Doktrina ug mga Pakigsaad 45–48 (Unit 11)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 45–48 (unit 11) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 45:1–15)

Sa pangbukas nga mga bersikulo sa Doktrina ug mga Pakigsaad 45, mabasa sa mga estudyante nga si Jesukristo milalang sa langit ug yuta ug nga Siya mao ang atong manlalaban ngadto sa Langitnong Amahan. Samtang nagkat-on kita mahitungod sa Manluluwas ug sa unsay Iyang nahimo alang kanato, makapalambo kita sa atong tinguha sa pagpatalinghug ngadto sa Iyang tingog.

Day 2 (Doktrina ug mga Pakigsaad 45:16–75)

Gikan sa pagtuon sa mga timailhan sa Ikaduhang Pag-anhi ni Jesukristo, nakat-unan sa mga estudyante nga kon kita mobarug sa balaang mga dapit ug magbantay sa mga timailhan, kita maandam alang niana nga mahinungdanong panghitabo. Gikan sa sambingay sa napulo ka dalagang birhen, ilang nakat-unan nga kon kita modawat sa kamatuoran ug modawat sa Balaang Espiritu isip atong giya, makalahutay kita sa Ikaduhang Pag-anhi sa Manluluwas. Kini nga leksyon mipaila usab sa mga estudyante ngadto sa impormasyon mahitungod sa Bag-ong Jerusalem.

Day 3 (Doktrina ug mga Pakigsaad 46)

Ang mga estudyante migahin og panahon dinhi niining leksyon sa paghunahuna kon sa unsang paagi ipahigayon ang mga miting sa Simbahan. Ilang nakat-unan nga ang mga lider sa Simbahan kinahanglang magiyahan pinaagi sa Balaang Espiritu samtang magpahigayon sila sa mga miting ug ang Ginoo nagsugo kanato sa pag-abi-abi sa tanang mga tawo ngadto sa atong mga miting sa publiko. Nahibaloan usab sa mga estudyante ang mga paagi sa paglikay nga malingla: (1) sundon ang Espiritu sa tanang kabalaan ug (2) motawag sa Dios ug magpakabuhi diha sa pagpasalamat ngadto Kaniya. Gitun-an dayon sa mga estudyante ang mahitungod sa mga katuyoan sa espirituhanon nga mga gasa.

Day 4 (Doktrina ug mga Pakigsaad 47–48)

Samtang nagkat-on ang mga estudyante mahitungod sa kaimportante sa pagtipig og mga rekord sa Simbahan, ilang nadiskubrihan ang kamatuoran nga kon kita magmatinud-anon sa atong mga paningkamot sa pagtipig og personal nga mga kasaysayan, ang Espiritu motabang kanato. Samtang gitun-an sa mga estudyante ang konteksto sa kasaysayan sa milalin nga mga Santos nga nangabut didto sa Ohio gikan sa New York, ilang gipamalandungan ang mando sa Ginoo sa pagpakigbahin sa unsay anaa kanato ngadto sa mga nanginahanglan.

Pasiuna

Kini nga leksyon mahitungod kon unsa ka mahunahunaon si Jesukristo kanatong tanan. Makaangkon og oportunidad ang mga estudyante sa pagkonektar sa mga doktrina ug mga baruganan nga ilang nakat-unan sa tibuok semana kon giunsa sa pagpakita sa Ginoo ang Iyang gugma ngari kanato.

Pahinumdom: Sa ilang personal nga pagtuon, ang mga estudyante magsag-ulo ug mogamit sa scripture mastery passage diha sa Doktrina ug mga Pakigsaad 46:33. Mahimo nimong hangyoon sila sa pag-recite niini ug ipakigbahin kon sa unsang paagi nga ang mga batan-on “mopalambo og hiyas ug pagkabalaan diha sa atubangan [sa Ginoo] kanunay.”

Mga Sugyot alang sa Pagtudlo

Doktrina ug mga Pakigsaad 45-46

Ang Ginoo nagtudlo mahitungod sa importanting mga panghitabo ug sa mga gasa sa katapusang mga adlaw

Isulat ang mosunod nga pangutana diha sa pisara: Kinsa ang naghunahuna kaninyo karon?

Mahimo nimong awhagon ang mga estudyante nga mogahin og panahon sa pagribyu sa Doktrina ug mga Pakigsaad 45–46, nga mangita sa mga bersikulo nga ilang gimarkahan ug sa bisan unsang mga kamatuoran nga ilang nahibaloan nga nagsuporta sa ideya nga ang Manluluwas naghunahuna kanila ug adunay personal nga interes diha kanila. Hangyoa ang mga estudyante sa pagpamalandong sa pangutana diha sa pisara, ug dapita sila sa pagtubag.

Unsa ang inyong nakat-unan sa inyong pagtuon niining semanaha nga nakatabang kaninyo nga makasabut nga ang Ginoo naghunahuna kaninyo? (Ang mga tubag sa mga estudyante mahimong maghulagway sa mosunod nga mga ideya: Ang Manluluwas mao ang atong manlalaban ngadto sa Amahan; ang Manluluwas mipakita sa Iyang gugma alang kanato pinaagi sa pagpadayag sa mga panghitabo sa dili pa ang Ikaduhang Pag-anhi; ug ang Dios naghatag kanato og mga gasa sa Espiritu samtang kita magtinguha ug magpakabuhi nga takus niini.)

Pahinumdumi ang mga estudyante nga niining panahona sa kasaysayan sa Simbahan, ang mga kaaway nagpakatap og mga bakak ug sayop nga mga taho mahitungod sa Simbahan ug ni Propeta Joseph Smith. Ang pagpadayag sa Doktrina ug mga Pakigsaad 45 nagpahinumdom sa mga Santos nga ilabi na atol niining malisud nga panahon nga ang Ginoo naghunahuna bahin nila.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 45:1–6. Hangyoa ang klase sa pagsunod ug ikonsiderar kon sa unsang paagi nga kining pagpadayag mahimong nakahupay sa mga Santos atol niining panahon sa pagpanglutos. Ikonsiderar ang pagpahunong sa mga estudyante sa ilang pagbasa aron imong mapangutana ang pipila sa mosunod human mabasa ang katugbang nga mga bersikulo:

Sa unsang paagi nga ang doktrina nga si Jesukristo milalang sa langit ug yuta (D&P 45:1) nagpakita nga ang Manluluwas adunay personal nga interes diha kaninyo?
Sa unsang paagi nga ang mga pulong sa Ginoo sa Doktrina ug mga Pakigsaad 45:2 nagpakita sa Iyang pagpakabana alang nato?
Gikan sa bersikulo 3, unsay inyong nasabtan sa gipasabut sa mga pulong nga “nangamuyo sa inyong kahimoan”?
Sumala sa bersikulo 4, unsa ang nasinati sa Manluluwas nga nakapahimo Kaniyang atong manlalaban ngadto sa Langitnong Amahan? (Nakasinati Siya og pag-antus ug kamatayon, ingon man nagpakabuhi nga walay sala. Mahimo nimong dapiton ang usa ka estudyante sa pagpasabut sa tahas sa usa ka manlalaban gikan sa unsay ilang nakat-unan sa ilang personal nga pagtuon.)
Sa unsang paagi nga ang pagkahibalo nga si Jesukristo mao ang atong manlalaban ngadto sa Langitnong Amahan makaimpluwensya sa inyong mga pagpili ug mga binuhatan karon?

Aron sa paghatag og gibug-aton sa kamahunahunaon sa Manluluwas ngari kanato, dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith. Hangyoa ang klase sa pagpaminaw sa dugang nga mga ideya mahitungod sa tahas sa Manluluwas isip atong manlalaban.

“Si [Jesukristo] nagbarug taliwala sa Amahan ug sa tawo. Siya nangamuyo alang sa atong kawsa. Kahibalo mo, sa dihang dinhi pa siya sa yuta kanunay siyang nag-ampo, ug siya nag-ampo alang sa iyang mga disipulo, nangamuyo sa iyang Amahan alang sa ilang kaayohan, ug kanunay na siyang nangamuyo sukad niana, ug siya nagbarug tali kanato ug sa Dios, ang atong Amahan” (sa Conference Report, Okt. 1953, 58).

Sa unsang paagi kaha nga ang usa ka tawo makapasalamat sa Manluluwas alang sa iyang pagkamanlalaban? (Aron matabangan ang mga estudyante sa pagpakigbahin og mahunahunaong mga tubag niining pangutana, mahimo nimo silang i-refer ngadto sa unsay ilang nasulat sa ilang ikaduhang assignment diha sa ilang leksyon alang sa Day 1 niining unit [D&P 45:1–15].)

Hangyoa ang mga estudyante sa paghunahuna og usa ka higayon nga ilang nabati nga walay usa nga naghunahuna kanila o ilang gibati nga dili kaayo sila importante kay sa uban.

Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang mga estudyante sa pagpaminaw kon unsay gibati sa Manluluwas bahin sa matag usa kanila.

“Mga kaigsoonan, ako mopamatuod nga walay usa kanato nga gipangga sa Dios nga mas minus kay sa uban. Ako mopamatuod nga Siya nahigugma sa matag usa kanato—mga kahuyang, kahadlok, kaugalingong imahe, ug tanan. Wala Siya magsukod sa atong mga talento o sa atong hitsura; wala Siya magsukod sa atong mga propesyon o kabtangan. Nag-abiba Siya sa kada runner, nagtawag nga ang lumba batok sa sala, dili batok sa usag usa. Nasayud ko nga kon kita magmatinud-anon, adunay usa ka hingpit nga gipahaum nga kupo sa pagkamatarung nga giandam ug naghulat sa tanan” (“The Other Prodigal,” Ensign, Mayo 2002, 64).

Dapita ang mga estudyante sa pagpakigbahin sa ilang kaugalingong mga kasinatian sa dihang ilang nabati nga ang Dios nagpakabana kanila o sa dihang ilang nabati nga gidasig sa Dios.

Ipasabut nga usa sa mga paagi nga gihupay sa Ginoo ang nag-unang mga Santos niining panahon sa pagpanggukod mao ang pagsulti kanila nga Siya moanhi pag-usab sa yuta aron sa pagpanalangin kanila. Isulat ang mosunod nga pakisayran sa kasulatan diha sa pisara: Doktrina ug mga Pakigsaad 45:55–59.

Hangyoa ang mga estudyante sa pagbasa og hilum niining mga bersikulo, nga mangita kon sa unsang paagi nga mapanalanginan ang mga Santos sa pag-anhi sa Ginoo.

Sumala sa bersikulo 57, unsay angay gayud natong buhaton aron maandam sa pag-anhi sa Manluluwas? (Isulat ang mosunod nga baruganan diha sa pisara: Kon kita modawat sa kamatuoran ug modawat sa Balaang Espiritu isip atong giya, magpabilin kita sa Ikaduhang Pag-anhi sa Manluluwas.)
Sa unsang paagi kaha nga ang pagdawat sa kamatuoran ug pagdawat sa Espiritu isip atong giya makaandam kanato alang sa Ikaduhang Pag-anhi ni Jesukristo?
Unsa man ang inyong nahimo aron makadawat sa kamatuoran sa inyong kinabuhi? Kanus-a man kamo nagiyahi sa Espiritu Santo? (Human makatubag ang mga estudyante, ikonsiderar ang pagpakigbahin sa mga kasinatian gikan sa kaugalingon nimong kinabuhi.)

Doktrina ug mga Pakigsaad 47–48

Ang mga Santos kinahanglang kanunay nga magtipig og kasaysayan ug ipakigbahin ang ilang mga kapanguhaan ngadto sa uban

Pahinumdumi ang mga estudyante nga ang usa ka bahin sa ilang mga pagtuon niining semanaha maghatag og gibug-aton sa kaimportante sa pagtipig og usa ka personal nga kasaysayan o journal. Aron maawhag ang mga sakop sa klase nga magpadayon sa ilang mga paningkamot sa pagtipig og personal nga kasaysayan o magsugod sa pagtipig og personal nga kasaysayan, mahimo nimo silang pangutan-on kon nganong importante ang pagtipig og personal nga kasaysayan.

Dapita ang mga estudyante sa pagpakigbahin kon unsa nga mga panalangin ang ilang nasinati gikan sa pagtipig og usa ka personal nga kasaysayan o gikan sa mga kasaysayan nga ilang nabasahan bahin sa ilang ginikanan, mga apohan, o lain pang mga katigulangan.

Sunod nga Unit (Doktrina ug mga Pakigsaad 49–56)

Aron maandam ang mga estudyante alang sa ilang pagtuon sa umaabut nga semana, mahimo nimo silang dapiton sa pagkonsiderar sa mosunod: Unsaon man nato sa pagsangyaw sa ebanghelyo ngadto sa uban? Unsaon ninyo pagkahibalo kon kamo nagtudlo o nagkat-on pinaagi sa Espiritu Santo? Naglisud ba kamo sa pag-ila kon ang usa ka butang iya sa Dios o gikan sa laing tinubdan? Ipasabut nga sa mosunod nga unit ilang makat-unan kon unsay gitudlo sa Ginoo bahin sa paagi nga maila ang kamatuoran ug malikayan ang sayop nga mga pagtulun-an.