Leksyon 116

Doktrina ug mga Pakigsaad 109:1–46

Pasiuna

Ang mga Santos nagtrabaho dul-an sa tulo ka tuig sa pagtukod sa Templo sa Kirtland. Sa dihang nahuman kini, ang Ginoo mipadayag ngadto ni Propeta Joseph Smith sa pag-ampo nga ihalad atol sa pagpahinungod sa templo. Ang Propeta mibasa sa pag-ampo isip kabahin sa tulumanon sa pagpahinungod niadtong Marso 27, 1836. Ang pag-ampo narekord sa Doktrina ug mga Pakigsaad 109. Kini nga leksyon naghisgot sa unang bahin sa pag-ampo, nga naglakip sa pangamuyo alang sa Ginoo sa pagdawat sa templo ug sa pagtuman sa mga saad nga Iyang gihimo mahitungod niini, lakip ang panalipod ug mga panalangin alang niadtong kinsa mosimba diha niini.

Mga Sugyot alang sa Pagtudlo

Doktrina ug mga Pakigsaad 109:1–23

Mihangyo si Joseph Smith sa Ginoo sa pagdawat sa Templo sa Kirtland ug sa pagpanalangin niadtong kinsa mosimba diha niini

Pagpakita og pipila ka mga litrato sa templo. Mahimo nimong pangutan-on ang mga estudyante kon nakahibalo ba sila asa ang matag templo mahimutang.

Isulat ang mosunod nga pangutana diha sa pisara: Nganong magtukod man kita og mga templo? Dapita ang mga estudyante sa pagpares-pares ug sa paghisgot sa mga tubag niini nga pangutana. Human sa igong panahon, ipasabut nga makakita kita og mga tubag niini nga pangutana sa Doktrina ug mga Pakigsaad 109.

Pakit-a ang mga estudyante og litrato sa Kirtland Temple (tan-awa sa Libro sa mga Hulagway sa Ebanghelyo [2009], no. 117; tan-awa usab sa LDS.org ug sa josephsmith.net). Ipasabut nga ang mga Santos nagtrabaho ug nagsakripisyo og dul-an sa tulo ka tuig sa pagtukod sa Templo sa Kirtland. Nakita nila ang katumanan sa saad sa Ginoo nga kon sila motuman sa Iyang mga sugo, sila “makabaton sa gahum sa pagtukod niini” (D&P 95:11). Niadtong Marso 27, 1836, ang mga Santos mitambong sa tulumanon sa pagpahinungod alang sa templo, ug mihalad si Joseph Smith sa pag-ampo sa pagpahinungod. Nakadawat siya sa mga pulong sa pag-ampo pinaagi sa pagpadayag sa wala pa ang tulumanon sa pagpahinungod. Ang pag-ampo narekord sa Doktrina ug mga Pakigsaad 109.

Gamita ang mga scripture study aid

Kadaghanan sa mga hubad sa Doktrina ug mga Pakigsaad naglakip sa mga scripture study aid sama sa mga footnote, index, mga litrato, ug mga mapa. Pananglitan, daghang mga edisyon naglakip sa usa ka seksyon nga gitawag og Kronolohiya sa Kasaysayan sa Simbahan, mga Mapa, ug mga Litrato, nga naglakip sa litrato sa Templo sa Kirtland. Awhaga ang mga estudyante sa paggamit niini nga mga tabang sa pagtuon sa ilang personal nga pagtuon sa kasulatan.

Plano sa hawanan sa ubos nga bahin sa Templo sa Kirtland.

Ipasabut nga hapit 1,000 ka mga Santos sa Ulahing mga Adlaw ang mitambong sa tulumanon sa pagpahinungod alang sa Templo sa Kirtland. Daghan pa ang gusto nga motambong apan dili na masulod sa building. Gipahigayon ni Propeta Joseph Smith nga sila makaapil sa miting sa laing building, ug ang tulumanon sa pagpahinungod gisubli alang kanila paglabay sa pipila ka mga adlaw.

Dapita ang mga estudyante sa paghunahuna nga nag-apil og tulumanon sa pagpahinungod sa Templo sa Kirtland. Mibati sila og dakong kahinam atol sa pangbukas nga kanta sa choir. Dayon mihatag si Sidney Rigdon og sermon. Human sa mubo nga intermisyon, duna silay oportunidad sa pagpaluyo sa mga lider sa Simbahan. Dayon si Propeta Joseph Smith mibarug ug mibasa sa pag-ampo sa pagpahinungod.

Dapita ang usa ka estudyante sa pagbarug ug pagbasa og kusog sa Doktrina ug mga Pakigsaad 109:1–4. Hangyoa ang klase sa pagsunod, nga mangita sa unang rason nga gitukod sa mga Santos ang Templo sa Kirtland.

• Unsa ang unang rason nga gitukod sa mga Santos ang Templo sa Kirtland? (Kinahanglang makakita ang mga estudyante nga gitukod sa mga Santos ang templo tungod kay ang Ginoo misugo kanila. Isulat ang mosunod nga pangutana diha sa pisara: Ang Ginoo misugo kanamo sa pagtukod og mga templo.)

Dapita ang usa ka estudyante sa pagbarug ug pagbasa og kusog sa Doktrina ug mga Pakigsaad 109:5. Hangyoa ang klase sa pagsunod, nga mangita sa mga pulong nga naghulagway sa sakripisyo sa mga Santos sa pagtukod sa templo.

• Unsa nga mga pulong ang inyong namatikdan? (Ang mga tubag mahimong maglakip sa “dako nga kalisdanan,” “gikan sa among kakabus,” ug “mihatag sa among mga kabtangan.”)

Aron matabangan ang mga estudyante nga makasabut sa gihimo nga mga sakripisyo sa mga Santos sa pagtukod sa Templo sa Kirtland, hangyoa ang usa ka estudyante sa pagbasa sa mosunod nga summary:

Tunga-tunga sa Hunyo 1833 ug Marso 1836, ang mga miyembro sa Simbahan misakripisyo og panahon, kwarta, ug mga kabtangan aron sa pagtabang sa pagtukod og balay alang sa Ginoo. Ang mga lalaki miboluntaryo sa pagtrabaho sa kontruksyon. Ang mga babaye naghimo og mga sinina ug naghatag og kapuy-an. Sa dihang kadaghanan sa mga lalaki miuban sa Kampo sa Zion, ang ubang mga babaye mipadayon sa trabaho sa templo. Pipila sa mga Santos sa Ulahing mga Adlaw, sama ni John Tanner ug Vienna Jacques, mihatag og daghan sa ilang bahandi alang sa pagtukod sa templo. Ang uban mihatag sa ilang mga kahanas. Pananglitan, si Brigham Young mibunyag og usa ka tawo nga ginganlan og Artemus Millet sa Canada. Si Brother Millet miundang sa iyang trabaho isip usa ka stone mason alang sa gobyerno sa Canada aron siya ug ang iyang pamilya makabalhin ngadto sa Kirtland, diin siya miserbisyo isip superintendente sa konstruksyon sa templo. Sa tanan, ang gasto sa templo mga 60,000 United States dollars—dako kaayo nga kantidad nianang higayuna, ilabi na sa kakabus sa mga Santos. Sa pagtandi, kana nga kantidad mosobra pa sa 1,000,000 United States dollars karon.

• Unsay nakapatandog ninyo mahitungod sa mga sakripisyo nga gihimo sa mga Santos sa pagtukod sa templo?

Dapita ang mga estudyante sa pagbasa pag-usab sa hilum sa bersikulo 5, mangita sa kamatuoran nga nagpasabut ngano nga ang mga Santos misakripisyo og dako sa pagtukod sa templo.

• Unsa nga kamatuoran ang inyong nakit-an mahitungod kon ngano nga ang mga Santos gusto nga magtukod og templo? (Ang mga estudyante kinahanglang makapadayag nga sa templo, ang Ginoo makapakita sa Iyang kaugalingon ngari kanato. Isulat kini nga baruganan diha sa pisara.)

Dapita ang katunga sa klase sa pagbasa sa hilum sa Doktrina ug mga Pakigsaad 109:10–11, mangita kon unsay gihangyo ni Joseph Smith sa Ginoo nga buhaton aron ang mga tawo makadawat sa mga panalangin sa templo. Dapita ang laing katunga sa klase sa pagbasa sa hilum sa Doktrina ug mga Pakigsaad 109:12–13, mangita sa mga pulong nga makatabang nila nga makasabut giunsa sa Ginoo pagpakita sa Iyang Kaugalingon ngari kanato diha sa templo. Human sa igong panahon, pangutan-a ang unang grupo sa mosunod nga mga pangutana:

• Unsay gihangyo ni Joseph Smith sa Ginoo nga buhaton aron ang mga tawo makadawat sa mga panalangin sa templo? (Sa pagtabang kanila uban sa Iyang grasya aron sila mahimong takus sa Iyang panan-aw.)

• Kon kita maningkamot nga mahimong takus nga mosulod sa templo, nganong nagkinahanglan kita sa grasya sa Ginoo?

Pangutan-a ang ikaduhang grupo sa mosunod nga pangutana:

• Unsa nga mga pulong ang inyong nakit-an nga makatabang kaninyo nga makasabut kon giunsa sa Ginoo pagpakita ang Iyang kaugalingon ngari kanato diha sa templo? (Mahimo nimong isugyot nga markahan sa mga estudyante kini nga gipakigbahin sa ilang mga kauban.)

Dapita ang mga estudyante sa pagpakigbahin, nga magpares-pares o uban sa tibuok klase, mga kasinatian nga ilang nasinati sa dihang mibati sila og kasuod ngadto sa Ginoo diha sa templo. Pahinumdumi sila nga ang pipila ka mga kasinatian sagrado ra kaayo o personal aron ipakigbahin. Kon angay, ipakigbahin ang imong kaugalingong kasinatian.

• Sa unsa nga paagi nga ang pagbati nga suod sa Ginoo diha sa templo makaimpluwensya sa inyong kinabuhi kon kamo anaa na sa gawas sa templo?

Dapita ang mga estudyante sa pagpadayon sa pagbasa sa Doktrina ug mga Pakigsaad 109:14–23 sa ilang kaugalingon, mangita og dugang nga mga panalangin nga gisaad sa Ginoo ngadto niadtong kinsa nagsimba diha sa templo.

• Unsa nga dugang nga mga panalangin ang gisaad sa Ginoo ngadto niadtong kinsa nagsimba diha sa templo? (Ang mga estudyante kinahanglang makakita og daghang mga panalangin niini nga mga bersikulo. Mahimo nimong isulat kini nga mga panalangin diha sa pisara.)

Gikan sa mga bersikulo 22–23, unsa ang pipila ka mga resulta sa pagsimba diha sa templo? (Agig sumpay sa mga tubag nga gihatag sa mga estudyante, tabangi sila sa pag-ila sa mosunod nga kamatuoran: Ang pagdawat og mga panalangin sa templo makasangkap nato og gahum ug tabang sa Ginoo samtang kita magserbisyo Kaniya. Isulat kini nga kamatuoran diha sa pisara. Mahimo usab nimong isugyot nga isulat sa mga estudyante kini diha sa ilang mga kasulatan.)

• Unsa sa inyong hunahuna ang gipasabut sa “sinangkapan uban sa gahum [sa Ginoo]”?

Aron matabangan ang mga estudyante nga makasabut kon unsay gipasabut sa sinangkapan uban sa gahum sa Ginoo, dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles:

“Sa balay sa Ginoo, ang matinud-anong mga miyembro sa Simbahan mahimong tugahan ‘uban sa gahum gikan sa kahitas-an’ [D&P 95:8], gahum nga makapahimo nato sa pagbatok sa tintasyon, pagtahud sa mga pakigsaad, pagsunod sa mga sugo sa Ginoo, ug mohatag og mainiton, walay kahadlok nga pagpamatuod sa ebanghelyo ngadto sa pamilya, mga higala, ug mga silingan” (“Cultivating Divine Attributes,” Ensign, Nob. 1998, 27).

• Sa unsa nga paagi nga kini nga matang sa gahum mahimong usa ka panalangin kaninyo ug sa inyong pamilya? Sa unsa nga paagi nga kini nga matang sa gahum mahimong usa ka panalangin alang sa full-time nga mga misyonaryo?

Doktrina ug mga Pakigsaad 109:24–46

Mihangyo si Joseph Smith sa Ginoo sa pagpanalipod ug pagpanalangin niadtong kinsa nagsimba sa templo ug niadtong kinsa nagsangyaw sa ebanghelyo

Pagdrowing og paleta ug espada diha sa pisara. Mahimo nimong ipasabut nga ang paleta gamiton sa pagbutang og mortar sa tunga-tunga sa mga bika o mga bato. Pangutan-a ang mga estudyante sa unsa nga paagi nga kini nga mga himan magamit sa pagtukod og templo.

Ipasabut nga atol sa pagtukod sa Templo sa Kirtland, ang manggugubot nga panon mihulga sa pagguba sa templo. Si Presidente Brigham Young misulti sa “mga laborer diha sa mga paril, naggunit sa espada sa usa ka kamot sa pagpanalipod sa ilang kaugalingon gikan sa manggugubot nga panon, samtang ilang gibutang ang bato ug gigamit ang paleta sa pagbalhin sa lain” (Discourses of Brigham Young, sel. John A. Widtsoe [1954], 415). Usahay, ang mga lalaki nga nagtrabaho sa templo sa adlaw kinahanglang mobantay niini sa gabii.

Ipasabut nga agig dugang sa makugihong pagtrabaho sa pagpanalipod sa templo ug sa ilang kaugalingon, ang mga Santos nangayo sa Ginoo og proteksyon. Dapita ang usa ka estudyante sa pagbasa og kusog sa Doktrina ug mga Pakigsaad 109:24–28, ug hangyoa ang klase sa pagpangita sa matang sa proteksyon nga gipangayo ni Joseph Smith gikan sa Ginoo human matukod ang templo.

• Unsa nga matang sa proteksyon ang giampo ni Joseph?

• Sumala sa bersikulo 24, unsay atong mabuhat aron makadawat niini nga matang sa proteksyon?

• Unsay makat-unan nato gikan niini nga mga bersikulo mahitungod sa pagdawat og proteksyon gikan sa dautan? (Ang mga estudyante mahimong mogamit og lain-laing mga pulong, apan kinahanglan nilang ilhon ang mosunod nga baruganan: Kon ang katawhan sa Ginoo takus ug nagsimba Kaniya diha sa templo, nan ang pagkadautan dili makabuntog kanila.)

I-summarize ang Doktrina ug mga Pakigsaad 109:29–46 pinaagi sa pagpasabut nga ang Propeta nag-ampo nga kadtong nagpakatap og mga bakak mahitungod sa mga Santos malibug ug nga ang mga miyembro sa Simbahan makabarug ug magbuhat sa buhat sa Ginoo. Mihangyo usab siya sa Ginoo nga sudlan ang templo sa Iyang himaya ug hatagan ang Iyang mga sulugoon og pagpamatuod ug gahum nga ilang gikinahanglan sa pagsangyaw sa ebanghelyo.

Sa pagtapos, awhaga ang mga estudyante nga magbaton kanunay og current temple recommend, bisan og wala sila magpuyo duol sa templo. Ikonsiderar ang pagpakigbahin sa mosunod nga pamahayag ni Presidente Howard W. Hunter:

“Sa pagkatinuod, ang Ginoo nagtinguha nga ang Iyang katawhan mahimong usa ka katawhan nga nadasig sa templo. Mao unta gayud kini ang labing tinguha sa akong kasingkasing nga ang matag miyembro sa Simbahan mahimong takus sa templo. … Himoa nga kita usa ka katawhan nga kanunayng moadto sa templo ug mahigugmaon sa templo. Magdali kita og adto ngadto sa templo ingon ka kanunay kon itugot sa panahon ug salapi ug personal nga mga kahimtang” (“The Great Symbol of Our Membership,” Ensign, Okt. 1994, 5).

Komentaryo ug Background nga Impormasyon

Doktrina ug mga Pakigsaad 109. Floor plan sa Templo sa Kirtland

Ang mosunod nga paghulagway nagpakita sa arrangement sa unang andana sa Templo sa Kirtland, diin mahitabo ang pagpahinungod:

Doktrina ug mga Pakigsaad 109:2–3. Nalig-on pinaagi sa pagpadayag ug mga sugo

Ubos sa direksyon ni Jesukristo, si Propeta Joseph Smith nakahimo og daghang mga butang kay sa iyang mahimo sa iyang kaugalingon. Nagpasabut sa desenyo ug konstruksyon sa Templo sa Kirtland, si Presidente Brigham Young mipahayag:

“Kon walay pagpadayag, si Joseph dili makahibalo unsay gusto sa Ginoo, bisan kinsa nga labaw pa kay ni bisan kinsang tawo, ug, kon walay sugo, ang Simbahan dyutay pa kaayo, huyang pa kaayo sa pagtuo, ug walay kwarta, nga mosulay sa hilabihan ka dakong gimbuhaton” (Discourses of Brigham Young, sel. John A. Widtsoe [1954], 415).

Doktrina ug mga Pakigsaad 109:5. “Gikan sa among kakabus kami mihatag sa among mga kabtangan.”

Si Presidente Thomas S. Monson namulong kabahin sa mga sakripisyo nga angay nga himoon aron makadawat og mga panalangin sa templo:

“Ang pipila ka ang-ang sa sakripisyo ang gilambigit sa pagtukod og templo ug sa pagtambong sa templo. Dili maihap kadtong nagtrabaho ug naningkamot aron maangkon sa ilang kaugalingon ug alang sa ilang mga pamilya ang mga panalangin nga anaa sa mga templo sa Dios.

“Nganong daghan man kaayo ang andam sa paghatag og daghan aron makadawat sa mga panalangin sa templo? Kadtong nakasabut sa mahangturong mga panalangin nga magagikan sa templo nasayud nga walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo, aron makadawat niana nga mga panalangin. Walay daghang mga milya nga biyahion, daghang mga babag nga buntugon, o daghang pagkadili komportable ang ilahutay. Nakasabut sila nga ang makaluwas nga mga ordinansa nga madawat sa templo nga magtugot kanato nga makabalik sa atong Langitnong Amahan diha sa mahangturong relasyon sa pamilya ug aron matugahan sa mga panalangin ug gahum gikan sa kahitas-an bililhon sa tanang sakripisyo ug tanang paningkamot” (“Ang Balaan nga Templo—ang Suga sa Kalibutan,” Liahona, Mayo 2011, 92).

Dugang nga mga Ideya sa Pagtudlo

Doktrina ug mga Pakigsaad 109:5. Pasundayag sa Video—“Treasure in Heaven: The John Tanner Story”

Aron matabangan ang mga estudyante nga makapasalamat sa mga sakripisyo nga gihimo sa pipila ka mga Santos sa pagtukod sa Templo sa Kirtland, mahimo nimong ipasalida ang video nga “Treasure in Heaven: The John Tanner Story.” Kini nga video anaa sa Doctrine and Covenants and Church History Visual Resources DVDs ug sa LDS.org.

Kon wala kay access niini nga video, mahimo kang modapit og usa ka estudyante sa pagbasa sa mosunod nga historical summary:

Niadtong sayong bahin sa 1830, si John Tanner usa ka adunahan nga tawo. Siya ug ang iyang asawa, nga si Elizabeth, adunay dakong pamilya, ug nagpuyo sila sa silangang Estados Unidos. Usa ka adlaw duha ka mga misyonaryo nga Santos sa Ulahing Adlaw mibisita sa ilang balay. Usa nila, si Elder Jared Carter, mihatag og panalangin sa priesthood ngadto ni John, ug ang mga tiil ni John, nga gikabahong, naayo diha-diha. Wala na gayud mogamit si John og sungkod pag-usab.

Sila si John ug Elizabeth Tanner nabunyagan niadtong Septyembre 17, 1832. Pagka-Disyembre 1834, si Brother Tanner dunay impresyon nga siya ug ang iyang pamilya kinahanglang mobalhin ngadto sa Kirtland. Sa ilang pag-abut, iyang nahibaloan nga ang utang sa templo kinahanglang bayaran na ug nga ang pobre nga mga lider sa Simbahan nagsige og pag-ampo sa paagi sa pagbayad sa utang. Diha-diha mihatag siya og kwarta. Nagpadayon siya sa paghatag og dakong kantidad sa kwarta sa pagtukod sa templo ug sa pagtabang sa buhat hangtud nahurot ang iyang kwarta. Sa dihang mibalhin siya uban sa iyang pamilya ngadto sa Missouri aron sa pagtabang sa pagtukod sa Zion, “nanghulam siya og mga kabayo ug usa niini luya na kaayo, ug karaan nga karwahe, usa ka baril nga powder, ug $7.50 nga kwarta,” sumala sa iyang anak nga lalaki, nga si Nathan. (Tan-awa sa George S. Tanner, John Tanner and His Family [1974], 74–77.)

Si Brother Tanner gitawag nga moserbisyo og misyon niadtong 1844. Sa wala pa siya mobiya aron moserbisyo, nahimamat niya si Joseph Smith sa dalan padulong ngadto sa Nauvoo ug gitunol kaniya ang sulat gikan sa utang nga iyang gihatag ngadto sa mga lider sa Simbahan alang sa balayranan sa dapit sa templo. Gisultihan ni John si Joseph nga walay obligasyon nga bayran siya. Agig tubag, miingon si Joseph, “Ang Dios mopanalangin kanimo, Amahang Tanner, ang imong mga anak dili gayud magpakalimos alang sa pagkaon” (sa John Tanner and His Family, 103). Kini nga panagna nahimong panalangin sa pamilyang Tanner sukad. (Tan-awa sa Leonard J. Arrington, “The John Tanner Family,” Ensign, Mar. 1979, 48.)

Doktrina ug mga Pakigsaad 109:22–23. “Sinangkapan uban sa [Iyang] gahum”

Isip mga estudyante hisguti ang gahum nga moabut pinaagi sa mga ordinansa ug mga pakigsaad sa templo (tan-awa sa D&P 109:22–23), itudlo nga ang full-time nga mga misyonaryo nagkinahanglan niini nga gahum sa ilang pagpakigbahin sa ebanghelyo. Basaha ang mosunod nga pamahayag ni Presidente Howard W. Hunter sa paghatag og gibug-aton sa pagdawat sa temple endowment. Mahimo nimong isugyot nga markahan sa mga estudyante kini nga mga pulong diha sa ilang mga kasulatan.

“Andamon nato ang matag misyonaryo aron moadto sa templo nga takus ug himoon kana nga kasinatian nga mas nindot pa gani kay sa pagdawat og mission call” (“Follow the Son of God,” Ensign, Nob. 1994, 88).

• Unsa ang atong mahimo aron ang temple endowment mas mahimong importante kay sa pagdawat og mission call?

Awhaga ang mga estudyante sa paghimo sa ilang pagpangandam alang sa mga panalangin sa templo nga prayoridad samtang mangandam sila alang sa mga misyon ug kaminyoon.

Aron matabangan ang mga estudyante sa kaimportante sa kalig-on nga ilang madawat sa templo ikonsiderar ang pagpasalida sa video “Strength beyond My Own,” nga anaa sa LDS.org. Hangyoa ang mga estudyante sa pagpamalandong unsa ilang kinahanglan nga buhaton aron sa paghimo sa templo nga prayoridad sa ilang mga kinabuhi.