Niadtong Agosto 17, 1835, usa ka kinatibuk-ang katiguman sa Simbahan ang nag-abut didto sa Kirtland, Ohio, aron sa pagkonsiderar sa gisugyot nga mga sulod sa unang edisyon sa Doktrina ug mga Pakigsaad. Tungod kay si Propeta Joseph Smith mibisita sa mga Santos didto sa Michigan, si Oliver Cowdery ang midumala sa katiguman. Diha sa miting, gikauyonan sa tanang mga Santos ang pagboto sa paglakip sa pamahayag nga gipresentar ni Oliver Cowdery kalabut sa mga gituohan sa Simbahan bahin sa gobyerno ug mga balaod.
Dapita ang mga estudyante sa paghunahuna nga sila nagporma og usa ka bag-ong nasud. Itudlo ang usa ka estudyante nga mahimong usa ka lider niining bag-ong gobyerno. Dapita ang estudyante sa pagdala sa iyang mga kasulatan ngadto sa atubangan sa klase. Pangutan-a ang estudyante nga lider sa mosunod:
Unsa nga mga balaod ang gusto nimong ipatuman sa mga tawo dinhi niining bag-ong nasud? (Mahimo nimong isulat sa pisara ang mga tubag sa estudyante.)
Pangutan-a ang klase:
Unsay inyong hunahuna sa mga balaod nga naestablisar sa inyong lider? Giunsa ninyo sa pagplano ang pagsunod niini?
Unsa kaha ang katuyoan sa usa ka gobyerno?
Ipasabut nga ang Doktrina ug mga Pakigsaad 134 naglangkob og dokumento nga namahayag sa gituohan sa Simbahan kalabut sa gobyerno ug mga balaod. Niadtong Agosto 17, 1835, samtang gihimo ang katapusang mga pagpangandam sa pag-imprinta sa unang edisyon sa Doktrina ug mga Pakigsaad, si Oliver Cowdery midumala sa usa ka kinatibuk-ang katiguman sa mga miyembro sa Simbahan. Iyang gipresentar ang dokumento, ug ang nanambong nga mga miyembro nagkauyon tanan sa pagbotar aron ilakip kini diha sa basahon. Si Joseph Smith ug si Frederick G. Williams, ang Ikaduhang Magtatambag sa Unang Kapangulohan, wala makatambong niining miting. Nagsangyaw sila sa ebanghelyo didto sa estado sa Michigan. Sa ilang pagbalik, mitugot si Joseph Smith nga malakip ang dokumento diha sa Doktrina ug mga Pakigsaad.
Dapita ang estudyante nga lider sa pagbasa og kusog sa pasiuna sa seksyon sa Doktrina ug mga Pakigsaad 134. Hangyoa ang klase sa pagsunod ug mangita kon nganong ang mga Santos mibati nga ang pamahayag gikinahanglang imantala. Hangyoa ang mga estudyante sa pagreport kon unsay ilang makit-an.
Dapita ang usa ka estudyante sa pagbasa og kusog sa Doktrina ug mga Pakigsaad 134:1. Hangyoa ang klase sa pagsunod. Hangyoa ang katunga sa klase sa pagpangita kon si kinsa ang mipasiugda sa ideya sa mga gobyerno ug ang unang katuyoan sa mga gobyerno. Dapita ang laing katunga sa pagpangita sa unsay tulubagon sa mga opisyal sa gobyerno ngadto sa Dios. Hangyoa ang matag grupo sa pag-report kon unsay ilang makit-an. Samtang nagtino ang mga estudyante sa mosunod nga mga kamatuoran, isulat kini sa pisara:
Ang mga gobyerno gipasiugdahan sa Dios alang sa kaayohan sa katawhan.
Ang mga opisyal sa gobyerno may tulubagon ngadto sa Dios sa pagbuhat alang sa kaayohan ug kasiguroan sa katilingban.
Sa unsa nga mga paagi nga ang mga lider sa gobyerno molihok alang sa kaayohan ug kasiguroan sa katilingban?
Dapita ang usa ka estudyante sa pagbasa og kusog sa Doktrina ug mga Pakigsaad 134:2. Hangyoa ang klase sa pagsunod, nga mangita sa tulo ka mga katungod nga kinahanglang panalipdan alang sa matag indibidwal. Sa dili pa mobasa ang estudyante, mahimo nimong ipasabut nga ang pulong nga walay paglapas [inviolate] nagpasabut nga luwas, o wala gisupak.
Sumala sa bersikulo 2, unsa nga mga katungod nga isiguro sa mga pangagamhanan [gobyerno] alang sa ilang mga lungsuranon? (“Ang gawasnon nga paggamit sa tanlag, ang katungod ug pagkontrolar sa kabtangan ug ang proteksyon sa kinabuhi.” Mahimo nimong sultihan ang mga estudyante nga si Presidente Ezra Taft Benson miingon nga ang “kinabuhi, kagawasan, [ug] kabtangan [mao] ang tulo ka dagkong katungod sa katawhan” [“Our Divine Constitution,” Ensign, Nob. 1987, 4].)
Unsa kaha ang gipasabut sa paggamit sa inyong tanlag? Ngano kaha nga importante nga mahimong gawasnon sa paggamit sa inyong tanlag?
Dapita ang usa ka estudyante sa pagbasa og kusog sa Doktrina ug mga Pakigsaad 134:4. Hangyoa ang klase sa pagsunod, nga mangita og lain pang katungod nga kinahanglan panalipdan sa mga gobyerno. (Sa dili pa mobasa ang estudyante, mahimo nimong ipasabut nga ang pulong nga kapangakohan [amenable] nagpasabut og tulubagon ug ang sibil nga mahistrado mao ang usa ka opisyal sa publiko kinsa magdumala sa balaod.) Hangyoa ang mga estudyante sa pag-report kon unsay ilang makit-an.
Ngano kaha nga importante nga ang mga tawo dunay tulubagon ngadto sa Dios, dili sa mga gobyerno, alang sa paagi nga ilang gigamit ang ilang relihiyon?
Unsa kaha ang gipasabut sa pagpugong sa krimen ug pagsilot sa kalapasan nga dili mosulay sa pagpugong sa tanlag o mosumpo sa kagawasan sa kalag?
Dapita ang usa ka estudyante sa pagbasa og kusog sa Doktrina ug mga Pakigsaad 134:3. Hangyoa ang klase sa pagpangita og usa ka butang nga ang mga lungsuranon sa pipila ka mga nasud mahimong makatabang sa pagsiguro nga ang ilang mga lider sa gobyerno motuman sa balaod. (Aron matabangan ang mga estudyante nga makasabut sa bersikulo, mahimong gikinahanglan nimong ipasabut nga ang usa ka republika mao ang usa ka gobyerno diin ang katawhan mopili og mga lider aron morepresentar kanila ug ang usa ka labaw nga kamandoan [sovereign] mao ang labaw nga magmamando, sama sa hari o rayna.)
Sa unsang paagi nga ang “tingog sa mga katawhan” magtinguha ug magpaluyo sa maayong mga lider? (Kon gikinahanglan, ipasabut nga ang mga pulong “tingog sa mga katawhan” nagpasabut sa buhat nga pagbotar alang sa mga lider.)
I-refer ngadto sa estudyante nga imong gitudlo nga mahimong lider sa bag-ong nasud sa sinugdanan sa klase. Dapita ang klase sa pagpili og dugang nga mga estudyante sa pag-abag niining lider. Dayon ipahigayon ang usa ka eleksyon aron ang klase makapili og duha sa mga estudyante kinsa maoy napilian. Dapita kining bag-ong mga lider sa pagdala sa ilang mga kasulatan ug moapil sa unang lider (ang tawo nga imong gitudlo sa sayo pa) diha sa atubangan sa klase. Hangyoa kining tulo ka mga lider sa pagpasabut kon unsa ang ilang nakat-unan mahitungod sa ilang responsibilidad isip mga opisyal sa gobyerno.
Ang mga responsibilidad sa mga lungsuranon gitakda
Hangyoa ang tulo ka mga estudyante nga mga lider sa paglista og pipila ka mga responsibilidad sa mga lungsuranon nga kinahanglang anaa sa ilang bag-ong nasud. Dapita ang usa ka estudyante sa paglista sa ilang mga tubag diha sa pisara. Dayon pangutan-a ang klase:
Unsay inyong hunahuna niining lista sa mga responsibilidad? Unsaon man ninyo pag-usab niining lista?
Dapita ang usa ka estudyante sa pagbasa og kusog sa Doktrina ug mga Pakigsaad 134:5–6. Hangyoa ang klase sa pagpangita sa mga responsibilidad sa mga lungsuranon. (Samtang magbasa ang estudyante, mahimo nimo siyang hangyoon sa paghunong og panagsa aron imong mahatag ang kahulugan sa mosunod nga mga pulong: dili mabalhin [inalienable] nagpasabut sa butang nga dili mahimong kuhaon; pagpanghulhog [sedition] nagpasabut og rebelyon batok sa mga lider sa gobyerno; pagtagad [deference] nangahulugan og pagnunot o pagtuman; mailisan [supplanted] nangahulugan og pagpuli; kapunongan sa kagubot [anarchy] nangahulugan og kawalay balaod—ang pagkawala sa mga lagda ug gobyerno o rebelyon batok sa mga lagda ug sa gobyerno.)
Sumala sa mga bersikulo 5–6, unsa ang atong responsibilidad ngadto sa atong gobyerno? (Kinahanglan mopahayag ang mga estudyante og butang nga susama sa mosunod nga kamatuoran: Kita angay nga mopaluyo ug mosunod sa gobyerno diin kita magpuyo. Ikonsiderar ang pagsulat niini nga baruganan sa pisara. Ipasabut nga kining baruganan naglakip sa gituohan nga ang atong gobyerno nagpatunhay sa mga balaod nga makapanalipod kanato sa atong “tiunay ug dili maagaw nga mga katungod.”)
Hain nga artikulo sa hugot nga pagtuo ang inyong mahinumduman niining baruganan? (Mahimo nimong dapiton ang mga estudyante sa pagbasa o pag-recite sa ikanapulog duha nga artikulo sa hugot nga pagtuo.)
Sa unsang paagi nga kita isip mga lungsuranon mopaluyo ug mosunod sa gobyerno? (Ang mga tubag mahimong maglakip nga kita makasunod sa mga balaod, makaawhag sa uban sa pagsunod, magserbisyo sa komunidad, motahud sa mga opisyal sa gobyerno, ug mobotar.)
Aron matabangan ang mga estudyante nga mahibaloan ang lain pang kamatuoran mahitungod sa pagsunod sa mga gobyerno ug sa mga balaod, ipangutana ang mosunod:
Sumala sa bersikulo 6, unsa ang bation sa Dios bahin sa atong pagkamasulundon ngadto sa balaan nga mga balaod ug mga balaod sa katawhan? (Human makatubag ang mga estudyante, isulat ang mosunod diha sa pisara: Ang Dios gusto nga atong respetuhon ug sundon ang balaan nga mga balaod ug mga balaod sa katawhan.)
Aron matabangan ang mga estudyante nga matubag ang miagi nga pangutana, dapita ang usa ka estudyante sa pagbasa og kusog sa mosunod nga pamahayag ni Elder James E. Talmage sa Korum sa Napulog Duha ka mga Apostoles. Hangyoa ang klase sa pagpaminaw kon unsaon nato pagtratar ang balaod sa yuta kon kini mosukwahi sa atong tinuohan:
Imahe
Elder James E. Talmage
“Kon dunay panagsumpaki tali sa mga gikinahanglan nga gihimo pinaagi sa gipadayag nga pulong sa Dios, ug niadtong gipahamtang pinaagi sa sekular nga balaod, hain niining mga awtoridad ang kinahanglang sundon sa mga miyembro sa Simbahan? …
“Naghulat sa desisyon sa [Dios] agig pagpabor sa relihiyusong kagawasan, katungdanan sa mga santos nga ipaubos ang ilang mga kaugalingon ngadto sa mga balaod sa ilang nasud. Bisan pa man niana, kinahanglan silang mogamit sa kada tukma nga pamaagi, isip mga lungsuranon o ginsakupan sa ilang lain-laing mga gobyerno, sa pagsiguro alang sa ilang kaugalingon ug alang sa tanang tawo sa panalangin sa kagawasan diha sa tulumanon sa relihiyon. Dili kinahanglan nga sila mag-antus nga walay pagprotesta [sa] pagpahamtang pinaagi sa masinupakon sa balaod nga mga manglulutos, o pinaagi sa paggamit og dili makiangayon nga mga balaod; apan ang ilang mga protesta kinahanglan itanyag diha sa legal ug tukma nga pamaagi. Ang mga santos praktikal nga mipakita og pagdawat sa doktrina nga mas palabihon pa nga mag-antus sa dautang mga kahimtang kay sa magbuhat og sayop pinaagi sa tinuyo nga tawhanong pagsupak ngadto sa dili makiangayon nga awtoridad” (The Articles of Faith, 12th ed. [1924], 422, 423]).
Dapita ang mga estudyante sa paghunahuna bahin sa mga tawo nga ilang nailhan kinsa misunod niining mga baruganan sa pagpaluyo ug pagsunod sa ilang gobyerno ug sa balaod. Mahimo nimong hangyoon ang pipila ka mga estudyante sa pagpakigbahin kon sa unsang paagi nga kining mga lungsuranon misunod sa gobyerno. Dayon hangyoa ang mga estudyante sa pagsulat diha sa ilang mga class notebook o mga scripture study journal mahitungod sa butang nga ila mismong buhaton sa pagpaluyo ug pagsunod sa gobyerno ug sa balaod.
I-summarize ang Doktrina ug mga Pakigsaad 134:8 pinaagi sa pagpasabut nga ang mga gobyerno adunay responsibilidad sa pagsilot niadtong nakahimo og mga krimen ug ang mga lungsuranon adunay responsibilidad sa pagtabang “sa pagdala sa mga makasasala batok sa maayo nga mga balaod ngadto sa pagsilot.”
Ang relasyon tali sa relihiyon ug sa gobyerno gihulagway
I-summarize ang Doktrina ug mga Pakigsaad 134:7, 9–10, 12 pinaagi sa pagpasabut nga si Oliver Cowdery misulat nga ang mga gobyerno kinahanglang moestablisar og mga balaod nga mopanalipod sa pagsunod sa relihiyon apan kinahanglang dili sila mopabor sa usa ka relihiyon batok sa uban. Agig dugang, misulat siya nga ang mga relihiyusong katilingban adunay katungod sa pagsilot sa ilang mga sakop nga mga badlungon pinaagi sa pag-excommunicate kanila o pagtangtang sa ilang pakigdait gikan kanila apan ang ingon nga mga katilingban walay katungod sa paghimo og mga paghukom o mopahamtang og mga silot nga mokuha sa kabtangan sa ilang mga sakop o mopasakit nila sa pisikal nga paagi.
Ang katungod sa paghangyo og tabang gikan sa gobyerno gipasabut
I-summarize ang Doktrina ug mga Pakigsaad 134:11 pinaagi sa pagpasabut nga pinasikad niining bersikulo, ang mga lungsuranon kinahanglang tugutan sa pagpangayo sa ilang gobyerno alang sa “pagtul-id” kon sila gibuhatan sa sayop. Ang pulong nga pagtul-id nagpasabut sa paghimo sa usa ka butang nga husto. Ang bersikulo naglakip usab og usa ka pamahayag nga ang mga lungsuranon mahatagan og kaangayan sa pagdepensa sa ilang mga kaugalingon ug sa uban kon adunay usa ka dinalian nga panginahanglan ug ang gobyerno dili makahimo sa pagtabang.
Hangyoa ang mga estudyante sa pagpakigbahin kon unsa ang ilang mapasalamatan sa ilang nasud o komunidad. Ipamatuod ang kaimportante sa pagpaluyo ug pagsunod sa mga gobyerno ug mga balaod.
Si Presidente Howard W. Hunter mihimo sa mosunod nga mga pamahayag:
Imahe
Presidente Howard W. Hunter
“Gitahasan kita sa katungdanan sa pagpaluyo ug pagsunod sa mga balaod sa yuta. Dili matinuoron ang tinuyo nga paglapas sa balaod. Dili kini makahimo og kalainan kon sa unsang paagi ang usa ka tawo mahimong mobati mahitungod sa kamakiangayon o kamakatarunganon sa mga lagda nga naestablisar sa katilingban, katungdanan sa usa ka tawo mao ang pagrespeto ug pagpaluyo sa balaod” (sa The Teachings of Howard W. Hunter, ed. Clyde J. Williams [1997], 164).
Imahe
Presidente Howard W. Hunter
“Ang kinaugalingon [sovereign] nga mga balaod sa estado kinahanglan gayud nga mapaluyohan, ug ang mga tawo nga nagpakabuhi ubos niadtong mga balaod kinahanglan gayud nga mosunod niini alang sa kaayohan sa tanan. Kalabut niini Ang Simbahan ni Jesukristo sa mga Santos sa Ulahing mga Adlaw mihimo og lig-on nga baruganan. Usa sa sukaran nga mga baruganan sa hugot nga pagtuo klaro nga gipahayag niining mga pulong: ‘Kami nagtuo sa kamandoan ubos sa mga hari, presidente, mga magmamando, ug sa mga maghuhukom, sa pagsunod, pagtahud, ug sa paghupot sa balaod’ [Mga Artikulo sa Hugot nga Pagtuo 1:12]” (The Teachings of Howard W. Hunter, 165).