Doktrina ug mga Pakigsaad 17–19 (Unit 5)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga mga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 17–19 (unit 5) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 17)

Pinaagi sa tambag sa Ginoo ngadto sa Tulo ka mga Saksi sa Basahon ni Mormon, nakat-unan sa mga estudyante nga kon kita mopakita og hugot nga pagtuo sa Dios, makadawat kita og pagsaksi sa mga kamatuoran nga atong gitinguha nga mahibaloan. Kadtong nakaangkon og usa ka pagsaksi sa kamatuoran adunay responsibilidad sa pagpamatuod niini. Ang Manluluwas Mismo mipamatuod nga ang Basahon ni Mormon tinuod.

Day 2 (Doktrina ug mga Pakigsaad 18)

Niini nga leksyon nakat-unan sa mga estudyante nga ang bili sa mga kalag dako kaayo nga si Jesukristo nag-antus ug namatay aron ang tanang tawo makahinulsol ug makabalik sa Langitnong Amahan. Nadiskubrihan usab sa mga estudyante nga kon tabangan nato ang uban sa paghinulsol ug moduol ngadto sa Ginoo, mobati kita og kalipay uban kanila diha sa gingharian sa Dios. Atong madungog ang tingog ni Jesukristo samtang magbasa kita sa mga kasulatan pinaagi sa gahum sa Espiritu.

Day 3 (Doktrina ug mga Pakigsaad 19:1–22)

Gikan sa tambag sa Manluluwas ngadto ni Martin Harris, nakat-unan sa mga estudyante nga si Jesukristo mituman sa kabubut-on sa Iyang Amahan ug nga si Jesukristo mohukom kanato sumala sa atong mga binuhatan. Nakat-unan usab sa mga estudyante nga kita kinahanglan gayud nga maghinulsol sa atong mga sala o mag-antus. Kadtong kinsa mopili nga dili maghinulsol mag-antus sa silot sa ilang mga sala.

Day 4 (Doktrina ug mga Pakigsaad 19:23–41)

Nakat-unan sa mga estudyante ang mahitungod sa saad sa Ginoo ngadto ni Martin Harris: kon si Martin magkat-on bahin Kaniya, maminaw sa Iyang mga pulong, ug maglakaw diha sa kaaghop sa Iyang Espiritu, nan siya makabaton og kalinaw. Kini nga saad magamit usab ngari kanato. Ang leksyon nakatabang usab sa mga estudyante nga kon kita mobuhat sa kabubut-on sa Ginoo, Siya mohatag kanato og mga panalangin nga mas dako og bili kay sa mga bahandi sa yuta.

Pasiuna

Kini nga leksyon motabang sa mga estudyante nga makakat-on kon nganong gikinahanglan ang paghinulsol. Makatabang kini nga mapalawman ang ilang pagsabut sa Pag-ula ni Jesukristo. Kon magkadako ang atong pagsabut sa sakripisyo ug kamasulundon ni Jesukristo, mas mokunhod ang atong mga pagduha-duha bahin sa atong abilidad sa pagtabang sa buhat sa Dios.

Mga Sugyot alang sa Pagtudlo

Doktrina ug mga Pakigsaad 17

Ang Ginoo misaad sa Tulo ka mga Saksi nga sila tugutan nga makakita sa mga palid ug sa ubang sagradong mga butang

Pagdala diha sa klase og sa ka butang nga makapainteresado, apan ayaw kini ipakita sa mga estudyante. Sa pagsugod sa klase, sultihi ang mga estudyante nga ikaw nagdala og usa ka butang. Pangutan-a ang mga estudyante kon mituo ba sila nimo nga anaa nimo ang butang bisan og wala sila makakita niini.

Dapita ang usa ka estudyante sa pagbasa og kusog sa Doktrina ug mga Pakigsaad 17:2. Hangyoa ang klase sa pagsunod, nga mangita sa unsay gikinahanglan nga maangkon sa Tulo ka mga Saksi sa wala pa nila makita ang bulawan nga mga palid.

Ngano kaha nga gikinahanglan sa Tulo ka mga Saksi nga adunay hugot nga pagtuo sa dili pa nila makita ang mga palid?

Dapita ang usa ka estudyante sa pagbasa og kusog sa Doktrina ug mga Pakigsaad 17:3–5. Hangyoa ang klase sa pagsunod, nga mangita sa unsay gikinahanglan sa Ginoo nga buhaton sa Tulo ka mga Saksi human nila nakita ang bulawan nga mga palid ug ang ubang sagradong mga butang.

Unsa ang gisulti sa Ginoo sa Tulo ka mga Saksi nga ilang gikinahanglang buhaton human nila nakita ang bulawan nga mga palid ug ang ubang sagradong mga butang?
Unsa ang gikinahanglan sa Ginoo kanato human nga makaangkon kita og pagsaksi sa kamatuoran? (Human kita makaangkon og pagsaksi sa kamatuoran, kita adunay responsibilidad sa pagpamatuod niini.)

Dapita ang mga estudyante sa pagpamalandong kon unsa ang ilang nahibaloan nga tinuod ug unsaon nila nga makapamatuod niadtong mga butanga.

Doktrina ug mga Pakigsaad 18–19

Ang Ginoo namulong bahin sa Iyang pag-antus ug nagtudlo sa kaimportante sa paghinulsol

Ipakita sa mga estudyante ang usa ka piraso nga prutas, o ipakita ang usa ka hulagway sa usa ka piraso nga prutas. Pangutan-a sila kon unsaon nato pagkahibalo kon ang prutas mahimo nang kaunon. (Sa hitsura niini o sa ubang timailhan nga makita nga kini hinog na.)

Dapita ang usa ka estudyante sa pagbasa og kusog sa Doktrina ug mga Pakigsaad 18:6. Hangyoa ang klase sa pagsunod, nga mangita kon unsa ang gisulti sa Ginoo nga nagkahinog sa kadautan.

Unsa kaha ang gipasabut niining “ang kalibutan nagkahinog sa kadautan”?
Unsa nga ebidensya ang inyong nakita nga kini nahitabo?

Dapita ang mga estudyante sa pagbasa og hilum sa Doktrina ug mga Pakigsaad 18:10 (bahin sa usa ka scripture mastery passage), nga mangita kon unsay gibati sa Ginoo kabahin sa tanang katawhan, bisan niadtong nagkahinog na sa kadautan. Sunod, hangyoa sila sa pagbasa og kusog sa Doktrina ug mga Pakigsaad 18:10, nga magdungan, balikon sa makadaghan hangtud nga maka-recite niini ang matag sakop sa klase.

Unsa ang gibati sa Ginoo bahin sa Iyang mga anak?
Sa unsang paagi nga ang pagkahibalo niini makaimpluwensya kon unsaon ninyo pagtratar kadtong nagpalibut kaninyo?
Sa unsang paagi nga makahibalo ang usa ka tawo nga siya adunay dakong bili ngadto sa Dios?

Ipasabut nga sa daghang mga sitwasyon ang bili sa usa ka butang matino kon pila ang kantidad nga andam nga ibayad sa usa ka tawo alang niini. Mahimo kang mopakita og pipila ka mga butang nga nagkalain-lain og bili aron sa pagpakita niini nga punto. Dapita ang usa ka estudyante sa pagbasa og kusog sa Doktrina ug mga Pakigsaad 18:11–12. Hangyoa ang klase sa pagsunod, nga mangita sa gibugti sa Manluluwas alang sa atong mga kalag.

Unsa ang gibugti alang sa atong mga kalag? Nganong gibayran kini? (Mahimo nimong isulat ang mosunod nga baruganan diha sa pisara: Ang bili sa kada indibidwal dako kaayo nga si Jesukristo nag-antus ug namatay aron kita makahinulsol ug makabalik ngadto sa Langitnong Amahan.
Unsa ang kalabutan sa paghinulsol sa pagduol ngadto sa Manluluwas?

Aron matabangan ang mga estudyante nga mas makasabut kon sa unsang paagi nga makatabang ang paghinulsol kanato sa pagduol ngadto sa Manluluwas, hangyoa ang usa ka estudyante sa pagbasa og kusog sa mosunod nga tudling gikan sa Matinud-anon sa Tinuhoan:

“Ang paghinulsol mas labaw pa kay sa pag-ila lamang sa sayop nga mga binuhatan. Usa kini ka kausaban sa hunahuna ug kasingkasing nga maghatag kanimo og bag-ong panan-aw mahitungod sa Dios, mahitungod sa imong kaugalingon, ug mahitungod sa kalibutan. Naglakip kini sa pagpalayo sa sala ug pagpaduol ngadto sa Dios alang sa kapasayloan. Nag-aghat kini tungod sa gugma alang sa Dios ug sa kinasingkasing nga tinguha sa pagsunod sa Iyang mga sugo” (Matinud-anon sa Tinuhoan: Usa ka Pakisayran sa Ebanghelyo [2004], 128–129).

Awhaga ang mga estudyante sa pagpamalandong sa bisan unsang mga sala, pamatasan, ug kinaiya nga kinahanglan nilang biyaan aron makahinulsol ug moduol ngadto ni Kristo.

Isulat ang mosunod nga pakisayran sa kasulatan diha sa pisara: Doktrina ug mga Pakigsaad 18:13–16.

Dapita ang pipila ka mga estudyante nga magpuli-puli sa pagbasa og kusog niining mga bersikulo samtang magsunod ang klase. Mahimo nimong isugyot nga markahan sa mga estudyante ang bisan unsang matang sa pulong nga maghinulsol niining mga bersikulo (naghinulsol ug paghinulsol). Human mabasa ang matag bersikulo, pangutan-a ang klase kon unsa ang gitudlo niana nga bersikulo mahitungod sa paghinulsol. Mahimo nimong ipasabut nga ang Doktrina ug mga Pakigsaad 18:15–16 usa ka scripture mastery passage.

Idugang diha sa pisara ang mga kamatuoran nga mahibaloan sa mga estudyante. Mahimong mahibaloan sa mga estudyante ang lain-laing mga baruganan, apan siguroa nga maklaro kini nga kon kita motabang sa uban sa paghinulsol ug moduol ngadto sa Ginoo, kita mobati og kalipay uban kanila diha sa gingharian sa Dios.

Dapita ang mga estudyante sa paghunahuna mahitungod kon unsa kaha kon sila mobalik sa presensya sa Dios aron mahukman. Pangutan-a sila kon giunsa nila pagplano sa pagpangandam alang nianang dakong panghitabo. Dapita ang usa ka estudyante sa pagbasa og kusog sa Doktrina ug mga Pakigsaad 19:4. Hangyoa ang klase sa pagsunod, nga mangita kon unsa gayud ang angay natong buhaton aron maandam alang nianang adlawa.

Sumala niini nga bersikulo, unsay mahitabo kon kita mopili nga dili maghinulsol?

Dapita ang mga estudyante sa pagbasa og hilum sa Doktrina ug mga Pakigsaad 19:13–19. Hangyoa sila nga mangita sa mga sangputanan alang niadtong kinsa mopili nga dili maghinulsol.

Sumala sa Doktrina ug mga Pakigsaad 19:16–19, unsay rason ang gihatag sa Manluluwas nganong Siya nag-antus alang sa atong mga sala? (Mahimo nimong idugang ang mosunod nga doktrina niadtong anaa sa pisara: Ang Manluluwas nag-antus alang sa atong mga sala aron kita makahinulsol ug dili na mag-antus sama sa Iyang gibuhat.)

Ikonsiderar ang pagpakita sa mga estudyante og usa ka hulagway sa Manluluwas didto sa Getsemani, sama sa si Jesus Nag-ampo sa Getsemani (Libro sa mga Hulagway sa Ebanghelyo [2009], nu. 56; tan-awa usab sa LDS.org). Ipasabut nga kadaghanan sa mga istorya sa pag-antus ni Jesukristo nahatag sa usa ka tawo gawas sa Iyang Kaugalingon (tan-awa sa Mateo 26:36–39; Lucas 22:39–44), apan ang Doktrina ug mga Pakigsaad 19 naglangkob og personal nga istorya sa Manluluwas bahin sa Iyang pag-antus.

Dapita ang mga estudyante sa pagribyu og hilum sa Doktrina ug mga Pakigsaad 19:18–19, nga mangita kon giunsa sa paghulagway sa Manluluwas ang pag-antus nga Iyang nasinati atol sa Pag-ula.

Isulat ang mosunod nga duha ka mga pangutana diha sa pisara:

Hain nga mga bahin sa gihulagway sa Manluluwas sa Iyang pag-antus ang makahuluganon nganha kaninyo? Ngano man?

Unsa nga paghulagway sa Manluluwas ang nakatabang nga madugangan ang inyong tinguha sa paghinulsol ug mobalik ngadto Kaniya?

Dapita ang mga estudyante sa pagpili og usa sa mga pangutana ug maghisgot sa mga tubag uban sa ilang pares.

Dapita ang mga estudyante sa pagkanta o pagpaminaw sa mga pulong sa himno nga “I Stand All Amazed” (Mga Himno, nu. 193). Hangyoa sila sa pagpamalandong sa mga pulong niining himno ug sa paghunahuna mahitungod sa unsay nahimo sa Manluluwas alang kanila.

Kon aduna pay panahon, dapita ang mga estudyante sa pagpakigbahin sa ilang mga pagpamatuod sa Manluluwas ug sa mga panalangin sa paghinulsol. Awhaga sila sa paglihok sa bisan unsang pagbati o pag-aghat nga anaa nila sa paghinulsol ug moduol ngadto sa Manluluwas.

Sa pagtapos niini nga leksyon, dapita ang mga estudyante sa pag-recite sa Doktrina ug mga Pakigsaad 19:23 nga sinag-ulo o basahon kini gikan sa ilang mga kasulatan. Pangutan-a sila kon sa unsa kaha nga paagi nga kining scripture mastery verse dunay kalabutan sa paghinulsol ug paglaum sa kapasayloan.

Sunod nga Unit (Doktrina ug mga Pakigsaad 20–23)

Unsa ang atong gibuhat sa Simbahan karon nga susama sa dihang gi-organisar ang Simbahan niadtong Abril 6, 1830? Unsa ang mga gikinahanglan alang sa bunyag? Giunsa pagtudlo ang usa ka naghupot sa priesthood sa pagpanalangin sa sakrament? Unsa ang mga katungdanan sa usa ka teacher o usa ka priest? Ang mga estudyante makakat-on sa mga tubag niining mga pangutana samtang sila magtuon sa Doktrina ug mga Pakigsaad 20–23.