Doktrina ug mga Pakigsaad 45:60–75

Pasiuna

Samtang nagpundok ang mga Santos didto sa Kirtland, daghang dili tinuod nga mga istorya sa pamantalaan ug mga tabi-tabi ang sayop nga mirepresentar ug nagdaut sa Simbahan. Sa pinadayag nga narekord diha sa Doktrina ug mga Pakigsaad 45, gisugdan sa Ginoo og pagpadayag ang mga detalye bahin sa usa ka dapit sa kalinaw ug kasiguroan nga kapundukan sa katapusang mga adlaw nga gisaad diha sa Basahon ni Mormon ug unang nahisgutan sa usa ka pinadayag pagka-1830 (tan-awa sa D&P 28). Gihulagway sa Ginoo ang mga detalye bahin niini nga dapit nga kapundukan, nga nailhan isip ang Bag-ong Jerusalem, o Zion. Gimanduan usab sa Ginoo si Joseph Smith nga sugdan ang pagtutok sa iyang mga paningkamot sa paghubad sa Biblia sa Bag-ong Tugon aron maandam ang mga Santos alang sa mga butang nga moabut.

Mga Sugyot alang sa Pagtudlo

Doktrina ug mga Pakigsaad 45:60–61

Gimanduan sa Ginoo si Joseph Smith nga sugdan ang iyang paghubad sa Bag-ong Tugon

Pangutan-a ang mga estudyante kon duna bay usa kanila nga maka-recite sa ikawalo nga artikulo sa hugot nga pagtuo. Kon magkinahanglan sila og tabang, hangyoa ang usa ka estudyante sa pagpakli ngadto sa Mga Artikulo sa Hugot nga Pagtuo ug ipabasa og kusog ang ikawalo.

Unsa man ang gisugyot sa mga pulong nga “kon kini tukma nga pagkahubad” bahin sa Biblia?

Pahinumdumi ang mga estudyante nga ganahan si Joseph nga magtuon sa Biblia ug nakakaplag og dakong kahupayan diha sa mga pulong niini. Hinoon, samtang nagtuon siya niini, nakabantay siya og mga sayop ug mibati nga ang ubang impormasyon nawala o dili kompleto. Dapita ang usa ka estudyante sa pagbasa og kusog sa mosunod nga mga pamahayag ni Propeta Joseph Smith kalabut sa Biblia. Hangyoa ang klase nga maminaw kon unsay hinungdan sa mga problema nga nabantayan ni Joseph:

“Tin-aw kaayo nga daghang mga importanting mga kasayuran mahitungod sa kaluwasan sa tawo natangtang gikan sa Biblia, o nawala sa wala pa kini mahugpong nga libro” (Mga Pagtulun-an sa mga Presidente sa Simbahan: Joseph Smith [2007], 259).

Namahayag usab siya: “Mituo ako sa Biblia nga tinuod kon nagagikan kini sa pluma [pen] sa orihinal nga mga tigsulat. Ignorante nga mga maghuhubad, dili mabinantayon nga mga magsusulat, o malinglahon ug kurakot nga mga pari ang nakahimo og daghang mga kasaypanan” (Mga Pagtulun-an: Joseph Smith, 207).

Sumala ni Joseph Smith, unsa ang dili mominos sa tulo ka rason nga ang Biblia adunay mga sayop diha niini?

Pahinumdumi ang mga estudyante nga diha sa leksyon bahin sa Doktrina ug mga Pakigsaad 45:16–59, ilang gitun-an kon unsay gisulti ni Jesukristo sa Iyang mga disipulo bahin sa Iyang Ikaduhang Pag-anhi. Ang pagpadayag nagsaysay pag-usab sa kadaghanan sa unsay narekord diha sa Mateo 24. Sa dihang gidiktar kini nga pagpadayag niadtong 1831, nagtrabaho si Joseph Smith sa dinasig nga mga kausaban sa Daang tugon. Dapita ang usa ka estudyante sa pagbasa og kusog sa Doktrina ug mga Pakigsaad 45:60–61. Hangyoa ang klase sa pagsunod ug mangita sa unsay gusto sa Ginoo nga tutukan sa pagtagad sa Propeta.

Giunsa pagsulti sa Ginoo nga ang paghubad sa Bag-ong Tugon makapanalangin sa mga Santos? (Mopadayag kini og dugang pa bahin sa kabubut-on sa Dios aron maandam ang mga Santos.)

Hangyoa ang usa ka estudyante sa pag-summarize sa mosunod nga impormasyon alang sa klase. (Aron mahatagan ang estudyante og panahon sa pag-andam, hatagi siya sa impormasyon sa dili pa magklase.) Mahimo nimong pun-an ang mga detalye nga wala mapahayag sa estudyante.

Sa tinglarag niadtong 1830, gimanduan si Joseph Smith sa paghubad sa Biblia. Wala niya hubara ang Biblia gikan sa usa ka pinulongan ngadto sa lain, ni siya dunay orihinal nga manuskrito sa Biblia nga kabasihan sa trabaho. Hinoon, magbasa ug magtuon si Joseph sa mga tudling gikan sa King James Version sa Biblia ug dayon mohimo og mga pagkorihir ug mga pagdugang kon gidasig sa Espiritu Santo. Sa ingon, ang paghubad mas dinasig nga kausaban kay sa tradisyunal nga paghubad.

Ang Hubad ni Joseph Smith gibana-bana nga nakaapekto og dili mominos sa 3,400 ka bersikulo diha sa King James Version sa Biblia. Kining mga kalainan naglakip sa mga pagdugang (sa pagklaro sa kahulugan o konteksto), mga pag-delete, gihan-ay pag-usab nga mga bersikulo, ug kompleto nga pag-usab sa estraktura sa piho nga mga kapitulo. Ang Hubad ni Joseph Smith nagklaro sa doktrinal nga mga sulod [content], ilabi na sa misyon ni Jesukristo, sa kinaiyahan sa Dios, sa kinaiyahan sa tawo, sa pakigsaad ngadto ni Abraham, sa priesthood, ug sa Pagpahiuli sa ebanghelyo.

Ang edisyon sa Mga Santos sa Ulahing mga Adlaw sa King James Version sa Biblia nga naimprinta human niadtong 1979 naglakip sa sobra sa 600 ka kausaban gikan sa Hubad ni Joseph Smith. Ang mubo nga mga kausaban gipahibalo diha sa mga footnote, ug ang mas dagko nga mga seleksyon makita diha sa Bible appendix.

Dapita ang usa ka estudyante sa pagtultol sa Joseph Smith—Mateo diha sa Perlas nga Labing Bililhon. Ipasabut nga kining bahina sa Hubad ni Joseph Smith naglangkob og dugang nga impormasyon gikan sa Mateo 24 bahin sa Ikaduhang Pag-anhi sa Ginoo ug sa katumanan sa Doktrina ug mga Pakigsaad 45:60–61.

Mahimo nimong hangyuon ang usa ka estudyante sa pagsulti pag-usab og kusog kon unsay iyang nasabtan bahin sa Hubad ni Joseph Smith. Kon ang imong mga estudyante dunay edisyon sa Mga Santos sa Ulahing mga Adlaw sa King James Version sa Biblia, mahimo nimong ipakita kanila ang mga ehemplo sa mga footnote sa Hubad ni Joseph Smith diha sa Bag-ong tugon o sa mas dagko nga mga seleksyon diha sa Bible appendix. Pananglitan, ang Matthew 4:1, namahayag nga si Jesus miadto “aron makig-uban sa Dios” imbis nga “aron tintalon sa yawa.” Human mapakita sa mga estudyante ang pipila ka ehemplo, pangutan-a sila kon sa unsa kaha nga paagi nga ang Hubad ni Joseph Smith makatabang sa ilang pagtuon ug pagsabut sa Biblia.

Doktrina ug mga Pakigsaad 45:62–65

Ang mga Santos gipasidan-an nang daan nga magpundok ngadto sa kasadpan nga mga nasud

Ipasabut nga ang Ginoo mimando sa nag-unang mga Santos nga mamalhin paingon sa kasadpan, “gikan sa silangan nga bahin sa mga yuta” (D&P 45:64). Aron matabangan ang mga estudyante nga ma-visualize ang pagpamalhin nga himoon sa mga miyembro sa Simbahan paingon sa kasadpan sa panahon nga kining pagpadayag gihatag (gikan sa New York ngadto sa Ohio), mahimo nimo silang hangyuon nga ipapakli ngadto sa Mapa 3 (“Ang New York, Pennsylvania, ug Ohio nga Dapit saUSA”) diha sa seksyon sa Mga Mapa sa Kasaysayan sa Simbahan sa ilang mga kasulatan. Dapita ang usa ka estudyante sa pagbasa og kusog sa Doktrina ug mga Pakigsaad 45:62–64. Hangyoa ang klase sa pagsunod ug sa pagtino kon nganong gimando sa Ginoo sa mga Santos nga pagpundok “sa kasadpan nga mga nasud” (D&P 45:64).

Unsay gisulti sa Ginoo nga “gani diha sa inyong mga pultahan”? Unsa kaha ang gipasabut niini nga paghulagway?

Ipasabut nga pagka-1861, dul-an sa 17 ka tuig human sa kamatayon ni Joseph Smith, usa ka Gubat nga Sibil ang nagsugod sa Estados Unidos. Gibana-bana nga kini nga gubat ang hinungdan sa sobra sa 1 ka milyon nga nangamatay, ingon man usab ang dakong kadaut sa kabtangan, nagdala og kalisdanan ngadto sa mga pamilya ug mga komunidad sa tibuok nasud. Kadtong mga Santos kinsa nagpadayon sa pagsunod sa tambag sa Ginoo nga magpundok gikan sa silangan napanalanginan og kalinaw ug kasiguroan didto sa Utah.

Dapita ang usa ka estudyante sa pagbasa og kusog sa Doktrina ug mga Pakigsaad 45:65. Hangyoa ang klase sa pagsunod, nga mangita kon unsay gusto sa Ginoo nga buhaton sa mga Santos samtang nagpundok ngadto sa kasadpan nga mga nasud.

Ngano nga kinahanglan man silang mopundok sa ilang mga katigayunan? (Aron makapalit og yuta diin ang mga Santos makapamuyo diha sa panaghiusa, kalinaw, ug kasiguroan. Ipasabut nga ang kabilin nagpasabut sa yuta diin ang mga Santos makapahimutang ug makasimba sa Ginoo.)

Doktrina ug mga Pakigsaad 45:66–75

Gihulagway sa Ginoo ang Bag-ong Jerusalem, o Zion

Hangyoa ang mga estudyante sa pagkonsiderar sa mosunod nga mga pangutana:

Kon kamo makapili nga magpuyo bisan asa sa kalibutan, asa man kaha kini? Nganong gusto man ninyong magpuyo didto?

Dapita ang pipila ka estudyante sa pagtubag. Samtang gibuhat nila, pagdrowing og linya sa tunga sa pisara, nga maghimo og duha ka kolum. Sa ibabaw sa usa ka kolum, isulat ang mga ngalan sa pipila ka lokasyon nga gihisgutan sa mga estudyante. Sa sama nga kolum, ubos sa mga ngalan, ilista ang ilang mga rason nganong gusto sila nga magpuyo niadtong mga lokasyon.

Dapita ang mga estudyante sa pagbasa og hilum sa Doktrina ug mga Pakigsaad 45:66–67, nga mangita sa ngalan sa yuta nga kabilin sa mga Santos ug sa mga rason nganong angay kining tinguhaon nga dapit nga ilang kapuy-an. Mahimo nimong isugyot nga markahan sa mga estudyante kon unsay ilang makit-an.

Unsa ang itawag sa yuta nga kabilin sa mga Santos? (Ang Bag-ong Jerusalem, o Zion. Isulat kini sa ibabaw sa ikaduha nga kolum diha sa pisara.)

Ipasabut nga diha sa mga kasulatan, ang pulong nga Zion usahay gigamit sa lain-laing mga paagi. Usahay ang pulong nagpasabut sa katawhan sa Zion ug naghulagway kanila isip “ang putli og kasingkasing” (D&P 97:21). Sa laing dapit ang Zion nagpasabut sa tibuok Simbahan ug sa mga istaka [stake] niini sa tibuok kalibutan (tan-awa sa D&P 82:14). Ang pulong nga Zion mahimong nagpasabut usab sa piho nga heyograpikanhong mga lokasyon. Niini nga pagpadayag, ang Zion nagpasabut sa usa ka pisikal nga siyudad nga katukuran ug kapundukan sa mga Santos.

Giunsa paghulagway sa Ginoo ang Bag-ong Jerusalem, o Zion? (Ilista ang mga tubag sa mga estudyante sa ikaduhang kolum diha sa pisara. Mahimo silang mogamit og lain-laing mga pulong, apan kinahanglan nilang mahibaloan ang mosunod nga doktrina: Ang Bag-ong Jerusalem mahimong usa ka dapit sa kalinaw ug kasiguroan, ug ang himaya sa Ginoo maanaa didto.)

Dapita ang mga estudyante sa pagtandi sa mga lokasyon nga ilang gipili alang sa ilang ideyal nga mga panimalay ngadto sa paghulagway sa Zion.

Base sa paghulagway sa Ginoo sa Zion, ngano kaha nga ganahan man kamo nga mahimong kabahin niini nga siyudad?
Asa kamo nakasinati og kalinaw ug kasiguroan? Nganong importante nga dunay mga dapit diin mahimo kamong luwas ug makabaton og kalinaw?

Dapita ang usa ka estudyante sa pagbasa og kusog sa Doktrina ug mga Pakigsaad 45:68–71. Hangyoa ang klase sa pagsunod, nga mangita sa dugang nga mga rason nga ganahan silang mopuyo sa Bag-ong Jerusalem. Mahimo nimong isugyot nga markahan nila kon unsay ilang makit-an. Hangyoa sila sa pagreport sa unsay ilang nakit-an, ug idugang ang ilang mga tubag ngadto sa ikaduhang kolum diha sa pisara.

Unsay bation sa dautan bahin sa Zion?
Sumala sa bersikulo 71, asa gikan ang matarung nga katawhan sa Zion? (Kon wala pa kini matino, isulat ang mosunod nga doktrina sa ikaduhang kolum diha sa pisara: Ang matarung nga katawhan gikan sa tanang kanasuran magpundok sa Zion. Mahimo nimong ipasabut nga tinuod kini alang sa Zion nga gipasabut niini nga pagpadayag ug tinuod alang sa mga stake sa Zion nga naestablisar sa tibuok kalibutan karon.)

Basaha ang mosunod nga pamahayag ni Propeta Joseph Smith kalabut sa hilisgutan sa Zion:

“Ang Zion … usa ka dapit sa pagkamatarung, ug ang tanang nagtukod didto kinahanglang mosimba sa tinuod ug buhi nga Dios, ug ang tanan mituo sa usa ka doktrina, nga mao ang doktrina sa atong Ginoo ug manluluwas nga si Jesukristo” (sa History of the Church, 2:254).

Dapita ang mga estudyante sa pagbasa og hilum sa Doktrina ug mga Pakigsaad 124:25–27 nga mangita kon unsay gisugo sa Ginoo nga buhaton sa mga Santos didto sa Nauvoo. Dayon i-summarize ang katapusang duha ka bersikulo niini nga pagpadayag pinaagi sa pagpasabut nga ang Ginoo mipahinumdom sa mga Santos nga ang Iyang Ikaduhang Pag-anhi kahadlokan alang sa ilang mga kaaway.

Mahimo nimong pahinumduman ang mga estudyante nga ang Ginoo miawhag sa nag-unang mga Santos ug kanato nga “mopatalinghug” sa Iyang tingog niini nga pagpadayag. Dapita ang mga estudyante nga tan-awon og balik ang Doktrina ug mga Pakigsaad 45 ug ribyuhon kon unsay gipadayag sa Ginoo ngadto sa mga Santos bahin sa Iyang Ikaduhang Pag-anhi ug sa Bag-ong Jerusalem. Mahimo nimo silang awhagon sa pagkompleto sa mosunod nga pamahayag diha sa ilang mga class notebook o mga scripture study journal: “Tungod sa akong nakat-unan sa Doktrina ug mga Pakigsaad 45, mangandam ko alang sa mga butang nga moabut pinaagi sa …” Tapusa pinaagi sa pag-awhag sa mga estudyante sa paghisgot kon unsay ilang nakat-unan sa leksyon karong adlawa uban sa usa ka sakop sa pamilya.

Komentaryo ug Background nga Impormasyon

Doktrina ug mga Pakigsaad 45:60–61. Ang Hubad ni Joseph Smith

Ang Hubad ni Joseph Smith usa ka “inusab o hinubad sa King James Version sa Biblia nga gisugdan ni Propeta Joseph Smith niadtong Hunyo 1830. Siya gisugo sa Dios sa paghubad ug pagtamud niini ingon nga ‘bahin sa iyang balaan nga tawag’ ingon nga usa ka propeta.” Bisan kon ang buhat nahuman niadtong Hulyo 1833, ang Propeta mipadayon sa paghimo og ginagmayng mga kausaban hangtud sa iyang kamatayon niadtong 1844. “Ang uban nga mga bahin sa hinubad gimantala sa panahon sa iyang kinabuhi.” (Tan-awa sa Giya ngadto sa mga Kasulatan, “Hubad ni Joseph Smith”)

Hinoon, tungod sa pagpanggukod, kakulang sa pinansyal nga kapanguhaan, ug sa iyang mga responsibilidad alang sa pagdumala sa Simbahan, wala makahimo si Joseph Smith sa pagmantala sa tanan niyang mga kausaban sa Biblia sa wala pa ang iyang kamatayon. Agig dugang, nagkulang ang Simbahan sa manuskrito. Nagpabilin kini sa mga kamot sa biyuda ni Joseph, nga si Emma Smith, human sa iyang kamatayon. Niadtong 1866 gihatag ni Emma kini nga manuskrito ngadto sa Reorganized Church of Jesus Christ of Latter Day Saints (RLDS), nga nailhan karon isip Community of Christ, nga nakabaton sa katungod sa pagkopya ug mimantala sa hubad pagka-1867. (Tan-awa sa Robert J. Matthews, “Q and A,” New Era, Abr. 1977, 46–47.)

Sa katapusan ang basahon ni Moises ug ang Joseph Smith—Mateo namantala isip kabahin sa Hubad ni Joseph Smith. Hinoon, unsay atong gigamit sa atong mga kasulatan karon usa lamang ka bahin sa hubad ni Jospeh Smith sa Biblia. “Samtang dunay pipila ka rason nganong ang tibuok teksto sa Hubad ni Joseph Smith wala malakip sa 1979 nga LDS edisyon sa Biblia, ang pagkadili kasaligan sa teksto sa JST [HJS] dili usa niini. Ang mga tudling nga dunay doktrinal nga kamahinungdanon gihatagan og gibug-aton, ug kay ang luna dako man nga butang, dili tanan gilakip” (Robert J. Matthews, “I Have a Question,” Ensign, Hunyo 1992, 29).