Leksyon 48: Doktrina ug mga Pakigsaad 42:30–42

Leksyon 48

Doktrina ug mga Pakigsaad 42:30–42

Pasiuna

Sa sayong bahin niadtong 1831, kadaghanan sa mga Santos nga nagpuyo sa New York, lakip na ni Joseph Smith, namalhin ngadto sa Ohio aron moapil sa dakong pundok sa bag-ong nabunyagan nga mga kinabig didto. Ang mga lider sa Simbahan nagtinguha og direksyon gikan sa Ginoo mahitungod sa naglambo nga Simbahan. Si Propeta Joseph Smith nakadawat og pagpadayag, nga narekord karon diha sa Doktrina ug mga Pakigsaad 42:1–73, sa presensya sa 12 ka elder. Niini nga pagpadayag, ang Ginoo mipaila sa temporal, ekonomikanhon, ug espirituhanong mga balaod nga naggiya sa mga miyembro sa Simbahan sa pagtabang sa mga kabus, pagpundo sa nagkadaiyang mga gimbuhaton sa Simbahan, ug moabag sa ubang mga Santos nga miabut sa Ohio.

Mga Sugyot alang sa Pagtudlo

Doktrina ug mga Pakigsaad 42:30–42

Gitakda sa Ginoo ang balaod sa pagpahinungod

Sa dili pa magsugod ang klase, paggamit og tape o usa ka marker aron makahimo og linya sa unom ka bildo nga mga baso. Markahi ang linya sa lain-laing gitas-on sa matag baso. Dad-a ang mga baso ngadto sa klase. Dad-a usab ang usa ka pitsel nga dunay sulod nga tubig nga sobra nga ikasulod sa tanang mga baso ngadto sa mga linya nga gimarka diha niini. (Mahimo nimong butangan og koloring ang tubig aron ang mga estudyante sayon ra nga makakita niini.)

Sa pagsugod sa leksyon, i-display ang pitsel. Sultihi ang mga estudyante nga ang tubig nagrepresentar sa tanang katigayunan ug mga kapanguhaan sa komunidad.

Ipasabut nga niadtong Pebrero 1831, ang mga miyembro sa Simbahan sa Kirtland, Ohio, kinahanglang motabang sa pag-atiman sa mga kabus, moabag sa bag-ong mga lumulupyo kinsa nagsakripisyo og maayo aron magpundok sa Ohio, ug motabang sa pagpundo sa pagpadagan sa Simbahan.

Dapita ang usa ka estudyante sa pagbasa og kusog sa Doktrina ug mga Pakigsaad 42:30. Hangyoa ang klase sa pagsunod, nga mangita kon unsay gipadayag sa Ginoo kalabut sa mga kabus.

Unsa kaha ang gipasabut sa “maghinumdom sa kabus”?

Ipasabut nga ang Ginoo misugo sa mga Santos sa pagpahinungod sa ilang mga kabtangan sa pagsuporta sa mga kabus. Isulat sa pisara ang pulong nga magpahinungod. Hangyoa ang mga estudyante sa pagpamalandong sa mosunod nga pangutana:

Unsa kaha ang ipasabut sa magpahinungod?

Isulat sa pisara ang mosunod nga kahulugan sa pulong nga pagpahinungod, nga gihatag ni Elder D. Todd Christofferson sa Korum sa Napulog Duha ka mga Apostoles. Mahimo nimong isugyot nga isulat sa mga estudyante kini nga kahulugan diha sa margin sa ilang mga kasulatan tupad sa bersikulo 30.

“Ang pagpahinungod mao ang paggahin o paghalad og usa ka butang nga ingon ka sagrado, gihalad alang sa balaanong mga katuyoan” (“Mga Hulagway sa Gipahinungod nga Kinabuhi,” Liahona, Nob. 2010, 16).

Sa unsa kaha nga paagi nga kining kahulugan dunay kalabutan sa buhat sa paghatag og butang sa pagtabang niadtong nanginahanglan?
Unsaon ninyo sa pag-summarize ang sugo sa Ginoo diha sa bersikulo 30 kalabut sa mga kabus? (Bisan kon ang mga estudyante mahimong mogamit og lain-laing mga pulong, ang ilang mga tubag kinahanglan magpakita sa mosunod nga doktrina: Ang Ginoo nagsugo kanato sa pag-atiman sa mga kabus ug niadtong nanginahanglan. Isip kabahin niini nga panaghisgot, mahimo nimong dapiton ang mga etudyante sa pagribyu sa Doktrina ug mga Pakigsaad 38:16, 34–36.)

Ipasabut nga ang Doktrina ug mga Pakigsaad 42 naglangkob og mga baruganan sa usa ka balaod nga gitawag og balaod sa pagpahinungod. Aron matabangan ang mga estudyante nga makasabut niining sukaranang mga baruganan, dapita ang usa ka estudyante sa pagbasa og kusog sa mosunod nga pagpasabut ni Presidente Marion G. Romney sa Unang Kapangulohan:

“Ang sukaranang baruganan ug ang kapaangayan alang sa balaod sa pagpahinungod ‘mao nga tanan nga ania kanato Iya sa Ginoo; busa, ang Ginoo mahimong motawag kanato alang sa bisan unsa ug sa tanan nga kabtangan nga anaa kanato, tungod kay kini Iyang gipanag-iya. … D&P 104:14–17, 54–57J. Reuben Clark, Jr., sa Conference Report, Okt. 1942, p. 55)” (“Living the Principles of the Law of Consecration,” Ensign, Peb. 1979, 3).

Pahinumdom: Ang mosunod nga leksyon nga maggamit og mga butang usa ka pagpayano sa balaod sa pagpahinungod ingon nga kini anaa sa Simbahan hangtud sa mga 1833. Human niining higayuna, ang Simbahan miusab sa naandang gibuhat. Dunay pipila ka mga hugna sa pagbuhat sa balaod sa pagpahinungod ug sa mga kausaban sa naandang gibuhat sa misunod nga mga katuigan.

Dapita ang unom ka estudyante sa pagduol sa atubangan sa kwarto. Hatagi ang matag usa kanila og walay sulod nga baso. Sudli ang mga baso og tubig gikan sa pitsel. Sudli ang usa ka baso ngadto sa linya nga imong gihimo diha niini, butangi ang tulo ka baso og tubig ibabaw sa mga linya nga imong gihimo, ug butangi ang duha sa ubos sa mga linya nga imong gimarkahan. Ipasabut nga ang matag baso nagrepresentar sa usa ka pamilya ug nga ang linya sa matag baso nagrepresentar sa mga panginahanglan ug sa matarung nga mga tinguha niana nga pamilya. Ang mga baso nga dunay tubig nga ubos sa linya nagrepresentar sa mga pamilya nga walay igong kwarta o mga butang nga mosuporta sa ilang mga panginahanglan.

Dapita ang usa ka estudyante sa pagbasa og kusog sa Doktrina ug mga Pakigsaad 42:31. Hangyoa ang klase sa pagsunod, nga mangita sa unang lakang nga kinahanglang buhaton niining mga Santos aron makasunod sa balaod sa pagpahinungod.

Alang niining mga Santos, unsa man ang unang lakang sa pagsunod sa balaod sa pagpahinungod? (Ang ilang mga butang “ihatag diha sa atubangan sa obispo [bishop] sa simbahan ug sa iyang mga magtatambag.” Sa lain nga pagkasulti, kinahanglan nilang ipakita ang ilang kaandam nga mopahinungod sa ilang kwarta ug kabtangan ngadto sa Simbahan.
Kinsa ang girepresentaran sa bishop? (Ang Ginoo.)

Sa pagrepresentar sa mga miyembro sa Simbahan nga nagpahinungod sa ilang mga kabtangan ngadto sa Simbahan, hangyoa ang unom ka estudyante sa pagbu-bu sa tubig gikan sa ilang mga baso ngadto sa pitsel. Dapita ang usa ka estudyante sa pagbasa og kusog sa Doktrina ug mga Pakigsaad 42:32, ug hangyoa ang klase sa pagpangita sa ikaduhang lakang nga kinahanglang buhaton niining mga Santos aron makasunod sa balaod sa pagpahinungod.

Ipasabut nga ang matag pamilya nakigtambayayong sa bishop ug nakadawat sa unsay gitawag nga usa ka “pagkatinugyanan” (D&P 42:72). Nagpasabut kini nga ang matag pamilya gisaligan og kabtangan ug mga kapanguhaan gikan sa Ginoo. Ang mga pamilya dunay pribadong pagpanag-iya sa kabtangan ug mga kapanguhaan nga ilang nadawat, ug kinahanglan nilang gamiton ang ilang kabubut-on sa pagdumala sa ilang pagkatinugyanan. Isip mga tinugyanan sa kabtangan ug mga kapanguhaan sa Ginoo, sila dunay tulubagon ngadto kaniya ug hingpit nga responsable alang sa unsay gisalig Niya ngadto kanila.

Ibu-bu ang tubig gikan sa pitsel, nga mopuno sa matag baso ngadto sa linya niini.

Aron matabangan ang mga estudyante nga makasabut kon giunsa paggahin sa bishop ang mga kapanguhaan ngadto sa mga pamilya, hangyoa ang usa ka estudyante sa pagbasa og kusog sa Doktrina ug mga Pakigsaad 51:3. Hangyoa ang klase sa pagsunod, nga mangita kon giunsa sa bishop (kinsa niining sitwasyuna mao si Edward Partridge) pagtudlo og bahin ngadto sa matag pamilya. Mahimo nimong isugyot nga isulat sa mga estudyante ang D&P 51:3 diha sa ilang mga kasulatan tupad sa Doktrina ug mga Pakigsaad 42:33.

Giunsa sa bishop pagtudlo og bahin ngadto sa matag pamilya? (Ang paggahin sa mga bahin gibase sa mga kahimtang, tinguha, ug panginahanglan sa matag pamilya.)

Dapita ang laing estudyante sa pagbasa og kusog sa Doktrina ug mga Pakigsaad 82:17. Hangyoa ang klase sa pagsunod, nga mangita kon giunsa sa Ginoo paghimong sarang sa tinguha ug panginahanglan sa usa ka tawo. Mahimo nimong isugyot nga isulat sa mga estudyante ang D&P 82:17 diha sa ilang mga kasulatan tupad sa Doktrina ug mga Pakigsaad 42:33.

Sumala niining bersikulo, unsay gipangayo sa Ginoo sa katawhan kinsa mipadayag sa ilang tinguha ug panginahanglan ngadto sa bishop? (Kinahanglang makiangayon sila, o, sa laing pagkasulti, patas ug matinuoron.)

Ipakita sa mga estudyante ang tubig nga nahabilin diha sa pitsel. Dapita ang usa ka estudyante sa pagbasa og kusog sa Doktrina ug mga Pakigsaad 42:33–36. Hangyoa ang klase sa pagsunod, nga mangita kon unsay gisugo sa Ginoo nga buhaton sa mga Santos sa gipahinungod nga kabtangan nga salin human nga ang mga pagkatinugyanan gigahin na.

Unsa ang gisugo sa Ginoo nga buhaton sa mga Santos sa salin nga kabtangan, o sa “nahibilin”? (Kinahanglan nila kining gamiton sa pagtabang sa mga kabus, mopundo sa mga building sa Simbahan, ug motabang sa mga miyembro nga nanginahanglan.) Unsa kaha ang girepresentar sa pitsel niining mga bersikulo? (Ang balay tipiganan.)
Sa unsang paagi nga ang pagpahinungod makatabang sa pag-atiman sa mga kabus ug niadtong nanginahanglan.
Sa unsang paagi nga ang pagpahinungod mahimong usa ka panalangin ngadto sa Simbahan?
Unsa kaha ang lisud bahin sa pagsunod sa balaod sa pagpahinungod?

Dapita ang usa ka estudyante sa pagbasa og kusog sa Doktrina ug mga Pakigsaad 42:38. Hangyoa ang klase sa pagsunod ug mangita og usa ka baruganan nga gitudlo sa Ginoo kalabut sa pagbuhat og maayo ngadto sa uban.

Unsa nga baruganan ang gitudlo sa Ginoo mahitungod sa pagbuhat og maayo ngadto sa uban? (Ang mga estudyante kinahanglang mopahayag nga sa pagbuhat nato og maayo ngadto sa uban, ato kining gibuhat ngadto sa Ginoo. Isulat sa pisara kini nga baruganan.)
Sa unsa kaha nga paagi nga kining kamatuoran nakatabang sa mga Santos nga andam nga mopahinungod sa ilang mga kabtangan? Sa unsang paagi nga ang paghinumdom niining kamatuoran makatabang kaninyo?
Kanus-a kamo mibati nga nagserbisyo kamo sa Ginoo samtang nagbuhat kamo og butang aron makatabang sa uban?

Dapita ang usa ka estudyante sa pagbasa og kusog sa Doktrina ug mga Pakigsaad 42:40–42. Hangyoa ang klase sa pagsunod, nga mangita sa mga kinaiya nga kinahanglang mabatunan sa usa ka tawo aron makasunod sa balaod sa pagpahinungod. (Aron matabangan ang mga estudyante nga makasabut kon sa unsang paagi nga ang bersikulo 40 magamit sa ilang kinabuhi, mahimong kinahanglan nimong ipasabut nga ang Ginoo wala magpaabut kanato nga maghimo sa atong kaugalingong sinina. Hinoon, gusto Niya nga kita hapsay ug limpyo sa atong pamustura.

Sa Doktrina ug mga Pakigsaad 42:42, ang pulong nga tapulan nagpasabut og taspukan. Ngano kaha nga lisud alang sa tapulan nga tawo ang pagsunod sa balaod sa pagpahinungod?

Bahina ang klase ngadto sa grupo nga dunay tag-duha o tag-tulo ka estudyante matag usa. Ipasabut nga bisan kon wala kita gisugo sa pagsunod sa balaod sa pagpahinungod sa samang paagi sa pagsunod sa nag-unang mga Santos, ang balaod epektibo gihapon karon. Dapita ang matag grupo sa pagbasa og kusog sa mosunod nga pamahayag ni Presidente Spencer W. Kimball, nga maminaw kon unsa ang kahulugan niini alang kanato karon sa pagsunod sa balaod sa pagpahinungod. Dapita dayon ang mga miyembro sa matag grupo sa paghisgot sa ilang mga tubag sa mga pangutana nga nagsunod sa pamahayag. (Mahimo nimong isugyot nga ang mga estudyante mosulat niini nga pamahayag diha sa margin sa ilang mga kasulatan duol sa bersikulo 30.)

“Ang pagpahinungod mao ang paghatag sa panahon, mga talento, ug kapanguhaan aron sa pag-atiman niadtong nanginahanglan—ma-espirituhanon man o ma-temporal—ug sa pagtukod sa gingharian sa Ginoo” (“Welfare Services: The Gospel in Action,” Ensign, Nob. 1977, 78).

Unsa ang pipila ka paagi diin ang usa ka tawo sa inyong palibut mahimong nanginahanglan (gawas sa pinansyal)?
Unsa nga panahon, mga talento, ug kapanguhaan nga anaa kaninyo nga inyong magamit aron sa pagtabang niadtong nanginahanglan?
Kanus-a kamo napanalanginan sa usa ka tawo kinsa mihatag og panahon, mga talento, o kapanguhaan aron sa pagtabang kaninyo?

Taposa pinaagi sa pagpakigbahin sa imong pagpamatuod bahin sa mga baruganan nga gihisgutan niini nga leksyon.

Komentaryo ug Background nga Impormasyon

Doktrina ug mga Pakigsaad 42:30–34. Ang balaod sa pagpahinungod

Si Presidente Joseph Fielding Smith mipasabut nga “ang Nagkahiusang Kapunongan, o balaod sa pagpahinungod, wala mag-ingon nga ang tapulan mokaon sa hinaguan sa mamumuo. Samtang ang tanang tawo makigbahin sa tanang butang nga anaa kanila ngadto sa tanan ug walay manghinubra kay sa lain, sa gihapon ang tanan kinahanglan gayud nga mohatag og serbisyo ug maghago alang sa kaayohan sa tanan” (Church History and Modern Revelation, 2 vols. [1953], 1:205).

Doktrina ug mga Pakigsaad 42:30–34. Ang balaod sa Ginoo sa pagpahinungod gitandi ngadto sa sosyalistikanhong mga programa

Ang uban misugyot nga ang pagbuhat sa balaod sa pagpahinungod ug ang sistema sa nagkahiusang kapunongan usa lamang ka relihiyusong matang sa sosyalismo o komunismo. Ang uban nangangkon nga usa kini ka kalamboan gikan sa ekonomikanhong mga pilosopiya sa panahon ni Joseph Smith o gikan sa mga eksperimento sa pagpahinungod sulod sa bag-ong relihiyon. Ang maong mga panghunahuna sayop. Sa mas bag-ohay nga panahon si Presidente Marion G. Romney sa Unang Kapangulohan milatid sa gipadayag nga sistema bahin sa nagkahiusang kapunongan:

“(1) Ang cornerstone sa Nagkahiusang Kapunongan mao ang pagtuo diha sa Dios ug ang pagdawat kaniya isip Ginoo sa yuta ug ang tigpasiugda sa Nagkahiusang Kapunongan.

“(2) Ang Nagkahiusang Kapunongan giimplementar pinaagi sa boluntaryo nga mga lihok sa mga tawo base sa gawasnong kabubut-on, nga makita pinaagi sa pagpahinungod sa tanan nilang kabtangan ngadto sa Simbahan sa Dios. …

“(3) … Ang Nagkahiusang Kapunongan gipadagan base sa baruganan sa pribadong pagpanag-iya ug indibidwal nga pagdumala. …

“(4) Ang Nagkahiusang Kapunongan dili politikanhon. …

“(5) Ang matarung nga katawhan usa ka nag-unang panginahanglan ngadto sa Nagkahiusang Kapunongan. …

“Ang Nagkahiusang Kapunongan mopalambo sa kalidad sa kinabuhi sa kabus ug mopaubos sa adunahan. Diha sa proseso ang duha mabalaan. Ang kabus, nga makagawas gikan sa pagkaulipon ug sa makauulaw nga mga limitasyon sa kawad-on, makahimo isip gawasnong mga tawo sa pagkab-ot sa ilang hingpit nga potensyal, sa temporal ug sa espirituhanong paagi. Ang adunahan, pinaagi sa pagpahinungod ug sa pagpakigbahin sa ilang sobra alang sa kaayohan sa kabus, dili sa pinugos nga paagi apan sa andam nga paagi isip usa ka buhat sa gawasnong kabubut-on, nagpakita niana nga gugmang putli alang sa ilang mga isigkatawo nga gihulagway ni Mormon isip ‘ang tiunay nga gugma ni Kristo.’ (Moro. 7:47.)” (sa Conference Report, Abr. 1966, 131).

Si Presidente J. Reuben Clark Jr. sa Unang Kapangulohan miingon: “Ang Nagkahiusang Kapunongan wala kaayo masabti. … Dili [kini] usa ka sistemang komunal. … Ang Nagkahiusang Kapunongan ug ang komunismo dili pareha” (sa Conference Report, Okt. 1943, 11).

Si Presidente Romney mipasabut nga kinahanglan natong dawaton ang personal nga responsibilidad sa pag-atiman sa mga kabus ug sa mga timawa: “Niining modernong kalibutan nga puno sa mga pangontra sa plano sa Ginoo, kinahanglan nga dili gayud kita malingla ngadto sa paghunahuna nga matangtang kanato ang atong mga obligasyon ngadto sa mga kabus ug nanginahanglan pinaagi sa pagpasa sa responsibilidad ngadto sa pipila ka panggobyerno o uban pang pampublikong ahensya. Pinagi lamang sa boluntaryong paghatag og buhong nga gugma alang sa atong mga silingan nga atong mapalambo kana nga gugmang putli nga gihulagway ni Mormon isip ‘ang tiunay nga gugma ni Kristo.’ (Moro. 7:47.)” “Caring for the Poor and Needy,” Ensign, Ene. 1973, 98).

Si Presidente Clark mihimo sa mosunod nga mga pamahayag bahin sa kwarta nga libreng gipanghatag sa gobyerno:

“Ang paghatag niining hilabihan ka daghang kwarta nga libreng gipanghatag nakamugna diha sa mga hunahuna sa gatusan ka liboan—kondili minilyon—ka mga tawo … og gugma alang sa pagkatapulan, usa ka pagbati nga ang kalibutan nakautang kanila og panginabuhian. Nakamugna kini og kahimtang alang sa labing makahugno nga politikanhong mga doktrina nga nakagamot sukad, … ug sa akong hunahuna mahimong modala kini kanato ngadto sa grabe nga politikanhong kasamok” (gikutlo diha sa Marion G. Romney, “Church Welfare Services’ Basic Principles,” Ensign, Mayo 1976, 121).

“Walay tawo nga dunay katungod sa usa ka kinabuhi sa pagkatapulan, bisan pila pay iyang edad. Wala gyud ko makakita og usa ka linya sa Balaang Kasulatan nga nag-awhag, o gani nagtugot niini. Sa nangagi walay gawasnong katilingban nga nakasuporta og dakong mga pundok diha sa pagkatapulan ug nagpuyo nga gawasnon” (sa Conference Report, Abr. 1938, 107).

Doktrina ug mga Pakigsaad 42:30–34, 54–55. Unang komunal nga mga sistema sa wala pa ang pinadayag bahin sa balaod sa pagpahinungod

Atol sa panahon ni Joseph Smith, pipila ka pundok sa mga tawo ang misulay sa pagporma og komunal nga mga sistema diin ang grupo nakigbahin sa pagpanag-iya sa tanang katigayunan ug mga kapanguhaan. Sa wala pa ang pinadayag bahin sa balaod sa pagpahinungod, ang pipila ka miyembro sa Simbahan didto sa Ohio miestablisar og ingon nga pundok. Ang pipila sa ilang gipangbuhat dunay problema:

“Sa dihang si [Joseph Smith] miabut sa Ohio [iyang] nadiskubrihan ang usa ka pundok nga dunay mga singkwenta ka tawo kinsa miestablisar og kalihokan sa usa ka kooperatiba base sa ilang interpretasyon sa mga pamahayag diha sa basahon sa Mga Buhat, nga naghulagway sa unang mga Santos nga naghiusang nag-ambit sa tanang butang (tan-awa sa Mga Buhat 2:44–45; 4:32). Kini nga pundok, nga nailhan isip ‘ang pamilya,’ … mga miyembro sa Simbahan nga nagpuyo sa umahan ni Isaac Morley duol sa balangay sa Kirtland. Sa dihang miabut si John Whitmer sa tunga-tunga sa Enero, nakabantay siya nga unsay ilang gibuhat nakamugna og daghang problema. Pananglitan, si Heman Bassett mikuha sa relo nga isulod sa bulsa nga gipanag-iya ni Levi Hancock ug mibaligya niini. Sa dihang gipangutana kon ngano, mitubag si Heman, ‘Ah, abi nako nga iya ‘tu sa pamilya.’ Mitubag si Levi nga dili siya ganahan sa maong ‘binuhatan sa pamilya’ ug dili na makaantus pa niini. [Levi W. Hancock, “Levi Hancock Journal,” LDS Historical Department, Salt Lake City, p. 81.]”

“Si Propeta Joseph … nakaamgo sa panginahanglan sa pag-establisar og mas perpekto nga sistema sa pagtubag sa nagkadako nga ekonomikanhong mga panginahanglan sa Simbahan. Nagkinahanglan og kwarta aron ipundo sa nagkadaiyang mga buluhaton sa Simbahan, sama sa pagmantala sa mga pinadayag ug mga pamphlet sa misyonaryo. … Ang kwarta, mga butang, ug kabtangan gikinahanglan sa pagtabang sa mga kabus ug sa pag-abag sa mga namalhin nga nagsakripisyo og dako nga magpundok sa Ohio, busa nangutana si Joseph sa Ginoo” (Church History in the Fulness of Times Student Manual, 2nd ed. [manwal sa Church Educational System, 2003], 95).

Ang pagpadayag nga girekord diha sa Doktrina ug mga Pakigsaad 42, nga mipadayag sa balaod sa pagpahinungod, mao ang usa sa pipila ka pagpadayag nga miabut agig tubag sa pangutana ni Joseph.

Doktrina ug mga Pakigsaad 42:34, 55. Ang balay tipiganan sa bishop

“Niadtong 1831 gipadayag sa Ginoo ngadto ni Propeta Joseph Smith nga ang mga miyembro sa Simbahan kinahanglang ‘[mo]hatag sa [ilang] mga butang ngadto sa kabus, … ug kini ihatag diha sa atubangan sa obispo … [ug] pagatipigan diha sa akong balay tipiganan, sa pagpangalagad sa kabus ug timawa’ (D&P 42:31, 34).

“Sobra sa 180 ka tuig human niana, ang mga balay tipiganan sa mga bishop sa tibuok kalibutan nagpadayon sa pagsuporta sa panawagan nga ‘pagmatinud-anon; barug diha sa buhatan nga [g]itudlo [sa Ginoo] nganha [kanila]; tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang’ (D&P 81:5).

“Ma-building man kini nga dunay sulod nga pagkaon ug ubang mga suplay o hugpong sa mga kapanguhaan diha sa ward nga makuhaan sa bishop, mga balay tipiganan sa mga bishop nga gigamit aron pag-atiman niadtong nanginahanglan.

“Ang manwal sa Simbahan, ang Basic Principles of Welfare and Self-Reliance (2009), nag-ingon, ‘Ang balay tipiganan sa Ginoo magamit sa matag bishop ug anaa sa matag ward. Sukwahi sa naandang kahibalo, ang balay tipiganan sa Ginoo dili limitado ngadto sa usa ka building o bodega nga puno sa mga butang nga magamit nga andam ipang-apud-apud.’

“Kon walay aktwal nga building nga tipiganan, ang mga bishop mahimong mopalit og gikinahanglang mga butang nga magamit gikan sa lokal nga namaligya gamit ang mga halad sa puasa” (Bishops’ Storehouse Opens the Windows of Heaven,” Church News and Events, Mayo 20, 2011, LDS.org).