Doktrina ug mga Pakigsaad 107:21–38

Pasiuna

Niadtong Abril 1835 ang bag-ong naordinahan nga sakop sa Korum sa Napulog Duha ka mga Apostoles didto sa Kirtland, Ohio, nangandam sa pagbiya sa ilang unang misyon isip usa ka korum. Sa wala pa sila mobiya, mihangyo sila nga mangayo si Propeta Joseph Smith og pagpadayag aron sa pagtabang kanila samtang sila magkabulag (tan-awa sa pasiuna sa leksyon 111). Ang pagpadayag nga iyang nadawat narekord sa Doktrina ug mga Pakigsaad 107. Mao kini ang ikaduha sa tulo ka mga leksyon nga naghisgot niini nga seksyon. Niini nga porsyon sa pagpadayag, ang Ginoo naglatid sa mga katungdanan sa tigdumalang mga korum sa Simbahan: ang Unang Kapangulohan, ang Korum sa Napulog Duha ka mga Apostoles, ug ang Seventy.

Mga Sugyot alang sa Pagtudlo

Doktrina ug mga Pakigsaad 107:21–26

Ang Ginoo naglatid sa mga katungdanan ug awtoridad sa nagdumalang mga korum sa Simbahan

Sa dili pa ang klase, isulat ang mosunod nga mga pulong diha sa pisara: suporta ug pagpaluyo. Inig sugod sa klase, hangyoa ang mga estudyante sa paghunahuna og usa ka panahon sa dihang ang usa ka tawo misuporta ug mipaluyo kanila. Dayon dapita ang mga estudyante sa pag-atubang ngadto sa usa ka partner ug mohulagway sa ilang kasinatian.

Unsa ang kalainan ang nahimo niini sa dihang nakahibalo kamo nga ang usa ka tawo misuporta o mipaluyo kaninyo?

Isulat ang pulong pagtuboy diha sa pisara, ug ipasabut nga sa pagtuboy og usa ka tawo nagpasabut nga kita mosuporta ug mopaluyo niana nga tawo.

Dapita ang mga estudyante sa pagbasa sa hilom sa Doktrina ug mga Pakigsaad 107:21–22, mangita kon kinsa ang giingon sa Ginoo nga kinahanglang ituboy sa mga miyembro.

Kinsa ang gisulti sa Ginoo nga kinahanglan nga atong ituboy? (Samtang ang mga estudyante motubag, isulat Ang Unang Kapangulohan isip usa ka ulohan diha sa pisara.)

Hangyoa ang mga estudyante sa pagribyu sa hilum sa Doktrina ug mga Pakigsaad 107:8–9. Sa dili pa nila basahon kini nga mga bersikulo, ipasabut nga sa bersikulo 9, ang mga pulong “Kapangulohan sa Halangdong Priesthood, sunod sa kapunongan ni Melchizedek” nagpasabut ngadto sa Unang Kapangulohan. Hangyoa ang mga estudyante sa pagpangita kon unsay gitudlo niini nga mga bersikulo mahitungod sa Unang Kapangulohan.

Unsa ang gitudlo niini nga mga bersikulo mahitungod sa Unang Kapangulohan? (Ubos sa ulohan, isulat ang mosunod nga kamatuoran: Ang Unang Kapangulohan adunay responsibilidad ug awtoridad sa pagdumala sa matag katungdanan sa Simbahan.)
Sumala sa bersikulo 22, unsaon nato pagtuboy ang Unang Kapangulohan? (Ang mga tubag sa mga estudyante kinahanglang magpakita sa mosunod nga kamatuoran: Ang Unang Kapangulohan ituboy sa pagsalig, hugot nga pagtuo, ug mga pag-ampo sa Simbahan. Mahimo nimong isugyot nga markahan sa mga estudyante ang mga pulong sa bersikulo 22 nga nagtudlo niini nga baruganan.)
Ngano kaha nga kinahanglan natong ituboy ang Unang Kapangulohan?

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw unsay iyang gisulti nga kinahanglan nga atong buhaton sa pagpaluyo, o pagtuboy, sa atong mga lider sa Simbahan.

“Aron kita makapaluyo niadtong gitawag … , kinahanglan nga atong susihon ang atong kinabuhi, maghinulsol kon gikinahanglan, mosaad nga mosunod sa mga sugo sa Ginoo, ug mosunod sa Iyang mga sulugoon. …

“… Mas maayo nga determinado kita sa pagpaluyo uban sa atong hugot nga pagtuo ug sa atong mga pag-ampo sa tanang nagserbisyo kanato sa gingharian. Personal akong nakahibalo sa gahum sa hugot nga pagtuo sa mga miyembro sa Simbahan sa pagpaluyo niadtong gitawag. … Akong gibati sa gamhanang paagi ang mga pag-ampo ug hugot nga pagtuo sa mga tawo nga wala nako mailhi ug kinsa nakaila lamang kanako nga usa ka tawo nga gitawag sa pagserbisyo pinaagi sa mga yawe sa priesthood” (“Ang Tinuod ug Buhi nga Simbahan,” Liahona, Mayo 2008, 21).

Unsay gisulti ni Presidente Eyring nga kinahanglan nga atong buhaton sa pagpaluyo sa atong mga lider sa Simbahan?
Sa unsang paagi kita makapaluyo sa mga lider sa Simbahan, sama sa Unang Kapangulohan, nga wala nato mailhi sa personal?

Hangyoa ang mga estudyante sa paghunahuna mahitungod kon unsay ilang gibuhat karon sa pagtuboy sa Unang Kapangulohan ug ubang mga lider sa Simbahan. Dapita sila sa pagsulat og usa ka tumong diha sa ilang mga class notebook ug mga scripture study journal kon unsay ilang buhaton sa umaabut aron mas makasuporta ug makapaluyo kanila.

Isulat Ang Korum sa Napulog Duha ka mga Apostoles isip ulohan diha sa pisara. Dapita ang mga estudyante sa pagbasa sa hilum sa Doktrina ug mga Pakigsaad 107:23, mangita unsay gisulti sa Ginoo mahitungod sa mga katungdanan sa Napulog Duha ka mga Apostoles.

Sumala sa bersikulo 23, nganong gitawag ang Napulog Duha ka mga Apostoles? (Human makatubag ang mga estudyante, isulat ang mosunod nga doktrina diha sa pisara ubos sa “Ang Korum sa Napluog Duha ka mga Apostoles”: Ang mga Apostoles mao ang espesyal nga mga saksi sa pangalan ni Jesukristo sa tibuok kalibutan. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)
Unsa sa inyong hunahuna ang gipasabut nga ang mga Apostoles mao ang espesyal nga mga saksi sa pangalan ni Jesukristo?

Dapita ang mga estudyante sa pagbasa unsa ang gisulti sa Bible Dictionary mahitungod sa pulong ug titulo nga Apostol. Hangyoa ang mga estudyante sa pagreport sa ilang nakit-an.

Ipasabut nga ang Presidente sa Simbahan mao ang senior nga Apostol dinhi sa yuta ug nga ang mga magtatambag sa Unang Kapangulohan mga Apostoles usab. Busa, ang mga sakop sa Unang Kapangulohan mga espesyal nga mga saksi usab sa pangalan ni Jesukristo. Dapita ang mga estudyante sa paghunahuna mahitungod kon unsay ilang gibati sa dihang sila naminaw o nagbasa sa mga saksi, o mga pagpamatuod, sa mga Apostoles. Hangyoa ang pipila ka mga estudyante sa pagpakigbahin sa ilang mga pagbati uban sa klase.

Dapita ang mga estudyante sa pagbasa sa hilum sa Doktrina ug mga Pakigsaad 107:24, mangita kon unsay gisulti sa Ginoo mahitungod sa awtoridad ug gahum sa Korum sa Napulog Duha ka mga Apostoles.

Sa bersikulo 24, unsay atong makat-unan mahitungod sa awtoridad ug gahum sa Korum sa Napulog Duha ka mga Apostoles? (Ang korum adunay awtoridad ug gahum sama sa Unang Kapangulohan. Mahimo nimong isulat kining impormasyon diha sa pisara ubos sa “Ang Korum sa Napulog Duha ka mga Apostoles.”)

Ipasabut nga kon ang mga lalaki maordinahan nga mga Apostoles, gihatagan sila sa samang mga yawe sa priesthood sama sa Presidente sa Simbahan. Hinoon, ang Presidente sa Simbahan, isip ang tigdumalang high priest sa Melchizedek nga Pagkapari, mao lamang ang bugtong tawo dinhi sa yuta kinsa gitugutan sa paggamit sa tanang mga yawe sa pagkapari. Ang ubang mga Apostoles mogamit niining mga yawe sa priesthood kon gitugutan sa Presidente sa Simbahan. Kon ang Presidente sa Simbahan mamatay, ang Unang Kapangulohan mawala ug ang Korum sa Napulog Duha, nga pareho og awtoridad ug gahum sa Unang Kapangulohan mahimong tigdumalang pundok sa Simbahan. Ang Presidente sa Korum sa Napulog Duha, ang senior nga buhi nga Apostol tugutan dayon sa paggamit sa tanan nga mga yawe sa priesthood.

Dapita ang mga estudyante sa pagbasa sa hilum sa Doktrina ug mga Pakigsaad 107:25, mangita sa laing korum sa priesthood nga gihisgutan niini nga pagpadayag ug unsa ang mga katungdanan sa mga sakop niini.

Unsa ang ikatulong korum nga gihisgutan sa Ginoo niini nga pagpadayag? (Samtang motubag ang mga estudyante, isulat diha sa pisara Ang Seventy isip ulohan.)
Unsa ang mga katungdanan sa Seventy? (Human makatubag ang mga estudyante, isulat ang mosunod nga kamatuoran diha sa pisara ubos sa “Ang Seventy”: Ang Seventy gitawag sa pagsangyaw sa ebanghelyo ug mahimong espesyal nga mga saksi ni Jesukristo sa tibuok kailibutan.)

Dapita ang mga estudyante sa pagbasa sa hilum sa Doktrina ug mga Pakigsaad 107:26, mangita kon unsay gisulti sa Ginoo mahitungod sa awtoridad sa Seventy. Hangyoa ang mga estudyante sa pagreport sa ilang nakit-an.

Aron matabangan ang klase nga makasabut unsa ang gisulti sa Ginoo mahitungod sa awtoridad sa Seventy, dapita ang usa ka estudyante sa pagbasa sa mosunod nga pamahayag:

Gihuptan ni Jesukristo ang mga yawe sa priesthood nga may kalabutan sa Iyang Simbahan. Iyang gitugyan ngadto sa matag usa sa Iyang mga Apostoles ang tanang mga yawe nga may kalabutan sa gingharian sa Dios dinhi sa yuta. Ang senior nga buhing Apostol, ang Presidente sa Simbahan, maoy bugtong tawo dinhi sa yuta nga awtorisado sa paggamit sa tanang mga yawe sa priesthood. …

“Ang mga Seventy molihok tungod sa assignment ug tungod sa pagdelegar sa awtoridad gikan sa Unang Kapangulohan ug sa Korum sa Napulog Duha ka mga Apostoles. … Ang Kapangulohan sa Seventy gi-set apart ug gihatagan og mga yawe aron modumala sa mga Korum sa Seventy” (Handbook 2: Administering the Church [2010], 2.1.1).

Dapita ang pipila ka estudyante sa pagpakigbahin sa ilang mga kasinatian samtang sila nagbasa o naminaw sa mga pakigpulong sa mga sakop sa Unang Kapangulohan, sa Korum sa Napulog Duha, ug sa Seventy. Kon ang mga estudyante nakahimamat na niini nga mga kaigsoonan, dapita sila sa pagpakigbahin usab niadto nga mga kasinatian.

Doktrina ug mga Pakigsaad 107:27–32

Ang Manluluwas mipasabut kon sa unsa nga paagi nga ang tigdumalang mga korum sa Simbahan mohimo og mga desisyon

Sultihi ang mga estudyante nga gusto ka nga sila mohimo og yanong desisyon isip usa ka grupo (pananglit, makahukom sila sa himno nga kantahon alang sa sunod nga debosyonal sa klase). Awhaga ang mga estudyante sa paghisgot sa ilang mga opsyon ug dungan makakab-ot og desisyon. Kon nakahimo na ang mga estudyante og desisyon, hisguti ang mosunod:

Sa unsa nga paagi nga ang mga grupo sa mga tawo sa kasagaran mohimo og mga desisyon?
Unsay inyong hunahuna niini nga pamaagi itandi kon giunsa sa Unang Kapangulohan, sa Korum sa Napulog Duha ka mga Apostoles, ug sa Seventy paghimo og mga desisyon?

Ipares-pares ang mga estudyante. Dapita sila sa pagbasa sa Doktrina ug mga Pakigsaad 107:27–32 pagdungan, mangita unsay gitudlo sa Ginoo mahitungod kon sa unsa nga paagi ang tigdumalang mga korum sa Simbahan mohimo og mga desisyon. Human ang mga estudyante dunay igong panahon sa pagsiksik niini nga mga bersikulo, hisguti ang mosunod nga mga pangutana:

Sumala niini nga mga bersikulo, sa unsa nga paagi ang tigdumalang mga korum mohimo og mga desisyon? (Human makatubag ang mga estudyante, mahimo nimong i-summarize ang ilang mga tubag pinaagi sa pagsulat sa mosunod nga baruganan diha sa pisara: Ang mga desisyon sa tigdumalang mga korum sa Simbahan gihimo pinaagi sa panaghiusa ug pagkamatarung.)
Unsa nga mga hiyas ang gihisgutan sa bersikulo 30 nga importante nga anaa niini nga mga kaigsoonan aron magkahiusa sa paghimo og mga desisyon?
Sumala sa bersikulo 31, unsa ang gisaad sa Ginoo sa tigdumalang mga korum sa Simbahan samtang sila mohimo og mga desisyon gamit kini nga mga hiyas?
Sa unsa nga paagi nga ang pagkahibalo nga ang Ginoo misaad sa pagpanalangin sa Unang Kapangulohan, sa Korum sa Napulog Duha ka mga Apostoles, ug sa Seventy sa Iyang kahibalo makatabang ninyo pagtuboy niini nga mga lider uban ang pagsalig, hugot nga pagtuo, ug pag-ampo ug pagsunod sa ilang tambag?

Doktrina ug mga Pakigsaad 107:33–38

Ang Ginoo naghatag og dugang nga direksyon ngadto sa tigdumalang mga korum sa Simbahan

I-assign sa matag estudyante ang usa sa mosunod nga mga bersikulo: Doktrina ug mga Pakigsaad 107:33, 34, o 35. Dapita ang mga estudyante sa pagtuon sa ilang bersikulo ug pag-ila sa mga kamatuoran mahitungod sa Napulog Duha ka mga Apostoles o sa Seventy. Human sa igong panahon, dapita ang pipila ka mga estudyante sa pagduol sa pisara ug pagsulat sa mga kamatuoran nga ilang nakit-an ubos sa “Ang Korum sa Napulog Duha ka mga Apostoles” o “Ang Seventy.”

Apil sa mga kamatuoran nga mahimong makit-an sa mga estudyante mao ang mosunod: Ang Napulog Duha ka mga Apostoles naglihok pinaagi sa pangalan sa Ginoo ug ubos sa direksyon sa Unang Kapangulohan sa pagtukod sa Simbahan. Ang Seventy naglihok pinaagi sa pangalan sa Ginoo ubos sa direksyon sa Napulog Duha ka mga Apostoles. Ang Napulog Duha ka mga Apostoles naghupot sa mga yawe sa pagpahayag sa ebanghelyo ni Jesukristo.

Tapusa kini nga leksyon pinaagi sa pagpakigbahin sa imong pagpamatuod sa sagrado nga mga responsibilidad niadtong gitawag sa Ginoo sa paggiya sa Iyang Simbahan. Awhaga ang mga estudyante sa pagtuboy ug pagpaluyo kanila pinaagi sa pagpaminaw sa ilang dinasig nga direksyon.

Komentaryo ug Background nga Impormasyon

Doktrina ug mga Pakigsaad 107:21–24. Espesyal nga mga saksi sa ngalan ni Kristo

Si Elder David A. Bednar sa Korum sa Napulog Duha ka mga Apostoles mitudlo unsay ipasabut nga mahimong espesyal nga saksi sa pangalan ni Kristo:

“Ang tahas sa usa ka Apostol karon pareha ra sa karaan (tan-awa sa Mga Buhat 1:22; 4:33). Ang gisugo kanato mao ang pag-adto sa tibuok kalibutan ug pagpahayag ni ‘Jesukristo, ug siya gilansang’ (tan-awa sa Marcos 16:15; 1 Mga Taga-Corinto 2:2). Ang usa ka Apostol mao ang usa ka misyonaryo ug usa ka espesyal nga saksi sa pangalan ni Kristo. Ang ‘pangalan ni Kristo’ nagpasabut sa kahingpitan sa misyon, kamatayon, ug pagkabanhaw sa Manluluwas—sa Iyang awtoridad, Iyang doktrina, ug Iyang talagsaong kwalipikasyon isip ang Anak sa Dios nga mahimo natong Manunubos ug atong Manluluwas. Isip espesyal nga mga saksi sa pangalan ni Kristo, kita magpamatuod sa katinuod, kabalaan, ug pagkabanhaw ni Jesukristo, sa Iyang walay katapusan ug mahangturon nga Pag-ula, ug sa Iyang ebanghelyo” (“Special Witnesses of the Name of Christ,” The Religious Educator: Perspectives on the Restored Gospel, vol. 12, no. 2 [2011], 1).

Doktrina ug mga Pakigsaad 107:27–30. Ang mga desisyon sa Unang Kapangulohan ug sa Korum sa Napulog Duha ka mga Apostoles

Mitudlo si Presidente Gordon B. Hinckley mahitungod sa mga desisyon sa Unang Kapangulohan ug sa Korum sa Napulog Duha ka mga Apostoles:

“Walay mga desisyon nga magagikan sa Unang Kapangulohan ug sa Korum sa Napulog Duha nga walay hingpit nga panag-uyon sa tanang may kalabutan. Sugod sa sinugdanan sa pagkonsiderar og mga butang, duna tingali mga kalainan sa opinyon. Ingon gayud niana. Kining mga tawhana naggikan sa managlahing kaagi. Mga tawo kini nga maghunahuna sa ilang kaugalingon. Apan sa dili pa himoon ang katapusang desisyon, adunay mahimong panaghiusa sa salabutan ug sa tingog.

“Malauman kini kon ang napadayag nga pulong sa Ginoo gisunod. Pag-usab nagkutlo ako gikan sa pagpadayag:

“‘Ang mga hukom niini nga mga korum, o bisan hain kanila, kinahanglan nga pagahimoon diha sa tanan nga pagkamatarung, diha sa pagkabalaan, ug pagkamapainubsanon sa kasingkasing, pagkamaaghup ug pagkamainantuson, ug diha sa hugot nga pagtuo, ug hiyas, ug kahibalo, pagkamapugnganon, pailub, pagkadiosnon, inigsoon nga pagkamabination ug gugma nga putli;

“Tungod kay ang saad mao, kon kini nga mga butang buhong diha kanila sila dili magkulang sa kasayuran sa Ginoo’ (D&P 107:30–31).

“Modugang ko pinaagi sa personal nga pagpamatuod nga sa bayente singko ka tuig nakong pagserbisyo isip sakop sa Konseho sa Napulog Duha ug sa hapit trese ka tuig nga nagserbisyo ko sa Unang Kapangulohan, wala gayud mahitabo nga wala sunda kining paagiha sa tanang dagkong desisyon nga gihimo. May nakita kong gipresentar nga panaglahi sa opinyon niini nga mga deliberasyon. Gikan niining mao gayud nga proseso sa mga tawo nga mipagawas sa ilang mga hunahuna anaa ang paghashas sa mga ideya ug mga konsepto. Apan wala gayud ako makabantay nga dunay seryusong panaglalis o personal nga pagdumot tali sa akong Kaigsoonan. Hinoon, akong namatikdan ang matahum ug talagsaong butang—ang pagkahiusa, ubos sa direktang impluwensya sa Espiritu Santo ug ubos sa gahum sa pagpadayag, mahitungod sa managsukwahing panan-aw hangtud nga nakab-ot ang bug-os nga paghiusa ug hingpit nga panag-uyon. Niana lamang himoon ang pag-implementar. Kana, ako mopamatuod, nagrepresentar sa espiritu sa pagpadayag nga gipakita og balik-balik sa pagdumala niining buhat sa Ginoo” (“God Is at the Helm,” Ensign, Mayo 1994, 54, 59).

Doktrina ug mga Pakigsaad 107:35. Ang mga yawe sa Napulog Duha ka mga Apostoles

Si Propeta Joseph Smith mitudlo nga ang Napulog Duha ka mga Apostoles “mao ang modumala sa mga simbahan sa mga Santos. … Sila ang mohupot sa mga yawe niini nga pangalagad, sa pag-abli sa pultahan sa Gingharian sa langit ngadto sa tanang kanasuran, ug mosangyaw sa Ebanghelyo sa matag binuhat. Mao kini ang gahum, awtoridad, ug hiyas sa ilang pagka-apostol” (Mga Pagtulun-an sa mga Presidente sa Simbahan: Joseph Smith [2007], 165).