Doktrina ug mga Pakigsaad 106–108; 137 (Unit 23)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 106–108; 137 (unit 23) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 106; 107:1–20)

Pinaagi sa pagtuon sa tambag sa Ginoo ngadto ni Warren Cowdery diha sa Doktrina ug mga Pakigsaad 106, nakat-unan sa mga estudyante nga kon kita mopaubos sa atong kaugalingon sa atubangan sa Ginoo, nan Siya malooy kanato, mobayaw kanato, ug mohatag kanato og grasya ug kasiguraduhan. Nasugdan usab sa mga estudyante ang ilang pagtuon sa Doktrina ug mga Pakigsaad 107, nga usa ka pagpadayag bahin sa priesthood. Gikan niini nga seksyon ilang nakat-unan nga ang Melchizedek Priesthood subay sa kapunongan sa Anak sa Dios. Natun-an usab nila ang lain-laing mga katungdanan ug mga responsibilidad sa Melchizedek ug Aaronic Priesthood.

Day 2 (Doktrina ug mga Pakigsaad 107:21–38)

Samtang gipadayon sa mga estudyante ang ilang pagtuon sa Doktrina ug mga Pakigsaad 107, ilang nakat-unan ang mahitungod sa mga responsibilidad sa tigdumalang mga korum sa Simbahan: ang Unang Kapangulohan, ang Korum sa Napulog Duha ka mga Apostoles, ug ang Korum sa Seventy. Nakat-unan usab nila nga ang mga desisyon sa tigdumalang mga korum gihimo diha sa panaghiusa ug sa pagkamatarung.

Day 3 (Doktrina ug mga Pakigsaad 107:39–100; 108)

Gikan sa Doktrina ug mga Pakigsaad 107, nakat-unan sa mga estudyante nga ang mga patriarch gitawag pinaagi sa pagpadayag ug gi-orden ubos sa direksyon sa Napulog Duha ka mga Apostoles ug nga ang mga amahan kinsa naghupot sa Melchizedek Priesthood adunay awtoridad sa pagpanalangin sa ilang mga anak. Natun-an usab sa mga estudyante ang mga pulong sa Ginoo ngadto ni Lyman Sherman nga narekord sa Doktrina ug mga Pakigsaad 108. Nadiskubrihan nila nga samtang mosunod kita sa tingog sa Ginoo, kita midapit sa Iyang kapasayloan, nga makahatag og kapahulayan sa atong mga kalag.

Day 4 (Doktrina ug mga Pakigsaad 137)

Niini nga leksyon, nakat-unan sa mga estudyante ang mahitungod sa panan-awon ni Propeta Joseph Smith sa celestial nga gingharian ug ang mga tawo nga iyang nakita didto. Ang leksyon naghatag og gibug-aton sa mosunod nga baruganan: Ang tanang mga tawo kinsa namatay nga walay kasayuran sa ebanghelyo, kinsa midawat unta niini sa tibuok nilang kasingkasing, makapanunod sa celestial nga gingharian; ang Ginoo mohukom kanato pinaagi sa atong mga binuhatan ug mga tinguha sa atong mga kasingkasing; ug ang tanang mga bata kinsa namatay nga wala pay tulubagon maluwas didto sa celestial nga gingharian.

Pasiuna

Diha sa ilang sinemana nga mga assignment, ang mga estudyante wala gihangyo nga palawman ang pagtuon sa Doktrina ug mga Pakigsaad 107:60–100. Kini nga leksyon mohatag kanila niana nga oportunidad. Makatabang kini nila nga mahimong pamilyar sa mga katungdanan sa priesthood ug mas masabtan ang ilang mga katungdanan isip mga miyembro sa Simbahan ni Jesukristo. Makakat-on usab ang mga estudyante gikan sa tambag nga gihatag ngadto ni Lyman Sherman nga narekord sa Doktrina ug mga Pakigsaad 108.

Sa pagtuon sa mga katungdanan sa priesthood dinhi niining leksyon, importante nga matabangan ang mga estudyante nga makasabut nga samtang mapahimutang ang mga kalalakin-an niining nagkalain-laing mga katungdanan isip mga naghupot sa priesthood, ang mga panalangin sa priesthood magamit sa tanan. Si Elder Dallin H. Oaks sa Korum sa Napulog Duha ka mga Apostoles mitudlo: Ang priesthood mao ang gahum sa Dios nga gigamit sa pagpanalangin sa tanan Niyang mga anak, lalaki ug babaye. Pipila sa atong minubo nga mga pulong, parehas sa ‘ang mga babaye ug ang priesthood,’ nagpasabut og sayop nga ideya. Ang mga lalaki dili mao ‘ang priesthood.’ Ang priesthood meeting usa ka miting niadtong naghupot ug naggamit sa priesthood. Ang mga panalangin sa priesthood, sama sa bunyag, pagdawat sa Espiritu Santo, sa temple endowment, ug mahangturong kaminyoon, parehas nga anaa para sa mga lalaki ug mga babaye. Ang katungod sa priesthood molihok diha sa pamilya ug sa Simbahan, sigun sa mga baruganan nga giestablisar sa Ginoo” (“Katungod sa Priesthood diha sa Pamilya ug sa Simbahan,” Liahona, Nob. 2005, 25–26). Ang mga lalaki ug mga babaye adunay managsamang importante nga papel diha sa pamilya ug sa Simbahan (tan-awa sa “Ang Pamilya: Usa ka Pamahayag ngadto sa Kalibutan,” Ensign, Nob. 2010, 129).

Mga Sugyot alang sa Pagtudlo

Doktrina ug mga Pakigsaad 107:60–100

Gipadayag sa Ginoo ang mga katungdanan sa mga presidente sa mga korum sa priesthood

Isip daklit nga pagribyu, isulat ang mga ulohan nga Melchizedek Priesthood ug Aaronic Priesthood diha sa pisara. Dapita ang mga estudyante sa paglista sa mga katungdanan sa priesthood ubos sa tukma nga mga ulohan. Hangyoa ang usa ka estudyante sa pagsulat sa katungdanan sa priesthood ug dayon ipasa ang chalk o marker ngadto sa laing estudyante, ipadayon kini nga proseso hangtud malista sa mga estudyante ang tanang katungdanan sa priesthood. Awhaga ang mga estudyante nga magtinabangay sa usag usa kon gikinahanglan. (Ang mga katungdanan sa Melchizedek Priesthood mao ang elder, high priest, patriarch, Seventy, ug Apostol. Ang mga katungdanan sa Aaronic Priesthood mao ang deacon, teacher, priest, ug bishop.)

Unsa ang korum sa priesthood? (Usa ka giorganisar nga grupo sa mga kaigsoonan kinsa naghupot sa samang katungdanan sa priesthood.)

Dapita ang usa ka estudyante ngadto sa pisara ug palingini ang mga katungdanan sa priesthood nga naorganisar ngadto sa mga korum. Awhaga ang klase sa pagtabang kon gikinahanglan. (Ang mosunod nga mga katungdanan adunay mga korum: Apostol, Seventy, high priest, elder, priest, teacher, ug deacon. Mahimo nimong ipasabut nga ang matag stake adunay usa ka korum sa mga high priest, uban sa presidente sa stake isip ang presidente sa korum. Sa matag ward, ang mga high priest giorganisar sa usa ka grupo sa mga high priest.)

Hangyoa ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 107:60–63, 85–89, 93–94. Dapita ang klase sa pagsunod ug motino kon unsa nga mga nahisgutan dinhi niining mga bersikulo nga komon sa mga korum.

Sumala niini nga mga bersikulo, unsa ang komon niining mga korum sa priesthood? (Ang mga estudyante mahimong mogamit og lain-laing mga pulong, apan siguroa nga mahibaloan nila ang mosunod nga kamatuoran: Ang usa ka presidente gitudlo sa pagdumala ug paggiya sa buhat sa matag korum sa priesthood.)
Sumala sa mga bersikulo 87–88, sa unsang paagi nga lahi ang korum sa mga priest gikan sa mga korum sa mga deacon ug mga teacher? (Ang bishop sa ward ang magdumala sa korum sa mga priest. Siya usab ang magdumala sa tanang naghupot og Aaronic Priesthood sa ward. Sa usa ka branch, ang presidente sa branch molihok isip presidente sa korum sa mga priest.)
Ngano kaha nga importante nga ang matag korum sa priesthood adunay presidente? Sa unsang paagi nga ang presidente sa korum sa priesthood makatabang sa mga sakop sa iyang korum?

Hangyoa ang usa ka estudyante sa pagbasa og kusog sa Doktrina ug mga Pakigsaad 107:65–66. Dapita ang klase sa pagsunod ug ilhon ang lider sa Simbahan nga modumala sa tanang naghupot sa priesthood. Dapita ang mga estudyante sa pagreport kon unsa ang ilang makit-an. Siguroa nga nasabtan sa mga estudyante nga kining mga bersikulo nagpasabut sa Presidente sa Simbahan.

Hangyoa ang laing estudyante sa pagbasa og kusog sa Doktrina ug mga Pakigsaad 107:67, 91–92. Dapita ang klase sa pagsunod, nga mangita sa mga pulong nga naghulagway sa awtoridad ug mga responsibilidad sa Presidente sa Simbahan.

Base sa unsay inyong nakat-unan dinhi niining mga bersikulo, unsaon ninyo pag-summarize ang awtoridad ug mga responsibilidad sa Presidente sa Simbahan? (Bisan og ang mga estudyante mogamit og lain-laing mga pulong, kinahanglang mailhan nila ang mosunod nga kamatuoran: Ang Presidente sa Simbahan naghupot sa awtoridad sa pagpangalagad sa tanang mga ordinansa ug mga panalangin ug nagdumala sa tibuok Simbahan. Dapita ang usa ka estudyante nga isulat diha sa pisara kini nga baruganan.)

Mahimo nimong dugangan og katin-awan ang pipila ka mga termino sa bersikulo 92 uban sa mosunod nga mga kahulugan gikan ni Elder John A. Widtsoe sa Korum sa Napulog Duha ka mga Apostoles:

“Ang propeta mao ang magtutudlo sa nahibaloan nga kamatuoran; ang manalagna mao ang tigsabut sa tinago nga kamatuoran, ang tigpadayag mao ang tigdala sa bag-ong kamatuoran. Sa kinatibuk-ang pagsabut, ang usa nga kasagarang gigamit, ang tawag nga, propeta, naglakip sa ubang mga tawag” (Evidences and Reconciliations, arr. G. Homer Durham, 3 vols. in 1 [1960], 258).

I-display ang litrato sa kasamtangang Presidente sa Simbahan.

Unsay pipila ka paagi nga kamo napanalanginan tungod sa awtoridad sa priesthood nga gihuptan sa Presidente sa Simbahan?

Hangyoa ang mga estudyante sa pagbasa og hilum sa Doktrina ug mga Pakigsaad 107:99–100.

Sumala niini nga mga bersikulo, unsay kinahanglan natong buhaton aron makabarug nga takus sa atubangan sa Ginoo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Aron makabarug nga takus sa atubangan sa Ginoo, kinahanglan kitang makat-on sa atong katungdanan ug mobuhat diha sa tanang kakugi aron matuman kini.)

Bisan og kining mga bersikulo gidirekta gayud ngadto sa mga naghupot sa priesthood, ang baruganan nga gitudlo niini magamit sa tanang mga miyembro sa Simbahan.

Ipares-pares ang mga estudyante. Dapita sila sa paghisgot sa mosunod nga mga pangutana. Basaha og tagsa-tagsa ang mosunod nga mga pangutana, o isulat kini diha sa pisara.

Sa unsang paagi nga napanalanginan kamo sa pagserbisyo sa usa ka miyembro sa Simbahan kinsa makugihong mituman sa iyang katungdanan?
Unsa ang inyong gibuhat aron makakat-on sa inyong katungdanan ug mobuhat diha sa tanang kakugi aron matuman kini?

Hatagi ang mga estudyante og oportunidad sa pagpamatuod sa kaimportante sa pagbuhat sa atong katungdanan diha sa Simbahan ug sa atong mga pamilya.

Doktrina ug mga Pakigsaad 108:4–8

Ang Ginoo mihatag ni Lyman Sherman og tambag ug mga saad

Pahinumdumi ang mga estudyante nga ang Doktrina ug mga Pakigsaad 108 naglangkob sa usa ka pagpadayag sa kabubut-on sa Ginoo ngadto ni Lyman Sherman, kinsa miduol ni Propeta Joseph Smith ug mihangyo nga masayud og dugang kalabut sa iyang katungdanan.

Dapita ang usa ka estudyante sa pagbasa og kusog sa Doktrina ug mga Pakigsaad 108:7–8. Hangyoa ang klase sa pagsunod, nga mangita sa mga instruksyon sa Ginoo nga gihatag ngadto ni Lyman. Hangyoa ang mga estudyante sa pagreport sa ilang makit-an. Mahimo nimong ipasabut nga ang mga pagdasig mao ang tambag o pag-awhag.

Sa unsang paagi nga gusto sa Ginoo nga mopalig-on si Lyman Sherman sa iyang mga kaigsoonan?

Hangyoa ang mga estudyante sa pagtino sa usa ka baruganan gikan sa instruksyon sa Ginoo ngadto ni Lyman diha sa mga bersikulo 7–8. Mahimo nilang mahibaloan ang lain-laing mga baruganan, lakip sa mosunod: Kinahanglan natong mapalig-on ang uban sa tanan natong panagsultihanay ug sa buhat. (Mahimo nimong isugyot nga markahan sa mga estudyante kini nga baruganan diha sa ilang mga kasulatan.)

Sa unsang paagi nga inyong mapalig-on diha sa inyong panagsultihanay kadtong anaa sa inyong palibut?
Sa unsang paagi nga inyong mapalig-on diha sa inyong mga buhat kadtong anaa sa inyong palibut?

Hangyoa ang mga estudyante sa paghulagway og usa sa ilang nasinati sa dihang adunay tawo nga mipalig-on kanila pinaagi sa pagbuhat sa usa sa mga aksyon nga nalista diha sa Doktrina ug mga Pakigsaad 108. Ikonsiderar ang pagpakigbahin sa imong kaugalingong kasinatian. Dapita ang mga estudyante sa paghunahuna sa usa ka tawo nga mahimo nilang mapalig-on karon ug ang piho nga aksyon nga ilang buhaton.

Sunod nga Unit (Doktrina ug mga Pakigsaad 109–112)

Aron matabangan ang mga estudyante nga maandam sa pagtuon sa Doktrina ug mga Pakigsaad 109–112, dapita sila sa pagkonsiderar sa mosunod: Nganong importante ang mga templo? Nakaapil na ba kamo sa usa ka pagpahinungod sa templo? Ipasabut nga sa sunod nga unit ilang makat-unan ang mahitungod sa pagpahinungod sa Templo sa Kirtland. Makakat-on sila og dugang mahitungod sa unsa ang nahitabo ug kinsa ang mipakita didto ug sa unsang paagi nga ang gipadayag didto makapanalangin kanila ug sa ilang mga pamilya hangtud sa kahangturan.