Doktrina ug mga Pakigsaad 94–96

Pasiuna

Ang Ginoo mipadayag sa pinadayag nga narekord sa Doktrina ug mga Pakigsaad 94 niadtong Agosto 2, 1833, ug misugo sa mga Santos sa pagplano ug pag-establisar sa siyudad sa Kirtland susama sa paagi nga misugo Siya kanila sa pagplano ug pag-establisar sa siyudad sa Zion didto sa Missouri. Ang Ginoo misugo usab sa mga Santos sa pagtukod og balay alang sa kapangulohan (usa ka Church administration building) ug usa ka balay alang sa pag-imprinta agig dugang sa templo, diin misugo na Siya kaniadto sa mga Santos sa pagtukod. Duha ka bulan sa wala pa kini, niadtong Hunyo 1, 1833, si Joseph Smith nakadawat sa pinadayag nga makita diha sa Doktrina ug mga Pakigsaad 95, diin ang Ginoo mipanton sa mga Santos tungod sa paglangay sa pagtukod sa templo. Ang Doktrina ug mga Pakigsaad 96 naglangkob sa instruksyon sa Ginoo nga itudlo si Newel K. Whitney aron “magdumala” (D&P 96:2) sa yuta diin ang templo sa Kirtland pagatukuron.

Mga Sugyot alang sa Pagtudlo

Doktrina ug mga Pakigsaad 94

Ang Ginoo misugo sa mga Santos sa pagtukod og duha ka mga balay ug mimatuod sa panginahanglan sa pagtukod sa templo

Hangyoa ang mga estudyante sa paghunahuna nga sila adunay oportunidad sa pagbiyahe ngadto sa usa ka nasud nga adunay daghang siyudad. Samtang nagbiyahe sila, nakabantay sila nga adunay dulaanan sa mga sport sa sentro sa matag siyudad.

Unsay masulti niini mahitungod sa mga tawo niini nga nasud?
Kon modesinyo kamo og dako nga siyudad, unsa man ang inyong ibutang sa sentro sa siyudad? Ngano man?

Dapita ang usa ka estudyante sa pagbasa og kusog sa Doktrina ug mga Pakigsaad 94:1, 3, 10. Hangyoa ang klase sa pagsunod ug sa pag-ila sa tulo ka mga building nga gisugo sa Ginoo nga tukuron sa mga Santos sa Kirtland, Ohio. Dapita ang mga estudyante sa pagreport sa ilang nakit-an.

Kirtland plat — Pinili gikan sa usa ka plano sa Kirtland, Ohio, mga Agosto 1833. Ang tulo ka mga building diha sa tuo nagrepresentar sa Templo sa Kirtland, usa ka balay diin ang Kapangulohan makahimo sa ilang buhat, ug usa ka opisina sa pag-imprinta.

Kining tulo ka mga building nagpakita og unsa nga mga butang ang importante ngadto sa Ginoo? (Mga ordinansa sa templo, ang buhat sa Unang Kapangulohan sa pag-angkon og pagpadayag ug sa pagpangalagad ngadto sa Simbahan, ug ang pag-imprinta sa mga kasulatan ug ubang mga buhat nga isugo sa Ginoo.)

I-summarize ang Doktrina ug mga Pakigsaad 94:13–17 pinaagi sa pagpasabut nga ang Ginoo mitudlo ni Hyrum Smith, Reynolds Cahoon, ug Jared Carter sa paghimo og building committee alang sa mga building nga gihisgutan diha sa Doktrina ug mga Pakigsaad 94.

Dapita ang mga estudyante nga hilum nga mobasa sa Doktrina ug mga Pakigsaad 94:16 aron mangita sa unsay gisulti sa Ginoo ngadto sa mga Santos mahitungod sa pagtukod sa mga building alang sa kapangulohan ug alang sa pag-imprinta. Hangyoa ang mga estudyante sa pagreport sa ilang nakit-an.

Ngano kaha nga importante nga unahon sa pagtukod ang templo kay sa laing duha ka mga building? Unsay matudlo niini kanato mahitungod sa ka-importante sa mga templo? (Mahimo nimong ipahibalo sa mga estudyante nga ang duha ka laing mga building wala gayud matukod.)

Doktrina ug mga Pakigsaad 95

Ang Ginoo mipanton sa mga Santos tungod sa paglangay sa pagtukod sa templo

Pahinumdumi ang mga estudyante nga ang Ginoo unang mihatag sa sugo sa pagtukod sa Templo sa Kirtland diha sa Doktrina ug mga Pakigsaad 88:119, nga narekord niadtong Disyembre 27 ug 28, 1832. (Isulat kini nga petsa diha sa pisara.) Dapita ang mga estudyante sa pagsiksik sa pasiuna sa seksyon sa Doktrina ug mga Pakigsaad 95 alang sa petsa sa paghatag niini nga pinadayag. Hangyoa sila sa pagbana-bana kon unsa ka taas ang gintang sa panahon tali niining duha ka mga petsa. Ipasabut nga atol niining panahona ang mga lider sa Simbahan nakaangkon og yuta sa Kirtland nga maoy tukuran sa templo. Hinoon, pagka-Hunyo 1, 1833, ang mga Santos wala pa makasugod sa pagtukod sa templo o bisan sa pag-andam sa pundasyon.

Dapita ang usa ka estudyante sa pagbasa og kusog sa Doktrina ug mga Pakigsaad 95:1–3. Hangyoa ang klase sa pagtino kon unsa ang gisulti sa Ginoo sa mga Santos kalabut sa ilang paglangay sa pagtukod sa templo. Dapita ang mga estudyante sa pagreport sa ilang nakit-an.

Unsa ang buhaton sa Dios alang niadtong Iyang gihigugma? (Ang mga estudyante kinahanglang mahibalo sa mosunod nga kamatuoran: Ang Dios mopanton niadtong Iyang gihigugma. Mahimo nimong isugyot nga markahan sa mga estudyante ang mga pulong nga nagtudlo niini nga kamatuoran diha sa ilang mga kasulatan.)
Unsay gipasabut sa pagpanton? (Pagdisiplina o pagkorihir.) Sumala niini nga mga bersikulo, nganong mopanton man ang Dios niadtong Iyang gihigugma?

Hangyoa ang mga estudyante sa pagkonsiderar kon sa unsang paagi sila sagad nga moresponde kon sila pantunon o korihian sa laing tawo. Dapita ang usa ka estudyante sa pagbasa og kusog sa mosunod nga istorya. Hangyoa ang klase sa pagpaminaw og mga paagi nga ang ubang mga Santos miresponde sa pagpanton sa Ginoo kanila:

Human madawat ni Joseph Smith ang pinadayag nga narekord diha sa Doktrina ug mga Pakigsaad 95, ang mga lider sa Simbahan mipahigayon og komperensya aron hisgutan ang pagtukod sa templo. “Ang uban uyon sa pagtukod og balay nga tabla, apan ang uban gusto nga motukod og balay nga troso. Mipahinumdom si Joseph kanila nga wala sila maghimo og balay alang sa tawo, apan sa Dios; ‘ug kita ba, mga kaigsoonan,’ miingon siya, ‘motukod og balay alang sa atong Dios, nga hinimo sa troso? Dili, ako adunay mas maayong plano kay niana. Ako adunay plano sa balay sa Ginoo, hinatag niya mismo.’” Human mapasabut ni Joseph ang hingpit nga sumbanan sa templo, ang tanan nga mga igsoon naghinam-hinam. Mibiyahe sila ngadto sa dapit nga tukuran, mitangtang og koral, ug gipatag ang usa ka umahan sa trigo nga gitamnan kaniadto sa pamilyang Smith. Human mahawan ang mga lugas, si Hyrum Smith “misugod sa pagkalot og kanal alang sa pundasyon nga bongbong.” (Lucy Mack Smith, History of Joseph Smith by His Mother, ed. Preston Nibley [1958], 230, 231.)

Unsa ang atong makat-unan gikan niini nga mga Santos mahitungod sa paagi sa pagresponde sa pagpanton?

Ipasabut nga diha sa bersikulo 3 ang Ginoo mihulagway sa paglangay sa mga Santos sa pagtukod sa templo isip “usa ka mabug-at kaayo nga sala.” Dapita ang mga estudyante sa pagsiksik sa Doktrina ug mga Pakigsaad 95:5–6 aron makita kon sa unsa gitandi sa Ginoo ang mga mabug-at kaayo nga sala. Hangyoa sila sa pagreport sa ilang nakat-unan.

Sa unsang paagi kaha ang pagbaliwala sa sugo sa Ginoo sa pagtukod og templo susama sa “[pag]lakaw diha sa kangitngit sa udtong tutok”? Sa unsang paagi kaha kita “[nag]lakaw diha sa kangitngit sa udtong tutok” kon kita mopili sa pagbaliwala sa uban nga mga sugo?

Dapita ang mga estudyante sa pagbasa sa Doktrina ug mga Pakigsaad 95:4, 8–9 nga adunay kapares. Hangyoa sila sa pagtino sa mga rason nganong ang Ginoo misugo sa mga Santos sa pagtukod sa Templo sa Kirtland. (Mahimo nimong ipasabut nga ang mga pulong “nga Ako mopahinabo sa akong kahibulongan nga buhat” [bersikulo 4] mahimong nagpasabut kon sa unsang paagi ang mga tawo nga wala motuo sa pagpadayag, sa langitnong mga pagbisita, ug ubang espirituhanong mga butang tingali motan-aw sa Pagpahiuli sa ebanghelyo isip kahibulongan.)

Unsa man ang atong makat-unan gikan niini nga mga bersikulo kon nganong gisugo kita sa Ginoo sa pagtukod og mga templo? (Human makatubag ang mga estudyante, mahimo nimong isulat ang mosunod nga baruganan diha sa pisara: Diha sa mga templo, ang Ginoo nag-andam sa Iyang mga sulugoon sa paghimo sa Iyang buhat ug mituga kanila og gahum.)

Ipasabut nga ang pagtuga [endow] nagpasabut sa paghatag og gasa sa usa ka tawo. Ang pagtuga diha sa templo nagpasabut nga makadawat og espirituhanong gahum ug kahibalo. Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:

“Hangtud nga kamo makasulod sa balay sa Ginoo ug makadawat sa tanang mga panalangin nga naghulat kaninyo didto, dili ninyo maangkon ang tanan nga ikatanyag sa Simbahan. Ang pinaka-importante ug dagkong mga panalangin sa pagkamiyembro sa Simbahan mao kadtong mga panalangin nga atong madawat sa mga templo sa Dios” (“Ang Balaan nga Templo—ang Suga sa Kalibutan,” Liahona, Mayo 2011, 93).

Unsa ang duha ka makaluwas nga mga ordinansa nga madawat lamang nato sa mga templo sa Dios? (Ang pagtuga diha sa templo [temple endowment] ug ang pagbugkos sa kaminyoon [marriage sealing].)
Unsa ang ubang mga butang nga inyong mabuhat karon aron mangandam nga makadawat niini nga mga ordinansa ug mga panalangin sa templo? (Ang mga tubag mahimong maglakip sa pagkamatinud-anon sa mga ordinansa ug mga pakigsaad nga nadawat na nila ug sa pagpuyo kanunay nga takus sa rekomend sa templo.)

Ipasabut nga ang pagtukod sa Templo sa Kirtland usa ka dako nga buluhaton alang sa mga Santos. Sa sayong bahin sa 1833, wala kaabut og 200 ang mga miyembro sa Simbahan sa Ohio, ug kadaghanan nila kabus. Dapita ang usa ka estudyante sa pagbasa og kusog sa Doktrina ug mga Pakigsaad 95:11–12. Hangyoa ang klase sa pagsunod, nga mangita kon unsay gisaad sa Ginoo kon ang mga Santos mosunod sa Iyang mga sugo.

Unsa ang gisaad sa Ginoo kon ang mga Santos motuman sa Iyang mga sugo?

Pahibaloa ang klase nga ang mga Santos sa Ohio mipadayon uban sa hugot nga pagtuo diha sa saad sa Ginoo ug mitukod sa templo.

Unsa nga baruganan ang atong makat-unan gikan sa bersikulo 11? (Ang mga estudyante kinahanglang mahibalo sa mosunod nga baruganan: Kon mosunod kita sa mga sugo, makabaton kita og gahum sa pagbuhat sa unsay gisugo sa Ginoo kanato.)
Unsa ang pipila ka mga sitwasyon nga inyong atubangon diin magamit kini nga baruganan? Kanus-a kamo mibati nga nakadawat kamo sa tabang sa Ginoo sa pagbuhat sa usa ka butang tungod kay misunod kamo sa mga sugo?

I-summarize ang Doktrina ug mga Pakigsaad 95:13–17 pinaagi sa pagpasabut nga ang Ginoo mihatag og mga instruksyon kabahin sa mga sukod ug mga gamit sa piho nga mga kwarto sa Templo sa Kirtland. Dapita ang usa ka estudyante sa pagbasa og kusog sa bersikulo 14. Hangyoa ang klase sa pagsunod, nga mangita og usa ka paagi nga ang Ginoo mipasabut nga Iyang tumanon ang Iyang saad sa paghatag kanila og gahum sa pagtukod sa templo. Dapita ang mga estudyante sa pagreport sa ilang nakit-an. (Mahimo nimong ipasabut nga ang Ginoo misaad sa pagpakita sa tulo ka tawo kon sa unsang paagi ang templo kinahanglang pagatukuron. Kining tulo mao ang Unang Kapangulohan.)

Aron matabangan ang mga estudyante nga makakita kon sa unsang paagi kini nga saad natuman, dapita ang usa ka estudyante sa pagbasa og kusog sa mosunod nga paragraph:

Si Joseph Smith, Sidney Rigdon, ug Frederick G. Williams dungan nga nag-ampo ug nakakita og panan-awon sa templo. Human detalyadong nakita ang gawas sa templo, “ang building ingon nga sa diha gayud sa [ilang] atubangan” ug ilang nakita ang sulod sa building nga daw anaa gayud sila sa sulod sa building (tan-awa sa Mga Pagtulun-an sa mga Presidente sa Simbahan: Joseph Smith [2007], 271). Sa wala madugay, sa diha nga hapit na mahuman ang templo, miingon si Frederick G. Williams nga susama kini sa modelo nga iyang nakita sa panan-awon hangtud sa kinagamyang detalye, ug siya walay makitang kalainan tali niini ug sa templo nga natukod.

Niini nga ehemplo, giunsa man sa Ginoo paghatag og gahum sa mga Santos aron mabuhat ang unsay Iyang gisugo nila nga buhaton?

Doktrina ug mga Pakigsaad 96

Si Newel K. Whitney gitudlo nga maoy responsable sa tanang yuta nga gipanag-iya sa Simbahan

Ipasabut nga diha sa Doktrina ug mga Pakigsaad 96, ang Ginoo misugo nga si Bishop Newel K. Whitney ang responsable sa yuta nga gipanag-iya sa Simbahan. Ang templo pagatukuron sa dapit nga gitudlo sa Ginoo, ug si Bishop Whitney mobahin-bahin sa nahibilin nga yuta ngadto sa mga lote alang niadtong magtinguha og kabilin. Ang uban niini nga mga lote giandam alang sa mga lider sa Simbahan nga responsable sa pagmantala sa mga pinadayag. Ang pagdawat niini nga kabilin makatabang kanila nga mapahinungod ang ilang panahon sa paghimo sa buhat sa Ginoo, nga naglakip sa pagmantala sa pulong sa Dios. Dapita ang usa ka estudyante sa pagbasa og kusog sa Doktrina ug mga Pakigsaad 96:4–5. Hangyoa ang klase sa pagsunod ug sa pagtino kon sa unsang paagi ang pagmantala sa pulong sa Dios makatabang sa mga Santos. Dapita ang mga estudyante sa pagreport sa unsay ilang nakat-unan.

Ipasabut nga niini nga pinadayag ang Ginoo misugo usab nga si John Johnson kinahanglang dawaton isip usa ka sakop sa United Firm, nga maoy nagdumala sa pinansyal, pagmantala, ug pangnegosyo nga mga kalihokan sa Simbahan.

Dapita ang pipila ka estudyante sa pag-summarize sa ilang nakat-unan gikan niini nga leksyon. Awhaga sila nga molihok sumala sa mga kamatuoran nga ilang nakat-unan.

Komentaryo ug Background nga Impormasyon

Doktrina ug mga Pakigsaad 95:1–2. “Kinsa kadto nga Ako naghigugma Ako usab nagpanton”

Si Elder Dallin H. Oaks sa Korum sa Napulog Duha ka mga Apostoles mipasabut kon sa unsang paagi ang pagpanton sa Dios usa ka ebidensya sa Iyang gugma:

“Ang gugma sa Dios hingpit kaayo nga Siya mahigugmaong nagmando kanato sa pagtuman sa Iyang mga sugo tungod kay Siya nasayud nga pinaagi lamang sa pagsunod sa Iyang mga balaod nga kita mahimong hingpit sama Kaniya” (“Gugma ug Balaod,” Liahona, Nob. 2009, 27).

Si Elder D. Todd Christofferson sa Korum sa Napulog Duha ka mga Apostoles mitudlo:

“Bisan tuod nga sa kanunay lisud kining antuson, sa pagkatinuod angay kita nga malipay nga ang Dios mikonsiderar kanato nga angayan sa Iyang panahon ug kahasol aron sa pagkorihir kanato.

“Ang balaanon nga pagpanton adunay labing minos tulo ka mga katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan. …

“Mag-ampo kita alang sa Iyang dinasig sa gugma nga pagkorihir” (“Ako Nagabadlong ug Nagapanton sa Akong Gihigugma,” Liahona, Mayo 2011, 98, 100).

Doktrina ug mga Pakigsaad 95:4. “Akong kahibulongan nga buhat”

Ang mga pulong nga “akong kahibulongan nga buhat” nagagikan sa Isaias 28:21, diin ang Ginoo miingon nga Siya mokorihir sa mga tawo kinsa wala motuo nga aduna silay panginahanglan sa paghinulsol. Ang Pagpahiuli sa ebanghelyo ug ang pag-establisar sa tinuod nga Simbahan dinhi sa yuta usa ka kahibulongan nga hitabo ngadto sa mga tawo kinsa mikonsiderar nga binuang ang pagtuo diha sa pagpadayag, langitnong mga pagbisita, ug ubang espirituhanong mga butang. Ang mensahe sa Pagpahiuli sa ebanghelyo gisangyaw ngadto sa daghang tawo nga nagtuo nga aduna na sila sa kamatuoran. Pipila niining mga tawhana tingali mikonsiderar sa atong mga paningkamot nga kahibulongan.

Doktrina ug mga Pakigsaad 95:8–9. Unsa man ang pagtuga [endowment] “uban sa gahum gikan sa kahitas-an”?

“Ang pagtuga usa ka gasa o kabilin. Sa Simbahan kasagaran kining nagpasabut sa usa ka ordinansa sa templo diin ang mga miyembro mohimo og piho nga mga saad ug makadawat og gasa sa kahibalo ug espirituhanon nga gahum agig balos. Ang pagtuganga gipamulong dinhi, hinoon, dili sama sa seremonya nga gipahigayon sa ulahi nga mga templo. Ang mga miyembro sa priesthood sa Kirtland miapil sa usa ka ‘dili kompleto nga pagtuga, ang hingpit nga ordinansa gireserba alang sa umaabut nga pagpahigayon sa diha nga usa ka templo nga gidesinyo alang sa buhat sa ordinansa mismo matukod’ (Bruce R. McConkie, ‘A New Commandment: Save Thyself and Thy Kindred!’ Ensign, Ago. 1976, p. 10). Ang unang kompleto nga pagtuga niini nga dispensasyon gihatag ni Joseph Smith sa Nauvoo niadtong 4 sa Mayo 1842.

“Ang pagtuga nga nadawat sa Kirtland naglakip sa mga paghugas ug pagdihog, ingon man usab sa paghugas sa tiil sa opisyal nga mga kaigsoonan sa priesthood. Ang Ginoo usab mibu-bu sa Iyang Espiritu, o sa laing pagkasulti mituga kanila og espirituhanong gahum, ug daghan ang nakadawat og mga pagpadayag o ubang mga gasa (tan-awa sa History of the Church, 2:308–10)” (Doctrine and Covenants Student Manual, 2nd ed. [manwal sa Church Educational System, 2001], 226).