Doktrina ug mga Pakigsaad 98–101:42 (Unit 21)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 98–101:42 (unit 21) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 98)

Samtang gitun-an sa mga estudyante ang mahitungod sa pipila sa kabayolente sa manggugubot nga panon nga nasinati sa mga Santos didto sa Lalawigan sa Jackson, Missouri, ilang nakat-unan nga atong mapamatud-an ang atong kaugalingon ngadto sa Ginoo pinaagi sa atong mga pakigsaad, bisan kon kini lisud buhaton. Nakat-unan usab sa mga estudyante nga kon mapailubon kitang mosagubang sa sayop nga pagtratar ug sa walay pagpanimalos, nan ang Ginoo mohatag kanato og ganti. Sa katapusan, ilang nakat-unan nga ang pag-apil sa gubat mahimong makatarunganon ubos sa mga kahimtang nga gitugot sa Ginoo.

Day 2 (Doktrina ug mga Pakigsaad 99–100)

Niini nga leksyon nakat-unan sa mga estudyante nga kita nagrepresentar sa Ginoo kon moserbisyo og mga misyon ug nga kadtong modawat sa ebanghelyo “sama sa usa ka gamay nga bata” (D&P 99:3) makaangkon og kalooy. Nakat-unan usab nila nga kon atong ipadungog ang atong mga tingog sa pagpakigbahin sa ebanghelyo ngadto sa uban diha sa kaligdong sa kasingkasing ug sa espiritu sa kaaghup, nan ang Ginoo motabang nato nga makahibalo unsay isulti ug ang Espiritu Santo mopamatuod sa atong mensahe. Nadiskubrihan usab sa mga estudyante nga ang tanang butang mahimo alang sa atong kaayohan kon kita maglakaw sa katarung sa atubangan sa Ginoo.

Day 3 (Doktrina ug mga Pakigsaad 101:1–16)

Samtang gitun-an sa mga estudyante ang mahitungod sa pagpapahawa sa mga Santos gikan sa Lalawigan sa Jackson, Missouri, ilang nakat-unan nga kon kita molapas sa mga sugo, ang Dios motugot nga kita mag-antus; lahi kini sa mga pagsulay ug sa lisud nga mga kasinatian niadtong kinsa mga matarung. Nakat-unan usab nila nga kon kita dili makalahutay sa pagpanton, kita dili mabalaan. Nadiskubrihan sa mga estudyante nga bisan kon nakasala kita, ang Ginoo adunay kalooy ngari kanato. Kon kita magpakabuhi nga matarung, makaplagan nato ang kahupayan diha sa kahibalo nga ang tanang mga tawo anaa sa mga kamot sa Ginoo.

Day 4 (Doktrina ug mga Pakigsaad 101:17–42)

Isip kabahin niining leksyon, nakat-unan sa mga estudyante ang mga paagi nga kita makaandam alang sa Ikaduhang Pag-anhi sa Manluluwas. Ila usab nga nahibaloan ang baruganan nga kadtong nag-antus og pagpanglutos alang sa ngalan sa Manluluwas ug molahutay diha sa hugot nga pagtuo moambit sa himaya sa Dios. Dugang pa, ilang nadiskubrihan nga aron matabangan ang mga katawhan sa kalibutan nga makadawat sa mga panalangin sa Dios, kinahanglan gayud kita nga maghinulsol sa atong mga sala ug magpaubos.

Pasiuna

Kini nga leksyon nag-focus sa pipila sa mga instruksyon sa Doktrina ug mga Pakigsaad 98 nga gihatag sa Ginoo ngadto sa mga Santos kinsa gipanglutos sa manggugubot nga panon. Kini nga leksyon makatabang sa mga estudyante sa pagsabut kon unsaon nato sa pagtubag ang malisud nga mga sitwasyon, ug makatabang kini sa paglig-on sa ilang mga pagpamatuod sa gahum ug kamabination sa Ginoo.

Mga Sugyot alang sa Pagtudlo

Doktrina ug mga Pakigsaad 98

Ang Ginoo mipasalig sa mga Santos sa panahon sa ilang mga kasakit

Sa dili pa magsugod ang klase, isulat ang mosunod nga mga pangutana diha sa pisara: Unsa ang inyong bation? Unsa ang inyong buhaton?

Pasabta ang mga estudyante nga sa leksyon karon ilang makat-unan ang mahitungod sa pipila sa mga pagsulay ug pagpanglutos nga nasinati sa mga Santos nga nagpuyo sa Lalawigan sa Jackson, Missouri, niadtong Hulyo 1833. Ipasabut nga pipila sa mga taga-Missouri nangasuko sa mga Santos tungod sa politikanhon, kalitingbanon, ekonomikanhon, ug relihiyosong mga kalainan.

Dapita ang usa ka estudyante sa pagbasa og kusog sa mosunod nga paragraph:

Pagka-Sabado, Hulyo 20, 1833, naa sa mga 400 ug 500 ka masuk-anon nga mga lumulupyo sa Missouri ang nagkapundok sa balay-hukmanan didto sa Independence, Missouri. Mipili sila og komitiba aron sa pagsulat og usa ka dokumento nga naglatid sa ilang mga gipangayo sa mga Mormon. Ilang gipangayo nga kinahanglan wala nay mga Santos sa Ulahing mga Adlaw nga mobalhin ngadto sa Lalawigan sa Jackson ug miingon nga kadtong nagpuyo na didto kinahanglang mosaad gayud nga mobiya sa labing madali nga panahon. Agig dugang, ilang gipangayo nga ang newspaper sa Simbahan mohunong na sa pagmantala. Sa dihang gipresentar kining mga gipangayo ngadto sa mga lider sa Simbahan sa Missouri, ang mga lider sa Simbahan nakalitan ug nangayo og tulo ka bulan sa pagkonsiderar sa proposisyon ug sa pagkonsulta sa mga lider sa Simbahan didto sa Ohio. Ang grupo sa mga lumulupyo sa Missouri nga nagpresentar sa mga gipangayo mibaliwala sa hangyo sa mga lider sa Simbahan. Dayon ang mga Santos mihangyo og 10 ka adlaw, apan gihatagan lamang sila og 15 minutos sa pagtubag. (Tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 132–33.)

Hangyoa ang mga estudyante sa pagtubag sa mga pangutana diha sa pisara.

Dapita ang laing estudyante sa pagbasa og kusog sa mosunod nga paragraph:

Ang mga taga-Missouri nga diha sa miting sa balay-hukmanan sa Independence kalit lang nahimong usa ka manggugubot nga panon ug mihukom sa pagguba sa opisina sa printahanan ug sa press. Ang manggugubot nga panon milungkab sa opisina sa printahanan, gilabay ang mga kagamitan ngadto sa kadalanan ug sa tanaman, giguba ang press, gikatag ang mga na-type na, ug miguba sa hapit tanang naimprinta, lakip ang kadaghanan sa mga panid sa Book of Commandments [Basahon sa mga Sugo] nga wala pa mabugkos. Ang manggugubot nga panon gustong moguba sa Gilbert ug Whitney Store. Hinoon, si Sidney Gilbert nakighimamat sa manggugubot nga panon sa wala pa sila mipadayon sa ilang plano ug misaad nga mag-impaki sa mga gamit ug mobiya sulod sa tulo ka adlaw. (Tan-awa sa Church History in the Fulness of Times, 133.)

Hangyoa ang mga estudyante nga tubagon na usab ang mga pangutana nga naa sa pisara.

Dapita ang laing estudyante sa pagbasa og kusog sa mosunod nga paragraph:

Tulo ka adlaw ang milabay, niadtong Hulyo 23, ang manggugubot nga panon mipakita pag-usab sa Lalawigan sa Jackson, Missouri, niining higayuna gisangkapan og mga rifle, mga pistola, mga latigo, ug mga bunal. Ang manggugubot nga panon misunog sa mga dagami ug mga kamaisan ug miguba sa pipila ka panimalay, mga kamalig, ug mga patigayon. Ang manggugubot nga panon sa katapusan mikompronta sa unom ka mga lider sa Simbahan, kinsa, nakakita nga ang mga kabtangan ug mga kinabuhi sa mga Santos anaa sa kakuyaw, mihalad sa ilang mga kinabuhi isip tubos. Misalikway niini nga tanyag, ang mga lider sa manggugubot nga panon mihulga nga ang kada lalaki, babaye, ug bata panglatiguhon gawas kon mouyon sila nga mobiya sa lalawigan. Ubos sa pagpamugos, ang mga Kaigsoonan mipirma og usa ka kasabutan nga mobiya sa Lalawigan sa Jackson—katunga sa mga miyembro sa Simbahan ug kadaghanan sa mga lider mobiya pagka-Enero 1, 1834, ug ang nahibilin pagka-Abril 1, 1834. Ang manggugubot nga panon mitugot nga magpabilin si John Corrill ug Sidney Gilbert aron sa pagbaligya sa mga kabtangan sa mga Santos nga gipapahawa. (Tan-awa sa Church History in the Fulness of Times, 134.)

Hangyoa ang mga estudyante nga tubagon na usab ang mga pangutana nga naa sa pisara.

Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 98. Hangyoa ang klase sa pagsunod, nga mangita kon unsa ang nakaaghat niining pagpadayag. Dapita ang mga estudyante sa pagreport kon unsa ang ilang makit-an.

Sumala sa pasiuna sa seksyon, unsay nakanindot bahin sa tayming niining pagpadayag?

Dapita ang usa ka estudyante sa pagbasa og kusog sa Doktrina ug mga Pakigsaad 98:1–2. Hangyoa ang klase sa pagsunod, nga mangita sa tambag nga gihatag sa Ginoo sa mga Santos. (Mahimong makatabang ang pagpasabut nga ang Sabaoth, sa bersikulo 2, usa ka Hebreohanon nga pulong nga kasagaran nagpasabut nga mga panon o kasundalohan. Ang paggamit niini nagpasabut nga ang Ginoo adunay mga kasundalohan sa mga anghel, o mga panon, ug mga kasundalohan sa Israel, o ang mga Santos, nga Iyang mamanduan. [Tan-awa sa Bible Dictionary, “Sabaoth.”])

Unsa nga tambag ang gihatag sa Ginoo ngadto sa mga Santos? (Isulat ang mga tubag sa mga estudyante diha sa pisara.)
Nganong importante nga ang mga Santos mohatag og pasalamat sa mga panahon sa kalisud?
Unsa kaha ang gipasabut sa mapailubon nga maghulat sa Ginoo?

Dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. Hangyoa ang klase sa pagpaminaw sa unsay kahulugan sa mapailubon nga maghulat sa Ginoo.

“Unsa … ang ipasabut sa paghulat sa Ginoo? Sa mga kasulatan, ang pulong paghulat nagpasabut nga molaum, magpaabut, ug mosalig. Ang paglaum ug pagsalig sa Ginoo nagkinahanglan og pagtuo, pailub, pagpaubos, kaaghup, kamainantuson, pagsunod sa mga sugo, ug paglahutay sa katapusan” (“Nagahulat sa Ginoo: Matuman ang Imong Kabubut-on,” Liahona, Nob. 2011, 72).

Sa unsang paagi nga ang pamahayag ni Elder Hales nakatabang ninyo nga makasabut kon unsa ang gipasabut sa mapailubon nga maghulat sa Ginoo?
Ngano man nga ang tambag nga mapailubon nga maghulat sa Ginoo importante ngadto sa mga Santos sa Missouri?
Unsa nga mga pulong sa kahupayan ang gihatag sa Ginoo ngadto sa mga Santos sa bersikulo 2?

Isulat ang mosunod nga baruganan nga dili kompleto diha sa pisara: Kon magpasalamat kita sa tanang mga butang ug mapailubon nga maghulat sa Ginoo, nan …

Dapita ang usa ka estudyante sa pagbasa og kusog sa Doktrina ug mga Pakigsaad 98:3. Hangyoa ang klase sa pagsunod, nga mangita kon unsay gisaad sa Ginoo sa mga Santos kon sila mosunod sa Iyang tambag.

Unsaon ninyo sa pagkompleto ang baruganan sa pisara, base sa bersikulo 3? (Ang mosunod maoy usa sa paagi sa pagkompleto sa baruganan: Kon magpasalamat kita sa tanang mga butang ug mapailubon nga maghulat sa Ginoo, nan ang Ginoo makahimo sa atong mga kasakit nga mamaayo ra alang kanato.)

Dapita ang mga estudyante sa paghunahuna og usa ka tawo nga ilang nailhan kinsa mapailubon nga naghulat sa Ginoo atol sa malisud nga mga panahon ug nakakaplag og mga rason nga magmapasalamaton.

Sa unsang mga paagi ang mga kasakit nakahatag og kaayohan sa kinabuhi niana nga tawo?

Dapita ang usa ka estudyante sa pagbasa og kusog sa Doktrina ug mga Pakigsaad 98:18. Hangyoa ang klase sa pagsunod, nga mangita sa usa ka panalangin nga madawat sa matinud-anon.

Tapusa pinaagi sa pagpamatuod sa mga baruganan nga imong nahisgutan sa klase karon.

Sunod nga Unit (Doktrina ug mga Pakigsaad 101:43–101; 102–105)

Dapita ang mga estudyante sa paghunahuna kon unsaon kaha nila sa pagtubag kon sila gitawag sa Ginoo sa paglakaw og gatusan ka milya sulod sa pipila ka bulan aron sa pagtabang sa mga miyembro sa Simbahan nga nanginahanglan. Ipasabut nga samtang magtuon sila sa tibuok Doktrina ug mga Pakigsaad 101 ug sa mga seksyon 102 hangtud sa 105 atol sa umaabut nga semana, ilang makat-unan ang mahitungod sa usa ka grupo sa mga tawo kinsa miboluntaryo sa pagbiyahe gikan sa Ohio ngadto sa Missouri aron sa pagtabang sa isigka miyembro sa Simbahan. Kini nga grupo naila nga Kampo sa Zion [Zion’s Camp].