Doktrina ug mga Pakigsaad 88:118–141

Pasiuna

Kini mao ang katapusan sa upat ka mga leksyon nga naghisgot sa Doktrina ug mga Pakigsaad 88. Ang pinadayag gihatag sa usa ka komperensya sa mga high priest niadtong Disyembre 27–28, 1832 (mga bersikulo 1–126) ug Enero 3, 1833 (mga bersikulo 127–141). Kini nga leksyon naglangkob sa Doktrina ug mga Pakigsaad 88:118–141. Niini nga bahin sa pinadayag, ang Ginoo misugo sa usa ka pundok sa mga tighupot sa priesthood sa pag-organisar sa Tulunghaan sa mga Propeta ubos sa direksyon ni Joseph Smith. Kadtong moapil sa tulunghaan dungan nga magkat-on pinaagi sa pagtuon ug pinaagi sa hugot nga pagtuo ug mopakita og gugma ug panaghigalaay sa usag usa.

Mga Sugyot alang sa Pagtudlo

Doktrina ug mga Pakigsaad 88:118–126

Ang Ginoo mihulagway og usa ka sumbanan sa pagkat-on

Sugdi pinaagi sa paghisgot sa mosunod nga mga pangutana:

Unsa ang inyong gikat-unan karon sa eskwelahan? Sa panimalay? Sa trabaho? Sa simbahan?
Sa unsang paagi ang pagkat-on mahitungod sa mga subject sa eskwelahan sama sa math o science lahi kay sa pagkat-on sa ebanghelyo? Sa unsang paagi kini managsama?

Ipasabut nga didto sa Kirtland, Ohio, niadtong Enero, 1833, usa ka grupo sa mga tighupot sa priesthood misunod sa sugo sa Ginoo nga magpundok sa unsay gitawag og Tulunghaan sa mga Propeta aron sa pag-andam sa ilang mga kaugalingon sa pagsangyaw sa ebanghelyo sa tibuok yuta. Samtang nag-abut sila, ang Ginoo mitudlo niini nga mga kaigsoonan kon unsaon nga mahimong lig-on, o mabayaw, pinaagi sa Espiritu samtang dungan sila nga nagkat-on. Dapita ang mga estudyante sa pagpangita og mga baruganan kabahin sa pagkat-on samtang magtuon sila sa Doktrina ug mga Pakigsaad 88:118–141 karon.

Dapita ang usa ka estudyante sa pagbasa og kusog sa Doktrina ug mga Pakigsaad 88:118. Hangyoa ang klase sa pagsunod ug sa pagpangita kon sa unsang paagi ang mga sakop sa Tulunghaan sa mga Propeta magtinguha sa pagkat-on.

Sa unsang paagi kini nga mga kaigsoonan magtinguha sa pagkat-on?
Unsa kaha ang gipasabut nga magkat-on “pinaagi sa pagtuon ug usab pinaagi sa hugot nga pagtuo”?

Aron matabangan ang mga estudyante nga makasabut kon unsa ang magkat-on pinaagi sa hugot nga pagtuo, dapita ang usa kanila sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. …

“… Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante pinaagi sa pagtudlo, sa pagpakita, o sa pag-eksperimento, hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.(“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 20).

Ipasabut nga makakat-on kita pinaagi sa hugot nga pagtuo kon aktibo ug mainampuon kitang moapil sa mga oportunidad sa pagkat-on ug dayon buhaton ang unsay atong nakat-unan. Makakat-on kita samtang atong ipakita ang atong hugot nga pagtuo pinaagi sa pagkamasulundon.

Tan-awa sa sinugdanan sa bersikulo 118 nga ang Ginoo mipasabut nga ang uban walay hugot nga pagtuo. Unsa ang atong makat-unan gikan niini nga bersikulo kon unsaon sa pagpalambo sa atong pagtuo? (Tabangi ang mga estudyante nga mahibalo og baruganan nga susama sa mosunod: Kon aktibo kitang magtinguha sa pagkat-on pinaagi sa pagtuon ug pagtuo, ang atong pagtuo kang Jesukristo molambo. Mahimo nimong isulat sa pisara kini nga baruganan.)

Aron matabangan ang mga estudyante nga makasabut sa pipila ka mga sirkumstanya diin ilang magamit kini nga baruganan diha sa ilang mga kinabuhi, basaha og kusog ang mosunod nga mga sitwasyon. Human mabasa ang matag usa, hangyoa ang mga estudyante sa pagpasabut kon sa unsang paagi ang tawo aktibong magtinguha sa pagkat-on pinaagi sa pagtuon ug pinaagi sa pagtuo. Hangyoa usab sila sa pagpasabut kon sa unsang paagi ang pagbuhat sa ingon makatabang sa tawo nga molambo diha sa pagtuo.

Usa ka batan-ong babaye mobasa kanunay sa mga kasulatan, apan panagsa ra siya mohunong sa paghunahuna kon unsay iyang gibasa. Wala siya mobati nga ang pagbasa sa mga kasulatan makahatag og dakong benepisyo kaniya.
Usa ka batan-ong lalaki motambong sa iyang mga miting sa Simbahan ug nalingaw nga moapil sa mga diskusyon sa klase. Usahay mobati siya nga naaghat sa paghimo og mga kausaban sa iyang kinabuhi base sa unsay iyang nakat-unan, apan kasagarang dili siya molihok sumala niadto nga mga pag-aghat.

Human mahisgutan sa klase kini nga mga sitwasyon, ipangutana ang mosunod:

Kanus-a kamo mibati nga milambo ang inyong pagtuo isip resulta sa aktibong pagtinguha nga makat-on pinaagi sa pagtuon ug pinaagi sa pagtuo? Sa unsang paagi ang inyong mga binuhatan nakatabang sa pagpalambo sa inyong pagtuo?

Dapita ang mga estudyante sa pagbasa og hilum sa Doktrina ug mga Pakigsaad 99:1 ug mangita unsay gitawag sa Ginoo nga buhaton ni John Murdock. Hangyoa ang mga estudyante sa pag-report kon unsay ilang makit-an.

Ipasabut nga agig tubag sa sugo sa pagtukod sa balay nga gihulagway diha sa bersikulo 119, ang mga Santos sa katapusan mitukod sa Templo sa Kirtland. Samtang ang templo gitukod pa, ang Tulunghaan sa mga Propeta nag-abut diha sa kwarto sa ibabaw sa tindahan ni Newel K. Whitney sa Kirtland.

Sa unsang paagi kaha ang tambag diha sa bersikulo 119 may kalabutan usab sa dapit diin ang mga kaigsoonan mag-abut alang sa Tulunghaan sa mga Propeta? Sa atong mga panimalay? Sa inyong personal nga mga paningkamot sa pagtuon sa eskwelahan? (Ang Tulunghaan sa mga Propeta gihimo subay sa mga baruganan nga gitudlo niini nga bersikulo. Ang atong mga panimalay mahimong mga dapit sa pag-ampo, pagpuasa, pagtuo, pagkat-on, ug kahusay.)

Bahina ang klase ngadto sa pares. Dapita ang mga estudyante sa pagsiksik sa Doktrina ug mga Pakigsaad 88:121–126 uban sa ilang mga pares ug sa pagtino kon unsa ang gipaabut sa Ginoo nga maoy pamatasan sa mga kaigsoonan diha sa Tulunghaan sa mga Propeta. Mahimo nimong isugyot nga markahan nila ang ilang nakit-an. Samtang ang mga estudyante nagtuon niini nga mga bersikulo, isulat ang mosunod nga mga instruksyon diha sa pisara aron kompletuhon sa matag parisan human nila masiksik ang tudling:

Desisyuni hain nga mga tambag ang labing makatabang sa kabatan-onan nga nagtinguha sa pagkat-on sa ebanghelyo. Hisguti nganong kini nga mga buhat importante sa pagtabang sa tawo nga makakat-on sa ebanghelyo.

Human ang mga estudyante aduna nay igong panahon sa pagbasa ug paghisgot sa tambag sa Ginoo, dapita ang pipila ka estudyante sa pagpasabut unsay ilang nakat-unan sa ilang mga diskusyon. Samtang motubag sila, ikonsiderar ang paggamit sa mosunod nga mga pangutana ug mga pagpasabut sa pagtabang kanila nga makasabut sa pipila sa tambag sa Ginoo:

Unsa kaha ang gipasabut sa “hunong gikan sa inyong tanan nga walay hinungdan nga mga pakigpulong, … katawa, … ug walay hinungdan nga panghunahuna” (bersikulo 121)? Ngano kaha ang paglikay sa pagbuhat niini nga mga butang sa espirituhanong mga kalihokan makatabang sa atong mga paningkamot sa pagkat-on sa mga butang nga sagrado?

Ipasabut nga ang mga miting alang sa Tulunghaan sa mga Propeta pagahimoon nga sagrado. Kini nga mga instruksyon kalabut sa katawa ug walay hinungdan nga pakigpulong nagpasabut nga kadtong miapil sa Tulunghaan sa mga Propeta kinahanglang adunay balaang pagtahud sa sagrado nga mga sitwasyon. Kini nga mga miting sa kadugayan mahitabo diha sa templo.

Timan-i ang pagbalik-balik sa pulong nga tanan diha sa bersikulo 122. Sa unsang paagi nga maapektuhan ang klase kon ang tanan nga mga estudyante moapil sa leksyon ug maningkamot sa pagkat-on gikan sa usag usa?
Sa unsang paagi kaha ang pagkatulog og “labaw pa kay sa gikinahanglan” makaapekto sa atong abilidad sa pagkat-on o sa pagbati sa Espiritu? Sa unsang paagi kaha ang pag-angkon og eksakto nga gidugayon sa pagkatulog ug ang sayo nga pagbangon makatabang kanato nga mas maayong makakat-on?
Unsaon ninyo pag-summarize ang tambag mahitungod sa pagkat-on nga gihatag diha sa Doktrina ug mga Pakigsaad 88:118–126? (Ang mga estudyante mahimong mosulti og lain-laing mga baruganan. Human sila makatubag, isulat sa pisara ang mosunod nga baruganan: Ang paghimo og matarung nga mga buhat ug paghunong sa dili matarung nga mga buhat makatabang nato nga makakat-on ug malig-on.
Hain nga mga kinaiya nga gihisgutan diha sa mga bersikulo ang mahimong sagupon o hunungon sa atong klase sa seminary aron mas maayo kitang makakat-on sa ebanghelyo ug dungan nga malig-on?

Dapita ang mga estudyante sa pagtan-aw og balik sa Doktrina ug mga Pakigsaad 88:121–126 ug sa pagpamalandong kon unsa nga tambag ang kinahanglan nilang mas hingpit nga sagupon diha sa ilang mga kinabuhi. Awhaga sila sa pagsulat og tumong nga buhaton ang unsay ilang nakat-unan.

Doktrina ug mga Pakigsaad 88:127–141

Ang Ginoo mihan-ay sa Tulunghaan sa mga Propeta

Dapita ang mga estudyante sa pag-adto sa pisara ug sa paglista og mga dapit diin magtuon sila sa ebanghelyo. (Ang mga tubag mahimong maglakip sa mosunod: Sunday School, klase sa Young Women o korum sa priesthood, seminary, ug panimalay.) Hangyoa ang mga estudyante sa pagkonsiderar kon aduna bay mga tawo niini nga mga dapit nga wala kaayo nila mailhi o naglisud sila sa pagpakig-uban. Dapita sila sa paghunahuna og usa niining mga tawhana samtang magtuon sila sa Doktrina ug mga Pakigsaad 88:127–141. Dapita sila sa pagpamalandong sa mosunod nga pangutana:

Sa unsang paagi ang akong relasyon niadtong kauban nakong nagkat-on sa ebanghelyo makaapekto sa akong abilidad nga makakat-on ug malig-on pinaagi sa Espiritu?

Ipasabut nga ang Ginoo nagpaabut sa mga sakop sa Tulunghaan sa mga Propeta sa pag-establisar og maayong relasyon sa usag usa samtang dungan sila nga nagkat-on. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 88:128–134. Hangyoa ang klase sa pagsunod ug sa pagpangita sa tahas sa magtutudlo sa pag-establisar og kahimtang sa espirituhanong pagkat-on diha sa Tulunghaan sa mga Propeta.

Sa unsang paagi ang magtutudlo sa Tulunghaan sa mga Propeta maka-establisar og kahimtang sa espirituhanong pagkat-on? (Mahimo nimong ipasabut nga ang pagyukbo sa magtutudlo ngadto sa mga sakop sa klase nagpasabut nga mitimbaya siya kanila sa ilang pagsulod. Usa kini ka piho nga pagtimbaya diha sa Tulunghaan sa mga Propeta.)
Unsa may imong nabantayan mahitungod sa pagyukbo o pagtimbaya diha sa bersikulo 133?

Dapita ang usa ka estudyante sa pagbasa og kusog sa Doktrina ug mga Pakigsaad 88:135–137. Hangyoa ang klase sa pagsunod ug sa pagpangita sa tahas sa estudyante sa pag-establisar og maayong kahimtang sa pagkat-on.

Unsa nga matang sa relasyon ang angay nga batunan sa mga sakop sa Tulunghaan sa mga Propeta sa usag usa?
Sumala sa bersikulo 137, unsa man ang gisaad sa Ginoo kon ang mga sakop sa Tulunghaan sa mga Propeta mosunod sa Iyang mga instruksyon? (Ang tulunghaan mahimong usa ka santuwaryo diin ang Espiritu mahimong molig-on kanila.)
Unsay mahimong mahitabo sa atong mga klase sa Simbahan o mga panimalay kon mosunod kita sa instruksyon sa Ginoo diha sa mga bersikulo 128–137? (Ang mga estudyante mahimong moila og lain-laing mga baruganan, apan mahimo nimong hatagan og gibug-aton ang mosunod: Kon mopakita kita og panaghigalaay ug gugma sa usag usa, niana makadapit kita sa Espiritu samtang dungan kita nga magtuon sa ebanghelyo.)

Dapita ang mga estudyante sa pagtan-aw og balik sa pagtimbaya diha sa Doktrina ug mga Pakigsaad 88:133.

Sa unsang paagi kaha nga kita makapakita og “katuyoan nga malig-on, dili matarug, ug dili mabalhinon, nga mahimo [nga usa ka] higala” ngadto sa mga sakop sa klase o pamilya nga dili kaayo nato kaila o naglisud kita sa paghigugma?
Kanus-a kamo nakasinati og kahimtang sa pagkat-on sa ebanghelyo diin ang tanan determinado nga mahimong mga higala? (Ikonsiderar ang pagpaambit og imong kaugalingong kasinatian.)

Dapita ang mga estudyante sa paghunahuna kon unsaon nila sa pagpalambo og determinasyon sa paghigugma niadtong kauban nilang nagkat-on sa ebanghelyo. Awhaga sila sa pagsunod sa mga pag-aghat nga ilang gibati nga mopakita og mas labaw nga pagkamabination ug gugma ngadto sa mga klasmeyt ug mga sakop sa pamilya. Ipamatuod nga ang Ginoo motabang kanila samtang maningkamot sila sa paghigugma sa uban.

Komentaryo ug Background nga Impormasyon

Doktrina ug mga Pakigsaad 88:118. “Pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo”

Si Presidente Marion G. Romney sa Unang Kapangulohan mitudlo:

“Nagtuo ako sa pagtuon. Nagtuo ako nga ang mga tawo daghan og makat-unan pinaagi sa pagtuon. Gani, akong naobserbahan nga wala kaayo silay makat-unan kalabut sa mga butang kon unsa kini karon, unsa kini kaniadto, o unsa kini sa umaabut kon walay pagtuon. Nagtuo usab ko, hinoon, ug nasayud, nga ang pagkat-on pinaagi sa pagtuon mapadali og maayo pinaagi sa hugot nga pagtuo” (Learning for the Eternities [1977], 72).

Doktrina ug mga Pakigsaad 88:121. “Hunong gikan sa inyong tanan nga walay hinungdan nga mga pakigpulong, gikan sa tanan nga katawa”

Sumala sa Doktrina ug mga Pakigsaad 88, ang mga sakop sa Tulunghaan sa mga Propeta kinahanglang mohunong gikan sa tanan nga walay hinungdan nga mga pakigpulong, katawa, ug maibugon nga mga tinguha tungod kay ang ilang mga miting pagahimoong sagrado ug himoon sa dili madugay diha sa templo. Wala kini magpasabut nga ang katawa mismo makasasala. Kalabut sa katawa, mitudlo si President Gordon B. Hinckley:

“Mahimo kamong maglingaw-lingaw. Siyempre makahimo kamo niana! Gusto namo nga malingaw kamo. Gusto namo nga malingaw kamo sa kinabuhi. … Gusto namo nga kamo baskog ug nagmaya, mokanta ug mosayaw, mokatawa ug malipayon.

“Apan sa pagbuhat niini, pagmapainubsanon ug mainampoon, ug ang mga pahiyom sa langit maanaa kaninyo” (“A Prophet’s Counsel and Prayer for Youth,” Ensign, Ene. 2001, 11).

Doktrina ug mga Pakigsaad 88:138–141. Ang paghugas sa mga tiil

Samtang ang mga kaigsoonan nga naghupot sa priesthood miapil sa Tulunghaan sa mga Propeta, sila gidawat pinaagi sa ordinansa sa paghugas sa mga tiil, nga pagahimoon sa Propeta, sa pagsunod sa ehemplo ni Jesukristo nga gihulagway diha sa Juan 13. Kalabut niini nga ordinansa, si Elder Bruce R. McConkie sa Korum sa Napulog Duha ka mga Apostoles mitudlo:

“Ang paghugas sa mga tiil usa ka ordinansa sa ebanghelyo; kini usa ka balaan ug sagrado nga seremonya, usa ka buhat nga ipahigayon sa mga santos diha sa kapribado sa ilang mga santuwaryo sa templo. Dili kini buhaton aron makita sa kalibutan o aron madawat sa kalibutanong mga tawo. Sa iyang panahon ug dispensasyon gipasiugdahan kini ni Jesus diha sa ibabaw nga kwarto panahon sa Katapusang Panihapon.

“‘Duha ka butang ang gibuhat sa atong Ginoo sa pagpahigayon niini nga ordinansa: 1. Gituman Niya ang karaang balaod nga gihatag ngadto kang Moises; ug 2. Gipasiugdahan Niya ang usa ka sagradong ordinansa nga kinahanglang ipahigayon sa mga tawo nga adunay tukmang gahum taliwala sa iyang tinuod nga mga disipulo gikan nianang adlawa.

“‘Isip kabahin sa pagpahiuli sa tanan nga mga butang, ang ordinansa sa paghugas sa mga tiil gipahiuli na sa dispensasyon sa kahingpitan sa panahon. …

“‘Ang kahibalo kalabut sa paghugas sa mga tiil anam-anam nga gipadayag niini nga panahon hangtud nga ang hingpit nga kahibalo nalakip na karon sa gipadayag nga mga ordinansa sa balay sa Ginoo’ (Mormon Doctrine, [2nd ed. (1966), 829, 831])” (Doctrinal New Testament Commentary, 3 vols. [1966–73], 1:708, 710).