Leksyon 121
Ang Simbahan Gibalhin ngadto sa Amihanang bahin sa Missouri
Pasiuna
Niadtong 1837 ug 1838, si Propeta Joseph Smith ug ang ubang mga lider sa Simbahan midumala sa Simbahan sa lisud nga panahon. Isip resulta sa ekonomikanhong kalisud, kahakog, pagpangita og sayop, ug mga pagpanggukod, 10 ngadto sa 15 porsyento sa mga Santos sa Kirtland, Ohio, ug sa amihanang bahin sa Missouri ang miapostasiya, lakip na ang pipila ka prominente nga mga lider sa Simbahan. Ang matinud-anong mga Santos sa Ohio nagsugod sa pagpamalhin aron moapil niadtong anaa sa amihanang bahin sa Missouri. Kini nga leksyon makatabang sa mga estudyante nga makasabut ug makakat-on gikan sa makasaysayanong mga panghitabo ug makahatag kanila og mga ideya sa mga pagpadayag nga nadawat atol niining panahona.
Mga Sugyot alang sa Pagtudlo
Apostasiya ug ang siyudad sa Far West
Atol sa panahon sa apostasiya ug pagpanggukod, ang matinud-anong mga Santos namalhin sa amihanang bahin sa Missouri
Sa dili pa magklase, isulat ang mosunod nga pangutana diha sa pisara: Ang mga kalisud ug mga pagsulay makatabang ba sa pagpalig-on sa atong pagtuo o makapawala sa atong pagtuo? Mahimo usab kang magdrowing og map diha sa pisara nga nagpakita sa lokasyon sa Kirtland, Ohio, ug sa ubang mga pinuy-anan [settlement] sa amihanang bahin sa Missouri.
Sugdi ang klase pinaagi sa pagdapit sa mga estudyante sa pagtubag sa pangutana diha sa pisara. Human mapakigbahin sa mga estudyante ang ilang mga ideya, ipasabut nga niadtong 1837 ug 1838, usa ka panahon sa mga pagsulay ang miresulta nga daghang mga Santos ang nagsagubang niini gayud nga pangutana. Ipasabut nga niini nga leksyon, ang mga estudyante makakat-on mahitungod niining lisud nga mga panghitabo ug unsay reaksyon sa mga Santos niini. Dapita ang mga estudyante sa pagpamalandong kon sa unsang paagi nga ang atong reaksyon sa mga pagsulay makapalig-on o makapahuyang sa atong pagtuo kang Jesukristo.
Mahimo usab nimong ipasabut sa mga estudyante nga kining leksyon makatabang nga ilang masabtan ang historical setting sa mga pagpadayag nga ilang tun-an sa Doktrina ug mga Pakigsaad 113–123.
Itudlo ang Missouri diha sa mapa. Ipasabut nga sa dihang gipalayas ang mga Santos gikan sa Lalawigan sa Jackson, Missouri, niadtong 1833, ang mga lumulupyo sa silingang Lalawigan sa Clay miabi-abi sa daghan kanila ug mihatag kanila og kahupayan, naglaum nga ang mga Santos temporaryo ra nga moistar didto. Hinoon, human makapuyo didto ang mga Santos sulod sa hapit tulo ka tuig, kining mga lumulupyo nagsugod na sa pagpugos kanila nga mobiya sa lalawigan.
Itudlo ang Kirtland, Ohio, diha sa mapa. Ipasabut nga niadtong 1837, ang tuig human mapahinungod ang Templo sa Kirtland, ang mga Santos nakasinati og mga pagsulay sa ilang pagtuo. Igong gidaghanon sa mga Santos ang miapostasiya ug mibiya sa Simbahan, lakip na sa pipila ka prominente nga mga lider sa Simbahan.
Bahina ang klase ngadto sa duha ka grupo. Hatagi og kopya sa usa sa mosunod nga mga historical summary ang matag grupo. (Kon dako ang imong klase, mahimo nimong bahinon ang mga estudyante ngadto sa upat o unom ka grupo ug hatagi ang matag grupo og usa sa mga summary. Motugot kini og daghan pang mga estudyante nga moapil sa panaghisgutan.) Dapita ang matag grupo sa pagbasa og dungan sa summary ug sa paghisgot sa mga pangutana diha sa katapusan sa summary. I-assign ang usa ka tawo sa matag grupo nga mangulo sa panaghisgutan ug motabang sa grupo sa pagsulat og baruganan nga ipakigbahin ngadto sa klase sa dili madugay.
Historical Summary 1—Apostasiya sa Kirtland
Niadtong 1837, ang mga Santos didto sa Kirtland, Ohio, nakasinati og mga problemang pinansyal. Aron matabangan ang mga Santos nga mas makasustiner sa ilang pinansyal, si Joseph Smith ug ang ubang mga lider sa Simbahan miestablisar og usa ka kompanya nga susama sa bangko ug mitawag niini og Kirtland Safety Society. Tungod sa mikatap nga ekonomikanhong depresyon atol niining panahona, daghang bangko ang napakyas sa tibuok nasud. Ang Kirtland Safety Society napakyas usab sa tinglarag sa 1837. Duha ka gatus ka mga namuhunan ang hapit nawad-an sa tanan, nga si Joseph Smith nahiagum sa kinadak-ang pagka-alkanse. Bisan kon ang Kirtland Safety Society wala gitukod sa Simbahan, ang pipila ka mga Santos mikonsiderar niini nga bangko sa Simbahan o bangko sa Propeta ug gimahay si Joseph Smith sa ilang mga problemang pinansyal. Ang uban nagsugod sa pagtawag kaniya og napukan nga propeta. Apan bisan pa man sa pagkapakyas sa bangko, daghan niadtong nawad-an og kwarta mipadayon diha sa pagtuo ug nagpabiling matinud-anon ngadto sa Propeta. (Tan-awa sa Church History in the Fulness of Times Student Manual [manwal sa Church Educational System, 2003], 171–73.)
Mga pagbati sa apostasiya ug pagpangita og sayop ang mikatap sa daghang mga Santos. Gihulagway ni Brigham Young ang usa ka okasyon sa dihang ang pipila ka mga lider sa Simbahan ug mga Santos nagpundok aron isalikway si Joseph Smith ug motudlo og bag-ong propeta:
“Pipila sa Napulog Duha, mga saksi sa Basahon ni Mormon, ug uban sa mga Awtoridad sa Simbahan, mipahigayon og usa ka council didto sa taas nga lawak sa Templo. Ang ilang gihisgutan mao ang pagsiguro kon unsaon pagtangtang si Propeta Joseph, ug si David Whitmer ang itudlo nga Presidente sa Simbahan. … Mibarug ako, ug sa yano ug maisugon nga paagi misulti kanila nga si Joseph usa ka Propeta, ug ako nasayud niini, ug nga sila mahimong magbagulbol ug mopakaulaw kaniya kutob sa ilang gusto, sila dili makaguba sa pagkatudlo sa Propeta sa Dios, sila makaguba lamang sa ilang kaugalingong awtoridad, makaputol sa nagbugkos kanila ngadto sa Propeta ug ngadto sa Dios ug motambug sa ilang kaugalingon ngadto sa impyerno” (Manuscript History of Brigham Young 1801–1844, ed. Elden Jay Watson [1968], 15–16).
Pagka-Hunyo 1838, mga 200 o 300 ka mga apostate ang mibiya sa Simbahan, lakip sa upat ka mga Apostoles, ang Tulo ka mga Saksi sa Basahon ni Mormon, ug usa ka sakop sa Unang Kapangulohan (tan-awa sa Church History in the Fulness of Times, 177). Bisan pa niana, kadaghanan sa mga Santos mipakita og hugot nga pagtuo niining panahon sa pagsulay, sama gayud sa gibuhat ni Brigham Young. Gilig-on sila sa Ginoo, ug nagpabilin silang matinud-anon sa ilang mga pagpamatuod. Pipila niadtong mibiya sa Simbahan atol niining panahon sa apostasiya sa wala madugay mibalik ug mihangyo nga mahiusa sila pag-usab uban sa Simbahan sa Ginoo. Lakip nila mao sila si Oliver Cowdery, Martin Harris, Luke Johnson, ug Frederick G. Williams.
Taliwala niining mga panlimbasug didto sa Kirtland, pipila ka mga apostate ang nagtinguha sa pagpatay ni Joseph Smith. Gipasidan-an sa Espiritu, siya ug si Sidney Rigdon mibiya pagkagabii niadtong Enero 12, 1838. Ang ilang mga kaaway migukod kanila sulod sa mga adlaw, apan gipanalipdan sila sa Ginoo. Miabut sila uban sa ilang mga pamilya didto sa Far West, Missouri, niadtong Marso 14, 1838.
Hisguti ang mosunod nga mga pangutana diha sa grupo:
-
Unsa nga mga baruganan ang atong makat-unan gikan niining makasaysayanong mga panghitabo?
-
Unsa kaha ang imong gibuhat aron magpabiling matinud-anon ngadto sa Propeta atol niining panahon sa pagpangita og sayop?
-
Kanus-a man nga ang paglahutay sa usa ka pagsulay uban sa pagtuo nakapalig-on sa imong pagtuo sa Manluluwas?
-
Sa unsang mga pamaagi nga ang pagsunod sa propeta nahimong espirituhanong panalipod alang kanimo?
Historical Summary 2—Pagpangulo sa Amihanang bahin sa Missouri
Sa ting-init niadtong 1836, sa dihang ang mga lumulupyo sa Lalawigan sa Clay, Missouri, namugos sa mga Santos sa pagpangita og mas permanente nga kapuy-an, sila si John Whitmer ug William W. Phelps, ang duha ka mga magtatambag sa kapangulohan sa stake sa Missouri, migamit sa kwarta sa Simbahan aron sa pagpalit og yuta sa usa ka dapit nga nailhan isip Far West sa amihanang bahin sa Missouri. Hinoon, sa dihang ilang gitanyag ang mga luna sa yuta ngadto sa moabut nga mga Santos, ilang gibaligya ang yuta nga dunay gamayng ginansya, nga ilang gitago para sa ilang kaugalingon. Nasagmuyo tungod niini ug sa uban pang kalapasan, ang high council sa Missouri mitangtang sa kapangulohan sa stake gikan sa ilang katungdanan.
Giuyonan ni Joseph Smith ang aksyon sa council, ug si William W. Phelps nasilo. Pagka-Nobyembre 1838, si Brother Phelps mipirma og affidavit batok sa Propeta. Kini nga affidavit nakatampo sa pagkaaresto nila ni Joseph Smith ug sa uban ug pagkatambug sa Liberty Jail alang sa tingtugnaw. Si Brother Phelps gi-excommunicate gikan sa Simbahan sa wala madugay human niana.
Didto sa bilanggoan, si Joseph Smith ug kadtong kuyog niya hilabihan nga nag-antus, dili lang sa grabe kaayo nga kahimtang sa ilang pagkabilanggo apan gikan usab sa mga report nga ang mga Santos gipapahawa sa ilang mga pinuy-anan ug giabuso sa daghang paagi. Ang manggugubot nga panon sa Missouri, nga wala masusi sa gobernador, miguba sa mga kabtangan ug mga kinabuhi, lakip na sa pagmasaker sa 17 ka tawo sa usa ka galingan nga gipanag-iya sa usa ka tawo nga ginganlan og Jacob Haun.
Nag-antus si William W. Phelps sa espirituhanong paagi tungod sa iyang mga aksyon, ug misulat siya kang Joseph Smith nga nangayo og pasaylo usa ka tuig human niana. Si Propeta Joseph Smith mibalus og sulat:
“Tinuod kini, nga nag-antus kami sa hilabihan agig sangputanan sa imong batasan. …
“Bisan pa man niana, ang kopa nainom na, ang kabubut-on sa atong Amahan nahimo na, ug kami buhi pa gihapon, niana kami nagpasalamat sa Ginoo. …
“Kon ang imong pagkumpisal tinuod, ug ang imong paghinulsol tinud-anay, ikalipay nakong ihatag kanimo pag-usab ang tuo nga kamot sa pakigdait, ug maglipay sa paghiuli sa maluibon. …
“‘Dali minahal nga igsoon, kay ang gubat humana,
“‘Kay ang managhigala sa una, sa katapusan managhigala ra gihapon’” (sa History of the Church, 4:163, 164).
Hisguti ang mosunod nga mga pangutana diha sa grupo:
-
Nganong lisud pasayloon ang usa ka higala nga nagluib kaninyo ug mao ang nakaingon nga nag-antus mo?
-
Unsay mga baruganan nga atong makat-unan gikan sa ehemplo ni Joseph Smith?
-
Unsay ubang mga leksyon nga atong makat-unan gikan niini nga kasinatian?
Human makabaton og panahon ang mga grupo sa pagbasa ug paghisgot sa mga historical summary, dapita sila sa pagsaysay og usab ngadto sa klase sa kasaysayan nga ilang nakat-unan ug sa mga baruganan nga ilang nahibaloan. Samtang nagtudlo sila, hangyoa sila sa pagsulat sa mga baruganan diha sa pisara. Kining mga baruganan mahimong maglakip sa mosunod: Sa pagpili nato nga motubag sa mga pagsulay uban sa pagtuo imbis nga pagduha-duha, ang atong mga pagpamatuod malig-on; samtang mosuporta kita sa propeta ug mosunod sa iyang tambag, makadawat kita og espirituhanong kasiguroan nga mobugkos kanato ngadto sa Dios (tan-awa sa historical summary 1). Sa pagpasaylo nato sa uban, mahimong ayuhon sa Ginoo ang atong mga relasyon (tan-awa sa historical summary 2).
Sa pagtino sa mga estudyante sa mga baruganan, ipangutana ang mosunod nga fmga pangutana aron matabangan sila nga makasabut ug mobati sa kaimportante niining mga kamatuoran. Kining mga pangutana mahimong maglakip sa mosunod:
-
Nganong kini nga baruganan importante nga atong mahinumduman?
-
Unsaon ninyo sa pagpasabut niini nga kamatuoran ngadto sa usa ka higala?
-
Kanus-a kamo nakasinati o nakakita og usa ka ehemplo niini nga baruganan?
Aron matabangan ang mga estudyante nga magamit kining mga kamatuoran nga ilang nakat-unan, hangyoa sila sa pagpili og usa o duha sa mga baruganan nga natino sa mga grupo. Dayon dapita sila sa pagsulat og tubag sa mosunod nga pangutana diha sa ilang mga class notebook o mga scripture study journal:
-
Unsa ang akong buhaton nga lahi tungod sa baruganan o mga baruganan nga akong nakat-unan karon?
Mga panghitabo nga misangput sa pagpapahawa sa mga Santos gikan sa amihanang bahin sa Missouri
Hangyoa ang klase sa pag-isa sa ilang mga kamot kon nakakita na sila og usa ka miyembro sa Simbahan nga mihimo og pagpili nga mao ang nakaingon nga ang usa ka tawo dunay negatibong impresyon bahin sa Simbahan. (Ayaw sila hangyoa sa pagpakigbahin sa ilang mga kasinatian.) Mahimo usab nimong hangyoon ang mga estudyante sa pagkonsiderar kon sa unsang paagi nga ang kaugalingon nilang mga aksyon nakaimpluwensya sa mga impresyon sa uban bahin sa Simbahan.
-
Nganong importante alang kanato nga maghunahuna kon sa unsang paagi nga ang atong mga aksyon o mga pulong makaapekto sa Simbahan?
Ipasabut nga niadtong 1838 ang mga aksyon ug mga pulong sa ubang mga miyembro sa Simbahan nakapadugang sa negatibong mga pagbati sa ubang mga lumulupyo sa Missouri ngadto sa mga Santos sa Ulahing mga Adlaw. Hatagi ang mga estudyante og mga kopya sa mosunod nga historical summary, ug dapita ang usa ka estudyante sa pagbasa niini og kusog. Hangyoa ang klase sa pagsunod, nga mangita sa mga butang nga gisulti o gibuhat sa ubang mga Santos nga nakadaut sa Simbahan ug sa mga miyembro niini. Ikonsiderar ang pagdapit sa estudyante sa paghunong human sa matag paragraph. Sa matag paghunong, pangutan-a ang mga estudyante sa mosunod:
-
Unsa ang gisulti o gibuhat sa pipila ka mga Santos nga mao ang hinungdan sa negatibong mga reaksyon ngadto sa Simbahan?
Niadtong 1837 ug 1838, ang ubang nasilo ug na-excommunicate nga mga miyembro sa Simbahan nga nagpuyo kauban sa mga Santos didto sa Far West misugod sa pagpasaka og mga kaso batok sa Simbahan ug sa mga lider niini ug sa pagsamok sa Simbahan. Ang ubang mga Santos nagsugod na og kawalay pailub niining mga masupakon. Pagka-Hunyo 1838, si Sidney Rigdon mainitong namulong sa unsay nailhan isip ang “Wali bahin sa Asin [Salt Sermon].” Gipasabut niya ang Mateo 5:13 ug miingon nga kon ang asin kawad-an sa lami niini, dili na gayud kini kapuslan sa bisan unsa ug angay nga isalibay sa gawas, nga nagpasabut nga kadtong mibiya sa Simbahan kinahanglang isalikway sa mga Santos. Dugang pa, 84 ka mga miyembro sa Simbahan ang mipirma og usa ka dokumento nga nagmando sa mga miapostasiya sa pagbiya sa lalawigan. Duha ka semana human niana, pagka-Hulyo 4, si Sidney Rigdon mihatag og pakigpulong diin misaad siya nga ang mga Santos mopanalipod sa ilang kaugalingon bisan kon moresulta pa kini sa “gubat nga hinutdanay.” Bisan kon kining duha ka mga pakigpulong morag misukwahi sa instruksyon sa Ginoo nga “[m]angamuyo alang sa kalinaw” (D&P 105:38), ang duha ka mga pakigpulong gimantala ug nakaingon sa hilabihan nga pagkaalarma sa dili mga Santos sa Ulahing mga Adlaw. (Tan-awa sa Church History in the Fulness of Times, 191–92.)
Pagka-Agosto 6, 1838, samtang ang usa ka grupo sa mga Santos misulay sa pagbotar didto sa Gallatin, Missouri, gisalikway sila sa usa ka grupo sa mga taga-Missouri, ug usa ka tawo gikan sa maong lugar ang mihapak sa usa sa mga Santos. Mibalus ang mga Santos, ug daghang kalalakin-an sa duha ka habig ang nangaangol. Kini nga insidente miresulta sa dugang nga mga panagbingkil ug pangpanghulga ug mipasamut sa kawalay pagsinabtanay tali sa mga Santos sa Ulahing mga Adlaw ug sa ilang mga silingan didto sa Missouri.
Atol niining panahona, usa ka kinabig nga ginganlan og Sampson Avard ang mipasiugda og sekreto nga mga panumpa ngadto niadtong moapil kaniya sa pagporma og usa ka pundok sa mga tulisan nga gitawag og mga Danite. Gisugo sila ni Avard nga manulis ug mangawat sa mga taga-Missouri, nga nag-ingon nga makatabang kini sa pagtukod sa gingharian sa Dios. Nakumbinser ni Avard ang iyang mga sumusunod nga ang iyang mga mando nagagikan sa Unang Kapangulohan. Ang kamatuoran nadiskubrihan sa wala madugay, ug si Avard gi-excommunicate. Ang mga aksyon ni Avard nakaingon sa dako nga kadaut sa imahe sa Simbahan ug nakatabang nga mosangput sa pagkabilanggo sa Propeta didto sa Liberty Jail.
Pagka-Oktubre 1838, usa ka gubat tali sa mga miyembro sa Simbahan ug mga sakop sa militia sa Missouri ang nakakalas og pipila ka kalalakin-an sa matag habig. Gipasubrahan nga mga report bahin sa gubat ang miabut kang Gobernador Lilburn W. Boggs, gobernador sa estado sa Missouri, kinsa miisyu dayon sa unsay nailhan nga sugo sa pagpatay: “Ang mga Mormon kinahanglang isipon nga mga kaaway ug kinahanglan puohon gayud o palayason gikan sa estado, kon mahimo alang sa kaayohan sa publiko” (kinutlo sa History of the Church, 3:175). Sa wala madugay, ang siyudad sa Far West gilibutan sa usa ka militia nga ang gidaghanon kalima pil-a ang pwersa sa mga Santos. Si Joseph Smith ug ang ubang mga lider sa Simbahan gibilanggo didto sa Liberty Jail, diin nagpabilin sila sa tibuok tingtugnaw. Ang nahibilin sa mga Santos gipugos nga mobiya sa estado.
-
Ngano kaha nga importante alang kanato nga mahibalo nga ang ubang pagpanggukod nga giantus sa mga Santos miresulta tungod sa mga aksyon sa mga miyembro sa Simbahan?
-
Unsa ang atong makat-unan gikan niining mga panghitabo mahitungod kon sa unsang paagi nga ang kaugalingon natong mga aksyon ug mga pulong makaimpluwensya sa uban? (Samtang motubag ang mga estudyante, hatagi og gibug-aton ang mosunod nga baruganan: Ang atong mga aksyon ug mga pulong makaimpluwensya kon unsay pagtan-aw sa uban sa Simbahan ni Jesukristo. Mahimo nimong hangyoon ang mga estudyante sa pagbasa sa Alma 39:11.)
Dapita ang pipila ka estudyante sa pagpakigbahin sa ilang mga kasinatian sa dihang nakita nila nga ang mga pulong o mga aksyon sa laing tawo nakaimpluwensya sa laing tawo nga makabaton og positibong pagtan-aw bahin sa Simbahan.
Tapusa pinaagi sa pag-refer og balik ngadto sa pangutana nga imong gisulat diha sa pisara sa wala pa magklase. Dapita ang mga estudyante sa pagpakigbahin kon unsay ilang nakat-unan karon mahitungod kon sa unsang paagi nga ang atong pagtubag sa mga hagit ug mga pagsulay makapalig-on o makapahuyang sa atong pagtuo. Ipakigbahin ang imong pagpamatuod mahitungod sa pagpabiling matinud-anon ngadto sa ebanghelyo atol sa mga panahon sa kalisdanan.
Komentaryo ug Background nga Impormasyon
Ang mga paghulagway sa panahon sa apostasiya didto sa Kirtland
Panahon sa 1837 usa ka dautang kinaiya ang mihasul sa ubang mga miyembro sa Simbahan didto sa Kirtland, Ohio:
“Niining panahona ang kinaiya sa pagpangagpas nga moginansya og hilabihan ka dako nga naglangkob sa pagpamuhunan diha sa mga yuta ug kabtangan sa tanang matang, nga kasagarang nahitabo sa tibuok nasud, dunay dakong impluwensya sa mga miyembro sa Simbahan. Ang mga bunga niini nga kinaiya, dautang pagtagna, pagpangita og sayop, kawalay panaghiusa, panagsumpaki, ug apostasiya nga tanan daling naklaro, ug morag ang tanang gahum sa yuta ug impyerno naghiusa sa impluwensya niini sa espesyal nga paagi aron mapukan ang Simbahan diha-diha, ug permanente nga motapus sa Simbahan” (History of the Church, 2:487).
Si Eliza R. Snow, kinsa nagpuyo sa Kirtland niining panahona ug wala madugay miserbisyo isip ikaduhang presidente sa Relief Society, mihulagway niini nga panahon sa Kirtland:
“Daghan sa nahimong mapainubsanon ug matinud-anon sa pagbuhat sa matag katungdanan—andam nga molihok sumala sa matag sugo gikan sa Priesthood, nahimong arogante, ug gibayaw sa garbo sa ilang mga kasingkasing. Samtang ang mga Santos hingpit nga mihangup sa ilang gugma sa kalibutan ug sa pagkakalibutanon, ang Espiritu sa Ginoo mipalayo sa ilang kasingkasing, ug napuno sila sa garbo ug kayugot ngadto niadtong mipabilin sa ilang kaligdong” (Biography and Family Record of Lorenzo Snow [1884], 20).
Gihulagway ni Brigham Young ang kahimtang sa Simbahan panahon niadtong 1837 ug sa iyang mga paningkamot sa pagpanalipod kang Propeta Joseph Smith:
“Niining panahona ang kinaiya sa pagpangagpas, kawalay pagbati ug apostasiya nga gihangup sa daghan sa Napulog Duha, ug milukop sa tanang Korum sa Simbahan, hilabihan gayud nga mipatigbabaw nga lisud alang ni bisan kinsa nga makita og klaro ang dalan nga agian.
“… Usa kini ka krisis sa dihang ang yuta ug impyerno morag naghiusa sa pagpukan sa Propeta ug sa Simbahan sa Dios. Daghan sa labing lig-on nga kalalakin-an sa Simbahan ang nagduha-duha.
“Atol niining pag-ataki sa gahum sa kangitngit nagpabilin kong matinud-anon kang Joseph, ug, inubanan sa tanang kaalam ug gahum nga gihatag sa Dios ngari kanako, gigamit nako ang tanan nakong kusog sa pagpaluyo sa sulugoon sa Dios ug mihiusa sa mga korum sa simbahan” (Manuscript History of Brigham Young 1801–1844, ed. Elden Jay Watson [1968], 15, 16–17).
Mga butang nga nakatampo sa mga problemang pinansyal didto sa Kirtland
Niadtong 1837, mga pagbati sa kahakog ang nasinati sa ubang mga miyembro sa Simbahan ug bisan sa ubang prominente nga mga lider sa Simbahan didto sa Kirtland. Ang kwarta nga bulawan ug pilak nihit. Ang mga tawo migamit og kwarta nga papel gikan sa pipila ka bangko diha sa dapit. Aron matabangan ang mga Santos nga mahimong makasustiner sa kaugalingon sa ilang pinansyal, si Joseph Smith ug ang ubang mga lider sa Simbahan miestablisar og usa ka kompanya nga susama sa bangko nga gitawag og Kirtland Safety Society. Daghang mga Santos ang mipalit og stock sa bag-ong bangko. Sulod sa pipila ka bulan sa pagbukas sa kompanya alang sa negosyo, usa ka pinansyal nga krisis, nga sa wala madugay gitawag og ang kalisang sa 1837, nagsugod didto sa Siyudad sa New York ug mikatap paingon sa kasadpang bahin, nga miresulta sa pagkahugno sa gatusan ka mga bangko, lakip na ang Kirtland Safety Society.
Lain pang mga butang ang nakatampo sa kahuyang sa Kirtland Safety Society. Daghang lain nga mga bangko ang midumili sa pagdawat sa kwartang papel sa Safety Society isip tinuod nga kwarta, ug ang mga newspaper nga kontra sa mga Mormon mitawag sa kwarta nga walay bili. Dugang pa, ang kapital sa kapunongan mga yuta; wala kini kapanag-iya og daghang pisikal nga kwarta, sama sa bulawan ug pilak, aron makatagbaw sa bisan unsa nga dagkong panginahanglan sa pagtubos sa kwartang papel niini. Ang mga kaaway sa Simbahan nakabaton og daghang kwartang papel aron makakuha og tinuod nga kwarta gikan sa bangko, nga nakapwersa sa kapunongan sa paghunong sa pagbayad og bulawan ug pilak ngadto sa mga kustomer niini pipila lamang ka semana human napagawas ang unang kwartang papel. Isip resulta, sila si Joseph Smith ug Sidney Rigdon gikiha sa paglapas sa mga lagda sa bangko sa Ohio ug gihusay. Gipamulta sila si Joseph ug Sidney og $1,000 matag usa.
Gibuhat ni Joseph Smith ang tanan niyang mahimo aron maagni ang mga namuhunan sa paghatag og dugang pundo aron makasustiner ang bangko, apan sa katapusan gipasa niya ang pagpadagan niini ngadto sa uban. Bisan pa man niana, napakyas kini sa pagsulbad sa problema. Ang walay kasinatian ug dili matinuoron nga mga tigdumala mipahuyang pa og samut sa bangko. Si Warren Parrish, ang cashier sa bangko ug personal nga escriba ni Joseph, mikawat og sobra sa 20,000 ka dolyar.
Ang nagkagrabe nga kinaiya sa pagpangagpas didto sa Kirtland nakadugang usab sa ekonomikanhong mga problema sa Simbahan. Tungod kay duna kunohay kwarta, nga ilang nahulam gikan sa bangko, daghang tawo ang nangutang aron mopalit og yuta aron ibaligya og balik sa dako kaayo nga ginansya.
Sa tinglarag sa 1837, ang Kirtland Safety Society kinahanglang permanente nga isira. Gatusan ka mga indibidwal ang nawad-an hapit sa tanan nga ilang gipamuhunan, nga si Joseph Smith nahiagum sa kinadak-ang pagka-alkanse. Tungod kay ang Safety Society gikonsiderar man sa kadaghanan nga usa ka bangko sa Simbahan o bangko sa Propeta, ang ubang mga Santos mibasul kang Joseph Smith sa ilang mga problemang pinansyal ug gani mitawag pa kaniya isip usa ka napukan nga propeta. Ang uban kinsa nawad-an og kwarta mipadayon diha sa pagtuo ug nagpabiling matinud-anon ngadto sa Propeta. (Tan-awa sa Church History in the Fulness of Times Student Manual [manwal sa Church Educational System, 2003], 171–73.)