Leksyon 118

Doktrina ug mga Pakigsaad 110

Pasiuna

Niadtong Dominggo, Abril 3, 1836, usa ka sakrament miting ang gihimo didto sa Templo sa Kirtland. Atol sa miting, sila si Joseph Smith ug Oliver Cowdery miadto sa usa ka dapit sa templo diin ang tabil nakapabulag nila gikan sa kongregasyon. Mihalad sila og usa ka pag-ampo. Sa ilang pagbarug human mag-ampo, si Jesukristo nagpakita kanila ug midawat sa bag-ong gipahinungod nga templo. Sila si Moises, Elias, ug Elijah nagpakita usab, ang mga yawe sa priesthood gipahiuli. Ang Doktrina ug mga Pakigsaad 110 mao ang istorya niini nga panan-awon.

Mga Sugyot alang sa Pagtudlo

Doktrina ug mga Pakigsaad 110:1–10

Ang Ginoo mipakita ug midawat sa Templo sa Kirtland

Pangutan-a ang mga estudyante unsay gisulat sa gawas sa matag templo. (“Pagkabalaan ngadto sa Ginoo—ang Balay sa Ginoo.”)

• Unsa ang kahulugan sa mga pulong nga “ang Balay sa Ginoo” nganha kaninyo?

Human mahisguti sa mga estudyante kini nga mga pangutana, ipasabut nga ang Ginoo mibisita sa Iyang balay didto sa Kirtland, Ohio, human kini mapahinungod. Aron matabangan ang mga esudyante nga makasabut sa mga sirkumstansya nga naglibut niining sagrado nga hitabo, dapita ang usa ka estudyante sa pagbasa og kusog sa seksyon sa pasiuna sa Doktrina ug mga Pakigsaad 110. Hangyoa ang klase sa pagsunod, nga mangita kon kinsa ang didto ug unsay ilang gibuhat sa wala pa mahitabo ang panan-awon.

• Kinsa ang didto atol niini nga panan-awon? Unsay ilang gibuhat sa wala pa mahitabo kini nga panan-awon?

Dapita ang usa ka estudyante sa pagbasa og kusog sa Doktrina ug mga Pakigsaad 110:1–3. Sa dili pa mobasa ang estudyante, hangyoa ang klase sa pagsunod ug sa pagsulay sa pag-visualize unsay gihulagway niini nga mga bersikulo.

Dapita ang mga estudyante sa pagbasa og hilum sa Doktrina ug mga Pakigsaad 110:4–5 aron mahibaloan unsay gisulti sa Manluluwas ngadto nila ni Joseph Smith ug Oliver Cowdery.

• Unsa ang anaa niini nga mga bersikulo nga makahuluganon nganha kaninyo? Ngano man?

Dapita ang pipila ka mga estudyante nga magpuli-puli sa pagbasa og kusog sa Mga Taga-Efeso 110:6–10. Hangyoa ang klase sa pagsunod, nga mangita sa mga rason nga gisulti sa Ginoo nga ang tanang mga Santos magmaya.

• Sumala sa bersikulo 7, ngano ang mga Santos dunay rason nga magmaya? (Ang Ginoo midawat sa templo ug misaad sa pagpakita sa Iyang kaugalingong ngadto kanila diha niini.)

• Sa unsang paagi Siya magpakita sa Iyang kaugalingon ngadto sa Iyang mga katawhan diha sa templo? (Ang pulong magpakita nagpasabut nga ipakita o ipasundayag. Pahinumdumi ang mga estudyante nga gihisgutan kini nila sa dihang nagtuon sa Doktrina ug mga Pakigsaad 97 ug Doktrina ug mga Pakigsaad 109. Sa kasagaran, ang Ginoo magpakita sa Iyang kaugalingon pinaagi sa gahum sa Espiritu Santo.)

Hangyoa ang mga estudyante sa pag-ila og usa ka baruganan gikan sa saad sa bersikulo 7–8. Ang mga estudyante mahimong moila og lain-laing mga baruganan, apan siguroha sa paghatag og gibug-aton sa mosunod: Kon kita mosunod sa mga sugo sa Ginoo ug maningkamot nga mahimong putli ang Iyang balay, Siya mopakita sa Iyang kaugalingon diha sa Iyang mga templo. Mahimo nimong isulat sa pisara kini nga baruganan.

Aron matabangan ang mga estudyante nga mas makasabut niini nga baruganan, hisguti ang mosunod nga mga pangutana:

• Sa unsa nga paagi nga mahimo nato nga putli ug dili mahugawan ang balay sa Ginoo?

• Ngano kaha sa inyong hunahuna nga ang Ginoo gusto nga kita magmasulundon ug limpyo sa dili pa Siya mopakita sa Iyang kaugalingon ngari nato sa Iyang balay?

Kon ang mga estudyante nakatambong sa templo, dapita sila sa paghanduraw sa usa ka kasinatian nga ilang nasinati sa dihang gibati nila nga duol sa Ginoo didto. Ikonsiderar ang pagpakigbahin kon unsay inyong gibati sa dihang misimba kamo sa templo.

Dapita ang usa ka estudyante sa pagbasa og kusog sa Doktrina ug mga Pakigsaad 110:9–10. Hangyoa ang klase sa pagsunod, nga mangita kon kinsa ang magmaya ug ngano.

• Sumala niini nga mga bersikulo, kinsa ang mapanalanginan tungod sa pagpahiuli sa mga panalangin sa templo?

• Sa unsa nga paagi mapanalanginan ang kalibutan tungod sa mga templo ug sa buhat sa kaluwasan alang sa mga buhi ug mga patay?

• Sa unsang paagi nga ang templo usa ka panalangin sa inyong kinabuhi?

Doktrina ug mga Pakigsaad 110:11–16

Sila si Moises, Elias, ug Elijah nagpakita, ug ang mga yawe sa priesthood gipahiuli ngadto nila ni Joseph Smith ug Oliver Cowdery

Dapita ang mga estudyante sa paghisgot og usa ka panahon sa dihang ang mga miyembro sa ilang pamilya temporaryong nagkabulag gikan sa usag usa. Hangyoa sila sa pagpakigbahin kon unsay ilang gibati panahon niini nga panagbulag. Samtang magtuon ang mga estudyante sa Doktrina ug mga Pakigsaad 110:11–16, dapita sila sa pagpangita kon sa unsa nga paagi nga kini nga panan-awon nakapasiguro nga ang atong mga pamilya makabuntog sa bisan unsa nga panagbulag.

Kopyaha ang mosunod nga tsart diha sa pisara. Ayaw isulat ang impormasyon diha sa parentesis.

	Moises D&P 110:11	Elias D&P 110:12	Elijah D&P 110:13–16
Mga yawe sa priesthood gipahiuli	(Ang mga yawe sa pagpundok sa Israel)	(Ang dispensasyon sa ebanghelyo ni Abraham)	(Ang mga yawe niini nga dispensasyon)
Unsa ang gidumala niini nga mga yawe	(Misyonaryo nga buhat)	(Celestial nga kaminyoon ug mahangturong kaliwatan)	(Gahum sa pagbugkos, lakip sa buhat sa templo ug family history)

Ipasabut nga human matapos ang panan-awon sa Manluluwas, tulo ka lain-laing mga indibidwal tagsa-tagsa nagpakita ngadto nila ni Joseph Smith ug Oliver Cowdery. Ipakita ang mga litrato nila ni Moises ug Elijah (tan-awa sa Libro sa Mga Hulagway sa Ebanghelyo [2009], nos. 14, 20; tan-awa usab sa LDS.org). Hangyoa ang mga estudyante sa pagpasabut kinsa sila si Moises ug Elijah ug sa paghingalan sa pipila ka importante nga mga butang nga ilang nahimo (kon ang mga estudyante nagkinahanglan og tabang, isugyot nga ilang tan-awon kini nga mga propeta diha sa Bible Dictionary). Ipasabut nga si Elias tingali usa ka propeta nga nagpuyo sa panahon ni Abraham. Agig dugang sa usa ka pangalan, ang Elias usa ka titulo nga nagpasabut nga tigpasiugda o tigpahiuli (tan-awa sa Bible Dictionary o Giya ngadto sa mga Kasulatan, “Elias,” scriptures.lds.org).

Bahina ang klase ngadto sa tulo ka grupo. I-assign ang matag grupo sa usa sa tulo ka mga pangalan diha sa tsart sa piara. Ipasabut nga ang matag usa sa mga mensahero mihatag sa mga yawe sa priesthood ngadto nila ni Joseph Smith ug Oliver Cowdery. Hangyoa ang mga estudyante sa pagtuon sa tudling sa kasulatan nga gisulat ubos sa ilang gitudlo nga pangalan ug diskobreha unsa ang gipahiuli sa anghel nga mensahero. Human sa igong panahon, dapita ang usa ka estudyante gikan sa matag grupo sa pagbasa sa gi-assign ngadto nila nga tudling sa kasulatan ngadto klase. Dapita ang ikaduha nga estudyante gikan sa matag grupo sa pagsulat kon unsay gipahiuli sa mensahero sa han-ay nga gibutangan og label nga “Mga yawe sa Priesthood gipahiuli” sa tsart nga naa sa pisara.

Aron matabangan ang mga estudyante nga makasabut unsa ang mga yawe sa pagpundok sa Israel, hisguti ang mosunod nga pangutana:

• Sa atong panahon, giunsa sa Ginoo pagpundok ang Iyang mga anak ngadto sa Iyang gingharian?

Idugang ngadto o ikumpirmar ang mga tubag sa estudyante pinaagi sa pagdapit sa usa ka tawo sa pagbasa sa mosunod nga pamahayag ni Elder Russell M. Nelson sa Korum sa Napulog Duha ka mga Apostoles:

“Ang misyonaryo nga buhat importante sa pagpundok sa Israel. … Sa daghang mga nasud ang atong mga misyonaryo nangita niadtong nagkatibulaag nga Israel” (“Ang Pagpundok sa Nagkatibulaag nga Israel,” Liahona, Nob. 2006, 81).

Isulat ang misyonaryo nga buhat diha sa pisara ubos sa “Moises” sa han-ay nga gibutangan og label nga “Unsa ang maablihan niini nga mga yawe.”

• Sa unsang paagi ang inyong mga kinabuhi naimpluwensiyahan pinaagi sa pagpahiuli ni Moises sa mga yawe nga nagdumala sa misyonaryo nga buhat?

Ang dispensasyon sa ebanghelyo ni Abraham, nga gihatag ngadto nila ni Joseph Smith ug Oliver Cowdery pinaagi ni Elias, mipahiuli sa mga saad nga gihimo sa Ginoo uban ni Abraham. Aron matabangan ang mga estudyante nga makasabut sa dispensasyon sa ebanghelyo ni Abraham nga gipahiuli ni Elias, dapita ang usa ka estudyante sa pagbasa sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Si Elias midala og balik ‘sa ebanghelyo ni Abraham,’ ang importante nga pakigsaad ni Abraham diin ang matinud-anong makadawat sa mga saad sa mahangturong paglambo, mga saad nga pinaagi sa celestial nga kaminyoon ang ilang mahangturong kaliwatan modaghan sama sa mga balas sa dagat o sama sa mga bitoon sa kalangitan. Si Elias mihatag sa saad—nga nadawat sa karaan pinaagi nila ni Abraham, Isaac, ug Jacob—nga sa moderno nga mga tawo ug sa ilang mga kaliwat ang tanang mga henerasyon mapanalanginan. Ug kita karon nagtanyag sa mga panalangin nila ni Abraham, Isaac, ug Jacob ngadto sa tanan nga modawat kanila” (“The Keys of the Kingdom,” Ensign, Mayo 1983, 22).

• Sumala ni Elder McConkie, unsa nga mga saad ang gihatag ngadto ni Abraham? (Samtang ang mga estudyante motubag, isulat ang celestial nga kaminyoon ug mahangturong kaliwatan diha sa pisara sa kolum ubos sa “Elias.”)

• Unsa ang kahulugan sa mga panalangin sa celestial nga kaminyoon ug mahangtuorng kaliwatan nganha kaninyo? Nganong importante man kini kaninyo?

Aron matabangan ang mga estudyante nga makasabut sa mga yawe nga gipahiuli ni Elijah, dapita ang duha ka mga estudyante sa pagbasa sa mosunod nga mga pamahayag:

Si Presidente Joseph Fielding Smith mitudlo: “Kining gahum sa pagbugkos gitugyan kang Elijah, mao ang gahum nga nagbugkos sa mga bana ug mga asawa, ug sa mga anak ngadto sa mga ginikanan alang karon ug sa kahangturan. Mao kini ang gahum nga nagbugkos nga anaa sa matag ordinansa sa Ebanghelyo. … Pinaagi niini nga gahum nga ang tanang mga ordinansa kalabut sa kaluwasan gibugkos, o gi-seal, ug misyon ni Elijah nga moanhi, ug mopahiuli niini” (Elijah the Prophet and His Mission [1957], 5).

Mipasabut si Elder David A. Bednar sa Korum sa Napulog Duha ka mga Apostoles: “Isip mga miyembro sa gipahiuli nga Simbahan ni Kristo, kita adunay responsibilidad nga pakigsaad sa pagsiksik sa atong mga katigulangan ug paghatag kanila sa makaluwas nga mga ordinansa sa ebanghelyo. … Tungod niini nga mga rason kita naghimo sa pagsiksik sa family history, nagtukod og mga templo, ug nagpahigayon sa mahinungdanon nga mga ordinansa. Tungod niini nga mga rason si Elijah gipadala aron sa pagpahiuli sa awtoridad sa pagbugkos nga nagbugkos dinhi sa yuta ug didto sa langit” (“Ang mga Kasingkasing sa mga Anak Mobati,” Liahona, Nob. 2011, 25–26).

• Sumala niini nga mga pamahayag, unsa ang gahum o awtoridad nga gipahiuli ni Elijah? (Samtang ang mga estudyante motubag, isulat gahum sa pagbugkos, lakip ang buhat sa templo ug family history diha sa pisara sa kolum ubos sa “Elias.” Mahimo nimong pahinumduman ang mga estudyante nga kon wala kining mga yawe sa priesthood, “ang tibuok yuta sa hingpit malaglag sa pag-anhi [sa Ginoo]” [D&P 2:3].)

• Sa unsang paagi nga kamo napanalanginan tungod sa pagpahiuli sa gahum sa pagbugkos?

Ipasabut nga si Presidente Joseph Fielding Smith miingon nga ang Templo sa Kirtland “gitukod alang sa pagpahiuli sa mga yawe sa awtoridad. Sa pagdawat niini nga mga yawe ang kahingpitan sa mga ordinansa sa ebanghelyo gipadayag” (Doctrines of Salvation, comp. Bruce R. McConkie, 3 vols. [1954–56], 2:242). Ang Presidente sa Simbahan ug ang Korum sa Napulog Duha ka mga Apostoles nagpadayon sa paggamit niining mga yawe sa priesthood.

Isulat ang mosunod nga dili kompleto nga pamahayag diha sa pisara: Ang mga yawe sa misyonaryo nga buhat, mahangturong mga pamilya, ug ang buhat sa templo makatabang nato sa …

Dapita ang mga estudyante sa pagbasa og hilum sa Doktrina ug mga Pakigsaad 110:11–16, mangita kon unsaon nila nga makompleto kini nga baruganan.

• Sumala niini nga mga bersikulo, ngano nga ang misyonaryo nga buhat, mahangturong mga pamilya, ug buhat sa templo gikinahanglan? (Samtang motubag ang mga estudyante, kompletuha ang pamahayag diha sa pisara. Ang ilang mga tubag kinahanglang magpakita sa mosunod nga baruganan: Ang mga yawe sa misyonaryo nga buhat, mahangturong mga pamilya, ug buhat sa templo makatabang nato sa pagpangandam alang sa ikaduhang Pag-anhi sa Ginoo.)

Aron matabangan ang mga estudyante nga makasabut niini nga doktrina, i-assign ang matag grupo sa usa sa mosunod nga mga pangutana aron pamalandungan: (1) Sa unsa nga paagi nga ang misyonaryo nga buhat makaandam sa mga tawo sa Ikaduhang Pag-anhi sa Ginoo? (2) Sa unsa nga paagi nga ang saad sa mahangturong kaminyoon ug mga pamilya makaandam sa mga tawo sa Ikaduhang Pag-anhi sa Ginoo? (3) Sa unsa nga paagi nga ang buhat sa templo makaandam sa mga tawo sa Ikaduhang Pag-anhi sa Ginoo? Human sa igong panahon, pagdapit og usa ka estudyante gikan sa matag grupo unsaon niya sa pagtubag ang mga pangutana.

Isulat ang mosunod nga mga pangutana diha sa pisara, ug dapita ang mga estudyante pagtubag niini diha sa mga class notebook o mga scripture study journal:

Sa unsang paagi nga napanalanginan kamo tungod sa mga yawe sa priesthood nga gipahiuli?

Unsay inyong mahimo sa pagtabang og laing tawo nga mapanalanginan pinaagi sa usa niining mga yawe sa priesthood?

Human sa igo nga panahon, dapita ang mga estudyante sa paghisgot sa ilang mga hunahuna uban sa usa ka partner. Ikonsiderar ang pagpakigbahin kon sa unsa nga paagi nga ang inyong kinabuhi napanalanginan tungod niining nga yawe sa priesthood nga gipahiuli.

Komentaryo ug Background nga Impormasyon

Doktrina ug mga Pakigsaad 110:10. “Ug ang pagkabantog niini nga balay mokaylap ngadto sa langyaw nga mga yuta”

Si Presidente Boyd K. Packer sa Korum sa Napulog Duha ka mga Apostoles mipasabut:

“[Niadtong 1836] ang Ginoo nanagna nga ang ‘pagkabantog niini nga balay mokaylap ngadto sa langyaw nga mga yuta.’ (D&P 110:10.) Kana, ubos sa mga sirkumstansya nga diha na, mao ang labing dakong kalagmitan. Ang mga miyembro sa Simbahan diyutay ra kaayo nga nagpuyo ug nagkatag sa hilit nga mga dapit sa bag-ong yuta. Apan bisan pa sa pagpanggukod ug mga pakigbisog ug mga pagsulay niadtong unang mga adlaw, mao kini ang mga kongregasyon nga karon nagkatag sa tibuok kalibutan, ug liboan ka mga misyonaryo nagsaksi sa matag balay kon sila pasudlon” (The Holy Temple [1980], 135).

Doktrina ug mga Pakigsaad 110:11. Ang pagpundok sa Israel

Si Presidente Joseph Fielding Smith mipasabut: “Si Moises naghupot sa mga yawe sa pagpundok sa Israel. Iyang gidala ang Israel nga makagawas sa Ehipto ngadto sa yuta sa Canaan. Iya kadtong appointment niini nga dispensasyon sa pag-anhi ug sa pagpahiuli niadtong mga yawe alang sa panagpundok” (Church History and Modern Revelation, 2 vols. [1953], 2:48). Sa wala madugay human niini nga panan-awon didto sa Templo sa Kirtland, si Propeta Joseph Smith migamit niini nga mga yawe aron sugdan ang pagpundok sa Israel gikan sa tanang bahin sa kalibutan. Pananglit, niadtong 1837 sila si Elder Heber C. Kimball, Elder Orson Hyde, ug ubang mga misyonaryo gipadala ngadto sa England, diin sila mitabang sa pagpundok sa dul-an 2,000 ka mga tawo ngadto sa gipahiuli nga Simbahan ni Jesukristo pinaagi sa ilang pagsangyaw.

Doktrina ug mga Pakigsaad 110:13. Ang pagbalik ni Elijah

“Kining importante nga adlaw sa mga panan-awon ug pagpadayag nahitabo sa Dominggo sa Pasko sa Pagkabanhaw, 3 sa Abril 1836 [tan-awa sa pasiuna nga seksyon sa Doktrina ug mga Pakigsaad 110]. Unsa ang mas maayong adlaw sa dispensasyon sa kahingpitan sa mga panahon sa pagmatuod sa katinuod sa Pagkabanhaw? Kana nga katapusan sa semana mao usab ang Pagpalabay sa Judeo. Sulod sa mga katuigan ang mga pamilyang Judeo mibakante sa lingkuranan sa ilang kasaulogan sa Pagpalabay, nagpaabut sa pagbalik ni Elijah. Si Elijah nakabalik na—wala ngadto sa kasaulogan sa Pagpalabay, apan didto sa templo sa Ginoo sa Kirtland” (Church History in the Fulness of Times Student Manual, 2nd ed. [manwal sa Church Educational System, 2003], 167).

Doktrina ug mga Pakigsaad 110:13–16. Ang mga yawe sa pagbugkos mopabalik sa mga kasingkasing sa mga amahan ug sa mga anak

Si Presidente James E. Faust sa Unang Kapangulohan nagtudlo:

“Sa akong opinyon, ang mga miyembro sa Simbahan adunay labing epektibo nga tambal sa atong nagkadugta nga kinabuhi sa pamilya. Alang kini sa mga lalaki, mga babaye, ug mga bata sa pagpasidungog ug pagtahud sa balaan nga mga tahas sa mga amahan ug mga inahan diha sa panimalay. Sa pagbuhat sa ingon, ang pagtahud sa usag usa ug pagpasalamat sa mga miyembro sa Simbahan mapalambo pinaagi sa pagkamatarung nga anaa niini. Niining paagiha, ang importante nga mga yawe sa pagbugkos nga gipahiuli si Elijah, nga gipamulong ni Malaquias, mahimong maglihok ‘sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa ilang mga amahan, basin pa unya ang tibuok yuta pagahampakon uban sa usa ka tunglo.’ (D&P 110:15; Mal. 4:6.) …

“Tingali atong giisip ang gahum nga gihatag ni Elijah nga butang nga may kalabutan lamang sa pormal nga mga ordinansa nga ipahigayon diha sa sagrado nga mga dapit. Apan kini nga mga ordinansa mahimong madasigon ug mabungahon lamang kon kini makita sa atong inadlaw nga mga kinabuhi. Miingon si Malaquias nga ang gahum ni Elijah mopabalik sa mga kasingkasing sa mga amahan ug sa mga anak ngadto sa usag usa. Ang kasingkasing mao ang tinubdan sa mga emosyon ug agianan alang sa pagpadayag. (Tan-awa sa Mal. 4:5–6.) Kining gahum sa pagbugkos sa ingon nagpadayag sa iyang kaugalingon diha sa mga relasyon sa pamilya, sa mga mithi ug mga hiyas nga napalambo sa usa ka maamuhan nga kahimtang, ug sa mahigugmaong pagserbisyo. Mao kini ang mga pisi nga nagbugkos sa mga pamilya” (“Father, Come Home,” Ensign, May 1993, 37).

Elder Russell M. Nelson sa Korum sa Napulog Duha ka mga Apostoles mitudlo:

“Kini nga pagpahiuli [sa mga yawe sa priesthood] giubanan sa unsay gitawag usahay og Epiritu ni Elijah—usa ka pagpakita sa Espiritu Santo nga nagsaksi sa balaan nga matang sa pamilya” (“A New Harvest Time,” Ensign, Mayo 1998, 34).