Leksyon 29

Doktrina ug mga Pakigsaad 21

Pasiuna

Ubos sa direksyon ni Propeta Joseph Smith, ang Simbahan ni Jesukristo sa mga Santos sa Ulahing mga Adlaw opisyal nga naorganisar niadtong Abril 6, 1830, sa panimalay ni Peter Whitmer Sr. sa Fayette, New York. Dul-an sa 60 ka mga tawo ang mitambong sa miting, nga naglakip sa pag-ampo, mga pagpaluyo, mga pag-orden, pagpahigayon sa sakrament, ug mga pagkumpirma. Niini nga miting, nadawat ni Joseph Smith ang pinadayag nga karon narekord diha sa Doktrina ug mga Pakigsaad 21. Niini nga pagpadayag ang Ginoo mideklarar sa calling ug responsibilidad ni Joseph Smith ug misugo sa mga miyembro sa Simbahan sa pagpatalinghug sa iyang mga pulong.

Mga Sugyot alang sa Pagtudlo

Pagtudlo pinaagi sa Espiritu ug pagpamatuod kang Jesukristo

Buhata ang tanan nimong mahimo sa pagmugna og kahimtang nga ang mga estudyante matudloan pinaagi sa Espiritu Santo. Usa sa labing makahuluganong paagi sa pagmugna og ingon niana nga kahimtang mao ang pagtutok sa imong mga ehemplo ug mga diskusyon ngadto sa Manluluwas, kanunayng magpamatuod mahitungod Kaniya, ug maghatag og oportunidad sa mga estudyante nga mopamatuod Kaniya.

Doktrina ug mga Pakigsaad 21:1–3

Si Joseph Smith gitudlo isip propeta ug manalagna sa Simbahan

Ikonsiderar ang paghangyo sa klase sa pagkanta sa, “Salamat, O Dios, sa Propeta” (Mga Himno ug mga Awit sa mga Bata, nu. 36), isip kabahin sa inadlaw nga debosyonal. Sa imong pagsugod sa leksyon, hisguti kini nga himno ug ipangutana ang mosunod:

• Unsa ang pipila ka rason nga mobati kamo nga mapasalamaton tungod sa propeta?

Pasabta ang mga estudyante nga sa ilang pagtuon sa Doktrina ug mga Pakigsaad 21, makakat-on sila og mga kamatuoran nga makapalambo sa ilang panabut sa tahas sa mga propeta. Aron ang mga estudyante mahatagan sa kasaysayan nga konteksto niini nga pagpadayag, i-summarize ang impormasyon nga gihatag sa pasiuna niini nga leksyon.

Dapita ang usa ka estudyante sa pagbasa og kusog sa Doktrina ug mga Pakigsaad 21:1. Hangyoa ang mga estudyante sa pagsunod, nga mangita sa mga ngalan nga pagailhon si Joseph Smith. Dayon hangyoa ang mga estudyante nga mo-report sa unsay ilang nakat-unan.

• Unsay buot ipasabut nga gitawag sa Ginoo si Joseph Smith nga mahimong manalagna?

• Unsay buot ipasabut nga gitawag sa Ginoo si Joseph Smith nga mahimong propeta?

Aron matabangan ang mga estudyante nga makasabut niini nga mga titulo ug sa mga responsibilidad kalabut niini, pagdapit og duha ka mga estudyante sa pagbasa og kusog sa mosunod nga paghulagway sa usa ka manalagna ug usa ka propeta. Hangyoa sila nga basahon ang matag pamahayag sa hinay-hinay, nga mohunong kadiyot sa katapusan sa matag sentence. Hangyoa ang klase sa pagpaminaw sa mga sentence nga makahuluganon kanila ug sa pagpangandam sa pagpasabut kon ngano.

“Ang manalagna mao ang tawo nga makakita gamit ang espirituhanong mga mata. Makasabut siya sa kahulugan nianang daw hanap [dili klaro o nakatago gikan] sa uban; busa usa siya ka tighubad ug tigpatin-aw sa mahangturong kamatuoran. Makita niya ang umaabut gikan sa nanglabay ug sa karon. Naghimo siya niini pinaagi sa gahum sa Ginoo nga direktang naglihok pinaagi kaniya, o sa dili direkta nga paagi uban sa tabang sa balaan nga mga instrumento sama sa Urim ug Thummim. Buot ipasabut, tawo siya nga makakita, naglakaw uban sa kahayag sa Ginoo nga buka ang mga mata’ (John A. Widtsoe, Evidences and Reconciliations, arr. G. Homer Durham, 3 vols. in 1 [1960], 258).

Ang propeta mao ang “usa ka tawo kinsa gitawag ug mamulong alang sa Dios. Ingon nga usa ka sinugo sa Dios, ang propeta makadawat og mga sugo, mga panagna, ug mga pagpadayag gikan sa Dios. Ang iyang responsibilidad mao ang pagpahibalo sa kabubut-on ug tinuod nga kinaiya sa Dios ngadto sa katawhan ug mopakita sa hinungdan sa iyang mga pakigsabut kanila. Ang propeta mosaway sa sala ug managna sa mga sangputanan niini. Siya magsasangyaw sa pagkamatarung. Usahay, ang mga propeta mahimo nga dasigon sa pagpanagna sa umaabut alang sa kaayohan sa katawhan. Ang nag-una niyang responsibilidad, hinoon, mao ang pagsaksi kang Kristo.” (Giya ngadto sa mga Kasulatan, “Propeta,” scriptures.lds.org).

Human mabasa ang matag kahulugan, dapita ang pipila ka mga estudyante sa pagpasabut hain nga mga sentence ang natiman-an nila og maayo.

Sa dili pa mopadayon, tingali makatabang nga hisgutan kadiyot ngadto sa mga estudyante ang mosunod nga mga kahulugan sa uban nga mga ngalan nga gihatag diha sa unang bersikulo sa Doktrina ug mga Pakigsaad 21:

Tighubad: usa ka tawo kinsa (1) mobalhin sa sinulat o gipamulong nga mga pulong ngadto sa laing pinulongan o (2) naghatag og mas klarong kahulugan sa hinubad nang daan pinaagi sa pagpalambo o pagkorihir niini o pagpahiuli sa nawala nga materyal (tan-awa sa Giya ngadto sa mga Kasulatan, “Hubad,” scriptures.lds.org).

Apostol: usa ka linain nga saksi ni Jesukristo ngadto sa kalibutan (tan-awa sa Bible Dictionary, “Apostle”).

Elder: “ang tukma nga ngalan nga gihatag ngadto sa tanan nga naghupot sa Melchizedek Priesthood” ug sa tawo nga gitawag nga mahimong full-time nga tigpangalagad alang ni Jesukristo (tan-awa sa Bible Dictionary, “Elders”).

• Sa unsang paagi ang mga ngalan nga gihatag kang Joseph Smith nakatabang kaninyo sa pagsabut sa iyang importanting tahas sa Pagpahiuli?

Dapita ang mga estudyante nga hilum nga mobasa sa Doktrina ug mga Pakigsaad 21:2–3, mangita kon unsa ang gidasig sa Dios kang Joseph Smith nga buhaton. Hangyoa ang mga estudyante nga mo-report sa unsay ilang nakat-unan. (Ang mga estudyante kinahanglang mopahayag sa kamatuoran nga ang Dios migiya ni Joseph Smith sa pagpahiuli sa Simbahan ni Jesukristo.)

• Ngano kaha nga importante nga atong mahibaloan nga si Joseph Smith gitawag sa Dios sa pagpahiuli ug pagpangulo sa Simbahan ni Jesukristo?

Pakit-a ang mga estudyante sa litrato nga Brother Joseph (Libro sa mga Hulagway sa Ebanghelyo [2009], nu. 87; tan-awa usab sa LDS.org) ug pagpamatuod sa kamatuoran nga imong gihisgutan sa ibabaw.

Doktrina ug mga Pakigsaad 21:4–9

Ang mga miyembro sa Simbahan kinahanglang mopatalinghug sa mga pulong ni Joseph Smith

Pahinumdumi ang mga estudyante nga ang Ginoo mihatag niini nga pagpadayag sa adlaw nga ang Simbahan naorganisar. Nga kini nga pagpadayag gihatag niining piho nga adlaw naghatag niini og espesyal nga kahulugan.

Isulat sa pisara ang mosunod nga mga pulong gikan sa Doktrina ug mga Pakigsaad 21:4–5 (ayaw ilakip ang mga kahulugan diha sa parentheses):

ang simbahan (mga miyembro sa Simbahan ni Jesukristo sa mga Santos sa Ulahing mga Adlaw sa panahon ni Joseph Smith ingon man sa atong panahon)

niya (nagpasabut gayud kang Joseph Smith, apan mahimong nagpasabut usab sa kasamtangang Presidente sa Simbahan)

mga pulong ug mga sugo (mahimong nagpasabut sa tanang mga pagtulun-an ug tambag sa usa ka propeta, lakip ang pihong mga instruksyon nga gihatag sa Ginoo pinaagi sa propeta)

sa tanan nga pagpailub ug hugot nga pagtuo (mahimong nagpasabut nga hingpit kita nga makasalig sa mga pagtulun-an sa propeta, nga kita dili gayud manaway kaniya, nga mosunod kita sa iyang tambag bisan pa sa bisan unsang personal nga kakulangan nga tingali aduna siya, ug nga kita mapailubon nga maghulat sa gisaad nga mga panalangin)

Dapita ang mga estudyante nga hilum nga mobasa sa Doktrina ug mga Pakigsaad 21:4–5 ug mamalandong sa kahulugan sa mga pulong diha sa pisara. Human sa igong panahon, pangutan-a ang mga estudyante kon unsaon nila sa paghatag og kahulugan niini nga mga pulong. Mahimo nimong gamiton ang mga kahulugan sa parentheses sa paggiya sa diskusyon. Dayon pangutan-a sa mosunod nga mga pangutana:

• Sumala sa Doktrina ug mga Pakigsaad 21:4–5, hain nga mga pagtulun-an sa propeta ang atong patalinghugan? (Mopatalinghug kita sa “tanan niya nga mga pulong ug mga sugo.”)

• Nganong magkinahanglan man usahay og pailub ug hugot nga pagtuo ang pagpatalinghug sa mga pulong sa propeta?

• Sa unsang paagi ang pagkahibalo nga ang propeta nagdawat og tambag ug mga sugo gikan sa Ginoo makatabang kaninyo sa pagdawat sa iyang mga pulong “sa tanan nga pagpailub ug hugot nga pagtuo”? (D&P 21:5).

Dapita ang matag estudyante nga hilum nga mobasa sa Doktrina ug mga Pakigsaad 21:6, nga mangita sa tulo ka mga panalangin nga ihatag ngadto niadtong modawat sa mga pulong sa propeta diha sa pagpailub ug hugot nga pagtuo. (Mahimo nimong ipasabut nga ang usa ka kahulugan sa pagkurog mao ang pagtangtang o pagbuhi sa usa ka butang gikan sa usa ka suporta o sudlanan. Sa ingon, ang usa ka hubad niini nga bersikulo mahimo nga kon mokurog ang mga langit “alang sa [atong] kaayohan,” ang mga pagpadayag ug mga panalangin “gibuhian” ug gibubu ngadto niadtong mosunod sa buhing mga propeta.)

• Unsaon ninyo sa pag-summarize ang mga saad nga gihatag niadtong mopatalinghug sa mga pulong sa propeta? (Ang mga estudyante mahimong mogamit og lain-laing mga pulong, apan kinahanglan nilang mapahayag ang mosunod nga baruganan: Kon mopatalinghug kita sa mga pulong sa propeta, mapanalipdan kita batok sa kaaway. Mahimo nimong isulat sa pisara kini nga baruganan.)

• Sa unsang paagi ang pagpatalinghug sa mga pulong sa propeta “mopatibulaag sa mga gahum sa kangitngit”?

Aron matabangan ang mga estudyante nga makasabut sa baruganan nga bag-o lang nilang nailhan, dapita ang usa kanila sa pagbasa og kusog sa mosunod nga kinutlo kabahin sa pagpakig-date (o laing kinutlo nga imong gipili) gikan sa Alang sa Kalig-on sa mga Kabatan-onan. Hangyoa ang tibuok klase sa pagpaminaw pag-ayo ug pag-ila sa propetikanhong tambag ug sa gisaad nga mga panalangin. Human mabasa sa estudyante, dapita ang mga estudyante sa pag-report sa unsay ilang nailhan.

“Ang date usa ka giplano nga kalihokan nga nagtugot sa usa ka batan-ong lalaki ug batan-ong babaye nga mas magkainilhanay sa usag usa. Sa mga kultura diin ang pagpakig-date gidawat, makatabang kini kaninyo sa pagkat-on ug pagpraktis sa sosyal nga mga kahanas, pagpalambo og panaghigalaay, paglingaw-lingaw sa tinarung nga paagi, ug sa katapusan makakita og mahangturong kauban.

“Kinahanglan nga dili kamo makig-date hangtud kamo moabut og labing minos 16 anyos. Kon kamo magsugod sa pagpakig-date, kuyog sa usa o mas daghan pa nga mga kauban. Likayi ang kanunay nga pakig-date sa samang tawo. Ang sayo kaayo nga pagpalambo og seryoso nga pakigrelasyon sa kinabuhi molimitar sa gidaghanon sa laing mga batan-on nga inyong ikahimamat ug tingali mahimong mosangput sa imoralidad. Dapita ang inyong mga ginikanan nga maila-ila kadtong inyong ika-date.

“Pilia nga makig-date lamang niadtong kinsa adunay taas nga moral nga mga sumbanan ug kansang pakigkuyog makapatunhay sa inyong mga sumbanan. Hinumdumi nga ang usa ka batan-ong lalaki ug usa ka batan-ong babaye nga nag-date responsable sa pagpanalipod sa dungog ug hiyas sa usag usa” (Alang sa Kalig-on sa mga Kabatan-onan [booklet, 2011], 4; tan-awa usab sa LDS.org).

• Kanus-a kamo o tawo nga inyong kaila napanalanginan tungod sa pagpatalinghug sa mga pulong ug mga sugo sa buhi nga propeta?

Awhaga ang mga estudyante sa pagpamalandong kon unsay angay nilang buhaton aron makaangkon sa mga panalangin nga gisaad diha sa Doktrina ug mga Pakigsaad 21:6. Pasaligi sila nga samtang kinasingkasing silang mopatalinghug sa mga pulong sa propeta, makadawat sila og dagkong mga panalangin karon ug sa kahangturan.

Dapita ang usa ka estudyante sa pagbasa og kusog sa Doktrina ug mga Pakigsaad 21:7–9. Hangyoa ang klase sa pagsunod, nga mangita sa matarung nga mga tinguha ug kinaiya ni Propeta Joseph Smith.

• Unsay atong nakat-unan mahitungod ni Propeta Joseph Smith gikan niini nga mga bersikulo?

• Sa unsang paagi kaha nga kini nga mga bersikulo magamit usab ngadto sa kasamtangang Presidente sa Simbahan ni Jesukristo sa mga Santos sa Ulahing mga Adlaw?

Doktrina ug mga Pakigsaad 21:10–12

Si Oliver Cowdery giila isip usa ka elder ug tigsangyaw

Sultihi ang mga estudyante nga sa unang miting sa Simbahan, si Oliver Cowdery gi-orden ni Propeta Joseph Smith isip usa ka elder, ug ang Propeta gi-orden ni Oliver Cowdery isip usa ka elder. Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 21:10–12.

Mahimo nimong ipasabut nga diha sa bersikulo 10, ang Ginoo naghisgut kang Oliver Cowdery isip “akong apostol” (tan-awa usab sa D&P 20:2–3). Ipasabut nga sa Gresyanhon, ang apostol nagpasabut nga “usa ka pinadala” (Giya ngadto sa mga Kasulatan, “Apostol,” scriptures.lds.org). Si Oliver Cowdery gipadala ni Jesukristo ug gisugo sa pagpamatuod kabahin sa Manluluwas. Bisan kon si Oliver gihatagan og apostolikahong mga responsibilidad, dili siya sakop sa Korum sa Napulog Duha ka mga Apostoles. Hinoon, mitabang siya sa pagpangita sa mga tawo kinsa gitawag isip sakop niana nga korum dihang gi-organisar kini niadtong 1835.

• Sumala sa Doktrina ug mga Pakigsaad 21:11, unsa ang gipabuhat kang Oliver Cowdery? (Magdala sa ngalan sa Ginoo.)

• Unsa ang kahulugan niini kaninyo nga magdala sa ngalan sa Ginoo?

Taposa ang leksyon karon pinaagi sa pag-awhag sa mga estudyante sa pagsunod sa mga aghat nga ilang madawat kalabut sa mga paagi nga sila modala sa ngalan sa Ginoo ug morepresentar sa Simbahan diha sa ilang mga pamilya, sa ilang komunidad, ug sa kalibutan.

Komentaryo ug Background nga Impormasyon

Doktrina ug mga Pakigsaad 21. Ang paghulagway ni Joseph Smith sa Abril 6, 1830

Kabahin sa mga panghitabo sa Abril 6, 1830, sa dihang ang Simbahan pormal nga giestablisar, ang Propeta Joseph Smith miingon:

“Ang Espiritu Santo gibu-bu diha kanamo ngadto sa hilabihan ka makabayaw nga kahimtang—ang pipila nanagna, samtang kaming tanan midayeg sa Ginoo, ug nagmaya sa hilabihan” (Mga Pagtulun-an sa mga Presidente sa Simbahan: Joseph Smith [2007], 162).

Doktrina ug mga Pakigsaad 21. Ang paghinumdom ni Joseph Knight sa Abril 6, 1830

Si Joseph Knight Sr. mirekord sa kalipay nga gibati ni Propeta Joseph Smith niining dili makalimtan nga adlaw, dihang ang iyang amahan, si Joseph Smith Sr., gibunyagan:

“Dunay usa ka butang nga akong hisgutan [mahitungod] nianang gabhiona [sa diha nga] ang tigulang nga si Brother Smith ug si Martin Harris nabunyagan. Napuno si Joseph sa Espiritu sa hilabihan nga iyang nakita ang iyang amahan ug si Mr. Harris mao nga … nanghinubra ang iyang kalipay nga daw dili siya kapugngan sa pagpahayag niini. Miadto siya sa nataran ug daw dili gusto nga makit-an sa tanan ug mibakho ug mihilak ug puno kaayo sa kalipay nga daw dili na siya mabuhi. … Siya ang labing naapektuhan nga tawo nga akong nakita sukad. Apan daw puno ang iyang kalipay. Nagtuo ko nga iyang nakita ang mahinungdanong buhat nga iyang nasugdan, ug matinguhaon sa pagbuhat niini” (gikutlo diha sa Dean Jessee, “Joseph Knight’s Recollection of Early Mormon History,” BYU Studies, vol. 17, no. 1 [1976], 37; ang spelling ug pag-capital gi-standardize).

Doktrina ug mga Pakigsaad 21:5. “Ang iyang pulong ikaw makadawat, ingon og gikan sa akong kaugalingon nga ba-ba”

Gihatagan og gibug-aton ni Presidente Ezra Taft Benson ang kaimportante sa buhi nga propeta ug Presidente sa Simbahan:

“Aron matabangan kamong makalatas sa importanting mga pagsulay nga nagpaabut sa unahan hatagan ko kamo karon og pipila ka aspeto sa importante kaayong yawe nga kon inyo kining tahuron, makoronahan kamo og himaya sa Dios ug mogawas kamong madaugon bisan sa kabangis ni Satanas.

“… Ania ang importanting yawe—sunda ang propeta—ug karon ania ang katorse ka mga sukaranan sa pagsunod sa propeta, ang Presidente sa Simbahan ni Jesukristo sa mga Santos sa Ulahing mga Adlaw. …

“Una: Ang propeta mao lang ang tawo kinsa mamulong alang sa Ginoo sa tanang butang.

“Ikaduha: Ang buhi nga propeta mas mahinungdanon alang kanato kay sa sumbanan nga mga kasulatan.

“Ikatulo: Ang buhi nga propeta mas importante alang kanato kay sa patay nga propeta.

“Ikaupat: Ang propeta dili gayud mopahisalaag sa Simbahan.

“Ikalima: “Ang propeta wala magkinahanglan nga magbaton og bisan unsang partikular nga yutan-ong pagbansay o mga kredensyal aron sa pagpamulong sa bisan unsang hilisgutan o mobuhat sa bisan unsang butang sa bisan unsang panahon.”

“Ikaunom: Ang propeta dili kinahanglan nga moingon, ‘Ang Ginoo namulong’ aron ihatag kanato ang kasulatan.

“Ikapito: Ang propeta mosulti kanato kon unsay kinahanglan natong masayran, dili kanunay kon unsay gusto natong masayran.”

“Ikawalo: “Ang propeta dili mapugngan sa pangatarungan sa mga tawo.

“Ikasiyam: Ang propeta makadawat og pagpadayag sa bisan unsang butang, temporal man o espirituhanon.

“Ikanapulo: Ang propeta mahimo nga malakip sa pangpubliko nga mga butang.

“Ika-onse: Ang duha ka mga grupo nga maglisud kaayo sa pagsunod sa propeta mao ang mapasigarbuhon kinsa mga maalamon ug ang mapasigarbuhon kinsa mga adunahan.

“Ikadose: Ang propeta dili kinahanglan nga inila sa kalibutan o sa kalibutanon.

“Ikatrese: Ang propeta ug iyang mga magtatambag naglangkob sa Unang Kapangulohan—ang labing taas nga korum diha sa Simbahan

“Ikakatorse: Ang propeta ug ang kapangulohan—ang buhi nga propeta ug ang Unang Kapangulohan—sunda sila ug kamo mapanalanginan; isalikway sila ug kamo mag-antus” (“Fourteen Fundamentals in Following the Prophet” [Brigham Young University fireside nga pakigpulong, Peb. 26, 1980], 1, 6, speeches.byu.edu).

Doktrina ug mga Pakigsaad 21:5–6. “Sa tanan nga pagpailub ug hugot nga pagtuo”

Si Presidente Harold B. Lee mipasabut sa bili sa pagpatalinghug sa tambag sa propeta, bisan og ang kaugalingon natong mga panglantaw lahi ra niana nga tambag:

“Karon ang bugtong kasiguroan nga anaa kanato isip mga miyembro niini nga simbahan mao ang pagbuhat sa tukma unsa ang gisulti sa Ginoo ngadto sa Simbahan niana nga adlaw sa pag-organisar sa Simbahan. Kinahanglan gayud nga kita magkat-on sa pagpaminaw sa tanan nga mga pulong ug mga sugo nga ang Ginoo mohatag pinaagi sa Iyang propeta, “ingon nga siya nakadawat [niini], maglakaw sa tanan nga pagkabalaan diha sa akong atubangan; … ingon og kini gikan sa akong kaugalingong ba-ba, sa tanan nga pagpailub ug hugot nga pagtuo.’ (D&P 21:4–5). Maanaay pipila ka mga butang nga nagkinahanglan og pailub ug hugot nga pagtuo. Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini mosupak sa inyong politikanhong mga panghunahuna. Mahimo nga kini supak sa inyong sosyal nga mga panghunahuna. Mahimong mobalda kini sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6)” (Mga Pagtulun-an sa mga Presidente sa Simbahan: Harold B. Lee [2000], 101; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 45).

Si Elder M. Russell Ballard sa Korum sa Napulog Duha ka mga Apostoles mitudlo:

“Dili kini basta-basta lamang nga butang, akong mga kaigsoonan, ang pagkaadunay propeta sa Dios sa atong taliwala. Katalagsaon ug katingalahan sa mga panalangin nga moabut sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. Sa samang higayon, ang pagkasayud nga [ang kasamtangang Presidente sa Simbahan] mao ang propeta sa Dios naghatag usab kanato og responsibilidad. Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ang atong pagsanong ug diha dayon. Ang kasaysayan nagpakita nga anaa ang kasiguroan, kalinaw, kalamboan, ug kalipay sa pagsanong sa propetikanhong tambag sama sa gihimo ni Nephi sa karaan, ‘Ako moadto ug mobuhat sa mga butang nga ang Ginoo nagsugo’” (“His Word Ye Shall Receive,” Ensign, Mayo 2001, 65).