“Leksiyon 75—Doktrina ug mga Pakigsaad 63:1–23: Ang Balaod sa Ginoo sa Kaputli,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 63:1–23,” Manwal sa Magtutudlo sa Seminary sa Doktrina ug mga Pakigsaad
Leksiyon 75: Doktrina ug mga Pakigsaad 60–63
Doktrina ug mga Pakigsaad 63:1–23
Ang Balaod sa Ginoo sa Kaputli
Sa ting-init sa 1831, si Propeta Joseph Smith mibalik gikan sa Missouri ug nakahibalo nga ang pipila sa mga Santos sa Kirtland nakahimo og seryoso nga mga sala, lakip na ang mga paglapas sa balaod sa kaputli. Diha sa pagpadayag nga narekord diha sa Doktrina ug mga Pakigsaad 63, ang Ginoo mipasidaan sa mga Santos sa pagkaseryoso sa ilang mga sala. Kini nga leksiyon makatabang sa mga estudyante nga mobati sa kamahinungdanon sa personal nga pagkamasulundon ngadto sa balaod sa Ginoo sa kaputli.
Mga Posibleng Kalihokan sa Pagkat-on
Ang kamahinungdanon sa hiyas
Aron sa pagsugod sa klase, ikonsiderar ang pagpakita og hulagway nga nagpakita sa Manluluwas. Ikonsiderar ang pagdapit sa mga estudyante nga isulat sa pisara ang ilang mga tubag sa kinaunahan sa mosunod nga mga pangutana. Mahimo nimong dapiton ang pipila ka estudyante sa pagpasabot sa unsay ilang gisulat ug sa pagpakigbahin kon unsaon nila pagtubag ang ikaduha nga pangutana.
-
Unsa ang pipila ka mga pulong o mga hugpong sa mga pulong nga naghulagway sa mga hiyas nga gusto sa Manluluwas nga atong maangkon?
Idugang ang pulong nga mahiyason sa pisara kon wala pa kini. Ipasabot nga ang pagkahimong mahiyason naglakip sa pagbaton og moral nga kaligdong, pagkahimong putli sa sekswal, ug pagbaton og espirituhanong gahom ug kalig-on (tan-awa sa Giya ngadto sa mga Kasulatan, “Hiyas,” scriptures.ChurchofJesusChrist.org).
-
Ngano kaha sa imong hunahuna nga ang pagkahimong mahiyason usa ka importante nga kinaiya nga atong maangkon?
-
Sa unsang paagi nga ang sugo sa Manluluwas nga mahimong maghiyason, agresibong giatake sa atong panahon?
Dapita ang mga estudyante sa paghunahuna mahitungod kon unsa ka importante alang kanila nga mahimong mahiyason ug putli sa sekswal nga paagi. Mahimo usab sila nga maghunahuna mahitungod sa mga pangutana nga aduna sila o sa mga babag nga personal nilang giatubang nga may kalabotan niini nga sugo. Awhaga ang mga estudyante sa paghatag og atensiyon sa espirituhanong mga pag-aghat nga makatabang kanila nga mobati og mas dakong tinguha sa pagpuyo og kinabuhi nga putli ug mahiyason.
Ang Manluluwas nagkondena sa sekswal nga sala
Ang mosunod nga pangkonteksto nga background makatabang sa mga estudyante nga maandam sa pagtuon sa Doktrina ug mga Pakigsaad 63.
Sa pagpadayag nga narekord diha sa Doktrina ug mga Pakigsaad 63, ang Manluluwas namulong sa makasasala nga mga kinaiya sa pipila sa mga Santos sa Kirtland, Ohio. Siya mipasidaan sa pagkaseryoso niini nga mga sala (tan-awa sa Doktrina ug mga Pakigsaad 63:1–6) ug mipakigbahin sa mga kamatuoran mahitungod sa kaimportante sa sekswal nga kaputli.
Tun-i ang Doktrina ug mga Pakigsaad 63:13–16, mangita sa mga pagdapit ug mga pasidaan sa Ginoo.
Kon gikinahanglan, tabangi ang mga estudyante nga masabtan ang kahulogan sa importante nga mga pulong o mga hugpong sa mga pulong niini nga mga bersikulo. Pananglitan, mahimong makatabang ang pagpasabot nga ang “pagpanapaw” nagpasabot sa sekswal nga relasyon tali sa usa ka minyo nga indibidwal ug sa usa ka tawo gawas sa iyang kapikas. Ang “kahigal” nagpasabot nga motan-aw sa usa ka tawo sa paagi nga makapukaw sa sekswal nga pagbati. Naglakip kini sa pagtan-aw og pornograpiya. “Ang balaod sa kaputli nagpahayag nga ang Dios nagtugot sa sekswal nga kalihokan tali lamang sa usa ka lalaki ug usa ka babaye kinsa minyo” (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 23).
-
Unsa ang gitudlo niini nga mga bersikulo diha kanimo mahitungod sa epekto nga mahimong mahatag sa sekswal nga mga sala ngari kanato?
-
Unsa ang imong makat-onan mahitungod sa Manluluwas gikan sa Iyang mga pulong niini nga mga bersikulo?
Usa ka kamatuoran nga angay nga hatagan og gibug-aton atol niini nga panaghisgot mao nga ang Manluluwas nagkondena sa kahigal ug sa tanang ubang matang sa sekswal nga sala.
Pagpalawom sa pagsabot mahitungod sa balaod sa kaputli
Tabangi ang mga estudyante nga makasabot nga ang sugo sa Manluluwas nga mahimong putli sa sekswal nga paagi sagad gitawag nga balaod sa kaputli. Ang mosunod nga kalihokan makatabang sa mga estudyante sa pagpalawom sa ilang pagsabot mahitungod sa kaimportante sa pagsunod niini nga balaod.
Dapita ang klase sa pagbinayloay og mga ideya sa pipila ka mga pangutana nga mahimong anaa ang mga tin-edyer mahitungod sa balaod sa Ginoo sa kaputli. Mahimong mobati ang mga estudyante nga mas komportable sa pagpangutana nga dili magpaila pinaagi sa pagsulat sa ilang mga pangutana. Pagpili og pipila ka angay nga mga pangutana ug ilista kini sa pisara.
Aron matabangan ka sa pag-andam sa pagtubag sa mga pangutana nga ikaw o ang uban aduna mahitungod sa balaod sa Ginoo sa kaputli, tun-i ang mosunod nga mga seksiyon diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022): “Magkinabuhi sa kahayag sa Dios” (mga pahina 16–21) ug “Ang inyong lawas sagrado” (mga pahina 22–29).
Ang mga estudyante mahimong makigtinabangay uban sa usa ka kauban o diha sa ginagmay nga mga grupo aron sa pagpangita sa mga tubag sa mga pangutana nga ilang gipili nga pagatutokan. Gawas sa pagtuon sa mga seksiyon gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), mahimong dapiton usab ang mga estudyante sa pagpangita sa uban pang mga kapanguhaan sa ebanghelyo.
Pipila sa dugang nga mga kapanguhaan nga mahimo nimong ipakigbahin sa mga estudyante makita diha sa “Dugang nga Kalihokan sa Pagkat-on” sa kataposan sa leksiyon.
Human sa igo nga gidugayon sa panahon, dapita ang mga estudyante sa paghisgot sa unsay ilang nahibaloan samtang sila nagtuon. Dapita ang daghang mga estudyante sa pagpakigbahin sa ilang mga panabot. Ang usa ka pangutana sama sa mosunod makatabang sa paggiya sa panaghisgotan.
-
Unsa ang imong nakaplagan nga nakapalawom sa imong pagsabot kon nganong kita gisugo sa pagsunod sa balaod sa kaputli?
Mga panalangin alang sa pagkamasulundon ngadto sa balaod sa kaputli
Human sa pagpasidaan sa mga Santos mahitungod sa pagkaseryoso sa paglapas sa balaod sa kaputli, ang Manluluwas miawhag kanila sa pagsunod sa Iyang mga sugo, ug Siya misaad og mga panalangin sa pagkamasulundon.
Basaha ang Doktrina ug mga Pakigsaad 63:19–20, 23, mangita sa unsay gitudlo sa Manluluwas.
-
Unsa nga mga panalangin ang gisaad sa Manluluwas niadtong nagtuman sa Iyang mga sugo?
-
Sa unsang paagi kaha nga ang paghinumdom niini nga mga panalangin modasig kanato sa pagpuyo og mahiyason nga mga kinabuhi?
Tingali adunay pipila ka mga estudyante nga nakahimog mga sala nga may kalabotan sa balaod sa kaputli. Pahinumdomi ang klase nga kon kita sinsero nga maningkamot sa paghinulsol sa atong mga sala, ang Manluluwas mohimo sa hingpit nga kapasayloan ug sa pag-ayo nga posible. Aron matabangan ang si bisan kinsa nga nabalaka nga sila nakahimo na og mga kasaypanan, mahimo nimong hatagan og gibug-aton ang Doktrina ug mga Pakigsaad 58:42–43.
Hinumdomi ang imong nakat-onan
Hatagi og panahon ang mga estudyante sa pagpamalandong sa ilang nakat-onan ug gibati atol sa ilang mga pagtuon karon. Usa ka paagi sa pagbuhat niini mao ang pagdapit kanila sa pagsulat sa ilang mga tubag sa usa o daghan pa sa mosunod nga mga pangutana diha sa ilang mga journal sa pagtuon.
-
Unsa nga mga impresyon o mga pagbati ang imong nasinati samtang nagtuon ka karon?
-
Unsay imong nakat-onan mahitungod sa kamahinungdanon sa pagkaputli ug sa epekto nga mahimong mahatag niana nga pagpili sa imong kinabuhi?
-
Unsa man ang usa ka butang nga gibati nimo ang kadasig sa pagbuhat o pagbag-o?
Taposa ang leksiyon pinaagi sa pagpahinumdom sa mga estudyante sa saad sa Manluluwas sa pagpanalangin sa tanan kinsa matinud-anong maningkamot sa pagsunod sa balaod sa Ginoo sa kaputli.