Ang Tahas sa Tigkat-on

Pasiuna

Ang katuyoan niini nga leksyon mao ang pagtabang sa mga estudyante nga makakat-on unsaon sa pagtuman sa ilang tahas sa pagkat-on sa ebanghelyo. Si President Henry B. Eyring sa Unang Kapangulohan miingon, “Ang tinuod nga pagkakabig nag-agad sa estudyante nga gawasnong naninguha diha sa hugot nga pagtuo, uban sa dakong paningkamot” (“We Must Raise Our Sights” [pakigpulong ngadto sa CES religious educators], Ago. 14, 2001], 4, LDS.org). Samtang nagtabang ka sa mga estudyante nga matuman ang ilang tahas diha sa proseso sa pagkat-on, sila makakat-on unsaon sa pagdapit og personal nga pagpadayag ug mopalig-on sa ilang pagkakabig ngadto sa Ginoo. Kinahanglan nga imong ribyuhon kanunay ang mga baruganan niini nga leksyon sa pagpahinumdom sa mga estudyante sa ilang responsibilidad sa pagkat-on sa ebanghelyo.

Mga Sugyot alang sa Pagtudlo

Ang mga tahas sa magtutudlo, sa tigkat-on, ug sa Espiritu Santo sa pagkat-on sa ebanghelyo

Pagdala og pagkaon o mainom ngadto sa klase (sama sa usa ka buok prutas o pan o usa ka basong tubig). Pagdapit og duha ka estudyante sa pagduol sa atubangan sa klase. Hangyoa ang usa sa mga estudyante sa pag-ingkib sa pagkaon o sa pagdimdim sa mainom. Hangyoa ang unang estudyante sa paghulagway sa lami sa pagkaon (o mainom) ngadto sa ikaduhang estudyante. Awhaga siya sa paghulagway niini og maayo nga ang paghulagway magtagbaw sa gana o magtagbaw sa kauhaw sa ikaduhang estudyante. Dayon pangutan-a ang ikaduhang estudyante sa mosunod:

Unsa nga kaayohan ang imong naangkon gikan sa pagkaon (o mainom) nga gihulagway sa laing estudyante?
Unsa ka maayo ang paghulagway sa estudyante sa pagtagbaw sa imong kagutom (o kauhaw)?
Unsa ang kinahanglan gayud nimong buhaton aron sa pag-angkon og bisan unsa nga kalig-on o kaayohan gikan niini nga pagkaon (o mainom)?

Pangutan-a ang klase kon sa unsa nga paagi kini nga ehemplo sa pagtubag sa mga panginahanglan sa atong pisikal nga mga lawas susama sa atong responsibilidad sa pagkat-on ug pagtubo sa espirituhanong paagi.

Itudlo nga pipila sa katawhan naghunahuna nga ang responsibilidad alang sa pagkat-on sa ebanghelyo nag-agad una sa tanan sa magtutudlo. Hinoon, sama kaayo sa ehemplo sa pagkaon o mainom, ang usa ka tawo dili makabaton og pagpamatuod sa espirituhanong mga kamatuoran alang sa uban. Ang matag usa kanato kinahanglan gayud nga mokat-on ug mogamit og mga kamatuoran sa ebanghelyo alang sa atong mga kaugalingon aron sa pagdawat og espirituhanong kalig-on ug pagtubo.

Dapita ang usa ka estudyante sa pagbasa og kusog sa Doktrina ug mga Pakigsaad 88:118. Awhaga ang klase sa pagsunod, nga mangita sa mga pulong nga naghulagway sa atong responsibilidad sa pagkat-on sa ebanghelyo.

Unsa nga mga pulong ang naghulagway sa atong responsibilidad sa pagkat-on sa ebanghelyo? (“Pangitaa ninyo nga makugihon,” “pagtudlo sa usag usa,” “pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.” Mahimo nimong dapiton ang usa ka estudyante sa paglista niini nga mga pulong diha sa pisara samtang ang mga estudyante nagsulti niini.)
Pamilyar kita sa unsay gipasabut sa pagpangita og kasayuran “pinaagi sa pagtuon.” Unsa kaha ang gipasabut sa pagpangita og kasayuran “pinaagi usab sa hugot nga pagtuo”?

Aron matabangan ang mga estudyante nga makasabut sa kahulugan niini nga mga pulong, dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Kon mahimo, hatagi og kopya ang kada estudyante o isulat ang pamahayag diha sa pisara sa dili pa magsugod ang klase. Hangyoa ang mga estudyante sa pagpangita og mga pulong nga nagtabang kanila sa pagsabut sa sugo sa Ginoo sa pagpangita og kasayuran pinaagi sa hugot nga pagtuo.

Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. …

“… Ang usa ka estudyante kinahanglan gayud magpakita og hugot nga pagtuo ug molihok aron makabaton sa kahibalo alang sa iyang kaugalingon” (“Seek Learning by Faith” [pakigpulong ngadto sa mga CES religious educator, Peb. 3, 2006], 3, LDS.org).

Isulat ang mosunod nga pamahayag diha sa pisara: Ang espirituhanong pagkat-on nagkinahanglan og …

Hangyoa ang mga estudyante sa paggamit sa pagpasabut ni Elder Bednar ug unsay ilang nakat-unan mahitungopd sa responsibilidad isip mga tigkat-on aron sa pagkompleto niini nga pamahayag. Posible nga mga tubag mahimong maglakip sa mosunod: Ang espirituhanong pagkat-on nagkinahanglan og paningkamot sa atong bahin. Ang espirituhanong pagkat-on nagkinahanglan kanato sa pagpakita og hugot nga pagtuo ug sa paglihok.

Aron sa pagtabang sa mga estudyante sa pagsabut sa impluwensya nga mahimo sa personal nga paningkamot diha sa ilang espirituhanong pagkat-on, i-drowing ang nag-uban nga diagram diha sa pisara. Ipasabut nga diha sa Doktrina ug mga Pakigsaad 50, ang Ginoo nagtabang kanato nga mas makasabut sa atong tahas diha sa pagkat-on sa ebanghelyo. Sa pagbuhat niini, Siya mipasabut una sa mga tahas sa magtutudlo ug sa Espiritu Santo diha sa pagkat-on sa ebanghelyo.

Dapita ang usa ka estudyante sa pagbasa og kusog sa Doktrina ug mga Pakigsaad 50:13–14. Sa dili pa basahon sa estudyante, ipasabut nga kini nga mga bersikulo gihatag ngadto sa unang mga miyembro sa Simbahan kinsa gi-orden sa pagtudlo sa ebanghelyo ngadto sa uban. Dapita ang katunga sa klase sa pagpangita sa mga pulong nga naghulagway sa responsibilidad sa usa ka magtutudlo. Dapita ang katunga sa klase sa pagpangita sa mga pulong nga naghulagway sa responsibilidad sa Espiritu.

Sumala niini nga mga bersikulo, unsa ang responsibilidad sa magtutudlo? (Sa pagsangyaw sa ebanghelyo pinaagi sa Espiritu. Dapita ang usa ka estudyante sa pagsulat sa pagsangyaw pinaagi sa Espiritu ubos sa Magtutudlo diha sa diagram.)
Unsa ang responsibilidad sa Espiritu, o sa Maghuhupay? (Ang pagtudlo sa kamatuoran. Hangyoa ang usa ka estudyante sa pagdugang sa mga pulong pagtudlo sa kamatuoran ubos sa Espiritu Santo diha sa diagram.)

Isulat ang mosunod nga kamatuoran diha sa pisara: Ang Espiritu Santo mao ang tinuod nga magtutudlo. Ipasabut nga samtang ang magtutudlo, misyonaryo, o lider sa Simbahan adunay responsibilidad sa pagsangyaw sa ebanghelyo pinaagi sa Espiritu, ang Espiritu Santo mao ang nagpadayag, naglamdag, ug nagdala sa kamatuoran sa ebanghelyo nganhi sa atong mga kasingkasing.

Kanus-a kamo mibati nga ang Espiritu nagtudlo kaninyo?

Dapita ang usa ka estudyante sa pagbasa og kusog sa Doktrina ug mga Pakigsaad 50:19–21. Hangyoa ang mga estudyante sa pagsunod, nga mangita sa mga pulong nga naghulagway sa responsibilidad sa tigkat-on.

Sumala niini nga mga bersikulo, unsa nga responsibilidad aduna ang tigkat-on? (Sa pagdawat sa pulong sa kamatuoran pinaagi sa Espiritu. Dapita ang usa ka estudyante sa pagsulat sa dawaton pinaagi sa Espiritu ubos sa Magtutudlo diha sa diagram.)

Aron sa pagtabang sa mga estudyante nga mas makasabut kon unsay gipasabut sa pagdawat pinaagi sa Espiritu, hangyoa sila sa pagpamalandong kon unsa ang gikinahanglan alang sa usa ka tawo sa pagdawat og bola gikan sa usa ka tawo kinsa nagpatid o naglabay niini ngadto kanila.

Unsa ang gikinahanglang buhaton sa usa ka tawo aron sa pagdawat sa bola? (Ipataas ang iyang mga kamot ug saw-on kini.) Sa unsa nga paagi kini sama sa paningkamot nga ang usa ka tigkat-on kinahanglan gayud nga mohimo aron sa pagdawat sa pulong sa kamatuoran pinaagi sa Espiritu? (Aron sa pagdawat sa bola, ang usa ka tawo kinahanglan gayud mangandam sa pagsawo niini. Sa samang paagi, kinahanglan gayud nga atong andamon ang atong mga kasingkasing ug mga hunahuna sa pagdawat sa kamatuoran pinaagi sa Espiritu.)

Dapita ang mga estudyante sa pagsiksik sa Doktrina ug mga Pakigsaad 50:22 sa hilum, nga mangita sa unsay mahitabo kon kita maghimo niini nga paningkamot sa pagdawat sa ebanghelyo ug sa pagkat-on pinaagi sa hugot nga pagtuo. Sa dili pa basahon sa mga estudyante, ipasabut nga ang mga pulong makadawat og kaayohan nagpasabut nga nabayaw o natukod sa espirituhanong paagi.

Sumala niini nga bersikulo, unsa nga mga panalangin ang madawat sa mga magtutudlo ug sa mga tigkat-on gikan sa Espiritu kon sila motuman sa ilang mga responsibilidad sa pagtudlo ug pagkat-on sa ebanghelyo? (Pagsabut, pagkadawat og kaayohan, ug hingpit nga kalipay.)

Sultihi ang mga estudyante nga si Elder Richard G. Scott mipamatuod sa koneksyon tali sa pagtuman sa mga tigkat-on sa ilang tahas ug sa oportunidad sa Espiritu sa pagtudlo ug sa pagpamatuod. Kon mahimo, hatagi ang kada estudyante og kopya sa mosunod nga pamahayag. Dapita ang usa ka estudyante sa pagbasa og kusog sa pamahayag. Hangyoa ang klase sa pagsunod, nga mangita sa mga pulong nga nagpasabut sa impluwensya sa paningkamot sa tigkat-on diha sa oportunidad sa Espiritu Santo sa pagtudlo.

“Ang desisyon [sa usa ka tigkat-on] nga moapil maoy usa ka paggamit sa kabubut-on nga nagtugot sa Espiritu Santo sa pagsulti og personal nga mensahe nga angay sa ilang indibidwal nga mga panginahanglan. Ang pagmugna og kahimtang sa pag-apil nagpalambo sa posibilidad nga ang Espiritu motudlo pa og importanting mga leksyon kaysa masulti sa [magtutudlo]” (“To Learn and to Teach More Effectively” [BYU Campus Education Week nga debosyonal, Ago. 21, 2007], 4–5, speeches.byu.edu).

Sumala sa pamahayag ni Elder Scott, unsaon nato sa pagdapit ang Espiritu Santo sa pagtudlo kanato?

Dapita ang mga estudyante sa pag-summarize kon sa unsang paagi ang ilang mga paningkamot isip mga tigkat-on nag-impluwensya sa oportunidad sa Espiritu Santo nga motudlo. Ang mga estudyante mahimong mogamit og lahi nga mga pulong, apan kinahanglan nilang ipahayag ang mosunod nga baruganan: Samtang atong gamiton ang atong kabubut-on sa pag-apil sa proseso sa pagkat-on, nagdapit kita sa Espiritu sa pagtudlo ug pagpamatuod sa kamatuoran. Isulat kini nga baruganan diha sa pisara ubos niadtong daan nang naila.

Aron hatagan ang mga estudyante og ehemplo sa usa ka tawo kinsa migamit sa iyang kabubut-on sa pagkat-on pinaagi sa pagtuon ug sa hugot nga pagtuo, dapita sila sa pagpamalandong sa istorya sa Unang Panan-awon ni Joseph Smith. Ipares-pares ang mga estudyante, ug i-assign ang kada pares og usa o sobra pa sa mosunod nga mga bersikulo: Joseph Smith—Kasaysayan 1:8, 10, 11, 12, 13, 14, 15, 16, 18. (Mahimo nimong isulat kining mga bersikulo diha sa pisara.) Dapita ang mga estudyante sa pagbasa sa gi-assign nila nga mga bersikulo ug hisguti ang mosunod nga pangutana:

Giunsa ni Joseph paghimo og paningkamot sa pagkat-on og espirituhanong mga kamatuoran?

Human sa igong panahon, dapita ang kada pares sa pagtudlo og mga pulong gikan sa ilang gi-assign nga mga bersikulo nga nagpakita sa paningkamot ni Joseph.

Ipamatuod nga ang pagkaandam ni Joseph sa pagtuon sa pulong sa Dios ug sa paglihok diha sa hugot nga pagtuo sa unsay iyang nakat-unan miresulta sa mas daghang kahibalo, usa ka panalangin nga maanaa tanan kanato. Dapita ang mga estudyante sa pagsiksik og hilum sa Joseph Smith—Kasaysayan 1:20, nga mangita sa unsay gisulti ni Joseph ngadto sa iyang inahan sa dihang mipauli siya sa panimalay human madawat ang Unang Panan-awon.

Hain nga pulong sa pamahayag ni Joseph ngadto sa iyang inahan ang nagpakita nga iyang nakat-unan ang kamatuoran sa iyang kaugalingon? (“Akong nakat-unan sa akong kaugalingon”)

Dapita ang mga estudyante sa pag-ila og baruganan nga atong makat-unan gikan sa kasinatian ni Joseph. Awhaga sila sa pagpulong sa ilang mga sugyot ingon sa “kon–niana” nga mga pamahayag. Ang mosunod maoy usa ka paagi nga ang mga estudyante mahimong mopahayag niini nga baruganan: Kon kita makugihong magtuon sa pulong sa Dios ug molihok diha niini sa hugot nga pagtuo, niana kita mahibalo sa mga kamatuoran sa ebanghelyo alang sa atong mga kaugalingon. (Mahimong mosugyot ka nga ang mga estudyante mosulat niini nga baruganan sa ilang kaugalingong mga pulong tupad sa Joseph Smith—Kasaysayan 1:20.)

I-refer ngadto sa pagkaon o mainom nga kalihokan nga imong gigamit sa sinugdanan sa klase. Pahinumdumi ang mga estudyante nga ang pagkaon og pisikal nga mga pagkaon nagkinahanglan og paningkamot sa atong bahin ug nga kita makabenipisyo gikan sa pagkaon o mainom pinaagi lamang sa pagkaon o pag-inom niini sa atong mga kaugalingon. Ipamatuod nga mao usab kini sa espirituhanong paagi: ang ebanghelyo makasulod sa atong mga kasingkasing ug mahimo lamang kabahin kanato samtang kita naghimo og paningkamot sa pagkat-on sa mga kamatuoran sa ebanghelyo ug sa paggamit niini sa atong mga kinabuhi.

Unsa nga mga aksyon ang imong himoon niini nga tuig aron sa pagdapit sa Espiritu sa pagtudlo kanimo ug sa pagdala sa mga kamatuoran sa ebanghelyo nganha sa imong kasingkasing? (Ang mga tubag mahimong maglakip sa pagtambong og mga miting sa Simbahan ug mga klase, lakip ang seminary; pag-apil og mga miting ug mga klase pinaagi sa pagkanta og mga himno, pagmarka og mga bersikulo sa kasulatan, pagrekord og mga panabut, pagtubag og mga pangutana, pagpakigbahin og mga kasinatian ug mga pagpamatuod, ug pagtudlo sa uban; pag-apil sa family home evening ug family scriture study; paghimo og inadlaw nga personal nga pagtuon sa kasulatan ug pag-ampo; ug paggamit sa mga baruganan sa ebanghelyo diha sa ilang mga kinabuhi. Dapita ang mga estudyante sa pagsulat og usa o daghan pa nga mga tumong.)

Taposa pinaagi sa paghangyo sa mga estudyante sa pagpamalandong sa ilang mga pagpamatuod sa ebanghelyo ug unsay ilang nahibaloan alang sa ilang mga kaugalingon nga tinuod. Dapita ang pipila ka mga estudyante sa pagpakigbahin kon sa unsang paagi ang ilang personal nga mga paningkamot sa pagkat-on sa ebanghelyo naka-impluwensya sa ilang mga pagpamatuod ug mga relasyon sa Ginoo. Idugang ang imong pagpamatuod sa kalig-on ug paggiya nga atong madawat gikan sa Ginoo agi og tubag sa atong mga paningkamot sa pagkat-on ug pagsunod sa mga baruganan sa ebanghelyo.

Komentaryo ug Background nga Impormasyon

Ang mga estudyante makadapit sa Espiritu Santo sa panghimatuod sa unsay ilang gikat-unan

Si Elder David A. Bednar mipamatuod sa koneksyon tali sa pagtuman sa mga tigkat-on sa ilang tahas ug sa oportunidad sa Espiritu sa pagtudlo ug sa pagpamatuod:

“Ang usa ka tigkat-on nga naggamit sa kabubut-on pinaagi sa paglihok sumala sa husto nga mga baruganan nagbukas sa iyang kasingkasing ngadto sa Espiritu Santo—ug nagdapit sa Iyang pagtudlo, gahum sa pagpamatuod, ug panghimatuod nga saksi. … Diha sa kinasingkasing ug pagkamakanunayon sa atong dinasig sa hugot nga pagtuo nga paglihok nga atong gipakita ngadto sa atong Langitnong Amahan ug sa Iyang Anak, si Jesukristo, ang atong pagkaandam sa pagkat-on ug sa pagdawat og panudlo gikan sa Espiritu Santo” (“Paningkamot sa Pagkat-on pinaagi sa Hugot nga Pagtuo” [pakigpulong ngadto sa mga CES religious educator, Peb. 3, 2006], 3, LDS.org).

Ang importansya sa inadlaw nga pagtuon sa kasulatan

Ang Matinud-anon sa Tinuhoan nagpahayag sa mosunod mahitungod sa importansya sa inadlaw nga pagtuon sa kasulatan:

“Ang ulahing adlaw nga mga propeta nagtambag kanato sa pagtuon sa mga kasulatan matag adlaw, sa indibidwal nga paagi ug uban sa atong mga pamilya. Sila miawhag kanato, sama sa pag-awhag ni Nephi sa iyang mga kaigsoonan, sa pagpahisama sa mga kasulatan sa atong mga kaugalingon, pagpangita og mga paagi nga ang sagrado nga mga istorya sa karaan magamit sa atong kinabuhi karon (tan-awa sa 1 Nephi 19:23–24). Sila miawhag kanato sa ‘pagsiksik sa mga kasulatan’ (Juan 5:39) ug ‘pagbusog sa mga pulong ni Kristo’ (2 Nephi 32:3).

“Ikaw makapahimulos og dako pinaagi sa pagsunod niini nga tambag. Ang makahuluganon nga pagtuon sa kasulatan kada adlaw makatabang kanimo nga mahimong makadawat sa mga paghunghong sa Espiritu Santo. Motukod sa imong hugot nga pagtuo, mopalig-on nimo batok sa tintasyon, ug motabang kanimo nga mopaduol sa Langitnong Amahan ug sa Iyang Hinigugmang Anak.

“Pagpalambo og plano alang sa imong personal nga pagtuon sa mga kasulatan. Hunahunaa ang paggahin og piho nga gidugayon sa panahon kada adlaw sa pagtuon sa mga kasulatan. Atol nianang higayona, pagbasa og maayo, mabinantayon sa mga pag-aghat sa Espiritu. Hangyoa ang imong Langitnong Amahan sa pagtabang kanimo nga masayud kon unsay gusto Niya nga imong makat-unan ug buhaton.

“Padayon sa pagbasa sa mga kasulatan, ilabi na ang Basahon ni Mormon, sa tibuok nimo nga kinabuhi. Mabalik-balik nimo sa pagdiskubre pag-usab ang mga bahandi sa kasulatan, makakaplag og bag-ong kahulugan ug paggamit niini samtang ikaw nagtuon niining nagkalain-laing mga yugto sa kinabuhi” (Matinud-anon sa Tinuhoan: Usa ka Pakisayran sa Ebanghelyo [2004], 98–99).

Si Presidente Henry B. Eyring sa Unang Kapangulohan miingon:

“Kon mahimo kitang walay pagtagad sa atong pagtuon sa mga kasulatan, mahimo kitang walay pagtagad sa atong mga pag-ampo.

“Tingali dili kita mohunong sa pag-ampo, apan ang atong mga pag-ampo mahimong mas pabalik-balik, mas wala hunahunaa, kulang sa tinuod nga katuyoan. Dili mapaduol ang atong mga kasingkasing ngadto sa usa ka Dios nga wala kita makaila, ug ang mga kasulatan ug ang mga pulong sa buhi nga mga propeta nagtabang kanato nga makaila Kaniya” (“Prayer,” Ensign, Nob. 2001, 17).