Home-Study nga Leksyon

Doktrina ug mga Pakigsaad 3–7; 10; Joseph Smith—Kasaysayan 1:66–67 (Unit 3)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang sila nagtuon sa Doktrina ug mga Pakigsaad 3–7; 10; Joseph Smith—Kasaysayan 1:66–67 (unit 3) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 3; 10)

Samtang nakat-unan sa mga estudyante ang mahitungod sa mga kahimtang nga naglibut sa pagkawala sa 116 ka mga pahina nga manuskrito sa Basahon ni Mormon, ilang nadiskubrihan nga ang mga katuyoan sa Dios dili gayud mapakyas. Ang pagbadlong sa Ginoo ni Joseph Smith tungod sa balik-balik og hangyo nga ihatag ang manuskrito ngadto ni Martin Harris nagtudlo sa mga estudyante nga kinahanglan kahadlokan nila ang Dios labaw pa kay sa mga pagdani sa tawo ug kon kita matinud-anon sa mga sugo sa Ginoo, Siya moabag kanato atol sa mga panahon sa kasamok. Human nga ang mga palid gibalik na ngadto ni Joseph Smith, ang Ginoo mitudlo kaniya nga si Satanas nagtinguha sa pagguba sa buhat sa Ginoo ug sa atong mga kalag, apan kon kita mag-ampo kanunay, makaangkon kita og gahum sa pagbuntog ni Satanas ug niadtong nagserbisyo kaniya.

Day 2 (Doktrina ug mga Pakigsaad 4)

Gikan sa tubag sa Ginoo ngadto sa gitinguhang tubag nga masayran ni Joseph Smith Sr. kon unsa ang gusto sa Ginoo nga iyang buhaton, nakat-unan sa mga estudyante nga kon sila moserbisyo sa Dios sa tibuok nilang kasingkasing, gahum, hunahuna, ug kusog, sila magbarug nga walay mansa sa Iyang atubangan sa katapusan nga adlaw. Nakat-unan usab nila nga samtang magkugi sila sa pagdala sa uban ngadto ni Jesukristo, makadawat usab sila og kaluwasan alang sa ilang mga kaugalingon. Sa katapusan, nahibaloan sa mga estudyante ang balaanong mga kinaiya nga makapahimo sa usa ka tawo nga kwalipikado sa pagtabang sa buhat sa Ginoo.

Day 3 (Doktrina ug mga Pakigsaad 5)

Sa dihang si Martin Harris nagtinguha og dugang nga saksi sa katinuod sa mga palid, ang Ginoo mitudlo kang Martin nga Siya mitawag kang Joseph Smith sa pagpahayag sa Iyang mga pulong ngadto sa kalibutan apan ang pagpamatuod sa Tulo ka mga Saksi mobarug usab isip ebidensya sa katinuod sa Basahon ni Mormon. Nakat-unan sa mga estudyante nga kon sila motuo sa mga pulong sa Ginoo, ang Espiritu mokumpirmar niining kamatuoran. Kini nga seksyon nakatabang usab nga masabtan sa mga estudyante nga kon kita sinsero nga mag-ampo uban sa kamapainubsanon ug sa hugot nga pagtuo, nan kita makadawat og mga tubag sumala sa atong matarung nga mga tinguha.

Day 4 (Joseph Smith—Kasaysayan 1:66–67; Doktrina ug mga Pakigsaad 6–7)

Ang Ginoo mitudlo kang Oliver Cowdery sa importanting mga kamatuoran mahitungod sa pagdawat ug pag-ila sa pagpadayag. Gipamalandungan sa mga estudyante kon sa unsang paagi nga kining mga kamatuoran maggamit ngadto kanila. Agig dugang, ilang nakat-unan nga ang Ginoo namulong og kalinaw sa atong mga hunahuna isip usa ka saksi sa kamatuoran. Nakat-unan usab sa mga estudyante nga samtang motan-aw kita ngadto ni Jesukristo uban sa hugot nga pagtuo, makabuntog kita sa pagduha-duha ug kahadlok.

Pasiuna

Atol niini nga leksyon ang mga estudyante magtuon una gikan sa Doktrina ug mga Pakigsaad 10, nga gipadayag ngadto ni Propeta Joseph Smith human nawala ang 116 ka mga pahina nga manuskrito sa Basahon ni Mormon. Sa wala pa kining pagpadayag si Moroni mikuha sa mga palid ug sa Urim ug Thummim gikan ni Joseph Smith ug ang Propeta nawad-an og gahum sa paghubad sulod sa usa ka panahon. Paghibalik sa mga palid, ang Ginoo mimando ni Joseph nga dili hubaron og balik ang porsyon sa mga palid nga katugbang sa nawala nga mga pahina nga manuskrito. Ang Ginoo mipadayag usab sa plano ni Satanas sa pagguba sa buhat ug mitudlo kon unsaon nato sa pagbuntog si Satanas.

Mga Sugyot alang sa Pagtudlo

Doktrina ug mga Pakigsaad 3; 10

Si Satanas nagtinguha sa paglaglag ni Joseph Smith ug sa buhat sa Dios

Dapita ang usa ka estudyante sa pagpasabut sa mga kahimtang nga naglibut sa pagkawala sa 116 ka mga pahina nga manuskrito. Dayon hisguti ang mosunod nga mga pangutana:

• Gikan sa unsay inyong nakat-unan sa pagtuon sa Doktrina ug mga Pakigsaad 3, ngano kaha nga si Joseph Smith mipadayon sa pagpangutana sa Dios sa samang pangutana bisan human nakadawat na og klaro nga tubag?

• Unsa kaha ang nakat-unan ni Joseph Smith gikan niining kasinatian?

• Unsa nga mga kamatuoran ang inyong nakat-unan gikan sa kasinatian ni Joseph nga makatabang kaninyo kon kamo makasinati og pagpamugos sa uban sa pagbuhat og usa ka butang nga dili matarung?

Ipakita ang usa ka lit-ag o laang (o pagdrowing og usa ka hulagway diha sa pisara). Hangyoa ang pipila ka estudyante sa pag-summarize sa unsay ilang nakat-unan gikan sa ilang pagtuon sa Doktrina ug mga Pakigsaad 10 mahitungod kon sa unsang paagi nga tuyoon ni Satanas ang paglaang ni Joseph Smith uban sa 116 ka mga pahina nga manuskrito.

Ipasabut nga diha sa Doktrina ug mga Pakigsaad 10:20–29 ang Ginoo mihulagway niadtong kinsa minunot sa impluwensya ni Satanas aron sa pagkuha sa 116 ka mga pahina nga manuskrito ug sa unsang paagi nga si Satanas nakahimo sa paglit-ag kanila.

Ipares-pares ang mga estudyante. Hangyoa ang usa ka estudyante sa matag pares sa pagbasa og hilum sa Doktrina ug mga Pakigsaad 10:20–29, nga mangita kon unsa ang gitudlo niini nga mga bersikulo bahin sa mga tumong ni Satanas. Hangyoa ang laing estudyante sa pagbasa sa samang mga bersikulo, nga mangita kon sa unsang paagi nga si Satanas nagtinguha sa pagtuman sa iyang mga tumong. Kon mahuman na sila, dapita ang mga estudyante sa matag pares sa pag-report sa usag usa. Human sa igong panahon, ipangutana sa klase ang mosunod:

• Unsay atong makat-unan gikan sa Doktrina ug mga Pakigsaad 10:20–29 bahin sa mga katuyoan ni Satanas? (Ang mga estudyante mahimong motino og lain-laing mga baruganan, apan siguroa nga ilang masabtan nga si Satanas nagtinguha sa pagguba sa buhat sa Ginoo ug sa atong mga kalag. Mahimo nimong isulat kini nga doktrina diha sa pisara. Mahimo usab nimong isugyot nga markahan sa mga estudyante ang mga pulong nga nagtudlo niini nga kamatuoran diha sa mga bersikulo 22–23 ug 27.)

• Gikan sa unsay inyong nabasa niining mga bersikulo, sa unsang paagi nga si Satanas nagtinguha sa pagguba sa buhat sa Ginoo ug sa atong mga kalag? (Mogamit siya og mga himan sama sa paglingla, kasuko, pag-ulog-ulog, ug pagpamakak. Mahimo nimong isugyot nga markahan sa mga estudyante kini nga mga himan sa kaaway diha sa ilang mga kasulatan.)

Aron matabangan ang mga estudyante nga makasabut ug mobati sa kaimportante niining kamatuoran, dapita sila sa paghisgot sa mosunod nga mga pangutana uban sa ilang mga pares (mahimo nimong isulat kini nga mga pangutana diha sa pisara o pag-andam og usa ka handout sa dili pa magklase):

• Unsa nga ebidensya ang inyong nakita nga si Satanas padayon gihapon sa paggamit sa paglingla, kasuko, pag-ulog-ulog, ug pagpamakak aron maguba ang buhat sa Ginoo ug ang mga kalag sa katawhan?

• Sa unsang paagi nga ang pagkahibalo bahin sa mga tumong ug mga pamaagi ni Satanas makatabang kanato nga makalikay ug makalingkawas sa iyang mga laang?

Dapita ang mga estudyante sa pagpamalandong kon hain sa mga pamaagi sa kaaway ang nalista diha sa Doktrina ug mga Pakigsaad 10:20–29 ang ilang nabati o nakita, ingon man kon unsay ilang mabuhat aron makalikay o makalingkawas sa mga laang ni Satanas.

Ipasabut nga niini nga pagpadayag, ang Ginoo mihatag og usa ka sugo ug usa ka saad kalabut sa atong mga paningkamot sa paglikay sa impluwensya ni Satanas. Dapita ang usa ka estudyante sa pagbasa og kusog sa Doktrina ug mga Pakigsaad 10:5, ug hangyoa ang klase sa pagpangita sa sugo sa Ginoo ug sa Iyang saad.

Isulat sa pisara ang mosunod: Kon kita , makaangkon kita og gahum sa pag .

Pangutan-a ang mga estudyante: Unsaon ninyo sa pagkompleto niining baruganan sumala sa bersikulo 5? (Ang mga estudyante mahimong motino og nagkalain-laing mga baruganan, apan siguroa ang pagpasabut og maayo nga kon kita mag-ampo kanunay, makaangkon kita og gahum sa pagbuntog ni Satanas ug niadtong nagserbisyo kaniya.)

Hangyoa ang mga estudyante sa pagribyu sa Doktrina ug mga Pakigsaad 10:38–45. Dayon dapita ang usa ka estudyante sa pagpasabut kon sa unsang paagi nga ang Ginoo mihulip sa nawala nga 116 ka mga pahina nga manuskrito.

Dapita ang mga estudyante sa pagbasa og hilum sa Doktrina ug mga Pakigsaad 10:43, nga mangita sa usa ka importanting kamatuoran nga gusto sa Ginoo nga masabtan ni Joseph Smith. (Samtang mopakigbahin ang mga estudyante sa ilang mga ideya, isulat sa pisara ang mosunod nga doktrina: Ang kaalam sa Dios mas labaw pa kay sa kaigmat sa yawa. Mahimong kinahanglan nimong ipasabut nga ang kaigmat nagpasabut sa mga lipat-lipat aron sa paglingla sa mga tawo.)

Ipangutana ang mosunod:

• Sa unsang paagi nga ang plano sa Ginoo sa paghulip sa nawala nga manuskrito naghulagway niining kamatuoran?

• Sa unsang paagi nga kini nakatabang kaninyo nga ang kaalam sa Dios mas labaw pa sa kaigmat ni Satanas?

Dapita ang mga estudyante sa pagbasa sa Doktrina ug mga Pakigsaad 10:44–45, nga mangita og dugang ebidensya sa kamatuoran nga nasulat sa pisara.

• Sumala sa Doktrina ug mga Pakigsaad 10:44–45, ngano nga ang gagmay nga mga palid mas dako man og bili kay sa dagkong mga palid nga giminubo ni Mormon nga anaa sa nawala nga 116 ka mga pahina? (Ang gagmay nga mga palid naglangkob sa istorya bahin sa espirituhanong mga butang. Ang nawala nga 116 ka mga pahina naglangkob sa giminubo nga istorya bahin sa makasaysayanon nga mga panghitabo.)

• Sa unsang paagi nga ang pagkahibalo nga ang Dios miandam og paagi sa paghulip sa nawala nga 116 ka mga pahina nga manuskrito nakatabang kaninyo nga mas hingpit nga mosalig Kaniya?

Doktrina ug mga Pakigsaad 4–7

Ang Ginoo mitambag ni Joseph Smith ug Oliver Cowdery nga dili magduha-duha o mahadlok

Dapita ang mga estudyante nga mo-report sa daklit sa pipila ka mga kamatuoran bahin sa personal nga pagpadayag nga ilang nakat-unan samtang nagtuon sa Doktrina ug mga Pakigsaad 6. Dapita sila sa pagpamalandong sa mga kasinatian sa dihang ilang nabati nga ang ilang mga hunahuna nalamdagan ug mibati og kalinaw bahin sa usa ka butang nga ilang giampo. Dapita ang pipila ka mga estudyante sa pagpakigbahin sa ilang mga kasinatian uban sa klase.

Pahinumdumi ang mga estudyante nga isip kabahin sa ilang pagtuon sa scripture mastery passage diha sa Doktrina ug mga Pakigsaad 6:36, misulat sila og mubo nga pakigpulong nga naghulagway sa mga paagi sa pagsunod sa tambag nga gihatag sa Ginoo niana nga bersikulo. Dapita sila nga magdungan sa pagbasa og kusog sa Doktrina ug mga Pakigsaad 6:36. Mahimo nimong balikon kini aron matabangan sila nga masag-ulo kini. Dayon hangyoa ang pipila ka mga estudyante kinsa komportable nga mopakigbahin sa ilang mga pakigpulong sa pagbuhat sa ingon. Mahimo nimong ipakigbahin ang imong pagpamatuod mahitungod kon sa unsang paagi nga ang Ginoo nakatabang kanimo sa pagbuntog sa pagduha-duha o kahadlok sa nangagi.

Sunod nga Unit (Doktrina ug mga Pakigsaad 8–9; 11–16)

Unsa ang espiritu sa pagpadayag? Unsaon man ninyo sa pag-ila kon kamo nakadawat og pagpadayag gikan sa Dios? Ipasabut nga sa sunod nga unit, ang mga estudyante makakat-on mahitungod sa mga baruganan sa pagpadayag nga mopanalangin kanila samtang sila mangita og giya gikan sa Dios diha sa ilang kinabuhi.