Si Joseph Smith nakadawat niini nga pagpadayag alang sa iyang kaugalingon, ni Oliver Cowdery, ug ni David Whitmer niadtong Hunyo 1829. Human motawag sa duha ka lalaki sa pagpahayag og paghinulsol, ang Manluluwas mitudlo kanila sa kaimportante sa pagdala sa Iyang ngalan diha sa ilang mga kaugalingon. Mihisgut Siya sa umaabut nga mga tawag sa Napulog Duha ka mga Apostoles ug sa ilang tinguha sa pagdala diha kanila sa ngalan ni Jesukristo “uban sa hingpit nga katuyoan sa kasingkasing” (D&P 18:27). Ang Ginoo mihatag dayon ni Oliver Cowdery ug David Whitmer sa responsibilidad sa pagpangita og mga tawo nga makaalagad isip mga sakop sa Korum sa Napulog Duha.
Si Jesukristo nagtudlo nga ang Iyang ngalan mao lamang ang ngalan diin mahimo kitang maluwas
Dapita ang usa o duha ka mga estudyante nga isulat sa pisara ang ilang mga apilyedo. Pangutan-a sila sa mosunod:
Unsa man ang kahulugan sa inyong apilyedo kaninyo?
Unsa nga mga pribilehiyo ug responsibilidad ang uban niana nga apilyedo? (Ang mga pribilehiyo mahimong maglakip og kapuy-an, gugma sa pamilya, seguridad, ug pagdako diha sa Simbahan. Ang mga responsibilidad mahimong maglakip sa pagtabang nga luwas ang panimalay, matahurong pagtagad sa mga sakop sa pamilya, pagbuhat sa mga buluhaton sa balay, ug pagdala og dungog sa pamilya.)
Pahinumdumi ang mga estudyante nga ang Ginoo mitawag ni Oliver Cowdery ug David Whitmer sa pagsangyaw og paghinulsol (tan-awa sa D&P 18:6, 9, 14). Ipasabut nga human ang Ginoo mihatag kanila niini nga instruksyon, namulong Siya kanila mahitungod sa mga pribilehiyo ug responsibilidad sa pagdala sa Iyang ngalan diha sa ilang kaugalingon.
Kopyaha ang mosunod nga tsart diha sa pisara, apan ayaw ilakip ang mga tubag nga naa sa ubos nga laray. Dapita sila sa pagsulat sa ilang mga hunahuna diha sa ilang mga class notebook o scripture study journal. Dayon dapita ang mga estudyante nga hilum nga mobasa sa Doktrina ug mga Pakigsaad 18:17–25 ug moila sa mga pribilehiyo ug responsibilidad nga moabut tungod sa pagdala diha kanato sa ngalan ni Jesukristo. Hangyoa sila sa pagsulat sa ilang nadiskubrihan diha sa ubos nga laray sa tsart.
Mga Pribilehiyo
Mga Responsibilidad
Modawat ug matudloan sa Espiritu Santo
Modapit sa uban nga magpabunyag ug molahutay hangtud sa katapusan
Makadawat og kaluwasan diha sa gingharian sa Amahan
Magbaton og pagtuo, paglaum, ug gugma nga putli
Molikay sa pagpakig-away sa ubang mga simbahan
Mamulong sa kamatuoran uban sa kaligdong
Maghinulsol ug molahutay hangtud sa katapusan
Sumala sa Doktrina ug mga Pakigsaad 18:23, nganong importante man alang kanato ang pagdala diha kanato sa ngalan ni Jesukristo? (Ang mga estudyante kinahanglang mahibalo sa mosunod nga doktrina: Ang pangalan ni Jesukristo mao lamang ang ngalan diin mahimo kitang maluwas. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)
Dapita ang usa ka estudyante sa pagbasa sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang klase sa pagpaminaw sa tambag ni Elder Ballard kon unsaon nato sa pagdala nganhi kanato sa ngalan ni Jesukristo:
Imahe
Elder M. Russell Ballard
“Atong gidala ang ngalan ni Kristo nganhi kanato diha sa mga tubig sa pagbunyag. Atong gibag-o ang epekto niana nga pagbunyag matag semana samtang mag-ambit kita sa sakrament, nagtimaan sa atong kaandam nga modala sa Iyang ngalan nganhi kanato ug nagsaad kanunay sa paghinumdom Kaniya (tan-awa sa D&P 20:77, 79) …
“Gihangyo kita sa pagbarug nga mga saksi Kaniya. … Nagpasabut kini nga andam kita sa pagpahibalo sa uban kon kinsa ang atong gisunod ug kansang Simbahan kita nahisakop: ang Simbahan ni Jesukristo. Sigurado nga gusto natong buhaton kini diha sa diwa sa paghigugma ug pagpamatuod. Gusto natong sundon ang Manluluwas pinaagi sa yano ug klaro, hinoon mapainubsanon, nga pagpahayag nga kita mga miyembro sa Iyang Simbahan” (“Ang Importansya sa Pangalan,”Liahona, Nob. 2011, 79–80).
Sa unsang paagi si Elder Ballard nagsugyot nga atong pahibaloon ang uban nga kita nagsunod ni Jesukristo?
Sa Doktrina ug mga Pakigsaad 18:19–20, ang Ginoo misugo kang Oliver Cowdery ug David Whitmer sa pagbaton og pagtuo, paglaum, ug gugma nga putli ug sa paglikay sa pagpakig-away sa ubang mga simbahan ug sa ilang mga miyembro. Ngano kaha nga importante alang kanato ang pagbuhat niini nga mga butang isip mga sumusunod ni Jesukristo?
Mahimo nimong tabangan ang mga estudyante nga makasabut nga diha sa Doktrina ug mga Pakigsaad 18:20, ang mga pulong nga “simbahan sa yawa” wala magpasabut og piho nga simbahan. Kini nagpasabut sa bisan kinsang tawo, grupo, organisasyon, o pilosopiya nga naglihok batok sa Simbahan ni Jesukristo ug sa kaluwasan sa mga anak sa Dios.
Dapita ang mga estudyante sa pagsulat diha sa ilang mga class notebook o mga scripture study journal og usa ka paagi nga ilang mapahibalo ang uban nga nagsunod sila kang Jesukristo.
Ang Ginoo mipadayag sa balaang tawag ug misyon sa Napulog Duha ka mga Apostoles
Ipasabut nga ang Ginoo namulong kabahin sa mga tawo gawas kang Oliver Cowdery ug David Whitmer nga modala diha kanila sa ngalan ni Jesukristo ug mopahayag sa Iyang ebanghelyo. Dapita ang mga estudyante nga hilum nga mobasa sa Doktrina ug mga Pakigsaad 18:27–32 ug isulat ang ilang mga tubag sa mosunod nga mga pangutana. (Isulat kini nga mga pangutana diha sa pisara sa dili pa magklase o andama kini isip handout alang sa matag estudyante.)
Unsa nga mga tinguha ang anaa niining napulog duha ka mga disipulo?
Unsay ipabuhat niining gitawag nga mga tawo? (Pangita og 3–5 ka lain-laing mga ideya.)
Kinsa nga mga sakop sa kasamtangang Korum sa Napulog Duha ka mga Apostoles ang inyong mahinumduman? (Isulat ang ilang mga ngalan.)
Human sa igong panahon, dapita ang mga estudyante sa pag-report sa ilang mga tubag sa unang pangutana nga nahisulat sa pisara. Dayon ipangutana ang mosunod:
Unsa kaha ang gipasabut nga modala nganhi kanato sa ngalan ni Jesukristo uban sa hingpit nga katuyoan sa kasingkasing?
Dapita ang pipila ka mga estudyante sa pag-report sa ilang mga tubag sa ikaduhang pangutana nga nahisulat sa pisara. Usa ka baruganan nga kinahanglang mailhan sa mga estudyante mao nga ang Napulog Duha ka mga Apostoles sa Ginoo gitawag sa pagsangyaw ug pagpangalagad sa ebanghelyo sa tibuok kalibutan. Dapita ang usa ka estudyante sa pagbasa og kusog sa Doktrina ug mga Pakigsaad 18:37–39. Hangyoa ang klase sa pagsunod, nga mangita sa responsibilidad nga gihatag sa Dios kang Oliver Cowdery ug David Whitmer.
Unsa ang gisugo sa Ginoo nga buhaton ni Oliver ug David? (Mangita og mga tawo nga tawagon sa Ginoo isip unang mga sakop sa Korum sa Napulog Duha ka mga Apostoles sa ulahing mga adlaw.)
Unsaon nila pagkahibalo kon kinsa ang angay nga tawagon isip mga Apostoles? (Ang umaabut nga mga Apostoles mopakita sa mga tinguha ug mga buhat nga gipamulong sa Ginoo.)
Ipasabut nga si Martin Harris usab nakadawat sa responsibilidad sa pagpangita sa Napulog Duha ka mga Apostoles. Ang unang mga sakop sa Korum sa Napulog Duha ka mga Apostoles sa ulahing mga adlaw gitawag niadtong Pebrero 14, 1835, hapit lima ka tuig human sa opisyal nga pag-organisar sa Simbahan. Ang pinadayag sa Doktrina ug mga Pakigsaad 18 makatabang kanato nga makasabut sa kaimportante niini nga korum pinaagi sa paglatid sa tahas sa mga Apostoles diha sa Simbahan ni Jesukristo.
Dapita ang mga estudyante sa pag-report sa ilang mga tubag sa ikatulo nga pangutana nga gisulat sa pisara pinaagi sa paghangyo kanila sa paghingalan sa kasamtangang mga sakop sa Korum sa Napulog Duha ka mga Apostoles. Kon mahimo, pagpakita og mga hulagway niini nga mga tawo. Ang mga litrato anaa sa Mayo ug Nobyembre nga mga isyu sa Ensign ug Liahona ug sa lds.org/church/leaders.
Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Sa dili pa basahon sa estudyante, ipasabut nga si Elder Holland mihimo niini nga pakigpulong sa iyang unang pakigpulong sa kinatibuk-ang komperensya isip usa ka bag-ong gitawag nga Apostol.
Imahe
Elder Jeffrey R. Holland
“Klaro nga ang akong labing dakong kaikag ug labing makalipay sa tanang pagkaamgo mao nga ako adunay oportunidad, sama sa gisulti ni Nephi, nga ‘[mag]hisgot kang Kristo, … [ma]lipay diha kang Kristo, … [mag]sangyaw kang Kristo, [ug] [ma]nagna kang Kristo’ (2 Ne. 25:26) bisan asa ako ug si bisan kinsa ang akong kauban hangtud mahurot ang katapusang ginhawa sa akong kinabuhi. Sigurado nga wala nay mas labaw pa nga katuyoan o mas dakong pribilehiyo kay sa nianang ‘talagsaon nga [saksi] sa ngalan ni Kristo sa tibuok nga kalibutan’ (D&P 107:23).
“… Labaw pa sa akong mga pulong ug mga pagtulun-an ug gisulting pagsaksi, ang akong kinabuhi kinahanglang kabahin niana nga pagpamatuod kang Jesus. Ang ako mismong pagkatawo kinahanglang magpakita sa kabalaan niini nga buhat. Dili nako maagwanta kon aduna koy masulti o mabuhat nga sa bisan unsang paagi makapakunhod sa inyong pagtuo kang Kristo, sa inyong gugma alang niini nga simbahan, o sa taas ninyong pagtahud sa balaang pagkaapostol.
“Mosaad ako kaninyo—sama nga misaad ko sa Ginoo ug niining akong mga kaigsoonan—nga maningkamot kong magpuyo nga takus niini nga pagsalig ug moserbisyo sa kinatibuk-ang sukod sa akong abilidad” (“Miracles of the Restoration,” Ensign, Nob. 1994, 31).
Sa unsang paagi makatabang kaninyo nga mahibalo nga kadtong nag-alagad isip mga Apostoles midala diha kanila sa pangalan ni Jesukristo uban sa hingpit nga katuyoan sa kasingkasing? Unsaon man nato sa pagsunod sa ilang ehemplo?
Dapita ang usa o duha ka mga estudyante sa pagtabang kanimo sa usa ka kalihokan. Taptapi kini nga mga estudyante o hangyoa sila sa pagpiyong. Dapita ang pipila ka mga estudyante nga magbanos-banos sa pagsulti gamit ang normal nilang tingog. Hangyoa ang gitaptapan nga mga estudyante nga hinganlan kon kinsa ang nagsulti. Dayon ipangutana ang mosunod:
Nganong ang ubang mga tingog mas dali man mailhan kay sa uban? (Ang mga estudyante mahimong mosulti nga kon mas kanunay kitang makadungog sa usa ka tingog, mas pamilyar ug mas mailhan kini.)
Dapita ang usa ka estudyante sa pagbasa og kusog sa Doktrina ug mga Pakigsaad 18:34–36, 47. Hangyoa ang klase sa pagsunod ug pag-ila og usa ka paagi nga ang Ginoo miingon nga makadungog kita sa Iyang tingog. (Tingali kinahanglan nimong ipasabut nga diha sa bersikulo 34, ang mga pulong nga “kini nga mga pulong” nagpasabut sa mga pinadayag sa Doktrina ug mga Pakigsaad.)
Sumala niini nga mga bersikulo, unsaon nato pagkadungog sa tingog sa Ginoo? (Ang mga estudyante mahimong mohatag og lain-laing mga tubag, apan siguroha nga klaro ang mosunod nga baruganan: Kita makadungog sa tingog ni Jesukristo samtang kita magbasa sa mga kasulatan pinaagi sa gahum sa Espiritu. Isulat sa pisara kini nga kamatuoran.)
Sa unsang mga paagi ang pagtuon sa kasulatan nagtabang nato nga madungog ang tingog ni Jesukristo?
Tabangi ang mga estudyante nga makasabut nga makadungog kita sa tingog sa Ginoo sa mga paagi nga dili madungog sa mga dalunggan. Pinaagi sa Espiritu Santo, makadawat kita og mga pagbati ug mga mensahe sa atong mga hunahuna ug kasingkasing (tan-awa sa D&P 8:2–3).
Balik ngadto sa kamatuoran nga imong gisulat diha sa pisara.
Sa unsang paagi kaha kini nga kamatuoran makaimpluwensya sa paagi sa inyong paghunahuna sa mga kasulatan? Sa unsang paagi kaha kini makagiya kaninyo samtang mopili kamo sa panahon ug dapit diin mobasa kamo sa mga kasulatan?
Kanus-a ninyo gibati nga gidasig kamo sa Ginoo sa inyong pagbasa o pagpamalandong sa mga kasulatan?
Awhaga ang mga estudyante sa pagsiksik sa mga kasulatan kada adlaw ug magmakugihon sa pagtinguha ug pagsabut sa tingog sa Ginoo. I-summarize ang Doktrina ug mga Pakigsaad 18:40–47 pinaagi sa pagpasabut nga ang Ginoo mimatuod nga si Oliver Cowdery, David Whitmer, ug ang umaabut nga mga sakop sa Korum sa Napulog Duha ka mga Apostoles makadawat og dagkong mga panalangin kon sila matinud-anon sa pagsunod sa Iyang mga sugo. Mahimo nimong tapuson kini nga leksyon pinaagi sa pagpamatuod sa mga kamatuoran nga imong gihisgutan sa mga estudyante.
Nagpasabut sa Doktrina ug mga Pakigsaad 18:20, si Presidente Joseph Fielding Smith mitudlo, “Kinahanglan natong masabtan nga kini maoy instruksyon kanato sa pagpakig-away batok sa tanan nga mga dautan, nianang supak sa pagkamatarung ug kamatuoran” (Church History and Modern Revelation, 2 vols. [1953], 1:83). Dili kini usa ka tawag sa pagpakig-away batok sa ubang mga simbahan o sa ilang mga miyembro.
Si Presidente Dieter F. Uchtdorf sa Unang Kapangulohan misulti:
Imahe
President Dieter F. Uchtdorf
“Samtang kita mosunod [sa Manluluwas] hingpit nga ehemplo, ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing. …
“Nga ibutang kini sa atong hunahuna, tuguti nga ang atong mga kasingkasing ug mga kamot sa kalooy matunol ngadto sa uban, kay ang tanan naglakaw diha sa iyang kaugalingong lisud nga agianan. Isip mga disipulo ni Jesukristo, nga atong Magtutudlo, gitawag kita aron sa pagsuporta ug sa pag-ayo kay sa pagpanghimaraut” (“Kamo Ang Akong mga Kamot,”Liahona, Mayo 2010, 68–69).