Leksyon 51

Doktrina ug mga Pakigsaad 45:1–15

Pasiuna

Niadtong Marso 1831, ang Simbahan nagpadayon sa paglambo didto sa Kirtland. Ang pagsupak batok sa Simbahan nagpadayon usab. Si Propeta Joseph Smith misulat: “Daghang sayop nga mga report, mga bakak, ug binuang nga mga istorya, ang gimantala diha sa mga newspaper, ug gipakatap sa tanang direksyon, aron mapugngan ang mga tawo nga mosusi sa buhat, o mohangup sa pagtuo.” Niining higayuna sa paglambo ug pagsupak, si Joseph Smith nakadawat og pagpadayag nga sa kaulahian siya miingon nga miabut “sa kahinangup sa mga Santos kinsa kinahanglang manlimbasug batok sa tanang butang nga ang maimbento sa paghukom ug pagkadautan” (sa History of the Church, 1:158). Kini nga pagpadayag, karon narekord diha sa Doktrina ug mga Pakigsaad 45, nagsugod sa mga pagpahayag gikan sa Manluluwas bahin sa Iyang mga tahas diha sa atong kaluwasan. Ang leksyon karon mao ang una sa tulo nga nag-focus sa Doktrina ug mga Pakigsaad 45.

Mga Sugyot alang sa Pagtudlo

Pagpamatuod

Kinahanglan imong ihatag ang imong pagpamatuod sa piho nga mga doktrina nga imong gitudlo sa matag leksyon, dili lang ang kinatibuk-an mahitungod sa kamatuoran sa ebanghelyo. Kon ikaw mopamatuod, hinumdumi kining tambag gikan ni Elder Jeffrey R. Holland sa Korum sa Napulog Duha ka mga Apostoles: “Ihatag ang pagsaksi gikan sa kinauyukan sa imong kalag. Mao kini ang labing importanting butang nga inyong ikasulti ngadto kanila sa tibuok oras. … Kon kita mopamatuod sa mga kamatuoran nga atong gitudlo, ang Dios mopamatuod sa atong mga kasingkasing ug ngadto sa mga kasingkasing sa atong mga estudyante sa mensahe sa ebanghelyo ni Jesukristo” (Pagtudlo ug Pagkat-on sa Simbahan,” Ensign, Hunyo 2007, 72–73)

Doktrina ug mga Pakigsaad 45:1–5

Si Jesukristo mihatag og gibug-aton sa Iyang mga tahas isip Tiglalang ug Manlalaban

Hangyoa ang mga estudyante sa paghunahuna nga nagtinguha sila og direksyon bahin sa usa ka butang nga importante ngadto kanila ug nga pipila ka tawo gustong mohatag kanila og tambag.

• Unsa nga mga kinaiya ang kinahanglang mabatunan sa usa ka tawo sa dili pa kamo ganahang maminaw sa iyang tambag? (Ang mga estudyante mahimong mopakigbahin og pipila ka lain-laing mga tubag niini nga pangutana. Sigun sa gikinahanglan, mahimo nimong isugyot nga mas ganahan silang maminaw sa tawo nga nagpakabana kanila sa personal ug kinsa duna nay kalampusan diha sa hilisgutan diin sila mitanyag og tambag.)

Ipasabut nga ang pagpadayag nga narekord diha sa Doktrina ug mga Pakigsaad 45 miabut sa panahon sa dihang ang mga Santos sa Ulahing mga Adlaw ug ang uban nakapaminaw ug nakabasa og nagsumpaki nga mga mensahe bahin sa Simbahan. Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 45. Hangyoa ang klase sa pagsunod, nga mangita sa mga kahimtang nga giatubang sa mga Santos.

Dapita ang usa ka estudyante sa pagbasa sa unang pulong sa Ginoo diha sa pagpadayag.

Pahinumdumi ang mga estudyante nga ang patalinghug nagpasabut og paminaw og maayo ug sunda. Kon tinuoray kitang mopatalinghug sa Ginoo, mosunod kita sa Iyang tambag ug mga sugo. Ipasabut nga sa sinugdanan niini nga pagpadayag, ang Ginoo mihimo og mga pamahayag bahin sa uban Niyang mga tahas ug bahin sa Iyang mga paningkamot nga motabang kanato. Sa pagbasa nato niining mga pamahayag, makakita kita og mga rason nga mopatalinghug sa Iyang mga pulong. Awhaga ang mga estudyante nga bantayan ang mga pulong nga patalinghug ug paminaw diha sa mga bersikulo nga ilang tun-an karon.

Dapita ang mga estudyante sa pagbasa og hilum sa Doktrina ug mga Pakigsaad 45:1, nga mangita kon unsay gisulti ni Jesukristo bahin sa Iyang kaugalingon. Hangyoa ang mga estudyante sa pag-report sa unsay ilang nakit-an. Sa ilang pagtubag, isulat sa pisara ang mosunod nga doktrina: Si Jesukristo milalang sa kalangitan ug sa yuta.

Dapita ang usa ka estudyante sa pagbasa og kusog sa Doktrina ug mga Pakigsaad 45:2. Hangyoa ang klase sa pagsunod, nga mangita sa mga rason nga mopatalinghug ngadto sa Manluluwas.

• Sumala niini nga bersikulo, nganong kinahanglan man kitang mopatalinghug ngadto sa Manluluwas? (Mahimong kinahanglan nimong ipasabut nga ang mga pulong nga “sa takna nga kamo wala magdahum nga ang ting-init milabay” nagpasabut sa ideya nga ang ting-init mahimong usa ka panahon sa pagtrabaho ug pag-andam alang sa ting-ani sa katapusan sa panahon. Kining bersikulo nagtudlo nga kinahanglan kitang mopatalinghug sa Manluluwas karon ug maghinulsol sa atong mga sala samtang duna pa kitay panahon sa pagtrabaho alang sa kaluwasan sa atong mga kalag.)

Ipasabut nga ang Doktrina ug mga Pakigsaad 45:3 naglakip sa pulong nga manlalaban. Ang manlalaban mao ang usa ka tawo kinsa mangamuyo alang sa kawsa sa laing tawo. Usahay mahitabo kini diha sa korte sa balaod, diin ang manlalaban mopresentar og ebidensya ngadto sa usa ka huwes nga nagrepresentar sa usa ka tawo nga gihukman.

Sa dili pa magklase andama ang tulo ka karatula sama sa mosunod:

Andama ang likod sa mga karatula sama sa mosunod:

Pagdapit og tulo ka estudyante ngadto sa atubangan sa classroom. Ihatag ang usa sa mga karatula ngadto sa matag estudyante. Hangyoa sila sa pagkupot sa mga karatula, nga mag-display sa mga pulong huwes, manlalaban, ug gikiha. Hangyoa ang estudyante nga nagkupot sa karatula nga gisulatan og manlalaban sa pagbarug taliwala sa laing duha ka estudyante.

Hangyoa ang klase sa paghunahuna nga anaa sila sa korte diin dunay huwes, usa ka manlalaban, ug usa ka gikiha kinsa giakusahan og usa ka krimen.

• Unsa man ang tahas sa usa ka huwes?

• Sa unsa kaha nga paagi nga ang usa ka manlalaban makatabang sa akusado?

Dapita ang usa ka estudyante sa pagbasa og kusog sa Doktrina ug mga Pakigsaad 45:3. Hangyoa ang klase sa pagsunod, nga mangita kon unsay gitudlo niining bersikulo bahin sa Manluluwas.

• Niining bersikulo, kinsa man ang huwes? (Samtang motubag ang mga estudyante niini nga pangutana, hangyoa ang estudyante nga nagkupot sa karatula nga gisulatan og huwes nga balihon ang karatula.) Kinsa man ang gikiha? (Hangyoa ang estudyante nga nagkupot sa karatula nga gisulatan og gikiha nga balihon ang karatula.) Kinsa man ang manlalaban? (Hangyoa ang estudyante nga nagkupot sa karatula nga gisulatan og manlalaban nga balihon ang karatula. Dayon isulat sa pisara ang mosunod nga doktrina: Si Jesukristo mao ang atong Manlalaban ngadto sa Langitnong Amahan.)

• Ngano nga nagkinahanglan man kita og manlalaban ngadto sa Langitnong Amahan? (Kay kita nakasala. Sumala sa kaangayan sa Dios, walay mahugaw nga butang nga makasulod sa Iyang presensya. Busa, nagkinahanglan kita og manlalaban nga mangamuyo alang sa atong kawsa sa atubangan sa Amahan ug motabang kanato nga mapahiuli ngadto Kaniya.)

Dapita ang usa ka estudyante sa pagbasa og kusog sa Doktrina ug mga Pakigsaad 45:4–5. Hangyoa ang klase sa pagsunod, nga mangita kon sa unsang paagi nga si Jesus nangamuyo alang sa atong kawsa sa atubangan sa Amahan.

• Sumala sa bersikulo 4, unsa man ang gihangyo ni Jesukristo nga ikonsiderar sa Langitnong Amahan? (Ang Manluluwas naghisgot sa Iyang walay sala nga kinabuhi ug sa Iyang pag-antus ug kamatayon.)

• Sumala sa bersikulo 5, unsa pa man ang gihangyo sa Manluluwas nga ikonsiderar sa Amahan? (Ang atong hugot nga pagtuo diha ni Jesukristo.)

Dapita ang mga estudyante sa pagpamalandong sa mga paagi nga gikinahanglan nila si Jesukristo nga mahimo nilang Manlalaban sa ilang matag adlaw nga kinabuhi. Hatagi sila og oras nga mosulat sa ilang mga class notebook o mga scripture study journal sa ilang mga gibati bahin sa Manluluwas nga nahimo nilang Manlalaban. Dapita usab sila sa pagsulat sa unsay ilang gibati kon unsay Iyang ipabuhat kanila aron mapakita nga mituo sila sa Iyang ngalan.

Doktrina ug mga Pakigsaad 45:6–10

Ang Manluluwas namahayag nga Siya mao ang kahayag ug kinabuhi sa kalibutan ug nga Iyang gipadala ang Iyang walay katapusang pakigsaad ngadto sa kalibutan

Ipares-pares ang mga estudyante, ug hangyoa ang mga parisan sa pagbasa og dungan sa Doktrina ug mga Pakigsaad 45:6–10. Human nga ang mga estudyante nakagahin na og igong panahon sa pagbasa, ipangutana ang mosunod:

• Sumala sa mga bersikulo 6–7, unsa man ang mga rason nga gihatag sa Manluluwas aron kita mopatalinghug ngadto Kaniya? Unsa ang kahulugan niini nganha kaninyo nga Siya mao “ang sinugdanan ug ang katapusan”? Sa unsang mga paagi nga nagdala Siya og kahayag ug kinabuhi sa kalibutan?

Isulat ang mosunod nga mga paghulagway bahin sa Manluluwas diha sa pisara:

Si Jesukristo mao ang sinugdanan ug ang katapusan.

Si Jesukristo mao ang kahayag ug ang kinabuhi sa kalibutan.

• Sumala sa bersikulo 8, unsay gisaad sa Manluluwas ngadto niadtong modawat Kaniya?

Ipasabut nga diha sa bersikulo 9, atong mabasa nga si Jesukristo mipadala sa Iyang “walay katapusan nga pakigsaad … nga mahimo nga kahayag ngadto sa kalibutan, ug mahimo nga sukaranan alang sa [Iyang] mga katawhan.” Sa laing pagpadayag, miingon Siya nga ang Iyang walay katapusan nga pakigsaad mao “ang kahingpitan sa [Iyang] ebanghelyo” (D&P 66:2).

• Unsa kaha ang gipasabut sa “pagpangita” sa ebanghelyo?

• Sa unsang mga paagi nga inyong nakita ang ebanghelyo nga nahimong kahayag sa kalibutan? Sa unsang mga paagi nga ang ebanghelyo usa ka sumbanan alang kanato kinsa mihimo og mga pakigsaad ngadto sa Ginoo?

Doktrina ug mga Pakigsaad 45:11–15

Ang Manluluwas namahayag nga Siya mao ang Dios ni Enoch

I-display ang litrato nga Siyudad sa Zion Gidala ngadto sa Langit (Libro sa mga Hulagway sa Ebanghelyo [2009], nu. 6; tan-awa usab sa LDS.org). Ipasabut nga paghulagway kini sa artist bahin ni Enoch ug sa iyang katawhan. Dayon dapita ang usa ka estudyante sa pagbasa og kusog sa Doktrina ug mga Pakigsaad 45:11. Ipasabut nga diha niini nga bersikulo, ang Ginoo miingon nga ang ubang mga tawo motawag Kaniya og “ang Dios ni Enoch.”

Dapita ang mga estudyante sa pagsulti sa klase sa unsay ilang nahibaloan bahin ni propeta Enoch. Sigun sa gikinahanglan, ihatag ang mosunod nga impormasyon: Si Enoch nabuhi sa wala pa ang panahon ni Noe. Ang yuta sa panahon ni Enoch napuno sa pagkadautan, apan gipangulohan niya ang usa ka katilingban sa matarung nga mga tawo nga nagpuyo sa usa ka siyudad nga gitawag og Zion. Ang mga lumulupyo sa Zion sa katapusan “nahimulag gikan sa yuta” (D&P 45:12)—nga gidala ngadto sa langit tungod sa ilang pagkamatarung (tan-awa sa Moises 7:69).

I-summarize ang Doktrina ug mga Pakigsaad 45:12–14 pinaagi sa pagpasabut nga gidawat sa Ginoo ang katawhan sa Zion ngadto sa Iyang kaugalingon ug Siya mitagana kanila “hangtud sa pag-abut sa adlaw sa pagkamatarung.” Nianang higayuna, si Enoch ug ang iyang katawhan mobalik sa yuta aron makighimamat sa matinud-anong mga Santos sa Ulahing mga Adlaw sa siyudad sa Bag-ong Jerusalem, nga pagatawagon usab og Zion (tan-awa sa Moises 7:62–64). Ang tanang mga propeta nagpaabut nianang adlawa. Tungod sa pagkadautan sa katawhan sa yuta, kanang adlawa wala pa moabut, apan kadtong kinsa nagpaabut niini makakita niini sa umaabut.

Dapita ang mga estudyante sa pagribyu sa mga pamahayag nga imong gisulat diha sa pisara nga naghulagway sa ubang mga tahas ug mga kinaiya ni Jesukristo. Dapita ang mga estudyante sa pagpamalandong niining mga pamahayag ug pagpili og usa ka kinaiya nga makahuluganon kaayo ngadto kanila. Human sa igong panahon, dapita ang pipila ka estudyante sa pag-report bahin sa tahas o kinaiya nga ilang gipili ug sa pagpasabut kon nganong makahuluganon kini ngadto kanila. Human makapasabut ang mga estudyante sa ilang mga hunahuna, isulat sa pisara ang mosunod nga baruganan: Samtang magkat-on kita bahin sa mga tahas ug mga kinaiya ni Jesukristo, ang atong tinguha sa pagsunod Kaniya molambo.

• Unsay inyong nakat-unan bahin sa Manluluwas karon nga nakatabang kaninyo nga ganahang mopatalinghug ngadto Kaniya?

Mahimo nimong ipakigbahin ang imong mga hunahuna bahin sa usa sa mga tahas o mga kinaiya sa Manluluwas ug kon sa unsang paagi nga ang imong kahibalo bahin niana nga tahas o kinaiya nakatabang kanimo nga magtinguha sa pagsunod Kaniya. Ikonsiderar ang pagtapos pinaagi sa pagpamatuod bahin sa mga panalangin sa pagpaminaw ngadto ni Jesukristo ug sa pagsunod sa Iyang tambag ug mga sugo.

Komentaryo ug Background nga Impormasyon

Doktrina ug mga Pakigsaad 45:3–5. Si Jesukristo mao ang atong Manlalaban

Si Presidente Boyd K. Packer sa Korum sa Napulog Duha ka mga Apostoles mipasabut sa tahas sa Manluluwas isip usa ka tigpataliwala:

“Ang matag usa kanato nagpuyo sa usa ka matang sa espirituhanon nga utang. Moabut ang adlaw nga ang utang paninglon na, og mobungat na sa bayad. Bisan unsa pa kini kayano sa atong tan-aw karon, kon kana nga adlaw moabut ug hapit na ang tagal, moaninaw kita sa palibut diha sa pait nga kahimtang nga dili mahimutang nga mangita og tawo, bisan kinsa, nga makatabang nato.

“Ug, pinaagi sa mahangturong balaod, ang kalooy dili ikahatag gawas kon adunay usa ka tawo nga andam ug makahimo sa pagdala sa atong utang ug mobayad sa bugti ug mohan-ay sa mga kondisyon alang sa atong katubsanan.

“Gawas kon adunay usa ka tigpataliwala, gawas kon kita adunay higala, ang tibuok gibug-aton sa kaangayan, dili kapugngan, dili mobati, kinahanglan gayud, sa positibong paagi kinahanglan gayud nga mahiaguman nato. Ang hingpit nga bayad sa kada kalapasan, bisan unsa pa kagamay o kabug-at, paninglon gikan nato hangtud nga mabayran ang tanan.

“Apan hibaloi kini: Ang kamatuoran, mahimayaon nga kamatuoran, nagpahayag nga adunay usa ka Tigpataliwala.

“‘Kay adunay usa ka Dios, ug adunay usa ra ka tigpataliwala sa Dios ug sa mga tawo, nga mao ang tawo nga si Kristo Jesus.’ (1 Tim. 2:5.)” (“The Mediator,” Ensign, Mayo 1977, 55–56).

Si Presidente Packer mihatag og gibug-aton nga ang Ginoo naglihok isip atong Manlalaban ngadto sa Amahan sa atong matag adlaw nga kinabuhi:

“Sa pipila ka rason, maghunahuna kita sa Pag-ula ni Kristo nga magamit lamang sa katapusan sa mortal nga kinabuhi sa katubsanan gikan sa Pagkapukan, gikan sa espirituhanong kamatayon. Kini mas labaw pa gayud niana. Mao kini usa ka gahum nga anaa gayud sa kanunay aron matawag sa matag adlaw nga kinabuhi. Kon kita gisakit o gihasol sa tanlag o nabug-atan tungod sa kagul-anan, makaayo Siya kanato. Bisan kon wala nato masabti sa hingpit kon giunsa pagbuhat ang Pag-ula ni Kristo, makasinati kita sa ‘kalinaw sa Dios, nga lapaw sa tanang pagpanabut.’ [Mga Taga-Filipos 4:7.]” (“The Touch of the Master’s Hand [Ang Paghikap sa Kamot sa Manluluwas],” Ensign, Mayo 2001, 23).

Si Elder D. Todd Christofferson sa Korum sa Napulog Duha ka mga Apostoles mihulagway sa iyang gibati kalabut sa paagi nga nangamuyo ang Manluluwas sa iyang kawsa ug sa ingon nakahatag og access ngadto sa Langitnong Amahan:

“Dako kini og kahulugan ngari kanako, nga ako bisan unsang higayon ug sa bisan unsang kahimtang makaduol pinaagi sa pag-ampo sa trono sa grasya, nga ang akong Langitnong Amahan maminaw sa akong pangaliyupo, nga ang akong Manlalaban, kinsa wala makabuhat og sala, kansang dugo gipaagas, mangamuyo alang sa akong kawsa. (Tan-awa sa D&P 45:3–5.) Nagsalig gyud ko niana nga access ngadto sa Dios, nga iyang gihatag sa tanan niyang mga anak, kay siya sa pagkatinuod walay pagtamud sa mga tawo, ug siya nga nangayo makadawat” (“I Know in Whom I Have Trusted,” Ensign, Mayo 1993, 83).

Doktrina ug mga Pakigsaad 45:11–12. “Si Enoch … nahimulag gikan sa yuta”

Si Propeta Joseph Smith nakaobserbar:

“Karon kining si Enoch nga gitagana sa Dios ngadto sa Iyang kaugalingon, nga kinahanglan siya nga dili mamatay nianang higayuna, ug gitudlo ngadto kaniya ang pangalagad ngadto sa terrestrial nga mga lawas, nga mahitungod kanila adunay gamay ra nga gipadayag” (sa History of the Church, 4:209).

Sa laing okasyon midugang ang Propeta:

“Siya [ang Ginoo] mipili kang Enoch, kinsa Iyang gimanduan, ug gihatagan sa Iyang balaod, ug sa katawhan nga uban kaniya; ug sa dihang ang kalibutan sa kinatibuk-an wala mosunod sa mga mando sa Dios, human makiglakaw uban sa Dios, iyang gibalhin sa pagkahimaya si Enoch ug ang iyang simbahan, ug ang Priesthood o pangagamhanan sa langit gikuha” (sa History of the Church, 5:64).