Doktrina ug mga Pakigsaad 60–64 (Unit 14)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 60–64 (unit 14) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 60–62)

Pinaagi sa pagtuon sa tambag sa Ginoo ngadto sa mga elder kinsa nagbiyahe gikan sa Missouri hangtud sa Ohio, nakat-unan sa mga estudyante nga mahimo kitang mawad-an sa atong pagpamatuod kon dili kita mopakigbahin niini. Nadiskubrihan usab sa mga estudyante nga ang tanang gahum anaa sa Ginoo ug makahimo sa pagpatunhay kanato ug nga kita angayang mosalig sa atong paghukom ug sa direksyon sa Espiritu kon kita mohimo og mga desisyon.

Day 2 (Doktrina ug mga Pakigsaad 63)

Sa ilang pagtuon sa Doktrina ug mga Pakigsaad 63, nakat-unan sa mga estudyante nga ang Ginoo mibadlong niadtong kinsa wala motuman sa Iyang mga sugo ug mihupay niadtong kinsa nagmatinud-anon. Nakat-unan sa mga estudyante nga ang hugot nga pagtuo dili moabut pinaagi sa mga timailhan apan ang mga timailhan moabut pinaagi sa hugot nga pagtuo, sumala sa kabubut-on sa Dios. Nahibaloan usab nila ang mosunod nga mga kamatuoran: Kon kita motan-aw sa uban nga may kahigal, dili kita makaangkon sa Espiritu ug kita maglimud sa hugot nga pagtuo; kon kita matinud-anon ug molahutay, nan makabuntog kita sa kalibutan; ug ang ngalan ni Jesukristo sagrado ug kinahanglan gayud nga isulti inubanan sa pag-amping.

Day 3 (Doktrina ug mga Pakigsaad 64:1–19)

Samtang gitun-an sa mga estudyante ang mga pulong sa Ginoo ngadto sa mga miyembro sa Simbahan nga nakasala, ilang nakat-unan nga ang Ginoo mapuanguron, mapasayloon, ug maloloy-on. Nakat-unan usab nila nga kon kita dili mopasaylo sa uban, kita mobarug nga gipanghimaraut diha sa atubangan sa Ginoo ug nga ang Ginoo nagmando kanato nga mopasaylo sa tanang tawo.

Day 4 (Doktrina ug mga Pakigsaad 64:20–43)

Niini nga leksyon nakat-unan sa mga estudyante ang bahin sa mga sakripisyo nga gipangayo sa Ginoo sa mga Santos samtang nagsugod sila sa pagtukod sa Zion. Ang leksyon naghatag og gibug-aton sa mosunod nga mga kamatuoran: Kon mosunod kita sa kabubut-on sa Ginoo alang kanato, dili kita matintal batok nianang dili nato maantus; mapanalanginan kita samtang mosunod kita sa Ginoo ug mohalad og mga sakripisyo nga Iyang gipangayo kanato; kon kita magmakugihon sa pagbuhat og maayo, nan makatuman kita sa dagko nga mga butang; ug kinahanglan kitang mosunod sa Ginoo uban sa atong kasingkasing ug andam nga mga hunahuna.

Pasiuna

Niadtong summer sa 1831, si Propeta Joseph Smith nagdumala sa pagpahinungod sa yuta nga pagatukuran sa mga Santos sa Zion didto sa Independence, Missouri. Kay wala didto ang Propeta, ang pipila sa mga miyembro sa Simbahan didto sa Ohio mipahilayo gikan sa kasugoan sa Ginoo ug nakahimo og bug-at nga mga sala. Kini nga leksyon nag-focus sa pipila ka mga sugo nga gihatagan og gibug-aton sa Ginoo human si Joseph Smith mibalik sa Ohio—lakip sa mga sugo sa paglikay sa kahigal ug sa pagpasaylo sa uban.

Mga Sugyot alang sa Pagtudlo

Doktrina ug mga Pakigsaad 63:1–21

Ang Ginoo nagpasidaan sa mga Santos mahitungod sa mga sangputanan sa pagkadautan ug pagkamasinupakon

Isulat ang mosunod nga pangutana diha sa pisara: Ngano kaha nga importante nga magpakabuhi kita sumala sa atong mga gituohan isip mga miyembro sa Simbahan ni Jesukristo? Dapita ang mga estudyante sa pagpakigbahin sa ilang mga tubag diha sa klase.

Ipasabut nga niadtong summer sa 1831, samtang si Joseph Smith ug ang ubang lider sa Simbahan didto sa Missouri aron sa pagpahinungod sa yuta ug sa luna nga tukuran sa templo sa Zion, ang pipila ka mga miyembro sa Simbahan sekreto nga nakabuhat og bug-at nga mga sala. Human ang Propeta mibalik ngadto sa Ohio, nakadawat siya og pagpadayag nga narekord sa Doktrina ug mga Pakigsaad 63.

Dapita ang usa ka estudyante sa pagbasa og kusog sa Doktrina ug mga Pakigsaad 63:1. Hangyoa ang klase sa pagsunod ug ipatino kon unsa ang tawag sa Ginoo sa mga miyembro dinhi niining bersikulo. Dapita ang mga estudyante sa pagreport kon unsa ang ilang makit-an.

Sa unsang paagi nga ang pagtawag sa atong kaugalingon nga mga katawhan sa Ginoo mahimong lahi sa pagkahimong mga katawhan sa Ginoo? (Samtang maghisgot ang mga estudyante niining pangutana, mahimo nimong ipasabut nga kadaghanan sa mga Santos nagbuhat og labaw pa kay sa motawag sa ilang kaugalingon nga mga katawhan sa Ginoo. Nagpabilin silang matinud-anon.)

Hangyoa ang mga estudyante sa pagbasa og usab sa bersikulo 1 ug mangita sa sugo sa Ginoo niadtong kinsa motawag sa ilang kaugalingon nga Iyang mga katawhan.

Unsay gusto sa Ginoo nga atong buhaton isip Iyang mga katawhan? (I-summarize ang mga tubag sa mga estudyante pinaagi sa pagsulat sa mosunod nga baruganan diha sa pisara: Isip mga katawhan sa Ginoo, angay natong buksan ang atong mga kasingkasing ug maminaw sa Iyang pulong ug sa Iyang kabubut-on kalabut kanato.)
Unsa kaha ang gipasabut sa buksan ang atong mga kasingkasing?
Sa unsang paagi nga ang pagbukas sa atong mga kasingkasing makaandam kanato sa pagpaminaw sa tingog sa Ginoo?
Unsa ang inyong buhaton nga makatabang kaninyo sa pagbukas sa inyong kasingkasing?

I-summarize ang Doktrina ug mga Pakigsaad 63:2–21 pinaagi sa pagpasabut nga ang Ginoo mibadlong niadtong kinsa dili matuohon, nangita og mga timailhan, ug nakahimo sa pagpanapaw ug uban pang bug-at nga mga sala. Dapita ang usa ka estudyante sa pagbasa og kusog sa Doktrina ug mga Pakigsaad 63:16. Hangyoa ang klase sa pagsunod, nga mangita sa usa ka pasidaan nga gihatag sa Ginoo.

Unsa nga pasidaan ang gihatag sa Ginoo diha sa bersikulo 16?
Unsay buot ipasabut sa pagtan-aw sa uban nga may kahigal? (Ang pulong kahigal nagpasabut “sa pagbaton og usa ka dili angay nga hugot nga tinguha alang sa usa ka butang” o sa usa ka tawo [Giya ngadto sa mga Kasulatan, “Kahigal,” scriptures.lds.org]. Ang pagtan-aw sa ubang tawo inubanan sa kahigal nagpasabut sa pagtan-aw sa lawas sa usa ka tawo nga dili angay o sa paagi nga makapapukaw sa sekswal nga mga pagbati. Kini naglakip sa pagtan-aw og pornograpiya.)
Unsa nga baruganan ang inyong makita diha sa pasidaan sa Ginoo sa bersikulo 16? (Ang mga estudyante mahimong mogamit og lain-laing mga pulong, apan kinahanglan ilang mahibaloan ang mosunod nga baruganan: Kon kita motan-aw sa uban nga may kahigal, dili kita makaangkon sa Espiritu ug kita maglimud sa hugot nga pagtuo. Mahimo nimong awhagon ang mga estudyante sa pagmarka niini nga baruganan diha sa ilang mga kasulatan.)
Ngano kaha nga ang pagkahigal ngadto sa ubang tawo makapawagtang sa Espiritu diha sa tawo?
Unsa ang atong mabuhat aron mabuntog ang mga tintasyon sa pagkahigal ngadto sa ubang tawo?

Isip kabahin sa panaghisgutan sa paglikay sa pagkahigal, mahimo nimong hatagan ang matag estudyante og kopya sa mosunod nga tambag gikan ni Elder Jeffrey R. Holland sa Korum sa Napulog Duha ka mga Apostoles. Dapita ang pipila ka estudyante nga magpuli-puli sa pagbasa og kusog sa mga paragraph. Human mabasa ang matag paragraph, hangyoa ang klase sa pagpasabut kon sa unsang paagi nga ang pagsunod niining tambag makatabang kanato nga mabuntog ang tintasyon sa pagkahigal.

Si Elder Jeffrey R. Holland mitudlo:

“Labaw sa tanan, sugdi pinaagi sa pagpalayo sa inyong kaugalingon gikan sa mga tawo, mga materyal, ug mga sitwasyon nga makapasakit kaninyo. …

“… Kon ang salida sa TV dili maayo, palonga kini. Kon ang salida malaw-ay, palayo. Kon ang dili husto nga pakigrelasyon naglambo, putla kini. Daghan niini nga mga impluwensya, sa sinugdanan, mahimong dili gyud ingon nga dautan, apan makahugaw kini sa atong paghukom, makaluya sa espiritwalidad, ug modala kanato ngadto sa butang nga dautan.

Pulihi ang hugawng huna-huna og puno sa paglaum nga mga hulagway ug malipayong mga handumanan; hunahunaa ang mga nawong sa mga tawo nga nahigugma kaninyo ug mawala ra kini kon inyong pasagdan. … Bisan unsa man ang naa sa inyong hunahuna, siguroha nga madawat kini sa inyong kasingkasing kon imbitahon lamang.

“Pag-ugmad ug kon asa ang Espiritu sa Ginoo. Siguroha nga naglakip kana sa inyong panimalay o apartment, nagpiho gayud sa matang sa art, musika, ug literatura nga inyong gikolekta” (“Walay Luna alang sa Kaaway sa Akong Kalag,” Liahona, Mayo 2010, 45, 46).

Pangutan-a kon aduna bay mga estudyante nga andam nga mopakigbahin sa ilang mga pagpamatuod kon sa unsang paagi nga sila napanalanginan tungod sa ilang mga paningkamot sa pagsunod sa balaod sa kaputli.

Doktrina ug mga Pakigsaad 64:8–19

Ang Ginoo nagsugo sa Iyang mga sulugoon sa pagpasaylo sa usag usa

Pahinumdumi ang mga estudyante sa ilang assignment gikan sa Day 3 niini nga unit nga sulayan sa pagmemorya ang Doktrina ug mga Pakigsaad 64:9–11, nga usa ka scripture mastery passage. Dapita ang klase nga magdungan sa pag-recite og kusog niining mga bersikulo. (Mahimong mo-refer ang mga estudyante ngadto sa ilang mga kasulatan alang sa tabang.) Pangutan-a kon aduna bay mga estudyante nga gustong mo-recite og kusog niining mga bersikulo alang sa klase sa ilang kaugalingon. Isulat ang mosunod nga sugo diha sa pisara: Ang Ginoo nagsugo kanato sa pagpasaylo sa tanang mga tawo.

Ngano kaha nga importante ang pagpasaylo sa tanang mga tawo, dili igsapayan kon sila nangayo og pasaylo sa ilang mga kasaypanan?
Sa unsang paagi nga nakatabang kini kanato nga itugot nga ang Dios na ang mohukom niadtong nakapasakit kanato?
Kanus-a kamo mibati nga napanalanginan tungod sa pagpasaylo sa usa ka tawo?

Ipasabut nga usahay andam kita sa pagpasaylo sa ubang tawo, apan manlimbasug sa pagpasaylo sa atong kaugalingon.

Nganong kinahanglan gayud nga kita mopasaylo sa atong kaugalingon?

Ipasabut ang unang baruganan nga imong gisulat sa pisara sa sinugdanan sa klase: Isip mga katawhan sa Ginoo, angay natong buksan ang atong mga kasingkasing ug maminaw sa Iyang pulong ug sa Iyang kabubut-on kalabut kanato. Dapita ang mga estudyante sa paghunahuna kon ang ila bang mga kasingkasing nahimong bukas ngadto sa mga pag-aghat o mga impresyon atol sa ilang pagtuon sa mga kasulatan karon. Awhaga sila sa pagsunod sa mga pag-aghat ug mga impresyon nga ilang madawat gikan sa Ginoo, ug mopamatuod nga samtang sila magbuhat sa ingon sila mahimong katawhan sa Ginoo.

Sunod nga Unit (Doktrina ug mga Pakigsaad 65–71)

Aron maandam ang mga estudyante sa ilang pagtuon atol sa umaabut nga semana, mahimo nimo silang dapiton sa pagkonsiderar sa mosunod: Sa unsang paagi nga ang usa ka bato moligid hangtud malukop ang yuta? Unsa gayud ang pagkaila sa Ginoo kanato? Ngano kaha nga ang mga ginikanan mobati og bug-at nga obligasyon sa pagtudlo sa ebanghelyo ngadto sa ilang mga anak? Unsa ang mga sangputanan ngadto sa mga ginikanan sa dili pagbuhat sa ingon? Ipahibalo sa mga estudyante nga atol sa ilang pagtuon sa kasulatan niining semanaha, ilang madiskubrihan ang mga tubag niining mga pangutana.