Doktrina ug mga Pakigsaad 133:36–74

Pasiuna

Kini nga leksyon naghisgot sa ikaduhang bahin sa pagpadayag nga narekord sa Doktrina ug mga Pakigsaad 133. Nadawat ni Joseph Smith kining pagpadayag niadtong Nobyembre 3, 1831. Gitubag niini ang mga pangutana sa mga misyonaryo bahin sa pagsangyaw sa ebanghelyo ug sa pagpundok sa Israel. Gihulagway usab niini ang Ikaduhang Pag-anhi sa Ginoo ug gipasabut kon unsay kinahanglan natong buhaton aron maandam alang niini.

Mga Sugyot alang sa Pagtudlo

Doktrina ug mga Pakigsaad 133:36–40

Ang Ginoo namahayag nga ang gipahiuli nga ebanghelyo kinahanglang isangyaw ngadto sa tibuok kalibutan

Sugdi ang leksyon pinaagi sa pagpangutana sa mosunod:

Kanus-a nga kamo naghinam-hinam kaayo nga makita ang usa ka tawo? (Dapita ang pipila ka estudyante sa pagsaysay sa ilang mga kasinatian. Mahimo usab nga mopakigbahin ka og usa ka kasinatian.)

I-display ang hulagway sa Ang Ikaduhang Pag-anhi (Libro sa mga Hulagway sa Ebanghelyo [2009], nu. 66; tan-awa usab sa LDS.org).

Naghinam-hinam ba kamo nga makita ang Manluluwas sa Iyang Ikaduhang Pag-anhi? Ngano man?

Ipasabut nga ang Ikaduhang Pag-anhi ni Jesukristo mahimong usa ka matam-is ug maanindot nga kasinatian alang sa pipila ug usa ka makahahadlok nga kasinatian alang sa uban. Ipamatuod nga ang Manluluwas nagtinguha nga ang tanang katawhan mag-andam sa ilang kaugalingon alang sa Iyang pag-anhi.

Dapita ang usa ka estudyante sa pagbasa og kusog sa Doktrina ug mga Pakigsaad 133:36–39. Hangyoa ang klase sa pagsunod, nga mangita sa ebidensya nga ang Manluluwas nagtinguha nga ang tanang katawhan maandam alang sa Iyang Ikaduhang Pag-anhi.

Unsa nga ebidensya ang inyong nakita niining mga bersikulo nga ang Manluluwas nagtinguha nga ang tanang katawhan maandam alang sa Iyang Ikaduhang Pag-anhi? (Mipadala Siya og usa ka anghel [o mga anghel] sa pagpahiuli sa ebanghelyo dinhi sa yuta. Gipadala usab Niya ang Iyang mga sulugoon sa pagsangyaw sa ebanghelyo ngadto sa tanang katawhan.)
Kinsa ang mga sulugoon sa Dios kinsa mao ang mosangyaw sa mensahe sa gipahiuli nga ebanghelyo? (Ang tanang mga miyembro sa Simbahan mga sulugoon sa Dios kinsa adunay responsibilidad sa pagpakigbahin sa ebanghelyo ngadto sa uban. Mahimo nimong isugyot nga isulat sa mga estudyante ang mosunod nga baruganan diha sa ilang mga kasulatan: Isip mga sulugoon sa Dios, makatabang kita sa uban nga maandam alang sa Ikaduhang Pag-anhi pinaagi sa pagpakigbahin sa ebanghelyo ngadto kanila.)
Sumala sa bersikulo 38, unsaon nato sa pagsangyaw sa ebanghelyo? Unsa kaha ang gipasabut sa pagsangyaw sa ebanghelyo “uban sa makusog nga tingog”? (Ang mga tubag mahimong maglakip nga kita kinahanglang mopakigbahin sa ebanghelyo inubanan sa kaisug ug konbiksyon.)

Dapita ang mga estudyante sa pagbasa og hilum sa Doktrina ug mga Pakigsaad 133:40 ug mangita og laing butang nga buhaton sa mga sulugoon sa Dios sa dili pa ang Ikaduhang Pag-anhi ni Jesukristo.

Sumala sa bersikulo 40, unsa ang buhaton sa mga sulugoon sa Dios sa dili pa ang Ikaduhang Pag-anhi? (Mag-ampo sila alang sa pagbalik sa Manluluwas.)

Doktrina ug mga Pakigsaad 133:41–56

Gihulagway ni Jesukristo ang Iyang Ikaduhang Pag-anhi

Dapita ang usa ka estudyante sa pagbasa og kusog sa Doktrina ug mga Pakigsaad 133:41–45. Hangyoa ang klase sa pagsunod, nga mangita sa mga panalangin nga moabut niadtong kinsa nag-ampo ug naghulat sa Ikaduhang Pag-anhi ni Jesukristo.

Sumala sa bersikulo 45, unsa ang gisaad sa Ginoo niadtong kinsa mohulat Kaniya? (Human makatubag ang mga estudyante, isulat ang mosunod nga kamatuoran sa pisara: Ang Ginoo nag-andam og dagkong mga panalangin alang niadtong mohulat Kaniya.)
Unsa kaha ang gipasabut sa maghulat sa Ginoo? (Tabangi ang mga estudyante nga makasabut nga ang mga pulong nga “mohulat sa Ginoo” nagpasabut nga labaw pa sa pagpalabay sa panahon hangtud nga Siya moabut. Nagpasabut kini sa pagbantay ug pagpangandam ug sa pag-apil sa Iyang buhat.)

Aron matabangan ang mga estudyante nga mas makasabut kon sa unsang paagi nga sila matinud-anong maghulat sa Ginoo ug sa Iyang pag-anhi, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang mga estudyante sa pagpaminaw alang sa himoon natong mga aksyon samtang kita maghulat sa Ikaduhang Pag-anhi.

“Ngadto ni bisan kinsa ninyo nga nabalaka mahitungod sa umaabut …

“Ang Dios naglaum nga kamo adunay igong pagtuo ug determinasyon ug igong pagsalig diha Kaniya sa pagpadayon, magpabilin nga magpakabuhi, magpabilin nga magmaya. Sa pagkatinuod, naglaum Siya kaninyo nga dili lang yano nga moatubang sa umaabut (kana morag dili maayo ug palabay lang nga paminawon); naglaum Siya kaninyo nga mohangup ug moimpluwensya sa umaabut—sa paghigugma niini ug sa pagmaya diha niini ug mahimuot sa inyong mga oportunidad.

“Ang Dios matinguhaon nga naghulat og kahigayunan sa pagtubag sa inyong mga pag-ampo ug sa pagtuman sa inyong mga damgo, sama gayud sa kanunay Niyang naandang buhaton. Apan dili Siya makahimo kon kamo dili mag-ampo, ug Siya dili makatuman kon kamo dili mangandoy. Sa laktod, dili Siya makahimo kon kamo dili motuo” (“Terror, Triumph, and a Wedding Feast” [debosyonal sa Church Educational System, Sept. 12, 2004], 3, speeches.byu.edu).

Unsa ang giingon ni Elder Holland nga kinahanglan natong buhaton samtang kita maghulat alang sa Ikaduhang Pag-anhi sa Manluluwas?

Dapita ang mga estudyante sa pagbasa og hilum sa Doktrina ug mga Pakigsaad 133:46–47 ug mo-report kon unsay ilang makat-unan bahin sa pipila ka mga tawo kinsa maanaa sa yuta sa panahon sa Ikaduhang Pag-anhi. Kinahanglan mahibalo ang mga estudyante nga dili tanang mga tawo makaila kinsa si Jesukristo sa panahon sa Iyang Ikaduhang Pag-anhi.

Dapita ang usa ka estudyante sa pagbasa og kusog sa Doktrina ug mga Pakigsaad 133:48–49. Hangyoa ang klase sa pagsunod, nga mangita sa usa ka paghulagway kon unsay panagway ni Jesukristo sa panahon sa Iyang Ikaduhang Pag-anhi.

Unsay kalahian bahin sa hitsura sa Manluluwas sa panahon sa Iyang Ikaduhang Pag-anhi? (Magsul-ob Siya og pula nga saput, ug mopakita Siya diha sa dakong himaya.)

Aron matabangan ang mga estudyante nga makasabut sa simbolismo sa pula nga saput sa Manluluwas, ipasabut ang termino nga kawa sa bino sa bersikulo 48. I-display ang kauban nga imahe sa usa ka kawa sa bino (gitawag usab og intusan sa bino) o pagdrowing og usa diha sa pisara. Ipasabut nga sa karaang kalibutan, ang usa ka intusan sa bino mao ang usa ka dako nga planggana nga gigamit alang sa pagpuga sa duga [juice] sa mga ubas. Ang planggana pun-on sa mga ubas, ug ang pipila ka mga tawo mosulod ug motunob-tunob sa mga ubas, aron mogawas ang duga. Samtang gitunob-tunoban ang mapula o tapul nga mga ubas, ang pula kaayo nga kolor sa duga milama sa ilang mga tiil ug mga sinina.

Dapita ang usa ka estudyante sa pagbasa og kusog sa Doktrina ug mga Pakigsaad 133:50–51.

Sa unsang paagi nga kining mga bersikulo makatabang kanato sa pagsabut sa kaangayan sa Ginoo? (Mahimo nimong pahinumduman ang mga estudyante nga ang dautan kinsa modumili sa paghinulsol kinahanglan gayud nga mag-antus sa mga gipangayo sa kaangayan ug dili makapuyo sa adlaw sa Ikaduhang Pag-anhi [tan-awa sa D&P 38:8]. Ang pula nga kolor sa sinina sa Ginoo nagrepresentar sa dugo sa mga dautan kinsa pagalaglagon kon ang kaangayan ipahamtang ngadto kanila sa Ikaduhang Pag-anhi.)

Dapita ang usa ka estudyante sa pagbasa og kusog sa Doktrina ug mga Pakigsaad 133:52–53. Hangyoa ang klase sa pagsunod ug mangita kon unsa ang mahinumduman ug mahisgutan sa mga matarung sa panahon sa Ikaduhang Pag-anhi. Dapita ang mga estudyante sa pag-report kon unsay ilang makit-an.

Unsa ang gitudlo niini nga mga bersikulo mahitungod sa kalooy sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 133:54–56. Hangyoa ang klase sa pagsunod ug motino kon kinsa ang mopakita uban sa Manluluwas sa Ikaduhang Pag-anhi.

Kinsa ang mopakita uban sa Manluluwas sa Ikaduhang Pag-anhi? (Ang mga matarung kinsa nabuhi sa wala pa si Jesukristo ug nabanhaw na moanhi uban Kaniya diha sa Iyang himaya. Agig dugang, ang mga matarung kinsa nabuhi ug namatay human si Jesukristo mabanhaw ug mobangon aron sa pag-apil sa Manluluwas ug niadtong uban Kaniya. Mahimo nimong hisgutan nga kini naglakip sa atong matarung nga mga sakop sa pamilya kinsa namatay na. Ang mga matarung kinsa nagpuyo pa dinhi sa yuta “pagabayawon diha sa mga panganod” aron mosugat sa Manluluwas [tan-awa sa 1 Mga Taga- Tesalonica 4:17; D&P 109:75].)

Doktrina ug mga Pakigsaad 133:57–74

Ang ebanghelyo gipadala aron sa pag-andam sa yuta alang sa Ikaduhang Pag-anhi ni Jesukristo

Ipares-pares ang mga estudyante. Dapita sila sa paghisgot sa mosunod nga pangutana uban sa ilang mga pares:

Unsa ang inyong nakat-unan sa Doktrina ug mga Pakigsaad 133 mahitungod sa Ikaduhang Pag-anhi sa Manluluwas? Unsa ang inyong mga pagbati samtang naghunahuna kamo mahitungod niining mga panghitabo?

Human makahisgot ang mga estudyante niining mga pangutana, dapita sila sa pagpangita sa Doktrina ug mga Pakigsaad 133:57–62 uban sa ilang mga pares ug mangita sa mga kamatuoran bahin sa hinungdan nganong ang ebanghelyo mag-una sa dili pa ang Ikaduhang Pag-anhi sa Ginoo. Human sa igong panahon, dapita ang pipila ka estudyante sa pag-report kon unsay ilang nakat-unan.

Ipamatuod nga samtang magkat-on kita sa ebanghelyo ug mosunod niini, maandam kita alang sa Ikaduhang Pag-anhi.

Sumala sa bersikulo 62, unsa ang kinadak-ang panalangin nga atong madawat? (Human makatubag ang mga estudyante, isulat ang mosunod nga kamatuoran diha sa pisara: Kadtong kinsa maghinulsol ug mopabalaan sa ilang kaugalingon makadawat og kinabuhing dayon.)

Aron matabangan ang mga estudyante nga makonektar kining baruganan sa usa ka baruganan nga ilang nahibaloan sa sinugdanan, ipangutana ang mosunod:

Sa unsang paagi nga ang baruganan sa bersikulo 62 may kalabutan sa baruganan nga atong nahibaloan sa Doktrina ug mga Pakigsaad 133:45, diin gipahayag nga “unsa ka dako nga mga butang ang imong giandam alang kaniya nga naghulat kanimo”?

I-summarize ang Doktrina ug mga Pakigsaad 133:63–74 pinaagi sa pagpasabut nga niining mga bersikulo ang Ginoo mitino sa pipila ka mga sangputanan alang niadtong kinsa dili maghinulsol ug mangandam alang sa Ikaduhang Pag-anhi. Ang pipila niining mga sangputanan naglakip sa pagkapuo gikan sa Ginoo ug sa Iyang matarung nga katawhan (tan-awa sa D&P 133:63) ug “itugyan ngadto sa kangitngit” (D&P 133:72), nga nagpasabut nga ang dautan kinsa mamatay sa Ikaduhang Pag-anhi mosulod sa usa ka dapit nga gitawag og bilanggoan sa espiritu o impyerno (tan-awa sa Giya ngadto sa mga Kasulatan, “Impyerno,” scriptures.lds.org).

Sa pagtapos niini nga leksyon, dapita ang mga estudyante sa pagsulat diha sa ilang mga class notebook o mga scripture study journal kon unsa ang ilang nakat-unan sa Doktrina ug mga Pakigsaad 133 nga nakapalig-on sa ilang pagsabut ug pagpamatuod sa Ikaduhang Pag-anhi ni Jesukristo. Ikonsiderar ang pagdapit og pipila ka estudyante sa pagpakigbahin niining mga ideya ngadto sa klase. Pagpamatuod sa mga kamatuoran nga inyong nahisgutan.