Leksyon 146: Ang Pagpuli diha sa Kapangulohan

Leksyon 146

Ang Pagpuli diha sa Kapangulohan

Pasiuna

Human sa pagkamartir ni Propeta Joseph Smith ug sa iyang igsoon nga si Hyrum niadtong Hunyo 27, 1844, pipila sa mga tawo ang nalibug kon kinsa ang mangulo sa Ang Simbahan ni Jesukristo sa mga Santos sa Ulahing mga Adlaw. Apan sa wala pa ang iyang kamatayon, ang Propeta nakaandam na alang niining pagpuli sa pagpangulo pinaagi sa pagtugyan sa tanang mga yawe ug mga gahum sa priesthood ngadto sa Korum sa Napulog Duha ka mga Apostoles. Sa dihang si Brigham Young, kinsa mao ang Presidente sa Korum sa Napulog Duha ka mga Apostoles, namulong ngadto sa mga Santos niadtong Agosto 8, 1844, daghang mga miyembro sa Simbahan ang nakadawat og espirituhanong pagsaksi nga siya ang natawag ug giandam sa Dios sa pagpangulo sa Simbahan.

Mga Sugyot alang sa Pagtudlo

Human sa pagkamartir ni Joseph ug Hyrum Smith, ang pipila ka mga tawo miangkon sa katungod sa pagpangulo sa Simbahan

Sa dili pa magsugod ang klase, isulat ang mosunod nga mga pangutana diha sa pisara:

Kon ang kasamtangang Presidente sa Simbahan mamatay, kinsa ang mahimong sunod nga Presidente sa Simbahan? Sa unsang paagi nga siya mapili?

Sa unsang paagi nga ang Presidente sa Simbahan makadawat sa awtoridad sa priesthood nga gikinahanglan sa pagdumala sa Simbahan?

Dapita ang mga estudyante sa pagkonsiderar kon unsaon nila sa pagtubag ang mga pangutana diha sa pisara. Awhaga sila sa pagpaminaw alang sa mga tubag niining mga pangutana karon samtang sila nagkat-on mahitungod sa kausaban sa pagpangulo sa Simbahan nga nahitabo human sa kamatayon ni Propeta Joseph Smith ug sa iyang igsoon nga si Hyrum.

Ipasabut nga human sa pagkamartir nilang Joseph ug Hyrum Smith, ang mga Santos nakasinati og grabe nga kasubo. Ang pipila nalibug usab mahitungod kon si kinsa ang mangulo sa Simbahan. Sa pagkawala sa Presidente sa Simbahan, nasabtan sa pipila nga ang pagkapangulo mahibalik ngadto sa Korum sa Napulog Duha ka mga Apostoles. Hinoon, ang pipila ka mga tawo naghimo og bakak nga pangangkon nga anaa nila ang katungod sa pagpangulo sa Simbahan. Apil kanila mao sila si Sidney Rigdon ug James Strang.

Dapita ang usa ka estudyante sa pagbasa og kusog sa mosunod nga tulo ka mga paragraph. Hangyoa ang klase sa pagsunod kon nganong si Sidney Rigdon, kinsa nahimong prominenting lider sa Simbahan sulod sa daghang mga katuigan, naghunahuna nga siya ang angayang mangulo sa Simbahan.

“Si Sidney Rigdon, Unang Magtatambag diha sa Unang Kapangulohan, miabut [didto sa Nauvoo] gikan sa Pittsburgh, Pennsylvania, niadtong Agosto 3, 1844. Sa tuig nga wala pa kini nga panahon, gisugdan na niya ang pagpakabuhi nga sukwahi sa tambag ni Propeta Joseph Smith ug nahibulag gikan sa Simbahan. Mibalibad siya sa pakigkita sa tulo ka sakop sa Napulog Duha nga anaa na didto sa Nauvoo ug hinoon namulong ngadto sa dakong grupo sa mga Santos nga nanagpundok alang sa ilang pagsimba sa Dominggo” (Our Heritage: A Brief History of The Church of Jesus Christ of Latter-day Saints [1996], 66).

Si Sidney Rigdon mitawag og usa ka espesyal nga miting nga gipahigayon og Martes, Agosto 6, aron nga ang mga miyembro sa Simbahan mopili og usa ka magbalantay alang sa Simbahan. Naingon kini nga si Sidney Rigdon naninguha sa pagpahigayon og miting aron ang mga miyembro sa Simbahan mouyon sa iyang posisyon isip magbalantay sa Simbahan sa wala pa mahibalik ang Napulog Duha ka mga Apostoles gikan sa ilang mga misyon didto sa silangang bahin sa Estados Unidos. Ang pipila sa mga lider sa Simbahan mibati nga si Brother Rigdon tingali adunay giplanohan nga “mopahimulos sa sitwasyon sa mga santos” (History of the Church, 7:225). Maayo na lang, nga tungod sa mga paningkamot ni Elder Willard Richards ug ni Elder Parley P. Pratt, ang miting nabalhin ngadto sa Huwebes, Agosto 8, 1844, diin ang kadaghanan sa mga Apostoles nakabalik na ngadto sa Nauvoo.

Si Sidney Rigdon miangkon nga tungod kay siya kanhi nang natawag ug naordinahan isip usa ka tigpama-ba alang ni Joseph Smith (tan-awa sa D&P 100:9), iya kining responsibilidad sa “pagsiguro nga ang simbahan gidumala diha sa tukma nga paagi” (History of the Church, 7:229). Nangangkon usab siya nga angayan siya nga mahimong “usa ka magbalantay sa katawhan” ug nga agig pagtuman niining responsibilidad, gibuhat niya ang unsay gisugo sa Dios nga iyang buhaton (tan-awa sa History of the Church, 7:230).

Kon kamo didto sa Nauvoo nianang panahona, unsa kaha ang inyong hunahuna bahin sa pangangkon ni Sidney Rigdon? Unsa kaha ang inyong kabalak-an bahin ni Brother Rigdon?

Dapita ang usa ka estudyante sa pagbasa og kusog sa mosunod nga paragraph. Hangyoa ang klase sa pagpaminaw kon nganong si James Strang miingon nga siya ang angay nga mangulo sa Simbahan.

Si James Strang, kinsa nabunyagan niadtong Pebrero 1844, nagsuhid og posible nga lugar alang sa mga Santos didto sa Wisconsin niadtong tingpamulak sa 1844. Human sa pagkamartir, si James Strang miangkon nga nakadawat og usa ka sulat gikan ni Joseph Smith, nagsulti nga siya ang gitudlo nga mahimong sumusunod ni Joseph. Sa sulat ni James Strang, nga gipakita niya ngadto sa mga miyembro sa Simbahan, makita nga adunay pirma ni Joseph Smith. Si James Strang miangkon nga maoy mahimong sunod nga propeta ug mipahibalo sa iyang posisyon diha sa usa ka komperensya sa Simbahan didto sa Michigan niadtong Agosto 5, 1844.

Kon nauban kamo sa mga Santos didto sa Michigan, unsa kaha ang inyong makita nga makapakombinser diha sa pangangkon ni James Strang? Unsa kaha ang inyong kabalak-an mahitungod niining mga pagpangangkon?

Dapita ang usa ka estudyante sa pagbasa og kusog sa mosunod nga lima ka mga paragraph. Hangyoa ang klase sa pagpaminaw kon unsa ang gisulti ni Brigham Young sa ubang lider sa priesthood, lakip sa mga sakop sa Korum sa Napulog Duha ka mga Apostoles kinsa anaa didto sa Nauvoo, mahitungod kon si kinsa ang angay nga mangulo sa Simbahan:

Sila Elders John Taylor, Willard Richards, si Parley P. Pratt anaa na sa Nauvoo sa dihang miabut si Sidney Rigdon. Kadaghanan sa mga Apostoles, lakip ni Brigham Young, nabalik na sa Nauvoo sa gabii niadtong Agosto 6, 1844. Pagkasunod adlaw, Agosto 7, ang mga Apostoles nagtigum diha sa council sa balay ni John Taylor. Sa ulahing bahin nianang hapona, nagtigum ang Napulog Duha ka mga Apostoles, ang high council, ug ang mga high priest. Si Presidente Young mihangyo ni Sidney Rigdon sa pagsulti sa iyang mensahe ngadto sa mga Santos. Si Sidney Rigdon maisugon nga mipahayag nga siya nakakita og panan-awon nga walay tawo nga mosunod ni Joseph Smith isip Presidente sa Simbahan. Dayon mitanyag siya nga siya itudlo isip ang magbalantay sa katawhan.

Pagkahuman ni Sidney Rigdon sa iyang pakigpulong, si Brigham Young miingon:

“Wala koy panginlabot kon si kinsa ang mangulo sa simbahan, … apan usa ka butang nga kinahanglan nakong mahibaloan, ug mao kana kon unsay gisulti sa Dios mahitungod niini. Anaa nako ang mga yawe ug ang mga pamaagi sa pagbaton sa hunahuna sa Dios bahin niana nga hilisgutan. …

“Gitugyan ni Joseph sa among mga ulo [nagpasabut ngadto sa Korum sa Napulog Duha] ang tanang mga yawe ug mga gahum nga gipanag-iya sa Pagkaapostol nga gihuptan niya mismo sa wala pa siya mawala. …

“Pila ka higayon nga si Joseph miingon ngadto sa Napulog Duha, ‘Ako mibutang sa pundasyon ug kinahanglan kamo magpadayon sa pagtukod, tungod kay sa inyong mga abaga gisangon ang gingharian’” (sa History of the Church, 7:230).

Nganong importante ang pagpamatuod ni Brigham Young kalabut sa mga yawe sa priesthood? (Human makatubag ang mga estudyante, isulat ang mosunod nga kamatuoran sa pisara: Ang mga Apostoles naghupot sa tanang mga yawe sa priesthood nga gikinahanglan sa pagdumala sa Simbahan.)

Ipasabut nga kon ang usa ka Apostol maordinahan, hatagan siya sa tanan nga gikinahanglan nga mga yawe sa priesthood dinhi sa yuta (tan-awa sa D&P 112:30–32), apan ang awtoridad sa paggamit niadtong mga yawe anaa lamang sa senior nga Apostol, ang Presidente sa Simbahan.

Basaha og kusog ang mosunod nga instruksyon nga nahatag pinaagi ni Propeta Joseph Smith ngadto sa Korum sa Napulog Duha ka mga Apostoles niadtong Enero 1836, kapin sa walo ka tuig sa wala pa siya mamatay:

“Ang Napulog Duha dili ubos ngadto ni bisan kinsa gawas sa unang Kapangulohan, … ‘ug kon wala ako, walay Unang Kapangulohan nga labaw pa sa Napulog Duha’” (sa History of the Church, 2:374).

Base niining pamahayag, unsa ang mahitabo sa Unang Kapangulohan kon ang Presidente sa Simbahan mamatay? Kinsa ang mangulo sa Simbahan? (Human makatubag ang mga estudyante, isulat ang mosunod nga doktrina diha sa pisara: Kon ang Presidente sa Simbahan mamatay, ang Unang Kapangulohan mawala ug ang Korum sa Napulog Duha ka mga Apostoles mahimong tigdumalang korum.)

Ipasabut nga kon ang Presidente sa Simbahan mamatay, ang mga magtatambag sa Unang Kapangulohan mobalik sa ilang mga pwesto isip mga sakop sa Korum sa Napulog Duha ka mga Apostoles, base sa ilang seniority sa Korum. Sa dihang unang naporma ang Korum niadtong 1835, ang seniority nahukman pinaagi sa edad. Karon ang seniority matino pinaagi sa petsa nga ang tawo nahimong sakop sa Korum sa Napulog Duha.

Dapita ang usa ka estudyante sa pagbasa og kusog sa Doktrina ug mga Pakigsaad 124:127–128, ug hangyoa ang klase sa pagpangita kon kinsa ang senior nga Apostol ug Presidente sa Korum sa Napulog Duha ka mga Apostoles sa panahon sa kamatayon ni Joseph Smith. Hangyoa sila sa pag-report kon unsay ilang nakit-an.

Base sa unsay inyong nakat-unan, ngano kaha nga andam man kamo sa pagsunod kang Brigham Young human sa kamatayon ni Propeta Joseph Smith?

Kompletuha ang doktrina diha sa pisara pinaagi sa pagdugang sa gilinyahan nga porsyon: Kon ang Presidente sa Simbahan mamatay, ang Unang Kapangulohan mawala ug ang Korum sa Napulog Duha ka mga Apostoles mahimong tigdumalang korum ubos sa direksyon sa senior nga Apostol.

Daghang mga Santos ang nakadawat og pagsaksi nga si Brigham Young ang angayang mangulo sa Simbahan

Ipasabut nga niadtong Agusto 8, 1844, ang mga Santos didto sa Nauvoo nagpundok nianang pagka-alas 10:00 sa buntag aron maminaw ni Sidney Rigdon nga miangkon isip magbalantay sa Simbahan. Tungod kay ang hapak sa hangin paingon sa stand, si Sidney Rigdon miposisyon diha sa karwahe luyo sa nagpundok nga kongregasyon aron ang mga tawo mas makadungog sa iyang tingog. Ang kongregasyon mitalikod aron ilang makita si Sidney Rigdon samtang siya nagsangyaw. Namulong siya ngadto sa liboan ka mga Santos nga nanagpundok sulod sa usa ka oras ug tunga, nagpasabut nganong siya gayud ang mahimong magbalantay sa Simbahan. Pipila ka mga tawo ang mihulagway nga ang iyang pagtabi dili makapadasig.

Si Presidente Brigham Young ug ang ubang mga lider sa Simbahan miabut ug milingkod diha sa stand sukwahi kon diin dapita si Sidney namulong. Ang hangin mikalma na niining higayuna. Pagkahuman ni Sidney Rigdon, si Brigham Young namulong. Ang nanambong miatubang aron makadungog ni Brigham Young nga namulong ug mitalikod sila sa karwahe nga giokupar ni Sidney Rigdon. (Tan-awa sa George Q. Cannon, “Discourse,” Deseret News, Peb. 21, 1883, 67.) Si Brigham Young namulong og mubo lang kaayo ug miingon nga mas pilion niya nga mobalik ngadto sa Nauvoo aron magbangutan alang sa Propeta kay sa mopili og bag-ong lider. Gipahibalo niya nga usa ka panagtigum sa mga lider ug mga miyembro ipahigayon unya nianang adlawa sa alas 2:00 sa hapon. Pipila ka mga miyembro sa Simbahan sa kaulahian mipamatuod nga samtang namulong si Brigham Young, ilang nakita ang iyang panagway nga nausab ug nadungog ang iyang tingog nga nausab, ug nakuha niya ang panagway ug tingog ni Propeta Joseph Smith. Kining milagroso nga panghitabo nakatabang sa daghang mga Santos nga makahibalo nga ang Ginoo gusto nga si Brigham Young ang mangulo sa Simbahan.

Dapita ang usa ka estudyante sa pagbasa og kusog sa mosunod nga mga ehemplo kon unsay nakita ug nadungog sa daghang mga Santos:

Si Benjamin F. Johnson nahinumdom, “Sa dihang namulong si [Brigham Young] nakalukso ko, tungod kay ang iyang tingog, ug ang iyang panagway, hitsura, kinaiya, gisul-ob ug pamustora, ang pagkatawo gayud ni Joseph; ug ako nasayud nianang higayuna nga ang espiritu ug kupo [mantle] ni Joseph anaa kaniya” (My Life’s Review, 104, isip kinutlo sa Church History in the Fulness of Times Student Manual, 2nd ed. [manwal sa Church Educational System, 2003], 291).

Si William C. Staines mihulagway ni Brigham Young nga namulong diha sa “tingog sama sa tingog ni Propeta Joseph Smith. Nagtuo ko nga siya kadto, ug ingon usab ang liboan nga nakadungog niini” (sa History of the Church, 7:236).

Si Wilford Woodruff misulat, “Kon wala nako makita siya sa akong kaugalingong mga mata, wala gayuy makakombinser kanako nga dili kadto si Joseph Smith, ug si bisan kinsa makapamatuod niini nga nakaila niining duha ka tawo” (sa History of the Church, 7:236).

Ipasabut nga atol sa miting nga gipahigayon sa kaulahian nianang adlawa sa alas 2:00 sa hapon, si Brigham Young ug ang ubang mga sakop sa Korum sa Napulog Duha ka mga Apostoles namulong. Daghang pang mikomentaryo nga ang hitsura ug tingog ni Brigham Young sama kang Joseph Smith samtang namulong siya nianang hapona. Si George Q. Cannon, kinsa 17 anyos pa lang nianang higayuna, nahinumdom, “Tingog kadto ni Joseph mismo. … Kini ingon og anaa sa mga mata sa katawhan nga daw si Joseph ang nagbarug sa ilang atubangan” (sa History of the Church, 7:236; tan-awa usab sa Edward William Tullidge, Life of Brigham Young [1877], 115). Agig dugang niining milagro, daghang mga Santos usab ang mibati sa Espiritu Santo nga nagsaksi ngadto kanila nga si Brigham Young ug ang Korum sa Napulog Duha gitawag sa Dios sa pagpangulo sa Simbahan. Sa katapusan niining miting, ang mga Sanos sa Nauvoo nagkauyon nga miboto sa pagpaluyo sa Korum sa Napulog Duha ka mga Apostoles, uban ni Brigham Young nga nangulo sa korum, sa pagpangulo sa Simbahan. Hinoon, dili tanang mga miyembro sa Simbahan sa katapusan mipili nga mosunod sa mga Apostoles. Ang pipila sa mga tawo mipili hinoon sa pagsunod sa mga indibidwal sama nilang Sidney Rigdon ug James Strang, kinsa mitukod og ilang kaugalingong mga simbahan.

Sa unsang paagi nga ang Ginoo mipanalangin sa mga Santos aron masayud kon kinsa ang Iyang gipili sa pagpangulo sa Simbahan?
Unsaon nato sa pagkahibalo nga ang mga lider sa Simbahan karon gitawag sa Dios? (Human makatubag ang mga estudyante, isulat ang mosunod nga baruganan diha sa pisara: Pinaagi sa Espiritu Santo, makadawat kita og usa ka pagsaksi nga kadtong mangulo sa Simbahan gitawag sa Dios.)
Ngano kaha nga importante ang pagdawat og usa ka pagpamatuod nga ang atong mga lider sa Simbahan mga tinawag sa Dios?
Kanus-a kamo nakadawat og pagsaksi nga ang usa ka lider sa Simbahan gitawag sa Dios? Unsa man ang inyong gibuhat aron makadawat nianang pagsaksi?

Ipasabut nga sa dihang namatay si Joseph Smith, ang senior nga Apostol (si Brigham Young) diha-diha dayon nakagamit sa mga yawe sa priesthood. Siya adunay katungod sa pagdawat og pagpadayag kalabut kon kanus-a i-organisar ang bag-ong Unang Kapangulohan. Niadtong 1847—kapin sa duha ka tuig human sa pagkamartir—si Brigham Young nadasig sa pag-organisar sa Unang Kapangulohan kay sa mopadayon sa pagpangulo sa Simbahan isip Presidente sa Korum sa Napulog Duha ka mga Apostoles.

I-display ang mga litrato sa kasamtangang Unang Kapangulohan ug sa Korum sa Napulog Duha ka mga Apostoles. Aron mahatagan ang mga estudyante og oportunidad sa pag-summarize sa unsay ilang nakat-unan, hangyoa sila sa pagpasabut kon unsay nahitabo sa Unang Kapangulohan ug sa Korum sa Napulog Duha ka mga Apostoles kon ang Presidente sa Simbahan mamatay. Hangyoa usab sila sa pagtino kon si kinsa ang mahimong Presidente sa Simbahan o senior nga Apostol kon ang kasamtangan nga Presidente sa Simbahan mamatay karon.

Mahimo nimong tapuson kini nga leksyon pinaagi sa pagpamatuod nga ang samang mga yawe ug mga gahum sa priesthood nga gitugyan ni Joseph Smith ngadto ni Brigham Young ug sa mga sakop sa Korum sa Napulog Duha ka mga Apostoles maoy gihuptan karon sa Presidente sa Simbahan, sa iyang mga Magtatambag diha sa Unang Kapangulohan, ug sa mga sakop sa Korum sa Napulog Duha ka mga Apostoles. Mahimo usab nimong ipakigbahin kon sa unsang paagi nga ikaw nakaangkon sa imong pagpamatuod nga ang mga lider sa Simbahan mga tinawag sa Dios. Dapita ang mga estudyante nga mainampuong mangita aron makaangkon o mapalig-on ang ilang pagpamatuod sa mga kamatuoran nga ilang nahisgutan karong adlawa.

Komentaryo ug Background nga Impormasyon

Timeline sa pagpuli diha sa Kapangulohan human sa pagkamartir ni Joseph Smith

Petsa
Hunyo 27, 1844	Sila si Joseph ug Hyrum Smith gimartir.
Hunyo 29, 1844	Haya sa mga lawas nilang Joseph ug ni Hyrum Smith.
Hunyo 27–Hulyo 7, 1844	Si Willard Richards ug ang naangol nga si John Taylor mao lang ang mga Apostoles sa Nauvoo.
Hulyo 8, 1844	Si Parley P. Pratt mibalik sa Nauvoo ug mitabang ni Willard Richards ug John Taylor nga mapabilin ang kahan-ay diha sa Church.
Agosto 3, 1844	Si Sidney Rigdon miabut sa Nauvoo gikan sa Pittsburgh, Pennsylvania.
Agosto 4, 1844	Si Sidney Rigdon misulti sa usa ka grupo sa mga Santos nga siya ang angayang mahimong magbalantay sa Simbahan ug gusto nga mopatawag og usa ka espesyal nga miting niadtong Agosto 6 aron kauyonan ang iyang pagkapili. Ang miting napahigayon pagka-Huwebes, Agosto 8.
Agosto 6, 1844	Kadaghanan sa mga Apostoles, lakip ni Brigham Young, nahibalik na sa Nauvoo gikan sa ilang mga misyon.
Agosto 7, 1844	Pagkabuntag, ang mga Apostoles nanagtigum diha sa panimalay ni John Taylor kinsa naangol. Sa miting sa hapon sa mga Apostoles, high council, ug mga high priest, si Sidney Rigdon miangkon na usab nga angayang mahimong magbalantay sa Simbahan. Misulti si Brigham Young nga siya [si Brigham Young] ang naghupot sa mga yawe ug gusto nga mohimo sa kabubut-on sa Ginoo kabahin nianang butanga.
Agosto 8, 1844	Atol sa miting sa alas 10:00 sa buntag, si Sidney Rigdon namulong sulod sa usa ka oras ug tunga ngadto sa liboan ka mga Santos nga nanagpundok nga mipasabut nga siya ang angayang mahimong magbalantay. Si Brigham Young namulong usab ug miawhag sa mga Santos nga magpundok pag-usab sa alas 2:00 sa hapon. Atol niining duha ka miting, daghang mga Santos ang nakasaksi nga ang hitsura ug tingog ni Brigham Young mora og si Joseph Smith. Atol sa alas 2:00 sa hapon nga miting, ang mga Santos mipaluyo ni Brigham Young ug sa Napulog Duha ka mga Apostoles isip mga lider sa Simbahan. Daghang mga miyembro sa Simbahan ang nakasaksi sa kupo ni Propeta Joseph Smith nga nabalhin ngadto ni Brigham Young, kinsa sa makadiyot ang hitsura ug tingog mora og si Joseph Smith.

Ang pagpuli diha sa Kapangulohan sa Simbahan naestablisar sa Ginoo

Ang pagpuli diha sa Kapangulohan sa Simbahan naestablisar sa Ginoo. Ang Simbahan wala gayud mawad-i og dinasig nga pagpangulo, ug walay rason alang sa espikulasyon o kontrobersiya kon si kinsa man ang mahimong sunod nga Presidente sa Simbahan.

Si Presidente Ezra Taft Benson mitudlo, “Ang Dios nasayud sa tanang butang, ang katapusan gikan sa sinugdanan, ug walay tawo nga mahimong presidente sa simbahan ni Jesukristo nga aksidente ra, o magpabilin diha sa sulagma lamang, o tawagon nga mopauli kay naatlan lamang” (“Jesus Christ—Gifts and Expectations,” New Era, Mayo 1975, 16–17).

Ang pagtugyan ni Joseph Smith sa mga yawe sa gingharian ngadto sa Korum sa Napulog Duha ka mga Apotoles

Si Wilford Woodruff, kinsa usa ka sakop sa Korum sa Napulog Duha ka mga Apostoles, mirekord kon unsay nahitabo niadtong Marso 1844 sa wala pa gipatay si Joseph Smith:

“Nagbarug siya og mga tulo ka oras sa kwarto nga mihatag kanamo sa iyang katapusang pagtudlo. Ang kwarto napuno sa espiritu. Ang iyang nawong misanag sama sa amber; ang iyang mga pulong sama kakusog sa kilat ngari kanamo. Mituhop kini sa tanang bahin sa among kalawasan gikan sa alimpulo sa among ulo ngadto sa kiting sa among mga tiil. Miingon siya, ‘Mga kaigsoonan, ang Ginoong Makagagahum misilyo sa akong ulo sa tanang Priesthood, sa tanang yawe, sa tanang gahum, sa tanang baruganan nga iya sa katapusang dispensasyon sa kahingpitan sa mga panahon, ug sa pagtukod sa gingharian sa Dios. Akong gi-sealed kadtong tanang mga baruganan sa inyong mga ulo, Priesthood, pagkaapostol, ug mga yawe sa gingharian sa Dios, ug karon kinahanglang andamon ninyo ang inyong mga abaga ug dawaton kining responsibilidad niini nga gingharian o kamo panghimarauton’” (Mga Pagtulun-an sa mga Presidente sa Simbahan: Wilford Woodruff [2004], xxxv–xxxvi).