Leksyon 101
Doktrina ug mga Pakigsaad 98:1–22
Pasiuna
Niadtong Hulyo 20, 1833, adunay grupo sa mga 400–500 nga Taga-Missouri midemanda nga wala nay mga Santos ang mobalhin ngadto sa Lalawigan sa Jackson ug nga kadtong nagpuyo na didto kinahanglang mobiya. Sa wala pa makatubag ang mga Santos sa Missouri, ang manggugubot nga panon nagsugod sa pagguba sa ilang kabtangan ug gihulga ang ilang mga kinabuhi. Niadtong Agosto 6, 1833, si Propeta Joseph Smith nakadawat og pagpadayag nga narekord sa Doktrina ug mga Pakigsaad 98, diin ang Ginoo mimando sa mga Santos unsaon sa pagtubag ang pagpanggukod. Bisan og ang pipila ka mga balita sa mga suliran sa Missouri lagmit miabut ngadto sa Propeta didto sa Kirtland, Ohio, mga 900 ka milya (1,450 ka kilometro) ang gilay-on, tingali nasabtan ra niya ang kaseryoso sa sitwasyon pinaagi lamang sa pagpadayag. Niini nga pagpadayag, ang Ginoo nakahibalo sa mga kasakit sa mga Santos sa Missouri ug sa Ohio. Mitambag Siya kanila sa pagsunod sa batakang balaod sa yuta ug sa pagtuman sa ilang mga pakigsaad.
Mga Sugyot alang sa Pagtudlo
Doktrina ug mga Pakigsaad 98:1–3
Ang Ginoo mihatag og kasiguroan ngadto sa mga Santos panahon sa ilang mga kasakit
Sa dili pa magsugod ang klase, isulat sa pisara ang mosunod nga pangutana: Unsay inyong bation?
Dapita ang usa ka estudyante sa pagbasa og kusog sa mosunod nga paragraph. Hangyoa ang klase sa paghunahuna unsay ilang bation kon sila ang anaa niini nga sitwasyon.
Niadtong Sabado, Hulyo 20, 1833, mga 400 ug 500 ka masuk-anon nga mga lumulupyo sa Missouri nagmiting didto sa korte sa Independence, Missouri. Mipili sila og komitiba aron sa pagsulat og usa ka dokumento nga naglatid sa ilang mga gipangayo sa mga Mormon. Ilang gipangayo nga kinahanglan wala nay mga Santos sa Ulahing mga Adlaw nga mobalhin ngadto sa Lalawigan sa Jackson ug miingon nga kadtong nagpuyo na didto kinahanglang mosaad gayud nga mobiya sa labing madali nga panahon. Agig dugang, ilang gipangayo nga ang newspaper sa Simbahan mohunong na sa pagmantala. Sa dihang gipresentar kining mga gipangayo ngadto sa mga lider sa Simbahan sa Missouri, ang mga lider sa Simbahan nakalitan ug nangayo og tulo ka bulan sa pagkonsiderar sa proposisyon ug sa pagkonsulta sa mga lider sa Simbahan didto sa Ohio. Ang grupo sa mga lumulupyo sa Missouri nga nagpresentar sa mga gipangayo mibaliwala sa hangyo sa mga lider sa Simbahan. Dayon ang mga Santos mihangyo og 10 ka adlaw, apan gihatagan lamang sila og 15 minutos sa pagtubag. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 132–33.)
I-refer ang mga estudyante ngadto sa pangutana sa pisara, ug ipangutana ang mosunod nga pangutana:
-
Unsay inyong bation kon kamo usa sa mga Santos nga nagpuyo sa Independence, Missouri, niining higayona?
Human makatubag ang mga estudyante, dapita ang laing estudyante sa pagbasa og kusog sa mosunod nga paragraph:
Ang mga Taga-Missouri didto sa miting sa korte sa Independence dali nga nahimong manggugubot nga panon ug nakahukom sa pagguba sa buhatan sa pag-imprinta ug sa press. Gilungkab nila ang buhatan sa pag-imprinta, gilabay ang mga kagamitan ngadto sa karsada ug sa tanaman, giguba ang press, gikatag ang imprinta, ug giguba hapit tanan nga naimprinta, lakip na sa kadaghanan sa wala pa mahimong libro nga mga panid sa Basahon sa mga Sugo. Ang manggugubot nga panon misunod pag-adto sa Tindahan ni Gilbert ug Whitney. Hinoon, si Sidney Gilbert misugat sa manggugubot nga panon sa wala pa sila makahimo sa ilang plano ug misaad nga sila mamutos sa mga butang ug mobiya sa tulo ka adlaw. (Tan-awa sa Church History in the Fulness of Times, 133.)
Hangyoa ang mga estudyante sa pagpakigbahin sa ilang mga tubag sa pangutana diha sa pisara kalabut niini nga istorya. Human ang mga estudyante mopakigbahin sa ilang mga hunahuna, dapita ang ikatulo nga estudyante sa pagbasa sa mosunod nga paragraph:
Paglabay sa tulo ka adlaw, niadtong Hulyo 23, ang manggugubot nga panon nagpakita pag-usab sa Lalawigan sa Jackson, Missouri, niining higayona nagdala na og mga riple, mga pistola, mga latigo, ug mga bunal. Gisunog nila ang pundok sa mga uhot ug mga umahan ug miguba sa daghang mga balay, mga kamalig, ug mga patigayon. Sa katapusan giatubang sila sa unom ka mga lider sa Simbahan kinsa, nakakita nga ang kabtangan ug mga kinabuhi sa mga Santos namiligro, ilang gitanyag ang ilang mga kinabuhi isip bayad. Gisalikway kini nga tanyag, ang mga lider sa manggugubot nga panon mihulga nga ang matag lalaki, babaye, ug bata latiguhon gawas kon mouyon sila nga mobiya sa lalawigan. Tungod sa pagpamugos, ang kaigsoonan mipirma sa kasabutan nga mobiya sa Lalawigan sa Jackson. Katunga sa mga miyembro sa Simbahan ug kasagaran sa mga lider mobiya inig Enero 1, 1834, ug ang uban mobiya inig Abril 1, 1834. Ang manggugubot nga panon mitugot nilang John Corrill ug Sidney Gilbert nga magpabilin sa pagbaligya sa kabtangan sa mga Santos kinsa gipapahawa. (Tan-awa sa Church History in the Fulness of Times, 134.)
Dapita ang usa ka estudyante sa pagbasa og kusog sa seksyon sa pasiuna sa Doktrina ug mga Pakigsaad 98. Hangyoa ang klase sa pagsunod, nga mangita unsay nakaaghat niini nga pagpadayag. Hangyoa ang mga estudyante sa pagreport sa ilang mga tubag.
-
Sumala sa seksyon sa pasiuna, unsay nakatalagsaon mahitungod sa tayming niini nga pagpadayag?
Ipasabut nga ang mga Santos sa Ohio nakasinati usab og pagpanggukod niining higayona. Ang mga baruganan niini nga pagpadayag alang kanila, ug kini alang usab nato. Dapita ang usa ka estudyante sa pagbasa og kusog sa Doktrina ug mga Pakigsaad 98:1–2. Hangyoa ang klase sa pagpangita sa tambag nga gihatag sa Ginoo sa mga Santos. (Makatabang tingali ang pagpasabut nga ang Panon, sa bersikulo 2, usa ka Hebreohanon nga pulong nga nagpasabut nga “mga pundok” o “mga kasundalohan.” Ang paggamit niini dinhi nagpasabut nga ang Ginoo nagmando sa mga kasundalohan nga mga anghel, o mga pundok, ug sa mga kasundalohan sa Israel, o sa mga Santos.
-
Unsa nga tambag ang gihatag sa Ginoo ngadto sa mga Santos? (Isulat ang mga tubag sa mga estudyante diha sa pisara.)
-
Nganong importante nga ang mga Santos mohatag og pasalamat sa mga panahon sa kalisud?
-
Unsa kaha ang gipasabut sa mapailubon nga maghulat sa Ginoo?
Dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. Hangyoa ang klase sa pagpaminaw sa unsay kahulugan sa mapailubon nga maghulat sa Ginoo.
“Nan, unsa man ang ipasabut sa paghulat sa Ginoo? Sa mga kasulatan, ang pulong paghulat nagpasabut nga molaum, magpaabut, ug mosalig. Ang paglaum ug pagsalig sa Ginoo nagkinahanglan og pagtuo, pailub, pagpaubos, kaaghup, kamainantuson, pagsunod sa mga sugo, ug paglahutay sa katapusan” (“Nagahulat sa Ginoo: Matuman ang Imong Kabubut-on,” Liahona, Nob. 2011, 72).
-
Ngano man nga ang tambag nga mapailubon nga maghulat sa Ginoo importante ngadto sa mga Santos sa Missouri?
-
Unsa nga mga pulong sa kahupayan ang inyong nakita sa bersikulo 2?
Isulat ang mosunod nga dili kompleto nga pamahayag diha sa pisara: Kon kita magpasalamat sa tanang mga butang ug maghulat nga mapailubon sa Ginoo, nan …
Dapita ang usa ka estudyante sa pagbasa og kusog sa Doktrina ug mga Pakigsaad 98:3. Hangyoa ang klase sa pagsunod, nga mangita kon unsay gisaad sa Ginoo sa mga Santos kon sila mosunod sa Iyang tambag.
-
Unsaon ninyo sa pagkompleto sa baruganan sa pisara base sa bersikulo 3? (Ang mosunod maoy usa ka paagi nga makompleto sa mga estudyante ang baruganan: Kon kita mohatag og pasalamat sa tanang mga butang ug maghulat nga mapailubon sa Ginoo, nan ang Ginoo makahimo sa atong mga kasakit nga molihok alang sa atong kaayohan.)
Dapita ang mga estudyante sa paghunahuna mahitungod sa usa ka tawo nga ilang kaila kinsa naghulat nga mapailubon sa Ginoo atol sa malisud nga mga panahon ug nakakita og mga rason nga magmapasalamaton.
-
Sa unsa nga mga paagi nga ang mga kasakit nakahatag og kaayohan sa kinabuhi niana nga tawo?
Doktrina ug mga Pakigsaad 98:4–10
Ang Ginoo mitambag sa mga Santos nga makighigala sa balaod sa yuta
Ipasabut nga dugang sa pagtambag sa mga Santos nga maghulat nga mapailubon, ang Ginoo misulti kanila sa pagsunod sa tanan Niyang mga sugo (tan-awa sa D&P 98:4) ug miingon nga sila gihatagan og kaangayan “sa pagpakighigala [o pagsuporta] niana nga balaod nga mao ang batakang balaod sa yuta” (D&P 98:6). Mipasabut Siya nga ang batakang balaod sa yuta miabag “niana nga baruganan sa kagawasan sa pag-amping sa mga katungod ug mga kahigayunan” ug nahisakop “sa tanan nga katawhan” (D&P 98:5).
Dapita ang usa ka estudyante sa pagbasa og kusog sa Doktrina ug mga Pakigsaad 98:9–10. Hangyoa ang klase sa pagsunod, nga mangita sa unsay gisulti sa Ginoo mahitungod sa mga lider sa gobyerno. Hangyoa ang mga estudyante sa pagreport sa ilang nakit-an.
-
Sa unsa nga paagi nga ang tambag sa Ginoo sa Doktrina ug mga Pakigsaad 98:4–10 makatabang nato karon bisan asa nga nasud kita magpuyo?
Doktrina ug mga Pakigsaad 98:11–18
Ang Ginoo misugo sa mga Santos sa pagtuman sa ilang mga pakigsaad, bisan atol sa malisud nga mga panahon
Hangyoa ang mga estudyante sa pagpamalandong sa mosunod nga pangutana:
-
Unsa nga ganti ang moabut ngadto niadtong motugyan sa ilang mga kinabuhi alang sa kawsa ni Jesukristo ug sa Iyang pangalan?
Dapita ang usa ka estudyante sa pagbasa og kusog sa Doktrina ug mga Pakigsaad 98:11–15. Hangyoa ang klase sa pagsunod, nga mangita sa tubag niana nga pangutana ug unsay gisulti sa Ginoo sa mga Santos mahitungod sa pagsulay o pagprobar.
-
Unsa nga sugo ang gihatag sa Ginoo sa mga Santos? (Tan-awa sa D&P 98:11–12.)
-
Sumala sa mga bersikulo 13–15, unsa ang usa ka rason nga kita gitestingan sa Ginoo? (Human makatubag ang mga estudyante, isulat ang mosunod nga baruganan sa pisara: Ang Ginoo mosulay nato aron makita kon kita motuman ba sa atong mga pakigsaad bisan kon kini malisud nga buhaton.)
-
Nganong importante man alang sa mga Santos sa Missouri niadtong 1833 nga makahibalo niini nga kamatuoran? Ngano nga kini nga kamatuoran importante nga atong hinumduman karon?
Hangyoa ang mga estudyante sa paghunahuna og usa ka tawo nga ilang nailhan kinsa usa ka maayo nga ehemplo sa pagtuman sa mga pakigsaad atol sa malisud nga mga panahon. Dapita ang pipila ka mga estudyante sa pagpakigbahin sa ilang mga tubag uban sa klase.
Dapita ang mga estudyante sa pagkonsiderar unsay ilang mahimo nga magpabilin nga lig-on ug motuman sa ilang mga pakigsaad bisan malisud kini nga buhaton.
Dapita ang usa ka estudyante sa pagbasa og kusog sa Doktrina ug mga Pakigsaad 98:16–18. Hangyoa ang klase sa pagsunod, nga mangita kon unsay gitambag sa Manluluwas nga buhaton sa mga tawo. Dapita ang mga estudyante sa pag-report sa ilang mga nakit-an.
Doktrina ug mga Pakigsaad 98:19–22
Ang Ginoo misulti sa mga Santos a Kirtland sa paghinulsol
Ipasabut nga sa dihang gihatag sa Ginoo kini nga pagpadayag, ang mga Santos sa Kirtland, Ohio, nakasinati usab og mga kalisud. Sa Doktrina ug mga Pakigsaad 98:19–22, mabasa nato ang mensahe sa Ginoo alang kanila.
Dapita ang usa ka estudyante sa pagbasa og kusog sa Doktrina ug mga Pakigsaad 98:19–22. Hangyoa ang klase sa pagsunod, nga mangita unsay gisulti sa Ginoo mahitungod sa mga Santos sa Kirtland. Dapita ang mga estudyante sa pagreport unsa ang ilang nakit-an.
-
Sa unsa nga paagi nga ang mga pulong sa Ginoo mahitungod sa mga Santos sa Kirtland may kalabutan sa unsay Iyang gisulti sa mga Santos sa Missouri? (Tan-awa sa D&P 98:11.)
-
Sa unsa nga paagi nga ang mensahe sa Ginoo sa bersikulo 11 atong magamit? (Tabangi ang mga estudyante nga makasabut nga “mounong ngadto” sa maayo mao ang walay pagduha-duha sa pagbuhat niini.)
Tapusa pinaagi sa pagpakigbahin sa imong pagpamatuod mahitungod sa mga doktrina ug mga baruganan nga gihisgutan karon. Awhaga ang mga estudyante sa pagbiya sa ilang mga sala ug mounong ngadto sa maayo.
Komentaryo ug Background nga Impormasyon
Doktrina ug mga Pakigsaad 98. Mga hinungdan sa panagbangi didto sa Lalawigan sa Jackson
“Ang orihinal nga mga lumulupyo sa dapit nagkadako ang pagduda samtang ang gidaghanon sa mga miyembro sa Simbahan dali nga mitubo. Daghang mga tawo ang nahadlok nga sa dili madugay maapsan ang ilang gidaghanon sa bag-ong relihiyoso nga pundok nga gikan sa Silangan. Ang ‘karaan nga mga nanimuyo’ gikan sa lain-laing sirkumtansya kay sa nangabut nga mga Santos sa Ulahing mga Adlaw, ug natural lang nga ang kultura, politikal, relihoyoso, ug ekonomikanhong mga kalainan mahitabo.
“Ang mga residente sa Lalawigan sa Jackson mga bagis ug abtik nga grupo nga gikan sa mga rehiyon sa kabukiran sa daghang habagatang mga estado ngadto sa kasadpang bahin sa Estados Unidos sa pagpangita og kagawasan gikan sa pagkontrolar sa kaugalingon. Kadaghanan kanila dili edukado ug kulang og maayong pamatasan sa kultura nga komon sa New England ug sa Silangan. Kadaghanan nila apil sa panamastamas, pagsupak sa Igpapahulay, lumba sa kabayo, tari, katapulan, hubog-hubog, sugal, ug pagkabayolente. …
“Ang karaang mga nanimuyo naghunahuna nga ang nagkadaghan nga pundok sa mga Santos nga usa ka politikanhong hulga, bisan og ang mga miyembro sa Simbahan wala molansar og katungdan o usa ray gibotaran sa tanan atol sa ilang mubo nga pagpuyo sa Lalawigan sa Jackson. Pagka-Hulyo 1833 ang populasyon sa Mormon sa lalawigan hapit na mag-dose ka gatus, dugangan pa sa mangabut kada bulan. Ang ubang mga miyembro nanghambog nga liboan pa ang moabut aron mopuyo sa lalawigan. … Ang lokal nga mga lumulupyo natural nga nahadlok sa relihiyosong kadasig nga nanagna nga ang tanang ‘mga Hentil’ (dili-mga Mormon) malaglag kon ang milenyal nga gingharian maestablisar sa Lalawigan sa Jackson.
“Ang mga ministro nga Protestante misupak usab sa pagsulod sa mga Mormon diha sa lalawigan. Ang mga Santos sa Ulahing mga Adlaw giisip nga mga panatik ug mga kriminal ug dali matunto ug ignorante tungod kay nagtuo sila ug kanunay nga nakasinati og mga milagro, panagna, mga pagpang-ayo, mga pagpadayag, ug nagsulti og mga pinulongan. Ang kasina ug kahadlok nga mawala ang ilang mga miyembro nakadugang sa pagsupak sa mga ministro. …
“Dugang pa, ang Mormon nga mga negosyante ug magpapatigayon malampusong mipuli sa porsyon sa mapuslanon nga Santa Fe Trail trade nga kaniadto gidominahan sa mga Taga-Missouri. Ang pipila ka karaang mga lumulupyo nahadlok nga ang mga miyembro sa Simbahan determinado sa pagkuha sa ilang mga yuta ug mga negosyo. Dugang pa, ang mga Santos ‘wala mopalit sa lokal nga mga negosyante, kay wala silay kwarta, apan nagbinaloay sa ilang mga kaugalingon didto sa storehouse sa Simbahan. … Ang pipila ka karaang mga lumulupyo mibaligya sa ilang kabtangan ngadto sa mga Mormons ug namalhin. Nagpasabut kini nga nagkagamay ug nagkagamay ang mga kustomer sa mga tindahan, ug umaabut nga pagkaguba sa panalapi’ alang sa nahibilin nga karaang mga lumulupyo [T. Edgar Lyon, “Independence, Missouri, and the Mormons, 1827–1833,” BYU Studies, autumn 1972, 17–18].
“Nahimo pa nga mas komplikado, sa tingpamulak niadtong 1833 ang Missouri gibahaan, miguba sa dungguanan sa Independence, ug mibalhin sa agianan sa suba palayo sa komunidad. Ang usa ka bag-ong lungsod, ang Westport, nga dunay mas maayong dungguanan, natukod didto sa ibabaw sa suba, ug ang negosyo sa Independence mihinay. Ang mga negosyante sa Independence mibasol sa mga Mormons niini nga sitwasyon. Nagtan-aw unsay mahitabo sa umaabut, ang pipila ka karaang mga lumulupyo mitanyag nga mobaligya ngadto sa mga Santos. Ang miyembro sa Simbahan gusto nga mopalit sa mga umahan ug mga kabtangan, apan walay igong kwarta nga ikapalit. Nakapalagot kini sa mga Taga-Missouri, ug sa wala madugay naghimo-himo sila og mga istorya kon unsa ka pobre ang mga Mormons.
“Ang Missouri frontiersmen nahadlok ug nasilag sa mga Indian. Ang ilang kasilag nagkadako niadtong 1830 sa dihang ang gobyerno nagsugod sa pagpamalhin sa silangang mga tribo sa mga yuta nga kasadpan sa Independence. Human sa 1832 nga Gubat sa Black Hawk, ang mga lumulupyo sa kasadpang Missouri nanghangyo sa Kongreso sa pagbutang og mga sundalo alang sa ilang proteksyon. Ang unang Mormon nga mga misyonaryo miabut atol niining tensyonado nga kahimtang namahayag sa mapanagnaong kahimtang sa lumad nga mga Amerikano. Ang karaan nga mga lumulupyo nahadlok nga ang mga Santos mogamit sa mga Indian sa pagtabang nila nga maangkon ang dapit alang sa ilang Bag-ong Jerusalem. Migrabe pa ang pagkakomplikado tungod sa Protestante nga mga ministro nga nasina sa mga paningkamot sa pag-proselyte sa mga Santos sa Ulahing mga Adlaw ngadto sa mga Indian.
“Ang panagbangi tali sa mga Santos ug sa karaan nga mga lumulupyo nahimong krisis bahin sa isyu sa pagkaulipon. Ang Missouri nahimong kabahin sa Estados Unidos isip usa ka estado diin ang pagkaulipon legal ubos sa inila nga Compromise niadtong 1820. Ang pagpanag-iya og ulipon limitado, hinoon. Ang karaan nga mga lumulupyo mihatag og bili sa pagpanag-iya og mga ulipon ug misaway nga wagtangon ang mga ulipon. Ang ubang mga Santos midala sa mga sentimento sa pagwagtang sa mga ulipon gikan sa Amihanan ug Silangan, ug ang posibilidad sa pagrebelde sa mga itom maoy gikahadlokan sa tibuok Kasadpan niining higayuna. Niadtong 1831 ang pag-alsa sa mga ulipon nga pinangulohan ni Nat Turner sa Virginia miresulta sa kamatayon sa labaw sa kapitoan ka mga puti ug usa ka gatus ka ulipon. Ang dili resonable nga kahadlok sa pag-alsa mikatap sa mga estado nga legal ang pag-ulipon. Busa, ang mga Taga-Missouri nadisturbo pag-ayo sa sayong bahin niadtong1832 sa mga huhungihong nga ang mga Santos naningkamot sa pagdani sa mga ulipon sa pagsupak sa ilang mga agalon o sa pag-eskapo.
“Sa paghunong dayon sa mga huhungihong, ang Hulyo 1833 Evening and Morning Star mimantala og artikulo nagpasidaan sa mga misyonaryo mahitungod sa pag-proselyte sa mga ulipon ug sa kanhi mga ulipon, nga nailhan nga ‘kagawasan sa mga tawo nga lahi og pamanit.’ Walay swerte ang lokal nga mga Taga-Missouri nagtuo nga kini nga tambag nagpasabut nga si Brother Phelps nangimbitar sa mga free black sa pag-apil sa mga Mormon sa Lalawigan sa Jackson. Ang artikulo nakamugna og tumang kasuko nga si Phelps miisyu og ‘Dugang’ nagpasabut nga ang Simbahan walay tuyo sa pag-imbitar sa mga free black sa Missouri, apan ang iyang pagpasabut wala makakombinser sa mga Taga-Missouri” (Church History in the Fulness of Times Student Manual, 2nd ed. [manwal sa Church Educational System, 2003], 130–32).