Doktrina ug mga Pakigsaad 51–52

Pasiuna

Samtang ang mga Santos nga milalin gikan sa silangan nga mga estado nagsugod sa pagpangabut sa Ohio niadtong Mayo 1831, ang Ginoo mipadayag sa Doktrina ug mga Pakigsaad 51 ngadto ni Joseph Smith alang ni Bishop Edward Partridge. Ang grupo nga miabut gikan sa Colesville, New York, gimanduan nga moadto sa Thompson, Ohio, diin ilang tumanon ang balaod sa pagpahinungod. Atol sa pagtapos sa ikaupat nga komperensya sa Simbahan, nga gipahigayon niadtong Hunyo 3–6, 1831, didto sa Kirtland, ang Ginoo mimando ni Joseph Smith ug sa ubang mga elder sa pagbiyahe nga magtinagurha ngadto sa Missouri, nga magsangyaw samtang nagpadulong ngadto. Sa pagpadayag nga narekord diha sa Doktrina ug mga Pakigsaad 52, ang Ginoo mitawag sa matag parisan ug mihatag og sumbanan aron matabangan sila nga makalikay sa pagpanglingla.

Mga Sugyot alang sa Pagtudlo

Doktrina ug mga Pakigsaad 51:1–20

Gimanduan sa Ginoo si Bishop Edward Partridge sa pagtubag sa temporal nga mga panginahanglan sa mga Santos

Aron matabangan ang mga estudyante nga magsugod sa paghunahuna bahin sa usa sa mga resulta sa pagsunod sa balaod sa pagpahinungod, dapita ang mga estudyante sa pagtubag sa mosunod nga mga pangutana nga magpares o sa ginagmay nga mga grupo o isip usa ka klase.

Unsa man ang labing nagkahiusa nga grupo nga nahimo kamong kabahin? Giunsa ninyo pagkahibalo nga ang usa ka grupo nagkahiusa? Unsa nga mga matang sa mga gipangbuhat ug mga kalihokan nga makatabang sa usa ka grupo nga magkahiusa?

Ipasabut nga ang mga Santos nga namalhin gikan sa New York nagsugod sa pagpangabut didto sa Ohio sa tingpamulak sa 1831. Usa ka grupo miabut gikan sa Colesville, New York, sa hilabihan nga pagsakripisyo. Kini nga grupo gimanduan nga mopuyo didto sa Thompson, Ohio, ug magsunod sa balaod sa pagpahinungod. Dapita ang mga estudyante sa paghunahuna sa panaghiusa nga mahimong moresulta gikan sa usa ka grupo nga dungang mihimo og mga sakripisyo sa pagsunod sa kabubut-on sa Ginoo.

Dapita ang usa ka estudyante sa pagbasa og kusog sa Doktrina ug mga Pakigsaad 51:1–3. Hangyoa ang klase sa pagsunod, nga mangita sa mga responsibilidad ni Bishop Edward Partridge.

Unsa ang pipila ka responsibilidad ni Bishop Partridge? (Mahimo nimong ipasabut nga sa bersikulo 3, ang mga pulong nga “managsama sumala ngadto sa iyang banay” wala magpasabut nga ang matag Santos sa Ulahing mga Adlaw makadawat sa samang tabang. Ang bishop kinahanglang mokonsiderar sa sitwasyon sa matag pamilya sa managlahing paagi ug “motudlo ngadto” kanila sa unsay ilang gikinahanglan. Managsama sila tungod kay ang bishop mihatag og managsama nga konsiderasyon ug pagtagad sa matag pamilya.)

Dapita ang mga estudyante sa pagbasa og hilum sa Doktrina ug mga Pakigsaad 51:9, nga mangita sa unsay gipasabut sa Ginoo nga duha ka tinuyo nga mga resulta sa pagsunod sa balaod sa pagpahinungod.

Unsa ang gilauman sa Ginoo sa Iyang katawhan? (Ang mga estudyante kinahanglang mopahayag sa mosunod nga baruganan: Gilauman sa Ginoo ang Iyang katawhan nga magmatinuoron sa uban ug magkahiusa.)

I-summarize ang Doktrina ug mga Pakigsaad 51:10–20 pinaagi sa pagpasabut nga ang Ginoo mimando ni Bishop Partridge sa pag-establisar og usa ka balay-tipiganan diin ang sobra nga mga butang matipigan. Iyang gipasabut nga Iyang gipahinungod ang dapit ngadto sa mga Santos “alang sa mubo nga panahon” (D&P 51:16). Bisan kon wala sila mahibalo kon unsa kadugaya sila magpuyo didto, kinahanglan sila nga “molihok diha niini nga yuta alang sa mga katuigan” (D&P 51:17), magmatinud-anon, maalamon, ug makiangayon nga mga tinugyanan sa unsay gihatag ngadto kanila. Mahimo nimong ipasabut nga diha sa bersikulo 10, ang pulong nga simbahan nagpasabut sa usa ka branch sa Simbahan (tan-awa sa D&P 51:10, footnote a; tan-awa usab sa D&P 20:81; 45:64).

Doktrina ug mga Pakigsaad 52:1–13, 22–36

Gimanduan sa Ginoo ang Propeta ug ang ubang mga elder nga mobiyahe ngadto sa Missouri ug mosangyaw sa ebanghelyo atol sa ilang pagbiyahe

Sa dili pa magklase, andama ang tulo ka clue, ang matag usa mogiya ngadto sa sunod. Pananglitan, ang unang clue mahimong momando sa mga estudyante sa pagpangita sa ikaduhang clue sa ubos o sa sulod sa usa ka butang sa usa ka lugar sa classroom. Ang ikaduha nga timailhan mogiya kanila sa pagpangita sa ikatulo nga timailhan nga naa sa bisan asang dapit sa classroom. Ang ikatulo nga timailhan kinahanglang mag-ingon: “Basaha ang Doktrina ug mga Pakigsaad 52: 1–6. Pangita og usa ka baruganan nga susama niining kalihokan.”

Ipapilit ang una nga timailhan sa pisara, ug isulat ang mosunod nga instruksyon sa tupad niini: Sunda kining timailhan aron makat-on kon unsaon sa pagdawat og padayon nga giya gikan sa Ginoo.

Human mabasa sa mga estudyante ang una nga timailhan, dapita sila sa pagsunod sa mga instruksyon sa pagpangita sa ikaduha nga timailhan. Dapita dayon sila sa pagbasa sa mga direksyon diha sa ikaduhang clue ug ipapangita ang ikatulong timaan [clue].

Sa dili pa sundon sa mga estudyante ang mga direksyon diha sa ikatulong clue, ipasabut nga ang tudling nga ilang pangitaon naglangkob og mga instruksyon nga gihatag ngadto ni Joseph Smith ug sa ubang mga priesthood lider atol sa usa ka komperensya sa Simbahan nga gipahigayon didto sa Kirtland, Ohio, niadtong Hunyo 1831. Pahinumdumi ang mga estudyante nga ang Ginoo mipadayag sa miagi nga ang mga Santos moestablisar og usa ka siyudad nga gitawag og Zion (tan-awa sa D&P 28:9), apan wala pa Niya gipadayag ang lokasyon niini.

Dapita ang mga estudyante sa pagsunod sa mga instruksyon sa ikatulo nga timailhan. Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 52:1–6. Dapita ang klase sa pagsunod, nga mangita sa baruganan nga susama sa kalihokan nga bag-o lang nilang nakompleto.

Sumala sa mga bersikulo 4–5unsay mahimong mahitabo kon kita magmatinud-anon sa mga instruksyon sa Dios? (Kon kita matinud-anon sa pagsunod sa mga instruksyon sa Dios, Siya mopadayag pa og dugang bahin sa Iyang kabubut-on ngari kanato. Isulat sa pisara kini nga baruganan.)
Sa unsang paagi nga kining kalihokan susama niining baruganan? (Samtang nagsunod ang mga estudyante sa matag instruksyon, ilang nadawat ang dugang nga mga direksyon, nga sa katapusan naggiya kanila ngadto sa tubag nga ilang gipangita.)
Unsa sa inyong gibati ang pipila ka kaayohan nga makadawat sa hinay-hinay sa giya ug kamatuoran sa Ginoo kay sa kausa ra tanan?

Dapita ang mga estudyante nga dunay kasinatian niini nga baruganan sa pagpakigbahin sa ilang mga kasinatian o sa pagpamatuod sa katinuod niini. Mahimo usab ikaw nga mopakigbahin og usa ka kasinatian o sa imong pagpamatuod. Awhaga ang mga estudyante sa pagsulat og pangutana, problema, o desisyon nga ilang giatubang nga gusto nila ang tabang ug giya sa Ginoo. Dapita dayon sila sa pagpamalandong ug sa pagsulat sa bisan unsang direksyon nga gihatag kanila sa Ginoo nga mas hingpit nilang mapatalinghugan aron mas madapit pa ang giya gikan Kaniya.

Dapita ang usa ka estudyante sa pagbasa og kusog sa Doktrina ug mga Pakigsaad 52:7–10. Hangyoa ang klase sa pagsunod, nga mangita sa mga instruksyon nga gihatag sa Ginoo sa pipila ka naghupot sa priesthood sa wala pa sila mobiyahe ngadto sa Missouri.

Unsa may gisugo nga buhaton niining mga naghupot sa priesthood samtang nagbiyahe sila?

Doktrina ug mga Pakigsaad 52:14–21, 36

Gipadayag sa Ginoo ang usa ka sumbanan nga makatabang nato nga makalikay nga malingla ni Satanas

Pahinumdumi ang mga estudyante nga sa pinadayag nga narekord diha sa Doktrina ug mga Pakigsaad 50, gipasidan-an sa Ginoo ang mga elder sa Simbahan bahin sa dili tinuod nga mga espiritu ug mihatag og mga instruksyon nga makatabang sa mga Santos aron malig-on ang usag usa samtang nagtudlo ug nagkat-on sila sa mga kamatuoran sa ebanghelyo.

Ipasabut nga diha sa Doktrina ug mga Pakigsaad 52:14–21, mipadayag ang Ginoo og dugang nga mga instruksyon aron matabangan nga mapalig-on ang mga miyembro sa Simbahan, ilabi na kadtong Iyang gitawag sa pagsangyaw sa ebanghelyo samtang mibiyahe sila ngadto sa Missouri.

Dapita ang usa ka estudyante sa pagbasa og kusog sa Doktrina ug mga Pakigsaad 52:14. Hangyoa ang klase sa pagsunod ug sa pagtino sa mga pulong nga gigamit sa Ginoo sa paghulagway sa unsay Iyang igtutudlo. (“Sumbanan sa tanan nga mga butang.”)

Unsa ang usa ka sumbanan? (Usa ka modelo nga atong masunod aron makab-ot ang usa ka pihong resulta.)
Unsa ang rason nga gihatag sa Ginoo sa paghatag niini nga sumbanan?

Ipares-pares ang mga estudyante. Dapita ang matag pares nga magpuli-puli sa pagbasa og kusog sa Doktrina ug mga Pakigsaad 52:15–19. Hangyoa sila sa pagpangita sa mga binuhatan ug mga hiyas nga giingon sa Ginoo nga makatabang sa Iyang katawhan nga makalikay nga malingla ni Satanas. Human sa igong panahon, hangyoa sila sa pagreport sa unsay ilang nakit-an. Dapita ang usa ka estudyante nga magsilbing tigsulat ug molista sa ilang mga tubag diha sa pisara.

Samtang motubag ang mga estudyante, mahimo nimong ipasabut o mohangyo nila sa pagpasabut sa kahulugan sa mosunod nga mga pulong: ang “kansang espiritu mahinulsulon” (D&P 52:15) nagpasabut sa usa ka tawo nga dunay mahinulsulon nga kinaiya; ang “mosunod sa akong mga ordinansa” (D&P 52:15) nagpasabut sa usa ka tawo nga nakadawat sa mga ordinansa ug nagtuman sa may kalabutan nga mga pakigsaad; ang “kansang pinulongan maaghup ug makahatag og kaayohan” (D&P 52:16) nagpasabut sa usa ka tawo kansang sinultihan mapainubsanon ug mobayaw o motabang sa uban; ang “nangurog ubos sa akong gahum” (D&P 52:17) naghulagway sa usa ka tawo kinsa mibati og balaang pagtahud alang sa gahum sa Dios; ug ang “magdala og mga bunga” (D&P 52:17) nagpasabut sa usa ka tawo kinsa nakahimo og butang nga maayo (sama sa “pagdayeg ug kaalam”) pinaagi sa pagsunod sa mga pagpadayag nga gihatag sa Dios.

Hatagi og panahon ang mga parisan sa paghisgot kon unsaon nila pag-summarize ang mga kamatuoran nga gitudlo diha sa Doktrina ug mga Pakigsaad 52:14–19. Human sa igo nga panahon, dapita sila sa pagpakigbahin sa mga kamatuoran nga ilang nahibaloan. Ang mga estudyante mahimong mohatag og lain-laing mga tubag, apan mahimo nimong hatagan og gibug-aton ang mosunod nga baruganan: Aron makalikay nga malingla ni Satanas, ang usa ka tawo kinahanglan gayud nga mosunod sa mga ordinansa sa Ginoo ug magpakabuhi sumala sa mga pagpadayag nga Iyang gihatag.

Pahinumdumi ang mga estudyante nga sa dihang gipadayag sa Ginoo kini nga sumbanan aron makalikay nga malingla, namulong Siya ngadto sa grupo sa mga naghupot sa priesthood kinsa mosangyaw sa ebanghelyo ngadto sa uban.

Ngano kaha nga importante man niadtong kinsa motudlo sa ebanghelyo ngadto sa uban sa pagsunod sa sumbanan nga gipadayag sa Ginoo niini nga mga bersikulo? (Aron makatudlo sila pinaagi sa Espiritu.)

Dapita ang usa ka estudyante sa pagbasa og kusog sa Doktrina ug mga Pakigsaad 52:36. Hangyoa ang klase sa pagsunod, nga mangita sa dugang nga instruksyon nga gihatag sa Ginoo niini nga pagpadayag. Dapita sila sa pagreport sa ilang nakit-an.

Unsa ang gisugo sa Ginoo nga ipahayag sa mga elder sa Simbahan?
Nganong makabaton man kita og pagsalig sa usa ka lider o magtutudlo nga nagpakabuhi sumala sa sumbanan nga gilatid sa Ginoo diha sa mga bersikulo 14–19 ug nagtudlo lamang sa unsay gitudlo sa mga propeta ug mga apostoles?

Mahimo nimong isugyot nga ikonsiderar sa kon giunsa sa mga sakop sa Unang Kapangulohan o sa Korum sa Napulog Duha ka mga Apostoles sa pagpakita niini nga sumbanan.

Doktrina ug mga Pakigsaad 52:37–44

Ag Ginoo mihatag og tambag ngadto sa mga lider nga magpabilin sa Ohio

Ipasabut nga samtang gitawag sa Ginoo ang daghan sa unang mga naghupot sa priesthood sa pagsangyaw sa ilang pagpaingon sa Missouri, ang pipila ka elder kinahanglang magpabilin sa Ohio. Dapita ang usa ka estudyante sa pagbasa og kusog sa Doktrina ug mga Pakigsaad 52:39–40. Hangyoa ang klase sa pagsunod, nga mangita sa mga instruksyon nga gihatag sa Ginoo ngadto sa mga elder nga magpabilin sa Ohio.

Unsa nga mga responsibilidad ang gihatag sa Ginoo ngadto sa mga elder nga nagpabilin sa Ohio?
Unsa kaha ang gipasabut sa “hinumdumi … ang kabus ug ang timawa”? Nganong ang paghunahuna lang sa usa ka tawo nga nanginahanglan dili igo aron matuman kini nga tambag gikan sa Ginoo?
Unsay gisulti sa Ginoo bahin sa mga tawo nga dili motuman sa ilang mga responsibilidad?
Unsa nga baruganan ang atong makat-unan gikan niining mga bersikulo bahin sa pagkahimong tinuod nga disipulo sa Ginoo? (Bisan kon ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga baruganan: Ang mga disipulo ni Jesukristo mobantay ug moatiman niadtong kinsa kabus, timawa, masakiton, ug nagkalisud.)

Hangyoa ang mga estudyante sa paghunahuna bahin sa mga tawo nga ilang nailhan nga ilang gikonsiderar nga mga disipulo ni Jesukristo. Dapita ang pipila ka estudyante sa pagpaambit kon sa unsang paagi nga ang usa ka tawo nga ilang nahunahunaan nagbantay ug nag-atiman alang niadtong nanginahanglan. Mahimo nimong ipahayag ang pasalamat nga imong gibati alang niadtong kinsa nagbantay ug nag-atiman kanimo sa imong panahon sa panginahanglan.

Komentaryo ug Background nga Impormasyon

Doktrina ug mga Pakigsaad 52:14–19. Usa ka ehemplo sa sumbanan sa pagkamatinud-anon

Si Elder Paul E. Koelliker sa Seventy misaysay sa mosunod nga istorya, nga naglakip sa ehemplo kon sa unsang paagi nga kita makaimpluwensya sa uban sa positibong paagi samtang magpakabuhi kita sumala sa sumbanan diha sa Doktrina ug mga Pakigsaad 52:14–19:

“Ang sumbanan mao ang sundanan, giya, balik-balik nga lakang, o dalan nga sundon aron mapahiangay sa katuyoan sa Dios. Kon sundon, makahimo kini natong mapaubsanon, maabtik, ug kaila sa tingog sa Balaang Espiritu gikan sa tingog nga makabalda kanato ug modala nato palayo. …

“… Kon nagsunod kita sa sumbanan nga gitudlo ni Ginoong Jesukristo, ang atong abilidad sa pagtabang sa uban molambo. Ang mosunod nga kasinatian usa ka ehemplo niini nga baruganan.

“Duha ka misyonaryo nanuktok sa pultahan, nanghinaut nga makakita og tawo nga modawat sa ilang mensahe. Giablihan ang pultahan, ug usa ka dakong tawo mitagad nila nga dili kaayo mahigalaon: ‘Siguro nasultihan ko na kamo nga dili na manuktok. Gipasidan-an ko na kamo nga kon mobalik gani mo, dili nindot ang inyong masinati. Karon lakaw na mo.” Kalit niyang gisira ang pultahan.

“Sa paglakaw sa mga elder, ang mas dugay, mas sinati nga misyonaryo miagbay sa mas bag-ong misyonaryo sa paghupay ug pagdasig niya. Wala sila masayud, ang tawo nagtan-aw nila sa bintana sa pagsiguro nga nasabtan nila ang iyang gisulti. Nagtuo siya nga makita sila nga mangatawa ug ibaliwala lang ang iyang dili maayong pagtagad. Apan, sa iyang pagtan-aw sa kamabination sa duha ka misyonaryo, nahumok dayon ang iyang kasingkasing. Giablihan niyag balik ang pultahan ug gipabalik ang mga misyonaryo ug gipakigbahin ang ilang mensahe niya” (“Tinuod Siya nga Nahigugma Kanato,” Liahona, Mayo 2012, 17).

Doktrina ug mga Pakigsaad 52:33–34. “Siya nga matinud-anon … panalipdan ug panalanginan”

“Nagbilin si Lydia Clisbee Partridge og usa ka istorya bahin sa mga kahimtang diin ang iyang bana, nga si Edward, nakadawat niining mapadayagon nga mando. Ang ilang mga anak natakdan og tipdas gikan sa pipila sa bag-ohay lang nga miabut nga mga miyembro sa New York nga nag-istar uban sa ilang pamilya. Misulat siya nga ang ilang ‘kinamagulangang anak nga babaye nasakit og hilanat sa baga [lung fever], ug samtang naglisud na gayud siya, ang akong bana gitawag pinaagi sa pagpadayag nga mokuyog sa uban ngadto sa Missouri aron mangita og dapit nga kapundukan sa mga Santos, ang mga dili tumutuo naghunahuna nga siguro nabuang na siya o dili siya moadto. Ug naghunahuna ko sa akong kaugalingon nga duna koy rason nga maghunahuna nga nagsugod na ang akong mga pagsulay, ug sa ingon [kini] nahitabo, apan kini nga pagsulay sama sa uban pa gisundan og mga panalangin kay ang among anak nga babaye naulian.’ (Partridge, Genealogical Record, 6.)” Documents, Volume 1: Hulyo 1828–Hunyo 1831, vol. 1 sa Documents series sa The Joseph Smith Papers [2013], 330).