Niadtong Nobyembre 3, 1831, duha ka adlaw human ang Ginoo misugo ni Joseph Smith sa pagmantala sa Basahon sa mga Sugo, ang Propeta nakadawat og pagpadayag nga narekord sa Doktrina ug mga Pakigsaad 133. Kini nga pagpadayag nalakip sa 1835 nga edisyon sa Doktrina ug mga Pakigsaad isip seksyon 100 ug mao ang nahimong apendiks sa basahon. Kadtong kinsa nagtrabaho sa manuskrito sa sinugdanan nagtumong sa pagpadayag nga usa ka bookend uban sa seksyon 1 sa mga pagpadayag nga gilakip sa 1835 nga edisyon. Ang pagpadayag mabahin sa duha ka mga leksyon. Kini nga leksyon maghisgot sa mando sa Ginoo nga ang Iyang katawhan mangandam sa ilang kaugalingon ug sa uban alang sa Iyang Ikaduhang Pag-anhi. Naghisgot usab kini sa mga panagna sa mga panghitabo nga may kalabutan sa Iyang Ikaduhang Pag-anhi ug sa milenyal nga paghari.
Sa dili pa magsugod ang klase, isulat ang mosunod nga pamahayag diha sa pisara. (Ang pamahayag makita sa “Pagpangandam alang sa Ikaduhang Pag-anhi,”Liahona, Mayo 2004, 7.)
“Karon nadasig ko nga mopakigpulong kabahin sa kamahinungdanon sa pagpangandam alang sa umaabut nga panghitabo nga mahinungdanon kaayo sa matag usa kanato—” (Elder Dallin H. Oaks).
Sugdi ang klase pinaagi sa pagpangutana sa mga estudyante sa mosunod:
Nasulayan na ba ninyo nga naa na kamo sa eskwelahan ug nakaamgo nga nakalimot kamo sa pagpangandam alang sa usa ka test? Kon mao, unsay inyong gibati?
Unsa ang inyong bation kon masayud kamo nga kamo nakapangandam gayud alang sa usa ka test?
Idirekta ang pagtagad sa mga estudyante ngadto sa pamahayag diha sa pisara. Dapita ang usa ka estudyante sa pagbasa og kusog sa pamahayag. Dayon ipangutana sa klase ang mosunod:
Unsa kaha nga panghitabo ang gipasabut ni Elder Oaks?
Dapita ang usa ka estudyante sa pagbasa og kusog sa Doktrina ug mga Pakigsaad 133:1–3. Hangyoa ang klase sa pagsunod, nga mangita sa mga panghitabo nga kita kinahanglan gayud nga maandam ug ang usa ka rason nganong kinahanglan gayud nato kining pangandaman. (Sa dili pa mobasa ang estudyante, mahimo nimong ipasabut nga ang mga pulong nga “mopakita sa iyang balaan nga bukton” nagpasabut nga ang Ginoo mopadayag sa Iyang kusog ug gahum ngadto sa kalibutan.)
Unsa nga panghitabo ang gipasabut sa Ginoo niining mga bersikulo? (Kon ang estudyante nagkinahanglan og tabang, dapita sila sa pagtan-aw sa bersikulo 2, footnotea. Dayon kompletuha ang pamahayag ni Elder Oaks diha sa pisara pinaagi sa pagsulat sa ang Ikaduhang Pag-anhi sa Ginoo.)
Sumala sa bersikulo 2, unsa ang mahitabo ngadto sa dili diosnon, o dautan, sa Ikaduhang Pag-anhi? (Kinahanglang mahibaloan sa mga estudyante ang mosunod nga doktrina: Sa Iyang Ikaduhang Pag-anhi, si Jesukristo moanhi agig paghukom batok sa dili diosnon. Mahimo nimong isugyot nga isulat sa mga estudyante kining doktrina diha sa ilang mga kasulatan duol sa bersikulo 2.)
Ang Ginoo nagsugo sa Iyang katawhan sa pagpangandam sa Iyang Ikaduhang Pag-anhi
Aron matabangan ang mga estudyante nga makasabut sa konteksto niini nga pagpadayag, dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 133. Hangyoa ang klase sa pagsunod, nga mangita kon sa unsang paagi nga kining pagpadayag sa sinugdanan nalakip diha sa Doktrina ug mga Pakigsaad. Human sila maka-report sa unsay ilang makit-an, dapita ang mga estudyante sa pagtimaan sa petsa nga nahatag kining pagpadayag. Ipasabut nga kining pagpadayag gawas na sa han-ay sa kronolohiya tungod kay naggikan kini sa apendiks sa Doktrina ug mga Pakigsaad. Kini nga pagpadayag ug ang seksyon 1 naglakip sa mga bookend alang sa mga pagpadayag nga natala sa Doktrina ug mga Pakigsaad.
Dapita ang mga estudyante nga basahon og maayo sa hilum ang bersikulo 4 ug mangita unsay gimando sa Ginoo nga buhaton sa Iyang katawhan kalabut sa Iyang Ikaduhang Pag-anhi.
Unsa ang gisugo sa Ginoo nga buhaton sa Iyang katawhan? (Mangandam sa ilang mga kaugalingon ug magpundok didto sa Zion.)
Isulat sa pisara ang mosunod nga dili kompleto nga pamahayag: nakatabang kanato nga maandam alang sa Ikaduhang Pag-anhi ni Kristo.
Ipares-pares ang mga estudyante. Dapita ang managkauban sa pagdungan og basa sa Doktrina ug mga Pakigsaad 133:4–16, nga mangita sa mga pulong nga nagtudlo kon unsaon sa pagpangandam alang sa Ikaduhang Pag-anhi sa Manluluwas.
Dapita ang matag parisan sa pag-report unsay ilang nakit-an, ug hangyoa ang usa ka estudyante sa pagkompleto sa pamahayag diha sa pisara pinaagi sa pagsulat sa mga tubag sa mga estudyante diha sa blangko.
Aron matabangan ang mga estudyante nga mas masabtan ang pipila ka mga paagi nga kita makaandam sa Ikaduhang Pag-anhi sa Ginoo, paghimo og usa ka kopya sa mosunod nga kalihokan alang sa matag estudyante. Dapita ang mga estudyante sa pagkompleto sa kalihokan uban sa ilang mga pares ug mangandam sa pagpakigbahin sa ilang mga panabut ngadto sa klase. (Mahimo nimong awhagon ang mga estudyante sa pagsulat sa ilang mga tubag sa dili pa sila mopakigbahin ngadto sa klase.)
Pagpangandam alang sa Ikaduhang Pag-anhi
Hisguti uban sa inyong pares kon nganong ang mga tubag nga nalista sa pisara ingon og importanting mga paagi sa pagpangandam sa Ikaduhang Pag-anhi ni Jesukristo.
Timan-i ang mga pulong mahitungod sa Babelonia sa bersikulo 5, 7, ug 14. Sa kapanahonan sa Daang Tugon, ang siyudad sa Babelonia mao ang usa ka lugar nga hilabihan ka dautan. Niining mga bersikulo, ang Babelonia gigamit isip simbolo sa pagkakalibutanon.
Unsa kaha ang ipasabut kon ang Ginoo mosugo kanato nga“[mo]gawas gikan sa Babelonia”?
Sa unsa nga mga paagi nga makagawas kita gikan sa Babelonia? Sa unsa kaha nga paagi nga kining mga butanga moandam kanato alang sa Ikaduhang Pag-anhi?
Unsay inyong nahimo nga inyong napahilayo ang inyong kaugalingon gikan sa kalibutanong mga impluwensya?
Basaha og usab ang Doktrina ug mga Pakigsaad 133:15, ug mangita kon unsa ang gipasidaan sa Ginoo sa nag-unang mga Santos nga dili nila buhaton kon sila mogawas sa Babelonia. Mahimo ninyong markahan kon unsay inyong nakit-an ug ikonsiderar kon sa unsang paagi kining pasidaan magamit sa inyong kinabuhi.
Unsa kaha ang gipasabut sa “ayaw palingia” pagkahuman nga atong gipalayo ang atong kaugalingon gikan sa kalibutanong mga impluwensya? (Kita “molingi” kon mosulay kita sa pagsalikway sa kalibutan apan mobalik sa atong naandang mga paagi kaniadto. Kay sa itugot ang kausaban sa atong mga kasingkasing, mangandoy kita ug dayon mobalik sa atong naandang paagi sa pagpakabuhi kaniadto.)
Unsa nga baruganan ang atong makat-unan gikan sa bersikulo 15?
Hisguti uban sa inyong pares kon sa unsang paagi nga ang batan-ong mga Santos sa Ulahing mga Adlaw “dili molingi” samtang sila maningkamot sa paglambo sa espirituhanong paagi ug mas mapaduol ngadto sa Manluluwas.
Hunahunaa ang mga tawo nga inyong nakaila kinsa kanunayng naglaum, nag-andam alang sa Ikaduhang Pag-anhi. Unsay inyong nakita nga ilang gibuhat?
Human sa igong panahon, dapita ang mga estudyante sa pagpakigbahin sa ilang mga tubag ngadto sa klase. (Aron matabangan ang tanan nga makaapil, tuguti ang lain-laing mga parisan sa pagtubag sa lain-laing mga pangutana.) Samtang naghisgot ang mga estudyante sa bersikulo 15, kinahanglan nilang mahibaloan ang usa ka baruganan nga sama sa mosunod: Kon kita mobalik ngadto sa pagkadautan ug sa mga sala kaniadto, nan dili kita mahimong andam alang sa Ikaduhang Pag-anhi ni Jesukristo.
I-refer og balik ngadto sa nalista diha sa pisara sa mga butang nga atong mahimo aron maandam sa Ikaduhang Pag-anhi ni Jesukristo. Ipasabut nga ang Ginoo gusto nga ang tanang katawhan maandam alang sa Iyang pag-anhi. Dapita ang mga estudyante sa pagribyu og daklit sa Doktrina ug mga Pakigsaad 133:4–15 ug motino sa mga bersikulo nga nagtudlo kanato kon unsaon sa pagsangyaw sa ebanghelyo ug pagdapit sa uban sa pagduol ngadto kang Kristo.
Hain sa mga bersikulo ang nagtudlo kanato nga kinahanglan kita nga mosangyaw sa ebanghelyo ug modapit sa uban sa pagduol ngadto kang Kristo? (Kinahanglang mahibaloan sa mga estudyante ang mga bersikulo 8–10.)
Unsa ang atong makat-unan gikan niini nga mga bersikulo mahitungod sa misyonaryo nga buhat? (Ang mga estudyante mahimong mogamit og lain-laing mga pulong, apan kinahanglan ilang mahibaloan ang mosunod nga baruganan: Kon kita mopakigbahin sa ebanghelyo, nagtabang kita sa uban nga maandam alang sa Ikaduhang Pag-anhi ni Jesukristo. Mahimo nimong isugyot nga isulat sa mga estudyante kini nga baruganan diha sa ilang mga kasulatan.)
Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles. Dapita ang klase sa pagpaminaw sa unsay nahibaloan ni Elder Andersen isip atong responsibilidad ug usa ka paagi nga kita makatuman niana nga responsibilidad.
Imahe
Elder Neil L. Andersen
“Usa sa inyong importante nga mga responsibilidad mao ang pagtabang sa pag-andam sa kalibutan alang sa Ikaduhang Pag-anhi sa Manluluwas. …
“Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas. …
“… Ang kalibutan giandam na alang sa Ikaduhang Pag-anhi sa Manluluwas tungod sa buhat sa Ginoo pinaagi sa Iyang mga misyonaryo” (“Pag-andam sa Kalibutan alang sa Ikaduhang Pag-anhi,”Liahona, Mayo 2011, 49, 50, 51).
Ngano kaha nga dili man igo ang pag-andam lang sa atong kaugalingon alang sa Ikaduhang Pag-anhi?
Sa unsa kaha nga paagi nga ang pagtabang sa uban nga maandam alang sa Ikaduhang Pag-anhi makatabang kaninyo nga maandam usab?
Dapita ang mga estudyante sa pagpamalandong niadtong mitabang kanila nga mas maduol ngadto kang Kristo. Dapita ang pipila ka estudyante sa pagpakigbahin kon sa unsang paagi nga ang uban nakaimpluwensya ug nakatabang kanila.
Hangyoa ang mga estudyante sa pagribyu og hilum sa Doktrina ug mga Pakigsaad 133:16, nga mangita sa unsay gisugo sa Ginoo nga buhaton sa tanang tawo aron maandam sa pagsugat Kaniya. Hangyoa ang mga estudyante sa pag-report kon unsay ilang makit-an.
Unsay inyong nakit-an sa bersikulo 16 nga dunay kalabutan sa misyonaryo nga buhat?
Unsa nga baruganan ang atong mahibaloan sa bersikulo 16 nga makatabang kanato sa pagpangandam sa pagsugat sa Ginoo kon Siya moabut? (Usa ka paagi nga makasulti ang mga estudyante niining baruganan mao nga kon kita maghinulsol, nangandam kita sa pagsugat sa Ginoo.)
Sa unsang paagi nga ang paghinulsol makatabang sa pag-andam kanato sa Ikaduhang Pag-anhi ni Jesukristo?
Isulat ang mosunod nga dili kompleto nga mga pamahayag diha sa pisara:
Akong andamon ang akong kaugalingon alang sa Ikaduhang Pag-anhi sa Manluluwas pinaagi sa …
Motabang ko sa uban nga makaandam alang sa Ikaduhang Pag-anhi pinaagi sa …
Aron matabangan ang mga estudyante sa paggamit niining mga kamatuoran nga ilang nakat-unan karon, hangyoa sila sa pagkompleto sa mga pamahayag sa pisara diha sa ilang mga class notebook ug mga scripture study journal.
Gipadayag sa Ginoo ang pipila sa mga panghitabo nga may kalabutan sa Iyang Ikaduhang Pag-anhi ug sa Iyang milenyal nga paghari
Ipasabut nga human sa pagtudlo mahitungod sa mga paagi sa pagpangandam alang sa Iyang pag-anhi, ang Ginoo misugo kanato sa pagpangandam.
Ipares-pares og usab ang mga estudyante aron aduna na usab silay bag-ong mga pares. Dapita ang katunga sa mga parisan nga magdungan og basa sa Doktrina ug mga Pakigsaad 133:17–25, nga mangita sa mga panghitabo nga may kalabutan sa Ikaduhang Pag-anhi ni Jesukristo. Hangyoa ang laing katunga sa mga parisan nga buhaton ang mao gihapon gamit ang Doktrina ug mga Pakigsaad 133:26–35. Human sa igong panahon, dapita ang matag parisan sa pag-report ngadto sa klase sa usa ka butang nga ilang nadiskubrihan.
Sumala sa bersikulo 17, unsay kinahanglan natong buhaton aron maandam alang sa Ikaduhang Pag-anhi? Nganong importante man kaayo kini? (Aron matabangan ang mga estudyante nga makatubag niini nga pangutana, mahimo nimong isugyot nga ilang basahon ang Alma 7:9, 14–19. Ipasabut nga ang mga pulong nga “naghimo sa iyang mga dalan nga tul-id” may kalabutan sa atong responsibilidad sa paghinulsol ug sa pagsangyaw sa ebanghelyo ngadto sa uban aron sila makahinulsol, mabunyagan, ug makadawat sa gasa sa Espiritu Santo.)
Tapusa pinaagi sa pagpamatuod sa kaimportante sa paghinulsol sa pagpangandam alang sa Ikaduhang Pag-anhi. Awhaga ang mga estudyante sa pagpakabuhi nga matarung aron sila makasinati sa katumanan sa mga saad sa Ginoo diha sa ilang mga kinabuhi.
Si Presidente Harold B. Lee miingon nga ang Doktrina ug mga Pakigsaad 101 ug 133 naghatag og usa ka “anam-anam nga pag-asoy sa mga panghitabo padulong sa pag-anhi sa Manluluwas” (“Admonitions for the Priesthood of God,” Ensign, Ene. 1973, 106).
Kon ang Ginoo mobalik, mopakita Siya ngadto sa piho nga mga grupo ug dayon mopakita diha sa dakong gahum, kaharianon, ug himaya—sa paagi nga ang tanan sa kalibutan makakita Kaniya (tan-awa sa D&P 88:95; 101:23–25; 133:40–42, 48–51). Ang mga propeta mihisgot sa upat ka mga pagpakita sa Ginoo isip kabahin sa Iyang Ikaduhang Pag-anhi:
Ang pagpakita ngadto sa tibuok kalibutan (tan-awa sa D&P 88:95; 101:23–25; 133:40–42, 48–51). (Tan-awa sa Doctrine and Covenants Student Manual, 2nd ed. [manwal sa Church Educational System, 2001], 404–5).
Si Elder Bruce R. McConkie sa Korum sa Napulog Duha ka mga Apostoles mitudlo:
Imahe
Elder Bruce R. McConkie
“Ang Nawala nga mga Tribo wala nawala sa Ginoo. Sa ilang mga biyahe paamihanan gigiyahan sila sa mga propeta ug dinasig nga mga lider. Aduna silay ilang Moises ug ilang Lehi, gigiyahan pinaagi sa espiritu sa pagpadayag, mituman sa balaod ni Moises, ug midala niining mga kasugoan ug mga paghukom nga hinatag sa Ginoo kanila sa mga kapanahonan nga nanglabay. Lahi gihapon sila nga katawhan mga gatusan ka tuig human niana, tungod kay ang nabanhaw nga Ginoo mibisita ug nangalagad taliwala kanila human sa iyang pagpangalagad niining kontinente taliwala sa mga Nephite. (3 Ne. 16:1–4; 17:4.) Klaro kaayo nga siya mitudlo kanila sa samang paagi ug mihatag kanila sa samang kamatuoran nga iyang gihatag sa iyang mga sumusunod didto sa Jerusalem ug sa kontinente sa Amerika; ug klaro nga ilang girekord ang iyang mga pagtulun-an, mao nga nakamugna og daghan kaayong kasulatan nga ikatandi sa Biblia ug sa Basahon ni Mormon. (2 Ne. 29:12–14.)
“Sa tukmang panahon ang Nawala nga mga Tribo sa Israel mobalik ug moabut ngadto sa mga anak ni Ephraim aron sa pagdawat sa ilang mga panalangin. Kining dakong panagpundok mahitabo ubos sa direksyon sa Presidente sa Ang Simbahan ni Jesukristo sa mga Santos sa Ulahing mga Adlaw, tungod kay siya ang naggunit sa mga yawe. … Ang mga yawe mao ang katungod sa kapangulohan, ang gahum sa pagdumala; ug pinaagi niining gahum ang Nawala nga mga Tribo mobalik, uban sa ‘ilang mga propeta’ ug sa ilang mga kasulatan aron ‘makoronahan og himaya, gani sa Zion, pinaagi sa mga kamot sa mga sulugoon sa Ginoo, gani ang mga anak ni Ephraim.’ (D. & P. 133:26–35.)” (Mormon Doctrine,2nd ed. [1966], 457–58; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 340–41).