Leksyon 132
Doktrina ug mga Pakigsaad 124:22–83
Pasiuna
Niadtong Enero 19, 1841, gisugo sa Ginoo ang mga Santos sa pagtukod og templo didto sa Nauvoo, Illinois. Niini nga pagpadayag, nga narekord diha sa Doktrina ug mga Pakigsaad 124, gipasabut sa Ginoo ang mga panalangin nga maangkon sa mga Santos kon magmakugihon sila sa pagtukod sa templo. Gisugo usab sa Ginoo ang mga Santos sa pagtukod og usa ka balay kon asa makaistar ang mga magbiyahe didto sa Nauvoo.
Mga Sugyot alang sa Pagtudlo
Doktrina ug mga Pakigsaad 124:22–41, 56–83
Gisugo sa Ginoo ang mga Santos sa pagtukod og usa ka templo ug usa ka balay alang sa mga bisita didto sa Nauvoo
Sa dili pa magklase, isulat ang mosunod nga pangutana diha sa pisara: Unsa man ang butang nga inyong nakab-ot nga nagkinahanglan og dakong panahon, paningkamot, o sakripisyo sa inyong bahin? Sa pagpangabut sa mga estudyante, hangyoa sila nga mahimong andam sa pagtubag niini nga pangutana. Human sa debosyonal, hangyoa ang pipila ka estudyante sa pagpakigbahin sa ilang mga tubag ngadto sa klase.
-
Nganong ang inyong nakab-ot angay lamang sa panahon, paningkamot, o sakripisyo nga gikinahanglan niini?
Ipasabut nga niadtong 1841 usa ka dakong bahin sa mga Santos ang namalhin ngadto sa Nauvoo, Illinois. Dapita ang mga estudyante sa pagbasa og hilum sa Doktrina ug mga Pakigsaad 124:25–27, nga mangita kon unsay gisugo sa Ginoo nga buhaton sa mga Santos didto sa Nauvoo.
-
Unsa ang gisugo sa Ginoo nga buhaton sa mga Santos?
-
Unsay gusto sa Ginoo nga gamiton sa mga Santos sa pagtukod sa templo?
Dapita ang usa ka estudyante sa pagbasa og kusog sa Doktrina ug mga Pakigsaad 124:28. Hangyoa ang klase sa pagsunod, nga mangita sa rason nga gihatag sa Ginoo nganong kinahanglang magtukod og templo ang mga Santos.
-
Nganong kinahanglang magtukod og templo ang mga Santos? (Aron dunay dapit diin ang Ginoo makaadto ug makapahiuli sa kahingpitan sa priesthood.)
Aron matabangan ang mga estudyante nga makasabut sa mga pulong nga “kahingpitan sa pagkapari [priesthood]” diha sa bersikulo 28, dapita ang usa ka estudyante sa pagbasa sa mosunod nga pamahayag ni Presidente Joseph Fielding Smith:
“Matag lalaki nga matinud-anon ug modawat niining mga ordinansa ug mga panalangin makabaton og kahingpitan sa priesthood, ug ang Ginoo miingon nga ‘siya mihimo kanila og managsama sa gahum, ug sa kusog, ug sa kamandoan’ [D&P 76:95; tan-awa usab sa D&P 88:107]. … Ang Ginoo mihimo niining posible alang sa matag lalaki niining Simbahan, pinaagi sa iyang pagkamasulundon, nga makadawat sa kahingpitan sa priesthood pinaagi sa mga ordinansa sa templo sa Ginoo. Dili kini madawat sa bisan asa nga dapit (sa Doctrines of Salvation, comp. Bruce R. McConkie, 3 vols. [1954–56], 3:132–33).
Ipasabut nga tanang miyembro sa Simbahan—mga lalaki ug babaye—makadawat sa kahingpitan sa mga panalangin sa priesthood pinaagi sa pagdawat sa tanang ordinansa sa templo. Pinaagi niining mga ordinansa, mahimo kitang makadawat sa tanang panalangin nga gitinguha nga ihatag sa Langitnong Amahan sa Iyang mga anak. Ipasabut nga ang pagpahiuli sa mga ordinansa ug mga pakigsaad sa templo nagsugod didto sa Templo sa Kirtland apan wala makompleto. Ang pagtukod og templo didto sa Nauvoo motugot nga magpadayon ang pagpahiuli sa mga ordinansa ug mga pakigsaad sa templo (tan-awa sa D&P 124:28, 40–41).
-
Unsa ang ordinansa? (Usa ka sagrado, pormal nga aksyon nga gipahigayon pinaagi sa awtoridad sa priesthood.)
Ipasabut nga ang ubang mga ordinansa importante sa kahimayaan, ug daghan niining makaluwas nga mga ordinansa ang mapahigayon lamang diha sa mga templo. Dapita ang mga estudyante sa pagbasa og hilum sa Doktrina ug mga Pakigsaad 124:29, nga mangita sa usa niining importante nga mga ordinansa sa templo nga gipasabut sa Ginoo nga kinahanglang ipahiuli. Hangyoa ang mga estudyante sa pag-report kon unsay ilang nakit-an.
Ipasabut nga niadtong Agosto 15, 1840, si Propeta Joseph Smith unang mitudlo nga ang mga Santos mahimong makapahigayon sa makaluwas nga mga ordinansa sama sa bunyag alang sa namatay na nilang mga sakop sa pamilya ug mga higala nga walay oportunidad nga makadawat sa ebanghelyo (tan-awa sa Mga Pagtulun-an sa mga Presidente sa Simbahan: Joseph Smith [2007], 489). Human niini nga pahibalo, daghang bunyag alang sa mga patay ang gipahigayon didto sa Suba sa Mississippi o sa duol nga mga sapa.
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 124:30–34. Hangyoa ang klase sa pagsunod, nga mangita sa direksyon sa Ginoo kalabut kon asa angayang ipahigayon ang ordinansa sa bunyag alang sa mga patay.
-
Asa man ang giingon sa Ginoo nga angayang ipahigayon ang ordinansa sa bunyag alang sa mga patay aron madawat kini ngadto Kaniya? Nganong gitugutan man sa Ginoo ang mga Santos nga temporaryong mopahigayon og mga bunyag sa gawas sa templo?
Mahimo nimong i-display ang litrato sa Templo sa Nauvoo (Libro sa mga Hulagway sa Ebanghelyo [2009], nu. 118; tan-awa usab sa LDS.org). Ipasabut nga human madawat ni Joseph Smith ang pagpadayag diha sa Doktrina ug mga Pakigsaad 124, ang trabaho sa templo daling miuswag. Niadtong Oktubre 3, 1841, human parsyal nga nakompleto ang basement sa templo, giingnan ni Joseph Smith ang mga Santos, “Wala nay mga bunyag alang sa mga patay, hangtud ang ordinansa pagahimoon didto sa Balay sa Ginoo. … Kay sa ingon namulong ang Ginoo!” (Mga Pagtulun-an: Joseph Smith, 567, 569). Niadtong Nobyembre 21, 1841, human ang bunyaganan natukod ug napahinungod didto sa basement sa Templo sa Nauvoo, nagpadayon ang mga bunyag alang sa mga patay. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 251–52; Mga Pagtulun-an: Joseph Smith, 567–69.)
Sa dihang natukod ang Templo sa Nauvoo, gimando ni Propeta Joseph Smith nga magtukod diha sa basement og bunyaganan nga nagpatong sa likod sa dose ka baka, nga nagrepresentar sa dose ka tribo sa Israel.
-
Sumala sa Doktrina ug mga Pakigsaad 124, asa lamang ang bugtong dapit nga ang kahingpitan sa mga ordinansa priesthood mabatunan alang sa katubsanan sa mga buhi ug sa mga patay? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Ang templo mao lamang ang bugtong dapit nga atong mabatunan ang kahingpitan sa mga ordinansa sa priesthood alang sa katubsanan sa mga buhi ug sa mga patay.)
-
Sa unsa kaha nga paagi nga kining doktrina nakapadasig sa mga Santos nga mohimo sa gikinahanglan nga mga sakripisyo sa pagtukod og templo didto sa Nauvoo?
Aron matabangan ang mga estudyante nga mobati sa kamatuoran ug kaimportante niini nga doktrina, dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson. (Mahimo nimong hatagan ang matag estudyante og kopya sa pamahayag.)
“Kadtong nakasabut sa mahangturong mga panalangin nga magagikan sa templo nasayud nga walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo, aron makadawat niana nga mga panalangin. Walay daghang mga milya nga biyahion, daghang mga babag nga buntugon, o daghang pagkadili komportable ang ilahutay. Nakasabut sila nga ang makaluwas nga mga ordinansa nga madawat sa templo nga magtugot kanato nga makabalik sa atong Langitnong Amahan diha sa mahangturong relasyon sa pamilya ug aron matugahan sa mga panalangin ug gahum gikan sa kahitas-an bililhon sa tanang sakripisyo ug tanang paningkamot” (“Ang Balaan nga Templo—ang Suga sa Kalibutan,” Liahona, Mayo 2011, 92).
-
Unsa kaha nga mga sakripisyo ang kinahanglan ninyong himoon aron mahimong takus ug andam sa pagdawat sa mga ordinansa sa templo?
Dapita ang usa ka estudyante sa pagbasa og kusog sa Doktrina ug mga Pakigsaad 124:38–41. Hangyoa ang klase sa pagsunod ug sa pagpangita kon nganong gisugo sa Ginoo si Moises sa pagtukod og usa ka tabernakulo didto sa kamingawan ug nganong Iyang gimanduan ang Iyang katawhan nga magtukod og templo sa yuta nga saad. (Mahimong kinahanglan nimong ipasabut nga si Moises ug ang iyang katawhan wala mopahigayon og mga bunyag alang sa mga patay. Walay buhat alang sa mga patay ang gipahigayon hangtud gipasiugdahan sa Manluluwas kana nga buhat didto sa kalibutan sa mga espiritu human sa Iyang kamatayon.)
-
Sumala sa bersikulo 38, nganong gisugo man sa Ginoo ang karaang mga Israelite nga magtukod og usa ka tabernakulo ug mga templo?
Isulat ang mosunod nga duha ka pangutana diha sa pisara:
Nganong importante man kaninyo ang templo? Nganong ang Simbahan nagtukod man og mga templo?
Ipares-pares ang mga estudyante sa ilang pagtrabaho. Hangyoa ang matag estudyante sa pagpili og usa sa mga pangutana diha sa pisara. Dapita ang mga estudyante sa pag-atubang sa ilang mga partner ug magpuli-puli sa pagtubag sa ilang mga pangutana base sa unsay ilang nakat-unan diha sa Doktrina ug mga Pakigsaad 124:25–41. Agig dugang, mahimo nimong dapiton ang pipila ka estudyante sa pagpakigbahin sa ilang mga ideya (o niadtong sa ilang partner) ngadto sa klase.
Mahimo nimong i-summarize ang Doktrina ug mga Pakigsaad 124:22–24, 56–83 pinaagi sa pagpasabut nga agig dugang sa templo, gimanduan sa Ginoo ang mga Santos nga magtukod og laing estruktura nga gitawag og Balay sa Nauvoo, kon asa makaistar ang mga bisita sa Nauvoo.
Doktrina ug mga Pakigsaad 124:42–55
Gipasabut sa Ginoo kon unsay mahitabo kon ang mga Santos motuman sa sugo nga magtukod og usa ka templo
Dapita ang mga estudyante sa pagbasa og hilum sa Doktrina ug mga Pakigsaad 124:42–45, nga mangita kon unsay giingon sa Ginoo nga mahitabo kon tukuron sa mga Santos ang templo ug mopatalinghug sa Iyang tingog ug sa tingog sa Iyang mga sulugoon. Hangyoa ang mga estudyante sa pag-report kon unsay ilang nakit-an.
I-summarize ang Doktrina ug mga Pakigsaad 124:46–54 pinaagi sa pagpasabut nga gisultihan sa Ginoo ang mga Santos kon unsay mahitabo kon ilang tukuron ang templo apan dili mopatalinghug sa Iyang tingog o sa tingog sa Iyang mga sulugoon. Gipasabut usab sa Ginoo nga Iyang dawaton ang mga paningkamot sa mga Santos sa pagtuman sa Iyang buhat (lakip na ang pagtukod og mga templo) bisan kon gipugngan sila sa pagbuhat sa ingon tungod sa pagpanggukod nga ilang gisagubang.
Dapita ang usa ka estudyante sa pagbasa og kusog sa Doktrina ug mga Pakigsaad 124:55. Hangyoa ang klase sa pagsunod, nga mangita kon unsay gipamahayag sa Ginoo nga mapamatud-an sa mga Santos ngadto Kaniya pinaagi sa pagsunod sa Iyang sugo sa pagtukod sa Templo sa Nauvoo.
-
Sumala sa bersikulo 55, unsay atong mapamatud-an ngadto sa Ginoo kon mosunod kita sa Iyang mga sugo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Pinaagi sa pagsunod sa mga sugo sa Ginoo, mapamatud-an nato ang atong pagkamatinud-anon. Mahimo nimong isulat kini nga baruganan diha sa pisara.)
Dapita ang mga estudyante sa pagpamalandong sa paningkamot, panahon, ug sakripisyo nga usahay dunay kalabutan sa pagtuman sa mga sugo sa Ginoo.
-
Sa unsang paagi nga ang oportunidad nga mapamatud-an ang inyong pagkamatinud-anon ngadto sa Dios makapadasig kaninyo sa pagsunod sa Iyang mga sugo?
-
Sumala sa bersikulo 55, unsay dugang nga mga panalangin nga gisaad sa Ginoo sa mga Santos kon tukuron nila ang templo sa Nauvoo?
Ipasabut nga ang mga panalangin sa dungog, walay kamatayon [imortalidad], ug kinabuhing dayon nga gisaad diha sa bersikulo 55 mahangturon.
-
Nganong importante nga masabtan nga ang mga panalangin nga atong madawat tungod sa atong pagkamatinud-anon sa Ginoo mahimong dili diha-diha dayon?
Dapita ang mga estudyante sa pagpamalandong sa mga higayon sa ilang kinabuhi sa dihang sila nagmasulundon sa usa ka sugo tungod sa tinguha nga mahimong maunungon ug matinud-anon sa ilang Langitnong Amahan ug sa Manluluwas. Dapita ang pipila ka estudyante sa pagpakigbahin sa ilang mga kasinatian ug mga pagbati mahitungod sa pagpakita sa Ginoo sa ilang pagkamaunungon ug pagkamatinud-anon. Dapita ang mga estudyante sa pagpangita og mga oportunidad nga mapamatud-an ang ilang pagkamatinud-anon ngadto sa Ginoo.
Komentaryo ug Background nga Impormasyon
Doktrina ug mga Pakigsaad 124:45. “Sila dili papahawaon sa ilang dapit”
Sa dihang gisugo sa Ginoo ang mga Santos sa pagtukod og templo, misaad usab Siya nga sila “dili papahawaon sa ilang dapit.”
Si Presidente Boyd K. Packer sa Korum sa Napulog Duha ka mga Apostoles miingon:
“Atol sa lisud kaayo nga panahon, mihatag ang Ginoo og hilabihan ka higpit nga pasidaan nga akong nahibaloan sa tibuok kasulatan. Duna kini kalabutan sa pagtukod sa Templo sa Nauvoo. Nahibalo ang mga Santos gikan sa kasinatian nga ang pagpadayon sa pagtukod og usa ka templo magdala og makalilisang nga pagpanggukod, mao nga ila kining gilangay. Gilugwayan sa Ginoo ang panahon ug miingon, ‘Kon kamo dili mobuhat niini nga mga butang sa katapusan sa panahon kamo isalikway ingon nga usa ka simbahan, uban sa inyong mga patay, miingon ang Ginoo nga inyong Dios’ [D&P 124:32].
“Kasagaran nga mataligam-an niana nga pagpadayag mao ang talagsaong saad: ‘Kon ang akong mga katawhan mopatalinghug ngadto sa akong tingog, ug ngadto sa tingog sa akong mga sulugoon kinsa Ako mitudlo sa pagpangulo sa akong mga katawhan tan-awa, sa pagkatinuod Ako moingon nganha kaninyo, sila dili papahawaon sa ilang dapit’ [D&P 124:45].
“Hinumdumi kini nga saad; hupti kini. Mahimo kining usa ka dakong kahupayan niadtong nanglimbasug nga mapabiling magkahiusa ang pamilya sa usa ka katilingban nga nagkaanam kawalay pagtagad, ug gani mobatok, niadtong mga sumbanan nga mahinungdanon sa usa ka malipayong pamilya. …
“Sublion ko ang saad nga kadtong mopatalinghug sa tingog niining kalalakin-an nga gitawag sa Ginoo ‘dili papahawaon sa ilang dapit’ [D&P 124:45].
“Apan ang saad gisundan niini nga pasidaan: ‘Apan kon sila dili mopatalinghug sa akong tingog, ni ngadto sa tingog niini nga mga tawo kinsa Ako mitudlo, sila dili mapanalanginan’ [D&P 124:46]” (The Twelve Apostles,” Ensign, Sept. 2005, 20).