Doktrina ug mga Pakigsaad 24–29:30 (Unit 7)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 24–29:30 (unit 7) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 24–26)

Pinaagi sa tambag sa Ginoo ngadto ni Joseph Smith ug Oliver Cowdery mahitungod sa pagtubag sa mga pagsulay, nakat-unan sa mga estudyante nga kinahanglan kita nga mopailub ug molahutay sa atong mga kasakit tungod kay ang Ginoo nag-uban kanato. Samtang gitun-an sa mga estudyante ang tambag sa Ginoo ngadto ni Emma Smith mahitungod sa iyang tahas diha sa Simbahan, ilang nahibaloan ang pipila ka mga baruganan ug mipili og usa nga ilang tutokan nga magamit sa ilang kaugalingong mga kinabuhi. Sa katapusan, natun-an sa mga estudyante ang pamahayag sa Ginoo nga ang tanang butang kinahanglan himoon pinaagi sa komon nga pagtugot diha sa Simbahan ug ikonsiderar kon sa unsang paagi nga mas makatuman pa sila sa ilang mga pasalig sa pagsuporta niadtong kinsa natawag ug gi-sustain sa pagserbisyo diha sa ilang mga ward o mga branch.

Day 2 (Doktrina ug mga Pakigsaad 27)

Samtang gitun-an sa mga estudyante ang Doktrina ug mga Pakigsaad 27, ilang nakat-unan nga samtang moambit kita sa sakrament, kinahanglang hinumduman nato ang maulaong sakripisyo ni Jesukristo. Nakat-unan usab nila nga kita nagpuyo sa dispensasyon sa kahingpitan sa panahon, nga naghiusa sa tanang yawe sa ebanghelyo, mga ordinansa, ug mga kamatuoran sa nangaging mga dispensasyon. Aron makasugakod sa kadautan sa atong panahon, giawhag ang mga estudyante sa pagsul-ob sa tibuok nga taming sa Dios.

Day 3 (Doktrina ug mga Pakigsaad 28)

Gikan sa tambag sa Manluluwas ngadto kang Oliver Cowdery, nakat-unan sa mga estudyante nga sa Simbahan ni Jesukristo, ang matag indibidwal nga mga miyembro dili makadawat og pagpadayag sa pagdirekta sa usa ka tawo kinsa nagdumala nga labaw kanila ug bugtong ang Presidente sa Simbahan ang makadawat og pagpadayag alang sa tibuok Simbahan. Hinoon, mahimo kitang makadawat og pagpadayag alang sa ato mismong kaayohan ug sa pagtabang kanato diha sa mga calling ug mga assignment nga gihatag. Nakat-unan usab sa mga estudyante nga ang mga lider sa Simbahan adunay responsibilidad sa pagkorihir niadtong kinsa mipahisalaag sa uban ug diha sa Simbahan ni Jesukristo, ang tanang butang kinahanglan gayud nga buhaton sa kahan-ay.

Day 4 (Doktrina ug mga Pakigsaad 29:1–30)

Gikan sa instruksyon sa Manluluwas bahin sa Ikaduhang Pag-anhi ug sa mga panghitabo nga mosunod sa Milenyum, nakat-unan sa mga estudyante nga kadtong kinsa moduol sa Manluluwas maandam alang sa mga pagsulay ug mga kalisdanan sa katapusang mga adlaw ug makadawat sa kinabuhing dayon. Kini nga leksyon nakatabang usab sa mga estudyante nga makasabut nga tungod kay si Jesukristo miula alang sa atong mga sala ug mao ang atong manlalaban ngadto sa Amahan, makabayaw kita sa atong mga kasingkasing ug magmaya.

Pasiuna

Kini nga leksyon maghatag sa mga estudyante sa usa ka oportunidad nga mapalawman ang ilang panabut sa kaimportante sa pagsul-ob sa tibuok nga taming sa Dios. Samtang nagkat-on ang mga estudyante sa matag piraso sa taming sa Dios, sila adunay oportunidad sa pagtimbang-timbang sa kalig-on sa ilang taming ug makahimo og kausaban sumala sa pag-aghat sa Espiritu Santo.

Mga Sugyot alang sa Pagtudlo

Doktrina ug mga Pakigsaad 27:15–18

Ang Ginoo nagmando sa Iyang katawhan sa pagsul-ob sa tibuok nga taming sa Dios

Pagdala diha sa klase og pipila ka matang sa pangproteksyon nga ekipo, sama sa pangproteksyon nga ekipo sa sports, mga safety glasses, mga gwantes sa medikal, usa ka helmet sa konstruksyon, o usa ka pangproteksyon nga vest. Hangyoa ang mga estudyante sa pagpasabut sa katuyoan sa ekipo ug sa unsang paagi nga kini makapanalipod sa nagsul-ob. Ipasabut nga samtang kining mga butanga pisikal nga makapanalipod kanato, ang Ginoo naghatag og tambag sa pagtabang kanato nga mapanalipdan sa espirituhanon nga paagi.

Dapita ang usa ka estudyante sa pagbasa og kusog sa Doktrina ug mga Pakigsaad 27:15. Hangyoa ang klase sa pagsunod, nga mangita kon unsay gisulti sa Ginoo nga kinahanglan gayud natong buhaton aron mapanalipdan sa espirituhanon nga paagi.

Unsa ang kinahanglan natong buhaton aron mapanalipdan sa espirituhanon nga paagi?
Sumala niining bersikulo, unsa ang gisaad sa Ginoo niadtong kinsa mosul-ob sa tibuok nga taming sa Dios?

Isulat ang mosunod nga baruganan diha sa pisara: Kon atong isul-ob diha sa atong kaugalingon ang tibuok nga taming sa Dios, makasugakod kita sa dautan.

Ngano kaha nga importante nga isul-ob ang tibuok nga taming sa Dios ug dili lang ang usa ka bahin niini?

Dapita ang usa ka estudyante sa pagbasa og kusog sa Doktrina ug mga Pakigsaad 27:16–18. Hangyoa ang klase sa pagsunod ug motino sa matag piraso sa espirituhanon nga taming nga kinahanglan natong isul-ob aron makasugakod sa dautan. Dapita ang usa ka estudyante nga magsilbing tigsulat ug maglista (o magdrowing) sa mga piraso sa taming diha sa pisara samtang gitino kini sa klase. (Mahimo nimong ipasabut nga si Apostol Pablo mitudlo usab mahitungod sa tibuok nga taming sa Dios [tan-awa sa Mga Taga-Efeso 6:11–17].)

Aron matabangan ang mga estudyante nga makasabut sa kaimportante sa espirituhaton nga panalipod nga gihulagway dinhi niining mga bersikulo, bahina ang klase ngadto sa gagmay nga mga grupo ug i-assign ang matag grupo sa usa sa mga piraso sa taming. Hatagi ang matag grupo og usa ka kopya sa mosunod nga pamahayag ni Presidente Harold B. Lee ug sa mosunod nga impormasyon ug mga pangutana kalabut sa gi-assign nga piraso sa taming ngadto kanila. Dapita ang mga estudyante sa pagtinabangay diha sa ilang mga grupo sa pagtubag sa mga pangutana nga gi-assign diha sa ilang piraso sa taming ug mangandam sa pagpakigbahin sa ilang mga tubag uban sa klase.

“Naangkon nato ang upat ka bahin sa lawas nga giingon ni Apostol Pablo nga [mga] pinakatumong nga bahin sa mga pwersa sa kangitngit. Ang mga bat-ang [hawak], nagsimbolo sa hiyas, kaputli. Ang kasingkasing nagsimbolo sa atong kinaiya. Ang atong mga tiil, atong mga tumong o mga katuyoan sa kinabuhi ug ang katapusan ang atong ulo, ang atong mga panghunahuna” (Harol B . Lee, Feet Shod with the Preparation of the Gospel of Peace, Brigham Young University Speeches of the Year [Nob. 9, 1954], 2).

“Bat-ang [nga] gibaksan uban sa kamatuoran” (tan-awa sa D&P 27:15–16):

Miingon si Presidente Lee, “Ang bat-ang mao kanang parte sa lawas taliwala sa gusok ug hita diin inyong mailhan ang mahinungdanong mga organ nga may kalabutan sa pagpasanay” (Feet Shod, 2). Ang pagbakus nagpasabut sa hugot nga pagkahigut sa usa ka bakus.

Ngano kaha nga si Satanas moataki sa atong kalunsay, hiyas, ug kaputli?
Sa unsa kaha nga paagi nga ang pagkasayud sa sumbanan sa Dios para sa moralidad makatabang kanato nga magpabilin nga lunsay, mahiyason, ug putli?

Ang mga tabang sa pagtuon sa kasulatan nakatabang nga kita mabaksan sa kamatuoran ug nakatabang sa pagpanalipod sa kamatuoran ug kaputli.

“Taming sa pagkamatarung” (D&P 27:16):

Sumala ni Presidente Lee, unsa ang gipanalipdan sa taming sa pagkamatarung [breastplate]?
Sa unsa kaha nga paagi nga ang pagkamatarung sa atong mga kasingkasing (atong mga tinguha) makaimpluwensya sa atong abilidad sa pagpakigbatok sa atong espirituhanon nga mga gubat?

“Mga tiil hinapinan uban sa pagpangandam sa ebanghelyo sa kalinaw” (D&P 27:16):

Ang “hinapinan” ninyo nga tiil nagpasabut nga nagsul-ob og sapatos o proteksyon sa inyong mga tiil.

Sumala ni Presidente Lee, unsa ang girepresentar sa atong mga tiil?
Sa unsang paagi nga si Satanas moataki sa atong mga tumong ug mga katuyoan sa kinabuhi?
Unsa ang nahatag sa Dios ngari kanato nga “gunitan” aron sa pagtabang kanato nga magpadayon ang atong mga tiil sa pagsubay sa dalan sa kinabuhi paingon sa atong mga tumong? (Tan-awa sa 1 Nephi 8:24.)
Sa unsang paagi ang pagtutok sa matarung nga mga tumong ug katuyoan makatabang kanato sa pagbuntog sa tintasyon?

“Ang panagang sa hugot nga pagtuo” (D&P 27:17):

Unsa kaha ang gipasabut sa “makasagubang sa tanan nga nagdilaab nga mga pana [mga tintasyon] sa dautan”?
Sa unsang paagi nga ang inyong pagtuo nakapanalipod ug nakaprotekta kaninyo?

“Ang kalo nga puthaw sa kaluwasan” (D&P 27:18):

Sumala ni Presidente Lee, unsay napanalipdan kon tabunan ang atong ulo?
Nganong importante man nga mapanalipdan ang atong mga hunahuna?
Unsaon ni Satanas sa pag-ataki sa atong mga hunahuna?
Unsa ang piho nga mga butang nga atong buhaton aron sa pagprotekta sa atong mga hunahuna?

“Ang espada sa akong Espiritu” (D&P 27:18):

Sa unsang paagi nga ang Espiritu makatabang kanato sa pagbuntog sa mga pagpang-ataki ni Satanas?
Unsay binhata nga mahatag kon ang Espiritu anaa kanato diha sa atong pagkig-away batok sa dautan?
Sa unsang paagi nga ang pulong sa Dios makatabang kanato sa paggamit sa espada sa Espiritu?
Unsay inyong mabuhat aron mas madapit pa ang Espiritu diha sa inyong kinabuhi?

Human ma-report sa mga estudyante ang ilang mga tubag, basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles, ug hangyoa ang mga estudyante sa pagpaminaw kon unsaon nato pagsul-ob ug paglig-on sa taming sa Dios:

“Gusto nakong hunahunaon nga kini nga espirituhanong hinagiban dili usa ka tibuok nga piraso sa metal nga gihulma aron mohaum sa lawas apan mas sama sa usa ka ginagmayng kinadena nga puthaw. Ang usa ka kinadena nga puthaw naglangkob og mga puthaw nga gitapot aron ang mogamit niini sayon rang makalihok nga dili mawad-an sa panalipod. Makaingon ko niana tungod kay kasinatian na nako kini nga wala kitay dako ug mahinungdanong butang nga mahimo aron maarmasan ang atong kaugalingon sa espirituhanong paagi. Ang tinuod nga espirituhanong gahum nag-agad sa daghang ginagmay nga lihok nga gisapid pinaagi sa hilo sa espirituhanong pagpalig-on nga mopanalipod ug mosagang sa tanang dautan” (“Be Strong in the Lord,” Ensign, Hulyo 2004, 8).

Unsa ang pipila ka gagmayng buhat nga, inubanan sa kalig-on niini, makatabang kanato nga mapanalipdan batok sa tintasyon ug dautan?

Dapita ang mga estudyante pagbalik og tan-aw sa pasiunang mga linya sa Doktrina ug mga Pakigsaad 27:15.

Unsa nga kinaiya ang angay natong batunan kon kita mosul-ob sa taming sa Dios? (Kinahanglan atong “ipataas ang [atong] mga kasingkasing ug magmaya.”) Nganong kinahanglan nga aduna kita niini nga kinaiya?
Unsa nga scripture mastery passage ang inyong nakat-unan niining semanaha nga nagtambag usab kanato sa pagpataas sa atong mga kasingkasing ug magmaya? (D&P 25:13. Ikonsiderar ang pagdapit sa mga estudyante nga magdungan sa pag-usab niini o i-recite kini gikan sa panumduman.)
Sa unsang paagi nga ang pagsunod sa mando sa Doktrina ug mga Pakigsaad 25:13 sa paghupot ngadto sa atong mga pakigsaad uban sa Langitnong Amahan makapanalipod kanato gikan ni Satanas?

Hangyoa ang mga estudyante sa pagkonsiderar sa unsay ilang nakat-unan sa leksyon karon, ug dapita sila sa pagpili og usa ka piho nga butang nga ilang mahimo aron mas makasul-ob sa taming sa Dios. Awhaga sila sa pagsulat kon unsay ilang buhaton diha sa usa ka piraso nga papel nga kanunay nilang matan-aw isip usa ka pahinumdom sa ilang pasalig.

Sa pagtapos niining leksyon, dapita ang pipila ka mga estudyante sa pagpakigbahin sa ilang pagpamatuod sa mga kamatuoran nga natudlo niini nga leksyon.

Sunod nga Unit (Doktrina ug mga Pakigsaad 29:31–50; 30–35)

Unsa ka daghan ang mga anak sa Langitnong Amahan nga gisalikway sa langit didto sa kinabuhi sa wala pa dinhi sa yuta? Nganong gisalikway sila? Unsay gipasabut sa “pag-ayag sa kanasuran”? Sa sunod nga unit, ang mga estudyante makakat-on sa mga tubag niini nga mga pangutana. Makakat-on usab sila bahin sa unang mga miyembro sa Simbahan nga gitawag aron sa “pag-ayag sa mga kanasuran pinaagi sa gahum sa Espiritu” (D&P 35:13).