Home-Study nga Leksyon
Doktrina ug mga Pakigsaad 129–131; 132:1–33 (Unit 28)
Materyal sa Pagpangandam alang sa Home-Study Teacher
Summary sa Daily Home-Study nga mga Leksyon
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 129–131; 132:1–33 (unit 28) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Samtang gitun-an sa mga estudyante ang pipila sa mga pagtulun-an ni Propeta Joseph Smith, ilang nakat-unan nga ang tinuod nga mga mensahero nga gikan sa Langitnong Amahan dili molingla kanato. Nadiskubrihan usab nila ang mga doktrina kalabut sa mga sakop sa Dios nga Kapangulohan. Nakat-unan sa mga estudyante nga ang mga relasyon nga mahimo natong maangkon didto sa langit sama ra niadtong atong natagamtam dinhi sa yuta, apan kini naglakip sa mahangturon nga himaya.
Niini nga leksyon nakat-unan sa mga estudyante ang mosunod nga mga baruganan: Bugtong Dios lang ang nasayud sa eksaktong panahon sa Ikaduhang Pag-anhi. Ang kahibalo ug salabutan nga atong makab-ot niini nga kinabuhi atong madala sa pagkabanhaw. Kon gusto kita nga makaangkon og panalangin gikan sa Dios, nan kinahanglan gayud kita nga mosunod sa balaod diin diha kini gipasikad.
Day 3 (Doktrina ug mga Pakigsaad 131)
Samtang gitun-an sa mga estudyante ang Doktrina ug mga Pakigsaad 131, ilang nadiskubrihan nga aron makaangkon sa labing taas nga ang-ang sa celestial nga gingharian, kinahanglan gayud kita nga mosulod sa bag-o ug walay katapusan nga pakigsaad sa kaminyoon. Nakat-unan usab sa mga estudyante ang kahulugan sa mga pulong nga “mas siguradong pulong sa panagna” ug nakat-unan ang mahitungod sa kinaiyahan sa atong mga espiritu.
Niini nga leksyon nakat-unan sa mga estudyante nga kon gihimo ang pakigsaad pinaagi sa awtoridad sa priesthood ug gisilyuhan sa Balaang Espiritu sa Saad, kini molungtad hangtud sa kahangturan. Nakat-unan usab nila nga kon ang usa ka lalaki ug babaye magpabilin diha sa bag-o ug walay katapusan nga pakigsaad sa kaminyoon, nan sila adunay usa ka mahangturong pagdugang sa kaliwatan.
Pasiuna
Gitun-an sa mga estudyante ang Doktrina ug mga Pakigsaad 132:1–33 sa ilang day 4 nga leksyon. Ang leksyon karon makatabang kanila nga mas makasabut sa tanan sa Doktrina ug mga Pakigsaad 132 ug ang baruganan sa dinaghan nga kaminyoon. Mapalambo usab sa mga estudyante ang ilang pagsabut mahitungod kon nganong ang dinaghan nga kaminyoon gibuhat sa unang panahon.
Pahinumdom: Nakat-unan sa mga estudyante ang duha ka scripture mastery passage dinhi niining unit: Doktrina ug mga Pakigsaad 130:22–23 ug Doktrina ug mga Pakigsaad 131:1–4. Sa sinugdanan niining leksyon, ikonsiderar ang pagdapit sa katunga sa klase sa pagpasabut kon unsa ang ilang nakat-unan gikan sa unang tudling ug ang laing katunga sa klase sa pagpasabut kon unsa ang ilang nakat-unan gikan sa ikaduha.
Mga Sugyot alang sa Pagtudlo
Doktrina ug mga Pakigsaad 132:3–6, 34–48
Ang Ginoo mitakda og mga kondisyon sa bag-o ug walay katapusan nga pakigsaad ug gipadayag ang baruganan sa dinaghan nga kaminyoon
Sa dili pa magklase, isulat ang mosunod nga mga pangutana diha sa pisara:
Nganong importante man kaninyo ang mahangturong kaminyoon?
Unsa may inyong buhaton, sugod karon, aron maandam ang inyong kaugalingon nga mosulod sa templo ug maminyo karon ug sa tibuok kahangturan?
Unsa nga mga panalangin ang moabut niini nga kinabuhi ngadto niadtong nagsunod sa balaod sa Dios nga ma-sealed sa templo?
Dapita ang mga estudyante sa pagpamalandong niining mga pangutana samtang magtuon sila karon sa Doktrina ug mga Pakigsaad 132.
Ipasabut nga samtang si Propeta Joseph Smith nagtrabaho sa dinasig nga hubad sa Daang Tugon niadtong 1831, nakabasa siya mahitungod sa karaang mga propeta nga nagbuhat og dinaghan nga kaminyoon (gitawag usab og polygamy). Ubos niining buhat, ang usa ka tawo makaminyo pa og laing asawa. Ang Propeta nagtuon sa mga kasulatan, namalandong sa unsay iyang nakat-unan, ug sa katapusan midala sa iyang mga pangutana bahin sa dinaghan nga kaminyoon ngadto sa Langitnong Amahan pinaagi sa pag-ampo.
Isulat ang Genesis 16:1–3 diha sa pisara. Ipasabut nga kining mga bersikulo naghulagway sa mga aksyon nila ni Sarai ug Abram, nga nailhan sa kaulahian isip Sara ug Abraham. Dapita ang usa ka estudyante sa pagbasa og kusog niini nga mga bersikulo. Hangyoa ang klase sa pagsunod ug sa paghunahuna bahin sa bisan unsang pangutana nga tingali aduna sila bahin niining panghitabo sa kinabuhi nila ni Abram ug Sarai.
Dapita ang mga estudyante sa pagbasa og hilum sa Doktrina ug mga Pakigsaad 132:1, nga mangita kon unsay gipangutana ni Propeta Joseph Smith samtang nagtuon siya sa mga tudling diha sa Daang Tugon kalabut sa pagbuhat sa dinaghan nga kaminyoon. Hangyoa ang mga estudyante sa pagreport sa ilang makit-an. (Mahimo nimong ipasabut nga ang pulong nga puyo-puyo mao ang usa ka termino nga gigamit sa paghulagway sa kababayen-an sa Daang Tugon kinsa, diha sa panahon ug kultura nga sila nagpuyo, legal nga naminyo sa usa ka lalaki apan adunay mas ubos nga estado kay sa asawa. Ang mga puyo-puyo dili kabahin sa buhat sa dinaghan nga kaminyoon sa atong dispensasyon.)
Isulat sa pisara ang mosunod nga pangutana: Nganong mosugo man ang Ginoo sa matarung nga mga lalaki ug babaye sa pagsunod sa baruganan sa dinaghan nga kaminyoon sa usa ka pihong panahon?
Ipasabut nga diha sa ilang pagtuon sa Doktrina ug mga Pakigsaad 132, makaplagan sa mga estudyante ang mga tubag sa pangutana diha sa pisara ug sa uban nilang mga pangutana kalabut sa dinaghan nga kaminyoon. Dapita sila sa pagsulat sa mga kamatuoran nga ilang madiskubrihan atol sa ilang pagtuon karon.
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 132:34–36. Hangyoa ang klase sa pagsunod, nga mangita kon nganong sila si Abraham ug Sara nagsugod sa pagbuhat sa dinaghan nga kaminyoon.
-
Sumala sa bersikulo 34, nganong gihatagan man ni Sara si Abraham og laing asawa? Unsay gitudlo niini ngari kanato bahin sa baruganan sa dinaghan nga kaminyoon? (Samtang motubag ang mga estudyante, isulat ang mosunod nga baruganan diha sa pisara: Ang dinaghan nga kaminyoon gitugot lamang sa Ginoo kon Siya magsugo niini. Aron matabangan ang mga estudyante nga makasabut niining baruganan, mahimo nimo silang hangyoon sa pagbasa sa Jacob 2:27, 30. Mahimo usab nimong isugyot nga ilang isulat kini nga pakisayran sa ilang mga kasulatan duol sa Alma 132:34.)
Dapita ang usa ka estudyante sa pagbasa og kusog sa Doktrina ug mga Pakigsaad 132:37–38. Hangyoa ang klase sa pagsunod, nga mangita sa mga pulong nga naghulagway sa mga kahimtang sa dihang ang Ginoo misugo sa pagbuhat sa dinaghan nga kaminyoon. Hangyoa ang mga estudyante sa pag-report kon unsay ilang makit-an.
I-summarize ang Doktrina ug mga Pakigsaad 132:39, 41–43 pinaagi sa pagpasabut nga gipamatud-an sa Ginoo nga kon ang mga tawo magbuhat sa baruganan sa dinaghan nga kaminyoon sumala sa Iyang sugo, dili sila sad-an sa sala sa pagpanapaw. Hinoon, kon dunay magbuhat og dinaghan nga kaminyoon ubos sa bisan unsa nga kahimtang nga wala gisugo sa Ginoo, sad-an sila sa pagpanapaw. (Hinumdumi nga ang pulong nga pagalaglagon sa bersikulo 41 nagpasabut nga kadtong mosupak sa ilang sagradong mga pakigsaad mahibulag gikan sa Dios ug gikan sa Iyang mga katawhan sa pakigsaad [itandi sa Mga Buhat 3:22–23; 1 Nephi 22:20].)
Dapita ang mga estudyante sa pagbasa og hilum sa Doktrina ug mga Pakigsaad 132:40 ug sa pagpangita kon unsay gisulti sa Ginoo nga Iyang buhaton. Hangyoa ang mga estudyante sa pag-report kon unsay ilang makit-an.
Ipasabut nga ang “tanan nga mga butang” nagpasabut sa mga balaod ug mga ordinansa sa ebanghelyo nga gipadayag sa miaging mga dispensasyon. Isulat ang mosunod nga baruganan diha sa pisara: Ang sugo nga tumanon ang balaod sa dinaghan nga kaminyoon sa ulahing mga adlaw kabahin sa pagpahiuli sa tanan nga mga butang. (Tan-awa usab sa Mga Buhat 3:20–21.)
Dapita ang usa ka estudyante sa pagbasa og kusog sa Doktrina ug mga Pakigsaad 132:45, 48.
-
Unsa man ang atong makat-unan gikan niini nga mga bersikulo mahitungod sa dinaghan nga kaminyoon? (Samtang motubag ang mga estudyante, isulat sa pisara ang mosunod nga baruganan: Ang dinaghan nga kaminyoon mahimong awtorisado lamang pinaagi sa mga yawe sa priesthood nga gihatag ngadto sa Presidente sa Simbahan.)
Ipasabut nga sa sayong bahin niini nga dispensasyon, isip kabahin sa pagpahiuli sa tanan nga mga butang, gisugo sa Ginoo ang pipila sa nag-unang mga Santos sa pagbuhat sa dinaghan nga kaminyoon pinaagi sa mga yawe sa priesthood nga gihuptan ni Propeta Joseph Smith ug sa nagsunod nga mga Presidente sa Simbahan—Brigham Young, John Taylor, ug Wilford Woodruff. Niadtong 1890, si Presidente Woodruff, nga nagsunod pinaagi niadtong sama nga mga yawe sa priesthood, nakadawat nga ang pagbuhat sa dinaghan nga kaminyoon kinahanglang tapuson (tan-awa sa Opisyal nga Pahayag 1).
Doktrina ug mga Pakigsaad 132:49–66
Ang Ginoo mitambag nila ni Joseph ug Emma Smith kalabut sa dinaghan nga kaminyoon
Ipasabut nga si Propeta Joseph Smith nagduha-duha sa pagsugod sa pagbuhat og dinaghan nga kaminyoon. Siya mipahayag nga wala siya mosugod sa buhat hangtud nga siya gipasidan-an nga siya pagalaglagon kon siya dili mosunod (tan-awa sa “Plural Marriage,” Historical Record, Mayo 1887, 222). Tungod sa kakulang sa dokumentasyon sa kasaysayan, gamay lang kaayo ang atong nahibaloan mahitungod sa nag-una niyang mga paningkamot sa pagtuman sa sugo. Hinoon, pagka-1841 ang Propeta misunod sa sugo, ug sulod sa misunod nga tulo ka mga tuig nagminyo siya og dugang pang mga asawa pinasikad sa mga sugo sa Ginoo. Ang pagkamasulundon ni Propeta Joseph Smith ngadto sa sugo sa Ginoo sa pagbuhat og dinaghan nga kaminyoon usa ka pagsulay sa hugot nga pagtuo alang kaniya ug sa iyang asawa nga si Emma, kinsa iyang gipangga og maayo.
I-summarize ang Doktrina ug mga Pakigsaad 132:49–56 pinaagi sa pagsabut nga ang Ginoo mitambag ni Joseph ug Emma Smith ug misaad kanila og mga panalangin kon sila mosunod sa baruganan sa dinaghan nga kaminyoon. Ipasabut nga niadtong 1841, si Propeta Joseph Smith nagsugod sa pagtudlo sa ubang matinud-anon nga kalalakin-an ug kababayen-an sa baruganan sa dinaghan nga kaminyoon. Bisan og kining matinud-anong mga miyembro sa Simbahan sa sinugdanan nagduha-duha ug nasagmuyo mahitungod sa sugo, nakadawat sila og indibidwal nga mga kumpirmasyon pinaagi sa Espiritu Santo ug midawat sa baruganan sa dinaghan nga kaminyoon.
Basaha og kusog ang Doktrina ug mga Pakigsaad 132:63, magsugod sa mga pulong nga “kay sila gihatag ngadto kaniya.” Sa dili pa nimo basahon, ipasabut nga kining bersikulo makatabang kanato nga masabtan ang usa ka rason nganong ang Ginoo misugo kang Joseph Smith ug sa uban sa pagbuhat sa dinaghan nga kaminyoon. Hangyoa ang klase sa pagsunod, nga mangita nianang piho nga katuyoan. Human sa imong pagbasa, isulat ang mosunod nga baruganan diha sa pisara: Dihay mga panahon nga ang Ginoo mimugna sa dinaghan nga kaminyoon aron sa pagsangkap og dugang oportunidad sa Iyang mga katawhan sa pagpasanay og mga anak ngadto Kaniya. (Mahimo kang mo-refer og balik sa Jacob 2:30.)
-
Unsa ang gipasabut sa “modaghan ug mopuno sa yuta”? (Magbaton og mga anak.)
-
Sa unsang paagi nga ang pagbaton og mga anak nagtugot sa mga ginikanan nga mahimong kabahin sa nagpadayon nga buhat sa Langitnong Amahan?
I-refer ngadto sa pangutana nga imong gisulat sa pisara inig hapit na sugdan ang leksyon: Ngano nga ang Ginoo magsugo sa matarung nga mga lalaki ug babaye sa pagsunod sa baruganan sa dinaghan nga kaminyoon sa piho nga mga panahon? Mahimo nimong dapiton ang mga estudyante sa pag-summarize alang sa klase kon unsa ang ilang nakat-unan gikan sa ilang pagtuon sa Doktrina ug mga Pakigsaad 132 ug Jacob 2:27, 30 nga makatabang nila sa pagtubag niining pangutana.
Tapusa pinaagi sa pagpakigbahin sa imong pagpamatuod ni Propeta Joseph Smith ug nga siya nakadawat ug misunod sa pagpadayag gikan sa Dios (tan-awa sa D&P 132:37).
Sunod nga Unit (Doktrina ug mga Pakigsaad 133–135)
Pangutan-a ang mga estudyante kon unsay ilang buhaton kon kinahanglan silang mopili tali sa ilang pagkamatay o paglingkawas niadtong nagtinguha sa pagpatay kanila. Unsa kaha kon ang pagpili nga atubangon ang kamatayon makaluwas sa mga kinabuhi sa inyong pamilya, mga higala, ug sa lain pang gatusan ka mga tawo? Buhaton ba ninyo kini? Si Propeta Joseph Smith andam nga miatubang sa kamatayon, nga miingon, “Ako moadto sama sa usa ka karnero ngadto sa ihawanan; apan ako malinawon ingon sa kabuntagon sa ting-init” (D&P 135:4). Ang mga estudyante mobasa mahitungod sa pagkamartir ni Propeta Joseph Smith diha sa sunod nga unit.