Leksyon 40: Doktrina ug mga Pakigsaad 35

Leksyon 40

Doktrina ug mga Pakigsaad 35

Pasiuna

Sulod sa unom ka bulan sukad sa pag-organisar sa Simbahan, si Oliver Cowdery ug Peter Whitmer Jr. gitawag sa pagsangyaw sa ebanghelyo ngadto sa mga American Indian (tan-awa sa D&P 28:8; 30:5). Si Ziba Peterson ug Parley P. Pratt gitawag dili dugay human niana nga mokuyog kanila (tan-awa sa D&P 32). Samtang nagpadulong sa kasadpan nga mga utlanan sa Missouri, mihunong sila sa Mentor, Ohio, ug sa Kirtland, Ohio, diin gipaambit nila ang mensahe sa gipahiuli nga ebanghelyo ngadto sa higala ni Elder Pratt ug kanhi ministro, si Sidney Rigdon. Sulod sa mubo nga panahon kapin sa 100 ka mga tawo, lakip ni Sidney Rigdon ug daghang mga miyembro sa iyang kongregasyon, ang nabunyagan. Sobra pa kini nga midoble sa total nga mga miyembro sa Simbahan.

Human mobiya ang mga elder sa Kirtland nga dapit aron sa pagpadayon sa ilang panaw, si Sidney Rigdon ug usa ka higala nga ginganlan og Edward Partridge mibiyahe ngadto sa Fayette, New York, aron makighimamat ni Propeta Joseph Smith. Wala madugay human sa ilang pag-abut, nadawat ni Joseph ang pinadayag nga narekord diha sa Doktrina ug mga Pakigsaad 35. Niini, ang Ginoo mihatag ni Sidney og piho nga mga responsibilidad sulod sa bag-ong gipahiuli nga Simbahan.

Mga Sugyot alang sa Pagtudlo

Doktrina ug mga Pakigsaad 35:1–12

Ang Ginoo miingon nga giandam Niya si Sidney Rigdon alang sa mahinungdanon nga buhat

Sa dili pa magklase, isulat ang mosunod nga pangutana diha sa pisara: Unsay inyong nasinati nga nakatabang ninyo nga masayud nga ang Ginoo nakaila kaninyo ug adunay plano alang sa inyong kinabuhi?

Aron sa pagsugod sa klase, dapita ang mga estudyante sa pagpaambit og mga tubag niini nga pangutana kon komportable sila nga mobuhat niini.

Ipasabut nga diha sa pinadayag nga karon narekord sa Doktrina ug mga Pakigsaad 35, ang Ginoo namulong ngadto sa usa ka tawo nga ginganlan og Sidney Rigdon, kinsa bag-o lang nga nabunyagan ug nakumpirmahan. Ang Ginoo namulong kang Sidney mahitungod sa iyang tahas sa pagtabang ni Propeta Joseph Smith. Awhaga ang mga estudyante sa pagpadayon sa paghunahuna sa pangutana diha sa pisara samtang magtuon sila sa mga instruksyon sa Ginoo ngadto ni Sidney.

Aron matabangan ang mga estudyante nga makasabut sa pipila ka background ni Sidney Rigdon, hangyoa ang usa ka estudyante sa pagbasa og kusog sa pasiuna niini nga leksyon. Dayon dapita ang usa ka estudyante sa pagbasa og kusog sa Doktrina ug mga Pakigsaad 35:1–3. Hangyoa ang klase sa pagsunod, nga mangita og ebidensya nga ang Ginoo nakahibalo mahitungod ni Sidney Rigdon ug sa iyang mga buhat.

Unsa nga ebidensya ang inyong nakita nga ang Ginoo nakahibalo ni Sidney Rigdon?
Unsa ang gisugyot niini nga mga bersikulo mahitungod sa relasyon sa Ginoo ngari kanato? (Samtang motubag ang mga estudyante, isulat sa pisara ang mosunod nga baruganan: Ang Ginoo nakaila kanato ug adunay ipabuhat alang sa matag usa kanato.
Nganong importante man kini nga kamatuoran diha kaninyo?

Aron pagmatuod nga ang Ginoo nakaila kanato sa tagsa-tagsa, dapita ang usa ka estudyante sa pagbasa og kusog sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:

“Ako mopamatuod nga ang Dios nasayud sa usag usa ninyo … sulod sa dugay na kaayo nga panahon (tan-awa sa D&P 93:23). Nahigugma Siya ninyo sulod sa dugay na kaayo nga panahon. … Nakaila Siya sa inyong mga ngalan ug sa tanan ninyong mga kagul-anan ug mga kalipay!” (“Mahinumdom kon Unsa ka Maloloy-on ang Ginoo,” Liahona, Mayo 2004, 46).

Pag-display og hulagway ni Juan Bautista nga nagsangyaw o ni Juan nga nagbunyag sa Manluluwas (tan-awa sa Juan Bautista Nagbunyag ni Jesus, Libro sa mga Hulagway sa Ebanghelyo [2009], nu. 35; tan-awa usab sa LDS.org). Hangyoa ang mga estudyante nga ilhon kon kinsa si Juan Bautista ug giunsa niya pag-andam sa uban alang sa pag-anhi ni Jesukristo.

Dapita ang usa ka estudyante sa pagbasa og kusog sa Doktrina ug mga Pakigsaad 35:4–6. Hangyoa ang klase sa pagsunod, nga mangita kon sa unsang paagi si Sidney Rigdon susama ni Juan Bautista.

Sumala sa bersikulo 4, sa unsang paagi si Sidney Rigdon susama ni Juan Bautista? (Giandam niya ang uban sa pagdawat sa kahingpitan sa ebanghelyo.)
Ang Ginoo miingon nga si Sidney mobuhat og “mahinungdanon nga buhat” kay sa gibuhat na niya (D&P 35:3). Sumala sa Doktrina ug mga Pakigsaad 35:6, unsay kabahin niining “mahinungdanon nga buhat”? (Motabang siya sa uban nga makadawat sa bunyag ug sa gasa sa Espiritu Santo pinaagi sa tukma nga awtoridad.)

Dapita ang mga estudyante sa pagpamalandong kon sa unsang paagi nga ang mga kasinatian ug mga sitwasyon sa ilang kinabuhi karon tingali nag-andam kanila alang sa “mahinungdanon nga buhat” sa umaabut. Mahimo nimo silang hatagan og pipila ka minuto sa pagsulat mahitungod niini diha sa ilang mga class notebook o scripture study journal.

Itudlo ang mga pulong “ug ikaw wala mahibalo” sa Doktrina ug mga Pakigsaad 35:4. Ipasabut nga sa wala pa gayud si Sidney makat-on mahitungod sa gipahiuli nga Simbahan ni Jesukristo, giandam na niya ang iyang kaugalingon ug ang uban sa pagdawat niini. Gibuhat niya kini pinaagi sa paggamit sa Biblia aron sa pagtudlo sa katawhan diha sa iyang simbahan sa Ohio. Ipamatuod nga bisan tuod kita wala masayud sa piho nga mga buluhaton nga giandam sa Ginoo alang kanato, makasalig kita nga Siya nahibalo kanato. Samtang maningkamot kita sa pagsunod Kaniya, motabang Siya kanato nga matuman ang buhat nga gusto Niya nga atong buhaton.

Dapita ang mga estudyante nga hilum nga mobasa sa Doktrina ug mga Pakigsaad 35:7–11. Hangyoa sila sa pagpangita kon unsay mahitabo sa kinabuhi niadtong motuo ug mopakita og hugot nga pagtuo sa Dios sa katapusang mga adlaw.

Sumala niini nga mga bersikulo, unsa ang gisaad sa Ginoo niadtong nagsunod Kaniya diha sa hugot nga pagtuo? (Bisan og ang mga estudyante mahimong mogamit og lain-laing mga pulong, kinahanglan silang mahibalo sa mosunod nga doktrina: Ang Ginoo mohimo og mga milagro, mga timailhan, ug mga katingalahan sumala sa hugot nga pagtuo niadtong mituo sa Iyang ngalan.)
Ngano kaha nga ang mga milagro, mga timailhan, ug mga katingalahan konektado kaayo sa hugot nga pagtuo?

Doktrina ug mga Pakigsaad 35:13–19

Ang Ginoo misaad nga motabang niadtong Iyang gitawag sa pagbuhat sa Iyang buhat

Dapita ang mga estudyante sa paghunahuna nga nag-organisar sila og usa ka sports team. Hangyoa sila sa paghulagway sa mga kalig-on ug kahanas nga gitinguha nila diha sa ilang mga magdudula.

Ipasabut nga niini nga pagpadayag ang Ginoo mihulagway niadtong Iyang gitawag sa pagtabang sa buhat sa ulahing mga adlaw sa pagtukod sa Iyang gingharian. Dapita ang usa ka estudyante sa pagbasa og kusog sa Doktrina ug mga Pakigsaad 35:13, ug hangyoa ang klase sa pag-ila sa mga kinaiya niadtong gipili sa Ginoo nga motabang sa Iyang buhat.

Unsa nga mga pulong niini nga bersikulo naghulagway niadtong kinsa gitawag sa Ginoo sa pagtabang sa Iyang buhat?
Sa unsang mga paagi kadtong gitawag sa Ginoo sa pagtabang sa Iyang buhat makonsiderar nga “mahuyang nga mga butang sa kalibutan”?
Ngano kaha nga kadtong giisip sa kalibutan nga huyang maayo nga mga kandidato sa pagtabang sa Ginoo sa pagtuman sa Iyang buhat?

Ipasabut nga ang pulong pag-ayag niini nga bersikulo nagpasabut sa binuhatan nga mag-ayag og lugas. Ang pag-ayag maoy proseso diin ang lugas, sama sa trigo, mabulag gikan sa dagami ug panit niini. Ang lugas tipigan, ug ang mga dagami ug panit ilabay.

Unsa kaha ang gipasabut sa mga pulong “pag-ayag sa mga kanasuran pinaagi sa gahum sa akong Espiritu”? (Tingali kinahanglan nimong tabangan ang mga estudyante nga makasabut nga kini nagpasabut sa mga paningkamot sa Ginoo sa pagbulag ug pagpundok sa mga tawo kinsa andam nga modawat sa ebanghelyo gikan niadtong dili andam.)
Unsa nga kamatuoran ang atong makat-unan gikan sa bersikulo 13? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga baruganan: Ang Dios mitawag niadtong mga mahuyang sa pagtuman sa Iyang buhat pinaagi sa gahum sa Iyang Espiritu. Isulat sa pisara kini nga kamatuoran.)
Sa unsang paagi kini nga kamatuoran makatabang sa usa ka tawo kinsa mibati og kabalaka mahitungod sa pagserbisyo og misyon? Sa unsang paagi kini makatabang sa usa ka tawo kinsa gihangyo sa pagtudlo sa simbahan apan mibati nga dili angay? Sa unsang paagi kini makatabang sa usa ka tawo kinsa mibati nga naaghat sa pagpaambit sa ebanghelyo apan dili sigurado kon unsay isulti o buhaton?

Dapita ang mga estudyante nga hilum nga mobasa sa Doktrina ug mga Pakigsaad 35:14–15 ug mangita og mga paagi nga ang Ginoo misaad sa paglig-on niadtong motabang sa Iyang buhat.

Unsa ang pipila ka mga pulong niini nga mga bersikulo nga naghulagway kon sa unsang paagi ang Ginoo mopanalangin kanato samtang kita motabang sa Iyang buhat?

Dapita ang usa ka estudyante sa pagbasa og kusog sa Doktrina ug mga Pakigsaad 35:17–19, 22. Hangyoa ang klase sa pagsunod, nga mangita sa tambag sa Ginoo ngadto ni Sidney Rigdon kalabut ni Propeta Joseph Smith.

Unsa ang tambag nga gihatag sa Ginoo ngadto ni Sidney Rigdon kalabut ni Propeta Joseph Smith? (“Bantayi siya nga ang iyang hugot nga pagtuo dili mawala,” “pabilin uban kaniya”, ug “ayaw siya isalikway.”)
Unsaon nato paggamit niini nga tambag kabahin sa atong mga lider sa Simbahan karon?

Doktrina ug mga Pakigsaad 35:20–27

Ang Ginoo misugo ni Sidney Rigdon sa pagsulat alang ni Joseph Smith, pagsangyaw sa ebanghelyo, ug pagtuman sa mga pakigsaad nga iyang gihimo

Hangyoa ang mga estudyante sa paghulagway sa ilang mga calling o katungdanan sa Simbahan. Dayon hangyoa ang mga estudyante nga hilum nga mobasa sa Doktrina ug mga Pakigsaad 35:20–23, nga mangita sa piho nga mga katungdanan nga gitawag sa Ginoo si Sidney Rigdon aron ipabuhat.

Unsa ang pipila ka mga katungdanan nga gitawag sa Ginoo si Sidney Rigdon aron ipabuhat?

Ipasabut nga usa sa mga katungdanan ni Sidney mao ang mahimong tigsulat alang ni Joseph Smith. Ang mga nag-unang tigsulat ni Joseph, si Oliver Cowdery ug John Whitmer, gitawag nga magmisyon. Ang paghubad sa Basahon ni Mormon nakompleto na niining higayuna, apan ang Ginoo misugo ni Joseph sa pagpahiuli o usabon ang mga porsyon sa King James Version nga Biblia nga nangawala o giusab. Si Joseph nagkinahanglan og tigsulat sa pagtabang niini nga buhat. (Tan-awa sa Giya ngadto sa mga Kasulatan, “Hubad ni Joseph Smith.”)

Dapita ang usa ka estudyante sa pagbasa og kusog sa Doktrina ug mga Pakigsaad 35:24–25. Hangyoa ang klase sa pagsunod, nga mangita sa mga panalangin nga gisaad sa Ginoo kang Sidney kon iyang tumanon ang mga pakigsaad nga iyang gihimo uban sa Ginoo. Mahimo nimong isugyot nga markahan sa mga estudyante kon unsay ilang makit-an.

Unsa kaha ang gipasabut nga ang Ginoo mouyog sa kalangitan alang sa inyong kaayohan? (Usa ka posible nga kahulugan mao nga ang Ginoo mopadala sa mga panalangin ug gahum sa langit aron sa pagtabang kanato sa pagtuman sa Iyang buhat ug sa pagbuntog sa dautan. Tan-awa usab sa D&P 21:6.)

Dapita ang mga estudyante sa pag-summarize niini nga mga bersikulo pinaagi sa pag-ila og usa ka baruganan kon sa unsang paagi nga mahimo kitang magmalampuson sa pagtuman sa buhat nga giandam sa Dios alang kanato. Bisan tuod ang mga estudyante mahimong mohugpong sa mga pulong niini sa lahi nga paagi, ang ilang mga tubag kinahanglang magpakita sa mosunod nga baruganan: Samtang kita mosunod sa mga sugo ug motuman sa atong mga pakigsaad, ang Ginoo motabang kanato sa pagtuman sa Iyang buhat. Isulat kini nga baruganan diha sa pisara.

Idirekta ang atensyon sa mga estudyante ngadto sa tulo ka kamatuoran nga gisulat sa pisara:

Ang Ginoo nakaila kanato ug adunay ipabuhat sa matag usa kanato.

Ang Dios mitawag niadtong mga mahuyang aron sa pagtuman sa Iyang buhat pinaagi sa gahum sa Iyang Espiritu.

Samtang kita mosunod sa mga sugo ug motuman sa atong mga pakigsaad, ang Ginoo motabang kanato sa pagtuman sa Iyang buhat.

Sa unsang paagi ang tulo ka kamatuoran sa pisara may kalabutan sa usag usa?
Kanus-a man kamo (o inyong kaila) nakadawat sa tabang sa Ginoo samtang nagtinguha sa pagtuman sa Iyang buhat?

Sa pagtapos, dapita ang usa ka estudyante sa pagbasa og kusog sa Doktrina ug mga Pakigsaad 35:26–27.

Base sa unsay inyong nakat-unan diha sa Doktrina ug mga Pakigsaad 35, unsa kaha ang mga rason ni Sidney Rigdon ug Joseph Smith aron mopataas sa ilang mga kasingkasing ug magmaya?

Dapita ang mga estudyante sa pagpakigbahin sa ilang mga rason nga mopataas sa ilang mga kasingkasing ug magmaya. Mahimo nimong idugang ang imong pagpamatuod sa kaandam sa Ginoo sa pagtabang kanato sa atong mga paningkamot sa pagtabang sa Iyang buhat.

Komentaryo ug Background nga Impormasyon

Doktrina ug mga Pakigsaad 35:3–4. “Ako … nag-andam kanimo alang sa mahinungdanon nga buhat”

Si Elder Dallin H. Oaks sa Korum sa Napulog Duha ka mga Apostoles namulong sa kaimportante sa pagdawat sa mga plano sa Ginoo alang sa atong kinabuhi:

“Ang hugot nga pagtuo ug pagsalig sa Ginoo naghatag kanato sa kalig-on nga modawat ug mopadayon, bisan unsay mahitabo sa atong kinabuhi. …

“… Ayaw pagsalig sa pagplano sa matag hitabo sa inyong kinabuhi—bisan sa matag importante nga hitabo. Pangandam nga modawat sa plano sa Ginoo ug sa kabubut-on sa uban sa mga butang nga dili kapugngan nga makaapekto kaninyo. Pagplano, siyempre, apan ipahimutang ang inyong pagplano sa personal nga mga pasalig nga motabang ninyo bisan unsa pay mahitabo. I-establisar ang inyong kinabuhi sa mahangturong mga baruganan, ug buhata kana nga mga baruganan bisan unsa pa ang mga sirkumstansya ug bisan unsa pa ang gibuhat sa uban. Dayon makapaabut kamo sa panahon sa Ginoo ug makasiguro sa sangputanan sa kahangturan” (“Timing,” Ensign, Okt. 2003, 17).

Doktrina ug mga Pakigsaad 35:13–14. “Ang mahuyang nga mga butang sa kalibutan”

Si Presidente Boyd K. Packer mitudlo:

“Ang Simbahan walay binayran nga propesyonal nga kaparian. Ang mga tawo gikan sa kongregasyon mao ang mga gipangtawag ngadto sa mga katungdanan sa pagpangulo sa tibuok kalibutan. …

“Ang tanan nga gihimo sa Simbahan—ang pagpangulo, ang pagtudlo, ang pagtawag, ang pag-ordinar, ang pag-ampo, ang pagkanta, ang pag-andam sa sakrament, ang pagtambag, ug ang tanan—gihimo sa ordinaryo nga mga miyembro, ‘ang mahuyang nga mga butang sa kalibutan’” (“Ang Huyang ug ang Yano sa Simbahan,” Liahona, Nob. 2007, 6–7).

Si Elder Joseph B. Wirthlin sa Korum sa Napulog Duha ka mga Apostoles mitanyag sa mosunod nga pag-awhag niadtong mobati nga dili angayan kaayo o gikapoy sa pag-abag sa buhat sa Ginoo:

“Alang kaninyo nga mga miyembro sa Simbahan nga mag-ukon-ukon tungod sa mga pagbati nga dili angay, ako mohangyo kaninyo sa pagpadayon sa paglakang sa unahan. Bisan kon mobati kamo nga ang inyong kusog makadugang ra og gamay, ang Simbahan nagkinahanglan kaninyo. Ang Ginoo nagkinahanglan kaninyo. Hinumdumi nga ang Ginoo kanunay mopili sa ‘mahuyang nga mga butang sa kalibutan’ aron matuman ang Iyang mga katuyoan. [D&P 1:19.]

“Sa tanan nga gikapoy, himoa nga ang makahupay nga mga pulong sa Manluluwas molipay kaninyo: ‘Umari kanako, kamong tanan nga nabudlay ug nabug-atan, ug papahulayon ko kamo.’ [Mateo 11:28.] Mosalig kita niana nga saad. Ang gahum sa Dios makapuno sa atong mga espiritu ug mga lawas uban sa kusog ug kalagsik. Ako moawhag kaninyo sa pagpangita niini nga panalangin gikan sa Ginoo.

“Paduol ngadto Kaniya, ug Siya mopaduol diha kaninyo, kay Siya misaad nga ‘kadtong nagahulat sa Ginoo magabag-o sa ilang kusog; sila manlupad pinaagi sa mga pako ingon sa mga agila; sila manalagan, ug dili makapuyan; sila manlakaw ug dili mangaluya.’ [Isaias 40:31.] …

“Hinumdumi, usahay kadtong kinsa mosugod nga pinakahinay motapos nga pinakalayo” (“Kahingawa alang sa Usa,” Liahona, Mayo 2008, 18–19).

Doktrina ug mga Pakigsaad 35:13–14. “Ako mobakus sa ilang mga bat-ang”

Si Presidente Thomas S. Monson mitudlo nga ang Ginoo motabang kanato sa pagtuman sa Iyang buhat:

“Pipila kaninyo tingali may kinaiya nga maulawon o maghunahuna nga ang inyong mga kaugalingon may kakulang sa pagbuhat sa usa ka calling. Hinumdumi nga kini nga trabaho dili lamang inyo ug ako. Trabaho kini sa Ginoo, ug kon kita anaa sa buluhaton sa Ginoo, may katungod kita sa panabang sa Ginoo.” Hinumdumi nga ang Ginoo mohulma sa bukobuko aron maplastar ang palas-anon nga ibutang niini” (“Sa Pagkat-on, sa Pagbuhat, sa Pagkahimo,” Liahona, Nob. 2008, 62).

Doktrina ug mga Pakigsaad 35:19, 22. “Bantayi siya … , pabilin uban kaniya, … ayaw siya og isalikway”

Ang Ginoo misugo ni Sidney Rigdon nga “bantayi [si Joseph Smith],” nga “[mag]pabilin uban kaniya”, ug “ayaw siya og isalikway” (D&P 35:19, 22). Bisan tuod nga si Sidney mibiya sa Simbahan human sa pagkamartir ni Joseph Smith, kanunay siya nga nagmatinud-anon sa dihang buhi pa ang Propeta. Makugihon ug matinud-anon siya nga lider sa Simbahan, ang bugtong nga magtatambag sa Unang Kapangulohan kinsa miserbisyo sa tibuok nga pagpangalagad ni Joseph Smith isip Presidente sa Simbahan. Si Sidney miantus og makalilisang nga kalisdanan diha sa kiliran sa Propeta, ug nakatagamtam siya og mahinungdanon nga espirituhanong mga pagpakita uban sa Propeta.

Doktrina ug mga Pakigsaad 35:20. Ang Hubad ni Joseph Smith sa Biblia

“Ang mga kasulatan ihatag, gani ingon nga [kini] anaa sa akong kaugalingon nga dughan” (D&P 35:20). Kini nga tudling nagpasabut nga ang buhat ni Joseph Smith sa dinasig nga paghubad sa Biblia mosobra pa kay sa pagpahiuli lang sa orihinal nga mga teksto sa Biblia. Hinoon, ang teksto sa biblia kinahanglang mosulti sa mensahe nga maoy tuyo sa Ginoo Mismo nga ihatag niini. Isip resulta, si Joseph wala lamang mokoriher o mousab sa teksto sa biblia, apan gidasig usab siya nga modugang sa unsay orihinal nga naapil, nga naghatag kanato og mas kompleto nga pagsabut sa mga kamatuoran nga gitinguha sa Ginoo nga atong masabtan.

Doktrina ug mga Pakigsaad 35:23. “Motawag sa balaan nga mga propeta aron sa pagpamatuod sa iyang mga pulong”

Si Sidney Rigdon usa ka sinati nga tigsangyaw nga adunay maayo nga kahibalo mahitungod sa Biblia. Ang Ginoo misugo kaniya sa paggamit niini nga mga gasa sa pagsangyaw sa gipahiuli nga ebanghelyo ug sa paggamit sa mga pagtulun-an sa biblikanhong mga propeta sa pagsuporta sa mga pulong ni Joseph.