Leksyon 57

Doktrina ug mga Pakigsaad 50

Pasiuna

Sa dihang miabut si Joseph Smith sa Kirtland, Ohio, nakaobserbar siya nga “pipila ka kahibudngan nga mga hunahuna ug dili tinuod nga mga espiritu ang mikuyanap taliwala” sa pipila ka Santos. Misugod siya sa pagtudlo uban sa “pagmatngon ug … pagmaalamon” aron mabuntog kini nga mga butang (tan-awa sa History of the Church, 1:146). Si Elder Parley P. Pratt mibalik gikan sa usa ka misyon ug nakaobserbar og susama nga kinaiya diha sa mga branch sa Simbahan gawas sa Kirtland. Siya ug ang ubang mga elder miadto ni Joseph Smith aron makadawat og giya (tan-awa sa History of the Church, 1:170). Niadtong Mayo 1831, ang Propeta nangutana sa Ginoo ug nakadawat og pagpadayag nga narekord diha sa Doktrina ug mga Pakigsaad 50. Niini nga pagpadayag, ang Ginoo mimando sa mga Santos sa pagtudlo ug pagdawat sa ebanghelyo pinaagi sa Espiritu sa kamatuoran.

Mga Sugyot alang sa Pagtudlo

Doktrina ug mga Pakigsaad 50:1–9

Ang Ginoo mipasidaan sa mga elder sa Simbahan bahin sa dili tinuod nga mga espiritu

Hangyoa ang mga estudyante sa paghunahuna nga nagtambong og sakrament miting diin ang pipila ka hamtong nga mga miyembro sa Simbahan nagbarug sa mga lingkuranan ug dagko kaayo og tingog nga nag-istoryahanay, samtang ang uban nagligid-ligid sa salog.

• Unsay inyong bation? Unsa kaha ang mahitabo sa Espiritu ubos sa maong mga kahimtang? (Siguroa nga kini nga panaghisgutan dili mahimong pagpanaway sa mga relihiyon diin ang mga tawo nalambigit sa maong mga kalihokan.)

Ipasabut nga sa dihang si Joseph Smith miabut sa Kirtland sa unang higayon, iyang nakita ang pipila ka Santos nga nalingla atol sa usa ka panahon sa dihang wala kaayoy nangulo nila. Isip resulta, “pipila ka kahibudngan nga mga hunahuna ug dili tinuod nga mga espiritu ang mikuyanap taliwala” kanila (History of the Church, 1:146). Ang bag-ong mga miyembro sa dapit sa Kirtland mipaila og kahibudngan, kusog, ug makapalibug nga mga kalihokan ngadto sa ilang mga tulumanon sa pagsimba. Kini nga mga kalihokan nakapaukyab sa mga emosyon sa mga tawo, apan wala kini makapalig-on. Ang ubang mga elder sa Simbahan wala makasabut sa unsay nahitabo, mao nga nangayo sila sa Propeta og tambag. Nangutana siya sa Ginoo ug nakadawat og pagpadayag nga makatabang sa mga Santos nga mapalig-on ang usag usa samtang sila nagtudlo ug nagkat-on sa mga kamatuoran sa ebanghelyo.

Dapita ang usa ka estudyante sa pagbasa og kusog sa Doktrina ug mga Pakigsaad 50:1–3. Hangyoa ang klase sa pagsunod, nga mangita sa tinubdan niini nga impluwensya diha sa mga Santos.

• Unsay tinubdan niini nga impluwensya?

• Sumala sa bersikulo 3, nganong gusto man ni Satanas nga molingla sa mga Santos?

Dapita ang mga estudyante sa pagbasa og hilum sa Doktrina ug mga Pakigsaad 50:4–9, nga mangita sa pasidaan sa Ginoo bahin sa pipila ka tawo taliwala sa mga miyembro sa Ohio.

• Unsa nga mga pulong ang gigamit sa Ginoo sa paghulagway sa pipila ka miyembro sa Simbahan niining panahona?

• Unsa ang tigpakaaron-ingnon? Sa unsang paagi nga ang pagpakaaron-ingnon makahatag og gahum ngadto sa kaaway?

• Unsay gisulti sa Ginoo nga mahitabo ngadto sa mga tigpakaaron-ingnon? (Tan-awa sa D&P 50:6, 8.)

Doktrina ug mga Pakigsaad 50:10–36

Ang mga naghupot sa priesthood gimanduan kon unsaon pagtudlo ug pagkat-on pinaagi sa Espiritu

Isulat ang mosunod nga mga pangutana diha sa pisara:

Unsa ang gikinahanglan aron mahimong usa ka epektibong magtutudlo sa ebanghelyo?

Unsa ang gikinahanglan aron mahimong usa ka epektibong tigkat-on sa ebanghelyo?

Dapita ang mga estudyante sa pagtubag nining mga pangutana. Irekord ang nag-una nilang mga punto diha sa pisara ubos sa matag pangutana. Bahina dayon ang klase ngadto sa duha ka grupo. Dapita ang usa ka grupo sa pagbasa og hilum sa Doktrina ug mga Pakigsaad 50:13–20, nga mangita sa mga tubag sa unang pangutana. Dapita ang laing grupo sa pagbasa og hilum sa Doktrina ug mga Pakigsaad 50:13–20, nga mangita sa mga tubag sa ikaduhang pangutana. Human sa igong panahon, dapita ang pipila ka estudyante sa pagpakigbahin unsay ilang nadiskubrihan.

• Unsa nga elemento sa pagtudlo ug pagkat-on sa ebanghelyo ang gibalik-balik niining mga bersikulo? (Ang panginahanglan alang sa Espiritu.)

• Unsa nga mga tahas sa Espiritu Santo ang gihisgutan diha sa Doktrina ug mga Pakigsaad 50:14? (Ang mga estudyante kinahanglang mopahayag nga ang Espiritu Santo mao ang Maghuhupay ug nga ang Espiritu Santo nagtudlo sa kamatuoran.)

• Unsa kaha ang gipasabut sa pagtudlo sa ebanghelyo “pinaagi sa Espiritu”? (D&P 50:22). Unsa kaha ang gipasabut sa pagtudlo “sa lain nga paagi”? (D&P 33:17).

Hangyoa ang mga estudyante sa paghunahuna og mga oportunidad nga duna sila sa pagtudlo sa ebanghelyo. Mahimong maghunahuna sila sa pagtudlo diha sa panimalay, uban sa ilang mga higala, sa seminary, sa simbahan, o isip mga home teacher. Dapita ang pipila ka estudyante sa pagpakigbahin og mga kasinatian sa dihang ilang nabati ang Espiritu nga migiya kanila sa pagtudlo sa ebanghelyo o sa pagpakigbahin sa ilang mga pagpamatuod.

• Unsa kaha ang gipasabut sa “nakadawat sa [pulong sa kamatuoran] pinaagi sa Espiritu sa kamatuoran”? (D&P 50:19). Unsa kaha ang gipasabut sa makadawat niini “sa lain nga paagi”? (D&P 50:19).

• Unsay inyong mahimo aron mas makadawat sa ebanghelyo kon itudlo kini pinaagi sa Espiritu?

Dapita ang usa ka estudyante sa pagbasa sa mosunod nga pamahayag ni Elder Jack H. Goaslind of the Seventy. Hangyoa ang klase sa pagpaminaw alang sa mga ideya bahin kon unsaon nato aron mas makadawat sa pulong sa kamatuoran pinaagi sa Espiritu.

“Pila kaninyo ang nadala sa ‘laay nga posisyon’ panahon sa sakrament miting? Kahibalo mo sa posisyon nga: moabante, manampiling sa duha ka kamot, ang mga siko itukod sa tuhod, blangko nga nagtutok sa salog. Nahunahunaan na ba ninyo nga inyo kining pagpili kon ang miting makapainteresado o dili? …

“Si Presidente Spencer W. Kimball miingon nga ang pagsimba ‘usa ka indibidwal nga responsibilidad, ug bisan una pa man ang gisulti gikan sa pulpito, kon ang usa ka tawo gustong mosimba sa Ginoo diha sa espiritu ug sa kamatuoran, mahimo niya kining buhaton. … Kon ang tulumanon pakyas alang ninyo, napakyas kamo. Walay usa nga makasimba alang ninyo; kinahanglan gayud nga buhaton ninyo ang kaugalingon ninyong paghulat sa Ginoo.’ (Ensign,Ene. 1978, p. 5.)

“Usa ka batan-on ang mihulagway kon sa unsa nga paagi niya unang nasinati ang espiritu sa pagsimba. Medyo aktibo siya sa iyang katuigan sa Aaronic Priesthood. Kon motambong siya og sakrament miting, kasagaran molingkod siya sa likod uban sa usa ka grupo sa iyang mga higala, ug dili siya maayong ehemplo sa balaang pagtahud. Usa ka adlaw, hinoon, miabut siya nga naulahi og gamay, ug walay kalingkuran tupad sa iyang mga higala. Naglingkod siya nga nag-inusara, ug sa unang higayon sa iyang kinabuhi, iyang gipiyong ang iyang mga mata panahon sa mga pag-ampo, mikanta og mga himno, naminaw sa mga pag-ampo sa sakrament, ug naminaw og maayo sa mga mamumulong. Sa mga tunga-tungang bahin sa unang mamumulong, nakabantay siya nga ang mga luha nag-agas sa iyang mga mata. Uban sa kaulaw, mabinatayon siyang mipasiplat sa palibut; walay lain nga morag emosyonal. Wala gayud siya masayud kon unsay nahitabo niya, apan ang kasinatian nakapausab sa iyang kinabuhi. Panahon kadto niana nga miting nga misugod gayud siya sa iyang espirituhanong pagpangandam alang sa iyang misyon. Siya mibatiog usa ka butang, ug swerte lang, siya milihok ug sa ingon nakapabilin niadtong mga pagbati” (“Yagottawanna,” Ensign, Mayo 1991, 46).

Dapita ang mga estudyante sa pagpakigbahin kon hain nga bahin niini nga istorya ang nakatandog kanila. Human sa pagpakigbahin sa pipila, mahimo nimong isugyot nga magsulat sila og usa ka piho nga paagi aron ilang mapalambo ang ilang mga paningkamot sa pagkat-on pinaagi sa Espiritu.

Hangyoa ang mga estudyante sa pagpamalandong kon sa unsang paagi nila matino kon sila nagtudlo ug nagkat-on ba pinaagi sa Espiritu. Dapita dayon ang usa ka estudyante sa pagbasa og kusog sa Doktrina ug mga Pakigsaad 50:21, ug hangyoa ang klase sa pagpangita sa instruksyon sa Ginoo kon unsaon kini pagbuhat.

• Unsay mahitabo kon magtudlo ug magkat-on kita pinaagi sa Espiritu?

• Unsa kaha ang gipasabut sa “makadawat og kaayohan ug maglipay nga maghiusa”? Kanus-a kamo nakasinati niini?

• Unsaon ninyo pag-summarize sa pagtulun-an sa Ginoo diha sa Doktrina ug mga Pakigsaad 50:13–22? (Ang mga estudyante kinahanglang mahibalo sa mosunod nga baruganan: Kon magtudlo ug magkat-on kita pinaagi sa Espiritu, makasabut kita sa usag usa ug makadawat kita og kaayohan ug maglipay nga maghiusa. Isulat sa pisara kini nga baruganan.)

Dapita ang mga estudyante sa pagbasa og hilum sa Doktrina ug mga Pakigsaad 50:23–25. Hangyoa sila sa pagpangita sa kalainan tali sa unsay mahitabo kon ang mga tawo magtudlo pinaagi sa Espiritu ug unsay mahitabo kon ang mga tawo magtudlo ug magkat-on “sa lain nga paagi” (D&P 50:17). Hangyoa ang mga estudyante sa pag-report kon unsay ilang makit-an.

• Giunsa paghulagway sa Ginoo ang pagtudlo nga dili makahatag og kaayohan?

• Giunsa paghulagway sa Ginoo ang pagtudlo nga “gikan sa Dios”? (D&P 50:22). Giunsa Niya pagsulti nga kita mapanalanginan samtang modawat kita sa maong pagtudlo?

• Unsa nga baruganan ang gitudlo niining mga bersikulo? (Ang mga estudyante kinahanglang mahibalo sa mosunod nga doktrina: Kana nga gikan sa Dios modan-ag ug makahatag og kaayohan, apan kana nga dili gikan sa Dios magdala og kalibug ug kangitngit. Isulat sa pisara kini nga kamatuoran.)

• Kanus-a kamo mibati nga kamo nga ang butang nga inyong nadungog, nakita, o nasinati dili gikan sa Dios? Giunsa man sa Espiritu sa pagtabang ninyo sa pag-ila niana?

Ipasabut ngadto sa mga estudyante nga makadungog ug makakita sila og mga mensahe nga gitumong aron sa pagguba sa ilang pagtuo. Ang mga baruganan nga ilang nakat-unan karon makapalig-on kanila batok niadtong mga mensahe. Mahimo nimong ipakigbahin ang usa ka kasinatian nga imong nasinati sa dihang ang Espiritu nakatabang nimo nga sa pag-ila nga ang usa ka mensahe dili gikan sa Dios.

I-summarize ang Doktrina ug mga Pakigsaad 50:26–36 pinaagi sa pagpasabut nga ang Ginoo mitambag sa mga naghupot sa priesthood kalabut sa gahum ug mga responsibilidad nga kauban sa ilang ordinasyon. Miingon Siya nga ang mga naghupot sa priesthood kinahanglang moserbisyo sa uban ug ipabilin ang ilang kaugalingon nga putli. Sa ilang pagbuhat sa ingon, ang Ginoo mohatag kanila og gahum sa pagbuntog sa dili tinuod nga mga espiritu sama niadtong nakita taliwala sa mga Santos sa panahon nga kining pagpadayag gihatag.

Doktrina ug mga Pakigsaad 50:37–46

Giawhag sa Ginoo ang mga Santos nga magpadayon sa paglambo diha sa grasya ug kamatuoran, ug Siya mipasalig kanila nga Siya magauban kanila

Ipakita ang hulagway nga Pag-ampo sa Pamilya (Libro sa Hulagway sa Ebanghelyo [2009], nu. 112; tan-awa usab sa LDS.org). Tudloa ang gamay nga batang lalaki ug ipangutana ang mosunod:

• Mahunahuna ba ninyo nga kining gamay nga batang lalaki moserbisyo og full-time nga misyon kon modako na siya? Unsa ang gisugyot dinhi sa hulagway nga andam siya nga moserbiyo?

• Nagkonsiderar sa buhat nga giandam sa Ginoo alang sa matag usa kanato, sa unsang mga paagi nga kita susama niining gamay nga batang lalaki?

Ipasabut nga ang Doktrina ug mga Pakigsaad 50:37–40 naglangkob sa tambag sa Ginoo ngadto sa pipila ka elder kinsa anaa sa dihang kini nga pagpadayag nadawat. Dapita ang usa ka estudyante sa pagbasa og kusog sa bersikulo 40. Hangyoa ang klase sa pagsunod, nga mangita sa tambag nga gihatag sa Ginoo ngadto niining mga elder.

• Sumala sa bersikulo 40, nganong gitawag man sa Ginoo kining mga naghupot sa priesthood nga “gagmay nga mga bata”? Sa unsang mga paagi nga kita sama sa gagmay nga mga bata?

• Unsa kaha ang gipasabut sa “motubo diha sa grasya”? Unsa kaha ang gipasabut sa motubo “diha sa kamatuoran”?

• Unsa man ang atong makat-unan gikan niini nga mga bersikulo bahin sa mga panalangin nga gusto sa Manluluwas nga atong madawat? (Ang mga estudyante kinahanglang mahibalo sa mosunod nga baruganan: Gusto sa Manluluwas nga kita motubo diha sa grasya ug diha sa kamatuoran.)

Dapita ang usa ka estudyante sa pagbasa og kusog sa Doktrina ug mga Pakigsaad 50:41–46. Hangyoa ang klase sa pagpangita sa mga pulong sa kahupayan ug pasalig nga gihatag sa Ginoo ngadto niining mga elder ug ngari kanato.

• Unsay buot ipasabut niini nganha kaninyo sa dihang ang Ginoo miingon, “Kamo akò”? Sa unsang paagi nga kini nga pasalig makatabang kanato nga “dili mahadlok”? (D&P 50:22).

• Unsa ang ubang mga saad niini nga mga bersikulo nga makahuluganon nganha kaninyo?

Tapusa pinaagi sa pagpamatuod bahin sa mga baruganan nga gitudlo niini nga leksyon karon. Awhaga ang mga estudyante sa pagtudlo ug pagkat-on pinaagi sa Espiritu sa mas hingpit nga paagi.

Komentaryo ug Background nga Impormasyon

Doktrina ug mga Pakigsaad 50. Ang paagi diin nadawat ni Propeta Joseph Smith kini nga pagpadayag

Si Elder Parley P. Pratt mihatag og paghulagway bahin ni Joseph Smith nga nagdiktar sa pagpadayag nga narekord karon diha sa Doktrina ug mga Pakigsaad 50. Usa kini sa labing detalyado nga mga paghulagway nga anaa kanato bahin sa Propeta nga nagdiktar sa mga pagpadayag. Miingon si Elder Pratt:

“Ang matag sentence gilitok sa hinay ug lahi kaayo nga paagi, ug pinaagi sa paghunong sa makadiyot sa tunga-tunga sa matag usa, sa igo nga gidugayon nga kini marekord, pinaagi sa ordinaryo nga tigsulat, nga pinakatay.

“… Walay bisan unsa nga pagduha-duha, pagribyu, o pagbasa og balik, aron mapabilin ang dagan sa hilisgutan; … ug didto ko aron sa pagsaksi sa pagdiktar sa pipila ka komunikasyon nga pipila ka pahina ang matag usa” (Autobiography of Parley P. Pratt, ed. Parley P. Pratt Jr. [1938], 62).

Human madiktar ni Joseph Smith ang mga pagpadayag, kanunay niyang ribyuhon ang sinulat nga bersyon, nga magtinguha og inspirasyon sa paghimo sa bisan unsa nga kausaban nga gikinahanglan.

Doktrina ug mga Pakigsaad 50. “Kahibudngan nga mga hunahuna ug dili tinuod nga mga espiritu” ang miabut taliwala sa mga Santos

Gihulagway ni John Whitmer ang pipila sa “kahibudngan nga mga hunahuna ug dili tinuod nga mga espiritu” (History of the Church, 1:146) taliwala sa mga Santos didto sa Kirtland sa tingpamulak sa 1831:

“Ang uban dunay mga panan-awon ug dili makasulti kon unsay ilang nakita, ang uban naghunahuna sa ilang kaugalingon nga kunohay anaa kanila ang espada ni Laban, ug mowara-wara niini [sama sa usa ka sundalo nga nagsakay sa kabayo], ang uban molihok sama sa usa ka Indian nga nag-aksyon nga nagkagis sa ulo, ang uban mopasagirit o mopasaguyod og kusog ug [diha] sa salog, sama kapaspas sa halas, nga [ilang] giterminuhan og paglayag sa sakayan ngadto sa mga Lamanite, nga nagsangyaw sa ebanghelyo. Ug daghan pang kawang ug binuang nga pagmaniubra nga dili angay, ug walay pulos nga hisgutan” (Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 305).

Doktrina ug mga Pakigsaad 50:13–14, 17. Pagtudlo pinaagi sa Espiritu sa kamatuoran

Si Elder Dallin H. Oaks sa Korum sa Napulog Duha ka mga Apostoles mipasabut kon unsay angay gayud natong buhaton sa dili pa magtudlo pinaagi sa Espiritu:

“Kinahanglan gayud kita nga magtuon sa mga kasulatan. Kinahanglan gayud kita nga magtuon sa mga pagtulun-an sa buhi nga mga propeta. Kinahanglan gayud kita nga magkat-on sa tanan nga atong makaya aron mahimong presentable ug masabtan ang atong kaugalingon. … Ang pagpangandam gikinahanglan sa pagtudlo pinaagi sa Espiritu” (“Teaching and Learning by the Spirit,” Ensign, Mar. 1997, 10).

Si Presidente Henry B. Eyring sa Unang Kapangulohan mihatag og ideya ug instruksyon nga makatabang kanato sa pagtudlo pinaagi sa Espiritu:

“Ang doktrina makaangkon sa iyang gahum sa higayon nga ang Espiritu Santo mopamatuod nga kini tinuod. …

“Tungod kay kita nagkinahanglan sa Espiritu Santo, kita kinahanglan nga magmatngon ug magmabinantayon nga dili molapas sa pagtudlo sa tinuod nga doktrina. Ang Espiritu Santo mao ang Espiritu sa Kamatuoran. Siya mopamatuod unsa ang atong gitudlo pinaagi sa paglikay sa pagpangagpas o kinaugalingon nga pagsabut. Kana mahimong lisud buhaton. Kamo nahigugma sa tawo nga inyong gipaningkamutan nga maimpluwensiya. Siya mahimong mosalikway sa doktrina nga iyang nadungog sa una. Kini makapatintal sa pagsulay og laing bag-ong butang o makapakurat. Apan kita midapit sa Espiritu Santo ingon nga atong kauban kon kita magmabinantayon sa pagtudlo lamang sa tinuod nga doktrina” (“Pagtudlo sa Tinuod nga Doktrina,” Ensign, Abr. 2009, 4).

Si Elder G. Scott sa Korum sa Napulog Duha ka mga Apostoles mihulagway sa kalainan tali sa pagtudlo pinaagi sa Espiritu ug pagtudlo pinaagi sa atong salabutan:

“Pipila ka tuig na ang milabay duna koy assignment sa Mexico ug Central America susama nianang sa usa ka Area President. …

“Usa ka Dominggo, … mibisita ko og [usa ka] priesthood miting sa branch diin ang usa ka mapainubsanon, dili edukado nga Mexican nga priesthood lider nanlimbasug sa pag-istorya sa mga kamatuoran sa ebanghelyo. Klaro kaayo kon unsa kalawom kini nga nakatandog sa iyang kinabuhi. Nabantayan nako ang iyang hilabihan nga tinguha nga maistorya kadtong mga baruganan. Giila niya nga bililhon kaayo kini ngadto sa mga kaigsoonan nga iyang gihigugma. Mibasa siya gikan sa manwal sa leksyon, apan ang iyang paagi usa ka putli nga gugma sa Manluluwas ug niadtong iyang gitudloan. Kana nga gugma, kasinsero, ug kaputli sa tinguha mitugot sa impluwensya sa Espiritu Santo nga molukop sa kwarto. …

“Human niana, mibisita ko sa klase sa Sunday School sa ward diin mitambong ang akong pamilya. Usa ka edukado kaayo nga propesor sa unibersidad ang mipresentar sa leksyon. Kana nga kasinatian klaro nga sukwahi sa usa nga natagamtaman sa priesthood miting sa branch. Daw para nako kana nga magtutudlo tinuyo nga mipili sa dili klaro nga mga reference ug dili kasarangan nga mga ehemplo aron sa pagpalambo sa gisangon niya nga hilisgutan—ang kinabuhi ni Joseph Smith. Duna koy lahi nga impresyon nga gigamit niya ang oportunidad sa pagtudlo aron makadayeg ang klase sa dako niya nga kahibalo. … Dili kaayo siya matinguhaon sa pagpahibalo sa mga baruganan sama sa mapainubsanon nga priesthood lider. …

“… Ang pagkamapainubsanon sa Mexican nga priesthood lider gikinahanglan sa paggamit kaniya isip instrumento alang sa espirituhanong komunikasyon sa kamatuoran” (“Helping Others to Be Spiritually Led” [pakigpulong ngadto sa mga CES religious educator, Ago. 11, 1998], 10–11, LDS.org).

Doktrina ug mga Pakigsaad 50:19–20. Pagdawat pinaagi sa Espiritu

Si Presidente J. Reuben Clark sa Unang Kapangulohan misugyot nga kita dunay importante nga tahas sa pagtino kon ang usa ka mamumulong nagtudlo ba pinaagi sa Espiritu o wala:

“Makasulti lamang kita kon ang mga mamumulong ‘nadasig pinaagi sa Espiritu Santo’ kon kita mismo ‘nadasig pinaagi sa Espiritu Santo.’

“Sa usa ka paagi, hingpit kining mobalhin sa responsibilidad gikan nila ngari nato aron sa pagtino kon sila namulong sa ingon” (“When Are Church Leaders’ Words Entitled to Claim of Scripture?” Church News, Hulyo 31, 1954, 9).

Si Elder Joseph B. Wirthlin sa Korum sa Napulog Duha ka mga Apostoles mikomentaryo bahin sa responsibilidad sa mga estudyante nga epektibong makakat-on:

“Kon mas daghang mga sakop sa klase ang mobasa sa ilang mga assignment nga basahunon nga kasulatan, mas modala sila sa ilang mga kasulatan ngadto sa klase, ug mas mohisgut sila kon unsa gayud ang kahulugan sa ebanghelyo sa ilang kinabuhi, mas madugangan ang ilang inspirasyon, paglambo, ug hingpit nga kalipay samtang mosulay sila sa pagsulbad sa ilang personal nga mga problema ug mga hagit” (“Teaching by the Spirit,” Ensign, Ene. 1989, 15).

Si A. Roger Merrill, kinatibuk-ang presidente sa Sunday School, mihatag og gibug-aton sa nag-unang panginahanglan alang kanato nga makakat-on pinaagi sa Espiritu:

“Mas nakasabut na kaayo ko kon unsa kaimportante nga makadawat sa Espiritu. Kita kanunay nagpokus, kay maoy angay, sa kaimportante sa pagtudlo pinaagi sa Espiritu. Apan kita angay mahinumdom nga ang Ginoo nagbutang og katugbang, gani labaw pa, sa kaimportante sa pagdawat pinaagi sa Espiritu. (Tan-awa sa D&P 50:17–22.)” “Pagdawat pinaagi sa Espiritu,” Liahona, Nob. 2006, 93).

Si Elder Jack H. Goaslind sa Seventy mipakigbahin sa mosunod nga istorya sa paghulagway nga matag usa kanato dunay abilidad sa pagpili kon kita nakakat-on ba pinaagi sa Espiritu o wala:

“Pipila ka tuig ang milabay nakadungog ko bahin sa usa ka buotan nga brother nga mihulagway sa iyang kinaiya samtang si Presidente David O. McKay mihatag sa iyang panapos nga pakigpulong sa kinatibuk-ang komperensya. Usa kadto ka maigang nga hapon, ug kadto ang ikalima nga sesyon nga iyang natambungan. Naglingkod siya sa balkon, ug kanunayng gisamok. Nakabantay siya og usa ka tawo nga naglingkod sa tunga-tunga nga bahin nga nakatulog nga ang iyang ulo nahangad ug abli ang iyang ba-ba. Misantup sa iyang hunahuna nga kon naa pa unta siya sa atop sa Tabernacle, iya siyang tuthoan agi sa usa sa mga lungag paingon gayud ngadto sa ba-ba nianang natulog nga tawo. Pagkanindot nga hunahuna! Human sa miting, nakadungog siya sa duha ka lalaki nga nag-istorya bahin sa ilang mga pagbati atol sa pakigpulong ni Presidente McKay. Klaro kaayo nga natandog sila sa unsay ilang nadungog. Naghunahuna siya sa iyang kaugalingon, Kining duha ka lalaki dunay talagsaon nga espirituhanong kasinatian, ug unsa may akong gibuhat? Naghunahuna og pagpatutho gikan sa kisame!” (“Yagottawanna,” Ensign, Mayo 1991, 46).