jasmine fa toa reraka kokoa tsy araka ny fahitana azy mahazatra ny reniny tato ho ato.

4. Nahita filazan-javatra feno haratsiam-panahy momba ny mpianatra iray hafa tao amin’ny tambajotran-tseratsera i Xavier.

5. Malalaka ny tolakandron’i Jared ary tsy misy zavatra tokony hataony sy toerana tokony halehany.

Ho famaranana dia asao ireo mpianatra hihira sy hihaino hira iray ao amin’ny fihirana izay manamafy ireo fitsipika nianarana tato amin’ity lesona ity. Angataho izy ireo hisaintsaina ireo tonony izay sahaza ireo fitsipika nampianarin’ny Mpamonjy ao amin’ny fizarana 58. Manasà mpianatra iray na roa hizara amin’ny iray kilasy ny zavatra tsapany fa ho tian’ny Mpamonjy hotsaroany avy tamin’ny zavatra nohalalininy androany. Mety hanampy ny manome fahafahana ireo mpianatra hanoratra ny eritreriny mialoha ny hanasana ny sasany hizara izany amin’ny feo mafy.

Azonao asaina ireo mpianatra hitady fahafahana handray andraikitra eo anatrehan’ny zavatra nianarany mialoha ny lesona manaraka amin’ny seminera. Azonao atao ny manao fanaraha-maso amin’ny alalan’ny fanasana ireo mpianatra hizara ny zavatra niainany amin’ny iray kilasy.

Loharanom-pitaovana fanampiny

Inona avy ireo ohatra sasantsasany ahitana fomba ahafahantsika mampihatra ny Fotopampianarana sy Fanekempihavanana 58:26–29 eo amin’ny fiainantsika?

Ny Loholona Jeffrey R. Holland ao amin’ny Kôlejin’ny Apôstôly Roambinifolo dia nilaza izao manaraka izao fotoana fohy taorian’ny nampahafantaran’ireo mpitarika ao amin’ny Fiangonana ny fandaharan’asa momba ny fanompoana. Mpikambana maro no nanana fanonataniana mikasika ny fomba mahomby hanompoana ny hafa.

Manoro hevitra anareo izahay ny tsy hiandrasanareo toromarika maro fanampiny intsony. Tonga dia mirotsaha fotsiny ao anatin’izany. Ampio ireo izay mila fanampiana. Aoka tsy hanakana anareo hanompo ny fieritreretana hoe karazana asa fanompoana inona no tokony hatolotrareo. Raha manaraka ireo fitsipika fototra izay efa nampianarina isika, miara-miasa amin’ny fanalahidin’ny fisoronana, mikatsaka ny Fanahy Masina hitarika antsika, dia hahomby foana. (Jeffrey R. Holland, “Ny fanompoana fampihavanana,” Liahona, nôv. 2018)

Nanazava ny fomba fiantefan’ireo fitsipika ireo eo amin’ny fikatsahantsika fanambarana sy fitarihana avy amin’ Andriamanitra ny Filoha Dallin H. Oaks ao amin’ny Fiadidiana Voalohany:

Ny fototry ny ezaka rehetra hahazoana fanambarana dia ny fanolorantena hanao izay azontsika atao amin’ny ezaka ataontsika manokana sy ny fahaizantsika mandanjalanja manokana. Midika izany fa mila manompo sy miasa isika.

Fomba iray manan-danja hahatongavana ho mendrika ny hahazo fanambarana ny mandroso hatrany ao anatin’ny fanompoantsika sy ny asantsika. Tao anatin’ny fandalinako ny soratra masina dia nahatsikaritra aho fa ny ankamaroan’ny fanambarana ho an’ny zanak’ Andriamanitra dia tonga rehefa eny am-pihetsehana izy ireo, fa tsy rehefa mipetraka any an-tranon’izy ireo ka miandry ny Tompo hilaza amin’izy ireo ny dingana voalohany tokony hatao. (Dallin H. Oaks, “In His Own Time, in His Own Way,” Ensign, Aug. 2013, 22)

Ny Rahavavy Rebecca L. Craven ao amin’ny Fiadidian’ny Zatovovavy maneran-tany dia nizara fomba azo ampiharana ireo fitsipika ireo eo amin’ny fahazoana fijoroana ho vavolombelona:

Niaina zavatra nahafinaritra aho niaraka tamina zatovovavy malala iray izay nametraka fanontaniana tena tamin-kitsim-po hoe: “Rahavavy Craven, ahoana no ahalalanao fa marina avokoa ny zavatra rehetra momba ny Fiangonana? Izaho mantsy tsy mahatsapa na inona na inona?”

Nialoha ny nanomezako valinteny azy malaky dia nametrahako fanontaniana aloha izy. “Mba resaho ahy ny momba ny fandalinanao soratra masina.”

Namaly izy hoe, “Tsy mamaky ny soratra masina aho.”

Nanontany aho hoe, “Ahoana ny miaraka amin’ny fianakavianao? Miara-mandalina ny Avia, hanaraka Ahy ve ianareo?”

“Tsia,” hoy izy.

Nanontany azy momba ny vavaka ataony aho: “Inona no zavatra tsapanao rehefa mivavaka ianao?”

Ny valinteniny dia hoe: “Tsy mivavaka aho.”

Tsotra ny valinteniko taminy: “Raha te hahafantatra zavatra ianao, dia mila manao zavatra.”

Tsy marina ve izany amin’izay zavatra tiantsika hianarana na hofantarina? Nasaiko ilay namako vaovao mba hanomboka hanao ny filazantsaran’i Jesoa Kristy, izany hoe: mivavaka, mandalina, manompo ny hafa, ary matoky ny Tompo. Tsy hitranga ny fiovam-po raha tsy manao na inona na inona. Tonga amin’ny alalan’ny herin’ny Fanahy Masina izany rehefa manao ezaka amim-piniavana isika mba hahafantatra amin’ny alalan’ny fangatahana sy fikatsahana ary fandondonana. Amin’ny alalan’ny fanaovana zavatra no hahatonga izany. (Rebecca L. Craven, “Ataovy izay manan-danja indrindra,” Liahona, mey 2022)

Sahanasa fianarana fanampiny

Fomba hafa hanombohana

Azonao atomboka amina rafi-tantara tahaka ity manaraka ity ny lesona, izay ahitana olona afaka mampiasa ny fahafahana misafidy ananany mba hanao na misafidy ny tsy hanao na inona na inona raha tsy terena hanao izany.

Alaivo sary an-tsaina hoe mandeha eny an-dalana ianao ary mahita olona efa antitra mianjera amin’ny tany. Iza amin’ireto manaraka ireto no tokony hataonao?

1. Mijanona kely mba hijerena raha toa ka mibitsika aminao ny Ray any An-danitra mba hanampy.

2. Miandry mba hijerena raha tonga dia mangataka fanampiana aminao ilay olona efa antitra.

3. Manantena olona hilaza aminao ny tokony hatao.

4. Tonga dia mijery avy hatrany izay fomba azonao hanampiana ilay olona nianjera.

Rehefa avy mamaly ireo mpianatra dia angataho izy ireo hizara antony mety hahatonga ny olona iray hisafidy ny safidy tsirairay. Avy eo dia asao izy ireo hamaky ny Fotopampianarana sy Fanekempihavanana 58:26–29 ary hisaintsaina ny fiantraikan’ny safidintsika amin’izay hiafarantsika.

“Mahatoky amin’ny fahoriana”

Asao ireo mpianatra hisaintsaina fifaninanana iray izay hiheveran’ny mpitsara ny halehiben’ny fahasarotana eo amin’ny famaritana ny isa tokony homena olona iray. Ohatra mety ho tafiditra ao anatin’izany ny gymnastique na ny patinage sur glace na ny snowboard. Ampio ireo mpianatra hampifandray izany amin’ilay Mpitsara tonga lafatra, dia i Jesoa Kristy, izay mahatakatra tsara ireo fahasarotana atrehin’ny olona tsirairay eto an-tany. Avy eo dia asao ireo mpianatra hamaky ny Fotopampianarana sy Fanekempihavanana 58:1–4 mba hitadiavana ny zavatra ianarany momba ny fitsaran’ny Mpamonjy.

Fampiharana maoderina ny andininy 26–29

Fomba iray hanampiana ireo mpianatra hijery fampiharana maoderina ao amin’ny fampianaran’ny Mpamonjy ny fizarana amin’ny vondrona tahadikan’ireo teny nambara ao amin’ny fizarana “Loharanom-pitaovana fanampiny.” Afaka mamaky ireo teny nambara ny vondrona tsirairay ary mamaritra izay andian-teny avy ao amin’ny Fotopampianarana sy Fanekempihavanana 58:26–29 izay tena sahaza azy ireo. Avy eo dia asao ireo mpianatra hizara toe-javatra samihafa izay azon’ny zatovo iray ampiasana ny zavatra izay ampianarin’ireo andian-teny na ireo teny nambara ireo.

Sahanasa momba izay zavatra manan-danja amin’ny mpianatra

Afaka manoratra toerana iray halehan’izy ireo amin’ny herinandro manaraka eo amin’ny tapa-taratasy iray ny mpianatra tsirairay (any an-trano, any an-tsekoly, any am-piasana, eny amin’ny kianja filalaovam-baolina, sy ny sisa) ary hametraka izany ao anaty boaty iray. Makà taratasy an-kisendrasendra avy ao amin’ilay boaty ary asao ny iray kilasy hizara fomba miavaka izay azon’ny olona iray safidina mba hanaovana soa ao anatin’izany toe-javatra na toerana izany.

Mazoto mirotsaka amin’ny fianarana

Mba hanampiana ireo mpianatra hifanakalo hevitra momba ny fomba azo ampiharana ireo fahamarinana ao amin’ny andininy 58 amin’ny zavatra iainan’izy ireo ao amin’ny seminera, dia asehoy ity teny nambaran’ny Loholona David A. Bednar ao amin’ny Kôlejin’ny Apôstôly Roambinifolo ity.

“Ny mpianatra mampiasa ny fahafahana misafidy amin’ny fanaovana zavatra mifanaraka amin’ireo fitsipika marina dia manokatra ny fony amin’ny Fanahy Masina ka manasa ny fampianarany, sy ny heriny mijoro ho vavolombelona, ary ny tenivavolombelony manamafy. Mitaky ezaka ara-panahy, ara-tsaina, ary ara-batana ny fianarana amin’ny alalan’ny finoana fa tsy vitan’ny mihaino fotsiny ihany ny hafatra. …

“… Ny mpianatra iray dia tsy maintsy mampihatra finoana sy manao asa mba hahazoana fahalalana ho an’ny tenany” (David A. Bednar, “Seek Learning by Faith,” Ensign, sept. 2007, 64).

Asao ireo mpianatra hanoritsoritra ireo safidy azon’ny mpianatra iray atao mialoha ny fotoam-pianarana, sy mandritra ny fotoam-pianarana, ary aorian’ny fotoam-pianarana izay afaka mampitombo na mampihena ny zavatra ianarany sy tsapany ao amin’ny seminera.

Raha manampy dia afaka mifanakalo hevitra ny mpianatra mikasika ny fomba ahafahan’ireo fitsipika ao amin’ny fizarana 58 sy ny teny nambaran’ny Loholona Bednar manatsara ny traikefany amin’ny fianarana any an-tsekoly ihany koa.