Leksyon 45
Didto sa Ohio
Pasiuna
Kini nga leksyon makahatag sa mga estudyante og mubo nga kinatibuk-ang pagpasabut [overview] bahin sa mga kasinatian sa mga Santos didto sa Ohio. Niadtong Disyembre 1830 ang mga Santos gisugo nga mamalhin ngadto sa Ohio (tan-awa sa D&P 37:3), ug pagka Enero 1831 sila gisaaran nga sila “pagatugahan uban sa gahum nga gikan sa kahitas-an” kon motuman sila (D&P 38:32).
Kadtong nagpundok didto sa Ohio napanalanginan gayud og maayo. Ang padayon nga mga pagpadayag miresulta sa mas lawom nga panabut sa mga Santos bahin sa ebanghelyo ni Jesukristo. Agig dugang, nakadawat sila og mga panalangin nga miabut tungod sa pagtukod og templo ug pagsangyaw sa ebanghelyo. Samtang milambo ang Simbahan sa gidaghanon ug sa espirituhanong kalig-on didto sa Ohio, grabe nga pagsupak ang milambo usab batok sa Simbahan ug sa mga lider niini. Nagpuyo si Propeta Joseph Smith didto sa Kirtland gikan niadtong Enero 1831 hangtud niadtong Enero 1838.
Mga Sugyot alang sa Pagtudlo
Kinatibuk-ang Pagpasabut sa Nahitabo sa Kirtland
Ipasabut nga niadtong Enero 1831, sila si Propeta Joseph Smith ug ang iyang asawa, si Emma, ingon man usab sila si Sidney Rigdon ug Edward Partridge, mibiya sa New York paingon sa Ohio. Misunod ang kadaghanan sa mga Santos sa New York atol sa nagsunod nga lima ka bulan. Ang mosunod nga ginagmayng upat ka leksyon naglangkob og talagsaong mga panghitabo sa panahon sa Ohio sa kasaysayan sa Simbahan. Bahina ang imong klase ngadto sa upat ka grupo, ug i-assign ang usa sa ginagmayng mga leksyon ngadto sa matag grupo. (Kon ang gidaghanon sa imong mga estudyante dili motugot alang niini, mahimo nimong bahinon ang imong klase sa pipila ka grupo ug i-assign ang sobra sa usa ka ginagmayng leksyon ngadto sa matag grupo.) Dapita ang mga estudyante sa pagtuon sa ilang mga outline ug sa pag-andam sa pagtudlo sa materyal ngadto sa klase. Human ang mga estudyante adunay igong panahon sa pag-andam, dapita ang matag grupo sa pagpili og usa ka sakop sa pagtudlo sa klase. Ang matag leksyon kinahanglang mokabat sa tulo ngadto sa upat ka minuto.
Ginagmayng Leksyon 1—Ang Balaod sa Simbahan
Sugdi pinaagi sa pagpangutana sa mga estudyante sa mosunod:
-
Nganong importante man ang mga balaod?
-
Ngano kaha nga ang mga balaod importante man sa Simbahan?
Pahinumdumi ang klase nga ang Ginoo misaad nga Siya “mohatag nganha [sa mga Santos] sa akong balaod” sa higayon nga moadto sila sa Ohio (D&P 38:32). Ipasabut nga sa dihang ang mga Santos miabut sa Ohio, gituman sa Ginoo ang Iyang saad ug mihatag og usa ka pagpadayag nga gipasabut isip ang Balaod sa Simbahan. Kini nga balaod, nga narekord diha sa Doktrina ug mga Pakigsaad 42, naglakip sa mga sugo ug mga instruksyon nga naggiya sa mga buluhaton sa Simbahan. Dapita ang matag parisan sa pagbasa og daklit sa Doktrina ug mga Pakigsaad 42 (nga nahimutang sa unang bersikulo), nga mangita sa pipila ka balaod nga gihatag sa Ginoo ngadto sa mga Santos.
Dapita ang mga estudyante nga markahan ang mga pulong nga “Mga balaod nga nagdumala sa pagpahinungod sa mga kabtangan gihatag” diha sa summary sa seksyon.
Ipasabut nga dinhi niini nga pagpadayag gihatag sa Ginoo ang balaod sa pagpahinungod, nga “usa ka balaan nga baruganan diin ang mga lalaki ug mga babaye sa kabubut-on nagpahinungod sa ilang panahon, talagsaon nga mga kahibalo, ug kalibutanon nga katigayunan sa pagpahimutang ug pagtukod sa gingharian sa Dios” (Giya ngadto sa mga Kasulatan, “Balaod sa Pahinungod, Pagpahinungod,” scriptures.lds.org). Ang pipila ka katuyoan sa balaod sa pagpahinungod naglakip sa pag-atiman sa mga kabus, pagtangtang sa kahakog, ug pagmugna og panaghiusa taliwala sa mga Santos.
Sobra og gamay sa usa ka tuig human gipadayag sa Ginoo ang balaod sa pagpahinungod, gisugo Niya ang mga lider sa Simbahan sa pag-establisar sa Nagkahiusang Kapunongan [United Firm]. Usa ka katuyoan sa Nagkahiusang Kapunongan, nga gibase sa mga baruganan sa balaod sa pagpahinungod, mao ang pag-establisar sa mga balay tipiganan sa pag-abag sa temporal nga mga panginahanglan sa mga miyembro sa Simbahan, ilabi na niadtong mga kabus. Usa kini ka panalangin sa mga Santos niining higayuna tungod kay daghang mga miyembro sa Simbahan nga namalhin gikan sa New York ngadto sa Ohio kinahanglang mobiya sa ilang mga panimalay ug kabtangan. Ang Nagkahiusang Kapunongan mihatag usab og mga pundo aron ipundo sa nagkadaiyang mga buluhaton sa Simbahan, sama sa misyonaryo nga buhat ug mga paningkamot sa pagmantala. Magkat-on kita og dugang bahin sa balaod sa pagpahinungod ug sa mga epekto niini sa mga Santos sa umaabut nga mga leksyon.
Ginagmayng Leksyon 2—Ang Templo sa Kirtland
Pahinumdumi ang mga estudyante bahin sa saad sa Ginoo nga pagatugahan ang mga Santos “uban sa gahum nga gikan sa kahitas-an” sa dihang miabut sila sa Ohio (tan-awa sa D&P 38:32). Dapita ang usa ka estudyante sa pagbasa og kusog sa Doktrina ug mga Pakigsaad 88:119. Hangyoa ang klase sa pagsunod, nga mangita sa sugo nga gihatag sa Ginoo ngadto sa mga Santos. Human nila matino nga ang Ginoo misugo kanila sa pagtukod og usa ka balay, ipasabut nga ang “balay” nga gipasabut sa Ginoo mao ang templo. Ang Templo sa Kirtland mao ang pinakaunang templo nga natukod niini nga dispensasyon.
Dapita ang mga estudyante sa pagpakli sa hulagway sa Templo sa Kirtland diha sa ilang mga kasulatan (Mga Hulagway sa Kasaysayan sa Simbahan, Hulagway 9, “Templo sa Kirtland”).
Ipasabut nga ang pagtukod sa Templo sa Kirtland mikabat og tulo ka tuig. Human mapahinungod ang templo niadtong Marso 27, 1836, gisugdan pagtuman sa Ginoo ang Iyang saad nga pagatugahan ang mga Santos og gahum ug ilang nasinati ang talagsaon nga espirituhanong mga panalangin. Pananglitan, ang Ginoo personal nga mipakita ngadto nila ni Joseph Smith ug Oliver Cowdery didto sa Templo sa Kirtland ug namahayag nga Siya “midawat niini nga balay” (D&P 110:7). Mipadala usab Siya og tulo ka langitnong mga mensahero—sila si Moises, Elias, ug Elijah—aron ipahiuli ang mahinungdanong mga yawe sa priesthood nganhi sa yuta. Kining mga yawe maghatag sa mga Santos og awtoridad sa pagpahigayon sa mga ordinansa sa templo ug sa pagbugkos sa mga pamilya sa kahangturan. Agig dugang, ang “mga yawe sa pagpundok sa Israel” gipahiuli atol niining panahona (D&P 110:11). Isip resulta, ang mga misyonaryo gitawag ug gihatagan og awtoridad sa pagtudlo sa ebanghelyo sa tibuok yuta.
Ginagmayng Leksyon 3—Misyonaryo nga Buhat
Hangyoa ang usa ka estudyante sa pagbasa og kusog sa Doktrina ug mga Pakigsaad 42:6–7. Dapita ang klase sa pagsunod, nga mangita sa sugo nga gihatag sa Ginoo ngadto sa mga Santos human sila miabut sa Ohio. Human mabasa sa mga estudyante ang mga bersikulo, ipangutana ang mosunod:
-
Unsa nga sugo ang gihatag sa Ginoo ngadto sa mga Santos?
-
Sumala sa bersikulo 6, unsaon sa pagsangyaw niining mga misyonaryo ang ebanghelyo?
-
Sa unsang paagi nga kini susama sa paagi kon giunsa pagsangyaw sa mga misyonaryo ang ebanghelyo karon?
Ipasabut nga sa dihang ang Templo sa Kirtland napahinungod ug ang mga yawe sa pagpundok sa Israel napahiuli, ang mga sakop sa Simbahan nagsugod sa pagsangyaw sa ebanghelyo ni Jesukristo sa mas daghang dapit. Dapita ang mga estudyante sa pag-abli sa ilang mga kasulatan ngadto sa Mapa 3 sa seksyon sa Mga Mapa sa Kasaysayan sa Simbahan sa ilang mga kasulatan (“Ang New York, Pennsylvania, ug Ohio nga Dapit sa USA”).
Samtang nagtan-aw ang mga estudyante sa mapa, pahinumdumi sila nga ang Ginoo misaad sa mga Santos nga Iya silang ipadala sa pagsangyaw “taliwala sa tanan nga mga nasud” (D&P 38:33). Ipasabut nga ang Kirtland usa ka ideyal nga dapit sa pagsugod sa pagpadala og mga misyonaryo sa tibuok kalibutan. Ang Kirtland duol sa pipila ka daghang ruta sa transportasyon sa Estados Unidos. Gikan sa Kirtland, ang mga misyonaryo kinahanglan lang nga mobiyahe og mubo nga gilay-on sa pag-access sa mga steamboat sa dagkong mga suba sa Amerika ug sa Lanaw sa Erie. Duna usab silay access sa nasudnong sistema sa kadalanan ngadto sa habagatan ug usa ka sistema sa kanal ngadto sa amihanan. Tungod niini, ang Kirtland mao ang dapit nga gigikanan alang sa mga misyon ngadto sa Canada, sa ubang dapit sa Estados Unidos, ug sa Great Britain.
Ipasabut nga tungod sa misyonaryo nga buhat atol niining panahona, ang mga miyembro sa Simbahan sa tibuok kalibutan milambo sa liboan. Niadtong 1837, sila si Elder Heber C. Kimball ug Orson Hyde gitawag uban sa lima pa sa usa ka misyon ngadto sa Great Britain, diin nakabunyag sila og mga 2,000 ka tawo. Pagka-1838, sa dihang ang mga Santos mibiya sa Kirtland tungod sa pagpanggukod, dunay mga 2,000 ka miyembro sa Simbahan nga nagpuyo sa Kirtland ug dul-an sa 18,000 sa tibuok kalibutan.
Ginagmayng Leksyon 4—Ubang Talagsaon nga mga Pagpadayag ug mga Panghitabo
Dapita ang klase sa pagbasa og hilum sa Doktrina ug mga Pakigsaad 42:61. Kon mahuman na sila sa pagbasa, ipasabut nga human miabut si Joseph Smith didto sa Ohio, gisultihan sila sa Ginoo nga siya “makadawat og pagpadayag ug dugang nga pagpadayag” kon mangayo siya sa Dios. Dapita dayon ang mga estudyante sa pagpakli sa kronolohikanhong han-ay sa mga sulod [content] sa Doktrina ug mga Pakigsaad (nga nahimutang human sa pasiuna). Hangyoa sila sa pagtino sa nahimutangan diin nadawat ang kadaghanan sa mga pagpadayag nga narekord diha sa Doktrina ug mga Pakigsaad. Human nila nadiskubrihan nga kadaghanan sa mga pagpadayag nadawat didto sa Ohio, ipasabut nga ang kaabunda sa mga pagpadayag sa Ohio nakatuman sa pulong sa Ginoo.
Aron mapakita sa klase ang ubang talagsaon nga mga pagpadayag nga nadawat didto sa Ohio, i-assign ang usa o duha sa mosunod nga mga seksyon gikan sa Doktrina ug mga Pakigsaad ngadto sa matag estudyante: Doktrina ug mga Pakigsaad 76; 89; 107; 137.
Alang sa matag seksyon, hangyoa ang na-assign nga mga estudyante sa pagbasa sa pasiuna sa seksyon ug sa pagbasa og daklit ang summary sa seksyon nga nahimutang una pa ang unang bersikulo. Dapita dayon ang matag estudyante sa pag-report kon nganong mahinungdanon ang mga seksyon nga na-assign ngadto nila. Samtang nag-report sila, siguroa nga mahibalo sila sa mosunod:
Doktrina ug mga Pakigsaad 76; 137 (Mga pagpadayag bahin sa tulo ka ang-ang sa himaya ug sa panan-awon bahin sa celestial nga gingharian)
Doktrina ug mga Pakigsaad 89 (Ang Pulong sa Kaalam)
Doktrina ug mga Pakigsaad 107 (Pagpadayag bahin sa priesthood)
Human naka-report ang mga estudyante, ipangutana ang mosunod:
-
Unsa kaha ang gibati sa mga Santos sa Ohio nga makadungog sa pipila niining mga kamatuoran sa unang higayon?
Ipasabut nga agig dugang niining gipadayag nga mga kamatuoran, ang Ginoo misugo usab kang Joseph Smith sa pag-organisar sa pagpangulo sa Simbahan atol nining panahona. Ang Unang Kapangulohan, ang Korum sa Napulog Duha ka mga Apostoles, ug ang Korum sa Seventy opisyal nga naorganisar samtang ang mga Santos nagpuyo sa Ohio. Agig dugang, si Joseph Smith nagpadayon sa iyang buhat sa paghubad sa Biblia.
Ang pagsupak ug apostasiya mipasakit sa mga matinud-anon didto sa Ohio
Human makompleto sa mga estudyante ang kalihokan sa ibabaw, ipasabut nga sa samang higayon nga ang mga Santos gipanalanginan og maayo sa Ginoo didto sa Ohio, gidugangan ni Satanas ang iyang pagsupak batok sa Simbahan. Sa pag-abut gayud sa mga Santos sa Kirtland, ang mga kritiko nga supak sa mga Mormon nagsugod sa pagpangataki sa Simbahan.
Dapita ang usa ka estudyante sa pagbasa sa mosunod nga pamahayag ni Joseph Smith kalabut niining mga kondisyon:
“Daghang sayop nga mga report, mga bakak, ug binuang nga mga istorya, ang gimantala diha sa mga newspaper, ug gipakatap sa tanang direksyon, aron mapugngan ang mga tawo nga mosusi sa buhat, o mohangup sa pagtuo” (sa History of the Church, 1:158).
Ipasabut nga ang pipila niining negatibong mga report gipasiugdahan sa pipila kinsa mibiya sa Simbahan tungod sa nagkadaiyang mga rason. Pananglitan, niadtong Septyembre sa 1831, usa ka kanhi miyembro sa Simbahan nga ginganlan og Ezra Booth ang misulay sa pag-agni sa mga tawo nga dili mopasakop sa Simbahan ug mimantala og siyam ka sulat nga ang detalye sa iyang mga kritisismo bahin sa Simbahan (tan-awa sa Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 203–4; tan-awa usab sa Church History in the Fulness of Times Student Manual, 2nd ed. [manwal sa Church Educational System, 2003], 113–15). Kining mga sulat nakapadugang sa pakigbatok ngadto sa Simbahan. Ang pagpanggukod nga miresulta gikan sa maong mga impluwensya usahay nahimong bayolente, ilabi na ngadto sa Propeta ug sa ubang mga lider sa Simbahan.
Sa usa ka grabe nga insidente, sa gabii sa Marso 24, 1832, usa ka manggugubot nga panon nga dunay 25 ngadto sa 30 ka lalaki nga miataki sa panimalay ni John Johnson sa Hiram, Ohio, diin nag-istar sila si Joseph ug Emma Smith. Nalupig sa kalalakin-an si Joseph Smith ug giguyod siya pagawas atol sa kagabhion. Gituok nila siya, gihuboan siya, ug mipugos sa pagpasulod sa garapa sa asido ngadto sa iyang ba-ba, nga nakatipak sa usa sa iyang mga ngipon, nga maoy hinungdan nga ang iyang sinultihan dunay gamayng taghoy. Dayon gibiyaan nila siya nga napuno sa alkitran ug mga balahibo. Sa dihang si Joseph naulian na og gamay sa iyang kusog mibalik siya ngadto sa balay. Sa dihang miabut siya sa pultahan ug nakita siya ni Emma nga napuno sa alkitran, nga sa iyang tan-aw morag dugo, nakuyapan siya. Ang mga higala migahin sa kagabion nga mitangtang sa alkitran. Pagkasunod adlaw, nga usa ka Dominggo, nagsangyaw si Joseph og wali nga gitambungan sa pipila ka sakop sa manggugubot nga panon. Pagkahuman sa wali, mibunyag si Joseph og tulo ka tawo. (Tan-awa sa History of the Church, 1:261–65.)
Atol sa panlimbasug ug kalibug bahin niini nga pagpangataki, ang pultahan sa balay nagpabiling abli. Isip resulta, ang anak nga lalaki ni Joseph, si Joseph Murdock Smith, kinsa nasakit na og tipdas, natakbuyan og “grabe nga hilanat” ug namatay lima ka adlaw human niana. Nianang sama nga gabii giguyod ang tiil ni Sidney Rigdon gikan sa iyang panimalay. Ang iyang ulo grabe nga nasamad tungod sa gansangon, gahi nga nataran, ug nagdeliryo sulod sa pipila ka adlaw. (Tan-awa sa History of the Church, 1:265.)
Ipsabut nga bisan pa man niini ug sa uban pang mga kalisdanan, nagpadayon ang mga Santos sa pagpundok sa Kirtland, ilabi na gikan niadtong 1836 hangtud sa 1838. Hinoon, ang pagpanggukod nagkagrabe og maayo atol sa tingtugnaw sa 1837 ug sa tingpamulak sa 1838 nga kadaghanan sa mga Santos napugos sa pagbiya sa Ohio. Ang pipila ka mga lider sa Simbahan, lakip na nila ni Joseph Smith, Sidney Rigdon, ug Brigham Young, kinahanglang mopalayo sa Kirtland alang sa kasiguroan sa ilang kinabuhi.
Taposa ang leksyon pinaagi sa pagpamatuod nga bisan kon nakasinati ang Simbahan og grabe nga mga pagsulay ug pagpanggukod didto sa Kirtland, ang Ginoo mipanalangin og maayo niadtong nagpabiling matinud-anon.
Komentaryo ug Background nga Impormasyon
Apostasiya sa Kirtland
Niadtong 1833, laing kanhi miyembro ang nakahatag og dakong problema sa Simbahan. Si Doktor Philastus Hurlbut nahimong usa ka elder sa Simbahan apan na-excommunicate tungod sa pagpanapaw samtang nagserbisyo og misyon. Bisan kon ang mga lider sa Simbahan mipakita kaniya og kalooy ug mitugot nga mahibalik ang iyang pagkamiyembro, nakasala na usab siya ug gipahimulag sa ikaduhang higayon. Si Hurlbut misulay sa pagdaut sa Simbahan ug ni Joseph Smith pinaagi sa pagkolekta og mga affidavit batok sa mga Mormon ug sayop nga nangangkon nga ang Basahon ni Mormon gibase sa usa ka manuskrito nga gisulat ni Solomon Spaulding imbis nga gihubad pinaagi sa gahum sa Dios.
Si Hurlbut nangangkon nga si Sidney Rigdon sikretong nakaangkon sa manuskrito ni Spaulding ug miusab niini uban ni Joseph Smith aron mahimo ang Basahon ni Mormon. Hinoon, kini nga pagsulay sa pagdaut sa Basahon ni Mormon hingpit nga walay basihan. Sa dihang nakit-an ang manuskrito ni Spaulding, usa ka pagsusi mitino nga walay pagkasusama sa Basahon ni Mormon o pagkapareho tali sa duha. Dugang pa, wala pa gani mahimamat ni Sidney Rigdon si Joseph Smith hangtud human namantala ang Basahon ni Mormon. Mipamatuod si Oliver Cowdery sa bakak nga mga pasangil ni Hurlbut: “‘Akong … nagunitan ang bulawang mga palid diin [ang Basahon ni Mormon] gihubad. Nakita usab nako ang mga tighubad [interpreter]. Kana nga basahon tinuod. Si Sidney Rigdon dili maoy misulat niini. Si Mr. Spaulding dili maoy misulat niini. Ako mismo ang misulat niini samtang gidiktar kini sa propeta.’ [Reuben Miller, journal, 1848–1849, Family and Church History Department Archives, 21 Okt. 1848; ang punctuation ug spelling gimoderno.]” (sigun sa gikutlo sa James E. Faust, “Some Great Thing,” Ensign, Nob. 2001, 47).
Ang ubang mga taga-Ohio, nabalaka nga ang mga sakop sa Simbahan sa dili madugay mahimong hilabihan na kadaghan nga makahimo sila og usa ka makabotar nga pundok ug makabaton og politikanhong gahum, mibayad kang Philastus Hurlbut aron dauton si Joseph Smith ug ang Basahon ni Mormon. Si Joseph Smith naguol sa usa ka sulat nga ang mga miyembro sa Simbahan “nag-antus og grabeng pagpanggukod tungod sa istorya sa usa ka tawo nga ginganlan og Doktor Hurlbut kinsa gipapahawa sa simbahan tungod sa malaw-ay ug sa pagkamananapaw nga kinaiya ug sa pagdaut kanato siya namakak sa talagsaong paagi ug gisunod sa mga tawo ang iyang impluwensya ug mihatag kaniya og kwarta aron sa pagguba sa Mormonismo nga mas nakabutang sa peligro sa atong kinabuhi karon” (“Letter to William W. Phelps and Others, 18 August 1833,” 3; tan-awa sa josephsmithpapers.org; ang spelling gi-standardize).
Uban pang kalamboan sa Kirtland
Didto sa Kirtland nga gipadayag sa Ginoo ang daghan bahin sa istruktura sa Simbahan. Ang mosunod nga mga katungdanan sa priesthood gipadayag ato sa panahon sa Kirtland: bishop, high priest, ang Unang Kapangulohan, patriarch, high council, Apostol, ug Seventy.