Doktrina ug mga Pakigsaad 63:22–66

Pasiuna

Sa Agosto 30, 1831, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 63. Kini nga leksyon naglakip sa Doktrina ug mga Pakigsaad 63:22–66, diin ang Ginoo nagsaad og mga panalangin ngadto sa mga Santos kinsa mga matinud-anon sa katapusang mga adlaw, nagpahimangno sa mga kuyaw sa garbo, ug nag-awhag sa Iyang mga sulugoon sa paghinumdom sa ka sagrado sa Iyang ngalan ug sa pagpamulong uban ang balaang pagtahud mahitungod sa tanang sagradong mga butang.

Mga Sugyot alang sa Pagtudlo

Doktrina ug mga Pakigsaad 63:22–54

Ang Ginoo nagsaad og mga panalangin ngadto sa mga matinud-anon sa katapusang mga adlaw

Sa wala pay klase, isulat ang mosunod nga pangutana diha sa pisara: Ngano kaha nga ang pipila sa mga tawo mobati og kaguol mahitungod sa pagpuyo sa katapusang mga adlaw?

Sa sinugdanan sa leksyon, dapita ang mga estudyante sa paghisgot niini nga pangutana isip usa ka klase o magpares.

Ipasabut nga sa pagpadayag nga gi-rekord diha sa Doktrina ug mga Pakigsaad 63, namulong ang Ginoo sa kalaglagan nga moabut diha sa mga dautan sa katapusang mga adlaw, apan mihimo usab Siya og gamhanang mga saad ngadto sa mga Santos. Agi og dugang, gisugo Niya ang mga Santos niana nga panahon sa pagpalit og yuta sa Missouri alang sa pagtukod sa Zion, nga Iyang gisaad nga mahimong usa ka dapit nga dangpanan (tan-awa sa D&P 45:66–69).

Aron matabangan ang mga estudyante sa pagkat-on mahitungod sa mga panagna diha sa Doktrina og mga Pakigsaad 63, paghimo og worksheet nga maglangkub sa mosunod nga mga pamahayag. I-assign nga magpares-pares ang mga estudyante sa pagtrabaho. Hangyoa sila sa pagpiho kon ang kada pamahayag tinuod o bakak pinaagi sa pagsiksik sa kaubang mga scripture reference. Mahimo kang mosugyot nga markahan sa mga estudyante diha sa ilang mga kasulatan ang mga kamatuoran nga ilang nakat-unan samtang kompletuhon nila kini nga worksheet.

____1. Atol sa mga gubat sa katapusang mga adlaw, ang dautang mga tawo molaglag sa usag usa. (Tan-awa sa D&P 63:32–33.)
____2. Ang matarung nga mga Santos dali nga makaikyas sa tanang kalaglagan sa katapusang mga adlaw. (Tan-awa sa D&P 63:34.)
____3. Kon si Jesukristo moanhi pag-usab, Siya molaglag bisan kinsang dautan nga mga tawo kinsa ania pa sa yuta. (Tan-awa sa D&P 63:34.)
____4. Kadtong kinsa mga matinud-anon sa kadugayan makabuntog sa tanang kalisud niini nga kinabuhi. (Tan-awa sa D&P 63:47–48.)
____5. Ang matarung nga mga tawo kinsa namatay sa wala pa ang Ikaduhang Pag-anhi mabanhaw kon ang Manluluwas moanhi sa yuta. (Tan-awa sa D&P 63:49.)
____6. Ang matarung nga mga tawo kinsa buhi sa yuta sa panahon sa Ikaduhang Pag-anhi dili gayud mamatay. (Tan-awa sa D&P 63:50–51.)

Human makompleto sa mga estudyante ang worksheet, hangyoa sila sa pag-report sa ilang mga tubag ngadto sa unang duha ka mga pamahayag. (Ang unang pamahayag tinuod, ug ang ikaduhang pamahayag bakak.) Hisguti ang ilang mga tubag, maghangyo kanila sa pagribyu sa scripture passage nga gilista human sa kada pamahayag. Samtang ang mga estudyante naghisgot sa ilang mga tubag ngadto sa pamahayag 2, dapita ang usa ka estudyante sa pagbasa og kusog sa mosunod nga pagpasabut ni Propeta Joseph Smith:

“Kini usa ka sayop nga pagtuo nga ang mga Santos makalingkawas sa tanang mga paghukom, samtang ang dautan mag-antus; kay ang tanang tawo ubos sa pag-antus, ug, ‘ang matarung maglisud sa pag-ikyas;’ … daghang mga matarung mabiktima sa sakit, sa katalagman, ug uban pa , nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios” (sa History of the Church, 4:11; tan-awa usab sa Journals, Volume 1: 1832–1839, vol. 1 sa mga serye sa Journals sa The Joseph Smith Papers [2008], 352–53).

Ngano kaha nga importanting mahibaloan nga ang matarung nga mga tawo dili makalingkawas gikan sa tanang mga pagsulay sa katapusang mga adlaw?

Hangyoa ang mga estudyante sa ilang mga tubag sa mga pamahayag 3–6 diha sa worksheet. (Ang mga pamahayag 3–5 mga tinuod, ug ang pamahayag 6 bakak.) Dapita ang usa ka estudyante sa pagbasa og kusog sa Doktrina ug mga Pakigsaad 63:47–48. Hangyoa ang klase sa pagsunod, nga mangita sa saad gikan sa Ginoo. Awhaga sila sa pagkonsiderar kon unsaon ang pagpahayag sa saad sa Ginoo niini nga bersikulo isip “kon–niana” nga pamahayag.

Unsaon ninyo sa pagpahayag sa saad sa Ginoo niini nga bersikulo isip “kon–niana” nga pamahayag? (Ang mga estudyante kinahanglang mopahayag nga kon kita matinud-anon ug molahutay, niana atong mabuntog ang kalibutan. Isulat sa pisara kini nga baruganan.)
Sa unsa nga mga paagi ang Ginoo makatabang kanato sa “pagbuntog sa kalibutan” diha sa atong inadlaw nga mga kinabuhi?
Sa unsa nga mga paagi ang Ginoo makatabang kanato sa “pagbuntog sa kalibutan” human kita mamatay?

Aron mahatagan og gibug-aton ang mahangturong mga panalangin nga atong madawat nga makatabang kanato sa pagbuntog sa kalibutan, dapita ang usa ka estudyante sa pagbasa og kusog sa Doktrina ug mga Pakigsaad 63:49. Hangyoa ang klase sa pagsunod, nga mangita sa mga panalangin nga gisaad sa Ginoo ngadto sa matarung.

Mahimo nimong ipakigbahin ang imong pagpamatuod sa mga panalangin nga atong madawat, niini nga kinabuhi ug sa sunod, kon kita matinud-anon ug molahutay.

Doktrina ug mga Pakigsaad 63:55–56

Nagpahayag ang Ginoo sa Iyang pagkawala mahimuot sa garbo ni Sidney Rigdon

Dapita ang usa ka estudyante sa pagbasa og kusog sa mosunod nga mga ehemplo. Human ang kada ehemplo mabasa, hunong ug hangyoa ang klase sa pagpasabut kon sa unsa nga paagi ang usa ka tawo matintal sa pagtubag uban ang garbo o pagkamahitas-on niana nga sitwasyon.

Gidapit ka sa pagpamatuod diha atubangan sa daghang kabatan-onan sa usa ka dako nga komperensya sa mga kabatan-onan.
Ang pipila sa mga indibidwal sa imong korum o klase sa Young Women nagmulo mahitungod sa mga kalihokan nga gitabangan nimo sa pagplano.
May talento ka nga mag-aawit, ug gihangyo ka sa pag-awit og kanta sa sakrament miting.

Ipasabut nga si Sidney Rigdon midawat og importanting buluhaton gikan sa Ginoo apan midawat uban ang garbo. Gimandoan siya sa Ginoo nga “mosulat og usa ka paghulagway sa yuta sa Zion, ug usa ka pahayag sa kabubut-on sa Dios, ingon nga kini mahimo nga mahibaloan pinaagi sa Espiritu ngadto Kaniya” (D&P 58:50). Kining sinulat nga paghulagway motabang sa mga Santos kinsa nagpuyo layo sa Independence, Missouri, nga mahibalo unsay hitsura sa yuta (ang panglitrato wala pa niadtong panahona). Kini motabang usab sa pagdasig sa mga Santos sa paghatag og kwarta alang sa pagpalit sa yuta (tan-awa sa D&P 58:51).

Hangyoa ang usa ka estudyante sa pagbasa og kusog sa Doktrina ug mga Pakigsaad 63:55–56. Dapita ang klase sa pagsunod, nga mangita og ebidensya nga si Sidney Rigdon na-impluwensya sa garbo samtang siya nagtuman sa iyang buluhaton sa pagsulat og usa ka paghulagway sa Zion.

Unsa nga ebidensya sa garbo ang inyong namatikdan? (Kinahanglan nga ang mga estudyante makapasabut nga si Sidney “nagbayaw sa iyang kaugalingon diha sa iyang kasingkasing, ug wala modawat og tambag.”)
Unsa ang resulta sa garbo ni Sidney? (Nakapasuko siya sa Espiritu, ug ang Ginoo wala modawat sa iyang sinulat. Mahimo nimong ipasabut nga ang nakapasuko sa Espiritu nagpasabut sa pagpuyo sa paagi nga ang Espiritu Santo mobiya gikan kanato.)
Unsa ang atong makat-unan gikan sa bersikulo 55? (Ang mga estudyante mahimong mogamit og lahi nga mga pulong, apan kinahanglan nga sila moila sa mosunod nga kamatuoran: Masuko ang Espiritu kon kita mapagarbuhon sa paghimo sa buhat sa Ginoo. Isulat kini nga kamatuoran diha sa pisara.)

Dapita ang pipila ka mga estudyante sa pag-usab og basa og kusog sa kada ehemplo sa ibabaw. Human mabasa ang kada ehemplo, hunong ug hangyoa ang klase sa pagpasabut kon sa unsa nga paagi ang usa ka tawo motagad niana nga sitwasyon uban sa pagpaubos imbis sa garbo. Human sa panaghisgot, ipasabut nga gihatagan sa Ginoo si Sidney Rigdon og oportunidad sa pagsulat og laing paghulagway sa Zion (tan-awa sa D&P 63:56). Mihinulsol si Sidney ug misulat og laing paghulagway sa yuta sa Zion nga nadawat sa Ginoo.

Doktrina ug mga Pakigsaad 63:57–66

Nagtudlo si Jesukristo sa Iyang mga sulugoon sa paghinumdom sa ka sagrado sa Iyang ngalan ug sa pagpamulong uban sa ligdong nga pagtahud sa tanang sagradong mga butang

Basaha o i-summarize ang mosunod nga istorya gikan sa kinabuhi ni Presidente Spencer W. Kimball. Hangyoa ang mga estudyante sa pagpaminaw sa bisan unsang butang nga makadani kanila.

“Sa Hospital sa St. Mark didto sa Siyudad sa Salt Lake [si Presidente Spencer W. Kimball] gipakatulog pinaagi sa anestesia ug gioperahan, ug gisakay sa lamesa nga may ligid balik sa iyang kwarto. May anestesia pa, namatikdan ni Spencer nga ang iyang lamesa mihunong sa elevator ug nadungog ang attendant sa ospital, nasuko sa usa ka butang, nanampalas sa ngalan sa Ginoo. Wala pa kaayoy panimuot, mihangyo siya uban ang pinugos nga tingog: Palihug ayaw pagsulti niana. Gihigugma ko Siya labaw kay sa bisan unsang butang dinhi niining kalibutan. Palihug.’ Usa ka hingpit nga kahilum. Dayon ang attendant sa ospital hinay nga mitubag: Wala ko unta kadto isulti. Pasayloa ko’” (Edward L. Kimball and Andrew E. Kimball Jr., Spencer W. Kimball: Twelfth President of The Church of Jesus Christ of Latter-day Saints [1977], 264).

Unsa ang anaa niini nga istorya nga nakapadani kaninyo?
Sa unsa nga paagi nga ang balaang pagtahud ni Presidente Kimball alang sa ngalan sa Ginoo lahi sa paagi nga kadaghanan sa mga tawo sa kalibutan karon naggamit sa ngalan sa Ginoo?

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 63:59–64. Hangyoa ang klase sa pagsunod, nga mangita sa mga pulong nga nagtabang kanila sa pagsabut kon sa unsa nga paagi ang Ginoo gusto kanatong mogamit sa Iyang ngalan ug sa unsa nga paagi Siya gusto kanato nga mamulong kalabut sa tanang sagradong mga butang.

Unsa ang inyong nakit-an mahitungod sa unsa nga paagi kita kinahanglan mogamit sa ngalan sa Ginoo? (Samtang ang mga estudyante nag-ila sa mga pulong gikan sa bersikulo 64, dapita sila sa pag-summarize sa unang bahin sa bersikulo. Kinahanglan nga ilang ipahayag ang mosunod nga baruganan: Ang ngalan ni Jesukristo sagrado ug kinahanglan gayud nga ipamulong uban ang pag-amping. Isulat kini nga baruganan diha sa pisara.)

Dapita ang usa ka estudyante nga mahimong tigsulat diha sa pisara. Hangyoa ang klase sa paghingalan og pipila ka mga sitwasyon diin kita mahimong mogamit sa angay nga paagi sa ngalan ni Jesukristo, ug ipasulat kini diha sa pisara. Mahimong maghisgot ang mga estudyante nga atong gamiton ang ngalan sa Manluluwas diha sa mga pag-ampo, pakigpulong, pagpamatuod, ug mga ordinansa sa priesthood. Mahimo usab kitang mosulti mahitungod sa Manluluwas sa kada adlaw nga panagsinultihay, apan kinahanglan nga buhaton ang mao sa labing ligdong nga pagtahud.

Ngano sa inyong hunahuna kita gikinahanglan nga mogamit sa ngalan sa Manluluwas uban ang ligdong nga pagtahud?
Sa unsa nga paagi ang Doktrina ug mga Pakigsaad 63:62 nagdugang sa inyong pagsabut sa unsay kahulugan sa gamiton ang ngalan sa Ginoo sa kawang? Sa unsa nga paagi kini nga bersikulo magamit ngadto sa mga ordinansa sa priesthood?
Kon gamiton nato ang ngalan sa Manluluwas, unsa ang atong buhaton nga mahinumduman nga kini sagrado ug kinahanglan gayud nga ipamulong uban ang pag-amping?

Tabangi ang mga estudyante sa pagsabut nga ang mga kamatuoran nga inyong gihisgutan dili lamang gamiton diha sa ngalan sa Manluluwas.

Unsa ang uban nga mga pulong o mga hilisgutan nga “gikan sa kahitas-an” ug mga sagrado? Unsaon nato sa pagsiguro nga kita namulong mahitungod niini “uban sa pag-amping”?

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Wala nay labaw ka sagrado o ka importanting mga pulong sa tanan natong pinulongan kay sa mga ngalan sa Dios Amahan ug sa iyang Anak, si Jesukristo” (“Reverent and Clean,” Ensign, Mayo 1986, 50).

Ngano nga ang ngalan sa Dios Amahan ug ni Jesukristo sagrado nganha kaninyo?

Pagpamatuod kabahin sa Langitnong Amahan ug ni Jesukristo, ug ipasabut kon ngano nga ang ilang mga ngalan mga sagrado nganha kanimo. Dapita ang mga estudyante sa paghunahuna og mga paagi nga sila mahimong mogamit sa mga ngalan sa Langitnong Amahan ug ni Jesukristo sa labaw kaligdong nga pagtahud, ug awhaga sila sa pagbuhat niini.

Komentaryo ug Background nga Impormasyon

Doktrina ug mga Pakigsaad 63:25–27. “Ako, ang Ginoo, ihatag ngadto ni Cesar ang mga butang nga iya ni Cesar”

Sa Lucas 20:19–26, atong mabasa kon giunsa sa mga sacerdote nga punoan [chief priests] ug sa mga escriba sa pagpaninguha og bitik ni Jesus pinaagi sa pagpangutana Kaniya kon uyon ba sa balaod ang pagbayad og buhis ngadto sa Romanong emperador, si Cesar. Nasayud sila nga kon moingon Siya og oo, ang mga Judeo mosalikway Kaniya tungod kay gikasilagan nila ang mga Romano, kinsa nakabuntog kanila. Kon si Jesus moingon og dili, maka-report sila Niya ngadto sa mga Romano, kinsa modakop Kaniya tungod sa pagbudhi batok sa kamandoang Romano. Mipakita si Jesus og kwarta nga may dagway ni Cesar nga nahisulat niini ug miingon, “Nan, bayri ninyo si Cesar sa mga butang nga iya, ug ang Dios sa mga butang nga iya sa Dios” (bersikulo 25).

Sa panahon ni Propeta Joseph Smith, ang paggamit sa Ginoo niana nga istorya mitabang sa pagtudlo sa mga Santos nga bisan tuod ang tibuok yuta iya sa Ginoo, ang mga Santos sa gihapon kinahanglang mopalit sa mga yuta diin ang Ginoo misugo kanila sa pagtukod sa siyudad sa Zion. Kini nga pagpalit gikinahanglan alang sa mga Santos aron adunay uyon sa balaod nga pagpanag-iya sa yuta ug sa pagpugong sa panagbingkil mahitungod niini sa umaabut.

Doktrina ug mga Pakigsaad 63:50–51. Unsa “ ang mamatay sa katigulangon,” ug unsa ang ipasabut nga ang mga tawo “mausab diha sa usa ka pagpamilok sa mata”?

Ang propetang Isaias mipadayag nga sa panahon sa Milenyum, “wala na unyay bata nga sa pila lamang ka adlaw, ni usa ka tawong tigulang nga dili matugob sa iyang mga adlaw: kay ang bata mamatay sa usa ka gatus ka tuig” (Isaias 65:20).

Gitudlo usab ni Presidente Joseph Fielding Smith: “Ang mga tawo sa yuta mortal lang gihapon, apan usa ka kausaban moabut diha kanila aron sila adunay gahum ibabaw sa sakit, balatian ug kamatayon. Ang tanang kamatayon hinginlan gikan sa yuta, tungod kay ang mga tawo mabuhi hangtud sila moabut sa edad sa usa ka kahoy o usa ka gatus ang panuigon (Tan-awa sa [D&P] 63:50–51), ug dayon mamatay sa katigulangon, apan kini nga kamatayon moabut diha sa usa ka pagpamilok sa mata ug ang mortalidad sa kalit mapulihan sa imortalidad. Walay mga lubnganan, ug ang matarung pagabayawon ngadto sa usa ka mahimayaong pagkabanhaw” (Church History ang Modern Revelation 2 bol. [1953], 1:461).