Leksiyon 76: Doktrina ug mga Pakigsaad 60–63

Doktrina ug mga Pakigsaad 63:57–64

Balaang Pagtahod alang sa Sagrado nga Ngalan ni Jesukristo

Diha sa pagpadayag nga narekord sa Doktrina ug mga Pakigsaad 63, ang Manluluwas mipahayag sa Iyang tinguha alang sa Iyang mga sumusunod nga “magbantay kon giunsa nila paggamit ang [Iyang] ngalan diha sa ilang mga ngabil” (Doktrina ug mga Pakigsaad 63:61). Kini nga leksiyon makatabang sa mga estudyante nga mobati sa kamahinungdanon sa paggamit sa ngalan sa Manluluwas nga adunay balaang pagtahod.

Mga Posibleng Kalihokan sa Pagkat-on

Mabinantayon kaysa dili kaayo magtagad

Isulat ang hugpong sa pulong nga Mabinantayon kaysa dili kaayo magtagad diha sa pisara. Dayon dapita ang mga estudyante sa paghisgot sa mosunod nga mga pangutana:

• Unsa ang pipila ka mga sitwasyon diin kini mahimong importante alang sa usa ka tawo nga magmabinantayon kaysa dili kaayo magtagad? Ngano man?

  Kon ang mga estudyante nagkinahanglan og tabang sa paghunahuna og mga ideya, mahimo nimong hisgotan ang pipila ka mga ehemplo, sama sa pagmaneho sa sakyanan, pag-search sa internet, pagputol sa buhok, o pag-opera.

• Unsa ang pipila ka mga butang nga sa imong hunahuna nga gusto sa Manluluwas nga kita mahimong magmabinantayon sa atong kinabuhi?

Si Sister Rebecca L. Craven sa Kinatibuk-ang Kapangulohan sa Young Women nangutana sa mosunod:

Mabinantayon ba kita sa atong mga pulong? O yano nga modawat sa law-ay ug bastos nga mga butang? (Rebecca L. Craven, “Mabinantayon batok Dili Kaayo Magtagad,” Liahona, Mayo 2019, 10)

Unsa ang pipila ka sitwasyon diin mahimong makasugat ka og pinulongan nga dili matinahOron ngadto sa Dios o sa ubang sagrado nga mga butang?

Dapita ang mga estudyante sa paghunahuna kon unsa ang ilang bation kon makasugat sila og ingon nga pinulongan. Dasiga sila samtang sila nagtuon sa pagpangita og mga pagtulun-an nga makatabang kanila nga mobati sa kamahinungdanon sa pagkamabinantayon kon unsaon nila sa pagsulti ang mahitungod sa sagrado nga mga butang, ilabi na kon unsaon nila paggamit ang mga ngalan sa Langitnong Amahan ug ni Jesukristo.

Balaang Pagtahod alang sa ngalan ni Jesukristo

Ang mosunod nga pagpasabot makatabang sa mga estudyante sa pagsabot sa kinatibuk-ang kahulogan sa mga bersikulo nga ilang tun-an gikan sa Doktrina ug mga Pakigsaad 63.

Sa panahon sa pagpadayag nga narekord diha sa Doktrina ug mga Pakigsaad 63, pipila sa mga Santos sa Kirtland, Ohio, migamit sa ngalan sa Ginoo nga walay tukma nga awtoridad sa pagkapari (tan-awa sa Doktrina ug mga Pakigsaad 63:62). Ang Ginoo mikondena niini nga mga buhat ug mitudlo sa mga Santos og importante nga mga kamatuoran kon unsaon paggamit ang Iyang ngalan.

Basaha ang Doktrina ug mga Pakigsaad 63:58–64, mangita sa unsay gusto sa Ginoo nga masabtan sa mga Santos mahitungod Kaniya.

• Unsa ang natabang niini nga mga bersikulo sa imong pagsabot mahitungod ni Jesukristo?

• Unsay imong nakat-onan gikan sa mga bersikulo 61–64 kon unsaon nato sa paggamit ang ngalan sa Manluluwas?

  Usa ka kamatuoran nga mahimong hisgotan sa mga estudyante gikan niini nga mga bersikulo mao nga ang ngalan ni Jesukristo sagrado ug kinahanglan gamiton nga adunay pag-amping.

• Unsa sa imong hunahuna ang gipasabot sa paggamit sa ngalan sa Manluluwas nga mabinantayon?

• Unsa ang imong mga pangutana mahitungod sa unsay imong nakat-onan niini nga mga bersikulo?

Kon ang mga estudyante adunay mga pangutana kon unsay gipasabot sa paggamit sa “ngalan sa Ginoo … sa kawang” (bersikulo 62), ipasabot nga kini mahimong maglakip sa pagsulti nga walay balaanong pagtahod sa Langitnong Amahan ug ni Jesukristo (tan-awa sa Dallin H. Oaks, “Reverent and Clean,” Ensign, May 1986, 49–50). Kini mahimo usab nga naglakip sa paggamit sa awtoridad sa pagkapari sa Manluluwas nga dili takos (tan-awa sa Neil L. Andersen, “Gahom sa Priesthood,” Liahona, Nob. 2013, 92). Seguroha nga masabtan sa mga estudyante nga kini sakto ra nga mamulong mahitungod sa Manluluwas diha sa ebanghelyo o sa adlaw-adlaw nga mga panag-istoryahanay kon maghisgot kita mahitungod Kaniya nga adunay gugma ug pagtahod.

Sa dili pa ipangutana ang mosunod nga pangutana, mahimong makatabang nga ipahanduraw sa mga estudyante nga sila nakaila og usa ka tawo nga wala makasabot sa kamahinungdanon sa paggamit sa ngalan sa Manluluwas nga adunay balaang pagtahod. Mahimo nilang hinumdoman kini nga tawo samtang maghisgot sila.

• Unsa sa imong hunahuna ang makatabang kanato nga mobati og mas dakong tinguha nga gamiton ang ngalan ni Jesukristo nga adunay balaang pagtahod?

Pagbati og mas dakong gugma ug balaang pagtahod alang ni Jesukristo

Ipasabot nga ang pagsabot og dugang kon kinsa si Jesukristo ug kon unsay Iyang nabuhat alang kanato makatabang kanato nga mobati og mas dakong gugma ug pagtahod alang Kaniya.

Sa dili pa ipaila ang mosunod nga kalihokan sa pagtuon, ikonsiderar ang pagdapit sa mga estudyante sa pagpakigbahin sa ilang mga kasinatian o sa mga kamatuoran nga ilang nahibaloan gikan sa mga kasulatan nga nagdasig kanila sa paghunahuna ug sa pagsulti nga adunay balaang pagtahod mahitungod ni Jesukristo. Mahimo ka usab nga mopakigbahin og usa ka ehemplo gikan sa imong kinabuhi.

Paggahin og panahon sa pagpangita og balaanong gitudlo nga mga tinubdan nga makatabang kanimo nga mobati og mas dakong gugma alang kang Jesukristo ug tinguha nga mamulong mahitungod Kaniya nga adunay pagtahod. Mahimo kang mangita og mga kasulatan, mga pamahayag gikan sa mga lider sa Simbahan, mga himno, o ubang makatabang nga mga kapanguhaan nga naghulagway kon kinsa Siya o unsay Iyang nabuhat. Irekord ang imong mga panabot o mga pagbati diha sa imong journal sa pagtuon.

Mahimong mangita ang mga estudyante og mga kapanguhaan nga sila ra o uban sa kapares. Kon gikinahanglan, mahimo nimo silang hatagan og pipila ka mga pananglitan sa mga kapanguhaan nga mahimo nilang tan-awon, sama sa mga himno nga nagtudlo sa sagrado nga kinaiya ni Jesukristo o sa pipila sa mosunod nga mga kasulatan: Mateo 8:23–27; 2 Nephi 25:13; Doktrina ug mga Pakigsaad 18:23–25; 35:1–2; 110:1–5.

Human sa igong panahon, dapita ang mga estudyante sa pagpakigbahin kon unsay ilang nakat-onan ug gibati gikan sa ilang mga pagtuon. Kon ang mga estudyante nakakaplag og makahuloganon nga mga himno, mahimong kantahon og dungan sa klase ang usa o daghan pa niini. Mahimo usab nimong dapiton ang mga estudyante sa pagbasa og usa ka kasulatan nga ilang nakit-an ug sa pagpakigbahin kon nganong makahuloganon kini kanila.

Ang mosunod nga mga pangutana makatabang sa mga estudyante sa pagpakigbahin sa ilang mga panabot:

• Unsa ang imong gitun-an nga nakapadasig sa pagpasalamat o pagtahod alang sa Manluluwas?

• Sa unsang paagi nga ang paghinumdom sa imong gitun-an makaapekto sa imong mga pagpili?

Mahimo nimong palapdan ang panaghisgotan sa ikaduhang pangutana pinaagi sa pagbahin sa mga estudyante ngadto sa gagmay nga mga grupo ug dapita sila sa paghisgot kon sa unsang paagi ang piho nga mga aspeto sa ilang mga kinabuhi mahimong maapektohan kon kita mobati og mas dakong balaang pagtahod alang sa Langitnong Amahan ug ni Jesukristo. Ang mga ehemplo sa mga aspeto sa ilang mga kinabuhi nga ilang mahisgotan naglakip sa:

• Ang mga pagpili nga ilang gihimo nga may kalabotan sa paggamit sa media.

• Ang ilang pakig-inter-aksyon sa uban.

• Ang ilang kaandam sa pagpaambit sa ebanghelyo.

• Ang paagi sa ilang pag-ampo ngadto sa Langitnong Amahan.

Pagkonektar niini diha sa imong kinabuhi

Aron matabangan ang mga estudyante sa pagpamalandong sa ilang nakat-onan, dapita sila sa pagtubag sa labing menos usa sa mosunod nga mga pangutana diha sa ilang mga journal sa pagtuon:

• Base sa unsay imong nakat-onan gikan sa Espiritu o gikan sa imong mga kauban karon, unsa ang mga kausaban nga imong namatikdan sa imong mga pagbati o panglantaw sa Manluluwas?

• Unsa ang usa ka butang nga gibati nimo ang tinguha nga mobuhat og mas maayo o lahi tungod sa unsay imong nakat-onan karong adlawa?

Pagdapit og pipila ka estudyante nga andam mopakigbahin sa unsay ilang nasulat. Dayon taposa ang leksiyon pinaagi sa pagpakigbahin sa imong pagpamatuod mahitungod sa Langitnong Amahan ug ni Jesukristo, ug ipasabot kon nganong ang Ilang mga ngalan sagrado alang kanimo.

Dugang nga mga Kapanguhaan

Nganong gikinahanglan man akong mogamit sa mga ngalan sa Langitnong Amahan ug ni Jesukristo nga adunay balaang pagtahod?

Si Presidente Dallin H. Oaks sa Unang Kapangulohan mitudlo:

Ang mga ngalan sa Dios nga Amahan ug sa iyang Anak, nga si Jesukristo mao ang pinaka sagrado o mahinungdanon nga mga pulong sa tibuok natong pinulongan. …

Kon ang mga ngalan sa Dios nga Amahan ug sa iyang Anak, si Jesukristo, gamiton nga may balaang pagtahod ug awtoridad, sila mogamit og gahom nga dili matugkad sa mortal nga tawo.

Angayng dayag sa matag magtutuo nga kining gamhanang mga ngalan—nga pinaagi niini gihimo ang mga milagro, nga pinaagi niini nahimo ang kalibotan, nga pinaagi niini gilalang ang tawo, ug pinaagi niini maluwas kita—balaan ug kinahanglang tagdon nga adunay hingpit nga balaang pagtahod. Ingon nga atong mabasa sa modernong pagpadayag, “Hinumdomi nga kana nga moabot gikan sa kahitas-an sagrado, ug kinahanglan gayod ipamulong uban sa pag-amping, ug pinaagi sa pagtugot sa Espiritu.”(Doktrina ug mga Pakigsaad 63:64.) (Dallin H. Oaks,“Reverent and Clean,” Ensign, Mayo 1986, 50, 51).

Unsa ang makatabang kanako nga mobati og mas dakong gugma ug balaang pagtahod kang Jesukristo?

Si Sister Jean B. Bingham, kanhi Kinatibuk-ang Presidente sa Relief Society mitudlo:

Ang malungtarong hingpit nga kalipay makaplagan sa pagpunting diha sa atong Manluluwas, si Jesukristo, ug sa pagsunod sa ebanghelyo ingon nga Iyang gipakita ug gitudlo. Kon kita mas magkat-on, magbaton og hugot nga pagtuo, ug mosunod ni Jesukristo, kita mas makasabot nga Siya mao ang tinubdan sa tanang pagpang-ayo, kalinaw, ug mahangtorong pag-uswag. (Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 85)

Sa unsang paagi ang pagbati og balaang pagtahod kang Jesukristo makaapekto sa akong kinabuhi?

Si Elder Ulisses Soares sa Korum sa Napulog Duha ka Apostoles mitudlo:

Kon kita tinud-anay nga nagdayeg kang Jesukristo ug sa Iyang ebanghelyo, mas malipayon kita, mas aduna kitay kadasig sa buhat sa Dios, ug atong giila ang impluwensiya sa Ginoo diha sa tanang butang. Dugang pa, ang atong pagtuon sa mga pulong sa Dios mas makahuloganon; ang atong mga pag-ampo, mas adunay katuyoan; atong pagsimba, mas adunay balaan nga pagtahod; atong pagserbisyo diha sa gingharian sa Dios, mas makugihon. Kining tanan nga aksiyon makatampo sa impluwensiya sa Espiritu Santo nga mas makanunayon sa atong mga kinabuhi. Mao nga, ang atong pagpamatuod sa Manluluwas ug sa Iyang ebanghelyo mapalig-on. (Ulisses Soares, “Nagdayeg kang Kristo ug sa Iyang Ebanghelyo,” Liahona, Mayo 2022, 115-116)

Doktrina ug mga Pakigsaad 63:62. Sa unsa kaha nga paagi nga ang usa ka tawo “naggamit sa ngalan sa Ginoo … sa kawang, nga walay pagtugot”?

Si Elder Neil L. Andersen sa Korum sa Napulog Duha ka Apostoles mitudlo:

Ang pagkadili takos nga pagpangalagad o pagpaambit sa sakramento, pagpanalangin sa masakiton, o sa pag-apil sa ubang mga ordinansa sa priesthood mao, sumala sa giingon ni Elder David A. Bednar, ang pagpanamastamas sa ngalan sa Dios [tan-awa sa David A. Bednar, Act in Doctrine (2012), 53]. Kon ang usa ka tawo dili takos, kinahanglan siyang mohunong sa pagpangalagad sa mga ordinansa sa priesthood ug mainampoong moduol sa iyang bishop isip unang lakang sa paghinulsol ug pagbalik ngadto sa mga sugo. (Neil L. Andersen, “Gahom sa Priesthood,” Liahona, Nob. 2013, 93)

Dugang nga mga Kalihokan sa Pagkat-on

Ehemplo gikan sa kinabuhi ni Presidente Spencer W. Kimball

Samtang imong gihisgotan ang kamahinungdanon sa paggamit sa ngalan ni Jesukristo nga adunay balaang pagtahod ug respeto, mahimo nimong gamiton ang mosunod nga asoy gikan sa kinabuhi ni Presidente Spencer W. Kimball (1895–1985):

“Sa St. Mark ‘s Hospital sa Siyudad sa Salt Lake [si Presidente Spencer W. Kimball] gihatagan og total anesthesia ug gioperahan, dayon gibutang sa lamesa nga adunay ligid balik padulong sa iyang kwarto. Bisan ubos pa sa anesthesia, nabati ni Spencer ang iyang lamesa nga mihunong sa usa ka elevator ug nadungog ang trabahante sa hospital, nasuko sa usa ka butang, nagpasipala sa ngalan sa Ginoo. Walay halos panimuot, siya mihangyo uban sa dakong paningkamot: “Palihog ayaw kana isulti. Gimahal ko siya labaw sa tanan dinhi sa kalibotan. Palihog.’ Usa ka hingpit nga kahilom ang nahitabo. Unya ang trabahante sa hospital mitubag sa hinay: ‘Dili unta to angayan nako nga isulti. Pasayloa ako.’” (Edward L. Kimball ug Andrew E. Kimball Jr., Spencer W. Kimball: Twelfth President of The Church of Jesus Christ of Latter-day Saints [1977], 264)

Human mapakigbahin ang asoy, dapita ang mga estudyante sa paghisgot unsa ang mipatigbabaw ngadto kanila.

Doktrina ug mga Pakigsaad 63:47. “Makabuntog sa kalibotan”

Ang mga estudyante mahimong makabenepisyo gikan sa usa ka panaghisgotan mahitungod sa mga pagtulun-an sa Manluluwas bahin sa pagbuntog sa kalibotan nga makita diha sa Doktrina ug mga Pakigsaad 63:47. Human magdungan sa pagbasa niini nga bersikulo, mahimo nimong dapiton ang mga estudyante sa pagkonsiderar sa pagmarka sa mga hugpong sa mga pulong nga “makabuntog sa kalibotan” diha sa ilang mga kasulatan. Unya dapita ang mga estudyante sa pagsulat sa mosunod nga mga pangutana diha sa ilang mga journal sa pagtuon, nga adunay luna ubos sa matag pangutana aron kasulatan sa ilang mga tubag.

• Unsa ang gipasabot sa pagbuntog sa kalibotan?

• Unsaon nato sa pagbuhat niini?

• Sa unsa nga paagi nga ang pagbuntog sa kalibotan magpanalangin sa atong mga kinabuhi?

Mahimong tun-an sa mga estudyante ang pakigpulong ni Presidente Russell M. Nelson sa Oktubre 2022 nga kinatibuk-ang komperensiya nga giulohan og “Buntoga ang Kalibotan ug Pangita og Kapahulayan” (Liahona, Nob. 2022, 95–98) aron makakaplag og mga tubag niini nga mga pangutana. Dapita ang mga estudyante sa pagrekord sa ilang mga tubag diha sa ilang mga journal sa pagtuon ug sa pagpakigbahin sa ilang mga panabot kon mahuman na sila sa pagtuon.

Doktrina ug mga Pakigsaad 63:64. Pagtratar sa sagrado nga mga butang nga adunay balaang pagtahod

Agig dugang sa paghisgot mahitungod sa paggamit sa ngalan sa Manluluwas nga adunay balaang pagtahod, ang mga estudyante mahimong makabenepisyo gikan sa paghisgot og ubang mga paagi nga ilang magamit ang tambag sa Ginoo diha sa Doktrina ug mga Pakigsaad 63:64. Ang mosunod nga mga pangutana tingali makatabang:

• Unsa ang pipila ka mga pulong o mga hilisgotan nga “[moabot] gikan sa kahitas-an” ug sagrado? Sa unsa nga paagi nga atong maseguro nga kita nag-istorya mahitungod niini “uban sa pag-amping”?

Ikonsiderar ang pagdapit sa mga estudyante sa paghunahuna mahitungod sa mga sitwasyon nga mahimo nilang atubangon diin sila makakita o makadungog og sagrado nga mga butang nga gipakaubos o gipamulong nga walay pagtahod. Pananglitan, usahay mahimong makasugat sila og dili angay nga mga panag-istoryahay diha sa ilang mga kaedad, o tingali maladlad sila sa dili angay nga mga bidyo, musika, o mga post sa social media.

Dapita ang mga estudyante sa paghunahuna kon unsay ilang mahimo aron malikayan o makasagubang niini nga mga matang sa mga sitwasyon. Pananglitan, mahimo silang mopili sa paglakaw palayo gikan sa dili angay nga mga panag-istoryahanay, pag-unfollow sa dili angay nga mga social media account, o magmabinantayon sa mga matang sa mga bidyo o musika nga ilang gipili nga tan-awon o paminawon.