Niadtong Septyembre 22 ug 23, 1832, nadawat ni Joseph ang pinadayag nga narekord diha sa Doktrina ug mga Pakigsaad 84. Niini nga pagpadayag, ang Ginoo mipadayag og mga kamatuoran mahitungod sa priesthood, sama sa gihisgutan sa miaging leksyon. Ang Ginoo mitudlo usab sa mga Santos sa kamahinungdanon sa pagpatalinghug sa pulong sa Dios. Siya mipanton kanila sa pagbaliwala sa Basahon ni Mormon ug sa ubang mga sugo ug mga pagpadayag.
Ang Ginoo mitudlo usab sa kamahinungdanon sa pagpatalinghug sa pulong sa Dios
Pahinumdumi ang mga estudyante sa tumong nga ilang gihimo sa sinugdanan sa tuig sa pagtuon sa kasulatan matag adlaw. Dapita sila sa pagkonsiderar kon unsa ka maayo ang ilang nabuhat kalabut niini nga tumong. Human kini makonsiderar sa mga estudyante, ipangutana ang mosunod:
Unsa ang pipila ka mga hagit nga inyong giatubang sa pagpaningkamot nga magtuon sa kasulatan matag adlaw? (Samtang nagtubag ang mga estudyante, angkuna nga mahimong lisud ang pagpadayon og gawi nga magtuon sa kasulatan matag adlaw.)
Nganong pilion man ninyo nga magtuon sa kasulatan bisan og lisud kining buhaton usahay?
Ipasabut nga sa leksyon karon, ang mga estudyante makakat-on sa mga kamatuoran gikan sa Doktrina ug mga Pakigsaad 84 nga modasig kanila sa pagpadayon sa ilang mga paningkamot sa pagtuon sa kasulatan.
Dapita ang mga estudyante nga hilum nga mobasa sa Doktrina ug mga Pakigsaad 84:43–44 ug ilhon ang mga pulong nga nagtudlo sa ka-importante sa pagtuon ug sa paggamit sa pulong sa Ginoo.
Unsa nga mga pulong ang inyong nakit-an nga nagtudlo sa ka-importante sa pagtuon ug sa paggamit sa pulong sa Ginoo? (Ang mga estudyante mahimong mohisgut og mga pulong sama sa “sugo,” “paghatag og makugihon nga pagsunod” ug “mabuhi pinaagi sa matag pulong.”)
Dapita ang usa ka estudyante sa pagbasa og kusog sa Doktrina ug mga Pakigsaad 84:45–46. Hangyoa ang klase sa pagsunod ug sa pagpangita sa mga pulong niini nga tudling nga sama og kahulugan sa “pulong sa Ginoo.”
Unsa nga mga pulong ang inyong nakit-an? (Ang mga tubag kinahanglang maglakip sa “kamatuoran,” “kahayag,” “Espiritu,” “Espiritu ni Jesukristo”, ug “tingog sa Espiritu.”)
Isulat sa pisara ang mosunod nga dili kompleto nga pamahayag: Kon makugihon kitang mosunod sa pulong sa Dios, niana …
Base sa inyong nakit-an sa bersikulo 45–46, unsaon ninyo pagkompleto ang pamahayag diha sa pisara? (Ang mga estudyante mahimong mosugyot og lain-laing mga tubag. Kompletuha ang baruganan sa pisara aron maghatag kini sa mosunod nga baruganan: Kon makugihon kitang mosunod sa pulong sa Dios, niana malamdagan kita pinaagi sa Espiritu ni Kristo.)
Idirekta ang atensyon sa mga estudyante ngadto sa mga pulong “ang Espiritu ni Jesukristo” diha sa bersikulo 45. Ipasabut nga ang laing hugpong sa mga pulong nga nagpasabut sa samang butang mao ang “ang Kahayag ni Kristo.” Ang Kahayag ni Kristo maoy “usa ka impluwensya alang sa kaayo diha sa mga kinabuhi sa tanang mga tawo. … [Hinoon,] ang Kahayag ni Kristo kinahanglang dili kalibgan uban sa Espiritu Santo. Dili kini usa ka personahe, sama sa Espiritu Santo” (Matinud-anon sa Tinuhoan [2004], 66). Ang Kahayag ni Kristo anaa sa matag tawo ug naghatag og “kahibalo sa husto ug sayop, [o] husto nga panabot, o konsensya.” “Makagiya kini nato aron pagkontrol sa atong mga buhat—gawas kon ato kini nga pugngan o ibaliwala” (Boyd K. Packer, “Ang Kahayag ni Kristo,” Liahona, Abr. 2005, 9).
Dapita ang usa ka estudyante sa pagbasa og kusog sa Doktrina ug mga Pakigsaad 84:47–48. Hangyoa ang klase sa pagsunod ug sa pagtino kon sa unsang paagi kita mapanalanginan kon mopatalinghug kita sa Espiritu ni Jesukristo.
Sumala sa bersikulo 47, sa unsang paagi kita mapanalanginan kon mopatalinghug kita sa Espiritu ni Jesukristo? (Ang mga estudyante mahimong mogamit og lain-laing mga pulong, apan kinahanglan silang makaila sa mosunod nga baruganan: Kon mopatalinghug kita sa Espiritu ni Jesukristo, makaduol kita ngadto sa Amahan. Isulat sa pisara kini nga baruganan.)
Sumala sa bersikulo 48, unsa ang buhaton sa Amahan samtang moduol kita Kaniya? (Motudlo Siya kanato.)
Sa bersikulo 48, atong mabasa nga ang Amahan motudlo kanato dili lamang alang sa atong kaayohan apan usab alang sa kaayohan sa tibuok kalibutan. Unsa man ang kahulugan niini nganha kanimo?
Ipasabut nga agig dugang sa pagbaton sa Kahayag ni Kristo, ang mga indibidwal makadawat sa pagpakig-uban sa Espiritu Santo human sila makasulod ngadto sa pakigsaad sa bunyag. Pinaagi niini nga gasa sila makadawat og dugang kahayag ug magiyahan balik ngadto sa presensya sa Amahan aron makadawat og kinabuhing dayon.
Ipapalong sa usa ka estudyante ang mga suga sa classroom ug dayon pabalika siya sa iyang lingkuranan. (Siguroa nga dunay igong kahayag sa kwarto aron luwas nga makalakaw ang estudyante.) Dapita ang mga estudyante sa paghunahuna sa mga panahon sa dihang kinahanglan silang molakaw sa tumang kangitngit. Hangyoa ang pipila sa paghulagway kon sama sa unsa kini nga kasinatian alang kanila. Dayon pasigaa og balik ang mga suga.
Ipasabut nga ang mga kasulatan kasagaran nga maghisgut sa kangitngit aron simbolikanhong mahulagway ang usa ka espirituhanong kahimtang. Dapita ang usa ka estudyante sa pagbasa og kusog sa Doktrina ug mga Pakigsaad 84:49–53. Hangyoa ang klase sa pagsunod ug sa pag-ila kon kinsa ang gisulti sa Ginoo nga anaa sa espirituhanong kangitngit ug nganong anaa sila niana nga kahimtang.
Kinsa man ang anaa sa kangitngit? Nganong anaa man sila sa kangitngit?
Ipasabut nga niini nga mga bersikulo, kadtong gihulagway nga anaa sa kangitngit gihulagway usab nga ubos sa pagkaulipon sa sala. Nagpasabut kini nga nabitik sila sa mga sangputanan sa ilang mga sala tungod kay wala sila maghinulsol.
Sa unsang paagi ang pagpakabuhi ubos sa pagkaulipon sa sala susama sa pagkaanaa sa kangitngit?
Ang Ginoo mipanton sa mga Santos tungod sa wala paghatag og gibug-aton sa Basahon ni Mormon
Ipasabut nga agig dugang sa pag-ingon nga ang kalibutan anaa sa kangitngit, ang Ginoo miingon nga ang mga hunahuna sa mga miyembro sa Simbahan nangitngit.
Dapita ang usa ka estudyante sa pagbasa og kusog sa Doktrina ug mga Pakigsaad 84:54–56. Hangyoa ang klase sa pagsunod ug sa pagpangita og duha ka rason nganong ang mga hunahuna sa mga miyembro sa Simbahan nangitngit.
Sumala sa bersikulo 54, nganong ang mga hunahuna sa mga miyembro sa Simbahan nangitngit?
Unsa ang gipasabut sa wala paghatag og gibug-aton sa usa ka butang? (Wala panumbalinga ang usa ka butang o pagtagad niini nga walay pagtahud o walay pag-amping.) Sa unsang paagi ang kawalay pagtuo o ang walay paghatag og gibug-aton sa sagrado nga butang makahimo sa hunahuna sa tawo nga mangitngit?
Dapita ang usa ka estudyante sa pagbasa og kusog sa Doktrina ug mga Pakigsaad 84:57. Hangyoa ang klase sa pagsunod ug sa pagpangita kon unsay kanunay wala hatagi og gibug-aton sa mga Santos.
Unsay kanunay wala hatagi og gibug-aton sa mga Santos? (Ang Basahon ni Mormon ug ang “kaniadto nga mga sugo” sa Ginoo, o ang nangagi nga mga pinadayag, lakip niadtong anaa sa Biblia.)
Sumala sa inyong nakat-unan gikan sa mga bersikulo 54–58, unsa ang mga sangputanan nga atong atubangon kon dili nato hatagan og gibug-aton ang pulong sa Dios? (Ang mga estudyante kinahanglang mopahayag nga kon dili nato hatagan og gibug-aton ang pulong sa Dios, ang atong mga hunahuna mongitngit ug ibutang kita ubos sa panghimaraut. Mahimo nimong isulat sa pisara kini nga baruganan.)
Dapita ang usa ka estudyante sa pagbasa og kusog sa mosunod nga mga pamahayag ni Presidente Ezra Taft Benson kalabut sa Basahon ni Mormon.
Imahe
Presidente Ezra Taft Benson
“Ang mahangturon ba nga mga sangputanan nag-agad sa atong pagsanong niini nga basahon? Oo, alang man sa atong panalangin o sa atong kaalautan.
“Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili, iyang gibutang ang iyang kalag sa kakuyaw ug nagsalikway niadtong makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod diha sa bato ni Kristo pinaagi sa Basahon ni Mormon ug nagpabiling nanggunit nianang gunitanan nga puthaw, ug sa tawo nga wala” (“The Book of Mormon Is the Word of God,” Ensign, Ene. 1988, 5).
“Dili kita magpabilin ubos sa panghimaraut, uban sa hampak ug paghukom niini, pinaagi sa wala paghatag og gibug-aton niining talagsaon ug kahibulongang gasa nga gihatag sa Ginoo ngari kanato. Hinoon, atong daugon ang mga saad nga konektado sa pagmahal niini diha sa atong mga kasingkasing” (“The Book of Mormon—Keystone of Our Religion,” Ensign,Nob. 1986, 7).
Dapita ang mga estudyante sa pagpamalandong kon giunsa nila pagtagad ang Basahon ni Mormon ug unsay ilang mabuhat sa paghimo sa ilang pagtuon niini nga tibuok kinabuhi nga paningkamot.
Unsa ang gisulti sa Ginoo nga gikinahanglan sa mga Santos agig dugang sa paghinulsol tungod sa wala paghatag og gibug-aton sa Iyang mga pulong? (Tabangi ang mga estudyante nga makakita nga agig dugang sa paghinumdom sa Basahon ni Mormon ug sa “kaniadto nga mga sugo” nga gihatag sa Ginoo, ang mga Santos kinahanglang mobuhat sa unsay nahisulat diha niini.)
Unsaon man ninyo pag-summarize sa unsay gusto sa Ginoo nga atong buhaton sa Basahon ni Mormon? (Ang mga estudyante mahimong moila og lain-laing mga baruganan, apan siguroa ang paghatag og gibug-aton sa mosunod: Kinahanglang matinud-anon kitang magtuon sa Basahon ni Mormon ug magpakabuhi sumala sa mga pagtulun-an niini. Isulat sa pisara kini nga kamatuoran.)
Ipares-pares ang mga estudyante. Hangyoa ang mga pares sa pagpaambit sa ilang mga tubag sa mosunod nga pangutana:
Kinsa ang maayong ehemplo alang ninyo sa pagtuon sa Basahon ni Mormon ug sa pagpakabuhi sumala sa mga pagtulun-an niini?
Sa pagtapos niini nga leksyon, dapita ang usa ka estudyante sa pagbasa og kusog sa Doktrina ug mga Pakigsaad 84:60–61. Hangyoa ang klase sa pagsunod ug sa pagpangita og dugang nga mga instruksyon nga gihatag sa Ginoo niadtong modawat sa Iyang mga pulong pinaagi sa Basahon ni Mormon. Human mabasa ang mga bersikulo, ipasabut nga sumala sa bersikulo 61, kadtong modawat sa mga pulong sa Ginoo diha sa Basahon ni Mormon kinahanglang mopamatuod niini ngadto sa uban.
Dapita ang pipila ka mga estudyante sa pagpamatuod kon sa unsang paagi sila napanalanginan samtang nagtuon sila sa Basahon ni Mormon ug nagtinguha sa pagpakabuhi sumala sa mga kamatuoran nga gitudlo niini. (Mahimo nimong hatagan og panahon ang mga estudyante nga maghunahuna sa ilang mga kasinatian sa dili pa sila hangyuon sa pagtubag.)
Pahinumdumi ang mga estudyante sa ilang mga tumong sa pagtuon sa mga kasulatan matag adlaw. Isulat ang mosunod nga mga pangutana diha sa pisara, ug dapita ang mga estudyante sa pagsulat sa ilang mga tubag diha sa ilang mga class notebook o mga scripture study journal:
Unsay inyong nakat-unan karon nga nakapadasig kaninyo sa pagpadayon sa pagtuon sa Basahon ni Mormon?
Unsay inyong buhaton aron mas makugihon nga magtuon sa Basahon ni Mormon ug mosunod sa mga kamatuoran nga inyong nakat-unan gikan niini?
Unsaon ninyo paggamit ang Basahon ni Mormon sa pagpaambit sa ebanghelyo ngadto sa uban?
Ipamatuod nga ang mga estudyante mas mapaduol sa Langitnong Amahan samtang ilang sundon ang mga kamatuoran nga gihisgutan karon sa klase.
Si Presidente Boyd K. Packer sa Korum sa Napulog Duha ka mga Apostoles mitudlo mahitungod sa Kahayag ni Kristo ug sa Espiritu Santo:
Imahe
President Boyd K. Packer
“Ang Espiritu Santo ug ang Kahayag ni Kristo managlahi. May panahon nga ihulagway sila diha sa mga kasulatan uban sa sama nga mga pulong, managlahi ang pagkabutang sa duha. Mahinungdanon nga inyong mahibaloan ang mahitungod sa duha. …
“Ang Kahayag ni Kristo gihulagway diha sa mga kasulatan isip ‘ang Espiritu [nga] naghatag og kahayag ngadto sa matag tawo nga mianhi sa kalibutan’ (D&P 84:46; emphasis gidugang); ‘ang kahayag nga anaa sa tanan nga mga butang, nga naghatag og kinabuhi sa tanan nga mga butang, nga mao ang balaod diin ang tanan nga mga butang gidumala’ (D&P 88:13; tan-awa usab sa Juan 1:4–9; D&P 84:45–47; 88:6; 93:9).
“Ug ang Kahayag ni Kristo gihulagway usab diha sa mga kasulatan isip ‘ang Espiritu ni Jesukristo’ (D&P 84:45), ‘ang Espiritu sa Ginoo’ (2 Mga Taga-Corinto 3:18; tan-awa usab sa Mosiah 25:24), ‘ang Espiritu sa kamatuoran’ (D&P 93:26), ‘ang kahayag sa kamatuoran’ (D&P 88:6), ‘ang Espiritu sa Dios’ (D&P 46:17), ug ‘ang Balaang Espiritu’ (D&P 45:57). Ang pipila niini nga mga termino gigamit usab sa pagpasabut ngadto sa Espiritu Santo.
“Ang Unang Kapangulohan misulat, ‘Adunay gahum nga milukop sa tibuok kalibutan nga mao ang kahayag ug ang kinabuhi sa kalibutan, “nga nagdan-ag sa kada tawo nga moanhi sa kalibutan,” diin nagpadayon gikan sa presensya sa Dios ngadto sa dili masukod nga kawanangan, ang kahayag ug gahum nga gihatag sa Dios sa nagkalain-laing matang ngadto “kanila nga nangayo kaniya,” sumala sa ilang hugot nga pagtuo ug pagkamasulundon.’ [“‘Receiving’ the Holy Ghost,” Improvement Era, Mar. 1916, 460.]
“Dili igsapayan kon kining gibati nga kahayag, kini nga kahibalo sa husto ug sayop, gitawag og Kahayag ni Kristo, husto nga panabut, o konsensya, makagiya kini nato aron pagkontrol sa atong mga buhat—gawas kon ato kini nga pugngan o ibaliwala” (“The Light of Christ,” Ensign,Abril 2005, 8–9).
Ang Manluluwas ug ang Iyang mga propeta mainampingong mibantay sa pagtigum ug pagpreserbar sa Basahon ni Mormon sa tibuok kasaysayan sa kalibutan. Ang mensahe niini hilabihan ka importante sa tanang katawhan. Si Presidente Ezra Taft Benson miawhag sa mga Santos sa Ulahing mga Adlaw nga dili mobaliwala niana nga mensahe:
Imahe
Presidente Ezra Taft Benson
“Pipila sa nag-unang mga misyonaryo, sa ilang pag-uli, gibadlong sa Ginoo diha sa seksyon 84 sa Doktrina ug mga Pakigsaad tungod kay wala nila hatagi og gibug-aton ang Basahon ni Mormon. Isip resulta, nangitngitan ang ilang mga hunahuna. Ang Ginoo miingon nga kini nga matang sa pagtagad sa Basahon ni Mormon midala sa tibuok Simbahan ubos sa panghimaraut, gani ang tanang mga anak sa Zion. Ug dayon ang Ginoo miingon, ‘Ug sila magpabilin ubos niini nga panghimaraut hangtud nga sila maghinulsol ug mahinumdom sa bag-o nga pakigsaad, gani ang Basahon ni Mormon.’ (Tan-awa sa D&P 84:54–57.) Ubos pa ba gihapon kita niana nga panghimaraut?
“… Ang bug-at nga mga sangputanan nagdepende sa atong pagsanong sa Basahon ni Mormon:
“‘Kadto kinsa modawat niini sa hugot nga pagtuo,’ miingon ang Ginoo, ‘ug magbuhat og pagkamatarung, makadawat og korona sa kinabuhi nga dayon;
“‘Apan kadto nga nagpatig-a sa ilang mga kasingkasing sa pagkawalay pagtuo, ug nagsalikway niini, kini mosumbalik ngadto sa ilang kaugalingon nga panghimaraut—
“‘Kay ang Ginoong Dios namulong niini.’ (D&P 20:14–16.)
“Tinuod ba ang Basahon ni Mormon? Oo.
“Alang kang kinsa man kini? Kanato.
“Unsa ang katuyoan niini? Pagdala sa katawhan ngadto ni Kristo.
“Sa unsang paagi kini buhaton niini? Pinaagi sa pagpamatuod kang Kristo ug pagpadayag sa Iyang mga kaaway.
“Unsaon nato kini sa paggamit? Kinahanglang makaangkon kita og pagpamatuod niini, kinahanglang motudlo kita gikan niini, kinahanglang mopataas kita niini isip usa ka sumbanan ug ‘mopatuhop niini.’ [Tan-awa sa 2 Nephi 29:2.]
“Nagbuhat ba kita niini? Dili sama sa angay natong buhaton, ni sama sa kinahanglan gayud natong buhaton.
“Ang mahangturon ba nga mga sangputanan nag-agad sa atong pagsanong niini nga basahon? Oo, alang man sa atong panalangin o sa atong kaalautan.
“Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili, gibutang niya ang iyang kalag sa kakuyaw ug nagsalikway nianang makahatag og espiritwal ug intelektwal nga panaghiusa sa iyang tibuok kinabuhi” (“The Book of Mormon Is the Word of God,” Ensign,Ene. 1988, 5).
“Ang Basahon ni Mormon wala pa sukad, ug wala pa gihapon, mahimong sentro sa atong personal nga pagtuon, pagtudlo sa pamilya, pagsangyaw, ug misyonaryong buhat. Niini kita kinahanglan gayud nga maghinulsol” (“Cleansing the Inner Vessel,” Ensign, Mayo 1986, 5–6).