Leksyon 93: Doktrina ug mga Pakigsaad 88:70–117

Leksyon 93

Doktrina ug mga Pakigsaad 88:70–117

Pasiuna

Kini ang ikatulo sa upat ka mga leksyon kabahin sa Doktrina ug mga Pakigsaad 88. Ang bahin sa pinadayag nga tutukan sa leksyon gihatag sa usa ka komperensya sa mga high priest niadtong Disyembre 27–28, 1832. Niini ang Ginoo misugo sa mga elder [anciano] sa Simbahan sa pagtudlo sa usag usa ug sa pagpangandam sa pagserbisyo isip mga misyonaryo. Ang Ginoo mitudlo usab kalabut sa mga timailhan sa Ikaduhang Pag-anhi, sa kinatibuk-ang han-ay sa pagbanhaw sa tanang tawo, ug sa pipila sa mga panghitabo libut sa katapusang pakig-away batok kang Satanas.

Mga Sugyot alang sa Pagtudlo

Doktrina ug mga Pakigsaad 88:70–117

Ang Ginoo misugo sa mga elder sa simbahan sa pag-andam alang sa ilang pagpangalagad ug mopadayag sa mga panghitabo kalabut sa Iyang Ikaduhang Pag-anhi

Dapita ang usa ka estudyante sa pag-adto sa atubangan sa klase ug itudlo sa laing estudyante kon unsaon pagbuhat ang usa ka yano nga buluhaton, sama sa pagtaud og necktie (o laing buluhaton nga ang ikaduhang estudyante dili makamao kon usaon paghimo). Hangyoa ang mga estudyante sa pag-isa sa ilang kamot kon bag-ohay lang silang nakatabang sa pagtudlo og leksyon o kahanas ngadto sa laing tawo. Hangyoa ang pipila sa paghulagway kon unsay ilang gitudlo. Dayon hisguti ang mosunod nga mga pangutana:

Unsa ang inyong nakat-unan pinaagi sa pagpangandam sa pagtudlo ug sa pagtudlo sa laing tawo?
Ngano kaha nga kasagaran mas makakat-on kita gikan sa pagpangandam sa pagtudlo kay sa tudloan kita sa uban?

Pahinumdumi ang mga estudyante nga ang Ginoo mihatag sa pinadayag diha sa Doktrina ug mga Pakigsaad 88 ngadto sa usa ka grupo sa mga tighupot sa priesthood kinsa nag-ampo aron masayud sa kabubut-on sa Ginoo kalabut sa pag-establisar sa Zion. Niini nga pagpadayag, ang Ginoo mitawag niining grupo sa mga tighupot sa priesthood isip “una nga mga mamumuo niining katapusan nga gingharian” (tan-awa sa D&P 88:70, 74) ug misugo kanila sa pag-organisar ug sa pagtambong og eskwelahan aron sa pag-andam sa ilang kaugalingon sa pagsangyaw sa ebanghelyo sa mga nasud sa yuta (tan-awa sa D&P 88: 74, 84, 127).

Dapita ang usa ka estudyante sa pagbasa og kusog sa Doktrina ug mga Pakigsaad 88:73–76. Hangyoa ang klase sa pagsunod, nga mangita sa unsay gisugo sa Ginoo nga buhaton niining mga naghupot sa priesthood aron makaandam sa pagtudlo sa uban.

Unsa man ang gisugo niining “una nga mga mamumuo” aron maandam sa pagtudlo sa uban isip mga misyonaryo? (Mahimo nimong hangyuon ang usa ka estudyante mga magsilbing tigsulat ug isulat ang mga tubag sa mga estudyante diha sa pisara.)
Unsa ang atong mahimo aron “maghan-ay,” “mag-andam” ug “magbalaan” sa atong mga kaugalingon aron mahimong mas epektibo sa pagpakigbahin sa ebanghelyo?
Sa unsang paagi nga ang pagkalimpyo gikan sa sala makaimpluwensya sa atong ablilidad sa pagpakigbahin sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 88:77–80. Hangyoa ang klase sa pagsunod, nga mangita sa unsay gisugo sa Ginoo nga buhaton niining mga naghupot sa priesthood samtang nanagtigum sila. Hangyoa ang mga estudyante sa pagreport kon unsay ilang nakit-an.

Unsa ang gisaad sa Ginoo niadtong makugihon nga motudlo? (Nga ang Iyang grasya mouban kanila ug nga sila mas hingpit nga matudloan sa tanan nga ilang gikinahanglan aron makasabut mahitungod sa gingharian sa Dios.)
Unsa ang gipasabut nga ang “grasya [sa Ginoo] mouban kaninyo” (D&P 88:78)? (Ang Ginoo motabang kanato kon kita makugihong magtinguha sa pagtudlo ug pagkat-on sa ebanghelyo.)
Gikan sa unsay inyong nakat-unan sa mga bersikulo 77–78, unsaon ninyo sa pagsulti og usa ka baruganan mahitungod sa pagtudlo? (Ang mga estudyante mahimong moila og pipila ka mga baruganan, lakip sa mosunod: Kon makugihon kitang motudlo sa usag usa, ang Ginoo motabang kanato nga mas hingpit nga makasabut sa Iyang mga kamatuoran. Pinaagi sa pagtudlo sa usag usa, makapangandam kita sa pagpaambit sa ebanghelyo ngadto sa uban. Mahimo nimong isulat kini nga mga baruganan diha sa pisara gamit ang mga pulong sa mga estudyante.)
Sa unsang mga paagi nga ang pagtudlo sa ebanghelyo ngadto sa uban nakatabang kaninyo nga mas makasabut niini?
Sumala sa bersikulo 79, unsa pay laing mga hisgutanan nga importante nga atong masabtan? Sa unsang paagi ang pag-angkon og ingon ka lawom nga kahibalo makatabang kanato sa pagtudlo sa ebanghelyo ngadto sa uban?

Aron matabangan ang mga estudyante nga mobati sa ka-importante ug sa paggamit sa mga baruganan nga ilang nahibaloan sa ibabaw, i-assign ang mga grupo og tag-upat ka mga estudyante nga mangandam ug motudlo sa mosunod nga mga mubo nga leksyon ngadto sa mga sakop sa ilang grupo. Hangyoa ang duha ka mga estudyante sa matag grupo nga magtinabangay aron mangandam sa pagtudlo sa Doktrina ug mga Pakigsaad 88: 81–86 ug ang laing duha ka mga estudyante magtinabangay aron mangandam sa pagtudlo sa Doktrina ug mga Pakigsaad 88: 87–98. Paghimo og kopya sa mosunod nga mga instruksyon alang sa matag grupo. Hangyoa sila sa pagbasa sa tanang instruksyon ug mga bersikulo sa kasulatan ug dayon modesisyon kon unsaon nila sa pagtudlo ang matag mubo nga leksyon. (Awhaga ang duha ka estudyante sa matag parisan nga moapil sa pagtudlo.) Ipasabut nga ang matag parisan adunay lima ka minuto sa pag-andam ug mga pito ka minuto sa pagtudlo. Human ang mga estudyante aduna nay igong panahon sa pag-andam, dapita ang mga parisan nga gi-assign sa Doktrina ug mga Pakigsaad 88: 81–86 sa pagtudlo sa ubang mga estudyante sa ilang mga grupo. Dayon hangyoa ang mga estudyante nga magbaylo og tahas ug dapita ang manag-uban nga gi-assign sa Doktrina ug mga Pakigsaad 88:87–98 sa pagtudlo. (Pahinumdom: Kon gusto nimo, mahimo nga ikaw mismo ang motudlo sa mga mubo nga leksyon kay sa mohangyo sa mga estudyante sa pagtudlo sa usag usa.)

Mubo nga Leksyon 1: Doktrina ug mga Pakigsaad 88:81–86

Sugdi ang imong leksyon sa mosunod nga pangutana:

Kanus-a kamo nagmapasalamaton tungod kay dunay tawo nga mipasidaan kaninyo mahitungod sa usa ka butang? (Mahimo usab nga mopaambit ka og usa ka kasinatian.)

Dapita ang usa ka estudyante sa pagbasa og kusog sa Doktrina ug mga Pakigsaad 88:81–83. Hangyoa ang uban sa pagpangita kon unsay gitudlo sa Ginoo mahitungod sa mga pasidaan. Dapita sila sa pagreport sa ilang nakit-an. Dayon ipangutan-a ang mosunod:

Unsay gipasabut nga kita napasidan-an? (Natudloan kita sa mga kamatuoran sa gipahiuli nga ebanghelyo ni Jesukristo.)
Unsa nga kamatuoran ang atong makat-unan gikan niini nga mga bersikulo? (Kadtong imong gitudloan mahimong mogamit og lain-laing mga pulong, apan kinahanglan silang mahibalo og baruganan nga susama sa mosunod: Tungod kay kita napasidan-an pinaagi sa mensahe sa ebanghelyo, ang Ginoo nagpaabut kanato nga mopasidaan sa atong mga silingan. Mahimo nimong isugyot nga markahan sa mga estudyante kini nga baruganan diha sa bersikulo 81.)

I-summarize ang Doktrina ug mga Pakigsaad 88:84–85 pinaagi sa pagpasabut nga ang Ginoo misugo sa mga tighupot sa priesthood kinsa diha atol sa pagdawat ni Joseph Smith niini nga pagpadayag nga makugihong maghago sa pag-andam sa ilang mga kaugalingon ug sa mga Santos nga makalikay sa umaabut nga mga paghukom nga nagpaabut sa mga dautan.

Dapita ang usa ka estudyante sa pagbasa og kusog sa Doktrina ug mga Pakigsaad 88:86. Hangyoa ang imong grupo sa pagpangita kon unsaon nato sa pagpakabuhi samtang nangandam kita sa pagpaambit sa ebanghelyo. Hangyoa sila sa pagreport sa ilang nakit-an.

Unsay gipasabut sa “ayaw kamo pagpalambigit sa inyong mga kaugalingon diha sa sala”? Sa unsang paagi kini nga instruksyon magamit sa inyong kinabuhi samtang nangandam kamo sa pagdawat sa mga ordinansa sa templo, pagserbisyo og full-time nga misyon, o magminyo ug makabaton og pamilya?

Aron matabangan ang mga estudyante nga maghunahuna kon sa unsang paagi ang pagkalambigit sa sala makaapekto sa ilang abilidad sa pagpamatuod kabahin sa kamatuoran, basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Walay misyonaryo nga wala maghinulsol sa sekswal nga kalapasan o malaw-ay nga sinultihan o pagtan-aw og pornograpiya ug dayon magpaabut nga mohagit sa ubang tawo sa paghinulsol niadtong nahimo nga samang mga butang! Dili kamo makahimo niana. Ang Espiritu dili makig-uban kaninyo, ug ang mga pulong moungot sa inyong tutunlan samtang litukon ninyo kini. Dili kamo mahimong mosubay sa unsay giingon ni Lehi nga ‘gidili nga mga dalan’ [1 Nephi 8:28] ug magpaabut nga mogiya sa uban ngadto sa ‘higpit ug pig-ot’ [2 Nephi 31:18] usa—dili kana mahimo” (“Apil Kitang Tanan,” Liahona, Nob. 2011, 45).

Mahimo ka nga mopaambit sa imong pagpamatuod sa ka-importante nga magpabiling limpyo aron mahimong epektibo sa pagpaambit sa ebanghelyo. Awhaga kadtong imong gitudloan nga magtinguha nga mahimong limpyo gikan sa pagkagumon sa sala.

Mubo nga leksyon 2: Doktrina ug mga Pakigsaad 88:87–98

Pangutan-a ang imong mga gitudloan kon nakadungog ba sila sukad og tawo nga mipaambit og gamhanan nga pagpamatuod. Dapita sila sa paghulagway sa pagpamatuod ug sa unsay ilang gibati samtang nakadungog sila niini.

Dapita ang usa ka estudyante sa pagbasa og kusog sa Doktrina ug mga Pakigsaad 88:87–91. Hangyoa ang mga estudyante nga imong gitudloan sa pagpangita og mga ehemplo sa gamhanang mga pagpamatuod. Human sila mobasa, ipangutana ang mosunod:

Sa dili pa ang Ikaduhang Pag-anhi sa Ginoo, unsa nga matang sa mga pagpamatuod ang mosunod sa mga pagpamatuod sa mga misyonaryo?

Dapita ang mga estudyante nga imong gitudloan nga hilum nga mobasa sa Doktrina ug mga Pakigsaad 88:92 ug mangita kon unsay isulti sa mga anghel sa langit atol niini nga panahon sa dili pa ang Ikaduhang Pag-anhi. Hangyoa sila sa pagreport sa ilang nakit-an. Sultihi sila nga ang termino Pamanhonon nagpasabut ni Jesukristo.

Nganong importante man kaayo nga andam kita alang sa Ikaduhang Pag-anhi sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 88:95–98. Hangyoa ang mga estudyante nga imong gitudloan sa pagpangita og duha ka managlahing grupo sa katawhan kinsa pagabayawon aron sa pagsugat sa Manluluwas sa Iyang pag-anhi. Dayon ipangutana ang mosunod:

Kinsa ang pagabayawon aron mosugat ni Jesukristo sa Iyang pag-anhi? (Ang Iyang mga Santos kinsa buhi ug ang Iyang mga Santos kinsa patay na. Mahimo nimong isugyot sa mga estudyante nga imong gitudloan nga ilang markahan ang mga pulong niini nga mga bersikulo nga nagtudlo sa mosunod nga kamatuoran: Ang mga matarung mosaka aron sa pagsugat ni Kristo sa Iyang pag-anhi.)

Hangyoa ang imong mga gitudloan sa pagribyu sa Doktrina ug mga Pakigsaad 88:98 ug sa pagpangita sa mga pulong nga naghulagway sa mga grupo sa mga Santos nga makaapil sa pag-anhi sa Ginoo. Dayon ipangutana ang mosunod:

Unsa nga mga pulong ang inyong nakit-an? (Mahimo nimong ipasabut nga ang mga pulong nga “unang mga bunga” nagpasabut sa matarung nga mga Santos kinsa mobangon sa Unang Pagkabanhaw.)

Ipaambit kon unsa sa imong hunahuna ang imong bation nga mahimong kabahin sa Ikaduhang Pag-anhi sumala sa paghulagway niini nga mga bersikulo.

Human ang mga grupo sa mga estudyante makatudlo sa usag usa, ipangutana ang mosunod ngadto sa tibuok klase:

Unsa nga mga pagtulun-an ang labing mahinungdanon kaninyo sa inyong diskusyon sa Doktrina ug mga Pakigsaad 88:81–98?

I-summarize ang Doktrina ug mga Pakigsaad 88:97–107 pinaagi sa pagpasabut nga ang Ginoo mipadayag nga ang mga patay pagabanhawon sa han-ay sa ilang pagkamatarung. Kadtong una nga pagabanhawon makapanunod sa celestial nga gingharian (tan-awa sa D&P 88:97–98). Kadtong ikaduha nga pagabanhawon makapanunod sa terrestrial nga gingharian (tan-awa sa D&P 88:99). Kadtong makapanunod sa telestial nga gingharian pagabanhawon human sa Milenyum (tan-awa sa D&P 88:100–101). Sa katapusan, kadtong “magpabilin nga mahugaw”—kadtong mipuyo dinhi sa yuta ug nahimo nga mga anak sa kapildihan—mabanhaw ug itambog ngadto sa kawanangan sa kangitngit (tan-awa sa D&P 88:102). Pagkahuman sa usa ka libo ka tuig nga kalinaw nga gitawag og ang Milenyum, si Satanas ug ang iyang mga sumusunod makig-away batok sa katawhan sa Dios nga gipangulohan ni Miguel (kinsa gitawag usab nga si Adan). Si Satanas ug ang iyang mga sumusunod mapildi ug itambog ngadto sa kawanangan sa kangitngit.

Itudlo ang mosunod nga baruganan diha sa pisara: “Kon makugihon kitang motudlo sa usag usa, ang Ginoo motabang kanato nga mas hingpit nga makasabut sa Iyang mga kamatuoran.” Dayon ipangutana ang mosunod:

Sa unsang paagi ang inyong pagsabut sa Doktrina ug mga Pakigsaad 88:81–86 o 88:87–98 milawom samtang gitudlo ninyo kini karon ngadto sa laing tawo?

Awhaga ang mga estudyante sa pagpangita og mga oportunidad sa pagtudlo sa ebanghelyo ngadto sa uban. Pagpamatuod kabahin sa mga panalangin nga ilang madawat sa paghimo niini.

Komentaryo ug Background nga Impormasyon

Doktrina ug mga Pakigsaad 88:73–76. “Ako modali sa akong buluhaton”

Niadtong Oktubre 2012, wala madugay human si Presidente Thomas S. Monson mipahibalo nga paubsan ang edad sa makamisyon nga batan-ong mga lalaki ug batan-ong mga babaye, si Elder Jeffrey R. Holland sa Korum sa Napulog Duha ka mga Apostoles mipasabut nga kini nga pahibalo usa ka ehemplo nga ang Dios mipadali sa Iyang buhat:

“Gipadali sa Dios ang Iyang buhat. Ug Siya nagkinahanglan og dugang pa ug mas andam ug takus nga mga misyonaryo sa pagpakaylap sa kahayag ug kamatuoran ug paglaum ug kaluwasan sa ebanghelyo ni Jesukristo ngadto sa kanunayng mangitngit ug makahadlok nga kalibutan. …

“… Kining pahibalo … dili mahitungod kaninyo. Mahitungod kini sa tam-is ug putli nga mensahe nga gihangyo kamo sa pagpaambit” (sa “Church Lowers Age Requirement for Missionary Service,” Church News, Okt. 6, 2012, ldschurchnews.com).

Doktrina ug mga Pakigsaad 88:81–82. Pagpasidaan sa atong mga silingan

Si Presidente Henry B. Eyring sa Unang Kapangulohan mipasabut sa atong katungdanan isip mga miyembro sa Simbahan sa pagpaambit sa ebanghelyo ngadto sa uban:

“Ang katungdanan sa pagpasidaan sa atong mga silingan anaa kanatong tanan kinsa midawat sa pakigsaad sa bunyag. Kita kinahanglang makig-istorya ngadto sa dili miyembro nga mga higala ug mga paryente mahitungod sa ebanghelyo. Ang atong katuyoan mao ang pagdapit kanila nga matudloan sa full-time nga mga misyonaryo kinsa gitawag ug gi-set apart alang sa pagtudlo. …

“… Kita kinahanglan gayud… modapit uban sa pagpamatuod. Ang gugma ug ehemplo makahimo niining posible. Apan kinahanglan gihapon natong moabli sa atong mga ba-ba ug mopamatuod. …

“Tingali ang uban kanato maglisud sa pagtuo nga kita nahigugma og igo, o nga ang atong mga kinabuhi igo nga maayo, o nga ang atong gahum sa pagpamatuod igo alang sa atong mga pagdapit sa atong mga silingan nga pagadawaton. Apan ang Ginoo nasayud nga kita mahimong mobati niana nga paagi. Paminaw ngadto sa Iyang maawhagong mga pulong, diin Iyang gimando nga ibutang diha sa unahan sa Doktrina ug mga Pakigsaad, sa dihang Siya mihatag kanato sa atong katungdanan: ‘Ug ang tingog sa pagpasidaan modangat ngadto sa tanan nga mga katawhan, pinaagi sa mga ba-ba sa akong mga tinun-an, kinsa Ako mipili niining katapusan nga mga adlaw’ (D&P 1:4).

“Ug dayon paminaw ngadto sa Iyang paghulagway sa mga kwalipikasyon niadto nga mga disipulo—kanato: “Ang mahuyang nga mga butang sa kalibutan moabut ug mopukan sa gamhanan ug mga malig-on” (D&P 1:19).

“Ug sa wala madugay: ‘Nga ang kahingpitan sa akong ebanghelyo mahimo tingali ikapahayag pinaagi sa mahuyang ug yano ngadto sa mga lumulupyo sa kalibutan’ (D&P 1:23).

“Ug dayon pag-usab, ‘Ug sa ingon nga sila mga mapainubsanon sila mahimo nga malig-on, ug mapanalanginan sa kahitas-an’ (D&P 1:28).

“Kana nga kasigurohan gihatag ngadto sa unang mga misyonaryo sa Simbahan ug ngadto sa mga misyonaryo karong adlawa. Apan kini gihatag ngari kanatong tanan usab. Kinahanglan gayud kita magbaton og hugot nga pagtuo nga kita makahigugma og igo ug nga ang ebanghelyo igo nga nakatandog sa atong mga kinabuhi nga ang atong pagdapit sa pagpili madungog ingon og gikan sa Magtutudlo kansang pagdapit mao kini” (“A Voice of Warning,” Ensign, Nob. 1998, 33–35).

Doktrina ug mga Pakigsaad 88:117. Maligdong nga mga katiguman

Gikan sa Enero hangtud sa Mayo 1836, pipila ka mga miting ang gipahigayon sa Kirtland. Ang uban niini nga mga miting mao ang maligdong nga mga katiguman. Ang maligdong nga mga katiguman mga espesyal nga mga miting nga lahi sa ubang mga miting sa Simbahan. Atol sa semana sa Marso 27, 1836, ang maligdong nga mga katiguman gipahigayon isip kabahin sa pagpahinungod sa Templo sa Kirtland, ug laing maligdong nga katiguman ang gipahigayon pagkahuman sa tulo ka adlaw niadtong Marso 30, 1836. Laing maligdong nga katiguman ang gipahigayon mga usa ka tuig human niadto sa Abril 6, 1837.

Si Elder David B. Haight sa Korum sa Napulog Duha ka mga Apostoles mitudlo:

“Ang maligdong nga katiguman, sigun sa gipasabut sa ngalan, nagpasabut og usa ka sagrado, mahunahunaon, ug mahilum nga okasyon diin ang mga Santos magkatigum ubos sa direksyon sa Unang Kapangulohan. Ang maligdong nga mga katiguman gigamit sa tulo ka mga katuyoan: sa pagpahinungod sa mga templo, espesyal nga instruksyon ngadto sa mga lider sa priesthood, ug pag-sustain og bag-ong Presidente sa Simbahan” (“Solemn Assemblies,” Ensign, Nob. 1994, 14).

Si Robert J. Norman, kanhi director sa Tucson Institute of Religion, mipasabut:

“Ang maligdong nga mga katiguman himoon aron sa pagpalambo sa pagka-espirituhanon sa mga Santos ug sa paghatag og dugang gibug-aton sa ka-importante sa katuyoan sa katiguman. Si Propeta Joseph Smith miingon, ‘Kinahanglang maandam nato ang tanang butang, ug motawag sa atong maligdong nga katiguman sama sa gisugo kanato sa Ginoo, nga makahimo kita sa pagtuman sa Iyang dakong buhat, ug kini kinahanglan gayud himoon sumala sa kaugalingong paagi sa Dios. Ang balay sa Ginoo kinahanglan gayud maandam, ug ang maligdong nga katiguman matawag ug ma-organisar diha niini, sumala sa han-ay sa balay sa Dios.’ (Teachings of the Prophet Joseph Smith, sel. Joseph Fielding Smith, Salt Lake City: Deseret Book Co., 1938, p. 91.)

“Girekord ni Heber C. Kimball ang mga instruksyon sa Propeta ngadto sa mga elder sa wala pa kana nga maligdong nga katiguman: ‘Gisugo kita sa pag-andam sa atong mga kaugalingon alang sa usa ka maligdong nga katiguman. Sa kadugayan miabut ang panahon nga magpundok na ang katiguman; nga sa wala pa kini miawhag si Propeta Joseph Smith sa mga elder nga himoong ligdong ang ilang mga hunahuna, pinaagi sa pagsalikway sa tanang dautan gikan niini, sa hunahuna, pulong ug buhat, ug sa paghimong balaan sa ilang mga kasingkasing tungod kay dili sila angay nga magpaabut og panalangin gikan sa Dios kon wala sila maandam alang niini, kay ang Espiritu Santo dili mopuyo sa dili balaan nga mga templo.’ (Orson F. Whitney, Life of Heber C. Kimball, 3d ed., Salt Lake City: Bookcraft, 1967, p. 91.)

“Kining dugay nang gihulat nga maligdong nga katiguman gipahigayon didto sa Kirtland Temple niadtong 30 sa Marso 1836, tulo ka adlaw human sa pagpahinungod niini. Diha sa katiguman, tulo ka gatus ka mga kaigsoonang lalaki nag-abut ug nakadawat og pipila sa mga ordinansa sa ebanghelyo, ug si Propeta Joseph Smith mihan-ay sa lain-laing mga korum sa Simbahan. (Tan-awa sa History of the Church, 2:430–33; D&P 88:139–141; 109:35.) Paglabay sa usa ka tuig, niadtong 6 sa Abril 1837, laing maligdong nga katiguman ang gitawag aron sa pagsaulog sa anibersaryo sa Simbahan ug sa dugang nga pag-organisar sa mga korum sa priesthood” (Robert J. Norman, “I Have a Question,” Ensign, Dis. 1988, 53).