Leksyon 60
Doktrina ug mga Pakigsaad 56
Pasiuna
Si Ezra Thayre gisangunan nga mopuyo ug magtrabaho, kauban ni Joseph Smith Sr., sa umahan ni Frederick G. Williams didto sa Kirtland, Ohio. Si Brother Thayre mitabang usab sa pagbayad sa ubang utang tungod sa yuta. Sa sayong bahin sa Hunyo 1831, siya ug si Thomas B. Marsh gitawag aron magmisyon ngadto sa Missouri (tan-awa sa D&P 52:22). Tungod sa garbo ug pagkahakog, dili andam si Brother Thayre nga mobiya uban ni Brother Marsh. Sa pagpadayag nga narekord diha sa Doktrina ug mga Pakigsaad 56, nga nadawat niadtong Hunyo 15, gibakwi sa Ginoo ang pagtawag ni Brother Thayre ug misangon og bag-ong kompanyon alang ni Brother Marsh. Mipasidaan ang Ginoo batok sa garbo ug mitudlo sa mga Santos nga Siya dunay giandam nga mas daghan pa alang kanila kay sa yuta ug kwarta.
Mga Sugyot alang sa Pagtudlo
Doktrina ug mga Pakigsaad 56:1–13
Gibakwi sa Ginoo ang pagtawag sa misyon ni Ezra Thayre ug gipasidan-an siya nga maghinulsol
Pangutan-a ang mga estudyante kon aduna ba silay nailhan nga tawo kinsa gibiyaan ang importanting butang aron sa pagsunod sa usa sa mga sugo sa Ginoo. (Ang mga pananglitan mahimong maglakip sa usa ka tawo nga nagsakripisyo aron magpasakop sa Simbahan, sa pag-adto sa misyon, o pagsunod sa usa ka piho nga sumbahanan sa Simbahan.) Dapita ang pipila ka estudyante sa pagpakigbahin sa ilang mga ehemplo.
Ipasabut nga pagka-Hunyo 1831, gitawag sa Ginoo si Ezra Thayre nga moserbisyo og misyon sa Missouri uban ni Thomas B. Marsh. Ang mga kabalaka ni Brother Thayre bahin sa kabtangan ug kwarta maoy hinungdan nga dili siya andam nga mobiya sa dihang si Brother Marsh andam na, mao nga si Brother Marsh miadto ni Joseph Smith aron mangutana kon unsay buhaton. Sa dihang ang Propeta nangutana sa Ginoo, ang Ginoo mitubag niya pinaagi sa pagpadayag nga narekord diha sa Doktrina ug mga Pakigsaad 56.
Dapita ang usa ka estudyante sa pagbasa og kusog sa Doktrina ug mga Pakigsaad 56:1–2. Hangyoa ang klase sa pagsunod, nga mangita kon unsay gisulti sa Ginoo niadtong mobalibad sa pagsunod sa Iyang mga sugo.
-
Unsay gisulti sa Ginoo bahin sa mga tawo nga mibalibad sa pagsunod sa Iyang mga sugo?
Isulat sa pisara ang mosunod nga dili kompleto nga pamahayag: Aron maluwas, kinahanglan kita nga …
Dapita ang mga estudyante sa pagkompleto sa pamahayag sumala sa bersikulo 2. Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Aron maluwas, kinahanglan kita nga mopas-an sa atong krus, mosunod sa Manluluwas, ug motuman sa Iyang mga sugo. (Kompletuha ang baruganan diha sa pisara.)
-
Unsa kaha ang gipasabut sa “mopas-an sa [atong] krus”? (Aron matabangan ang mga estudyante nga makasabut niining mga pulong, mahimo nimo silang dapiton sa pagbasa sa Hubad ni Joseph Smith sa Mateo 16:24, nga makita diha sa Matthew 16:24, footnote e)
-
Unsa nga mga sugo ang nahatag sa Ginoo nga nagkinahanglan nga kamo mopas-an sa inyong mga krus ug magsakripisyo aron mahimong masulundon? (Ang ubang mga ehemplo makita diha sa Alang sa Kalig-on sa mga Kabatan-onan.)
-
Unsa nga mga panalangin ang inyong nadawat o inyong madawat tungod kay mipili kamo nga magmasulundon?
Ipangutana kon sa unsang mga paagi nga ang mga tawo sa mosunod nga mga ehemplo makapas-an sa ilang mga krus ug makasunod sa mga sugo sa Ginoo:
-
Usa ka batan-ong lalaki hapit na moabut sa pangidaron nga siya makahimo na sa pagserbisyo og misyon. Nabalaka siya bahin sa tanang butang nga iyang biyaan kon siya moserbisyo.
-
Usa ka batan-ong babaye nahibalo nga ang mga batan-on sa iyang ward nga mobisita sa templo sulod sa pipila ka mga bulan, apan siya walay temple recommend. Dunay butang sa iyang kinabuhi karon nga nakapugong niya nga makadawat og usa.
Ipasabut nga kon kita mopili sa dili pagpas-an sa atong krus, mahimong mawala kanato ang mga oportunidad nga mapanalanginan ang uban ug makadawat og mga panalangin sa atong kaugalingon mismo. Dapita ang usa ka estudyante sa pagbasa og kusog sa Doktrina ug mga Pakigsaad 56:3–5. Hangyoa ang klase sa pagpangita kon unsay nahitabo tungod kay si Ezra Thayre dili andam nga moadto sa Missouri. Sa dili pa mobasa ang mga estudyante, mahimo nimong ipasabut nga ang pulong nga nagbakwi nagpasabut nga gibawi o gikanselar.
-
Unsay nawala kang Ezra Thayre tungod kay dili siya andam nga moadto? (Nawala niya ang kahigayunan nga moserbisyo og misyon ingon man usab ang mga panalangin nga moresulta unta.)
-
Sumala sa bersikulo 4, unsa ang mabuhat sa Ginoo sa mga sugo nga Iyang gihatag? (Ang mga estudyante kinahanglang mahibalo sa mosunod nga baruganan: Ang Ginoo makahatag og sugo o makabakwi og sugo sumala sa unsay Iyang nakita nga angay.)
Hangyoa ang mga estudyante kon makahunahuna ba sila og mga ehemplo gikan sa mga kasulatan o sa kasaysayan sa Simbahan bahin sa Ginoo nga naghatag ug dayon nagbakwi og sugo. Ang mosunod mao ang pipila ka ehemplo:
-
Human nga ang Ginoo mitanyag og mas taas nga balaod ngadto kang Moises ug sa iyang katawhan, ang mga anak sa Israel nagmasinupakon ug nagsugod sa pagsimba og bulawan nga baka. Ang Ginoo mihatag dayon kanila og mas ubos nga balaod. (Tan-awa sa Exodo 32–34; Hubad ni Joseph Smith, Exodo 34:1–2; D&P 84:23–27.)
-
Atol sa mortal nga pangalagad sa Manluluwas, gipadala Niya ang mga Apostoles ngadto lamang sa mga sakop sa balay ni Israel (tan-awa sa Mateo 10:5). Wala madugay human sa Pagkabanhaw sa Manluluwas, gisultihan Niya ang mga Apostoles sa pagsangyaw sa ebanghelyo ngadto sa katawhan sa tanang kanasuran (tan-awa sa Mateo 28:19).
-
Niini nga dispensasyon ang Ginoo misugo sa pipila sa unang mga Santos sa paghimo sa dinaghan nga kaminyoon. Si Propeta Joseph Smith ug daghan sa mga lider sa Simbahan nakabantay nga lisud kini nga sugo, apan gituman nila kini. Human makadawat og pinadayag, si Presidente Wilford Woodruff miisyu sa Manifesto, nga gidawat sa Simbahan isip dunay pagtugot ug gikinahanglan niadtong Oktubre 6, 1890. Miresulta kini sa pagtapos sa dinaghan nga kaminyoon diha sa Simbahan (tan-awa sa Opisyal nga Pahayag 1).
I-summarize ang Doktrina ug mga Pakigsaad 56:6–7 pinaagi sa pagpasabut nga ang Ginoo miusab sa mga tawag sa misyon nila ni Selah J. Griffin ug Newel Knight. Pahinumdumi ang mga estudyante nga tungod sa kalisdanan nga nahimo ni Leman Copley sa Thompson, Ohio, ang mga Santos sa Colesville gimanduan nga mobalhin ngadto sa Missouri. Gihangyo nila si Propeta Joseph Smith kon mahimo ba silang mobalhin uban ni Newel Knight nga mangulo nila, sama sa iyang gibuhat sukad nga mibiya sila sa Colesville. Si Newel Knight gitawag nga moserbisyo uban ni Selah J. Griffin sa wala pa kining kalisdanan (tan-awa sa D&P 52:32), mao nga ang Ginoo mimando ni Selah J. Griffin sa paghulip sa dapit ni Ezra Thayre isip kompanyon ni Thomas B. Marsh ug magpabilin si Newel Knight uban sa mga Santos sa Colesville.
Dapita ang usa ka estudyante sa pagbasa og kusog sa Doktrina ug mga Pakigsaad 56:8–11. Hangyoa ang klase sa pagsunod, nga mangita sa unsay gisugo sa Ginoo nga buhaton ni Ezra Thayre human nga gibakwi ang iyang tawag sa misyon.
-
Unsay gisulti sa Ginoo nga mahitabo kon maghinulsol si Ezra Thayre? Unsay mahitabo kon dili siya maghinulsol?
Ipasabut nga gipili ni Ezra nga maghinulsol, ug pito ka bulan human niana gitawag na usab siya nga moserbisyo isip misyonaryo uban ni Thomas B. Marsh (tan-awa sa D&P 75:31).
Doktrina ug mga Pakigsaad 56:14–20
Gipasidan-an sa Ginoo ang mga Santos batok sa kahakog ug mapasigarbuhong mga kasingkasing
Hangyoa ang mga estudyante sa paghunahuna nga aduna silay usa ka higala kinsa nakasala ug lain ang gibati. Ang higala miduol kanila ug nangutana, “Unsay kinahanglan nakong buhaton aron maghinulsol?” Hatagi og panahon ang mga estudyante nga makapamalandong ug makatubag. Human sila makatubag, dapita ang usa ka estudyante sa pagbasa og kusog sa Doktrina ug mga Pakigsaad 56:14–15. Hangyoa ang klase sa pagsunod, nga mangita sa mga kinaiya ug mga aksyon nga nakapugong sa atong mga sala aron mapasaylo.
-
Sumala sa Doktrina ug mga Pakigsaad 56:14–15, unsa nga mga kinaiya ug mga aksyon ang nakapugong sa atong mga sala aron mapasaylo?
-
Unsa kaha ang gipasabut sa mga pulong nga “pagtambag diha sa inyong kaugalingon nga mga paagi”? Unsa ang gisugyot sa mga pulong nga “ang inyong mga kasingkasing wala matagbaw”? (Nagpasabut kini nga dili makontento kon unsay anaa ninyo.)
-
Unsay atong makat-unan gikan sa mga bersikulo 14 ug 15 mahitungod kon unsay gikinahanglan aron makahinulsol ug makadawat og kapasayloan? (Ang mga estudyante mahimong makahibalo og lain-laing mga baruganan, apan siguroa ang paghatag og gibug-aton sa mosunod nga kamatuoran: Ang paghinulsol naglakip sa pagsunod sa tambag sa Ginoo ug pagpalayo gikan sa dili matarung nga mga tinguha.) Mahimo nimong dapiton ang mga estudyante sa pagsulat niining kamatuoran duol sa Doktrina ug mga Pakigsaad 56:14–15.)
-
Ngano nga ang pagkamasulundon ug pagpalayo gikan sa pagkadili matarung gikinahanglan man sa tinuod nga paghinulsol?
Ipasabut nga ang paghinulsol dili lang bahin sa pagsunod og hugpong sa mga lakang apan nagkinahanglan og hingpit nga kausaban sa kasingkasing—usa ka pasalig sa pagsunod sa Ginoo ug pagpalayo gikan sa tanang pagkadili matarung. Sa dihang kini nga pagpadayag nadawat, makita nga ang kahakog ug garbo ni Ezra Thayre nakapugong niya sa pagsunod sa tambag sa Ginoo.
-
Sa unsang paagi nga ang garbo sa usa ka tawo nakaapekto sa iyang abilidad aron makabaton og mahinulsulon nga kasingkasing?
Dapita ang mga estudyante sa pagbasa sa Doktrina ug mga Pakigsaad 56:16–17 nga dunay kauban. Hangyoa ang usa ka kauban sa pagpangita kon sa unsang paagi nga ang usa ka dili mahinulsulon nga kasingkasing makita diha sa tawo nga adunahan. Hangyoa ang laing kauban sa pagpangita kon sa unsang paagi nga ang dili mahinulsulon nga kasingkasing makita diha sa tawo nga kabus. Mahimo nimong isugyot nga ilang markahan kon unsay ilang makit-an. Hangyoa ang mga estudyante sa pagpasabut sa unsay ilang nadiskubrihan ngadto sa ilang mga pares ug dayon hisguti og dungan ang mosunod nga mga pangutana (mahimo nimo kining isulat diha sa pisara):
-
Unsa nga mga pagkapareha ang inyong makita diha sa dili mahinulsulon nga mga kasingkasing sa adunahan ug sa kabus?
-
Nganong ang kahakog komon man nga kinaiya sa adunahan ug sa kabus?
Hangyoa ang mga estudyante sa pagpamalandong kon kanus-a nila nakita kini nga mga kinaiya diha sa kaugalingon nilang kinabuhi o sa kinabuhi niadtong ilang nailhan.
Dapita ang usa ka estudyante sa pagbasa og kusog sa Doktrina ug mga Pakigsaad 56:18. Hangyoa ang klase sa pagsunod, nga mangita sa mga pulong nga naghulagway sa mga kasingkasing niadtong kinsa bulahan.
-
Sumala sa bersikulo 18, unsa man ang angayang mahitabo sa atong kasingkasing? Unsay gipasabut sa pagbaton og masulub-on nga kasingkasing? Unsa man usab ang usa ka mahinulsulon nga espiritu? (Kini nga mga termino nagpasabut og pagkamapainubsanon ug pagnunot ngadto sa Ginoo.)
-
Kon ang atong kasingkasing nahimong hakog o mapasigarbuhon, unsaon man nato sa pag-usab?
Dapita ang mga estudyante nga magpadayon sa pagbasa sa Doktrina ug mga Pakigsaad 56:19–20 kuyog sa ilang mga pares. Hangyoa sila sa pagpangita sa mga panalangin nga gisaad sa Ginoo niadtong adunay mapainubsanon nga kasingkasing. Mahimo nimong isugyot nga ilang markahan kon unsay ilang makit-an.
Isulat sa pisara ang mosunod nga dili kompleto nga pamahayag: Kadtong dunay mapainubsanon nga kasingkasing maka …
-
Sumala sa mga bersikulo 18–20, unsa nga mga panalangin ang mokompleto sa sentence diha sa pisara? (Samtang ang mga estudyante motino sa mga panalangin nga gihisgutan niining mga bersikulo, isulat kini sa pisara. Mahimo nimong ipasabut nga ang pulong nga ganti [recompense] nagpasabut sa mga ganti sa maayong binuhatan ug silot sa dili matarung nga mga lihok.)
Ipasabut nga ubos sa balaod sa pagpahinungod, ang bahin nga ihatag ngadto sa indibidwal o pamilya sumala sa ilang mga kahimtang gitawag og “kabilin” (D&P 57:7). Posible nga atol sa unang pagbuhat niini nga balaod, ang pipila sa mga Santos, sama ni Ezra Thayre, nahimong sobra ra ka matinguhaon nga makadawat sa ilang “kabilin.”
Isulat ang mga pulong nga Akong Kabilin tupad sa mga panalangin nga gilista diha sa pisara.
-
Gikan sa unsay atong gilista, unsaon ninyo pag-summarize ang mga panalangin nga giandam sa Ginoo alang niadtong dunay mapainubsanon nga kasingkasing? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga baruganan: Kadtong dunay mapainubsanon nga kasingkasing makapanunod sa yuta.)
-
Sa unsang paagi nga ikakumpara ang mga panalangin nga gihulagway diha sa mga bersikulo 18–20 sa kabtangan ug kwarta nga gitinguha pag-ayo ni Ezra Thayre ug sa ubang nag-una nga mga Santos?
Ipamatuod ang bahin sa mga panalangin, o “kabilin,” nga giandam sa Ginoo alang kanato samtang kalimtan nato ang pagkadili matarung ug mopasalig nga mosunod sa Iyang mga sugo.
Komentaryo ug Background nga Impormasyon
Doktrina ug mga Pakigsaad 56:2. Pagpas-an sa atong krus ug pagsunod sa Ginoo isip mga misyonaryo
Si Presidente Ezra Taft Benson namulong bahin sa gilauman alang sa mga batan-ong lalaki sa pagsakripisyo kon unsay gikinahanglan aron moserbisyo og misyon:
“Kalabut sa pagserbisyo og misyon, si Presidente [Spencer W.] Kimball miingon, ‘Pagkahakog ug pagkawalay paghunahuna kon ang usa ka batan-ong lalaki mohingkod, mogahin sa iyang panahon sa pagpangandam alang sa buluhaton sa iyang kinabuhi ug sa iyang trabaho ug dili andam nga moserbisyo sa iyang Tiglalang dinhi niini, ang labing importante nga serbisyo sa kalibutan’ (seminar sa mga Regional Representative, 30 Sept. 1977). …
“Mga batan-ong lalaki, kining pamahayag ni Presidente Kimball kinahanglan maoy inyong personal nga motto: “Ang matag LDS nga lalaki kinsa takus ug makahimo kinahanglang magmisyon” (Ensign, Mayo 1974, p. 87). Gihangyo namo kamo nga mohimo sa sakripisyo. Ato kanang gitawag og ingon niana tungod kay kita walay mas maayong ngalan alang niini. Usa kini ka pamuhunan. Apil niini, ang labing mahinungdanon nga pagserbisyo dinhi sa kalibutan. Ayaw paglikay sa responsibilidad. Ayaw paghunahuna og maayo nga mosupak. Gidapit namo kamo nga moapil sa kasundalohan … nga nagkadaghan matag adlaw. Ang inyong trabaho mao ang pagsangyaw sa mensahe sa Pagpahiuli ngadto sa kalibutan. Hibaloi nga kamo aduna sa among pagsalig ug gugma. Gilauman namo kamo nga mohimo niana nga misyon” (“This Is a Day of Sacrifice,” Ensign,Mayo 1979, 33).
Doktrina ug mga Pakigsaad 56:4. Ang Ginoo mosugo ug mobakwi
Si Presidente Boyd K. Packer sa Korum sa Napulog Duha ka mga Apostoles mihatag og mga ideya kon sa unsang paagi nga ang Ginoo usahay mousab sa direksyon nga gihatag ngadto sa Simbahan. Giawhag ni Presidente Packer ang mga miyembro nga mosalig sa proseso sa pagpadayag nga gihatag ngadto sa mga Apostoles ug sa pagdawat sa mga kausaban ug mga pamaagi ingon nga kini gipadayag:
“Ang mga kausaban sa organisasyon o pamaagi usa ka pagpamatuod nga ang pagpadayag nagpadayon. Samtang ang mga doktrina nagpabiling wala mausab, ang mga pamaagi dili. …
“Ang plano sa ebanghelyo gipadayag pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto. Ug nagpadayon kini: ‘Kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.’ (A sa HP 1:9.)
“Dunay mga kausaban nga himuon sa umaabut sama sa nangagi. Mohimo man ang Kaigsoonan og mga kausaban o mosupak niini magdepende gayud sa mga instruksyon nga ilang madawat pinaagi sa agianan sa pagpadayag nga naestablisar na sa sinugdanan.
“Ang mga doktrina magpabilin nga dili mausab, mahangturon; ang organisasyon, mga programa, ug mga pamaagi mausab sigun sa imando Niya kansang simbahan mao kini. …
“Ug sa katapusan, kon unsay ihatag moabut tungod kay ang Ginoo namulong niini, ‘bisan pinaagi sa [Iyang] kaugalingon nga tingog o pinaagi sa tingog sa [Iyang] mga sulugoon, kini managsama ra.’ (D&P 1:38.) Makaila kita sa Iyang tingog kon mamulong Siya” (“Revelation in a Changing World,” Ensign, Nob. 1989, 15, 16).
Doktrina ug mga Pakigsaad 56:14–15. Aron mapasaylo sa sala
Si Elder D. Todd Christofferson sa Korum sa Napulog Duha ka mga Apostoles mihatag og gibug-aton sa mga resulta sa pagsinati og hingpit nga kausaban sa kasingkasing pinaagi sa paghinulsol:
“Ang paghinulsol nagkinahanglan og tinuoray nga katuyoan ug kaandam sa pagpadayon, bisan sa mga kasakit. Ang mga pagsulay sa paghimog listahan sa piho nga mga lakang sa paghinulsol mahimong makatabang sa uban, apan mahimo usab kining mosangput ngadto sa paagi nga wala sa hunahuna, listahan lang sa mga lakang sa paghimo nga walay tinuod nga pagbati o kausaban. Ang tinuod nga paghinulsol dili pagpakaaron-ingnon. …
“Pinaagi sa hugot nga pagtuo sa maloloy-ong Manunubos ug sa Iyang gahum, ang posibleng kawalay paglaum mausab ngadto sa paglaum. Ang kasingkasing ug tinguha sa usa ka tawo mausab, ug ang kanhi makadani nga sala mahimong mag-anam kalaw-ay. Ang desisyon sa pagsalikway ug pagbiya sa sala ug paghiuli, ingon ka hingpit kutob sa mahimo, sa kadaut nga iyang nahimo bation na karon nianang bag-o nga kasingkasing. Kining lig-ong determinasyon sa dili madugay motubo ngadto sa pakigsaad sa pagsunod sa Dios. Human sa paghimo niana nga pakigsaad, ang Espiritu Santo, ang mensahero sa balaang grasya, magdala og kahupayan ug kapasayloan” (“Ang Balaanong Gasa sa Paghinulsol,” Liahona, Nob. 2011, 40).
Doktrina ug mga Pakigsaad 56:19. Ang Ginoo modala og ganti alang sa mapainubsanon og kasingkasing
Ang mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles nagtudlo sa baruganan sa pagbayad, nga nalakip diha sa saad sa ganti gikan sa Manluluwas:
“Ang Ginoo mobalos sa matag matinud-anon sa matag mawala. Nga kana diin gikuha gikan niadtong nahigugma sa Ginoo mahimong idugang ngadto kanila sa Iyang kaugalingong pamaagi. Samtang kini dili moabut sa panahon nga kini atong gitinguha, ang matinud-anon mahimong masayud nga ang matag luha karon sa katapusan mahimong ibalik gatusan pil-a uban sa mga luha sa kalipay ug pasalamat” (“Bisan Unsa ang Mahitabo, ug Dawata Kini,” Liahona, Nob. 2008, 28).