Leksyon 75
Doktrina ug mga Pakigsaad 69–71
Pasiuna
Sa hinapos sa Oktubre o sayo sa Nobyembre 1831, nadawat ni Oliver Cowdery ang buluhaton sa pagdala sa manuskrito alang sa Book of Commandments gikan sa Ohio ngadto sa Missouri. Sa Missouri, i-imprinta ni William W. Phelps ang basahon sa iyang imprintahanan. Sa Nobyembre 11, 1831, gitudlo sa Ginoo si John Whitmer nga mahimong kauban sa biyahe ni Oliver ug gimandoan siya sa pagpadayon sa iyang mga katungdanan isip Church Historian (tan-awa sa D&P 69). Sa pagkasunod adlaw, gitudlo sa Ginoo ang unom ka tawo sa pagserbisyo isip mga tinugyanan sa mga pagpadayag (tan-awa sa D&P 70). Sa Disyembre 1831, gimandoan sa Ginoo si Joseph Smith ug Sidney Rigdon sa pagserbisyo og misyon aron sa pagwagtang sa dili mahigalaong mga pagbati batok sa Simbahan ug aron sa pag-andam sa agianan alang sa mga pagpadayag ug mga sugo nga imantala (tan-awa sa D&P 71).
Mga Sugyot alang sa Pagtudlo
Doktrina ug mga Pakigsaad 69
Ang Ginoo nagpadayag sa importansya sa pagtipig og mga kasaysayan
Sa dili pa magklase, isulat ang mosunod nga pangutana diha sa pisara: Adunay bay tawo sukad nga misalig kanimo sa pagbantay og usa ka butang nga bililhon?
Sa sinugdanan sa leksyon, hatagi ang mga estudyante og panahon sa paghunahuna mahitungod sa pangutana diha sa pisara. Dayon pangutan-a sa mosunod:
-
Unsay gisalig diha kanimo nga buhaton? Giunsa niana nga pagsalig sa pag-impluwensya sa imong pagbantay alang sa butang nga bililhon?
Dapita ang usa ka estudyante sa pagbasa og kusog sa pasiuna sa seksyon alang sa Doktrina ug mga Pakigsaad 69. Hangyoa ang klase sa pagsunod ug pagpangita sa unsay gisalig ngadto kang Oliver Cowdery.
-
Unsay gisalig ngadto ni Oliver Cowdery?
-
Kon kamo gisaligan niining bililhong mga butang, unsaon ninyo sa pagbantay niini?
Dapita ang usa ka estudyante sa pagbasa og kusog sa Doktrina ug mga Pakigsaad 69:1–2. Hangyoa ang klase sa pagsunod, nga mangita sa tambag nga gihatag sa Ginoo kalabut niining bililhong mga butang.
-
Ngano kaha nga kini maalamon nga sobra sa usa ka tawo ang modala niining bililhon nga mga butang?
Ipasabut nga gisaligan sa Ginoo si John Whitmer og laing importanting responsibilidad, dugang sa pagtabang ni Oliver sa pagdala sa mga pagpadayag ug salapi ngadto sa Missouri. Dapita ang pipila ka mga estudyante sa pgpuli-puli sa pagbasa og kusog gikan sa Doktrina ug mga Pakigsaad 69:3–8, ug hangyoa ang klase sa pagpangita og unsa pay gisalig sa Ginoo ngadto ni John Whitmer nga buhaton. Hangyoa ang mga estudyante sa pag-report kon unsay ilang makit-an. Mahimo nimong pahinumduman ang mga estudyante nga si John Whitmer gitawag sa pagserbisyo isip Church Historian ug Recorder sa sayo nga bahin sa 1831 (tan-awa sa D&P 47).
-
Sumala sa Doktrina ug mga Pakigsaad 69:3, unsay gimando sa Ginoo nga iparekord kang John Whitmer?
-
Sumala sa bersikulo 8, nganong importante alang kang John Whitmer ang pagtipig og kasaysayan sa Simbahan?
Ipasabut nga sukad sa panahon ni Joseph Smith, ang mga lider sa Simbahan makugihong naningkamot sa pagsunod sa sugo sa Ginoo sa pagrekord sa “tanan nga mahinungdanon nga mga butang … mahitungod [sa] simbahan” (D&P 69:3). Ilang gipabilin ang “tanan nga mga butang nga alang sa kaayohan sa simbahan” (D&P 69:8), bisan og ang pipila niadto nga mga butang makaulaw. Sama pananglit, ang Doktrina ug mga Pakigsaad naglakip og pipila ka mga pagpadayag diin ang Ginoo mipanton sa unang mga lider sa Simbahan (tan-awa sa D&P 3:5–9; 93:41–50). Karon ang Church Historian, ubos sa direksyon sa Unang Kapangulohan, nangulo sa mga paningkamot sa Church History Department aron sa pagtipig sa tukma nga kasaysayan sa tanan nga “mahinungdanon nga mga butang.”
Aron matabangan ang mga estudyante sa pag-ila og baruganan diha sa Doktrina ug mga Pakigsaad 69:3, 8, isulat ang mosunod nga dili kompleto nga pamahayag diha sa pisara: Ang Ginoo nagpaabut nga ang mga kasaysayan tipigan alang sa kaayohan sa …
Pangutan-a ang mga estudyante kon unsaon nila sa pagkompleto kini nga pamahayag base diha sa mga bersikulo 3 ug 8. Samtang sila nagtubag, kompletuha ang pamahayag diha sa pisara: Ang Ginoo nagpaabut nga ang mga kasaysayan tipigan alang sa kaayohan sa Simbahan ug sa nagtubo nga mga kaliwatan. Mahimo nimong sigurohon nga ang mga estudyante nakasabut nga ang mga pulong “nagtubo nga mga kaliwatan” nagpasabut ngadto kanila, ang kabatan-onan sa Simbahan.
-
Sa inyong opinyon, sa unsa kaha nga paagi ang mga kasaysayan sa Simbahan ug personal nga mga kasaysayan makahatag og kaayohan sa Simbahan? Sa unsa kaha nga paagi kini naghatag og kaayohan sa nagtubo nga kaliwatan?
Hangyoa ang mga estudyante sa paghunahuna mahitungod sa usa ka istorya gikan sa kasaysayan sa Simbahan o sa mga kasaysayan sa ilang pamilya nga nakatabang kanila. Ipares-pares ang mga estudyante, ug hangyoa sila sa pagpakigbahin sa ilang mga istorya ngadto sa usag usa. Hangyoa usab sila sa pagsulti mahitungod sa unsa nga paagi ang mga istorya nakaimpluwensya kanila. O mahimo nimong dapiton ang pipila ka mga estudyante sa pagpakigbahin sa ilang mga istorya diha sa tibuok klase.
Doktrina ug mga Pakigsaad 70
Ang Manluluwas nagtudlo og mga tinugyanan sa pagbantay sa Iyang mga pagpadayag
Dapita ang mga estudyante sa pagbasa og hilum sa pasiuna sa seksyon sa Doktrina ug mga Pakigsaad 70 ug sa pagpangita sa unsay gisulti sa kasaysayan ni Joseph Smith mahitungod sa Doktrina ug mga Pakigsaad (sa orihinal gitawag og Book of Commandments).
-
Sa unsa nga paagi gihulagway sa Propeta ang Doktrina ug mga Pakigsaad?
Dapita ang usa ka estudyante sa pagbasa og kusog sa Doktrina ug mga Pakigsaad 70:1 ug hangyoa ang klase sa pagpangita sa mga ngalan sa unom ka mga lider sa Simbahan. Dayon dapita ang laing estudyante sa pagbasa og kusog sa Doktrina ug mga Pakigsaad 70:2–4. Hangyoa ang klase sa pagsunod, nga mangita sa responsibilidad nga gihatag sa Ginoo niining unom ka mga lalaki.
-
Unsa nga responsibilidad ang gihatag sa Ginoo niining unom ka mga lalaki? (Sila mahimong mga tinugyanan sa mga pagpadayag ug mga sugo.)
-
Sumala sa Doktrina ug mga Pakigsaad 70:4, unsa ang gisulti sa Ginoo nga Iyang gikinahanglan niini nga mga lalaki sa adlaw sa paghukom? (Siya magkinahanglan og kasayuran sa ilang pagkatinugyanan. Sa laing pagkasulti, Siya mohangyo kanila sa pagreport sa ilang serbisyo.)
-
Unsa ang gisugyot niini mahitungod sa unsay gikinahanglan sa Ginoo kanato sa adlaw sa paghukom? (Samtang ang mga estudyante nagtubag, tabangi sila sa pag-ila sa mosunod nga kamatuoran: Ang Ginoo mopatubag kanato alang sa mga katungdanan nga Iyang gisalig kanato. Isulat sa pisara kini nga kamatuoran.)
-
Sa unsa nga paagi kaha kini nga kamatuoran nag-impluwensya sa paagi nga kita nagtubag sa mga calling ug mga buluhaton diha sa Simbahan?
I-summarize ang Doktrina ug mga Pakigsaad 70:5–18 pinaagi sa pagpasabut nga gisultihan sa Ginoo kining unom ka mga lalaki sa paghimo sa ilang pagkatinugyanan sa mga pagpadayag nga “ang ilang buluhaton diha sa simbahan sa Dios, sa pagdumala kanila ug sa mga kahimoan niana, oo, ang mga kaayohan niana” (D&P 70:5). Pinasubay sa balaod sa pahinungod, bisan unsang kinitaan nga ilang madawat nga sobra sa ilang mga panginahanglan ihatag ngadto sa balay tipiganan sa Ginoo alang sa pag-amuma sa mga kabus (tan-awa sa D&P 70:7).
Doktrina ug mga Pakigsaad 71
Nagtudlo ang Ginoo ni Joseph Smith ug Sidney Rigdon kon unsaon sa pagtubag sa mga kritiko sa Simbahan
Pangutan-a ang mga estudyante kon nakadungog na ba sila og mga pagsaway mahitungod sa Simbahan. Mahimo nimong ikonsiderar ang pagdapit og pipila ka mga estudyante sa pagsulti mahitungod sa ilang mga kasinatian.
-
Unsa ang angay nga mga paagi sa pagtubag sa mga pagsaway sa Simbahan?
Aron matabangan ang mga estudyante sa pagsabut sa konteksto sa Doktrina ug mga Pakigsaad 71, dapita ang usa ka estudyante sa pagbasa og kusog sa mosunod nga impormasyon (o ikaw mismo ang mobasa sa paragraph). Hangyoa ang klase sa pagpaminaw kon giunsa pagsaway ang Simbahan ug ang mga lider niini sa panahon nga kini nga pagpadayag gihatag.
Si Ezra Booth usa ka ministro sa Methodist kaniadto kinsa nahimong miyembro sa Simbahan human mabasa ang Basahon ni Mormon, makigsulti ni Joseph Smith, ug masaksihan ang pagpang-ayo. Mibiyahe siya isip usa ka misyonaryo ngadto sa Missouri apan nawad-an og kadasig sa dihang dili siya makahimo og mga milagro aron sa pagkumbinsir sa uban sa kamatuoran. Agi og dugang, si Booth wala motuo nga ang kinaiya ni Joseph Smith angay alang sa usa ka propeta o sa usa ka espirituhanong lider. Nahimo siyang hilabihan ka hinawayon ni Joseph Smith, mibiya sa Simbahan, ug misulat og siyam ka sulat nga nagsaway sa Simbahan ug sa mga lider niini. Kini nga mga sulat, gimantala sa usa ka pamantalaan nga gitawag og ang Ohio Star, migiya sa pipila ka mga tawo sa pagpalambo og dili mahigalaong mga pagbati ngadto sa Simbahan ug sa mga lider niinii. Ang kasaysayan ni Propeta Joseph Smith mitawag sa mga sinulat ni Ezra Booth og “mga serye sa mga sulat, nga, sa pagdaot niini, pamakak, ug ngil-ad nga mga intensyon sa paglaglag sa buhat sa Ginoo, mipakita sa iyang [kang Booth] kahuyang, kadautan ug kabuang, ug mibilin kaniya og handumanan sa iyang kaugalingong kaulaw, alang sa kalibutan nga mahinumduman” (History of the Church, 1:216–17). Si Symonds Ryder, laing wala mahimuot nga miyembro, mihatag og mga kopya sa pipila ka mga pagpadayag ngadto sa laing pamantalaan, nagsulay sa pagpugong sa mga tawo sa pagpasakop sa Simbahan.
Ipasabut nga ang kasamok nga gihimo ni Ezra Booth ug Symonds Ryder mitubo ngadto sa usa ka seryosong problema. Dapita ang usa ka estudyante sa pagbasa og kusog sa Doktrina ug mga Pakigsaad 71:1–4 ug hangyoa ang klase sa pagpangita unsay gisulti sa Ginoo nga buhaton ni Joseph Smith ug Sidney Rigdon aron sa paghupay sa dili mahigalaong mga pagbati nga miresulta gikan sa mga artikulo sa pahayagan.
-
Sumala sa bersikulo 1, unsay gitudlo sa Ginoo nga buhaton ni Joseph Smith ug Sidney Rigdon aron sa paghupay sa negatibong mga pagbati sa mga tawo mahitungod sa Simbahan? (Sila kinahanglan nga mogamit sa mga kasulatan ug sa gahum sa Espiritu nga ihatag sa Ginoo kanila.)
-
Unsa nga baruganan ang atong makat-unan gikan niini nga panudlo mahitungod sa unsaon pagtubag ang mga pagsaway kabahin sa Simbahan? (Bisan tuod ang mga estudyante mohatag og daghang husto nga mga tubag, siguroha nga ilang ilhon ang mosunod nga baruganan: Kon ang mga tawo mosaway sa Simbahan, kita makatubag pinaagi sa pagpakigbahin og mga kamatuoran gikan sa mga kasulatan ug sa pagsunod sa paggiya sa Espiritu. Isulat sa pisara kini nga baruganan.)
-
Unsa ang atong mabuhat karon sa pag-andam sa pagtubag sa mga panaway batok sa Simbahan o sa mga lider niini?
Aron matabangan ang mga estudyante sa pagsabut sa kaimportante sa pagbaton sa paggiya sa Espiritu samtang sila nagtubag sa pagsaway batok sa Simbahan, dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. Hangyoa ang klase sa pagpaminaw kon sa unsa nga paagi ang Espiritu makatabang kanato sa pagtubag sa pagsaway batok sa Simbahan.
“Samtang kita motubag sa uban, ang matag sitwasyon managlahi. “Maayo na lang, ang Ginoo nasayud sa mga kasingkasing sa mga tig-akusar kanato ug unsaon nato sila sa pagtubag sa maayong paagi. Samtang ang tinuod nga disipulo mangayo og giya sa Espiritu, makadawat sila og inspirasyon gikan sa matag panag-abut. Ug sa matag panag-abut, ang tinuod nga mga disipulo motubag sa mga paagi nga modapit sa Espiritu sa Ginoo” (”Kristohanong Kaisug: Ang Bugti sa Pagkadisipulo,” Liahona, Nob. 2008, 73).
Basaha og kusog ang Doktrina ug mga Pakigsaad 71:5–11. Hangyoa ang mga estudyante sa pagpangita sa tambag ug paghupay nga gihatag sa Ginoo ngadto niadtong kinsa nagtubag sa pagpanaway batok sa Simbahan.
-
Unsa nga tambag ang inyong nakita diha sa bersikulo 7?
Ipasabut nga si Sidney Rigdon misunod sa tambag sa Ginoo ug midapit ni Ezra Booth sa pagkuyog kaniya sa lungsod sa Ravenna, diin diha sa publiko ilang hisgutan ang mga sulat nga gipadala ni Ezra ngadto sa pamantalaan. Gidapit usab ni Sidney si Symonds Ryder sa usa ka publiko nga debate kabahin sa Basahon ni Mormon. Ang duha ka lalaki mibalibad sa mga imbitasyon. Mipamatuod gihapon si Sidney sa kamatuoran didto sa Ravenna ug sa ubang mga dapit.
-
Sa unsa kaha nga paagi ang tambag diha sa Doktrina ug mga Pakigsaad 71:8–10 makahupay ngadto niadtong kinsa nagtubag sa pagsaway batok sa Simbahan?
Dapita ang mga estudyante sa pagkonsiderar kon unsay ilang buhaton aron mas makapangandam og maayo sa ilang mga kaugalingon sa pagtubag sa pagsaway batok sa Simbahan. Ipaambit ang imong pagpamatuod sa Simbahan ug sa mga lider niini.
Komentaryo ug Background nga Impormasyon
Doktrina ug mga Pakigsaad 69:3, 8. “Siya mopadayon sa pagsulat ug mohimo og kasaysayan”
Si Presidente Spencer W. Kimball mipamatuod sa kaimportante sa pagsulat og personal nga mga kasaysayan:
“Ang inyong journal mao ang inyong kasaysayan sa kaugalingong kinabuhi, busa kini kinahanglang tipigan og maayo. Kamo talagsaon, ug adunay mga hitabo sa inyong kasinatian nga mas halangdon ug dalaygon sa ilang kaugalingong paagi kay sa niadtong na-rekord sa ubang kinabuhi. Kini mahimong naglangkob og mga butang sama sa kalit nga mga panan-aw ug mga istorya kabahin sa pagkamatinud-anon. …
“Ang inyong istorya kinahanglang isulat karon samtang kini bag-o pa ug samtang ang tinuod nga mga detalye anaa. …
“Unsa ang inyong mahimo nga mas maayo alang sa inyong mga anak ug sa mga apo kay sa mag-rekord sa istorya sa inyong kinabuhi, sa inyong mga kadaugan ibabaw sa kalisdanan, sa inyong pagkaamgo human sa pagkasayop, sa inyong pag-uswag sa dihang ang tanan ingon og walay paglaum, sa inyong paglipay sa dihang sa katapusan kamo milampos? …
“Pagkuha og notebook, … usa ka journal nga molungtad sa tanang panahon, ug tingali ang mga anghel mahimong mokutlo gikan niini sa kahangturan. Pagsugod karon ug isulat diha niini ang inyong inadlaw nga mga kalihokan, inyong kinailadmang mga hunahuna, inyong mga kalampusan ug mga kapakyasan, inyong mga panag-uban ug inyong mga kadaugan, inyong mga impresyon ug inyong mga pagpamatuod” (“The Angels May Quote from It,” New Era, Okt. 1975, 5).
Doktrina ug mga Pakigsaad 71. Ang misyon ni Joseph Smith ug Sidney Rigdon sa Ohio
Ang kasaysayan ni Joseph Smith naglakip og paghulagway kon giunsa ni Joseph Smith ug Sidney Rigdon sa pagtrabaho aron matuman ang mando sa Ginoo sa paghupay sa dili mahigalaong mga pagbati ngadto sa Simbahan nga milambo tungod sa mga artikulo sa pamantalaan nga gisulat ni Ezra Booth:
“Gikan niini nga panahon hangtud sa ika-8 o ika-10 sa Enero, 1832, ang akong kaugalingon ug si Elder Rigdon mipadayon sa pagsangyaw didto sa Shalersville, Ravenna, ug sa ubang mga dapit, mipahimutang sa kamatuoran, mipamatuod sa kawsa sa atong Manunubos; mipakita nga ang adlaw sa pagpanimalos nagsingabut diha niini nga kaliwatan sama sa usa ka kawatan sa kagabhion, nga ang pagdaot, pagkabuta ug kangitngit mipuno sa mga hunahuna sa daghan, ug mihimo kanila sa paglutos sa tinuod nga Simbahan, ug misalikway sa tinuod nga kahayag; nga niana nga paagi daghan kaming gibuhat sa paghupay sa naukyab nga mga pagbati nga nagtubo gumikan sa eskandalusong mga sulat nga gimantala diha sa Ohio Star, didto sa Ravenna, ni Ezra Booth, nga nahisgutan na nga mibiya sa kamatuoran” (sa History of the Church, 1:241).
Doktrina ug mga Pakigsaad 71. Symonds Ryder
Sa dihang unang nahibalo si Symonds Ryder mahitungod sa Simbahan, mipabilin siyang nagduha-duha sulod sa pipila ka panahon kon gusto ba siyang magpabunyag. Apan, sa 1831 nabasa niya ang usa ka istorya sa pamantalaan kabahin sa pagkaguba sa Peking, China, ug nahinumdom nga gipanagna sa usa ka Mormon nga batang babaye ang pagkaguba niana nga siyudad mga unom ka semana sa wala pa kini mahitabo. Kini nga kasinatian migiya kaniya sa pagpasakop sa Simbahan.
Wala madugay human si Symonds nabunyagan ug nakumpirmahan, gi-orden siya nga elder. Nadawat niya ang sulat nga gipirmahan ni Propeta Joseph Smith ug Sidney Rigdon, nagpahayag nga kabubut-on sa Ginoo, gipahibalo pinaagi sa Espiritu Santo, nga siya kinahanglan mosangyaw sa ebanghelyo. Sa duha ka sulat nga iyang nadawat ug sa opisyal nga sugo sa pagsangyaw, hinoon, ang iyang pangalan na-spelling og Rider kay sa Ryder. Tungod sa sayop nga spelling, misugod sa pagduda si Symonds sa mga pagpadayag ni Joseph Smith ug sa iyang calling isip usa ka propeta sa Dios. Sa kadugayan mibiya si Symonds sa Simbahan. Samtang ang iyang reaksyon sa nasayop nga spelling sa iyang pangalan dili lamang ang rason sa iyang pagbiya sa kamatuoran, kini midugang niini. Human sa iyang pagbiya sa kamatuoran, nahimo si Symonds Ryder nga usa sa mga sakop sa pundok sa manggugubot nga mialkitran ug mibutang og mga balhibo ni Joseph Smith sa gawas sa panimalay ni John ug Elsa Johnson sa gabii sa Marso 24–25, 1832.
Doktrina ug mga Pakigsaad 71:7. Pagtabang sa uban nga masabtan ang kamatuoran
Si Elder Robert D. Hales sa Korum sa Napulog Duha ka mga Apostoles mihatag sa mosunod nga tambag kon sa unsa nga paagi tubagon ang mga tawo kinsa nagsaway sa Simbahan:
“Isip tinuod nga mga disipulo, ang una natong hunahunaon mao gayud ang kaayohan sa uban, dili personal nga kaayohan. Ang mga pangutana ug mga pagsaway naghatag kanato og oportunidad sa pagtabang ngadto sa uban ug mopakita nga sila importante sa atong Langitnong Amahan ug kanato. Ang atong tumong mao nga tabangan sila nga makasabut sa kamatuoran, dili ang pagdepensa sa atong kahusto sa usa ka debate sa teyolohiya. Ang atong kinasingkasing nga mga pagpamatuod mao ang pinakagamhanan nga tubag nga atong mahatag sa mga tig-akusar kanato. Ug kana nga pagpamatuod matawo lamang diha sa gugma ug kamapuanguron.” (“Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 74).
Si Elder Marvin J. Ashton sa Korum sa Napulog Duha ka mga Apostoles mitambag:
“Tingali dili gayud kita mahimong gawasnon niadtong kinsa dayag nga mga anti-Mormon. Busa, awhagon nato ang tanan natong mga miyembro sa pagdumili nga mahimong anti-anti Mormon” (“Pure Religion,” Ensign, N ob. 1982, 63).