Leksyon 133
Doktrina ug mga Pakigsaad 124:84–145; 125–126
Pasiuna
Kini ang katapusan sa tulo ka leksyon nga naghisgot sa Doktrina ug mga Pakigsaad 124. Naghisgot usab kini sa Doktrina ug mga Pakigsaad 125 ug 126. Diha sa Doktrina ug mga Pakigsaad 124:84–145, mihatag og tambag ang Ginoo sa indibidwal nga mga miyembro sa Simbahan ug mihingalan niadtong moserbisyo sa lain-laing mga katungdanan sa pagpangulo sa priesthood. Niadtong Marso 1841, si Propeta Joseph Smith nakadawat sa pagpadayag nga anaa sa Doktrina ug mga Pakigsaad 125, diin ang Ginoo mipadayag sa Iyang kabubut-on kalabut sa pagpundok sa mga Santos didto sa Teritoryo sa Iowa. Niadtong Hulyo 9, 1841, nakadawat siya sa pagpadayag nga anaa sa Doktrina ug mga Pakigsaad 126, diin gisultihan sa Ginoo si Brigham Young nga dili na siya kinahanglang mobiya sa iyang pamilya aron moserbisyo og mga misyon.
Mga Sugyot alang sa Pagtudlo
Doktrina ug mga Pakigsaad 124:84–122
Naghatag ang Ginoo og tambag ngadto sa piho nga mga indibidwal
Sa dili pa magklase, isulat ang mosunod nga baruganan sa usa ka piraso nga papel: Kon mopatalinghug kita sa tambag sa mga propeta, kini makaayo kanato. Ibutang ang papel sa usa ka sobre, ug sa gawas sa sobre sulati og Sa unsang paagi kita mapanalanginan karon ug sa kanunay.
Sugdi ang leksyon pinaagi sa pagpakita sa sobre ngadto sa mga estudyante. Sultihi sila nga anaa kini mga instruksyon kon sa unsang paagi sila mahimong magmalipayon karon, makalikay og dili kinahanglanon nga mga hagit sa ilang kinabuhi, ug makadawat sa ubang mga panalangin. Ipasabut nga ang mga instruksyon magamit sa matag usa kanila, bisan pa man sa talagsaon nilang mga kahimtang. Dapita ang mga estudyante sa pagpamalandong sa mosunod nga mga pangutana:
-
Ngano kaha nga importante man alang kaninyo nga makabaton sa mga instruksyon diha sa sobre?
-
Kon maanaa na ninyo ang mga instruksyon, unsa ka duol nga inyo kining masunod sa higayon nga mabatunan na ninyo kini?
Kopyaha ang kauban nga tsart diha sa pisara sa dili pa magsugod ang klase. I-refer ngadto sa tsart, ug ipasabut nga diha sa Doktrina ug mga Pakigsaad 124:84–118 mihatag ang Ginoo og indibidwal nga mga instruksyon ngadto sa piho nga mga miyembro sa Simbahan nga, kon sundon, nagsaad og dagkong mga panalangin. Dapita ang matag estudyante sa pagbasa og hilum sa duha o dugang pa nga mga pakisayran diha sa pisara. Hangyoa sila sa pagpangita sa pagkasusama tali sa mga instruksyon nga gihatag ngadto sa matag indibidwal nga ilang nabasahan.
|
William Law (D&P 89–90) |
Hyrum Smith (D&P 94–96) |
Amos Davies (D&P 111–114) |
Robert Foster (D&P 115–118) |
Human nga ang mga estudyante nakagahin na og igong panahon sa pagbasa, ipangutana ang mosunod:
-
Unsa nga pagkasusama ang inyong nabantayan diha sa instruksyon nga gihatag ngadto niining mga kalalakin-an? (Ang matag tudling naglangkob og instruksyon sa pagsunod sa tambag ni Propeta Joseph Smith.)
Dapita ang mga estudyante sa pagribyu sa mga bersikulo nga ilang nabasa ug mangita sa mga panalangin nga gisaad sa Ginoo kon kining kalalakin-an mosunod sa tambag nga Iyang gihatag kanila. Hangyoa ang mga estudyante sa pag-report kon unsay ilang makit-an. Isulat ang ilang mga tubag diha sa pisara.
-
Unsaon ninyo pag-summarize ang mga saad nga gihimo sa Ginoo ngadto niining kalalakin-an kon mopatalinghug sila sa Propeta?
Dapita ang usa ka estudyante sa pag-abli sa sobre ug sa pagbasa og kusog sa baruganan nga nasulat diha sa papel.
-
Sa unsang paagi nga ang matag usa sa gisaad nga mga panalangin nga gilista diha sa pisara dunay kalabutan sa mga pulong nga “kini makaayo kanato”?
Hangyoa ang mga estudyante sa paglista og piho nga tambag nga gihatag sa Presidente sa Simbahan sa bag-o lang nga katuigan, ug dapita ang usa ka estudyante sa pagsulat sa ilang mga tubag diha sa pisara.
-
Kanus-a kamo napanalanginan tungod sa pagpatalinghug sa tambag sa mga propeta? (Mahimo usab nimong ikonsiderar ang pagpakigbahin og usa ka kasinatian.)
Dapita ang usa ka estudyante sa pagbasa og kusog sa Doktrina ug mga Pakigsaad 124:84. Hangyoa ang klase sa pagsunod, nga mangita kon unsay gisulti sa Ginoo nga gibuhat sa usa ka miyembro sa Simbahan nga ginganlan og Almon Babbitt imbis nga mosunod sa tambag sa Unang Kapangulohan.
-
Sumala sa bersikulo 84, unsa may gibuhat ni Almon Babbitt imbis nga mosunod sa tambag sa Unang Kapangulohan? (Nangandoy siya sa pagpahimutang sa iyang kaugalingong pulong. Mahimo nimong ipasabut nga klaro nga misulay siya sa pag-agni sa pipila ka tawo “nga dili dayon” mobalhin ngadto sa Nauvoo ug manimuyo hinoon didto sa Kirtland [tan-awa sa History of the Church, 4:476].)
-
Unsa ang pipila ka ehemplo kon sa unsang paagi nga ang mga tawo mopahimutang sa ilang kaugalingong pulong sa atong panahon?
Dapita ang mga estudyante sa pagkonsiderar sa ilang mga tubag sa mga pangutana nga ilang gipamalandungan sa sayong bahin sa leksyon mahitungod sa ilang tinguha nga makabaton ug mosunod sa mga instruksyon diha sa sobre. Hangyoa sila sa pagsulat og piho nga tumong alang sa pagpalambo sa ilang mga paningkamot sa pagpatalinghug sa tambag sa buhi nga mga propeta aron makadawat sila sa gisaad nga mga panalangin.
I-summarize ang Doktrina ug mga Pakigsaad 124:119–122 pinaagi sa pagpasabut nga mihatag ang Ginoo og dugang nga mga instruksyon ngadto sa Simbahan kalabut sa pagtukod sa Balay sa Nauvoo, nga mahimong usa ka hotel nga gipanag-iya sa Simbahan.
Doktrina ug mga Pakigsaad 124:123–145
Gihinganlan sa Ginoo kadtong kinsa moserbisyo sa nagkalain-laing mga katungdanan sa pagpangulo sa priesthood
Hangyoa ang mga estudyante sa paglista diha sa pisara sa pipila ka katungdanan sa pagpangulo sa priesthood diha sa Simbahan.
Ipasabut nga diha sa Doktrina ug mga Pakigsaad 124:123–145, gihinganlan sa Ginoo ang piho nga mga indibidwal nga moserbisyo sa nagkalain-laing mga katungdanan sa pagpangulo sa priesthood. Hangyoa ang katunga sa klase sa pagtan-aw sa mga bersikulo 123–132 ug ang laing katunga sa pagtan-aw sa mga bersikulo 133–142, nga mangita sa mga katungdanan sa pagpangulo sa priesthood nga gihisgutan sa Ginoo. Hangyoa ang mga estudyante sa pagreport kon unsay ilang makit-an, ug sa paglista sa bisan unsang mga katungdanan sa pagpangulo sa priesthood diha sa pisara nga wala pa malista.
Hangyoa ang usa ka estudyante sa pagbasa og kusog sa Doktrina ug mga Pakigsaad 124:143. Hangyoa ang klase sa pagsunod, nga mangita sa mga rason nganong mitawag ang Ginoo og mga lider sa priesthood ug mihatag og mga yawe sa priesthood.
-
Nganong mitawag ang Ginoo og mga lider sa priesthood ug mihatag og mga yawe sa priesthood? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Mitawag ang Ginoo og mga lider sa priesthood aron modumala sa buhat sa pangalagad ug motabang sa paghingpit sa mga Santos.)
Dapita ang mga estudyante sa pagkonsiderar og mga paagi nga ang ilang mga lider sa priesthood nakatabang kanila sa ilang mga paningkamot nga mas makasunod kang Jesukristo ug mas mahisama Kaniya. Mahimo nimong dapiton ang pipila ka estudyante sa pagpakigbahin sa ilang mga kasinatian.
Doktrina ug mga Pakigsaad 125
Gisugo sa Ginoo ang mga Santos sa pagpundok ngadto sa mga dapit nga Iyang gitudlo
Ipasabut nga human mapapahawa ang mga Santos gikan sa Missouri sa winter sa 1838–39, miabut sila didto sa Illinois ug Iowa, diin sila namuyo sa isigka pikas habig sa Suba sa Mississippi. I-summarize ang pagpadayag nga narekord diha sa Doktrina ug mga Pakigsaad 125 pinaagi sa pagpasabut nga nadawat kini niadtong Marso 1841 ug mipadayag sa kabubut-on sa Ginoo kalabut sa mga Santos nga nagpuyo sa Teritoryo sa Iowa ug niadtong nagplano nga moadto didto. Niini nga pagpadayag gisugo sa Ginoo ang mga Santos nga magpundok ug magtukod sa mga dapit nga itudlo sa Ginoo pinaagi ni Propeta Joseph Smith, lakip na ang siyudad sa Iowa nga paganganlan og Zarahemla. Mipalit ang Simbahan og dugang nga mga yuta didto sa Iowa kay sa Illinois, nga nagsugyot nga ang mga lider sa Simbahan wala magtinguha nga ang tanang mga Santos magpuyo didto sa Nauvoo.
Doktrina ug mga Pakigsaad 126
Wala na kinahanglana nga mobiya si Brigham Young sa iyang pamilya aron moserbisyo og dugang nga mga misyon
Dapita ang mga estudyante sa paghunahuna unsay mahitabo kon mobiya sa ilang mga pamilya aron moserbisyo og mga misyon alang sa Ginoo sa sunod nga lima ka summer ug dayon tawagon nga moserbisyo og misyon sa ubang nasud sulod sa duha ka tuig.
-
Unsay inyong bation mahitungod sa pagbiya sa inyong pamilya sa daghang higayon?
-
Unsay inyong bation kon kamo ang responsable sa pagsangkap sa mga panginahanglan sa inyong pamilya?
Pahibaloa ang mga estudyante nga human mipasakop sa Simbahan si Brigham Young niadtong Abril 1832, miserbisyo siya og pipila ka misyon sa sunod nga siyam ka tuig. Ang una niyang misyon mao ang atol sa winter human siya mabunyagi. Ang laing lima, lakip na ang iyang pag-apil sa Kampo sa Zion, nahitabo sa matag summer gikan niadtong 1833 hangtud sa 1837. Kining mga misyon nagsugod sa tulo ngadto sa lima ka bulan ang gidugayon. Niadtong Hulyo 8, 1838, si Brigham Young, kauban ang laing mga Apostoles, gitawag nga moserbisyo og misyon ngadto sa Great Britain. Gisunod nila ang mga instruksyon sa Ginoo nga mobiya alang niini nga misyon gikan sa Far West, Missouri, niadtong Abril 26, 1839 (tan-awa sa D&P 118). Si Brigham Young ug ang laing mga Apostoles migahin sa nagsunod nga pipila ka bulan didto sa Iowa ug Illinois, nga naghimo og dugang nga mga pagpangandam nga mobiyahe ngadto sa Great Britain. Usa ka epidemya sa malaria ang midagsang sa dapit sa summer sa 1839, ug sila, usab, nangasakit.
Basaha og kusog ang mosunod nga pamahayag ni Brigham Young. Hangyoa ang klase sa pagpaminaw alang sa iyang kinaiya sa pagserbisyo sa Ginoo bisan pa man nga grabe nga nasakit nga dili man gani siya makasaka sa karwahe kon dili tabangan sa dihang mibiya siya.
“Determinado ako nga moadto sa England o mamatay sa pagpaningkamot. Ang akong lig-on nga desisyon mao nga ako mobuhat unsay gikinahanglan nga buhaton sa Ebanghelyo sa kinabuhi ug kaluwasan, o ako mamatay sa pagpaningkamot sa pagbuhat niini” (Mga Pagtulun-an sa mga Presidente sa Simbahan: Brigham Young [1997], 6).
Ipasabut nga ang misyonaryo nga pagserbisyo ni Brigham Young nagkinahanglan og sakripisyo sa bahin usab sa iyang pamilya. Dapita ang usa ka estudyante sa pagbasa sa mosunod nga summary sa mga kahimtang sa pamilya ni Brigham Young sa dihang mibiya siya alang sa iyang misyon ngadto sa Great Britain:
Mibiya si Brigham Young sa Montrose, Iowa, paingon sa Great Britain niadtong Septyembre 14, 1839, 10 ka adlaw human ang iyang asawa, nga si Mary Ann, nanganak sa ilang ikaupat nga anak. Nag-antus usab si Mary Ann og malaria. Kini ang ikalimang higayon sukad sila naminyo nga iyang napalarga si Brigham paingon sa usa ka misyon. Kay gipugos sa pagpapahawa sa ilang panimalay ug nawad-an sa hapit tanan sa ilang mga kabtangan didto sa Missouri sa miaging tuig, anaa sila sa hilabihan nga kakabus. Gibiyaan ni Brigham si Mary Ann nga dunay $2.72 lamang alang sa ilang pamilya. Sila si Brigham ug Mary Ann misalig nga ang Ginoo mosangkap alang kanila ug misalig sa saad gikan ni Propeta Joseph Smith nga maatiman ang mga panginahanglan sa mga pamilya sa mga Apostoles samtang ang mga Apostoles tua sa layo alang sa ilang misyon. (Tan-awa sa Leonard J. Arrington, Brigham Young: American Moses [1985], 74–75, 413, 420.)
Ipasabut nga human mangulo sa misyonaryo nga buhat sa Simbahan didto sa Great Britain, miabut si Brigham Young sa Nauvoo, Illinois, niadtong Hulyo 1, 1841. Si Propeta Joseph Smith nakadawat og pagpadayag nga makita diha sa Doktrina ug mga Pakigsaad 126 mga walo ka adlaw human niana.
Dapita ang usa ka estudyante sa pagbasa og kusog sa Doktrina ug mga Pakigsaad 126:1–3. Hangyoa ang klase sa pagsunod, nga mangita kon unsay gisulti sa Ginoo kang Brigham mahitungod sa iyang pagserbisyo. Hangyoa ang mga estudyante sa pag-report kon unsay ilang nakit-an. (Mahimong kinahanglan nimong ipasabut nga ang pulong nga pagtrabaho og maayo nagpasabut sa makugihong paghago sulod sa dugay nga panahon.)
Ipasabut nga bisan kon ang Ginoo wala na magkinahanglan nga iyang biyaan ang iyang pamilya, si Brigham Young sa kaulahian mihimo og mga misyon sulod sa mubo nga panahon. Dapita ang mga estudyante sa pagtino og usa ka baruganan gikan sa mga bersikulo 1–2 nga nagtudlo kon unsay mahitabo kon kita makugihong maghago alang sa Ginoo. (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon kita makugihong maghago alang sa Ginoo, nan dawaton Niya ang atong matarung nga halad. Mahimo nimong isugyot nga isulat sa mga estudyante kini nga baruganan diha sa margin sa ilang mga kasulatan.)
-
Kanus-a kamo mibati nga nahimuot ang Ginoo sa inyong pagserbisyo?
Dapita ang mga estudyante sa paghunahuna mahitungod sa mga oportunidad nga duna sila sa pagserbisyoo sa Ginoo. Awhaga sila sa pagsunod sa ehemplo sa mga lider sama ni Brigham Young nga makugihong naghago diha niining mga oportunidad. Ipakigbahin ang imong pagpamatuod nga ang Ginoo modawat sa matarung nga mga halad sa ilang makugihong mga paningkamot diha sa Iyang buhat.
Komentaryo ug Background nga Impormasyon
Doktrina ug mga Pakigsaad 124:84–86. Almon Babbitt
Si Almon Babbitt usa ka sakop sa Kampo sa Zion ug gitudlo nga usa ka sakop sa Unang Korum sa Seventy niadtong Pebrero 28, 1835. Si Almon dunay kaagi nga mobaliwala sa tambag sa mga lider sa Simbahan ug mangulo sa uban nga mosunod sa iyang personal nga mga desisyon.
Diha sa Doktrina ug mga Pakigsaad 124:84, gigamit sa Ginoo ang analohiya sa bulawanon nga baka (tan-awa sa Exodo 32) sa paghulagway sa kinaiya ni Almon Babbitt. Gitakda ni Almon ang iyang pulong ingon nga unsay angayang sundon sa mga Santos imbis nga ang pulong sa Ginoo nga gihatag pinaagi sa Unang Kapangulohan.
Doktrina ug mga Pakigsaad 126:1. Ang misyon sa Korum sa Napulog Duha ka mga Apostoles didto sa Great Britain
“Niadtong Abril 1840, sa dihang ang ubang mga Apostoles miabut sa British Isles, si Brigham Young, kinsa maoy nangulo sa Simbahan didto sa British Mission, mipatawag sa mga kaigsoonan ngadto sa Preston alang sa usa ka kinatibuk-ang komperensya sa Simbahan. … Ang unang gibuhat mao ang ordinasyon ni Willard Richards [kinsa nagserbisyo sa kapangulohan sa misyon] ngadto sa pagka-apostol sumala sa pagpadayag niadtong 1838 [tan-awa sa D&P 118:6]. … Karon duna nay walo ka sakop sa Napulog Duha didto sa British Isles, nga sila si Brigham Young, Heber C. Kimball, Parley P. Pratt, Orson Pratt, John Taylor, Wilford Woodruff, George A. Smith, ug Willard Richards. Ang laing duha, sila si William Smith ug John E. Page, wala motuman sa mga misyon didto sa Britain. Si Orson Hyde miabut sa wala madugay, mitrabaho uban sa iyang mga kaigsoonan sulod sa pipila ka bulan didto sa England, ug dayon miadto sa Palestine aron ipahinungod kana nga yuta alang sa pagbalik sa mga Judeo. Usa ka bakante sa Napulog Duha ang pabiling wala mahulipi nianang higayuna” (Church History in the Fulness of Times Student Manual, 2nd ed. [manwal sa Church Educational System, 2003], 231).
Samtang gigiyahan ni Brigham Young ang pagpadako sa misyonaryo nga buhat sa tibuok British Isles, gipakita niya ang dakong espirituhanon ug administratibong abilidad. Ubos sa paggiya ni Brigham Young ug sa ubang mga Apostoles, nakasinati ang Simbahan og talagsaon gayud nga paglambo didto sa Great Britain. Sa higayon nga kadaghanan sa mga Apostoles mibiya sa England sa hinapus nga bahin sa Abril 1841, tunga-tunga sa 7,000 ug 8,000 ka tawo ang mipasakop sa Simbahan, nga mga 1,000 kanila ang namalhin ngadto sa Nauvoo pipila ka bulan sa sayong bahin niana.
“Kini nga misyon usa ka importante nga panahon sa pagbansay ug pagkahingkod alang sa Korum sa Napulog Duha ka mga Apostoles. Napalig-on ni Brigham Young ang mga kahanas sa pagpangulo nga sa wala madugay nagamit niya didto sa Nauvoo. … Pinaagi sa mga pagsulay ug mga sakripisyo didto sa Britain, ingon man usab sa paghago alang sa komon nga tumong, ang Napulog Duha nagkahiusa sa paagi nga misiguro og lig-ong pagpangulo sa Simbahan sa miabut nga katuigan” (Church History in the Fulness of Times, 234).
Doktrina ug mga Pakigsaad 126:3. Ang pag-atiman ni Brigham Young alang sa iyang pamilya
Human makapauli gikan sa Great Britain, gisunod ni Brigham Young ang sugo sa Ginoo nga “moamuma pag-ayo sa [iyang] banay” (D&P 126:3). Migahin siya og panahon matag adlaw sa pagtudlo ug pag-ampo uban sa iyang mga anak, kinsa nahinumdom kaniya isip usa ka malumo ug mahigugmaong amahan.
Si Brigham Young 40 anyos sa dihang ang pagpadayag nga anaa sa Doktrina ug mga Pakigsaad 126 nadawat, apan ang mosunod nga istorya nagpakita sa iyang padayon nga debosyon sa iyang pamilya:
“Sa edad nga 23 nangasawa siya ni Miriam Angeline Works. Duha ka anak nga babaye ang natawo sa batan-ong magtiayon. Gibuhi ni Brigham ang iyang pamilya pinaagi sa paghimo ug pag-ayo og mga lingkuranan, mga lamesa, ug aparador ug pagtaod og mga bintana, pultahan, hagdanan, ug mga estante sa fireplace. …
“Sa dihang si Miriam nasakit og tuberculosis, si Brigham maoy mibuhat sa iyang trabaho dugang sa iyang kaugalingon trabahoon. Sa dihang nagpadayon nga dili na makabangon ang iyang asawa, kanunay na siyang magluto og pamahaw alang sa pamilya, mag-ilis sa iyang mga anak nga babaye, maglimpyo sa balay, ug ‘mag-alsa sa iyang asawa ngadto sa rocking chair duol sa fireplace ug biyaan siya diha hangtud nga makauli siya sa gabii,’ aron sa pagluto sa panihapon, pagpakatulog sa iyang pamilya, ug paghuman sa mga buluhaton sa balay [Susa Young Gates ug Leah D. Widtsoe, The Life Story of Brigham Young (1930), 5]. Ang iyang kasinatian sa iyang kabatan-on ug sayo nga kaminyoon sa pag-atiman sa mga anak ug pagdumala sa panimalay nagtudlo kaniya mahitungod sa pagtinabangay sa pamilya ug pag-atiman sa balay. Paglabay sa pipila ka tuig iyang gitambagan ang mga Santos mahitungod niini nga mga hilisgutan ug nangomedya nga iyang mapilde ang ‘kadaghanan sa mga babaye [diha] sa komunidad sa pag-atiman sa balay’ [Deseret News, Ago. 12, 1857, 4]” (Mga Pagtulun-an sa mga Presidente sa Simbahan: Brigham Young [1997], 2).
“Agig dugang sa paggahin og ubay-ubay nga panahon uban sa iyang pamilya human niini nga pagpadayag [D&P 126] kay sa iyang nahimo sa miaging pipila ka katuigan, si Brigham Young duol usab kang Propeta Joseph Smith kasagaran nianang panahona (baynte otso sa katapusang trenta y sais ka bulan sa kinabuhi ni Joseph).
“Morag klaro nga ang Ginoo, kay nasayud sa umaabut ni Brigham Young ug sa umaabut sa Simbahan, mipaduol kang Brigham ngadto ni Joseph aron makakat-on siya sa unsay kinahanglan niyang mahibaloan sa pagpangulo sa Simbahan human sa kamatayon ni Joseph” (Doctrine and Covenants Student Manual, 2nd ed. [manwal sa Church Educational System, 2001], 313).
Bisan kon wala na gikinahanglan nga mobiya si Brigham sa iyang pamilya sa pagserbisyo og dugang nga mga misyon, miserbisyo gihapon siya og pipila ka misyon sa mubo nga panahon sa wala pa mamatay ang Propeta.