Home-Study nga Leksyon

Ang Pagpuli sa Kapangulohan, ang Pagbiya sa Nauvoo, ug ang Pagbaktas Padulong sa Kasadpan (Unit 30)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod mao ang summary sa mga doktrina ug mga baruganan nga nakat-unan sa mga estudyante samtang sila nagtuon sa unit 30. Kini nga summary dili tuyo nga itudlo isip kabahin sa imong leksyon. Ang leksyon nga imong itudlo alang sa unit 30 magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Ang Pagpuli sa Kapangulohan)

Nakat-unan sa mga estudyante ang mosunod nga mga baruganan mahitungod sa pagpuli sa kapangulohan: Ang mga Apostoles naghupot sa tanang mga yawe sa priesthood nga gikinahanglan sa pagdumala sa Simbahan. Kon ang Presidente sa Simbahan mamatay, ang Unang Kapangulohan ma-dissolve ug ang Korum sa Napulog Duha ka mga Apostoles mahimong tigdumalang korum ubos sa direksyon sa senior nga Apostol. Pinaagi sa Espiritu Santo, makadawat kita og usa ka pagsaksi nga kadtong kinsa mangulo sa Simbahan gitawag sa Dios.

Day 2 (Ang Pagbiya sa Nauvoo; ang Pagbaktas Latas sa Iowa; Doktrina ug mga Pakigsaad 136:1–18)

Pinaagi sa pagtuon bahin sa mga paningkamot sa mga Santos sa paghuman sa Templo sa Nauvoo sa wala pa sila gipwersa sa pagbiya sa Illinois, nakat-unan sa mga estudyante nga ang pagdawat sa mga ordinansa sa templo angay lang sa tanan natong matarung nga paningkamot ug sakripisyo. Nakat-unan usab nila nga ang Ginoo nagkinahanglan nga mosunod kita sa mga pakigsaad nga atong gihimo.

Day 3 (Doktrina ug mga Pakigsaad 136:19–42)

Samtang gitun-an sa mga estudyante ang pinadayag nga narekord sa Doktrina ug mga Pakigsaad 136, ilang nakat-unan nga kon kita malipayon kinahanglan kita nga modayeg ug mopasalamat sa Langitnong Amahan ug kon kita magmasulub-on, kinahanglan kita nga mag-ampo nga ang atong mga kalag unta magmalipayon. Ilang nadiskubrihan nga ang atong mga pagsulay makaandam kanato sa pagdawat sa himaya sa Dios alang kanato ug kon magmapainubsanon kita sa atong kaugalingon ug mosangpit sa Dios, nan ang Espiritu molamdag kanato. Nakat-unan usab nila nga kon kita magkugi sa pagtuman sa mga sugo sa Ginoo, nan ang mga paghukom sa Ginoo dili moabut kanato, ang atong pagtuo malig-on, ug ang atong mga kaaway dili molampus batok kanato.

Day 4 (Ang mga Handcart Pioneer, 1856–60)

Nakat-unan sa mga estudyante ang mahitungod sa mga pagsulay sa mga handcart pioneer ug nakadiskubre nga kon kita mapailubon nga mag-antus alang sa ikaayo sa ebanghelyo, mahimo kita nga mabalaan. Ilang nakat-unan nga isip mga disipulo ni Jesukristo, angay kitang motabang niadtong mga nanginahanglan. Nakat-unan usab nila nga kon kita matinud-anon nga molahutay sa pag-antus, makaila kita sa Dios.

Pasiuna

Pinaagi niining leksyon masabtan sa mga estudyante nga sila kinahanglang magpakita og hugot nga pagtuo kon sila mosunod sa tambag ug giya sa atong mga lider sa Simbahan. Makat-unan usab nila nga ang Ginoo mopanalangin kanila kon sila motabang sa uban nga nanginahanglan ug moandam sa agianan alang kanila.

Mga Sugyot alang sa Pagtudlo

Doktrina ug mga Pakigsaad 136:1–18

Ang Ginoo mitambag sa mga Santos sa pag-organisar sa ilang mga kaugalingon ug mangandam sa pagpadayon sa ilang panaw sa kasadpan

Taptapi ang mata sa usa ka estudyante ug ipahimutang siya diha sa daplin sa kwarto. Dayon usba sa paghan-ay ang mga butang diha sa kwarto, nga maghimo og kasaba aron ang estudyante makaingon nga ang mga butang gibalhin. Pangutan-a ang gitaptapan nga estudyante sa pagpili og usa ka kauban aron makasulti sa direksyon sa pagtabang niya nga makaadto sa pikas nga bahin sa kwarto. Kon ang estudyante mopili og usa ka tawo, ipangutana:

• Nganong gipili man nimo kana nga tawo?

• Sa unsang paagi nga ang atong pagsalig sa laing tawo makaimpluwensya kon unsaon nato sa pagsunod sa ilang direksyon?

Hangyoa ang giya sa paghatag og mga direksyon aron ang gitaptapan nga estudyante makahimo sa paglakaw nga luwas ngadto sa pikas nga bahin sa lawak. Dayon sultihi ang duha ka estudyante sa pagbalik ngadto sa ilang mga lingkuranan.

Dapita ang usa ka estudyante sa pagbasa og kusog sa mosunod nga paragraph mahitungod sa pagbiya sa mga Santos gikan sa Nauvoo. Hangyoa ang klase sa pagpaminaw sa mga paagi nga ang kasinatian sa mga Santos mahimong sama sa kasinatian sa estudyante nga gigiyahan sa pagtabok sa classroom.

Ubos sa mga hulga sa kabayolente gikan sa manggugubot nga panon, ang mga Santos nagsugod sa pagbiya sa Nauvoo niadtong Pebrero 1846, nga nagpanaw paingon sa kasadpan latas sa estado sa Iowa. “Ang pagbiya sa Nauvoo mao ang usa ka buhat sa hugot nga pagtuo alang sa mga Santos. Mibiya sila nga dili sigurado asa gayud sila mopaingon o kon kanus-a sila maabut sa usa ka dapit nga kapuy-an. Ang ila lang nahibaloan nga sila gipalayas sa Illinois pinaagi sa ilang mga kaaway ug ang ilang mga lider nakadawat og pagpadayag sa pagpangita og usa ka kadangpan didto sa Rocky Mountains” (Church History in the Fulness of Times Student Manual, 2nd ed. [manwal sa Church Educational System, 2003], 309).

• Sa unsang paagi nga ang kasinatian sa mga Santos nga mibiya sa Nauvoo susama ngadto sa kasinatian sa estudyante nga gigiyahan sa pagtabok sa classroom?

• Unsa ang atong makat-unan gikan sa kasinatian sa mga Santos nga mibiya sa Nauvoo? (Ang mga estudyante mahimong mogamit og lain-laing mga pulong, apan kinahanglan nilang ipahayag ang mosunod nga baruganan: Nagpakita kita og hugot nga pagtuo kon kita mosunod sa tambag ug giya sa atong mga lider sa Simbahan. Mahimo nimong isulat sa pisara kini nga baruganan.)

Dapita ang mga estudyante sa pagpakli ngadto sa Mapa 6 (“Ang Paingon sa Kasadpan nga Kalihokan sa Simbahan”) diha sa seksyon sa mga Mapa sa Kasaysayan sa Simbahan sa ilang mga kasulatan ug pangitaon ang Nauvoo ug ang Winter Quarters. Ipasabut nga tungod sa naghinubra nga ulan ug dili igo nga kagamitan, ang mga Santos nga mibiya sa Nauvoo niadtong Pebroro 1846 migahin og upat ka bulan sa 300 ka milya nga pagbiyahe tabok sa Iowa. Mihinay ang pag-abante sa grupo tungod niini nga mga kahimtang ug tungod kay sila nawad-an og kapin sa 500 ka baskog nga mga Santos sa Ulahing mga Adlaw nga mga kalalakin-an. Kini nga mga kalalakin-an, kinsa naila isip ang Mormon Battalion, mitubag sa tawag ni Presidente Brigham Young sa pag-apil sa United States Army aron makakwarta aron itabang sa kabus nga mga miyembro sa Simbahan nga makabiyahe sa kasadpan. Kini nga sakripisyo nakatabang sa daghang mga paagi, apan daghan usab nga mga pamilya ang napasagdan nga wala ang mga bana ug mga amahan sa usa ka bahin panahon sa panaw. Naghunahuna niining hinay nga pag-abante, ang mga lider sa Simbahan nakahukom sa dili pagpadayon paingon sa kasadpan ngadto sa Rocky Mountains hangtud sa tingpamulak sa 1847. Sila mitambag sa mga Santos sa pagpahimutang alang sa tingtugnaw. Usa sa pinakadakong mga pinuy-anan, ang Winter Quarters, nahimutang sa kasadpan nga bahin sa Suba sa Missouri, diha sa moderno nga estado sa Nebraska.

Dapita ang usa ka estudyante sa pagbasa og kusog sa mosunod nga deskripsyon sa Winter Quarters ug sa ubang temporaryong pinuy-anan:

Daghan sa mga Santos nagpuyo sa mga balay nga ginama sa troso ug mga willow ug yuta. Daghang tawo ang nakulangan og kapasilungan gikan sa tugnaw nga panahon. Mga sakit sama sa malaria, pneumonia, tuberculosis, cholera, ug scurvy miresulta sa daghang pag-antus ug sa kamatayon. Kapin sa 700 ka mga tawo ang namatay sa mga kampo sa pagtapos sa unang tingtugnaw. (Tan-awa sa Ang Atong Panulundon: Usa Ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw [1996], 71–72; Church History in the Fulness of Times Student Manual, 319–20).

• Kon nakauban pa kamo sa mga Santos didto sa Winter Quarters, unsa kaha ang inyong bation, nga nakaamgo nga kinahanglan pa kamong mobiyahe og gatusan pa ka mga milya?

Mahimo nimong ipasabut nga bisan atol niining panahona sa pag-antus ug sa kamatayon, ang matarung nga mga Santos napanalanginan tungod sa mga pakigsaad nga ilang gihimo. Mahimo usab nimong ipasabut nga ang Ginoo misaad og dagkong mga panalangin niadtong namatay diha sa pagserbisyo Kaniya (tan-awa sa Alma 40:11–12; 60:13; D&P 42:46).

Hangyoa ang mga estudyante sa pagbasa sa pasiuna sa seksyon sa Doktrina ug mga Pakigsaad 136, nga mangita kon diin kini nga pagpadayag gihatag ug kinsa ang nakadawat niini. Hangyoa sila sa pag-report kon unsay ilang nakit-an.

Dapita ang usa ka estudyante sa pagbasa og kusog sa Doktrina ug mga Pakigsaad 136:1.

• Sa unsa kaha nga paagi nga nakatabang sa mga Santos ang makahibalo nga ang Ginoo nagpadayon sa pagpadayag sa Iyang kabubut-on ngadto kanila?

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 136:2–5. Hangyoa ang klase sa pagsunod, nga mangita kon unsay gisugo sa Ginoo nga buhaton sa mga Santos sa pagpangandam sa pagpadayon sa ilang panaw ngadto sa kasadpan.

• Unsaon pag-organisar sa mga pundok?

• Ngano kaha nga nakatabang man ang pag-organisar sa mga Santos ngadto sa mga grupo inubanan sa napili nga mga lider? Sa unsang paagi nga kini susama sa paagi sa pag-organisar sa Simbahan karon? (Human motubag ang mga estudyante niining mga pangutana, mahimo nimong isulat ang mosunod nga kamatuoran diha sa pisara: Ang Ginoo nag-organisar sa Iyang mga Santos ngadto sa mga grupo aron nga ang matag usa ka tawo magiyahan ug maamumahan.)

Ipasabut nga tungod sa pagkasakit ug kamatayon didto sa Winter Quarters ug sa nagpalibut nga mga kampo, daghang mga pamilya ug mga indibidwal angnagkinahanglan og pinansyal nga tabang aron sila makapadayon sa ilang biyahe sa kasadpan.

Ipares-pares ang mga estudyante. Hangyoa sila nga magdungan sa pagtuon sa Doktrina ug mga Pakigsaad 136:6–11, nga mangita og mga paagi nga ang mga Santos kinahanglang moatiman niadtong mga nanginahanglan. (Mahimo nimong isugyot nga ilang markahan kon unsay ilang makit-an.) Sa dili pa mobasa ang mga estudyante niining tudling, ipasabut nga ang mga Santos wala mopahawa sa Winter Quarters sa samang higayon. Ang mga pulong nga “niadto kinsa magpabilin” sa bersikulo 6 nagpasabut sa mga Santos nga nagpabilin sulod sa usa ka panahon sa Winter Quarters ug sa palibut sa mga kampo.

• Unsa nga mga pulong diha sa mga bersikulo 6–11 nga nagpakita kon sa unsang paagi nga ang mga Santos kinahanglang moatiman niadtong mga nanginahanglan?

• Unsa nga pulong diha sa bersikulo 7 ang nagpasabut sa mga tawo kinsa miandam sa agianan alang sa uban? (Mga pioneer.)

Isulat ang mosunod nga kahulugan diha sa pisara. (Kini kinutlo gikan sa Oxford English Dictionary, 2nd ed. [1989], “pioneer.”)

Pioneer: Usa ka tawo kinsa mag-una aron sa pag-andam o pag-abli sa agianan alang sa uban nga mosunod.

• Sumala sa bersikulo 11, unsa ang gisaad sa Ginoo niadtong kinsa motabang sa uban nga nanginahanglan ug moandam sa agianan alang kanila? Unsay atong makat-unan gikan niini? (Human motubag ang mga estudyante, mahimo nimong isulat ang mosunod nga baruganan diha sa pisara: Ang Ginoo mopanalangin kanato kon kita motabang sa uban nga nanginahanglan ug moandam sa agianan alang kanila.)

• Kinsa ang nag-andam sa agianan alang kaninyo aron matagamtam ang mga panalangin sa ebanghelyo?

Hangyoa ang mga estudyante sa pagpamalandong sa mosunod nga mga pangutana. Dayon dapita ang pipila sa pagpakigbahin sa ilang mga tubag ngadto sa klase.

• Unsa ang inyong buhaton aron mahimong pioneer—sa pagtabang sa uban nga nanginahanglan ug mag-andam sa agianan alang kanila nga makatagamtam sa mga panalangin sa ebanghelyo?

Tapusa pinaagi sa pagpamatuod sa mga kamatuoran nga inyong nahisgutan ug awhaga ang mga estudyante nga molihok sumala niadtong mga kamatuoran.

Sunod nga Unit (Ang Gubat sa Utah ug ang Mountain Meadows Massacre, ang Pagtungha sa Perlas nga Labing Bililhon, Opisyal nga Pahayag 1, ug Doktrina ug mga Pakigsaad 138)

Aron matabangan ang mga estudyante sa pag-andam sa ilang pagtuon sa mosunod nga semana, hangyoa sila sa pagkonsiderar sa mosunod nga pangutana: Unsa ang pipila ka mga sangputanan sa pagsulay sa pagtago sa sala? Sa sunod nga unit makat-unan sa mga estudyante ang mahitungod sa usa ka subo nga panghitabo nga gitawag og Mountain Meadows Massacre nga nahitabo sa dihang ang pipila ka mga miyembro sa Simbahan misulay sa pagtago sa ilang mga sala. Makat-unan usab nila ang mahitungod sa paglambo sa Simbahan samtang ang mga Santos namuyo didto sa Salt Lake Valley.