Doktrina ug mga Pakigsaad 25

Pasiuna

Ang pagpanggukod batok ni Propeta Joseph Smith ug sa mga miyembro sa Simbahan ni Jesukristo mipadayon panahon sa ting-init sa 1830. Ang asawa ni Joseph nga si Emma gibunyagan sa Hunyo 28, apan ang pagpanggukod sa mga miyembro milangay sa iyang kumpirmasyon hangtud sa Agosto 1830. Sa ulahing bahin sa Hunyo, human sa bunyag apan sa wala pa ang kumpirmasyon ni Emma, nadawat ni Joseph ang pinadayag sa Doktrina ug mga Pakigsaad 25. Diha niini, ang Ginoo mihatag ni Emma og mga pulong sa kahupayan ingon man usab mga instruksyon kabahin sa iyang mga responsibilidad sa pamilya ug sa Simbahan.

Mga Sugyot alang sa Pagtudlo

Doktrina ug mga Pakigsaad 25:1–3

Ang Ginoo mitawag kang Emma Smith isip pinili nga babaye

Sa dili pa magklase, pagdapit og tulo ka mga estudyante nga i-pamilyar ang ilang mga kaugalingon sa mosunod nga mga summary sa kinabuhi ug kinaiya ni Emma Smith, asawa ni Propeta Joseph. Sugdi ang klase pinaagi sa pagdapit niining tulo ka mga estudyante sa pagsulti sa klase unsay ilang nakat-unan mahitungod ni Emma Smith. Mahimo ka nga mo-display og litrato ni Emma Smith (Libro sa mga Hulagway sa Ebanghelyo [2009], nu. 88; tan-awa usab sa LDS.org).

Mitabang si Emma ni Joseph Smith sa panahon sa paghubad sa Basahon ni Mormon.

Wala madugay human naminyo si Emma Hale kang Joseph Smith, si anghel Moroni misulti kang Joseph nga miabut na ang panahon nga iyang madawat ang bulawang mga palid. Sayo sa buntag sa Septyembre 22, 1827, si Joseph ug Emma nagkuyog og sakay sa karwahe padulong sa Bungtod sa Cumorah, diin didto gidawat ni Joseph ang mga palid. Tungod sa pagpanggukod sa New York, si Joseph ug Emma mibalhin dayon ngadto sa Harmony, Pennsylvania, diin sa kadugayan nakapalit sila og yuta gikan sa mga ginikanan ni Emma. Didto sa Harmony, ang Propeta misugod sa paghubad sa mga palid. Sulod sa mubong panahon, si Emma maoy tigsulat samtang naghubad si Joseph. Hangtud niining puntoha, si Joseph gisugo nga dili gayud ipakita ang mga palid ni bisan kinsa, bisan gani ni Emma. Bisan tuod nakaobserbar si Emma sa mga palid nga naa ibabaw sa lamesa nga gitabunan og lino nga panapton, wala gayud niya gitukas ang panapton aron motan-aw niini.
Nakasinati si Emma og trahedya, kasakit, ug pagpanggukod.

Samtang nagpuyo sa Harmony, Pennsylvania, si Emma nanganak og usa ka lalaki nga ginganlan og Alvin nga wala mabuhi og dugay. Si Emma mismo grabe nga nasakit, ug nahadlok si Joseph nga basin mamatay siya. Sa dihang naayo na siya, nadunggan niya ang makapaguol nga balita nga ang 116 ka hinubad nga mga pahina sa manuskrito giwala sa higala ni Joseph nga si Martin Harris. Bisan sa iyang luya nga panglawas, gihupay ni Emma ang iyang magul-anong bana, kinsa nawad-an sa gahum sa paghubad. Magkauban, gihulat nila ang kabubut-on sa Ginoo alang sa paghubad sa mga palid. Sa kadugayan napugos siya sa pagbiya sa iyang panimalay sa Harmony tungod sa mga pagpanghulga sa dautang mga tawo.
Sa adlaw nga si Emma gibunyagan, si Joseph gidakop.

Sa Hunyo 1830, si Joseph ug ang gamay nga pundok sa mga tumutuo mihimo og dam sa usa ka sapa duol sa Colesville, New York, aron makahimo og igong gilawumon sa tubig nga makapahigayon og mga bunyag. Hinoon, usa ka panon sa manggugubot mibungkag sa dam sa wala pa makapahigayon og mga bunyag. Pagkasunod adlaw, gitukod og balik sa mga Santos ang dam ug mipahigayon og bunyag alang sa 13 ka tawo, lakip ni Emma Smith. Nianang gabhiona, sa wala pa mapahigayon ang mga kumpirmasyon, gidakop si Joseph sa pasangil nga “badlungon nga tawo” (History of the Church, 1:88). Gikasuhan siya ug gihukman nga walay sala, apan diha-diha dayon human sa husay gidakop na usab siya sa samang pasangil sa usa ka konstable [polis] nga gikan sa silingan nga dapit. Gibuhian na usab siya. Tungod sa padayon nga oposisyon sa ilang misyonaryo nga mga paningkamot, ang mga miyembro sa Simbahan napugos sa paglangay sa ilang mga tigum sa pagkumpirma. Si Emma wala makumpirmahi nga miyembro sa Simbahan ug wala mahatagi sa gasa sa Espiritu Santo hangtud sa sayong bahin sa Agosto. Sa ulahing bahin sa Hunyo, human sa bunyag apan sa wala pa ang kumpirmasyon ni Emma, si Joseph nakadawat og pagpadayag nga gitumong ngadto kang Emma, nga karon narekord diha sa Doktrina ug mga Pakigsaad 25.

Unsay imong madayeg ni Emma Smith samtang nasayud ka mahitungod sa iyang mga kasinatian?

Hangyoa ang mga estudyante nga hilum nga mobasa sa Doktrina ug mga Pakigsaad 25:1–3, nga mangita sa mga pulong nga tingali nakahupay ni Emma. Dapita ang pipila ka estudyante sa pag-report sa unsay ilang nakit-an ug ipasabut nganong gihunahuna nila nga kadto nga mga pulong tingali nakahupay kaniya.

Sa unsa nga paagi ang pagkasayud nga kamo anak nga lalaki o anak nga babaye diha sa gingharian sa Ginoo motabang kaninyo sa lisud nga mga panahon?
Unsa ang gisaad sa Ginoo ni Emma kon siya magmatinud-anon ug “maglakaw sa mga agianan nga maligdong”?
Unsa kaha ang gipasabut nga “maglakaw sa mga agianan nga maligdong”? Sa unsang paagi ang usa ka tawo mapanalipdan pinaagi sa paglakaw sa mga agianan nga maligdong?

Dad-a ang atensyon sa mga estudyante ngadto sa mga pulong nga “pinili nga babaye” sa Doktrina ug mga Pakigsaad 25:3. Mahimo nimong isugyot nga ilang markahan kini nga mga pulong. Ipasabut nga sa diha nga ang Relief Society giorganisar niadtong 1842 (sobra usa ka dekada human kini nga pagpadayag gihatag), si Emma Smith gitawag nga mahimong unang presidente sa organisasyon. Niini nga okasyon, gibasa ni Propeta Joseph Smith ang pinadayag nga gilakip sa Doktrina ug mga Pakigsaad 25. Dayon iyang gipasabut nga si Emma “pinili” tungod kay siya “gipili ngadto sa usa ka piho nga buhat … ug nga ang pinadayag natuman pinaagi sa [iyang] pagkapili ngadto sa Kapangulohan sa Kapunongan, diin siya gisugo nang daan sa pagpatin-aw sa mga Kasulatan” (sa History of the Church, 4:552–53).

Doktrina ug mga Pakigsaad 25:4–16

Si Emma Smith nakadawat og tambag kalabut sa iyang mga katungdanan sa pamilya ug sa Simbahan

Isulat ang mosunod nga mga pulong sa pisara ug dapita ang mga estudyante sa pagkopya niini diha sa ilang mga class notebook o scripture study journal:

Tambag	Calling	Saad

Dapita ang mga estudyante nga hilum nga mobasa sa Doktrina ug mga Pakigsaad 25:4–16 ug mangita og mga pulong o mga ideya nga may kalabutan sa tulo ka mga kategoriya nga gisulat sa pisara. (Mahimo nila kining buhaton sa tagsa-tagsa o nga adunay pares.) Hangyoa sila sa pagsulat sa unsay ilang nakit-an ubos sa tukma nga kategoriya. (Sama pananglit, diha sa bersikulo kwatro, ang instruksyon sa Ginoo alang kang Emma nga “ayaw pagmulo” tungod kay wala siya makakita sa mga palid mabutang sa kategoriya nga tambag.) Human sa igong panahon, i-assign ang mga estudyante sa gagmay nga grupo nga maghisgot sa mosunod nga mga pangutana. Mahimo nimong isulat ang mga pangutana diha sa pisara o andama kini isip mga handout alang sa matag grupo. Mahimo ka usab nga mo-assign og lider sa diskusyon sa matag grupo aron mangutana ug moawhag sa pag-apil sa matag estudyante.

Hain nga mga pulong o mga ideya nga inyong nailhan nagpakita nga ang Ginoo nakaila ug nahigugma ni Emma Smith? Ipasabut kon sa unsang paagi ang matag hugpong sa mga pulong o ideya ebidensya sa gugma sa Ginoo.
Ang Doktrina ug mga Pakigsaad 25:16 naglangkob sa pamahayag sa Ginoo nga gituyo Niya nga ang mga tambag ug mga saad niini nga seksyon magamit usab ngari kanato. Unsa ang pipila ka mga leksyon nga inyong nakat-unan gikan sa mga pulong sa Ginoo ngadto ni Emma? (Samtang imong ilhon kini nga mga kamatuoran, isulat kini.)

Human ang mga grupo maghisgot sa ilang mga tubag niini nga mga pangutana, hangyoa sila sa pag-report ngadto sa klase sa mga baruganan nga ilang nahibaloan sa Doktrina ug mga Pakigsaad 25:4–16. Ang ilang mga tubag mahimong maglakip sa pipila o tanan sa mosunod (bisan kon mahimong lahi ang pagkahan-ay sa mga pulong):

Kinahanglang atong isalikway ang mga butang sa kalibutan ug magtinguha nianang mahangturon.

Samtang mosimba kita sa Ginoo pinaagi sa matarung nga mga musika, Siya mopanalangin kanato.

Makakaplag kita og kalipay ug kahupayan sa paghupot sa mga pakigsaad nga atong gihimo uban sa Dios.

Kon mosunod kita sa mga sugo sa Dios kanunay, makadawat kita og korona sa pagkamatarung.

Samtang ang mga estudyante mo-report sa mga kamatuoran nga ilang nailhan, hisguti ang ilang mga tubag ngadto sa klase. Sunda ang direksyon sa Espiritu samtang modapit ka og mga estudyante sa pagpasabut sa unsay ilang nakit-an ug pagpaambit og mga panabut ug mga ehemplo. Ang mga pangutana ug mga instruksyon sa ubos mahimong makatabang samtang imong pangulohan kini nga diskusyon.

Kinahanglang atong isalikway ang mga butang sa kalibutan ug magtinguha nianang mahangturon (tan-awa sa D&C 25:10).

Sa unsang paagi kaha ang tambag nga unahon ang mahangturon nga mga butang kay sa mga butang niini nga kalibutan makatabang kang Emma, ilabi na isip asawa ni Joseph Smith? (Tingali makatabang ang pagpasabut nga si Emma Hale nagtubo sa usa ka mauswagon nga panimalay apan, human maminyo, kasagaran nagpuyo sa hilabihan ka kabus nga kahimtang.)
Sa unsang paagi ang tambag nga unahon ang mahangturong mga butang kay sa mga butang sa kalibutan makatabang kanato karon?
Unsa ang pipila ka mga butang sa kalibutan nga sagad unahon sa mga tawo kay sa Dios?
Unsay atong mabuhat sa pagtinguha sa mga butang nga mahangturon?

Dapita ang mga estudyante sa pagpamalandong kon giuna ba nila ang kalibutanong mga butang kay sa Dios.

Kon kita mosimba sa Ginoo pinaagi sa matarung nga mga musika, Siya mopanalangin kanato (tan-awa sa D&P 25:12).

Sumala niini nga bersikulo, unsa ang usa ka butang nga gikahimut-an sa Ginoo? Unsay Iyang gisulti mahitungod sa mga panalangin nga moabut pinaagi sa “awit sa mga matarung”?
Unsa nga mga panalangin ang inyong nadawat isip resulta sa pagsimba sa Ginoo pinaagi sa angay nga mga musika?

Ikonsiderar ang pagdapit sa mga estudyante sa paghimo og tumong nga maminaw sa takus ug angay nga musika. Awhaga sila sa pagpaabut sa mga panalangin nga moabut samtang ilang kab-uton kini nga tumong.

Makakaplag kita og kalipay ug kahupayan sa paghupot sa mga pakigsaad nga atong gihimo uban sa Dios (tan-awa sa D&P 25:13).

Mahimo nimong ipasabut nga ang mga pulong nga “hupot ngadto sa pakigsaad” nagpasabut nga mosunod og maayo o monunut sa mga saad nga atong gihimo uban sa Dios.

Paghunahuna og tawo nga imong nailhan nga nagpabiling matinud-anon sa iyang mga pakigsaad, bisan sa lisud nga mga panahon.

Sa unsang paagi kana nga pagkamatinud-anon usa ka panalangin diha kaniya?
Kanus-a kamo napanalanginan tungod kay nagmatinud-anon kamo sa mga pakigsaad nga inyong gihimo?

Dapita ang mga estudyante sa paghunahuna kon sa unsang paagi sila mopataas sa ilang mga kasingkasing ug magpabiling matinuuron sa ilang mga pakigsaad.

Kon kita mosunod sa mga sugo sa Dios kanunay, makadawat kita og korona sa pagkamatarung (tan-awa sa D&P 25:15).

Ipasabut nga ang mga pulong nga “ang korona sa pagkamatarung ikaw makadawat” nagpasabut sa pagdawat sa kahimayaan sa celestial nga gingharian (tan-awa usab sa D&P 29:13).

Sa unsang paagi kini nga saad makatabang sa usa ka tawo nga nakasinati o nag-atubang og malisud nga mga panahon?
Nganong importante man nga magmasulundon kanunay ug dili lamang matag karon ug unya?

Dapita ang mga estudyante sa pagpamalandong kon sa unsang paagi sila makapalambo nga magmasulundon kanunay. Mahimo nimo silang awhagon sa pagsulat sa ilang mga hunahuna diha sa ilang mga class notebook o scripture study journal.

Human nimo mahisguti kini nga mga kamatuoran gikan sa Doktrina ug mga Pakigsaad 25 ngadto sa klase, dapita ang mga estudyante nga mainampuong ikonsiderar ug isulat ang unsay ilang gibati nga gusto sa Ginoo nga ilang buhaton base sa unsay ilang nakat-unan sa klase karon. Awhaga sila nga lihukon kini nga mga impresyon.

Dugang nga mga Ideya sa Pagtudlo

Doktrina ug mga Pakigsaad 25. Pagdapit og mga bisita sa klase

Aron malakip ang mga pagpamatuod ug kasinatian sa hamtong nga mga babaye niini nga leksyon, ikonsiderar ang paggamit sa mosunod nga mga ideya sa pagtudlo:

Uban sa pagtugot sa mga lider sa priesthood nga responsable alang sa seminary sa inyong dapit, dapita ang pipila ka tinahud nga mga sister gikan sa imong branch, ward o stake nga motambong sa klase ug ipresentar ang summary kabahin ni Emma Smith sa pagsugod sa leksyon. Mahimo ka usab nga mokonsiderar og laing mga paagi sa paglakip kanila sa tibuok leksyon. Sama pananglit, mahimo nimo silang hangyoon sa pagpaambit sa ilang mga pagpamatuod sa mga baruganan nga gitudlo diha sa Doktrina ug mga Pakigsaad 25.

Doktrina ug mga Pakigsaad 25. Pagpasalida sa video—“Emma Smith Follows the Lord’s Counsel”

Aron matabangan ang mga estudyante nga makasabut sa konteksto sa tambag sa Ginoo ngadto kang Emma Smith diha sa Doktrina ug mga Pakigsaad 25 ug sa pagpakita sa iyang tubag niini, ipakita sa mga estudyante ang video nga “Emma Smith Follows the Lord’s Counsel.” Ang video mahimong gamiton sa pag-ilis sa mga summary kabahin ni Emma nga makita sa sinugdanan sa leksyon. O, aron sa pagpasabut og maayo sa personal nga kinaiya sa tambag sa Ginoo ngadto kang Emma Smith, mahimo nimong ipasalida kini nga video human makabasa ang mga estudyante sa Doktrina ug mga Pakigsaad 25:4–16. Kini nga video makita sa Doctrine and Covenants and Church History Visual Resource DVDs ug sa LDS.org.

Doktrina ug mga Pakigsaad 25:1–3. Pagpasalida sa video—“An Elect Lady”

Aron mahatagan ang mga estudyante og usa ka summary sa kinabuhi ni Emma Smith ug sa pagpakita sa iyang kalig-on, ipakita sa mga estudyante ang video nga “An Elect Lady.” Mahimo nimong gamiton kini nga video human ang mga estudyante makatuon ug makahisgut sa Doktrina ug mga Pakigsaad 25:1–3. Sa dili pa nimo ipasalida kini nga video, dapita ang mga estudyante sa pagpamalandong kon sa unsang paagi ang “pinili” nga mga babaye nga ilang nailhan nakaimpluwensya sa ilang mga kinabuhi. Mahimo usab nimong awhagon sila sa pagkonsiderar kon sa unsang paagi ang tambag diha sa Doktrina ug mga Pakigsaad 25 tingali nakahatag og kahupayan ni Emma Smith sa panahon sa mga kalisdanan nga iyang nasinati. Kini nga video makita sa Doctrine and Covenants and Church History Visual Resource DVDs ug sa LDS.org.

Ang pasidungog ni Lucy Mack Smith ngadto ni Emma Smith

Ikonsiderar ang pagtapos sa klase pinaagi sa pagbasa sa mosunod nga summary sa pipila ka mga pagsulay ni Emma Smith ingon man usab sa pasidungog ni Lucy Mack Smith kaniya:

Sulod sa katuigan, si Emma Smith nawad-an og unom ka mga anak tungod sa kamatayon ug miantus og walay hunong nga pagpanggukod uban sa iyang bana. Gilungkab ang iyang balay, nawad-an siya og kapuy-an pipila ka higayon, ug kanunay nga kinahanglan siyang mosalig sa pagkamabination sa uban aron makaangkon sa mga kinahanglanon sa kinabuhi. Sa kadugayan, bisan ang iyang pinalangga nga si Joseph gikuha gikan kaniya ug bangis nga gipatay. (Alang sa dugang impormasyon kabahin sa mga anak ni Emma, bisitaha ang Joseph Smith Papers website: http://josephsmithpapers.org/back/joseph-smith-pedigree-chart).

Ang ugangan nga babaye ni Emma Smith, si Lucy Mack Smith, misulat sa mosunod mahitungod kaniya:

“Wala ko sukad makakita og babaye sa akong kinabuhi, kinsa molahutay sa tanang matang sa kakapoy ug kalisdanan, matag bulan, ug matag tuig, uban nianang dili mapaling nga kaisug, kadasig, ug pailub, nga kanunay niyang gibuhat; kay nasayud ko sa iyang gisagubang—nabutang siya sa mga sitwasyon nga dili sigurado ang sangputanan— milahutay siya sa kalisdanan sa pagpanggukod, ug misukol sa kasilag sa mga tawo ug sa yawa, nga makapahugno na sa hapit bisan kinsang babaye. Posible, nga daghan tingali ang makasugat og susama niini—mag-ampo ko sa Dios, nga dili kini mahitabo; apan, kon mahitabo man gani, hinaut mahatagan sila og grasya sumala sa ilang panahon, sama nga maoy nahitabo kaniya” (History of Joseph Smith by His Mother, ed. Preston Nibley [1958], 190–91).