Si Leman Copley, usa ka kinabig sa Simbahan, gusto nga ang mga misyonaryo magsangyaw sa ebanghelyo ngadto sa mga miyembro sa iyang kanhi relihiyosong grupo, ang mga Shaker. Bisan pa man niana, nagpadayon siya sa paghupot sa pipila ka sayop nga mga gituohan niana nga relihiyon. Nabalaka bahin sa nagpabilin nga mga gituohan ni Leman, si Joseph Smith nangutana sa Ginoo niadtong Mayo 7, 1831, ug nakadawat og pagpadayag nga narekord karon diha sa Doktrina ug mga Pakigsaad 49.
Ang Ginoo mitawag nila ni Sidney Rigdon, Parley P. Pratt, ug Leman Copley sa pagsangyaw ngadto sa mga Shaker
Sa dili pa magklase, paghimo og lit-ag sa unggoy o pag-drowing og kauban nga hulagway diha sa pisara. Sa paghimo og lit-ag sa unggoy, pagkuha og kahon nga dunay tabon. Siguroa nga anaa ang tabon sa kahon, ug busloti ang kilid sa kahon og igong gidak-on nga masulod ang bukhad nga kamot sa estudyante apan dili moigo kon kumoon. Butangi og piraso sa prutas o bola sulod sa kahon.
Imahe
box with hole
Pangutan-a ang mga estudyante kon kamao ba sila nga modakop og unggoy. (Kon makamao sila sa mosunod nga pamaagi, dapita sila sa pagpasabut niini ngadto sa tibuok klase. Kon ikaw nakahimo na og lit-ag, mahimo usab nimong dapiton ang usa ka estudyante sa pagpakita nga malit-ag.) Isugyot nga usa ka paagi aron malit-ag ang unggoy mao ang pagsulod og makapadani nga butang sa usa ka sudlanan nga dunay lungag nga igo ang gidak-on nga makuot kini sa kamot sa unggoy. Kon magunitan sa unggoy ang butang, dili na kini makatangtang sa kumo niini tungod kay naggunit kini sa butang nga dako ra kaayo agi sa lungag. Sa ilang determinasyon sa pagkupot sa butang, ang ubang mga unggoy motugot sa ilang kaugalingon nga madakpan.
Dapita ang mga estudyante sa pagbasa og hilum sa pasiuna sa seksyon sa Doktrina ug mga Pakigsaad 49 ug mangita sa mga paagi nga ang sitwasyon nga gihulagway susama sa lit-ag sa unggoy. Human mapasabut sa mga estudyante nga si Leman Copley nanlimbasug sa paghikalimot sa piho nga mga gituohan sa mga Shaker, hangyoa ang mga estudyante sa paglista sa pipila ka gituohan sa mga Shaker.
Samtang motubag ang mga estudyante, isulat ang ilang mga tubag diha sa pisara, sama sa gipakita sa ubos. Ayaw iapil ang kolum nga dunay ulohan nga “Ang Doktrina sa Ginoo.” Imong idugang kana nga kolum sa ulahing bahin sa leksyon.
Kon ang mga estudyante nakuryuso bahin sa ngalan nga Shaker, ipasabut nga ang mga miyembro sa United Society of Believers in Christ’s Second Appearing kasagaran gitawag og mga Shaker tungod sa ilang pamaagi sa pagsimba, nga naglakip sa pagpakurog sa ilang mga lawas samtang sila manganta, manayaw, ug mamakpak sa ilang mga kamot ngadto sa musika.
Dapita ang usa ka estudyante sa pagbasa og kusog sa Doktrina ug mga Pakigsaad 49:1–4. Hangyoa ang klase sa pagsunod, nga mangita kon unsay gipadayag sa Ginoo bahin sa mga Shaker.
Giunsa sa paghulagway sa Manluluwas ang mga Shaker? (Tan-awa sa bersikulo 2.)
Unsa kaha ang gipasabut sa “nagtinguha nga masayud og tipik sa kamatuoran, apan dili sa tanan”? (Ilang gidawat ang ubang mga pagtulun-an sa Dios apan gibaliwala o gisalikway ang uban.)
Sa unsa nga mga paagi nga ang mga miyembro sa Simbahan adunay susama nga mga kinaiya karon?
Isulat sa pisara ang mosunod nga dili kompleto nga sentence: Ang pagkahimong matarung sa atubangan sa Ginoo naglakip sa …
Pangutan-a ang mga estudyante kon unsaon nila pagkompleto niini nga baruganan base sa mga pulong sa Ginoo diha sa bersikulo 2. Samtang motubag ang mga estudyante, kompletuha ang baruganan diha sa pisara: Ang pagkahimong matarung sa atubangan sa Ginoo naglakip sa pagtinguha nga makadawat sa tanang kamatuoran nga Iyang gipadayag. Mahimo nimong isugyot nga isulat sa mga estudyante kini nga baruganan diha sa ilang mga kasulatan tupad sa bersikulo 2. Ipasabut nga kon dako ang atong tinguha nga masayud sa kamatuoran, magtinguha usab kita nga magpakabuhi sumala sa kamatuoran.
Nganong gikinahanglan man ni Leman Copley ang tambag diha sa bersikulo 2? Sa unsang paagi nga kini nga baruganan makatabang kanato?
Unsa kaha nga mga panalangin ang mawala sa usa ka tawo pinaagi sa pagpili nga modawat og tipik lamang sa kamatuoran?
I-refer ngadto sa lit-ag sa unggoy. Dapita ang mga estudyante sa paglista og pipila ka mga lit-ag nga mopahimo sa mga tawo sa pagsalikway sa pipila ka pagtulun-an sa Dios—mga aksyon ug mga kinaiya nga gihuptan sa mga tawo nga nakapugong aron mahimo silang matarung diha sa atubangan sa Ginoo. (Ang pipila ka ehemplo mahimong maglakip sa pagpangatarungan sa usa ka makadaut nga naandang gawi, pagpaminaw sa musika nga moabug sa Espiritu, pag-apil sa mga kalihokan sa Dominggo nga dili angay alang sa Igpapahulay, pagpasulabi sa mga pagtulun-an ug mga pilosopiya sa kalibutan kay sa mga pagtulun-an sa Dios, ug dili pagdawat sa sugo nga mopasaylo sa uban.)
Unsa ang pipila ka sangputanan sa paghupot sa maong mga aksyon ug mga kinaiya? Sa unsang paagi nga susama kini sa lit-ag?
Dapita ang mga estudyante sa pagkonsiderar kon unsay ilang pwede nga mabiyaan aron makadawat sa tanang panalangin nga gitagana sa Langitnong Amahan alang kanila. Ikonsiderar ang pagdapit kanila sa paghimo og usa ka tumong sa pagbiya sa butang nga nakapugong kanila nga mahimong matarung sa atubangan sa Ginoo.
Ang Ginoo mikorihir sa sayop nga doktrina sa mga Shaker ug mimando sa Iyang mga sulugoon sa pagdapit kanila nga maghinulsol ug magpabunyag
Pahinumdumi ang mga estudyante nga ang Ginoo mimando nila ni Leman Copley, Sidney Rigdon, ug Parley P. Pratt sa pagsangyaw sa ebanghelyo ngadto sa mga Shaker (tan-awa sa D&P 49:1–4). Ipasabut nga sa wala pa makadawat niini nga mando, si Leman Copley “madasigon nga ang ubang mga elder kinahanglang moadto sa iyang kanhi nga mga kaigsoonan [ang mga Shaker] ug mosangyaw sa ebanghelyo” (Histories, Volume 2: Assigned Histories, 1831–1847, vol. 2 sa Histories series sa The Joseph Smith Papers [2012], 37). Sa dihang kini nga mga elder miadto sa mga Shaker, ilang gibasa og kusog ngadto kanila ang pagpadayag diha sa Doktrina ug mga Pakigsaad 49.
Diha sa pisara, kopyaha ang ikaduhang kolum sa tsart gikan sa sayong bahin niini nga leksyon.
Bahina ang klase ngadto sa lima ka grupo. I-assign ang matag grupo og usa sa mga tudling sa kasulatan nga gisulat sa pisara. (Kon ikaw dunay gamay nga klase, bahina ang mga tudling ngadto sa mga estudyante ug hisguti kining tanan isip usa ka klase.) Dapita ang mga estudyante sa pagbasa sa gi-assign kanila nga mga tudling, nga mangita sa mga doktrina ug mga baruganan nga mokorihir sa sayop nga mga gituohan sa mga Shaker.
Kon ang mga estudyante duna nay igong panahon sa pagtuon niining mga tudling sa kasulatan, dapita sila sa paghisgot sa mosunod nga mga pangutana diha sa ilang mga grupo ug mangandam sa pagpakigbahin sa ilang mga tubag ngadto sa klase.
Unsa nga mga doktrina ug mga baruganan ang kinahanglang masabtan sa mga Shaker ug ni Leman Copley?
Sa unsang paagi nga ang gi-assign nganha ninyo nga mga bersikulo mopasabut niining mga kamatuoran?
Kon ang mga grupo duna nay igong panahon sa pagbasa ug paghisgot sa gi-assign nga tudling ngadto nila, dapita ang usa ka estudyante gikan sa matag grupo sa pagtubag niining mga pangutana alang sa tibuok klase. Mahimo nimong isugyot nga markahan sa mga estudyante ang mga tudling nga nagtudlo sa mga kamatuoran nga ilang gitino.
Ang mga estudyante kinahanglang mahibalo sa mosunod nga mga doktrina ug mga baruganan. (Hinumdumi nga kining mga kamatuoran ginumerohan aron mahiangay sa lista sa sayop nga mga gituohan diha sa pisara.) Samtang maghisgot ang mga estudyante niining mga kamatuoran, ikonsiderar ang paghatag og follow-up nga mga pangutana aron sa pag-awhag og dugang pa nga panaghisgot.
Sa Doktrina ug mga Pakigsaad 49:7, ang mga estudyante kinahanglang mahibalo sa mosunod nga doktrina: Walay usa gawas sa Dios ang nasayud kon kanus-a mahitabo ang Ikaduhang Pag-anhi.
Sa Doktrina ug mga Pakigsaad 49:22–25, usa ka baruganan nga mahimong mahibaloan sa mga estudyante mao ang mosunod: Kon nasayud kita sa mga timailhan sa Ikaduhang Pag-anhi, dili kita malingla sa sayop nga mga pangangkon.
Unsa ang pipila ka timailhan nga nahisgutan diha sa mga bersikulo 23–25? (Mahimo nimong ipasabut nga ang ngalan nga Jacob diha sa bersikulo 24 nagpasabut ngadto sa balay ni Israel.) Sa unsang mga paagi nga inyong nakita kining mga timailhan sa atong panahon?
Sa Doktrina ug mga Pakigsaad 49:11–14, ang mga estudyante kinahanglang mahibalo sa mosunod nga doktrina: Si Jesukristo mimando sa Iyang mga sulugoon nga manawagan sa mga tawo nga motuo Kaniya, maghinulsol, magpabunyag, ug modawat sa gasa sa Espiritu Santo.
Nganong mapasalamaton man mo nga nabunyagan mo ug nga nakadawat mo sa gasa sa Espiritu Santo? Nganong naglaum man mo nga motabang sa ubang tawo nga makadawat niining mga ordinansa?
Sa Doktrina ug mga Pakigsaad 49:15–17, ang mga estudyante kinahanglang mahibalo sa usa o sobra pa sa mosunod nga mga doktrina: Ang kaminyoon tali sa usa ka lalaki ug usa ka babaye gi-orden sa Dios, ug ang mga bana ug mga asawa gimanduan nga mahimong usa ug magbaton og mga anak. Mahimo nimong ipasabut ang mga pulong nga “nga ang yuta makatuman sa katuyoan sa iyang pagkalalang; ug nga kini unta mapuno uban sa gidaghanon sa mga tawo.” Kini nga tudling nagtudlo nga usa sa mga katuyoan sa paglalang sa yuta mao ang paghatag og dapit diin ang mga anak sa Dios makapuyo isip mga pamilya.
Unsa nga mga katuyoan ang gituman sa kaminyoon tali sa usa ka lalaki ug usa ka babaye diha sa plano sa Langitnong Amahan?
Sa unsang paagi nga ang “[p]agdili sa pagminyo” misukwahi sa plano sa Langitnong Amahan?
Sumala sa bersikulo 16, giaprubahan sa Dios ang tradisyonal nga kaminyoon tali sa usa ka lalaki ug sa usa ka babaye. Unsa ang pipila ka paagi nga ang mga tawo misulay sa pagbiay-biay o pagguba sa tradisyonal nga kaminyoon?
Unsa man ang mahimo karon sa mga batan-ong lalaki ug mga batan-ong babaye aron makapangandam alang sa celestial nga kaminyoon?
Sa Doktrina ug mga Pakigsaad 49:18–21, ang mga estudyante kinahanglang mahibalo sa mosunod nga doktrina: Gihatag sa Ginoo ang mga hayop sa yuta aron atong magamit. (Mahimo nimong ipasabut nga ang pulong nga panaput nagpasabut og sinina.)
Unsa nga pasidaan ang makita diha sa bersikulo 21? Ngano kaha nga ang Ginoo wala mahimuot niadtong mopatay og hayop nga wala kinahanglana?
Ipasabut nga ang mga Shaker ug si Leman Copley wala mosunod sa tambag sa Ginoo. Ang mga Shaker misalikway sa mensahe sa mga misyonaryo, ug si Leman Copley mibalik ngadto sa iyang kanhi nga mga gituohan ug mibiya sa Simbahan.
Tapusa pinaagi sa paghangyo sa usa ka estudyante sa pagbasa og kusog sa Doktrina ug mga Pakigsaad 49:26–28. Hangyoa ang klase sa pagsunod, nga mangita sa tambag ug mga saad sa Ginoo. (Mahimo nimong ipasabut nga ang pulong nga anaa sa luyo nagpasabut sa usa ka tawo nga nanalipod sa laing tawo gikan sa likod.)
Dapita ang mga estudyante sa pagbasa og usab sa hilum niining mga bersikulo ug sa paghunahuna kon sa unsang paagi nga ang tambag ug mga saad sa Ginoo magamit ngadto kanila sa tagsa-tagsa. Ipakigbahin ang imong pagpamatuod bahin sa mga panalangin nga moabut kon kita magtinguha sa mga pagtulun-an sa Ginoo ug mosunod niini.
Si Elder Glenn L. Pace sa Seventy namulong sa kapeligro sa tipik nga pagsunod sa propetikanhong tambag:
Imahe
Elder Glenn L. Pace
“Dunay uban natong mga miyembro nga nagbuhat og pinili nga pagkamasulundon. Ang propeta dili usa ka tawo nga moplastar og kamatuoran diin gawasnon kitang mokuha ug mopili. Hinoon, ang ubang mga miyembro nahimong kritikal ug misugyot nga usbon sa propeta ang menu. Ang propeta dili maghimo og survey aron matino ang labing popular nga opinyon sa publiko. Iyang gipadayag ang kabubut-on sa Ginoo ngari kanato. Ang kalibutan napuno sa nagkaut-ot nga mga simbahan nga minunot sa opinyon sa publiko ug nahimong mas mapahinunguron sa pagsulti og unsay nindot paminawon sa ilang mga miyembro kay sa pagsunod sa mga balaod sa Dios.
“Niadtong 1831, ang ubang mga kinabig gustong modala og pipila sa ilang kanhi nga mga gituohan ngadto sa Simbahan uban nila. Ang atong problema karon mao ang mga miyembro nga daw daling madani sa mga uso sa katilingban (ug sa mabiay-biayon nga mga tawo nga dili mouyon kanila) ug gusto nga ang Simbahan mousab sa posisyon niini aron ma-accommodate sila. Ang mga doktrina nga gituohan sa laing tawo morag nindot kaayo alang nila.
“Ang tambag sa Ginoo niadtong 1831 mahinungdanon gihapon karon: ‘Tan-awa, Ako moingon nganha kaninyo, nga sila nagtinguha nga masayud og tipik sa kamatuoran, apan dili sa tanan, kay sila dili matarung diha sa akong atubangan ug kinahanglan gayud nga maghinulsol.’ (D&P 49:15.)
“Kinahanglan natong dawaton ang tibuok nga kamatuoran—gani ang tanan niini—‘isul-ob ninyo ang tibuok hinagiban sa Dios’ (Efe. 6:11), ug motrabaho sa pagtukod sa gingharian. Matag usa kanato mahimong mangutana sa atong kaugalingon, ‘Positibo ba kong magtatampo sa pagtukod sa gingharian sa atong panahon niining dispensasyon sa kahingpitan sa panahon?’” (“Follow the Prophet,” Ensign, Mayo 1989, 26–27).
Mahimo usab nimong ipakigbahin ang mosunod nga pamahayag ni Propeta Joseph Smith, nga nagpasidaan bahin niadtong kinsa nangangkon nga nasayud sa panahon sa Ikaduhang Pag-anhi sa Manluluwas: “Si Jesukristo wala gayud motug-an ni bisan kinsa nga tawo sa tukma nga panahon nga Siya mobalik [tan-awa sa Mateo 24:36; D&P 49:7]. Sigi ug basaha ang mga kasulatan, ug ikaw dili makakita og bisan unsa nga nagklaro sa takdo nga takna nga Siya mobalik, ug ang tanan nga nagsulti mga bakakon nga magtutudlo” (Mga Pagtulun-an sa mga Presidente sa Simbahan: Joseph Smith [2007], 304).
Gidayeg ni Presidente Gordon B. Hinckley ang kaminyoon tali sa usa ka lalaki ug usa ka babaye sa mosunod nga pamahayag:
Imahe
President Gordon B. Hinckley
“Talagsaon gayud ang kaminyoon ubos sa plano sa atong Amahan sa Kahangturan, usa ka plano nga gihatag diha sa Iyang balaanong kaalam alang sa kalipay ug seguridad sa Iyang mga anak ug sa pagpadayon sa kaliwatan.
“Si Presidente Joseph F. Smith kausa namahayag ‘nga walay lalaki nga maluwas ug mahimaya sa gingharian sa Dios kon wala ang babaye, ug walay babaye nga makakab-ot sa kahingpitan ug kahimayaan diha sa gingharian sa Dios, nga mag-inusara. Ang Dios ang mitukod sa kaminyoon sa sinugdanan. Siya mihimo sa tawo diha sa Iyang kaugalingong hitsura ug panagway, lalaki ug babaye, ug diha sa ilang paglalang kini giplano na nga sila kinahanglang pagahiusahon diha sa sagrado nga kaminyoon, ug ang usa dili mahingpit kon wala ang usa.’ (Sa Conference Report, Abril 1913, p. 118.)
“Sigurado gayud nga walay usa ka tawo nga nagbasa sa mga kasulatan, sa daan ug sa bag-o, ang magduhaduha sa balaanong konsepto sa kaminyoon. Ang labing maanindot nga mga pagbati sa kinabuhi, ang labing madagayaon ug makatagbaw nga mga tinguha sa tawhanong kasingkasing, mapahayag diha sa usa ka kaminyoon nga nagbarug nga putli ug walay lama sa kadautan sa kalibutan.
“Ang ingon nga kaminyoon, Ako nagtuo, mao ang tinguha—ang gilauman, gipangindahay, ang gi-ampo nga tinguha—sa kalalakin-an ug kababayen-an sa tanang dapit” (“What God Hath Joined Together,” Ensign, Mayo 1991, 71).
Sama sa gipahayag sa mosunod nga pamahayag, Ang Simbahan ni Jesukristo sa mga Santos sa Ulahing mga Adlaw wala mouyon sa kaminyoon sa sama nga sekso:
“Ang Simbahan dunay usa lang, dili mausab nga sumbanan sa sekswal nga moralidad: ang sobra ka suod nga relasyon tukma lamang tali sa usa ka bana ug usa ka asawa nga gihiusa diha sa mga bugkos sa kaminyoon.
“Ang pagsupak sa Simbahan sa kaminyoon sa sama nga sekso wala molangkob ni mouyon sa bisan unsa nga matang sa kapintas ngadto sa homosekswal nga kalalakin-an ug kababayen-an. Ang pagpanalipod sa kaminyoon tali sa usa ka lalaki ug usa ka babaye wala makaapekto sa Kristohanong mga obligasyon sa mga miyembro kalabut sa gugma, kamabination ug pagkatawo ngadto sa tanang katawhan. … Atong gipahayag ang tinuod nga gugma ug pakighigalaay alang sa usa ka homosekswal nga sakop sa pamilya o higala nga dili magadawat sa pagbuhat sa homosekswalidad o bisan unsang paghatag pag-usab og kahulugan sa kaminyoon” (“The Divine Institution of Marriage,”mormonnewsroom.org).
Si Presidente Gordon B. Hinckley nagtudlo:
Imahe
President Gordon B. Hinckley
“Ang mga tawo mangutana mahitungod sa atong baruganan niadtong kinsa naghunahuna sa ilang mga kaugalingon sa gitawag og mga bayot ug mga tomboy. Ang akong tubag mao nga ato silang higugmaon isip anak nga mga lalaki ug mga babaye sa Dios. Tingali sila adunay piho nga mga kahilig nga mga gamhanan ug tingali malisud nga pugngan. Kadaghanan sa mga tawo adunay mga kahilig sa usa ka matang o sa uban sa nagkalain-lain nga mga panahon. Kon sila dili mobuhat niini nga mga kahilig, niana sila makapadayon sa unahan sama sa uban nga mga miyembro sa Simbahan. Kon sila molapas sa balaod sa kaputli ug sa moral nga mga sumbanan sa Simbahan, niana sila ubos sa pagdisiplina sa Simbahan, sama usab sa uban” (“What Are People Asking about Us?” Ensign, Nob. 1998, 71).
Si Presidente Boyd K. Packer sa Korum sa Napulog Duha ka mga Apostoles mitudlo:
Imahe
President Boyd K. Packer
“Mga batan-on, pagkat-on sa pagpugong sa kaugalingon ug gamita ang sentido komon kalabut sa mga butang sa panglawas ug nutrisyon, ug ilabi na sa medikasyon. Likayi nga masobrahan ra o mahimong panatiko o modawat sa unsay popular sa kalibutan.
“Pananglitan, ang Pulong sa Kaalam nagtambag kanato nga mokaon og karne panagsa lang (tan-awa sa D&P 89:12). Basin kon ang usa ka tawo masobrahan ra, giingnan kita sa laing pagpadayag nga ‘kinsa kadto nga nagdili sa [pagkaon og karne] wala gi-orden sa Dios’ (D&P 49:18“The Word of Wisdom: The Principle and the Promises,” Ensign, Mayo 1996, 18).