Leksyon 49: Doktrina ug mga Pakigsaad 42:43–93

Leksyon 49

Doktrina ug mga Pakigsaad 42:43–93

Pasiuna

Ang ulahing bahin sa Doktrina ug mga Pakigsaad 42 usa ka pagpadayon sa unsay nailhan isip balaod sa Simbahan. Naglakip kini sa mga pagtulun-an sa Ginoo kalabut sa kamatayon ug sa pagkaayo. Naglangkob usab kini sa tambag sa Ginoo ngadto sa mga Santos mahitungod kon unsaon pagdumala ang bug-at nga mga sala ug mga krimen ug unsaon pag-atiman sa tukmang paagi ang mga sitwasyon kon kita masilo o makapasilo.

Mga Sugyot alang sa Pagtudlo

Doktrina ug mga Pakigsaad 42:43–55

Ang Ginoo mihatag og tambag mahitungod sa kamatayon ug pagkaayo

Sa usa ka kamot, paggunit og garapa o gamay nga sudlanan sa dinihugan nga lana sa oliba alang sa pagpangalagad sa masakiton; sa imong pikas kamot, paggunit og botelya sa tambal.

Unsa ang gamitan niini nga mga item? Hain niini ang atong saligan sa panahon nga masakit?

Human ang mga estudyante mopakigbahin sa ilang mga hunahuna, dapita ang usa ka estudyante sa pagbasa og kusog sa Doktrina ug mga Pakigsaad 42:43–44. Hangyoa ang klase sa pagpangita sa instruksyon sa Ginoo kabahin sa unsay atong masaligan sa mga panahon nga masakit. Aron matabangan ang mga estudyante nga makasabut niining mga bersikulo, mahimong makatabang ang pagpasabut nga ang mga hilba ug humok nga pagkaon nga gihisgutan sa bersikulo 43 nagpasabut sa medikal nga mga pagtambal nga kasagarang idapat atol sa panahon diin kini nga pagpadayag gihatag.

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi nga ang pagkaayo moabut pinaagi sa hugot nga pagtuo ug medikal nga pagtambal.

“Ang mga Santos sa Ulahing mga Adlaw nagtuo sa paggamit sa labing maayo nga syentipikanhon nga kahibalo ug mga pamaagi. Naggamit kita og nutrisyon, ehersisyo, ug uban pang naandang buhaton sa pagreserba sa kahimsug, ug motagana sa kahimsug, ug atong gigamit gilakip ang panabang sa mga healing practioners, sama sa mga doktor ug mga tig-opera, sa pagpahiuli sa atong kahimsug.

“Ang paggamit sa medical science dili sukwahi sa atong mga pag-ampo sa pagtuo ug sa atong pagsalig diha sa mga panalangin sa priesthood. …

“Syempre dili kita maghulat hangtud nga ang tanang mga pamaagi magamit una pa kita mag-ampo inubanan sa pagtuo o mohatag og mga panalangin sa priesthood alang sa pag-ayo. Atol sa emerhensya, ang mga pag-ampo ug mga panalangin mag-una. Sa kasagaran dungan natong gamiton ang tanang mga paningkamot” (“Pag-ayo sa Masakiton,” Liahona, Mayo 2010, 47).

Ngano kaha nga importante man para nato nga mogamit sa pag-ampo ug sa mga panalangin sa priesthood ingon man sa medical nga pagtambal alang sa pag-ayo sa panahon nga masakit?
Sumala sa bersikulo 44, ang tanan bang tawo nga masakit nga makadawat og panalangin sa priesthood mamaayo?

Sultihi ang mga estudyante nga ang Ginoo mipasabut nganong ang uban nga makadawat og mga sa priesthood mahimong dili maulian. Dapita ang usa ka estudyante sa pagbasa og kusog sa Doktrina ug mga Pakigsaad 42:48. Hangyoa ang klase sa pagsunod ug mangita sa mga baruganan nga nagdumala kon ang usa ka tawo mamaayo isip resulta sa panalangin sa priesthood.

Sumala sa bersikulo 48, unsa man ang nag-unang butang nga motino sa resulta sa panalangin sa priesthood? (Samtang motubag ang mga estudyante, mahimo nimong ipasabut nga ang “wala ikatakda ngadto sa kamatayon” nagpasabut sa kamatuoran nga ang kamatayon o pagkaayo mahitabo sumala sa gitakda nga panahon, kaalam, ug kabubut-on sa Ginoo.)
Nganong dili man ang tanan nga nagbaton og hugot nga pagtuo ni Jesukristo ang mamaayo?
Nganong importante ang pagbaton og hugot nga pagtuo sa kabubut-on ug sa panahon sa Dios alang sa matag usa kanato?

Dapita ang mga estudyante sa pagtino og usa ka baruganan nga atong makat-unan gikan sa Doktrina ug mga Pakigsaad 42:48 bahin sa pagkaayo gikan sa atong mga sakit. (Ang mga tubag sa mga estudyante kinahanglang mopakita sa mosunod nga baruganan: Kon kita dunay hugot nga pagtuo diha ni Jesukristo, mamaayo kita sumala sa Iyang kabubut-on.) Mahimo nimong isugyot nga markahan sa mga estudyante ang mga pulong sa bersikulo 48 nga nagtudlo niini nga baruganan.

Aron matabangan ang mga estudyante nga makasabut nga ang atong pagtuo kinahanglang masentro ngadto ni Jesukristo kay sa piho nga sangputanan nga atong gitinguha, hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Dapita ang klase sa pagpaminaw sa usa ka rason nganong importante nga ang atong pagtuo masentro ni Jesukristo.

“Isip mga anak sa Dios, nga nasayud sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, mosalig kita Kaniya. Ang unang baruganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulugan og pagsalig. Akong gibati kana nga pagsalig sa usa ka pagpamulong nga gihatag sa akong ig-agaw sa panahon sa usa ka lubong sa batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdanan mipahingangha kanako ug dayon milig-on kanako: ‘Nasayud ako nga kabubut-on kadto sa Ginoo nga siya mamatay. Siya adunay maayo kaayo nga medikal nga pag-atiman. Gihatagan siya og mga panalangin sa priesthood. Ang iyang pangalan gibutang sa prayer roll sa templo. Siya ang gihisgutan sa gatusan ka mga pag-ampo aron mahimsog og balik. Ug nasayud ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayuna.’ Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangidaron. Siya mipahayag, ‘Ang hugot nga pagtuo sa among pamilya anaa kang Jesukristo, ug wala magdepende sa mga resulta.’ Kadto nga mga pagtulun-an mga tinuod gayud alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta” (“Pag-ayo sa Masakiton,” 50).

Giunsa man sa mga indibidwal nga gihisgutan ni Elder Oaks sa paggamit ang hugot nga pagtuo diha ni Jesukristo?
Usahay nagkinahanglan kini og mas dakong pagtuo nga makita ang usa ka minahal nga mamatay o mag-antus sa dugay nga pagkasakit kay sa makita nga sila nabuhi o naayo. Ngano kaha nga ingon man kini niini?
Ngano kaha nga importante man ang pagpakita og hugot nga pagtuo ni Jesukristo bisan og wala kita makadawat sa resulta nga atong gitinguha?

Pangutan-a ang mga estudyante kon nakaila ba sila og usa ka tawo nga namatay bisan og nagsunod sa tukmang medikal nga tambag ug nagtinguha og pagkaayo pinaagi sa pag-ampo ug sa mga panalangin sa priesthood. (Magmabinantayon gayud sa mga pagbati niadtong lagmit nakasinati niining sitwasyon.) Dapita ang usa ka estudyante sa pagbasa og kusog sa Doktrina ug mga Pakigsaad 42:45–47. Hangyoa ang klase sa pagsunod, nga mangita sa mga pulong nga tingali makahupay sa tawo nga nakasinati nga namatyan sa usa ka minahal.

Ang bersikulo 45 nagsulti kanato nga natural lang kitang magbangutan sa pagkawala niadtong atong gimahal. Unsa nga doktrina ang gitudlo diha sa bersikulo 46 nga mahimong makadala og kahupayan niadtong nagbangutan sa pagkawala sa usa ka minahal sa kinabuhi? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga doktrina: Ang kamatayon matam-is ngadto niadtong namatay diha sa Ginoo.)
Unsa kaha ang gipasabut sa namatay diha sa Ginoo?
Unsa kaha ang gipasabut sa ang kamatayon mahimong “tam-is” ngadto niadtong mamatay tungod sa Ginoo? (Tingali kinahanglan nimong ipasabut nga bisan ang usa ka matinud-anon nga tawo kinsa namatay mahimong pisikal nga nag-antus sa kasakit, kini nga saad nagpasabut sa kalinaw ug kapahulayan nga iyang masinati didto sa kalibutan sa mga espiritu.)

Dapita ang mga estudyante sa pagpamalandong kon sila nagpakabuhi ba sa paagi nga ang kamatayon mahimong “tam-is” ngadto kanila kon kini mahitabo karon. (Mahimo nimong dapiton ang mga estudyante nga irekord ang ilang mga hunahuna diha sa ilang mga class notebook o mga scripture study journal.)

Doktrina ug mga Pakigsaad 42:56–73

Ang Ginoo misaad sa pagpadayag og dugang nga kasulatan ug kahibalo niadtong kinsa mangayo

I-summarize ang Doktrina ug mga Pakigsaad 42:56–58 pinaagi sa pagpasabut nga kining mga bersikulo nagpasabut ngadto sa Hubad ni Joseph Smith sa Biblia. Gisultihan sa Ginoo ang mga Santos nga ang Hubad ni Joseph Smith kinahanglang itudlo ngadto sa tanang tawo. I-summarize ang Doktrina ug mga Pakigsaad 42:59–69 pinaagi sa pagpasabut nga kining mga bersikulo naglangkob sa mga instruksyon gikan sa Ginoo ngadto ni Joseph Smith ug sa ubang mga lider sa Simbahan mahitungod kon kanus-a ug kang kinsa nila isangyaw ang ebanghelyo. Giawhag sila sa Ginoo nga sundon ang mga balaod nga gihatag ngadto kanila, ug Iyang gipasabut nga makadawat sila og dugang nga direksyon nga makatabang kanila sa pag-establisar sa Simbahan ug moandam sa mga Santos nga magpuyo sa umaabut nga Bag-ong Jerusalem. Agig dugang, gitudloan sila sa Ginoo og mga baruganan mahitungod kon unsaon nila sa pagpadayon sa pagdawat og balaanong pagpadayag. I-summarize ang Doktrina ug mga Pakigsaad 42:70–73 pinaagi sa pagpasabut nga ubos sa balaod sa pagpahinungod, kadtong mihatag og full-time o part-time nga serbisyo sa Simbahan gihatagan og pinansyal nga tabang.

Dapita ang mga estudyante sa pagbasa og hilum sa Doktrina ug mga Pakigsaad 42:61, 68, nga mangita sa mga baruganan bahin sa pagdawat og pagpadayag. Ang mga tubag sa mga estudyante mahimong maglakip sa mosunod:

Kon mangayo kita, ang Ginoo mohatag kanato og kahibalo nga magdala kanato og kalinaw, hingpit nga kalipay, ug kinabuhing dayon.

Kon mangayo kita og kaalam, ang Ginoo mohatag kanato sa madagayaon gayud.

Unsa ang mga panalangin sa makugihong pagpangayo sa Ginoo alang sa pagpadayag?

Ipakigbahin ang imong pagpamatuod nga ang atong mga lider sa Simbahan mangulo ug mogiya kanato pinaagi sa baruganan sa nagpadayon nga pagpadayag.

Doktrina ug mga Pakigsaad 42:74–87

Ang mga priesthood lider makadawat og instruksyon sa pagdumala sa mga miyembro nga nakahimo og bug-at nga sala

Ipasabut nga diha sa Doktrina ug mga Pakigsaad 42:74–87, ang Ginoo naghulagway sa ubang mga balaod nga nagdumala sa pagdisiplina sa Simbahan. Piho Siyang mihatag og direksyon ngadto sa mga priesthood lider mahitungod kon unsaon sa pagpangalagad niadtong kinsa nakahimo og bug-at nga sala, lakip na sa sekswal nga mga sala, pagpangawat, pagpamakak, o “bisan unsa nga matang sa pagkadautan” (D&P 42:87).

Doktrina ug mga Pakigsaad 42:88–93

Gitudloan sa Ginoo ang mga Santos kon unsaon pagsulbad sa personal nga pagpasakit

Kanus-a kamo nakakita og tawo nga napasakitan tungod sa mga pulong o binuhatan sa laing tawo? Mibati ba kamo nga nasakitan o nasilo tungod sa mga pulong o binuhatan sa laing tawo?

Dapita ang usa ka estudyante sa pagbasa og kusog sa Doktrina ug mga Pakigsaad 42:88–89. Hangyoa ang klase sa pagsunod, nga mangita sa mga instruksyon sa Ginoo kon unsay buhaton kon dunay makapasakit kanato.

Unsa may angay natong buhaton sa usa ka tawo nga nakapasakit kanato? (Makighusay uban kaniya sa pribado. Mahimo nimong ipasabut nga ang pulong nga makighusay nagpasabut sa pagsulbad sa mga panagbangi ug ibalik ang panaghiusa.)
Ngano kaha nga kini nga buhat makatabang man?

Isulat ang mosunod nga dili kompleto nga mga pamahayag diha sa usa ka bahin sa pisara:

Ang mga pagpasakit nga nahatag diha sa pribado kinahanglang …

Ang mga pagpasakit nga nahatag diha sa publiko kinahanglang …

Diha sa pikas nga bahin sa pisara, isulat ang katapusan sa matag usa sa miaging mga pamahayag:

… sulbaron diha sa publiko.

… sulbaron diha sa pribado.

Dapita ang mga estudyante sa pagbasa og hilum sa Doktrina ug mga Pakigsaad 42:90–93, ug manduan sila sa pagpares-pares sa matag usa sa dili kompleto nga pamahayag uban sa tukma nga katapusan niini. (Ang mga pagpasakit nga nahatag diha sa pribado kinahanglang husayon diha sa pribado. (Ang mga pagpasakit nga nahatag diha sa publiko kinahanglang husayon diha sa publiko.)

Ngano kaha nga dili man angay alang sa mga pagpasakit sa pribado nga husayon diha sa publiko?
Ngano kaha nga usahay angayan lang nga husayon ang mga pagpasakit sa publiko diha sa publiko?

Hangyoa ang mga estudyante sa paghunahuna og mga sitwasyon nga naghulagway sa husto ug dili husto nga paggamit niining mga kamatuoran. Dapita ang pipila ka estudyante sa pagpakigbahin sa ilang mga ideya. (Samtang mipakigbahin ang mga estudyante, hatagi og gibug-aton nga ang paghusay sa mga pagpasakit diha sa paagi sa Ginoo naglangkob og paghinulsol ug pagpasaylo.)

Sa unsa kaha nga paagi nga ang tukmang paghusay sa mga pagpasakit mahimong makapanalangin og usa ka pamilya? Usa ka ward o branch? Usa ka grupo sa mga classmate?

Mahimo nimong ipasabut nga nagkinahanglan kini og kaisug aron duolon nato ang usa ka tawo nga nakapasakit kanato. Dapita ang mga estudyante nga mag-ampo alang sa tabang gikan sa Langitnong Amahan samtang nagtinguha sila sa paghusay sa mga pagpasakit sa tukmang paagi ngadto sa uban.

Komentaryo ug Background nga Impormasyon

Doktrina ug mga Pakigsaad 42:46–47. Ang kamatayon “matam-is” ngadto niadtong namatay diha sa Ginoo

Si Presidente Joseph Fielding Smith mipasabut kon unsay gipasabut sa ang kamatayon matam-is ngadto niadtong namatay diha sa Ginoo:

“Ngadto sa ubang mga miyembro sa Simbahan ang panultihon nga kadtong namatay diha sa Ginoo dili makatilaw og kamatayon nahimong usa ka lisud nga panultihon. Nakita nila ang maayo nga matinud-anong kalalakin-an ug kababayen-an nga nag-antus og pipila ka adlaw ug usahay sulod sa mga bulan sa wala pa sila kuhaa. Apan dinhi ang Ginoo wala moingon nga dili sila mag-antus sa kasakit sa lawas, apan sila dili mapaubos sa tumang kaguol ug kasakit sa kalag nga masinati sa mga dautan, ug bisan kon mag-antus sila diha sa lawas, apan ang kamatayon ngadto kanila matam-is kay sila makaamgo nga takus sila diha sa atubangan sa Ginoo” (Church History and Modern Revelation, 2 vols. [1953], 1:186). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 85.)

Doktrina ug mga Pakigsaad 42:48. “Wala ikatakda ngadto sa kamatayon”

Si Presidente Joseph Fielding Smith miingon, “Walay matarung nga tawo nga kuhaon nga wala pa ang iyang panahon” (sa Funeral Services for Elder Richard L. Evans,” Ensign, Dis. 1971, 10).

Si Elder David A. Bednar sa Korum sa Napulog Duha ka mga Apostoles mipasabut nga ingon nga nagkinahanglan kita og hugot nga pagtuo nga mamaayo, nagkinahanglan kita og hugot nga pagtuo nga modawat sa kabubut-on sa Ginoo nga dili kita mamaayo:

“[Adunay] usa ka baruganan nga magamit sa matag mapahinungurong disipulo: ang lig-on nga pagtuo diha sa Manluluwas mao ang manunuton nga pagdawat sa Iyang kabubut-on ug tukmang panahon diha sa atong mga kinabuhi—bisan kon ang sangputanan dili mao ang atong gilauman o gusto. …

“Ang pagkamatarung ug hugot nga pagtuo sa tinuod mao ang instrumento sa pagpalihok sa bukid—kon ang pagpalihok sa bukid magtuman sa mga katuyoan sa Dios ug pinasubay sa Iyang kabubut-on. Ang pagkamatarung ug ang hugot nga pagtuo sa tinuod instrumento sa pag-ayo sa masakiton, bungol, o bakol—kon ang ingon nga pag-ayo nagtuman sa mga katuyoan sa Dios ug pinasubay sa Iyang kabubut-on. Busa, bisan adunay hugot nga pagtuo, daghang mga bukid ang dili mabalhin. Ug dili tanan nga masakiton ang mamaayo. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.

“Kadaghanan sa mga leksyon nga kita gikinahanglan nga mokat-on sa mortalidad madawat lamang pinaagi sa mga butang nga kita nagsinati ug usahay nag-antus. Ug ang Dios nagpaabut ug misalig kanato nga moatubang sa temporaryong mortal nga kalisdanan uban sa Iyang tabang aron kita makakat-on kon unsay atong kinahanglang makat-unan ug sa katapusan mahimong unsay atong makab-ot sa kahangturan” (“That We Might ‘Not … Shrink’ [D&C 19:18]” [debosyonal sa CES alang sa mga young adult, Mar. 3, 2013], LDS.org). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 85–6.)

Doktrina ug mga Pakigsaad 42:70–73. Pagdawat “sa makiangayon nga bayad sa ilang tanan nga mga pangalagad”

Niini nga mga bersikulo, ang pagpasabut gihimo ngadto sa bishop ug sa iyang mga magtatambag nga nagdawat “sa makiangayon nga bayad sa” ilang mga pangalagad. Sa atong panahon, nagpasabut kini sa pihong paagi ngadto sa mga General Authority, mga mission president, ug mga temple president kinsa gikinahanglan nga mobiya sa ilang mga panginabuhian aron moserbisyo og full time diha sa Simbahan. Kining mga indibidwal nakadawat og tukma nga kwarta nga panggasto nga igong ikasuporta nila ug sa ilang mga pamilya atol sa ilang panahon sa pangalagad.